القائمة الرئيسية

الصفحات

رواية اسرار قدس الفصل العاشر 10 بقلم زينب ماجد

رواية اسرار قدس الحلقة العاشرة 10 بقلم زينب ماجد
رواية اسرار قدس الجزء العاشر 10 بقلم زينب ماجد
رواية اسرار قدس البارت العاشر 10 بقلم زينب ماجد
رواية اسرار قدس الفصل العاشر 10 بقلم زينب ماجد

رواية اسرار قدس الفصل العاشر 10 بقلم زينب ماجد



عطـر مـن جلبت بيكـم بلايـة جفـوف
(لـ كرار اياد)

قدس : تاخذني خطواتي لبيت اهلي والهوى يرد بيه اردود
كلبي اتزلزل بمچانه .. صاب الوجع بطني والخوف التف عليّ من كل مجان

تكربت ليهم واني اتخيل
مروان يطلع يشوفني ويكضبني يحز نحري
يوسف لو عمار .. لو امي ؟
شراح يكلولي وشراح اجاوبهم
اريد اتذكر شاتفقت ويا خطاب اكللهم
من الخوف كل الجان على بالي طار .. كامت اجدامي وحدة تلف بوحدة .

دخلت البيت سمعت صوت امي الدوانية : هاي ياهي

كام يوسف ونهلة طلعت من المجاز صرخت : قدسسسس

بسرعة التفيت بيها وحضنتها ابجي
وهي تصرخ : وين جنتي يولي .. وين مشيتي صارلنا يومين ندورج ووووينج

طلعت امي ويوسف كضبني من راسي : وين جنت ولج ويامن شاااااردة

دفعته نهلة عني وهلتني وراها انهدت امي ومروان علي صياح ومكاون ويسالون وين جنتي واني ابجي ولابدة بسد نهلة ما احس الا دفرة وتجيني من وراي كسرت ضلعي صرخت وكضبتي عمار : صارلج يومين شاررررردة ولج.. اكو وحدة تشرد من رجلها وين جنتي احجييييي

كام يجر براسي وتناوب وياها عمار ويوسف
ولوني وليه وامي تكلهم : هاي مالت ذبح البت التشرد وتضل بالشوارع يومين وما تلفي نحز اركبتها ونفتك منها

كلهم يصارخون ونهلة تحاول تفاككني منهم
اريد كلمة تطلع مني وابرر جن الساني انكص وما يطلع منه غير الصراخ

عمار يطك ويوسف يجر و مروان يدفر وبين رجليهم طحت .. ذبت روحها عليه نهلة وكامت تعاركهم وعمار كضب براسي يكلها : هاي الا نكص راسها يلا نخلص من عارها .. اليوم اذبحها اليوووووم

كامت نهلة تصرخ وبناتها وكعن عليه واني اصريخي ماله والي

بالزور سحبتني من اديهم وفوتتني بالقرفة
كمت اكح بقوة واريد بس اتنفس من الجتل الاجلته ريتي تسممت .. اختنكت واني اكح من كل صدري .. زوعت على صفحة وهم يتصايحون

سركت الباب علي نهلة وخلت صياحهم ليقاد
شوي فتحت الباب امي : اكعدي احجي وين جنتي ترا اخوتج عزموا اعلى جتلت احجي

- يمه ما اندل انا ما عرف البيت وخت ابو وهب ونسوانه كضبوني رادوا يحركوني وشردت والله يمة رادوا يحركوني ذبوا عليه نفط

-بس ابو وهب يكول ردت اكربها دفعتني وشردت

- جذاب والله يمه جذاب ، خطاب نطى مي لمرته لحابسها واميرة فتنت يمه وكلتله قدس واني والله ما نطيتهم جتلني وراد يكربني بالزور خفت منه وطلعت من القرفة اشرد تكاون هو وخطاب

- خطاب شنهو سالفته وياج

- ما عرف .. عليج الله يمه لا ترجعيني اله والله يمه يذبحني اني ارضى اضل خدامة لاخوتي بس لا ترجعيني لبيت ابو وهب ابوس ايدج يمه

- ابو وهب جاي بالطريق لو عرفت صدك رايدات يحركنج ما اردج بس طلع حجيج جذب

- هو ما جان بالبيت من رادن يحركني تكاون هو وخطاب وطك ابنه جيلة وشالاه للمستشفى

- ياهو الطك ابنه جيلة ؟

- هو ابو وهب

نهلة : عمة شني باعيها البت لاكيها بالشارع حرام عليكم شنهو ابو وهب واطي قدس

امي : صارلج يومين من طلعتي منهم وين جنتي

- ما اندليت ارجع خذاني واحد ابو مخضر ذبني بسوك ابغداد قاد واحد اشترالي جبة وشحاطة زعم شردت مفرعة

- وشلون وصلتي البيت لو ما تندلين

- اندل خان سعيد الليشترون منه اخوتي ما اندل قيرة كلت للزلمة وصاله يومين يدور خان سعيد وين صاير لحد ما جابني له كتله بيتنا بالجول طلع يدور بالجول لما دحكت بستانكم من ابعيد

- عجل ليش ما نزل وياج الزلمة

- اني كتلو رجلي ارهابي وراد يكتلني وشردت واريد اصل لهلي كالي اوصلج بس ما ادخل ولا تجيبين اسمي اخاف على عائلتي

- تفتنين على رجلج ولج انت شنهو من بنية مو حكه لو جا وحز راسج

- يمه بيتو زنزانة يعذب بيها عياله وحريمة يمه والله الواحد ما يطيق يعيش عندو ارضى اضل خدامة هين بس ما اردلو

- مو هي اعلى كيفج

- اجتل روحي لو رديت

- وجتلت الضلوع وجوع الربوع

حجتها وكامت مني
لميت روحي وكعدت عدل واني اجر بشعري من وجهي والفه .. تكربت مني نهلة : احجيلي الصدك خاطر اوكفلج يولي اخوتج عازمين اعلى ذبحتج .. وين جنتي .

