رواية كحل عرب الفصل الرابع والستون 64 بقلم زينب ماجد

 رواية كحل عرب الفصل الرابع والستون 64 بقلم زينب ماجد

رواية كحل عرب البارت الرابع والستون 

رواية كحل عرب الفصل الرابع والستون 64 بقلم زينب ماجد


رواية كحل عرب الجزء الرابع والستين 


((( بقلم زينب ماجد )))


الحلقة_ 64

(خروج جسام )


أعلمها الورع

واطبگ عليها الباب

تذكر ضحكتك واجهرت ما عنّت

(عريان السيد خلف)


تصارخنا ساعة الشفناها هيج .. تراكضنا ليها .. وتكرب سرحان و هو يريد يشيلها . ابوي يكله : من رخصتك شيخ ما بيها شي .. تفضل .


- المرررررة ميته يااااا بو ستاااار


دنجيت عليها ، ادكن اعلى خدها ..

خايبة اكعدي .. ولج فتحي عيونج .

مسبلة اديها و طايحة و الدم اعلى خشمها ، كامت امي وزرت عباتها ..


وسرحان يكله : يو تشيلها يو تخليني ادشن المرة راح تموت يابو ستار .


وعمه يصيح : شنهي رايد تورط روحك و اهلك بمصيبة لخرى دخلهم يشلونها شماااالك يا بويه .


كواغد.: عينيني عينيني ...وياي ياله .

تكابلنا اعليها انا و امي وشلناها و جهالها نطو من البجي ، شالتهم لاله وتجر بالاخر .


تكرب من عدنا ابوي و شال ايمان عنا ، و سرحان ركض جدامهم .. صعد بالسيارة هو و عمه و انا و امي و طلعنا بيها للمستشفى .. وصلنا غاد .


ركضو جابولها كرسي و شلناها كعدناها .. ركضوا بيها للطواري .. وانا وامي نركض وراها .. فحصاها الدكتور و داس اعلى كلبها .. نشغت .


ظل يتسمع لكلبها و ينشدنا : شنو الصاير وياها ؟


كواغد : مدري يدكتور ...تكعد هي وتكلك


- انتم مو اهلها


- اي بس لكيناها طايحة وما نعرف شمالها وهالركضنا بيها للمستشفى .


ظل يفحص بيها بس كض ايدها نشغت حيل وكامت تصرخ ، كال : احتمال عدها كسر باليد .


دش سرحان و عمه : هاا

راحت الهم امي و كالتله : كلت الهم ما نعرف شبيها .. خاطر يو نشدوها هي وحاكم تتجازة من كون يو كلنا مجتولة هساه يجيبون النا الامن ، و يو كلنا لا وحجت غير هالحجي هي نطلع جذابين وننلام ... خلها تطلع منها هي .


قاسم : زين ما سويتي هيج اخيرلنا لا سيم ولا جيم وهسه انبهنها ما تحجي بس خل نشوف شنهي وضعها.


سرحان : لزوم نمش ليها كبل لا يستدعون الامن ، من كون جروحها موش مالت طيحة .


كواغد : دياله .


مشى سرحان و تقدم للدكتور و كال : السلام عليكم


- اهلا وعليكم السلام .


- وياك الشيخ سرحان من عرب ال جلوب ، و جينا نعرف شنهو الصاير بالبت .


- اهلا وسهلا بيك ، على راسي شيخنا .. البت بعدنا لازم نفحصها حتى نعرف شبيها ، بس جروحها قوية و احتمال كلش جبير عدها كسر بالايد .


- خير ان شاءالله ، بوية لا تخافون عليها ، امونه بنيتنا و ان شاءالله مشافاة ..


قاسم : شلونج بوية .. شنهي طحتي يو شبلاج .. غير تعاينين دربج يابويه .. حظج هاذ الطيحاج هالطيحة هاي .


ما ردت عليهم و هي تون من ايدها .. نشدني الدكتور : حامل لو لا ؟ .


- والله ما اعرف دكتور ..


- حتى ناخذلها اشعة نشوف ايدها بس اذا حامل ميصيرلها اشعة ...


ندستها : حامل انت يو لا


ايمان :- ما اعرف


كتب الها تحليل دم .. و احنا واكفين ، مشى عنه الدكتور و المضمد يضمد بجروح وجهها .

خياط واحد بكصتها عبنها مطكوكه طكه كوية .


اعلى وكفتنا هاي ، وكف ابوي ،جراه سرحان و كال : صدك جذب يابو ستار هاي انت العاكل الناخذ من عكلك يطلع منك هالفعل هاذ.


- صارت بعد و هي هم بيها صوج انا محذرها ما تعاند و هي ترد تعاند .


- عليش عاندت .


- سوالف بيت ما تسوى


- جا من كونها ما تسوى عليش عامل بحالها هيج .. احمد ربك سكتت الا يو حاجية غير الأمن يذبونك جوا.


- الله كريم .


