القائمة الرئيسية

الصفحات

رواية ليلة اكتمال القمر كاملة - زهور جمال الدين

رواية ليلة اكتمال القمر كاملة - زهور جمال الدين

نتحدث اليوم عن رواية ليلة اكتمال القمر
التي جلبناها لكم اليوم كاملة في هذا المقال الذي سيتم تحديثه كُلما صدرت حلقات جديدة من الرواية
كُل ما عليكم هو متابعتنا فقط لقراءة رائعة زهور جمال الدين الجديدة 
رواية ليلة اكتمال القمر كاملة
لتحميل رواية ليلة اكتمال القمر pdf : اضغط هنا 
رواية ليلة اكتمال القمر كاملة - زهور جمال الدين

رواية ليلة اكتمال القمر الحلقة الأولى مكتوبة 1 للكاتبة  زهور جمال الدين

(الحلقة الاولى )


قصتى بدت من يوم جانا عمى فاتح وقالى يا افراح نبيك تمشى معاى للرحلة اللى دايرتهالنا المدرسة ... ماهو عمى فتوحة نايب مدير فى المدرسة اللى جيهتهم .. وانا عاد وين تلقينى انقز على رجل وحدة فى قولت يا اميمتى خلينى نمشى مع عمى
عمتك صبريه (امها)/ يابنيتى حطى عقلك فى راسك عمك حوشه مافيه الا الدكورة كيف نبعتك تباتى عندهم تى والله خالك مجيد يقتلنى
-افراح/ كيف يااام خيرك نسيتى جنة بنت عمى مش صغيرة تقرا فالثانوى ..والله نقعد معاها ومانطلع من دارها
-صبريه/ كونه عمك عنده بنت فهدا مايمنعش انه حوشه معبى ولاد وخالك مستحيلة يرضى
-افراح تنقرز/ليش هكى يااام ديما حارمتنى من دون البنات ..
-صبريه / لا حارماتك لا سو..سلم بنتى ريحى عظامك
تلفتت افراح لى حناها/ كلميها يا حناى عمرى مامشيت رحله خاطرى نشوف البنات شن يرفعو شن يلبسو علاش هكى
حناها فاطمه/ خليها تمشى ياصبريه بنيتى ..وانتى ديما معقدة روحك ومعقدة بنتك معاك
-صبريه/ فكينى منه ولدك مجيد تشبحى فيه بلا حتى شى الشيح والريح .. امالا كانا نبعت البنت كيف يدير
-عمتك فاطمه/ لكن هدا عمها
-عمك فاتح من برة / احمم احم.. عمتى فاطمه .. شنحالك
فاطمه / اسسس ..اسس علينا الراجل بيسمعنا
وعلت صوتها / تفضل فتوحة وليدى
ساوت صبريه محرمتها على راسها / اهلين يا فاتح اوخى خش تفضل .. شنحالك
دف فاتح الباب بالشوى وخش للجنان / السلام عليكم
وسلم على صبريه مرت خوه وعلى امها عمتك فاطمه ونشد عالحال ولاحوال وقاللهم عالرحلة
-فاتح/ هوا احنا منعطلوش ماشيين لى عين الشرشارة وقبل المغرب بادن الله نكونو هنايا
-صبريه شادة صفرة وتنقى فالعدس ومنزلة عيونها تحشمت منه تبى تخلى طرفها / ياوخى كانا عليا انا ارفعها من توة بنت خوك .. لكن انت تعرف مجيد خوى مايبيهاش تخطاه بكل.. اهو قريب ايروح وشاوره كانا قالك ارفعها خلى تمشى عادى
-فاتح ضحك / تمام تو نراجيه برة
-فاطمه / اقعد وليدى اشرب طاسه شاهى
-فاتح / صحيتى ياعمتى ..مدامه مجيد مهناش خلى نراجيه برة وخلاص ...
طلع فاتح وطلعت افراح تجرى وراه
-صبريه تلفتت لى امها ونزلت نضراتها / ومن امتى فتوحة سلفى يشد فى افراح بنتى هالشدان هدا كله .. ترا كيف الموضوع ماخشليش دماغى
-فاطمه/ مافيك من شك
-صبريه/ توة احنا علاش انكثرو فالدوة والشك .. بالنسبه لى خوى مجيد بالتاكيد بيرفض انه يخلى افراح تمشى معاه وانتهت المشكلة
جى مجيد وكلمه فاتح .. قولو حشمه على روحه لانه مهما يكون فاتح عم البنت والمفروض عنده فيها حصه.. عالمهم كلمه من هنايا وكلمه من هنايا مع تنقيز البنت وطلبها للمشى وافق مجيد انه يخليها تمشى مع عمها للرحلة 😳!!
.
.
.
.
فالجنان

