القائمة الرئيسية

الصفحات

رواية كحل عرب الفصل الثالث والستون 63 بقلم زينب ماجد

 رواية كحل عرب الفصل الثالث والستون 63 بقلم زينب ماجد

رواية كحل عرب البارت الثالث والستون

 
رواية كحل عرب الفصل الثالث والستون 63 بقلم زينب ماجد

رواية كحل عرب الجزء الثالث والستون

((( بقلم زينب ماجد )))

الحلقة_63
( خصام بين المحبين )

يا..طَبع مدري اشجَره
علما ..تصِح ميّال
(عريان السيد خلف)

عدل كعدته و انا اعاينلة ابسمة كلها ضيم .. ظليت اعاين عليهم .. مدري يمكن راح احسدهم اعلى كثر ما تمنيت روحي بهالمچان ..

بودي اصرخ واكلهم
هاذ مچاني
وهاذ ولفي الما هده كلبي
و هاذ الهواني و ما هوى غيري .
ودي اخبر الناس كلها بالسالفة المضمومة حدر ضلوعي و تطحن بيه بكل وكت .

لجن القدر و القسمة و النصيب و الدنيا و العادات و التقاليد .. كلها تكلي سكتي .. و ظاله بس اوجد و اتحسر اعلى مچاني الهادته برضاي لغيري.

النساوين يصفكن و يهوسن .. و الناس تضحك ، و هو كاعد واعكاله اعلى راسه .. و يعاين عليهم ، يو يجاوب اليشند و يحاجيه ، و انا سارحه بملامحة و معزولة اعلى صفحة .

اندار يعاين علي .. تبسم .. تنهدت تنهيدة بحسرة
دنج و هو يتنهد و صد عينه ليغاد .. يمكن كل الكاعدين و اليمر ما ينتبه لهالتفاصيل هاي ولا تأثر عده ، بس انا وياه نعرف شكثر حجت عيونه .. وكل تنهيدة تطلع من افادنا هي صرخة خرسة تشك صدورنا.

رد عاينلي و هو يكول : غياب امس شنهي القضية ، ان شاءالله المانع خير ؟.

- صبحيت مالي خلك هلما اجيت .

- عدج العافية ، ان شاءالله الصحة تمام .

- ان جان اعلى الصحة تهون .. مرضنا مرض كلوب موش مرض لشة .

- مامش احد مرتاح .. كلها كلوبها تون . الله كريم .

هيسيت مرته بصفة تضايكت حيل وحجت وسا وحدة من حبايبها خاطر تكف الهوسة و تمش للحجرة ، كال الها : بس خل يفض العشا .

- نتعشى بحجرتنا دخت ما اريدن اظلن هنا .

كمت اعلى حيلي انا من عرفت تضايكت من عدي و صحت اعلى امي :- يمه خلنا نروح للبيت ، بتي مناك عد جميرة واخافن لا تون علي .

ردحة : ياااااع شمالج يمه و اطلعون بلا عشا .. تسودنتي ، وكت عشا .. تعشوا وروحوا .

كواغد : لا يدية عساها دايمة هم ياله نمش مناك البنيات غاد .. و ابو ستار هم يتضايك لو تأخرنا لليل .

سرحان : هي ظلت اعلى العشا .. تعشو وامشوا .

هدية : ما يعتاز بتي مناك والله ، انا يو ما جاية اول امس فخرية وعازمتنا ما اجي لجن ما ردت اردنها .. واجيت بس ابارك الكم .. بالمبارك ان شاءالله .

سكت هو وما حجه و انا ظليت اعدل بعباتي اعلى راسي .. هي دنجت ومدري شكاموا يتهامسون .. ردت امش ، حجه ويا امه و كال الها : اعزلي عشا ام ستار و زيدي اعليه خاطر تاخذه وياها للبيت .

حجاها و كام راح للديوان طلع ، مشت امه خاطر تعزل عشانا ، و فخرية تعايني مبحلكة و تخوزر .. فتت منها و كلت الها : ديه لا تخوزرين علي انا لا بنيتي اغيضج وبا اكرب صوبج انت التعنيتي لداري و عزمتيني خاطر تغيضيني ، من تغتاضين .. لا تخوزرين .. شايفة الف خير .

ما ادري شظلت اتمتم وراي طلعت من البيت كله و امي لسه تسولف ويا ام سرحان .. لكيت خنجر واكف بصف السيارة و كال : ام امنية .

انداريتله : عليّ ؟

- حكج محد محترمج و تصدكين انا اصيحلج هيج .. تعاي بوية موصى اوصلنكم للبيت .

تبسمت : يطيك العافية ، نتمشى ما عدنا شي .

-دصعدي يا خوية هو انا ما عوليت يطيني السيارة خاطر اتسرسح بيها ، اصعدي .