- اني ما حجيت لامي الصدك فد انت احجيلج فد لا تعوفيني

- احجي يمعزاية كليلي شصار وياج

جاي تحجي فاتت مرت اخوي صيحت نهلة : حيل بيج وابو زايد ولو حطوج وكتلوج فلا افزعلج زعم عسرة وتستاهلين اليجرالج اكو بت تهد رجلها وتطلع

- رادوا يحركوني والله

- وين كاعدين ويحركن بت شنهي مالهن رداد تايهة ويحركونج غير تجين ليجاي تعلمينه خاطر نفزع وننعل ابوهم

- ما اندليت اجي ما عرف

- ومنين تعرفين طالعة ماشية شو حدج للمراح واتردين وهم لو وصلتي يطلعولج الغمان يدكفخون فوك راسك من امداج وامدا حظج يمعثرة لا حظج مثل النسوان وطحتيلج باهل ينشد بيهم الظهر ولا طحتيلج بزلمة زين من امده بختج يولي

قمتني وكامت تمشي للبيت
تلومونها صارلها يومين ما اندلت البيت هو ياهو العماها للببنية ياهو الما يخليها تتعدى البستان منين تعرف الدرب وترد

شنهي كله الكم
واحدكم شاد زنبيله علينا وصاير عنتر بن شداد اذبح واصلخ الزلمة الحوك بيكم يرد الشايب العايب الطيتوها اله تلاكوه ما يدبر يكرب بت بيوت سواله سالفة وجتلها وخلا البت تشرد بريشها

ردتها امي : يمعثووة عليش ما تنطمين البت دافعة زلمتها وشاردة ما سمعتيها

- لا والله ما سمعت كالتلج طلعت من الحجرة مو من بيته خلي عدج بكلبج رحم بتج هاي مو عدوتج نسوانه متكابلات عليها ورايدات يحركنها زعم يعرفن مالها ام تفزعلها ولا اخوة اليطلعولها من وراج انت الخليتيهم يستحكرونها يوم الاطيتيها عروس بطرك العباية

بت وريدة وعيون الله عليها لا صفكة لا هلهولة لا فرحة ذبيتيها بدين هالشايب ما خفتي ربج شلون ترضاه .. شلون روحها تريده عيشتيها بجول وتذبيها بجول

على صياح نهلة وهوستها اخوتي سكتو
وامي كامت تجيب منا وترد منا ما تعرف تجاوبها وركبت حكي بروسهم

اخير شي كالتلها : اسمعي عمة وحك القران لو اجا ابو وهب ورديتيها بعد الصار لا اخذ البت واطر بديرة ما عاتبتها رجل واخفيها عنكم واردها لاهلها .

بسكم خافوا الله بيها بت جرتوا ما جرتوه فوك راسها كافي .. مطيتها عطية لشايب لا زفة لا هلهولة لا صفكة .. منهوبة معيوبة شبيها

سكتت البيت كله عني
ارتحت .. وضليت لفة روحي بالجرجف وكاعدة
واتامل بنهلة توكفلي واطلكني من ابو وهب وافتك منه .. ساعتها اذا طلكني لو عرف اهد اهلي واشرد اتزوج خطاب اسويها ولا اصل بالضيم طول عمري بس كوني افتك .

ضلت كلمة من حجيها براسي ( اخذها عنكم واردها لاهلها ) شني تاخذني وتردني لاهلي عجل اني وين ؟

بس خطاب جان اهم فكرة براسي
عاشرته بس يومين وهاليومين هو صار اهلي بيها واهلي صاروا قرب (غرب)

اريد شي ياخذني منهم ويذبني عنده
واضل اكمل عمري وياه ... يستخسرون بيه اعيش متهنية ويا زلمة يناسبني ويحبني ازود من الشايب ابو وهب ؟

ليقاد اجا ابو وهب يصركع ويهوس واذبحها واجتلها .. وكفتله امي : البت طلعت شاردة من نسوانك ما شاردة منك عليش ما كتلنا بهالحجي

- وانت شنهو تحاسبيني احط نعالي فوك روسكم وغصباً ما عنكم اخذها

- البت صالها يومين مضيعة دربها وما تندل ونسوانك ذابتت عليها نفط ورايدات يحركنها عجل انا اطيتها الك امانة خاطر هيج تعمل بحالها ؟

- البت هاي تجذب وجاي تسد جذبتها بجذبة على نسواني على ابو رادن يحركنها خاطر لا احد يسالها وين جانت .. لجن تالله لا ما احط راسها تحت جدمي واسحكها واعلمها الخوف شلونه ... وينها طلعيها

- البت مرعوبة وحالها ما يسر خلها

- ما اخلها هسه اخذها واردها

- انت يوم الاخذتها كتلي تسويلها صفكة وهوسة غاد وين الزفة ؟ انا طاوعتك واطيتها الك بعباتها بس حجيك وينو من ماخذها لا غرفة نوم عروس لا نيشان لا مهر ولا زفة وفوك منها نسوانك يريدن يحركنها ..