اعاين لابوي محتقن و كلش طالعة من الدنيا من عيونه ، كرب منها ما حجه وياها لجن هي دارت عنه و كامت تبجي ، حجت كواغد :هدها ترتاح لا تكرب هسه.


كاعد يحجون دشت السستر و هي تطي فحص الدم و كالت : المريضة حامل بس تحتاج اشعة.


اجا الدكتور عاينها و نقلوها.. صبالها ايدها بلا اشعه.

عاد من طلعنا ،حجت هي ويا سرحان و كالتله : ما اريد ارجع لذاك البيت ، اريدك تخابر على اهلي يجوني.


ابوي ما حجه ولا فك حلكه ، و سرحان كال الها : تامرين امر و ما يصير خاطرج الله طيب ، خل اخذج اليوم ترتاحين وتنامين غاد عدنا و يصير خير.


خذاها سرحان و امي وياها .. وانا رديت ويا ابوي .. كلش متضايك ، اول ما وصلنا نام جفي اعلى وجهه ما عاين احد .


هند تريد امها .. و اميدي يتباجى ولا يرضى يسكت كتلهم تعالو خل اخذنكم ليغاد واخليكم يم امكم .


كضيت الجهال و كلت الها : جميرة عينج اعلى نويسه هسه


خذيتهم و رحت ليغادي ، دكيت الباب لاككتني راديون : هلا هدوة شلونج ..


- على الله ، امي وين .


- جوا امج .. دشي


- بس جبت هالجهال ذول يتباجون اعلى امهم .. كلت اجيبنهم .


دشيت وامي تسولف لسرحان السالفة و تكللهم: زلمة مغتاض وطالت اعصابة ، جا وكت زينة نروف حذاه ووكت اعصابه نميل عنه هاي الحياة ، يوم زين ويوم شين .. ونحمل الشين لجل الزين ولخاطر هالفرووخ هاي .


وكفت بالباب ووكلت الها : ترد هي يو تظل هنا ؟


راديون : عليش مستعجلة ددشي داخل .


- لا يطيج العافية بتي منك انشلع كلب جلجول بيها و لزوم اردن .


حجه سرحان : والله يا ام ستار اذا سالفة غيض فالوادم مدري شمالها .. كلها مغتاضة والواحد ما جارع روحه وينتر اعلى الوادم .


- مدري ليش حسيته يكصدني بحجيه، اندارت امي و هي تكللها : سمي بسم الله دية و خلنا نمش ، ساعة شيطان لا تخلينها تغلبج .


ايمان : ما اريده خلي الج .


- انا شنهي .. ايسيت منه من ذاك الوكت ، بس بكيفج بعد ما اريدن اجبرنج و تكولين جبرتني ، بهداي فكري ولا تكبرينها و توصلينها لاخوتج و تخلينهم يتشمتون بيج و هم اخوة يوسف .


سرحان : ظلي عدنا الليلة ام ستار


- يطيك العافية يمه ، هم ياله امش بيتنا غاد تايه .


انا بالباب واكفة و امي كامت و اجت احذاي كامت عمة ردحة و سرحان حجه : خو انت بسمريتي بالباب لا دشيتي ولا كعدتي .


- مستعجلة اريد اروحن


- جا صابج ساعة هسة يو كاعدة و شاربة جاي اعلى هالوكفة هاي .


- ابغير وكت ان شاءالله


حجه ويا ابن اخوه و كاله : عمي ناوشني السويج خاطر اوصلنهم


كواغد : لا يطيك العافية خذ راحتك


- لا ما يصير ، ياله خل اوصلنكم.


مشينا انا و امي صعدنا وياه ، وهو يحجي وي امي و عينه علي ، درتله مرة وعاينتله من تبسملي درت عنه .


ردينا للبيت و هو نطر مني الجلمة ما حجيتها .


رد سرحان للبيت و تلكته امه : يمه حرمتك من امس ولليوم ما كاربها و هي عروس ، حتى عيب من عمك ييمه لخاطره ..


- والله يا يمه ما ادري شكللج ، للجن مالي نفس بكلشي ومرات اهيس بروحي مالي داعي بكل هالدنيا .. يا كثركم و يا لمتكم حذاي بس اهيس بروحي غريب بلا وطن .


- عليش تكول هيج .


- السوالف بكلبي جثيرة ... يمكن الله ما خالقني حتى اعيش .. مخلوق اسعى لغيري و اكدن و اتعب ليهم .


- شنهو المعتازة وهيج متضايك ؟

شو مرة و عدك

وليدات خير من الله .. و جاه و مضيف و خيرات الله كلها عدك ، و تكول غريب ومالي وطن .. جا شنهو التريدة بعد .. احمد الله ييمه و اشكره .


- الف الحمد و الشكر لجن انت كل هاي ما معتازها .. راضي يو اكعد بصريفة و اغبش فلاح و اتعب وينهد حيلي ومحقق مرادي . عدي تسوى الدنيا ولا اكولن معتاز .


- مرادك شنهو ؟ .


- الله وحده يعلم مرادي شنهو .