تبسمت : جا انطر خل تجي امي .

اجت امي وكضتها اعلى الباب هي و عمتي ردحة يسولفن و هو واكف يتنطر و انا اعاينلهم .

صاح : ءهلا ءهلااااا .. تروحن يو لا

كواغد : هاذ علينا ؟

خنجر : اعلى طوايف اهلي ، دياله تفرگسن اجدامي من الوكفة .

- سرحان موصيه يوصلنا .

كواغد : يا دهر الدهره شهرنا بصياحة ، ياله دية اودعنكم .

رحنا للسيارة و هي تكله : جا هو هيج الينده شهرتنا .

- اي صالج ساعة ديديديديدي .. بس سوالف خو دشن و كولن فد شواي وتعال النا ، ناصباتني صنم و مناطر شنهي .

- دروح يمه يسلمك الله احنا نمش ، ذليتنه بهالتوصيلة.

خنجر : لخاطر جلجول اوصلنكم من كونها مرتي و ما يصير اهدن نسيبتي وامش .

صعدت امي يمه تضحك وانا صعدت ورا و هي تكله : استحي اعلى روحك مرتك شنهي البت كبرت لا تكسر بختها.

خنجر : والله يو هسه تنزل ايه بجلجول و يكولون كبرت ما اصكد .. تظل ذيج البت الكرعة المصلبخة بعيني ما تكبر .

- يا خايب تضايك لو احد كال الها جلجول يو المصلبخة ما ترضى تكول شني انا اسمي جمارة .

- اي هم زين كتيلي خاطر مرت الاخرة اعرف بيش اغيضنها يو مرت .

- لا كبرت بعد و ذيج المدرسة ما تروحلها .. راح تروح لمدرسة بالولاية .

- والله زين ورضى حاكم .

- والله هاذ الشايله همه .. لجن اشتغل غاد ابيعن روبة و كيمر عرب .. واخذنها و ارد وياي وهلبت اقنعنه .

- والله يا ام ستار انا اأيدج خلها تكمل ، البت نبهه و شاطرة وملسنة .. لا تكسرينها بعرس حللها حال بنات السلف ، خلها تكمل هلبت يصير براسها المصلبخ حظ .

- جا انا شريدن .. غير اريدنها تصير مثغفة ومتعلمة و افتخر بيها جدام صويحباتي .

- ان شاءالله ، ياله خلصت كروتكم .. انزلو وچفوني شركم

- يطيك العافية يمه .

نزلنا انا وامي و هو توكل بدربه ..
حجت امي : ها اغتاضيتي ؟ جتلتي روحج ليما رديتي وجهج معبس ، امداج يالغمة .

- حظي هاذ بعد شسوي .

- كولي الحمد لله هكو نسوان حالهن اردى منج ييمه ، لا عدهن زلم بيهم خير ولا اهل بيهم خير وشابعات ضيم . احمدي عدج اب يحبج و اخيات حذاج وانا يمج و بنيتج بحظنج ... مو كلشي نريده نحصله ييمه هاي الدنيا تطي و تاخذ .

- الحمد لله اعلى كل حال .

دشينا للبيت و ابوي جان واصل كبلنا ، تلكانا : هااا خلص العرس .

- عرسيش .. لملوم مالت اهله .. و مشاها .

- حتى رحيم بالمضيف يكول يو ما جهاله ما يعرس ، بس مكرود جهاله يتامه .

- الله يسعدهم ان شاءالله جا شنريد منهم .. اطوني عشا تاكلون .

حاكم : اي والله جوعان ..

حطينا العشا و كعدنا ناكل .. حجت امي : اكلك حاكم اريدن احاجيك بس عليك العباس لا تردني .

- شنهي ؟

- جميرة

- شمالها

- جا ما شوفتك شهادتها ناجحة

-اي شفتها ذيج المرة .. شبيها ؟

- انا موش اشتغل بالولاية واودي هاليطلع بيدي .

- لا تكليلي تداوم بالولاية .. هالسلفة شيليها من بالج .

- يا علي العباس مدرسة مالت بنات ما بيها كل ولد .. بس بنيات .

- بت هي شعدها رايحة للولاية اكعدي كواغد وچفينا هالسالفة هاي .

- جا هي درست ويضيع تعبها .

- عرفت قراية و كتابة خلصت .. كعديها و ستري على بناتج .

- جا هي وياي وعلي اخذها بيدي واردنها بيدي ما ازحينها عن عيني .

- عوفي هالسالفة هسه .

- تامر امر بس عليك العباس فكر بيها لا تظلم البت ، شحصلت هديوة من العرس خاطر هاي تعرس .. اعاين النسوان .. هاي تكلي بتي تدرس بالديوانية عد خوالها وذيج تكلي ابغداد .. وهاي الدشت كلية و هاي الصارت محامية ، جا شني فرق بناتنا و ما يصيرن ؟

- عوفي هالسالفة عاي عوفيها.

