القائمة الرئيسية

الصفحات

رواية العروسة هربت الفصل الرابع 4 بقلم صغيرة الكتاب

رواية العروسة هربت الحلقة الرابعة 4 بقلم صغيرة الكتاب
رواية العروسة هربت الجزء الرابع 4 بقلم صغيرة الكتاب
رواية العروسة هربت البارت الرابع 4 بقلم صغيرة الكتاب
رواية العروسة هربت الفصل الرابع 4 بقلم صغيرة الكتاب

رواية العروسة هربت الفصل الرابع 4 بقلم صغيرة الكتاب

_ : انت كنت بتعوض مكانها بيا صح ؟! كنت بتملى الفراغ اللي هي سايباه بيا؟! ، حسام اتوتر وحس بالاحراج من لمياء وحس نفسه قد ايه استهان بمشاعر لمياء ، لمياء كانت خايفة من سكوته أكتر من كلامه ، لانه لو اتكلم ممكن ينكر بس سكوته ده بيعبر عن إن كلامها كله مظبوط

لمياء : قول أي حاجه أرجوك سـ..... ، حسام قاطع لمياء في الكلام وقال

حسام : أيوه دي كانت حبيبتي ، وكنا ناويين نتجوز بس حصلت خلافات كتير بينا في الفترة الأخيرة وسيبنا بعض وكل واحد فاكر ان الحق معاه هو وبس ، كنت هتجنن من غيرها مش قادر أعيش ولا لاقي طعم لأي حاجه ، كانت بتكابر وبتعاند ومش راضية ترجع ، فـَ فكرت استفزها بأي طريقة مكنتش واعي للي أنا بعمله إذا كان صح أو غلط ، وفكرت في اني أخطب ساعتها بس أكيد هتفوق لنفسها وتبطل مكابرة وتتقبل فكرة انها لسة بتحبني

  مع كل كلمة كان حسام بيقولها كانت لمياء بتحس كإنه فيه سـ*ـكاكين بتـ*ـقطع في قلبها بغـ*ـشم ، كانت بتحاول تتنفس بسرعه جدا من كتر ما هي مش قادرة تاخد نفس ، المرة دي مقدرتش تسيطر على دموعها ، كانت ملامحها ثابته بس دموعها مكانتش مبطله خالص ، مدت إيدها لطرحة الفستان اللي فوق راسها وشالتها وادتهاله

لمياء : دي من حق حبيبتك ، هي خلاص معادتش هتكابر تاني ، كلمها وصلح كل حاجه بينكم ، لمياء ادتله ضهرها وكانت هتمشي بس هو مسك ايدها بسرعه

حسام : لمياء .. أنا... أنا آسف ، لمياء بصتله وهي ضامه حواجبها ، كانت هتتكلم بس افتكرت ان كلامها مش هيفرق في حاجه وملوش لازمه أصلا ، ضحكت بسخرية وشدت ايدها ومشيت

ـــــــــــــــــــــــــــــــــــــــــــــــــــــــــــــــ

شرين راحت الأوتيل اللي كان المفروض الفرح هيتعمل في القاعه اللي فيه ، دخلت تسأل في الاستقبال عن الفرح بس الموظف قالها ان الفرح اتلغى

شرين : طيب ممكن حضرتك تشوفلي في حجز لأي سويت هنا ب اسم حسام بلال الشناوي ؟!

الموظف : حاضر يا فندم لحظات بس ، شرين استنت شوية وكانت بتبص حواليها بتوتر كانت خايفة يكون حسام موجود ، قاطع تفكيرها الموظف لما قالها

الموظف : كان فيه حجز دابل باسمه يا فندم بس اتلغى من حوالي ساعتين كده ، شرين حطت ايدها على قلبها وقالت بصوت واطي