- الله كريم يمه ، دكوم واصل مريتك و يحلها ربك .


- الجهال وينهم ؟


- راحو عد راديون ينامون


- عليش عد راديون .. ندهيهم ينامون بحجرتنا


- المرة عروس ييمه ما يصير


- ولونه ؟ انا خذتها لجلهم مو خاطر اطردنهم و هي تنام بحجرتي ، ندهيهم .


مشيت للحجرة و هي متزوكه و جاره كحل العرب و الاحمر بخدودها و تلكتني : هلا ابو مأمون .


- الجهال ليش عد راديون .


- جا غير بعدنا جداد


- هالحجي ما اسمعنه مرت الاخرى ندهيهم و خلهم ينامون حذانا اعلى القريوله ياااله .


ظلت تعاينلي مستغربة ، اندرت ليها: امشي


فزت : اي هسه .


طلعت تجيبهم و انا نزعت الدشداشة ولبست كلابية خفيفة .. وتمددت .. هيسيتها اجت سويت روحي غفيت ما اعلى بالي اكابل احد .


نومتهم بالكاع و اجت .. عدي ما درت ولا كعدت .. اهيس الدنيا طالعة من بين عيوني .


للفجر عاينت ليها نايمة ، لبست ثيابي وطلعت للشط .. كلش متضايك حتى نومي ما ارتحت بيه ، اتكلب اتكلب جني سمچة مزوهرة.


شما اجيبن واردن .. اعرف روحي متضايكة من كون هدوة دايرة عني وما رضت تحجي وياي .. شكثر نطرت تعاينلي وترضي دليلي بنظرة بس ما هيست انا سرحان حذاها . جني واحد غريب .


نطرت هلبت تمر علي بهالفجرية هاي و تريح افادي لجن ما مرت .. مدري شلون طاوعها دليلها ونامت وهي مغتاضة مني.


طلعت الشمس .. رديت للبيت و كلت للنساوين : استعجل بالريوك اريد اطلع للمعمل .


حجت فخرية : مو جنت تطلع للمعمل اعلى راحتك شجرى و كمت تطلع غباشي ..


- شغلنا جثير .


- شغلك جثير يو البشغل هامك .


ما رد عليها و كام و كال الهم : ما لازم ريوك ، اتريك غاد ، ياله اشوفكم بخير .


مشت فخرية لحجرتها و هي تبجي ، لحكتها راديون و ردحة .. دشن اعليها و كاللها : شنهو الصاير بيناتكم و هيج كابه وما يرضى يسمعلج


- وعلي ما بينا شي ، بس اول امس كلت اله شيخ و تمش ورى وحيدة معرسه .


راديون : معرسه شنهي .. هدوة رجلها اتاسر بالجيش و مات هناك .. وهو ينطر الساعة اليحصل اعليها خاطر يردها اله ، تجين انت تزيدين اعليه و ادوسين بفاده عليش .


- ما ميت اسير .


- ميت دية ، يا اسير يظل عايش و هم كلهم غدوا دماية و بس الجثث تتناثر .


- والله ما اخليهم يصرون يو تنطبك السما اعلى الكاع .


- يو صارت ما ينطر منج و من الول كلت الج انا سرحان موش هاذ اليلاشينا ويضحك ويانا ويا المرة كبحي وما يتوالم .. ذيج عانت الامرين منه وماتت من قهره و هي تنطر يحبها وما حباها تجين هسه تظيدين اعلى افاده عليش .


- شني انت صافة وياه


- جا غير اخوي .. جا اصفن وياج .


- الله ينطيج ديه ، خليني بحالي.


- اي اخليج اخيرلي .. عمه انا اروحن اشوفن ايمان كعدت خافنها تعتاز شي .


....


هدية : دشيت متأخرة للشغل من كون مرت ستار لويلة تون من بطنها والتهيت وياها .. وتأخرت ياله وصلت .


دشيت للمعمل ، وكف سرحان : متأخرة ساعة ، تعرفين يو لالة .


- كصها من اجرتي يشيخ ، من كون الظروف يو بالأيد ما اتأخر .


- يو جانت ظروف اهون .. ياله بويه روحي اعلى شغلج .


حجاها و طلع مشى .. و دلالة تمش تبيع ، وكفت حذاه و حجت : شيخ ما تاخذ مني و تخليني استرزق


- امري بوية شعدج .


- عدي هالثياب هاي .. وهالمحابس الفضة واحجارها كريمة .. والكلايد و شتختار .


اعاين للكلادة .. عجبتني . بيها خرزة خضرة ... وذهبها زين كلت الها : شنهو من ذهب هاذ ؟


- ذهب ٢١ وعلي .. وموش ذهب طكطوكي .. ذهب النجف .


- اطيني ياها ..


خذيتها و حطيتها بجيبي و رديت اعلى راس شغلي، خذوا استراحة الساعة عشرة .. الياكل و اليستراحله شواي .. و انا جويعد و اعاينها من بعيد تسولف ويا صويحباتها بالشغل.