- انا اعوفنها بس انت فكر بيها .

- الله كريم .

خلصينا العشا .. وكملينا وابوي و امي دكوها سوالف ، سالفة تجر سالفة اعلى العشيرة و اعلى الولاية وناسها .

مرت ايمان و هي تكله : حاكم اني راح انام .

- جا كاضج ؟ امشي نامي

- متنام ؟

- لا راح انامن هنا .

طفينا الضوا و لفينا روسنا و امي جرت البردة عليهم و هم يسولفون .. و ظلوا سوالفهم تجر و الجاي حذاهم ويضحكون .. شكثر كلبي ارتاح ساعة الشفت امي و ابوي هيج يضحكون ..

كلت انهجم راسج يسريوه بساع اشتغلتي و غيريتي .. اشوف ستار جان عايدها و عمي ناصر عابد امها اثاري يعرفن لهالدروب .. جا مثل حظي المضيعة صول جعابي ، لا عرفت اتوالم ويا فليح ولا حظيت بولفي .

لهناك اختفى حسهم و انا نايمة .. كربت من عدي ايمان ونامت حذاي .. تنوعتلها .. تعاين علي و تعاين للبردة مالت امي و تمدد .. انا انداريت عنها و خاطر انامن .

بس ما نمت ظليت اتخايل سرحان وفخرية
وعقلي يسرح .. ها حبها ها تبسم ليها .. و بالها و ها كضيت الليل ..

انداريت وانا بفكري بس ايمان مامش !
جا موش نامت هنا .. عليش كامت ؟
هديتها ونمت .

.....

سرحان : دشيت للحجرة و الجهال ماخذتهم راديون عدها .. لكيتها كاعدة .. حجيت : الله بالخير

عاينت علي و كالت : جا موش الخير راح ويا اهله ؟

تنهدت ومشيت انزع بعكالي ، حجت هي : تحج وياها ولا جن انا موجودة و بكل عين صلفة ليما تطلع مني تكلي .. تلزكتي بيه لا بعمره راح يهواج ولا راح يكربج من عبنه ما يحب غيري ولا يهوى غيري و ظلت تغلط علي وانا بثياب عرسي .

- وانت عليش رايحة ومتعنية تعزمينها اعلى العرس بلا علم احد .. احنا موش كلنا العرس مختصر اعلى اهلنا وما نعزم غرب .

- جا وانت عليش ما تعزم و تخبر احد ، يو خايف هي تدرى و تزعل منك.

- تدرى شني و تزعل شني انا شعدي وياها خاطر اكللها يو اخذ اذنها بعرسي ؟ البت نا عدي وياها شي ، هالمرة عديتها من كونج عروس مرت الاخرى يو نعادت ما اتفاهم وياج .

- هاذ الحجي جدامي هيج .. وكبل شواي انا جويعدة و عيونك تلاحكها وحجاية وحدة ما حجيت وياي . بكثر ما حجيت وياها .. وعليش غايبة و شنهي صحتج .. جا انا شنهي .

- جان المفروض تطلك و اخذنها مرة ، لجن زلمتها غاب و تفرهدت امالي بيها .. لجن حطي براسج واليوم عرسنا ، يو صحالي زماني اخطب و اعرس .

- تفكر بعرس و خطبة بليلة عرسي .. جا انا شني هنا

- هاذ العدي .

- شيخ و حاط عينك اعلى مرة معرسة وزلمتها مفكود و هي بلا مستحى ادور اعليك .. شنهي الحيا شح .

هو جاي يدنج خاطر يشيل حزامه ويا ما حجتها ، وطر الحزام بيها ، اجا بوجها و كال الها : ياهو هاذ الشح مستحاااااه ، كومي اطلعي منا يااااااله ، امشي .

اعلى صياحي .. دشت امي ردحه : خير يمه

- المرة اتطاول اعلى زلمتها بليلة عرسه .. موش مرة وما اريدنها ، اندهي عمي ياخذ بته وما يخليها ابيتي يااااله .

- اضكر الله يمه وصل اعلى محمد .. عليش شنهو الصار

ظليت اصيح و اكللها : طلعيها من عدي يممممه

- يمه عيب من عمك وعلي بس كلي شنهو الصار بينكم شحجت .

دشت امها و خواتها خاطر يعرفن السالفة ..
هديتهن و طلعت برا .. سالم بالباب نشدته : خنجر ما رد السيارة ؟

- لا بعده .