- تريدين مني مهر وفلوس يوساااام انا وهب اطلبين علي فلوس ابت لو ازت انعالي يكع اعلى ١٠٠ من زينة النسا واحلاهن

- انا لا اطيتها الك بفلوس ولا كتلك على مهر يوم الطلبتها مني كتلك كبعها واخذها بس سويلها زفة كتلي غاد اسويلها صفكة وفرحة .

- مو انا التفرضين عليه اوامرج ولو ردت اسوي والما اسوي انا الاعرف انت شنهو وتحاسبيني وينها

نهلة : البت ما تجي

-المرة مرتي واخذها يمتى ما يجي ابالي

- من كونها مرتك وبوصايتك عليش ما حميتها من نسوانك من ترسنها نفط ورادن حركتها

- نسواني ما حاركاتها والبت تجذب طلعوها

- مالها طلعة لو حاولت تتعدى البيت وماكو زلم التوكفك عد حدك لا وحك بخت محمد اصيرلك بالف زلمة واردك منين ما جيت

صاحت عليها وسام ما رضت نهلة
كاموا يتصايحون بيناتهم وابو وهب يهدد ويريد يهد على نهلة وعمار ويوسف يجرونه ونهلة ما وفرت كلمة ما جتها وذبتها على ابو وهب

لحد ما هد البيت وكال الهم (هينة )

من رد ابو وهب وما كدر ياخذني
حيل فرحت اول مرة ابو وهب ينرد وما يكدر يفرض دوره على البيت

ضليت عد اهلي اتعافى
يوم ويومين واسبوع .. ومر الاسبوعين
حيل فرحت كلت : خلصت من ابو وهب
اهلي راح يجبروه يطلكني وافتك منه

بديت اشتاك لخطاب
طلعت من هالبيت بحال .. ورديت بحال
طلعت وانا متمنية اسم رجال اخلف منه جاهل صقيرون ..

رديت وانا كلبي محمل بعشك واحد قير الرضيت بيه ... جان بالي خالي هساه خيال خطاب ما يفاركني ..

ول بابا
يحيلي وبعد حيلي
وجلمات المحبة التطلع من ثمه عشكها كلبي وطبعت بيه .

شلون اوصله ؟
وشلون راح احجي وياه مرت اللخ
اذكر شلون جان يجي الفجر يدحج علي
وين جان عكلي وما فهمته
رحت فتنت عليه وضيعته مني .

قمضت عيوني استشعر اللحظات الجان يكربني بيها احس جانت حبم مو حقيقة .. مستحيل انا عشت هيج لحظات .. اديه حضنو احساسه شعوره حت صوت الهمس والنفس استشعره .

اطلع للمراح ارجع للبيت اتذكر كل لحظة عشتها وياه واتمنى اردلها واضل عايشة بشعوره .

من بعد اسبوعين
اجانا خطار .. ياهو ؟
يكولون خالنا .. انا لا يعمري سمعت بخال ولا شفتو

واكفة بالمطبخ واسمع حسه يسلم على خواني واحد واحد .. لفيت الربطة عدل وكلت خل اروح اسلم ما طوله خالي

فتت الهول اسلم : ها شلونك خالي

دحج : ياهي ؟

وسام : قدس ما تتذكرها ؟

ضل يدحج بوجهي : هلا يابه

بس لا سالمني ولا مدلي ايدو مثل خواني
حجت امي : امشي غاد حضري الغدا ويا نسوان اخوتج يلا

- زين يمه
- رحت واني اسأل : اكلج ليش عودن عرف خواني وما عرفني؟

- هو سلم عليج ؟

- اي فد ما اعرف ما احسو سلم

-عيفج منه يلا اكضي ويانا الغدا يلا

كمت اثرم بالبصل واحط بالجدر واذب الثوم والفاصولية واكللها : تدرين قاد يم بيت ابو وهب الاكل عدهم بالكحط

- عليش ؟

- هو والحاجة اختو اكبر جلوفة ما يرضون يطبخون تمن .. فد مركة واذا سوينا تمن لازم ولاها لبن ما مرك

- شهالعيشة شيكضون المرك شرب

- لا قموس بالخبز

ضحكت : يمعثرات حظج كملي يولي

- هو شعدا جا شيريد

- امج رايدة ترد للموصل بعد ما ابو وهب توعدلها جيف ما اطتج

- بس خاف ياذينا

- وهالتريد خوانج يروحون ويا

ما افتهمت شي !
المهم كملت القدا وياهم عد ما ردت اكعد ع السفرة اتقدا وياهم امي اشرتلي براسها ، اجيت عدها : ها يمه ؟

- اخذي صحنج ودخلي اكلي وحدج

-عليش ؟

- مثل ما اكلج

خذيت صحني وفتت جوا ما كابلت خالي
تعودت ما اهتم لجحد امي وياي وتفريقها الي عن اخواني .

كعدت اكل بلا ما اهتم
اسمعهم يحجون ويسولفون وخالي يكلهم بيت فلان وبيت فلان اذكر سامعة هاي الاسماء بالموصل قاد بس ما اتذكرهم شيعودولنا

ظهرية وطافية الكهرباء وكاعدين بالهول هم يسولفون اجت الكهرباء : صاحت امي ( قدسسسس)

- ها يمة

- كومي اترسي المبردات بالعجل

- زين يمه

طلعت جريت الصوندة وترست مبردة الهول وباكي المبردات مال البيت لحد ما خلصت رجعت للقرفة .. اول ما دخلت هوى المبردة لفح بوجهي .. تنفست حيل واني اغمض عيوني والشعور يعود بيه لخطاب

بالمرتين الاجا وكربني بيهن جانت المبردة معلوكة .. عد بيت ابو وهب من هد عليه بالليل وراد يكربني وابيت ابو علي صاحبه هم جنت سابحة وهوى المبردة بالقرفة يدور .. صار عكلي كل ما سمع صوت مبردة لو اشتم هواها يرد بيه لذاك الشعور من جنت بين اديه .