شكثر ما حاوليت اديرن عنها .. لجن عيوني ادورها و ادور رضاها من كونها مغتاضة مني.


دش خنجر للمعمل و هو يكول : هااا الله يساعدهم


- هلا بيك


- كالو طالبني


- ما دامك عطال بطال افلحلي بشغله و شوفلي محاصيل البستان .


- شمالها


- جاي تنباع بسعر التراب .. يعني الصندوك مالت المخضر ابغداد ينباع للتجار ١٠ اضعاف عدنا ... رايدك تشوفلي هالامر و تستطلعلي اعليه .


- تامر .. امش هسه ؟


- اي


مشى عني و انا درت لهدوة مامش بمجانها ، جاي اكومن من مجاني خاطر ادورنها .. اجت من وراي و حطت جدامي ماعون وكالتلي : شني هاذ


انداريت ليها متبسم و هي تجاوبني : تحتومة جايبينها ويانه وكلت اذكرنك ..


رديت كعدت بمجاني مرتاح و كلت الها : مشكورة و جزاج الله الف خير .


دنجيت وانا اكللها : ما زعلانة مني يهدوة .


- جا غير الكلب يكدر يطول بزعله .. و اترهه

لجنه موش بامري .


تبسمت ليها : ما نايم من امس والله .


- عليش ؟


- امشي وبعدين نحج .


- تتهنى بزادك .


- يطيج العافية .


مشت جدامي تتغنج و انا روحي تاهت بيها .. والبسمة تبسمرت بشفافي ، شكثر ما احاول اكضن روحي وما اتبسم .. لجن فرحتي ظاهرة اعلى ارسومي .


خلصت الشغل و الكل طلع .. بس هي ما طلعت ليما فضى المعمل اجت عدي وكالت : عليش ما نايم ؟


- هكو احد ينام وولفه مغتاض ، يا دليل اليرتاح بغيضه ؟


- شكثر ما اكولن ابعد عنك و اهدنك من كون ادروبنا مستحيله ، لجنها جدامي موش طوعي تخط بيه وما اهيس روحي الا احذاك ، بس انا اخافن ارد للشوك و اتأذى .


- ما جاي تشوفين الاذية بالبعد موش بالكرب .


- و تالية هالكرب شنهو ؟


-يكولون صدام راح يطي قرار ويخلي فترة الطلاق من الأسير ٣ سنوات موش ٥ .. من كون الاسارى كثرت و النسوان مالهن والي .. انا اتنطر بنار هلبت يطلكج القاضي خاطر اردن للشوك و اجاهد بعشكج .


- انا لا صدام ولا الأسر حدي .. انا ضيمي ال ثجيل ، الما خلونا من اول ، يخلونا وانا عدي بت منهم ؟


- هدج من هالكلام هاذ و اخذي هالهدية هاي مني الج اعلى الكطعتهن من اسبوعيتج .


- ماله داعي عليش كلفيت روحك

حجيت هيج بس من. شفت الكردانة عيني شاهت .. وخذيتها من ايده بفؤحة و انا اكولن : اااااالله حيل حلوة ، هاي الي


تبسم : صكد فرحتي يهدوة .


- بس انا ما اريدن اكلفنك


- اعلى الضحكة هاي مستعد يومية اجيبلج ذهبة خاطر اتونس بفرحتج .


- انا اروحن .


- ياااااااااا بوية .. من تكولين هالچلمه هاي تفرفحيني .


- عليش


- افرح حيل وعلي .


تبسمت و خذتها و كلت اله : مشكور .. ما اريدن اتأخر .


-مودعة بالله .


مشيت عنه و انا يا خفاتني .. وكلساع اطلع الكردانه و اعاينها وفرحانه بيها .. بس شو صفنت بروحي .. اهلي يو نشدوني منين جبتها شكللهم ؟


اكللهم لكيتها و فضت

مشيت للبيت ونمت و ارتحتلي شواي و كعدت وكلت لامي اعلى الكردانة لجنها ما صدكتني .. و ظلت تعاينلي بنص عين. و انا فرحانه بيها وحاطتها اعلى ركبتي و اتشيم بيها .. شكثر حبيتها.


سرحان رد للبيت مرتاح ..نشد عن جهاله ..

عد راديون كال : شني القضية يمه شما نشدتكم تكلولي عد راديون .


- جا شسوي يا ابني غير هم يروحون غاد يلعبون ويا جهال


- ايمان شلون حالها


- والله يا ابني مصخنة وغادية نار و يس تون من جسمها.


- انا ما خبرت اخوتها رغم كتلها راح اخابرنهم ، اريدنها تهدا و تفرزن امرها وترد لزلمتها بلا شهيرة .


لليل خاكم مر اعلى سرحان و كاله : رايد اخذ ايمان للبيت .


- والله يا ابو ستار البت مريضة وما تكدر اعلى الردة خلها ترتاح والله كم يوم والله كريم .