فتت للديوان .. عمي ليلتها ما بايت بالبيت جيفن عرس بته ... ظليت اناطر ليما رد خنجر بالسيارة ، كلتله : اوچب لا تروح

- شنهي

- خلنا نطلع للجول ، متضايك حيل

- جا وعرسك ؟

- انعل هيج عرس .. دمش

طلعنا انا وياه و عزلنا عن ربعه .. منجين اعلى السيارة و نسولف : جا اذا ما رايدها عليمن عرست ؟

- وليمتها اظلن انطر هاذ وذاك مان علي بخدمته .. امي مرة جبيرة ومالي احد وجهالي زغارة وهدوة مأيس منها .. شنهي حالي .

- يو جايبلك خدامه

- هو هالوكت هاذ مال خدامه يخنجر ما تعاين الوضع شلونه ، يو طلعت مني يو من واحد من عايلتي احجاية اعلى صدام يو اعلى الحزب وخدم ببيوتنا غير نصبح اعلى الحدود ... شعرف عن الخدم و احطنهم .. و هو بهالوكت الاخ يحاذر من اخوه .

- والله ما ادري شكلك .. بس يو تجي وياي تشربلك جم بطل ، تنسى هدوة وهاي الجديدة و تنسى حتى مطر بكبره .

- العتب موش عليك لا والله تعداك العيب ، العتب علي الجايب روحي وصافها ويا وحيد مخربط مثلك.

- ههههههههه عليك العباس شغلني وعلي جاتلني الفكر .

- روح كل للشرب و النسوان هلبت يشغلنك .

- شسوي بيهن واخوي الشيخ سرحان ال ضاحي حذاي .

- لا اخوك ولا اعرفك .. ميل عني .

- اهاا ابو مأمون

- عود وكت ما تلم روحك وتبطل سوالفك الشينة الرديت الهن تعال احطنك فوك راسي ، اما اعلى حالك هاذ بصخلتين ما اسرحنك .

- حاط العباس وياك .. عليش هيج وياي وانا اخيك .

- دصعد اصعد خل اوصلنك .

- لا روح اظلن ويا الربع

- تصافيت انت وحيدرة ؟

- لا والله بعدنا

- لا تطولها ، فضو الزعل ولا تخلون الزين و الشين يدش بينكم .

- الله كريم .

.....

هدية : كعدت الصبح و امي كاعدة كبلي كاعد تمشط و تظفر بكصايبها : ها يمه اصباح الخير .

شفتها مرتاحة .. هلكثر انشرح سدري ..
رحت حبيتها اعلى راسها وكلتلها : يمه وعلي من اشوفنج مرتاحة انا ارتاح من يمي .

- غديتلج فدوة احبيبتي ابنيتي .

وهي كاعدة تمشط و جمارة نايمة .. سمعت و تكربت حطت راسها بحضن امي وتكللها : جا وانا شني .

- انت بتي الراح تصير تكدورة و ارفع راسي بيها.

- يمه تحبيني انا يو هدوة.

- اثنينجن .. ذيج جبيرتي و انت احبيبتي ..ومامش اعز منجن اعلى كلبي ..

هدية : بس كون تبطلين تكليلنا برابيك

- لا ييمه جا انتن برابيك .. هاي سالفة منتهين منها.

- لا يمممه موش جنتي زينة عليش هيج .

- والله ييمه بنات حويكم برابيك ما تتامنن يو زحت عيني عنجن الكاجن مطيناتني .

- لا يمه عليش تكولين هيج و علي ما مسويات شي .

- الله يحفظجن ييمه و يستر عليجن بجاه محمد وال محمد ، بس روحي كعديلي ابوج هلبت يروح وياي للولاية .

- جا عليش يروح ؟

- كالي امس .. اروحن وياج و قنعيته يمش هلبت اشوفنه المدرسه غاد و يرضى اخيتج اداوم بيها .. و انا طالبتها طليبه من ابو الحسن .

كمت انا ولالة اعلى الريوك .. وجمارة مشت ولا جنها بعيرة اجيب بروحها وتدحس بحضن ابوي و هو يحبحب بكصتها ويلاشيها .. كعد اميدي و شاف ابوي يحب بجميرة و هو صرخ وصدع روسنا .. اعلى حسه كعدت بتي .. مو جنه جدها .. لا ابوها وحكها كامت تصرخ و تلعلع بحسها خاطر يشيلها .. طردهم كلهم وشالها اعلى اجتافه و كام .

حطينا الريوك والجهال يتعاركون .. و بتي تتعاير .. الكعدو بحضن امي صرخت وتريد هي تكعد و الكعدوا بحضن ابوي ظلت تعيط و تجيب سابع جار اعلى صياحها.

كعدنا نتريك وايمان حجت : اني البارحة ابد منمت الليل كله اتخيل واخاف .

هدية : جا مو اجيتي نمتي بصفي عليش كمتي ؟

ايمان : لا منمت يمج .. شوكت ؟

هدية : شني مو اجيتي ونمتي شمالج

- لا والله ما جاية .. يمه اخاف طنطل ؟

هدية : صكد تحجين

- اي والله مجاية .