تمددت ع الوسادة اتذكره
جرت عيوني .. حيل كمت اتمناها احس بروحي ما انتمي لكل الاماكن بكثر ما انتميله وكل الحياة مالها طعم بدونه .. اكل اشرب انام اسولف ويا نسوان اخوتي شعور حيل ممل من هو ماكو .. اني اريده هو ما اريد اهلي.

ضليت متمدد واني تايهة بافكاري
سمعتهم كلهم هدوا ماكو صوت
كمت من مكاني طلعت اطمش عليهم شفتهم كلهم نايمين .. المسجل يم راس مروان خذيته ورحت دخلت للقرفة .. دحكت لكيت كاسيتات مكتوب ( حسام الرسام )

هو مو هذا الاسم الكال عليه خطاب وقنالي عليه
حطيت الكاسيت وشقلت المسجل .. طلع صوت عالي نصيته بسرعة .. وضليت ادحج وراي خاف كعدوا .. بس محد كعد هم زين

رجعت عليته شوي
كلماتها ( مدري شبية يا ربي لمن فاركت حبي حسيت الشمس غابت حسيته وكف ) الصوت كلش حلو والاغنية كمت اوصفها على خطاب .. تخلص وارجعها اسمعلها ....

مدري شبيه فهموني
بعد ما اشوف بعيوني
طريقي وين دلوني رجعوني على حبي
كلمات كمت اشوف روحي بيها كل الاريده اعرف كلشي وارجعله .

ضليت اكلب الظهرية كلها واسمع باقاني هذا المطرب .. واسمعلهن
سمعت بغداد
لو رايد تنساني
من زعلك من بجاك

فد ماكو القنية القناها الي ما موجودة شكثر دورت ما لكيتها .

كعد عمار واني اسمع بالمسجل فتح الباب : شجاي تسوين ؟

-فد اسمع بيه

-دعوفي وكومي سويلنا جاي

- اخذه وياي بالمطبخ ؟

- اخذي بس كومي

- خوش
شلت المسجل رحت اسويلهم جاي واسمع من زعلك من بجاك ... اجت عبير بت مروان اخوي تتمركص يمي على صوت المسجل

اني واكفة اصف الاستكاين
طب مروان لكى بته تركص على اقنية من زعلك من بجاك كام يضحك ويكلها ( اي بعد ابوج حيل شد )ويفتح اديه ويركص وياها ويقني

اشتقل وادحج عليهم واضحك
طب عمار كام يهز ركبة ويركص ويندارلي : كملتي

- هسه فد يتخدر

اندار عني وهو يهز ركبة ويطك اصبع ويصيح : يا بويه لو لاكيته والله لهجم بيته .

كمت ادحج عليهم وهم يركصون ويا الجهال واضحك خلصت الجاي مروان خذا المسجل وكام يطلع اقاني بيه كله حسام الرسام

اني يمكن سامعته كبل هذا المطرب بس ما انتبهت عليه ولا حبيته الا من خطاب قناله

كعدوا يشربون جاي العصر
حجت نهلة : قدس

- ها

- تمشين وياي نحوش الكوجة ونجي

- خوش

كمت منهم خالي حجه ويا امي : راح ترديها لزلمتها وتكفين شره لو شنهو

من حجاها واني طالعة كضبت بنهلة وكتلها : فد اسمع

- عود الحكينا

- خوش خوش روحي واني اجي وراكم

وسام : نسوانه رايدات يحركوها وهي بس يجي طاري رجعتها تصيح دخيلكم شسوي

- من وراه هالسالفة راد واحد من ولدج انتحاري وراح تعمين على ولدج من وراها

- ما اكدر اطي واحد من ولدي وهالصحتك تاخذ عمار ويوسف يمك خاطر اكله مشو لخوالهم ما ضل غير مروان وعائلته وهذا عده عائلة ما يكدر يطي روحه

- شلون ما اشوف راح ادولبين روحج بهالسالفة .

- انا ما اريد منك غير تاخذ عمار ويوسف وياك هالفترة وتخليهم يمك وانا اشوف حل ويا ابو وهب

- اطلكيها ؟

- لو ما رادته شلون ونسوانه رادن يحركوها هم ترد تشرد منه ونرجع ندورها بكل مكان وما نلكاه وذيج الهوسة وذيج الطلابة

- ولو ما رضى يطلكها

- انا ما كتله طلكها .. كتله ما ترضى ترد ونهلة التكاونت وياه

- انا ما رايد اتاخر فتحي عينج زين يوسام ابو وهب جلب والجلب ارحم منه بسج حاطة ركبتج واركاب عايلتج بيده زمان اول راح وذاك النظام ولى لا اظلين تحت ايده وحكمه

شفت عمار طلع
بسرعة تعدلت وسويت روحي ادنج للصوندة اجرها : وين رايحة

- نهلة تريدني احوش وياها الكوجة

- ورايحة بلا عباة

- حت هي راحت بلا عباة

- فوتي شد العباية وروحي لا اطلعين هيج

- وهو ياهو يشوفني بهالجول

- تسمعين لو لا

دخلت للبيت اخذت عباة قديمة من البوفية توزرت بيها وطلعت للزرع حصدنا سلال الكوجة وجبناهن الغروب .. لكينا عمار ويوسف وخالي ما هم رايحين بس يوسف ضال

