رواية حمل مرعب كاملة بقلم مصطفى مجدي
 |
| رواية حمل مرعب كاملة بقلم مصطفى مجدي |
رواية حمل مرعب الجزء الأول
انا من البنات الشمال اللى الشباب بتحب تشوفهم فى الشوارع ، عندى استعداد اكون كل يوم مع واحد شكل ، المهم هطلع منه بمصلحة ايه ، وانا مبقتش كده من نفسي فيه ظروف كتير هي اللى دفعتنى انى اعمل كده.
من وانا صغيرة وانا عندى هرمونات الانوثة عالية وحاسة بنفسي اوى ، ومن يومى وانا بحب اسمع كلمات الاعجاب واشوف في عين الشباب نظرات عينيهم وهي بتطلع عليا .
انا اسمى رانيا الشامى ، دلوعة وبحب كل حاجة انثوية ، اللبس ، الميكب ، موبايل حديث فيه كاميرا جميلة واصور نفسي طول اليوم صور كتير، وانا فى المدرسة كنت بشاغل الشباب اللى بتقف على باب المدرسة من شباك الفصل ولما اخرج من المدرسة اعمل نفسي مش شايفاهم وانا لمحاهم بجنب عيني وهما هيموتوا ويكلمونى وكأنى مكنتش بكلمهم هما.
كذا مرة حصلت خناقة فى المواصلات بسببي ، وكان اخرهم فى اتوبيس زحمة جدًا ومليان رجالة ، كنت متأخرة على واحدة صاحبتى واضطريت اركبه ، الرجالة ورايا وقدامى ومحدش فيهم عايز يتحرك وكأنهم اصنام واقفين او مستمتعين وحابين يتلزقوا فيا فى الرايحة والجاية لحد ماواحد فيهم اتجرأ ولمسنى ، طبعًا مسكتش وفرجت عليه الاتوبيس كله والرجالة كلها مسكت فى بعض علشانى وقعدت انا وصاحبتى نحكى طول اليوم على الموقف ده.
ووسط الزحمة والخناقات واحد شاب شكله ابن ناس اوى قرصنى من ايدي وادالى ورقة مكتوب فيها رقم تليفونه ، بصراحة عجبنى وحبيت اتكلم معاه ودى كانت بدايتى.
الموضوع ابتدا يطور بنا لحد مافى يوم روحت شقته وقعدنا مع بعض وطبعًا عملنا كل حاجة ومبقتش بنت.
وفى اليوم ده مكنش عندى احساس انى منهارة او انى عملت حاجة غلط ، بالعكس كنت حاسة ان الموضوع عادى ومفيش اى حاجة اثرت فيا ولما طلب نتقابل تانى برضو روحت معاه وبعد كام يوم قررت ابعد عنه بمزاجى واتحايل عليا علشان يتجوزنى وانا رفضت .
انا اهلى ناس بسيطة ومستواهم المادى ضعيف ، كان عندى صاحبة ليا قريبة مني زنت عليا علشان اهرب واسيب اهلى ونشتغل انا وهي فى كباريه فى محافظة تانية ويبقى كله بتمنه ونقدر نعمل الفلوس اللى عايزينها ونفتح اى مشروع ونشم نفسنا شوية.
وفعلا هربت وروحت معاها ، اشتغلنا فى الكباريه ومكنتش شوفت صاحبه خالص ، وساعة اول قبض اجتمعت بيه ، راجل غريب اوى راسم وشم كتير ونظرات عينه مش ولابد ، مش موضوع ان نظراته شمال لان كلنا تحت امره وباشارة منه ، لكن نظراته مريبة وكأنه بيدور على حاجة مش لاقيها او مستنى حاجة .
ولما سألت صاحبتى سلمى عليه قالتلى:
= الراجل ده انا سمعت عنه بلاوى ، بيقولوا عليه مخاوى ، وناس بتقول عليه انه كان مريض نفسي وهرب ومحدش عارف ياخد معاه حق ولا باطل ، ومجند كل اللى فى الكباريه علشان ينقلوله الاخبار بالحرف ، عارفة كمان سمعت عليه ايه ، مش هتصدقى
.. ايه؟!
= سمعت ان الراجل ده جمع فلوسه من البلاد العربية ، اللى اشتغل فيها بيعمل اعمال فى بق الميتين
.. نعم بتتكلمى جد
= معرفش بقى ده جد ولا لأ ، بس بيقولولى ان الناس اللى بتطلب منه كده بتكون ناس واصلة جدًا ومعاهم فلوس كتير
.. طب وهما هيخلوه يعمل كده ليه؟
= علشان يعرفوا اسرار الميت ده ايه وفلوسه فيه ويستولوا عليها
وسط مابنتكلم بصلى جامد افتكرته سمعنا ، لكن بعد ثوانى نده عليا وقالى:
= رانيا تعالى على مكتبي...
يتبع ..
- لقراءة الجزء الثاني : اضغط هنا