- لا جا يمكن اتحلم

- لا اكيد هاذ طنطل

حاكم: بعد من انا ما انام بالحجرة جيبي فراشج و افراش جهالج و فرشي يم البنيات ونامي .

- لا مو عبالي تجي تنام بس مأجيت .

امي اغتاضت وردتها : جا موش كالج انا راح انمن هنا ، بعد هالحجي الماصخ عليش و عليش تنطرين .

دارت وجهه ايمان منها متضايكة وامي كامت اعلى حيلها .. كالتله : حاكم تروح وياي يو لاله .

- جا انطري اغسل .

- استعجل يالة ..
كام و جمارة تكل لامي وابوي : خل امش وياكم اتونس

نزيت انا : جا وبتي ياهو اليظل يمها ، لالة حبلى ومالومة و ايمان و ايمان مبتليات بجهالهن .. اكعدي .

جمارة : شنيييي وعلي مليت بس كاعدة.

كواغد : اها جميرة و كبرت وبعد ما تخطي عتبة الباب .. شدو روسكم يكرعان .

- يمه عليج الله فدوة يمه .

- وبتيييييي ؟

لالة: ما عدي شي خليها انا اداريها .

جمارة : اها لاله اداريها .. انا اروحن ويا امي .

وكامت غسلت ولبست و شدت حجابها و دكت رجل الا تروح ويا امي وابوي ، امي كالت الها اوكفي غاد و انا اخذج وياي .. نوسة و درت جمارة راح تروح ويا امي وابوي تسودنت كامت تشيل بروحها وتركعها الا تروح ويا جمارة .

وانا يو اروح وارد كبالها ما تعبرني ولا تبجي علي بس على جمارة تتسودن .. طلع ابوي و شاف بتي تبجي .. كالي : بدليلها اخذها وياي .

كمت بساع بدلت الها بس اريدنهم يطلعون خاطر اطلع تأخرت .. هو شالها ومشى والصياح ما تعرفه منين يطلع بنات ستار يبجن و واخواني من ايمان نطوا .

عافهم وصك الباب و اخذ يس جمارة و بتي وراحو .. انا عفتهن يسكتن بالجهال كضيت اعبايتي .. و طريت الدرب للمعمل .

وصلت غاد متأخرة .. سرحان واكف بالباب .

كربت : اصباح الخير

- اصباح النور ... من تأخرتي كلت ما تجي بعد .

- لا عليش اهدن رزقتي .

- دام رزقتج يهدوة لا تسوفين ولا تستغلين وجودي و تتغيبين .. ترا الشغل شغل.

- تامر يشيخ .

تبسم : امشي اعلى شغلج بويه .

مشيت اعلى شغلي و انا عيني تتبعه .. كرب من عدي وكال : اجرج مال ذاك الأسبوع ما خذيتي .. مكطوع منه مال يوم واحد بسبب الغياب .

هزيت راسي و خذيت منه الفلوس وكلت اله : يطيك العافية .
بس اختنكت حيل منه ، جا على يوم واحد حاسباني .. هاي عود هو يحبني ويهواني .. هاذ اول يوم عرس وهيج تغير علي وكام يكطع مني جا باكي الأيام شلون .

لابسة الجفوف و الكمامة و اخوطن بالحليب و هو اعلى النار .. تكرب و هو يكول : هدي السوالف البراسج و ركزي بشغلج الحليب راح يحترك .

كلش اغتاضيت منه ، و اختنكت واهيس الدمعة صارت اعلى اطراف جفوني .. تعداني ومشى يحاسب العمال .

خلصيت البيدي ورحت ليه .. كاعد جدام مكتبه و كلت اله : سرحان .

رفع راسه ، عاين اعلى صفحته واحد واكف ، حجه : سرحان ما تنعاد .. استادي .. حجي شيخ .. اختاري اللي تعجبج و ندهيني بيهن لجن سرحان حاف ما تنعاد .

اختنكت حيل ردت احاجي، اندار للبصفه وكاله : امس گل لحجي يونس يجيبلي الاوراق من طاهر.

مشى انداريت وكتله : اذا جان وجودي بهالمجان يضايك انا اهدن الشغل .

- عليش ؟

- مدري .. جن العرس غيراك .. هاي ثالث مرة تزفني اعلى شي ما يسواش .

- العرس شله غرض ؟ يو البعبه ...... استغفر الله

- لا كملها عليش تستغفر .. موش اكللك متغير .

- يو سمعج احد و انت تكليلي هاذ الحجي شراح يكول عني و عنج .

نزلت دموعي ودرت عنه امش ، حجه : كربي

انداريت ليه ، حجه : عليش بجيتي .