نسوان اخوتي مسويات عشا
ونهلة راحت تتقوسل يم الحوض سالتها : صدك ابو وهب رايد واحد من اخواني لعملية انتحارية ؟

- عمت عينه عده كون ولد ما يطي بيهم جاي على عمتي تعاي انطيني واحد من ولدج يروح شهيد .. ولو جانها الشهادة لله عجل يابه ليش ما يروح هو ينفذ العملية ويصبح شهيد ؟

اكلها ملايكة الله تبتلي بيه غاد ونفتك منه احنا

- راح يطلكني لو لا

- عليش ادكين ع الطلاك يمكموعة ؟ عليش اجيبين الحجي لروحج سكتي وخلينا نحير بسالفة الانتحاري هاي وعود بعدين ننظر بامرج ست قدس

سكتت
ومشيت للمطبخ لكيتهن مسويات العشا بتيتة وبيض وجاي كعدنا نتعشى الكل هدوء .. محد حجه تحس كل واحد سوالفه بكلبه ويحجي بروحه ما ويا البصفه .

كضينا كلشي
رحنا نمنا على وكت ..
من الفجر كعدت رحت للمراح فتحت الباب للدجاج ونثرتلهن الحنطة .. وطلعت الصخول والهوش وحطيت طوس الماي يوردن

ردت اكعد يمهن واسمع بالمسجل حلالي
مشيت لقرفة مروان فتحتها على كيفي مقلين بيها فانوس ومنصينة .. دحكت المسجل يم راس مروان وهو نايم يم مرته وبناته نايمات.. فتت على كيفي خذيته وطلعت من القرفة

خذيت المسجل ورحت للمراح حطيته وعليته على اقنية ( مدري شبيه ) وكاعد ارعى بصخلاتي وانظف المراح

كام المسجل وحده يمشي بالاقاني واني ادندن وياهن وانظف .. فجأة طفى حس المسجل انداريت عليه خاطر اشوف عليش طفى

فزيت من شفت ابو وهب الطفاه
من الفزة عو جاي امشي تعثرت واني ادحج بيه : ااااا ان اني اروح اني انده

- اششش وين جنتي ولج

- اكل لامي اجيت

- تعاي جاي وين شردتي مني ولج .. ويامن

- ما ويا احد اني فد ضعت ما اندليت اهلي بالزور وصلت فد اكلك

جرني من ثيابي : اذا ما راح تمشين وياي وتكليلي طاعتك وامرك ابجي دم على زمانج .. انا ريسان خلك وحدة مثلج تعصي اوامري

- اروح انده امي

جرني من ثوبي : دحجي هين ديري بالج مني
شنهو ؟ .. ديري ... بالج ... مني
افتهمتي

- اي

- امشي صيحي امج ياااااله

مشيت للبيت اركض انردمت بالباب
صاحت نهلة : يا ستار من هالصباح تترادمين شجاج

- ابو وهب اجا
احجي بخوف ورهبة وادي وجسمي كلهن يرعشن

- لا هله ولا مرحبا .. روحي كعدي عمتي

رحت لقرفة امي : يمه يمه يمه

- ها هااا شجالج وياي

- يمه ابو وهب اجا

دحكت علي : شافج

- اي يكلي اذا ما تردين وياي ابجيج على زماني يمة عليج الله ما اريد اروح

- وشصخم وجهج وطلاعاج وحيدج ؟

- فد رحت اورد الحلال وانظف المراح صاير سيان اني ادري الكي يمه عليج الله لا تخلي ياخذني

- وخري عني شو وخري

كامت من مكانها
لكيت مروان طالع كبل امي
رحب بيه بالاستقبال ... وطلعتله امي
كعدوا مدري شحجوا جوا ونسوان اخوتي كضن الريوك ودته ( بيداء) وردت تكلي ( عمتي تكول تعاي تريكي )

- لا لا ما اروح ما اريد
ما رحت

رد مروان صاح علي : قدددددس

ما رديت
فد اكل باظافيري وادحج من الخوف والعيون مدمعة .. اجا يصيح : هيييي وينج

- ما اروح فدوة ما اريد

- يولي لا تتعايرين امشي اتريكي يريدج

- ما اريد عليك الله

- امشي لا تخلين خلكي يطلع بهالصباح
مشيت وياه دخلت الدوانية صاحت امي : تعاي بسج هالعيارة اكعدي تريكي

هو ما دحج بيه
كعدت جدام الصينية وعيني تراقبه تجاهلني حجه ويا امي : عمار ويوسف شعدهم راحو ويا خالهم ؟

وسام : رايدهم عمال عده بناء جم شهر ويردون ما يطولون الولد هم كبروا ويريدون يعرسون وحال ما يكفي

- شعجب بهالوكت راحو

- ما بيها شعجب جا عليهم وخذاهم

- ومن يمتى هو عده حاجة وياهم لو يحاجيهم ما شايفهم اسنين

- بعد اجا ورادهم على شغل وهم كيفو

- بيها الخير

كام ياكل ولكمته ها كبرها بحلكه يلوج بيها ... انا ادحج بيه بخوف عرف انا جاي اطمش عليه .. رفع عينه بخزرة علي وكال : عليش ما تاكلين

بسرعة خذت خبزة ومديت ايدي
حجه ويا امي : هذا الاسبوع انا راح اطلع للاردن .. عد ما ارجع ما اريد الدلال زايد .. تعكلين بتج وتعلميها طاعة رجلها