- البت زغيرة وبيتك عامر ان شالله لجن ولد عمك و كرابتكم رايحين رادين اعلى البيت وانا تصعب علي ظلتها .


- البيت من اول بيت عمتها و اعذرني يا ابو ستار البت يو ما رضت ترد .. انا احطلها حجرة و تعيش بيها حتى يو ما اجو اخوتها ... انا اخوها و هاذ بيت اخوها و عمتها .


حاكم ظل يحجي وياه لجن سرحان مصر اعلى رأيه ما يردها الا هي تطلب.


يومين ياخذون بمرت ستار للجدة وو يكلولها مامش ولادة ، و ترد .. ليما كواغد كابعهة وماخذتها للمستشفى .


من امعاينينها و شايفين بالسونار و لنه الفرخ ميت و الماي اخضر خايس ابطنها .. نكلوها عملية بساع و هم يلومون بكواغد عليش ما جايبتها من كونها يو مطولة البت ميته.


لالة و سمعت الفرخ ميت ابطنها و هي تناطرة مناطر .. ماتت بواجي ، يريدون يحضرونها للعملية و عي تلطم و تنوح جن ميتلها واحد من اهلها موش فرخ ميت ابنها.


سوولها العملية و طلعوها .. لجن لالة جنازة

تبجي وتكلهم : فريخي ، مرادي ومناي عمه ، راح مني فريخي .


وكواغد تواسي بيها

حاكم بهاليومين التحق بدوامه .. بس ستار ما جاي .


اطت الفرخ لاخوتها دفنوه و هي ظلت مجابلة لالة ليما طلعت من المستشفى .. كالت لابوها : اخذني وياك هاذ البيت و طناطله الجتلو فريخي ، كله من حدر يسرى ام الطناطل هي الموتت فريخي .


وصفى البيت لا ايمان ولا لالة بس يسرى تصول و تجول .. وجمارة تخلص وكتها تكعد بالباب ببت اختها .. وتتعارك ويا بنات ستار وتكتل بيهن من كونهن يكتلن و يأذن بنوسة .. ونوسة موش بت هديوة اعلى كثر ما هي ربيبة جميرة.


اما ايمان ف٤ ايام و هي مريضة لا تشيل ايد ولا رجل و حامل .. و نساوة و ايدها مكسورة و جسمها يون . ما كامت من فراشها و بس تبجي ، شكثر ما حاكم حاول بس يشوفها هي ما ترضى تشوفه .


لما التحق حاكم و حجا وياها سرحان : خوية الله بالخير عليج ؟


- هلا


- خوية تريدين تظلين هزا اشيلنج اعلى راسي .. تريدين تردين براحتج ، بس الامر لزوم نحسمه و نحطله حد .. اخابر اخوتج يو تردين ؟

انا يو خابرتهم متأخر هم يكلولي عليش ما كلتلنا ، الراي شنهو خوية .


- ما اريد ارجع لحاكم


- ان جان اعلى الطكة .. زلمة عصبي و طلعت اعصابه جا المرة تحمل يا خوية


- اذا حملت مرة احمل عشرة و اني ما اكدر احمل الضرب ، و حاكم مو بوعيه هن ساحراته


- ياهن الساحراته


- كواغد و يسرى


- كوية جلمتج هاي مردودة عليج، ام ستار نعرفها مرة طيبة و تخاف الله ما تمش بهالدرب لا تظلمين بختها .


- مدامك ما مصدكني خابر اخوتي و شوف رايهم و هم يحكومون ..


- القصة موش ما مصدكج .. انا وياج موش ضدج بس لا تتهمين احد بلا دليل .


- خابر اخوتي ..


- يعني ما تردين ؟


- لا ما ارجع .


-براحتج .


خابر على اخوتها و كال الهم الموضوع هيج و هيج وهي طالبتكم .. اخوها لؤي كال اله : الجمعة احنا يمك.


بهالفترة مر اسبوع اعلى موعد جية ستار بس ما اجا .. كواغد ظل بالها عليه .. ظلت تنشد عنه و عن الاخبار و يخبرونها .. الحرب مشتدة غاد و مامش نزول .


وهي تدعي و تتنخى .. ها يم البنين و ها يبو الحسن .

ايام و اندكت الباب .. فتحتها ولنه ستار جايها فراري .


ويكلها : يمه بعد ما اردن غاد يو يكطعوني


- عليش يمه شجاري


- يمه نقلونه و حطونا بوجه المدافع و كل ساعة تمر انضوك الموت .. وايام مرات نظل بلا اكل .. ما خلينا لا جلاب ولا واوية بالجول ما كطعناهن و اكلناهن من الجوع .


- مت عيني عليك يمه ، ظل بحجرتك ولا تطلع و يو نشد عنك احد اكللهم ما رد .


- اي خليني اشبع نوم بحجرتي ولا اموتن غاد .. ما اروححن بعد .


وظلت امي تغطي اعلى ستار تخاف اعليها من الموت من كونه وحيدها و ما عدها ولد غيره يشيل عنها .