- كل هاذ و تريدني ما ابجي ؟ .. ولو انا ما تمر على ضحكه لا ما اتزقنب بيها ، من كون ضحكت الصبح طلعيتها من خشمي الساعة .

- هدوة من تغتاضين ارسومج تحلو واكومن اضيع بعكدة الحاجب واتوهدن و اخاف الناس تفرزن و تفتهم عيوني وينفضح علمي بين الناس .

درت علي : الحجي هاذ شني ؟

- دموعج ياذني يهدوة

- انت سببهن .

- جا يو نا كصيت من يوميتج وانت غايبة شيكولون ؟ ما تطلع و يتفتن علي ؟ ..يو ندهتيني بلا تكلفة ..شيكولون عني و عنج .

- مو بس هيج انا اعرفنك .. متضايك مني .

- متضايك منج عليش ، انت حاطة ابالج هالامر من كون موجدة اعلى عرسي .. لجن امس العروس انطكت بسببج و ما جانت ليلة اعلى كثر ما جانت مصيبة .

- عليش انطكت ؟

- لا المجان ولا الوكت مالت حجي و سوالف ، روحي لشغلج .. و عود بعدين نحجي .

- يعني ما متضايك من وجودي هنا ؟

- انت مسودنه يو بعكلج خيط ؟ انا انطر شوفتج اعلى نار و انت تكليلي متضايك .

من حجه هالحجاية .. ماي وتبدى اعلى افادي ، كلت اله : جا خوش انا اروحن .

تبسم : روووحي .

.....

كواغد: ذيج المدرسة الأكللك عليها ... جريبة من عدي و جدام عيني .. تدرس بيها و اخذنها واردنها بيدي .

- جا تظلين طول عمرج تشتغلين يكاغد ، انا هالفترة و سجاجين اعلى افادي شغلج هاذ لجن الوكت الحاط سجينته اعلى زردومي ومخليجن انت و هدوة تشتغلن .. باجر عكبه يصير عدي لا انت ولا هي تشتغلن ، تكعدن و مصرفجن يوصل الجن .

- بيك الخير و البركة بجاه الحسين اليرزقك و يسهل امرك ، لجن انا سالفتي جميرة

- وجميرة يو درست و بطليتي من هشغل شلون ؟

- هسه دخلها اداوم هالسنة ويسهلها ربك بس لا تشيل همها.

- الله كريم .

- والنعم بالله بس خاطر امش بمعاملتها مالت النقل ، يردون ورقة من الصحة ومدري منين خاطر تنقل من الأبتدائية للثانوية .

- انا امشي بيها ان شاءالله

-الله يطيك العافية ان شاءالله ويخليك خيمة اعلى روسنا .

- الله يسلمج.

نحجي ونعاين لجمارة شايلة بت هديوة اعلى خصرها وراحت اشترت الها .. و اجت ، اندرت ليه : صكد ردت اكللك

- شنهي ؟

جاي نحجي و اجا زلمة و كال : انطيني كيمر عرب .. و حطيلي وياه جبن عرب.

حطيتله انطاني الفلوس ، ضميتهن حدري ورديت احجي ويا حاكم .. شفته متضايك : تفرج وربك و هالايام تصير سوالف .

هز راسه : الله كريم .. شردتي تحجين ؟

- انا نذرت اذبح ذبيحة لابو الجوادين يو طلعت من ذيج السالفة بخير ومامش احد بينا متاذي و الحمد لله تعديناها و انا من ذاك الوكت لهاذ الوكت اجمع بفليساتي خاطر اشتريلي طلي واذبحة ..

- اي جا وين المانع

- موش انا كلت بنذري اذبحنه بالامام، بس صعبت علي شلون اخذ طلي مناك ليغادي ، و غاد ما اندل وين يبيعون طليان و اشتريلي ذبيحة .. كلت اطي الفلوس لليشتغلون عد الامام يو اذبنهن بشباجه بس كالو ما يصير دام نذرتي تذبحين لزوم تذبحين.

- نروح انا وياج .. ونشتري ونذبح غاد

- انت بعدلك شكثر اعلى ممشاك ؟

- بعد ٤ ايام

- نروح باجر ؟

- الله كريم .

.........

هدية: ظليت اشتغل و اعاين ليه يروح و يرد جدامي و يحاسب بعماله .. سرحان كلبه طيب و خوش زلمة لجن بالشغل ما يتحاسب لا يعرف اخو ولا صديج .. الكل عده عمال وواحد ما يفرك عن الاخر و اليتسوف .. يطرده يو جان اكرب الناس عليه ، ويكللهم الشغل يو صار محسوبية وهاذ عمك وذاك خالك ما يفلح .

خلصينا الشغل .. وانا صديت للشباج اعدل عباتي عليها خاطر انطلع ، كرب مني وكال : انطري ليما الكل يطلع .