- اخذها وخلها زوجة هين .. لا تحطها ويا نسوانك

- مو انت التعلميني وين احطها ووين اخليها

- نسوانك رايدات يحركوها

- وحركنها ؟

- شردت قير

- هالافلام الهندية ان جانها تعبر عليج ما تعبر علي .. ارد من الاردن وخلني اشوف واحد يعصالي امر الا اكسر ظهره

بسرعة كمت من مكاني ورحت للقرفة
شكثر جنت متاملة امي ترده بس من شفت ضعفها جدامه وهو يامر وينهي كرهت روحي
بجيت لحد ما داخ راسي
مالي سند اسند روحي اله واخلي يخلصني منه
لا هو يفك مني ولا اهلي ينشد الظهر بيهم ويخلوه يطلكني .. ولو عرف احرك روحي ولا اردله

من راح
توسلت بامي حجيت بجيت ما اهتمتلي تكلي : شو وخري عني انا كلبي خلصان

رحت لنهلة كالت : ويلي اشكثر تنعثلين دكافي كنالج ما تردين .. هسه رديناج زور وبجيتي كل هالبجى رجعة ما ترجعين لو ياخذج هين لو ما تروح

- حتى هين ما اريده ما احبه

- هسه الله كريم بس فكينا ترا ذبحتينا

سكتت منها
بس كلبي خايف منه ..
امي متخوفة من سكوته وكت الدرى اخوتي راحو الخالي تكول ( ما حجه بسالفة الانتحارية وما كالي شنو الوضع وسكوته هذا يخوف )

ورى يومين من روحته للاردن
جنت كاعدة الفجر وحيدي .. خذيت المسجل ورحت لامراح .. واني انظف شفت ارتال امريكية اجت صوبنا

انا اعرف امي واخوتي ارهابية
وبيتنا مرتع ارهاب كل مرة يريدون يتفقون على عملية يجون لبيتنا ينظمون شغلهم .. ويجهزون السيارة اليريدون يفخخونها

جنت ما اعرف ليش يسون هيج
بس بعدين نهلة سولفتلي هاي السيارات يذبوها بنص الناس يفجروها .. بس ضل مكانه مخفي محد يعرفه جول لا احد مر بينا ولا احد كربنا من سقط النظام ولهسه

من شفت ارتال امريكيا جاية ليجاي
هبطت عفت المسجل مشتغل ورحت للبيت اركض فتت على قرفة مروان ندهت واني اصرخ واكله : كوووم كوووم الامريكان اجوووو كووووم

نهلة فزت وهي تصيح : دخيلك ربي

مروان فز وكضب الدرج
اندفر الباب علينا .. احنا فد نسوان اني وامي ونسوان اخوتي ... نهلة لمت بناتها واني ركضت على امي كبل لا اوصلها .. طلع جدامي مجند امريكي اسود وطويل .. شفتو تعارضت من الخوف كمت اصرخ بعلو حسي

وجه الرشاشة مالتو عليه يطلع منها ضوه بعيني ، كمت اصرخ : والله ما مسوين شي والله ما عرف شي فد عوفونا الله يخليكم

كضبني الاسود ودفعني للقرفة ويحجي امريكي
دخلوا قيره فردشوا القرفة كلها .. البوفية القراض كلشي واني اصرخ من الخوف ..

ما سمعنا صوت رمي
بس دبات رجليهم ع الكاع وفوك السطح
وبالبيت وحجيهم وصياحهم بالانكليزي .. وصوت صريخ امي ونسوان اخوتي .. كل وحدة جروها بمجان

اني حصرت روحي ويا الحايط ولامة نفسي ومدنجة راسي وحاطة ادية فوكهم واصم بذاني .. انجنيت من الرعب والخوف .

بالساعتين وهم يفتشون البيت
ما خلو شي ما كلبوه وكسروه ويدورون مدري على شنهو .

لزموا فد امي وخذوها وياهم
وطلعوا وعافونا فد محد بينا يستجري يكوم من مكانه نخاف لا بعدهم

شوية سمعت نهلة تنحب وصوت نحيبها عالي وهي تفتر بالبيت ، كمت الها انحب وياها وطلعنا كلنا فد نبجي محد بينا يحجي .. وكلنا نسوان وجهال .

طلعت للمراح خاطر اشوف الحلال خاف صارله شي .. الحلال كلو بمجانه .. رجعت الدجاج و الهوش والصخول ..

جاي اسد المراح .. دحكت من بعيد جن جثة مغبرة .. خفت كلبي ... تكربت منها لكيته مروان اخوي صايبينه جيلة براسه وطايح من فوك على التراب ومخلوط دمه بالتراب ... فد دحكته كمت اصرخ صريخ

كلهن ركضن علي
من شافنه كامن يصرخن ونسوانه زلغن اخدودهن وملشن شعرهن وكامن يدكن على روسهن

بالساعة احنا نلطم وندك ونبجي ما نعرف شنسوي .. كامت نهلة لحيلها ولمتنا وكالت امشن

حجت وياها بيدها : ونعيف مروان مترب بدمه بلا دفن ولا غسل

- اردله امشن خل نهد المكان

مسحت دموعي وكتلها : والحلال ؟

- امشن عون كلشي وامشن لا يردون علينا وياخذونا لو يجي احد منهم ويعتدي علينا امشن

تحجي ويانا كلنا مضعضعات ونبجي وما نعرف شنسوي .. دخلت جابتلنا عبي وكامت تصيح وتقلط علينا خاطر نمشي ونعوف البيت