بيوم الجمعة ..

اجو اخوة ايمان و حضر لؤي و حضر الثاني جلال

ساعة الشافوا حالها اغتاضو حيل و كالولها : مو هذا الدكيتي رجل الا تتزوجي ، ارتاحيتي هسه من امسوي بيج هشكل ؟


سرحان : مرة ورجال يجرى بينهم كل شي ، لا تلوم يخوي ، و الحك لله حاكم يحبها .


لؤي : يحبها و ضاربها بهالشكل هذا ، لعد لو يكرهه شيسوي ؟ مو عدنا نسوان اشو مضربناهم هيج.


سرحان : اعلى حجيك هاذ يخوي اليسمع يكول الله ولا جنها ، عرست و هي اثارها بجسمها و حاكم خذاها منكم مجتولة ، عليش هالحجي هاذ ، المرة عدها جهال ، احجولكم حجاية حك و خلوها ترد لزلمتها.


- واذا تريد ترجع لرجلها لويش دا تطلبنه ؟ .. ما ترجعله للافندي المسوي بيها هشكل ؟


- اخوتها ورادت تشكيلهم والاخ يو طاح صاح اخ و انتم اخوتها و تنختكم .. كولو ياله .


- ما عدنا مانع ، ترجع ويانا هسه و تظل عدنا ، بس مو يوم ويومين و تكول رجعوني لحاكم ، كدامك احجيها ، لو راحت ، رجعة لحاكم ما الها .


- الله كريم ، اخذها و خلها ترتاح .. و عود الله يحلها ان شاءالله .


- ورثها شكد صرفت منه و شكد اخذت ، كون تقربله حاكم ؟


- ما اعرف انشدها .


عاينلها و سألها ، كالتله : مبقى منه شي الا القليل .


وهو تسودن و صرخ : حصة كاملة شنو ما بقى منها .. وين حصتج .


- انطيتها لحاكم


- انطيتيها لحاكم و بعد ما ماكل حقج شامرج بهالشكل هذا ؟ .. انت غبية ، اكو وحدة تنطي حصتها ، فلوسج وورث ابوج تنطينه للغرب لييييش .


ظال يصيح و يصرخ بالبيت على الورث ، رايد يوكفه سرحان بس ما رضى ، راح لبيت حاكم لكاه ملتحق .. اخذ اخته و كال الهم : انتظروا ارفع عليكم دعوة واسحب فلوس ابوي وورثه من بين عيونكم ... و طلع و هو يهدد .


بس كواغد متعاركه وياه و كايلتله : هي الاطته شنهي جبرها يو حط السلاح براسها و كال الها اطيني ، زلمة و طاح بشدة و كلنا وكفنا وياه موش بس هو .


- حقها يرجع وعلى داير مليم و من عيونكم و اصبر اليجيكم مني ..


ضربت الباب بوجه كواغد و طردته .. ورجع اخذ اخته و هو يتعارك وياها ويلوم بيها .


......


راديون : نايمة الظهرية وجهال اخوتي منومتهم حذاي ووسن بت كريم اعلى ايدي .. و امي ندهتني

راديون راديون

فزيت ... ها يمه ؟


- كومي غسلي بساع


- شكو ؟


- جسام اعلى الباب يريدج


صفنت بوجهه : صكد تحجين يو ناصبة علي ؟


- وعلي شمالج ، استعجلي بساااع ، الزلمة ناطر .


طفرت مثل المسودنه بساع ، اعاين الروحي و انزل بشعري ، اجي منا وارد منا ما عرفت ابدل يو اتاخر و هو ناطر .


ما لكيت روحي الا فاكه الباب و اعلى حالي هاذ طلعت اركض .. ولني اشوفنه جدامي .. نشغت من الفرحة، هو جان كاعد ، ساعة الشافني فز من كعدته ووكف .


طحت اعليه و حضنته ، و هو لمني بين اديه .. ثغبت و بجيت بلا بوعي .. و هو يحب براسي .


همسلي : مشتاكلج حيل يكل حيلي .


- موش كثري ، ما اصدك طلعت وانت جدامي ، ما تعرف شكثر ناطرة هاللحظة هاي الاشوفنك بيها حر .


حجيتها و بجيت ، حجت امي : الله يديمها عليكم الفرحة و يابختج بجرعته يمه .


درت ليها متبسمه ، وديت اعاينله : يمتى طلعت شوكت اجين انا احسبة بعد شهر الطلعتك ، شلون هيج طلعوك .


- طلعت و الحمد لله رديتلج.


- ورديتلي سالم يبعد اهلي ..

رديت حظنته و هو يضحك .. عاينتله : تسبح مو ، احضرلك الحمام .. متغدي ، يو نعسان .


- ما معتاز شي غيرج ، البسي و تعاي وياي ، هاي طلعتي حتى اهلي بعدني ما مار عليهم .


- بس انا ما محضرة روحي ، لزوم احفن .. انظف نفسي ، لا ظل هنا .