- عليش ؟

- عدي جم حجاية وياج .

ظليت امش منا و اروحن منا خاطر محد محد يشوفني واكفة وينشدني عليش ما اطلعين .. ليما الكل طلع .. كال : تعاي كعدي .

- مامش احد

- لا بس الحجي برا وما عليه .. اكعدي

- مو اخافن اتأخر .

- شنهو الحاصل بينج و بين فخرية ؟

- ما حصل شي

- امس جان المفروض ليلة عرس لجن صارت ليلة طلابة .. اعلى كثر ما تعاركت وياي ، طلعتني من زياكي ووصلت بيه الحالة اطكنها و هي بثياب عرسها .

- عليش

- انت شلون تكليلها عمره ما راح يهواج ولا يكربج وهالحجي

- انا ؟ .. يمتى كايله هالحجي .. كتلها لا تغتاضين انت العزمتيني .. من كونعا رادت تغيضني و تكلي اعلى عرسكم ومن حضرت العرس اغتاضت مني ، جا انا شلي غرض.

- المهم ... ابعدي منها ولا تحجين وياها.

- ابعد شني ، سرحان شمالك جا انا كاربتها وابعد يو ما هي ساعة وكتها تمر و تعايرني بوضعي و تتشمت بحالنا ، لجن اشوفنك خايف عليها مني ، اطمن .. ما راح اكربنها ولا اكربك ولا الي غرض بيك ويا ريت مرت الاخرة ما تكرب وتكلي رايد احجي وياك .. ما بيناتنا غير الشغل ويو تشوفني مضايكتك .. ابعد من الشغل هم .. خوش .

- يواشج بويه اكلتيني بكشوري ، مو هيج السالفة .

- لا هيج ولا هم يحزنون .. اودعناك يشيخ .. مدري يا ستادي .. اختار التعجبك .

تبسم .. و انا انداريت عنه مغتاضة وطالعة روحي .

وصلت البيت .. امي و ابوي جايين .. ونايمين .. وحتى جمارة منومه بتي اعلى ايدها و غافيه وياها ، و الباكين كلمن بحجرته .

نزعت عباتي وكعدت مغتاضة .. لا نمت ولا هدالي بال ، رحت خضيت روحي هلبت اهدى لجن ما هديت .

كعدت امي .. و كالتلي : شمالج شو معبسة .

- مامش شي

- جا الي تكليلي مامش شي ؟

- تعاركت انا و سرحان

- عليش ؟

- سولفت الها السالفة ..كالتلي : هدي الشغل و اكعدي

- اهدنه عليش ، شغل و مرتاحة بيه و خير من الله احصل عليش اهدنه ، لجن هالمرة ما ادري منين طلعتلي و خربطت حالي .

- جا انا من ساعة اللفت وكربت واحنا بالبستان ما ارتحت ليها من كونها عربيد البساتين ما تهيسين اعلى يا ساعة يطلعلج يلدغج و يموتج .. وانا خايفة ييمه اعليج لا تلدغج و تفتن اعليج

- وانا شمسوية و تفتن ؟ يمه انا مبوشه اروحن و اردن بدربي وما كاربه احد .. حتى سرحان ما اكربنه يو شكثر ما تمناه كلبي ، عدي بت و كل بالي هي .

- الله كريم مالج غرض بيها ، راح اخدر الجاي و اكليلج لكيمة و لا تشيلين هم غير همج مامش احد يستاهل خلهم يولون .

كامت تخدر الجاي وابوي كعد وتمدد بصف بتي و يحبحب بيها و ينغمش بجمارة خاطر يكعدها ويلاشيها.

كعدن و هو يكللها : كواغد ناخذ جمارة للكاظم باجر

جمارة : اي اي اي اروحن ، يمه عليج العباس كولي اريدن اشوفن بغداد .

- تشوفين بغداد يو الإمام شو ما تستحين اعلى روحج

- اثنينهم . كولي اي كولي اي .

ايمان : راح تروحون بغداد ؟

حاكم : اي باجر نغبش ان شاءالله .

- واني ؟

حاكم : و انت شني ؟

- اريد اروح صارلي هواية مشايفة بغداد

- وشعدج ابغداد و تروحين .

يسرى : اكلج انت من امس ولليوم ما تكابلين احد جيف عمي و عمتي متصافين ظهديهم اثنيوينهم يمشون يزورون ويردون عليش كاعدتلهم كعدة اعلى الزردوم .

ايمان : محد حاجي وياج ، ولا موجهتلج الحجي لا تدخلين .

حاكم : ايماااااان .

- ايمان شنو ترا بس دا اكولك اروح وياكم ىيعني ما بيها شي لو رحت .

- واني كلت ما تروحين .

- انت شبيك ويايه من البارحة و اليوم ما تطيقني ولا حجيت وياية حجاية ، وكل ما احجي وياك تتضايق .