دفعتنا اخذت منها العباية وكمت ادحج بالبيت وعلى جثة مروان بالكاع ودموعي تجري .. تذكرت المسجل مالو

ركضت للمراح صاحت وراي نهلة : بت الجلب امشيييي

- جاية

ركضت جبت المسجل مالتو واجيت اركض وراهن ونمشي بطرك العباية والنعال .. بالنص ساعة نمشي يلا لكينا سيارة حجت وياه نهلة وصعدنا ما افتهمنا وين والمن رايحين

صعدنا يطلع بينا ٤ نسوان وخمس جهال
صعدنا ترسنا التكسي ترس ونهلة كعدت يم السايق وعبير بحضنها . طلع بينا للمحمودية

وصلنا قاد طلع بيت اخو نهلة موجود بالمحمودية فد ما اعرف عليش ما يجيها ولا واصل قاد .. وصلنا وفتحنا الديوانية وكعدنا بيها وهي كالتلنا : انتن ضلن هين انا رادة ويا سلمان لجثة مروان نجفنا وندفنا ونجيب الحلال والغراض بسيارة حمل ونجي .

ضلينا كاعدين لليل يلا اجت ومحملة القراض كلهن والحلال .. كمنا انزل وياها : سالتها : يعني مروان مات هاهية بعد ما يرجع

- كامت تبجي وتدحك لبناتها وهي تكول : يحظ هالمعثرات ذني يا يمة صفن بلايا ابو ول كتله مروان جوز من هالسوالف مروان شلك بجتل الوادم ما حلاله غير هالموته .

تحجي وتبجي واخوها يهدي بيها ويكللها : الله موجود الله موجود اذكري الله وخلنا نسوف حال وسام وين

حجت - محد دمرهم غير وسام
محد جار عليهم غيرها لو شما يصير بيها ما يبرد كلبي .

كضينا ليلنا بالنوح
وهذا الحال ثلث تيام .. بيداء راحت لاهلها ضلت فد وحدة واني ونهلة .. كالت : عظم بنادم ثجيل لازم ناخذلنا بيت ونكعد بيه ونرعى هالحلال

اتفقت ويانا تلكى بيت ونعاونها بالعيشة
بنفس اليوم الاتفقت بيه ويانا امي ردت .. مخابرة على اخو نهلة كال الها : عدنا البنات تعاي

اجت ونهلة كابلتها بالصريخ والمكاون وتكلها : كله من وراج تيتمن بناني ما جزتي من هالدرب ما شفتي ابو وهب شسوا بينا .. يوم العزيتي عليه واحد ما رضيتي تطي يروح يفجر روحه خذاه منج غصب وجتله .. شفتي شجرتي علينا بمصايبج هااااي ما بسج منهم ومن هالزمرة ذولة دمرتينا تعبتينا

نهلة تحجي وامي اصطكت لا تجاوبها ولا تحجي عد ما درت مروان اخوي انجتل .. انزوت وحدها وبس اصريخها لوحدها كام يطلع .

اول مرة اشوف امي تنكسر وتصرخ هيج وتبجي عد ما فكدت واحد من ولدها .. ضلت بحزنها هاذ

نهلة تكول اريد احط بيت اربي بناتي
وامي تكلها نرد للبيت ونضل بيها
ونهلة تكلها ما جزتي من ذيج المكبرة المكعدتنا بيها مو دفنتي بيها واحد من ولدج شتريدين بعد ادفنين .

- ادفن الجان السبب بدفنة ابني
دمه ما يروح وانا امه

- ودمه براس يا مكرود اطلعينه جوزي منهم وعوفي ولدج يعيشون بس من الجتل والدم اخشومنا جلت ريحة الدم بسج

- انا الاعرف شلون اخذ حك ابني واعرف شلون اداري بناته

عيون امي مليانة حقد
ما تنحزر شتريد ولا واحد يعرف شيدور براسها

ضلت مكاون هي ونهلة ما كضى مكاونهن واني مجابلة الحلال ...

الحال طول اسبوعين
اجت صاحتلي : قدس

- ها يمه

- تعاي جاي احاجيج

- كولي يمه

- كبل لا احجي رايدة اسىلج رايدة طلاكج من ابو وهب لو لا

- يمه ما اريده

- دحجي وسمعي عدل لو جنتي تريدين طلاكج طاوعيني

- ما يطلك

- انا ما راح اخلي يطلكج وبس انا راح اخلي بصف اخوج

- تجتلينه

- هسسس انت بتي وهذا سر ولو تحسبيني امج اطاوعيني وتردين له ليما اكدرله

- يمه ما اريد اردله ما اكدر

- تكدرين تكدرين تحملينه فد جم شهر وانا احلف وروح اخوج مروان راح اكتله وما راح اخلي عايش بس اريدج ابيته ووياه وانا كل اسبوع يمج

- يمه فد اكلج

- هششش جهزي روحج يجيج باجر وتردين وياه

- فد يمه انا ما اريدو

- ادري تريدين خطاب وادري بخطاب رايدج

سكتت .. حجت : لو طاوعتيني ازفج لخطاب بيدي بس هسه اريدج اطاوعينه وتريدين وتضلين طوع امره لما افك منه واجتله

- ولو جتلني ؟

- ما يجتلج وانا امج وياج طاوعيني وما تخيبين

- يمه ما اريدو

- اييييه لو شما احجي وياج عكل جلمود ما يفهم اسمعي اكلج حضري روحج باجر تردين ويا وكل كلمة ما اسمعها منج

عافتني وهي تكلي ترجعين
وانا عايشة باحلامي ومتاملة يطلكني وارد لخطاب .. تاليتها تغصبني عليه