- ما يعتاز انا احبنج هيج .


- لا طالع من سجن و اكابلنك هيج ما يصير وعلي ، ظل هنا .


- لا لزوم اروحن لاهلي .. دامج تريدين تحضرين روحج ..


- عليش ، اروحن وياك


- احتاريت بيج يابوية ، تروحين يو تظلين


- انطر اخلص روحي .


- لا خلصي اعلى راحتج وانا اروحن اشوفن اهلي وامرلج بالليل .


- هااا ، اذا هيج اي جا خوش .


همس: مشتاك لجلماتج و ضحكاتج و كلشي بيج مشتاكله .


- روح لاهلك ورد خبرني بشوكك .


- اموتج بالشوك .


تبسمت و دنجيت حبني براسي ، اعاينلة اللحية و الشعر عالي .. ملامحه هادهن التعب .. و السواد حدر عيونه جنه ليل .. و حيله مهدود .. ترخص مني وراح


وانا رحت لامي ونسوان اخوتي : دبروني شلون الحك يو ما الحك ، لزوم اشتري ثياب جديدة و اانظف نفسي و احفن ووووو هواي هواي .


ملوك : بالاول راح ادزن اعلى ام عباس الحافوفة ، تحفلج و تنظفلج .. و انا راح امش للسوك اشتريلج ثيابج كلها و اللي تعتازيهن ، و نسوان اخوتج احذاج .


- اي جا خوش .


مشت امي دزتلي اعلى الحافوفه و انا اروحن منا وارد منا وما اهيس روحي ، بالي يحجي و فكري مشغول ما اسمعهم شيحجون ولا اركز شيكولون .


اجت الحافوفة نظفتني و خذت وجهي و انا عمري ما ماخذة وجهي هاي اول مرة بحياتي ، اخذ وجهي كله ، جنت شواربي اشيلهن الحدر حاجبي انظفهن .. و ٢٤ ساعة مكابلة مرايتي .. بس هسه حفيت وجه كامل من عبن زلمني جان مفكود و مصيبة اعلى مصيبة لا حفيت ولا خذيت خيط و لا جسلي بال اشيلن شعر و اتزين .


لجن هساه .. ملهوفة اتزين و اشوفن حالي حتى يو لابسة اسود بس المهم انظف وجهي .. انا عيوني خضر اعلى عيون امي و حاجبي ثخين ..

من حفيت و عاينت لنفسي ، ما مصدكه ..

هاي صدك انا يو غيري ؟


مدري جن شفت بروحي ... كمت تجيبن المرايا منا و اتغنز بروحي منا ، و الفرحة ما واسعة افادي .. اعلى كثر ما فرحانه بطلعة رجلي من السجن .


هالزلمة هاذ ما عاشريته جثير ، لجن مدري شمالني جن كل عمري عايشة وياه و كلبي راف حذاه .


ردت امي من السوك و نعلها جايبتلي اثياب ملونه و ازواكات و ملابس جديدة اشكال والوان .


- يااااع ، يمه صكد تحجين ، تجيبيلي الوان ، وين وين اللوان و اخوتي معزايين .


- وليمتها تظلين بالاسود .. رحتي عروس بثوبج الاسود شصار ؟ فكرتي روحج و فكرتي رجلج و لزكتي بيه صالج سنين ..


- ولونه يمه كريم ما صاله سنة من ميت شلون يطاوعني كلبي انزع الاسود


- ويو لبستي يرد ؟ .. انا يو يرد وليدي باسود اكصبنج يو نزعتي لجنه راح بلا رده .. هدينه من الحزن ، نزعي ثيابج و تزيني الرجلج و هو صاله سنين مسجون ومحروم منج لا تجابلينه بأسود .


- ها ، والله ما ادري شكلج .


- دروحي اتسبحي و خل امشطلج شعرج و انعمنه بزيت .. وعود كعدي تصفني .


ضحكت ورحت للحمام كعدت بالطشت و فاكه الحنفية و اغسل اذب الماي علي .. بربعت بنص الماي و انا احجي ويا روحي :،خل ابربع روحي بالماي كبل لا اردن لسلطان يقسطلي الماي تقسط.

غسلت غسلة من العمر .


طلعت واهيس بروحي شخفاتني مدري من الجعج النزل عني مدري السبح مدري انا الفرحانة بروحي وما اهيسنها .


كملت امي شعري و كمت للمراية خاطر اشوفن روحي .. لابسة نفنوف احمر يوصل للركبة ، ووجهي محفوف .. اهيس بروحي وحدة ثانية هالكثر انعجبت بروحي .


جانت هكو ممثلة تطلع بالافلام المصرية من تشوفها امي وتطلع تكول هاي راديون .. اسمها (زبيدة ثروت ) ،بس انا شعري طويل ، حيل طويل و ثخين .


لليل .. سمعت ال ثجيل ذابحين الذايح الطلعت ابنهم و محتفلين والديرة كلها عرفت بطلعت ابن سلطان من السجن.