صبريه تنقرز على امها/ انا منبيش بنتى تفارقنى يااام حرة فيها انا
-فاطمه / نقصى صوتك خوك بيسمعك تقعدى فالمناقد انتى وياه .. اهو وخيك دار حل وقال لى عمها فوت عليها الصبح وخلاص معناها مش ح تبات عندهم
-صبريه/ هوا هدا داير روحه حازر عليها من ولاد عمها ..تى ماهو بيبعتها مع مدرسة مخلطه بالمفرخ .. كانا بوها حى راهو هدا كله لا يصيرلى لا يصيرلها ولا يتحكم فينا حد
-فاطمه / ايييييه علينا عاد

صبريه ارملة زوجها متوفى من 9 سنوات .. مكسوبها افراح بنتها روحت بيها لى حوش بوها وهيا عمرها عامين .. وتوة اهو كبرت وتقرا صف الخامس... خالها مجيد عزرى وواعر
.
.
.

ثانى يوم فات عليهم فاتح لقى افراح واتيه طلعت و مشت معاه وامها لاخر لحظه توصى ..افراح دايرة توكه ولابسة قفطان العيد وفاتحه شعرها الاصفر زى الدهب وطالعه ببراءة طفلة
ركبت مع عمها من قدام ومشووووووو ....
.
.
.
.

قبل المغرب بشوى ...

فاتح اتصل بي مجيد....
-فاتح يلكلك / اااا الو
-مجيد/ اهلين يافتوحه
-فاتح / قوتتلك ... اهو جبت افراح افتحلها باب الحوش
-مجيد / انا توة طلعت مشيت للجامع خاطر المغرب قرب .. نزلها وقوللها اطق على امها تو تفتحلها
-فاتح / تمام اوخى تمام ...
وصكرو المكالمه .....

دور فاتح السيارة وفات من قدام عمك الاجنف جارهم
-فاتح/ خير يا عمى الاجنف
-الاجنف رد عليه بلا نيه / خير خير

.
.
.
.
ادن المغرب وصلى مجيد فالجامع .... وروح ..
خش للحوش ... لقى صبرية مقعمزة عالكرسى وجهها متغيير ومايتفسرش وامه كيف سلمت من الصلاة
-مجيد يبي يزبط خيرهم / شنو بنتك ماجابت شى يتاكل من الرحلة
-صبريه قامت راسها مستغربة هدوءه/ افراح ماروحتش راهو
مجيد / ااه ... ماروحتش...
تلفت لى امه / كيف ماروحتش عمها حطها من قبل المغرب

وطلع من باب الحوش بخطوات سريعه وصبريه تمشى وراه
صبريه تمشى وراه وتصفق فى ايديها / ياوخى الليل ليل البنيه وين
-مجيد قايم التليفون يتصل/قتلك عمها من قبل المغرب حطها قدام الحوش
-صبريه بدت تبكى/ ياحليلى .. يا غبارتى .. ياندايمى غير شن بعتنى فى بنتى بروحها

-مجيد حامق ويحكى فالتليفون / البنت وين ياراجل
-فاتح / من بنت .. خيركم العفو
-مجيد / افراح ....... افراح مالقيناهاش!!!!!!!!!!😱
-فاتح / اااه .. شن تحكى انت .. صكر هانى جايك
.
.
.
____________________________________________

_

طلع مجيد يلود فالشارع شافه من اوله لى اخره بالك يلاقى البنيه .... رجع للحوش يشبح فى امه عمتك فاطمه واقفه قدام الباب.. وتلود يمين ويسار ... سرع خطواته ووصل لى امه ..
-مجيد حامق/ شن اديري قدام الباب يااام خيرك طالعه
-عمتك فاطمه / ياوليدى اختك دايرتلى حالة الداخل خلتنى حتى انا نمولج
-مجيد/ خشى لداخل يمى وردى بالك تطلعي لا انتى ولا بنتك