- كلت ما تروحين يعني ما تروحين .. شتريدين تسوين ؟

- ليش دا تتعامل وياي هيج اني محجيت شي .

- كومي دشي داااااااخل ولا تخليني اشوفن وجهج النكس .

- لويش دا تغلط ؟

- ولج بووووووووويه كلت الج ولي ، ولييييي

مشت و هي تكله : اكص ايدي اذا ما ساحراتك و مغيراتك عليه ، اصلا انتم لا ثوبي ولا عيشتي بس الوم الوكت الما خلالي اعتنيه و اتحمل اذيتكم .

كام الها و كال الها : شو كربي هنا خاتون .. ياهو هاذ المو ثوبج ؟

- وخر عني

حجت هالحجاية يو هو جن متحمل عليها ، كضاها من راسها و جراها للحجرة سركه الباب و تولاها كتل ..و احنا هبينا اعلى الباب ندك نريد ... ولك بويه افتح ..

ما فتح .. كضاها كضيان .. ليما فك الباب و دشينا ما نعرف الدم من خشمها يو من حلكها .. شلتها انا ودنجت عليها امي ، و هي حتى ثيابها مشككه .

دفعت امي و هي تصيح : ارتاحيتييييي ، من شفتي ضربني ارتاااااح كلبج .. بردتي .. تحجين بالله و انت ما تخافين الله بيه .

كواغد : يا دهر الصابج كون انا شلي غرض .

- شلج غرض .. والله انت الساحرته ، انت و يسرى .. انتم المغيرينه عليه .. يتيمة و دعوتي ما تتعداكم الله ينطيكم بجاه النبي .

اريدن اجرنها .. اهديها بيها ما تهدى ، ابوي سمعها هيج يو تسودن .. رد عليها كل طكه يطكها .. يو حجر جا فل .. واحنا ندفع بيه وما يرد ..

كامت تبجي و تصيح هي ..
كوة جرينا ابوي منها .. بس طاحت لا بيها تكوم ولا تكعد ، و امي كامت تتصايح وياه و تكله : هو هيج شجاك .. جا البت يو ميته بيدك شنكول وشنحجي ، شني ما صارت بعينك مصيبة امس .. كافي بسك .

جاي تحجي ، جرتها عباتها ايمان و تريد تطلع من البيت .. كام الها هو كال الها : ادفنج بالباب يو تعديتي عتبة الباب وعلي ، هسه تردين .

- ما ارجع والله ، وهسه لو مو تموتني .

- تعاندينييييييي ولج
ونزل عليها فشاير و غلط و يريد يكضها . كوة جرته امي و دخلته بحجرة ستار و تحجي وياه و انا كاضة بيها و اكللها : بس كليلي ... طلعتي وين تروحين .

- اروح لسرحان ياخذني لاهلي

- يا اهل ذول العافوج يا دية دكعدي و اسكتي ، عصبي يهدأ و يرد يصالحج .. كولي يا الله .

- مو عصبي والله مو عصبي و انتم ساحرينه ، كافي تعبت .. ساعة اشوف طنطل ، ساعة يتخبل عليه هو ، بهذا البيت اني ما اكدر ابقى من الاول كلت الكم تشيلون بس اني ما اشيل و جبرتوني اجي وياكم .. عوفوني عسى ما اموت بس بهالبيت ما اعيش .

- وجهالج .. تروحين و تهدينهم

- لامنا اعوفهم .. جهالي وياية

- دضكري الله وصلي على محمد .

لاله : هاج دهاج شربي الماي و صلي اعلى محمد

- لا اريد ميولا اريد كلشي ، عوفوني اطلع ، بهالبيت ما اريد ابقى ، دا اختنك عوفووووني .

نقنع بيها .. نريد ما تهدى ولا تسكت .. لحد ما كالت : ما اريدكم كوة هي لو غصب ... عوووووووفوني .

سمعها ابوي و تسودن و كام ليها . نريد نجرها منه .. جراها من راسها ورداها للحجره .. امي لبست عباتها و راحت للمضيف تنده سرحان خاطر يلحك الها وياخذها .

وابوي ندك نريد ما يفكه .. وحسها اختفى
تسودنه كلنه طكه من الطكات مثل ذيج المصيبة وماتت بيده .. كمت انا و لاله ندك حيل وما يفتح .

اجا سرحان و امي صاحت : سون درب .

دخل هو كلنا تكترنا .. و عمه دش وياه .. دك الباب و صاح : ابو ستااااار ، افتح الباب .

ابوي من سمع صوت زلام بالبيت بساع فك الباب، ولنها طايحة بالكاع ميته لا حس ولا نفس .... يتبع

لقراءة الفصل التالي : اضغط هنا
reaction:

تعليقات