انطر و اناطر ومليت النطرة و جسام ما مبين

شني نساني ، حتى نعسيت اعلى كثر ما صفنت و انا مكحله و مزوكه روحي .


انداريت لامي : اكلج يمه اروحلهم ؟


- وين ؟


- لال ثجيل


- استجني واركدي ، يجي رجلج و ياخذج


- جا تاخر


- يو ما اجا اليوم يجي باجر


-ياااا وانا حضريت روحي كل هالتحضير و اتفشل غير اتكاوم وياه وعلي .


- بسم الله الرحمن الرحيم توه رد ، كولي يالله .. مكابلته بالطلايب .


- موش انا جويعدة اعلى نار يا يمه .


- يجي وتشبعين تحبحب و تحضن لا تخافين .


- يممممه لا تحجين هيج وعلي استحي.


- جا اصبري فلفلتي اعلى ازلمة ، انطري .


صديت عنها .. شلون فشلتني

ظليت انطر واهيس روحي ضجت منه كلش ، هيج شاف اهله و نساني ، جا انا المن متحضره ؟


لهناك باليل كلش اندكت الباب ، فزيت انا و امي تصيح : ثكلي بتي


- يمه اجا


- جا ما عرفتج اخفيفة


- يمه مشتاكتله وعلي .


فتحت الباب و انا ما طلعتله خاطر افاجئنه بشكلي هاذ موش جدام تمي يظل يبلعم ..


لجن اسمعنه يحجي ويا امي و يكللها : ابوي بايع اخشابي و مفرغ كل الحجرة وما اكدر اخذنها من كون لزوم اجيبن غراض ياله .


- و شلون هسه ؟


- كوة اجيت وعلي الخطار ما فكو من البيت ، ليما فضوا و الكل مشى لحجرته طلعت و اجيتكم بس اذا اخذتها وين احطنها و حجره فارغة تصوصي .


- جا هاي متحضرتلك و ناطرتك نطرة ، يو تفشلت تموت .


ضحك هو وكهكه و هو يكل الها : والله انا مشتاك الها حيل ، جا هي وينها بس خل اشوفنها كبل لا اروحن.


ملوك : عليش ما تبات هنا


- لا ما يصير ، البيت ما بيه محرم


- هسه موش غريب يا وليدي و انا اخذ البنيات و امش بيهن لبيت سرحان و انت ومريتك اخذوا راحتكم بالبيت لوحيدكم ، هي مشتاكتلك و انت مشتاك الها.


- والله تريدين الصدك ما اكللج لا من كون ولهان اعليها حيل .


- جا انطر انده البينات و اخذنها و اكللها تسويلك مجال .


- ناطر .


دشت ملوك و اجا سرحان و سلم اعلىجسام و ظل يتفكد حاله و يتحمدله بالسلامه ، طلعت ملوك و النسوان و الجهال من البيت اندار الهم سرحان :


- ها بويه وين مطين وجهكم بهالليل ؟


ملوك : سلطان بايع اخشابهم و ظال بلا حجرة و هاي مشتاكة لزلمتها كلت يبات الليلة هنا ياخذ راحته ويا مريته .


سرحان : ها اي ، اعلى راحتكم ما بيها شي مرته هي .


جسام : مشكور ابو مأمون


- هلا بيك بويه .


طلعوا كلهم و ظل الباب مفتوح جدام جسام ، هو عاين منا و منا و دش للبيت و سركى الباب .


تمشى و هو يصيح : رويدا ... رويده وينج

خايبة ءهلا البيت غريب واستحي اتمشى بيه .


راديون : هنااا تعال .


تتبع حسها ومشى للحجرة الطلع منها الصوت ، وصل ليها فك الباب و هي كالتله : هلا تفضل .


ظل واكف متبسمر بمجانه : هاي ياهي هاي


ضحكت : يعني ياهي انا ، غير مرتك .


- لا وعلي مبدلينها.


اريدن اصكن حلكي واسكت ، فاكه حلكي واضحك وهو مبحلك بيه ، كرب من عدي وهو مصدوم : انا بحلم يو يو بعلم .


- عليش تكول هيج ؟


- الحسن و الجمال هاذ كله الي ؟


- لا تبالغ ... فرشتلك .. و حتى هاذ التلفزيون شغليته ولو راح يعزل بس.... جراني ليه


- ولج يا تلفزيون انا حيلي مهدود ومناطرج سنين و تكليلي تلفزيون ، كربي جاااي


- جا و الكرامة ؟


ضحك و كال : صاعدة لراسي الكرامة


وسحبني ليه بلهفة .. انا مشتاكتله و هو مشتاكلي و ما نعرف ياهو الازود بالشوك ...


اعلى الحال و يندك الباب دكة قوية ، فزينا اثنينا ....يتبع


لقراءة الفصل التالي : اضغط هنا 
لقراءة باقي حلقات الرواية اضغط على (كحل عرب)
تعليقات



حجم الخط
+
16
-
تباعد السطور
+
2
-