بجيت كطعت روحي رحت لنهلة اتوسل ما جانت بحالي كالتلي : هديني يرحم اهلج انا وين وانت وين .. شوفي ورديله مالج مهرب منه

حجتها وعافتني
فد اني وعدت خطاب ما ارجع لابو وهب وراح اصر واضل هين .. ما اكدر ارجع .. شلون افهم اهلي اني ما رايدة الرجعة

توسلت بامي ما فاد
حجيت ويا مرت اخو نهلة ما رضت تدخل بشي يخط امي .. رجعت على امي اتوسل

حجت : ولو ضليتي بهالحال تتاملين يطلك تعجزين وخطاب يايس منج ويعرس وانت محد يدري عنج .. ساعديني وصيري وياي وبطلي البجى ما مكسور كلبج على اخوتج واحد منهم جوا التراب

- وارجع لجتاله ؟

- هساه ما نكدر نعمل شي نسايره لحد ما اتمكن منه وادفنو .. ابو وهب صعب يقدس سانديني وخلينا نفتك من طوعه وسطوته فوك روسنا

ادحك بيها وابجي
من باب اشوف مالي امل يطلكني
واني صار فوك الشهر لا شفت خطاب ولا خطاب دورني ولو ضليت هيج هو يعاشر ناس هواي ويمشي ابقداد .. وابقداد بنات جثيرة ينساني ويحب قيري وياخذها وانا اكعد انطر سنين ابو وهب يطلكني

انا شجاي ارطن .. وارد كبال خطاب اصف ويا ابو وهب واصيرله مرة .. واتحمل يكربني ويحبني وينام بصفي اكتل روحي لو سواها وما اتحمل

كضيت الليل كله ابجي وما اعرف الحل
اريد منفذ اهرب منو وما اطاوع ابو وهب
فكرت انهزم من امي واوصل لخطاب بس ولو وصلتله ارد للصفر لا يكدر يتزوجني ولا يكدر يضل وياي شارد

منين ما افكر اشوف روحي ارجعله ومن افكر بروحي وياه اشوف الموت اهون الي من عشرته

للفجر ما غمضت عيني والدموع ما فاركت عيوني
كعدوا الصبح امي توصيني وتكلي : حضري روحج

شما يمر الوكت احسه حبل ملفوف على ركبتي وجاي يضك شوية شوية واختنك .. اريد فد مهرب اخلص من هالواقع وما اردله بس مالي مهرب من هالرجعة

لا اخو يساندني
لا اقارب لا عمام ولا ام وياي كل همها مصلحة اخوتي وثار اخوتي براسي

اجا ابو وهب
سلم على اخو نهلة ودخل الدوانية
اني جن اجا الموت مو ابو وهب .. هاكثر دموع ذبت عيني .

شويه وصاحت امي : ياله قدس امشي ويا رجلج يمه

انوسل بيها بعيوني وهي تخزرني ضحكت على ايدي وهي تسالمني : مثل ما اوصيج بتي سايري

حطت العباية على راسي ومشيت
اندار وهو يكلي : ها ول يابه خلصيتي

ما جاوبته ولا حجيت
جن مرجعيني لزنزانة التعذيب وراجعة للضيم برجلي حتى امي تاخذ ثار اخوي براسي واكعد اساير هالارهابي

صعدت ويا بالسيارة وهم يسلمون عليه شغل السيارة .. وحجه : ها قدس رديتيلي لو لا ؟

ما رديت بس كلبي يرجف خوف وقهر
حجه : عليش ما لابسه النكاب المرة ما يجوز تطلع بلا نكاب حرام شرعاً

ما رديت حجه : يلا انا اشتريلج سهلة
ما بس راح اشتريلج نكاب .. اشتريلج ثوب جديد واسويلج صفكة وهوسة خاطر ادخل عليج بخير

ما جاوبته .. رد حجه : مستحية ؟
انا اموت اعلى البت اليجتلها الحيا ما احب البت الوكحة .. وانت خوش بنية وحبابة بس ينرادلج بعد تتعلمين شلون اطاوعين رجلج ..

حجه : كتلهم يحضرون كيكة الج وجقليت وشموع ... الليلة وياج بعنادهننننن

حجاها وكرص خدي وضحك بصوت عالي
دحكت بيه ذاب الشماق الاحمر منا ومنا وفرحان يسوق .

غمضت عيني .. احس بيه بكربي
كشت روحي .. جسمي كله كشعر .. دمعت عيوني واندرت عنه خفت يشوفني ابجي ويعصب

وصل للبيت ودخل بنفس الفرع الشردت منه
انقبض كلبي .. صف السيارة وكال : نزلي ...
يتبع....
لقراءة الفصل العاشر اضغط على : ( رواية اسرار قدس الفصل العاشر )
لقراءة باقي الفصول اضغط على : ( رواية اسرار قدس )
reaction:

تعليقات

ستصدر قريبًا على مدونة يوتوبيا رواية المتداول التي تم طلبها مِنا كثيرًا وهي أول رواية مصرية تدور أحداثها حول تداول الـ فوركس والعملات ستتعلم من خلالها تداول العملات بأقل خسائر مُمكنه وكيف يُمكنك الربح من خلال شراء وبيع العقارات رواية بإمكانها تعليمك كيفية الربح من تداول الذهب والعملات والفوركس كيف يُمكن لشخصًا في بداية حياته مثل (عيسى) في الرواية أن يُحقق ثروة مالية كبيرة فى مدة قصيرة.