شرين : الحمدلله يارب

الموظف : أي خدمه تاني يا فندم

شرين : لا ميرسي شكرا

شرين دخلت القاعه وحزن الدنيا كله باين على ملامحها ، بصت على الكوشة والطرابيزات والكراسي ، حتى الدي چي والأنوار اللي كانت منقياها هي وحسام ، كانوا منقيين الألوان اللي شرين بتحبها ، دول حتى كانوا مختارين كل حاجه هو كان مختارلها الفستان وهي كانت مختارة البدلة على ذوقها ، كل حاجه كانت ماشية زي الفل بس فجأة كل أحلامها اتبخرت ، راحت قعدت على أول طرابيزة قريبة من الكوشة واتخيلت انها لابسة الفستان وحسام جنبها لابس البدلة ، بس كل حاجه اتلاشت بسرعه ، شرين اتكلمت ورعشة صوتها مش مفارقاها

شرين : كنا هنتجوز هنا في نفس القاعه دي ، ليه عملت فيا كده يا حسام ، أنا كنت بحبك ولحد اللحظه دي بحبك ، بس فيه حاجه كده جوايا اتكسرت مش قادره اصلحها ، انا قلبي واجعني أوي

شرين مسحت دموعها وقالت

شرين : يا ترى انت فين يا حسام

ـــــــــــــــــــــــــــــــــــــــــــــــــــــــــــــــ

الساعه عدت 1 بعد نص الليل وسماح قلقانه جدا على لمياء ، فكرت انها ممكن تكون رجعت البيت عشان كده روحت ، بس ملقيتهاش في البيت برضو وبتتصل بيها كل شوية فونها مقفول ، قعدت في الصالون مستنية ومش جايلها نوم نهائي وكل شوية بتبص في الساعه لحد ما بقت 2.45 فجأة جرس الباب رن فقامت تفتح بسرعه ، بس اتفاجئت

سماح : هو انت!!!

ـــــــــــــــــــــــــــــــــــــــــــــــــــــــــــــــ

لمياء كانت ماشية في الشارع لحد الساعه 3 الفجر ، الجو كان برد جدا وشعرها كان طاير من كتر الهوا ، فضلت تعيط بكسرة نفس ، كانت حاسة ان قلبها هيطلع من مكانه من كتر الوجع اللي هي كانت حاسة بيه ، تعبت جدا من كتر المشي فقعدت على الرصيف وهي بتحاول تستوعب

لمياء : إز.... إزاي كنت بجهز عشان الفرح ، من كام ساعه بس كنت أسعد واحده في الدنيا ، و... و دلوقتي بقيت اتعس إنسانه على وش الأرض ، ليه يا حسام .. معقول تعيشني في الوهم ده سنه بحالها !! ههه كنت مخدوعه كل الفتره دي ، كنت فاكره اني خلاص لقيت السعاده اللي فضلت ادور عليها طول عمري ، بس طلعت كدبة كبيرة وأنا الغـ*ـبية اللي صدقت

لمياء أخدت نفس عميق وحاولت تقوم بس حرفيا أعصابها كانت سايبة من كتر التعب ، فجأة اتمدتلها ايد

لمياء : انت بتعمل ايه هنا ؟!

_ : جاي أواسيكي في خـ*ـيبتك بعد ما سيبتيني ....
يتبع...
لقراءة الفصل الخامس اضغط على : ( رواية العروسة هربت الفصل الخامس )
لقراءة باقي الفصول اضغط على : ( رواية العروسة هربت )
reaction:

تعليقات

ستصدر قريبًا على مدونة يوتوبيا رواية المتداول التي تم طلبها مِنا كثيرًا وهي أول رواية مصرية تدور أحداثها حول تداول الـ فوركس والعملات ستتعلم من خلالها تداول العملات بأقل خسائر مُمكنه وكيف يُمكنك الربح من خلال شراء وبيع العقارات رواية بإمكانها تعليمك كيفية الربح من تداول الذهب والعملات والفوركس كيف يُمكن لشخصًا في بداية حياته مثل (عيسى) في الرواية أن يُحقق ثروة مالية كبيرة فى مدة قصيرة.