فى هالاثناء ركب فاتح سيارته هوا ولده معاد ومشى لى حوش عمتك فاطمه .. وصل بعد عشرة دقايق درس السيارة ونزل يلاقى مجيد واقف قدام الباب يمولج
-فاتح / خيركم ياراجل شن فى
-مجيد / ورحمه بوى كان ماتطلع البنت يافاتح مايصير بينى وبينك طيب
-فاتح يلقى فى ايديه / البنت وصلتها من بكرى..وكلمتك ياراجل.. نزلت من سيارتى ولقت باب القراج مفتوح خشت منه
-معاد / غير بالشوية يابوى خلى نفهمو
-مجيد/ انت ضم فمك وماليكش علاقة بالموضوع
-معاد يعيط/ انا مالياش علاقة بالموضوع ... البنت بنت عمى وشرفها من شرفى ومدامه هكى الكلام .. والله يا مجيد كان ماطلعها مايصير بينا وبينك طيب زى ماقلت انت
مجيد ينقز عليه يطبقله رقبته ويخنقه/ ياصغار الحرام انتم وبوكم ضيعتو البنت وجايين تبو تحطوها فى راسى

طاحو يضاربو وفاتح يحز وعمتك فاطمه تعيط من ورا الباب
جوهم الجيران يجرو ...
عمك الطاهر/ استهدى بالله يامجيد خيركم شن فى
-عمتك فاطمه من الجنان / ياوالله نهار امزقح على راسى وين كان مدسوسلى بس
-مجيد يعيط / خشى للحوش انتى وبنتك يااام
فاتح يرعش/ يا الاجنف مش كنت هنايا انا قبل شويا ولا
-الاجنف/ صحيح قبل شوى فوتت من قدامى وسلمت عليا
-فاتح / حطيت البنيه قدام الباب خليتها خشت ومشيت
-الاجنف/ حتى انا ريتها لما خشت من باب الحوش
ووجه يده على باب حوش مجيد
-مجيد / منين خشت ياحاج من الباب هدا
-الاجنف/ اى نعم من الباب هدا
-مجيد تلفت لى فاتح/ انت مش قلتلى قبل شوى انها خشت من باب القراج لقاته مفتوح
-معاد / انت تتهم فينا ولا شنو
-عمك سالم جارهم واقف/ مافهمنا شى ياناس فهمونا شنو فى
-مجيد حامق/ بنت اختى رفعها عمها معاه للرحلة متع مدرسته ويقول حطيتها فالحوش وامها تقول بنتى ماروحتش
-عمك سالم / يارسول الله حضر وجهك
-الطاهر جارهم / شنو الدم هدا يامجيد !!!!!
تلفتو قدام الباب يلاقو نقط دم عالارض ....
الاجنف/ ماحد يتحرك لين توصل الشرطه

توة زعما البنت وين مشت .. ومنو مسؤل على اختفائها ...
اااه قصدكم هيا اختفت ... ولا زعما ضاعت ... وشنو الدم اللى قدام الباب ..................الحلقات الجايه نفهمو

القصة مشوقة وفيها اثارة .....تابعونا
زهور جمال الدين 🔥

تمت ...... ويتبع

رواية ليلة اكتمال القمر الحلقة الثانية - زهور جمال الدين

زهور جمال الدين (2)


قدام حوش مجيد ...

مجيد وفاتح ومعاد والتريس يتناقشو

عمك سالم جارهم / مافهمنا شى ياناس فهمونا شنو فى
-مجيد حامق/ بنت اختى رفعها عمها فاتح معاه للرحلة متع مدرسته ويقول حطيتها فالحوش وامها تقول بنتى ماروحتش
-عمك سالم / يارسول الله حضر وجهك
-الطاهر جارهم وجه يده لى قدام الباب متع مجيد/ شنو الدم هدا يامجيد !!!!!
تلفتو قدام الباب يلاقو نقط دم عالارض ....
الاجنف/ ماحد يتحرك لين توصل الشرطه
-معاد مشى لى سيارته / تى اطلع يابوى هادو كمشة بسطاردية متلقطين
فاتح لاحق ولده / انا ماشى للمركز يامجيد واللى عنده حق ياخده
عمتك فاطمه تنادى من داخل/ مجيد ياوليدى الحقنا اختك طاحت عليا
خش مجيد يجرى للحوش وتحركت سيارة معاد ... وخلو الجيران فى حوسة..........ياوالله ليله مباركة

جت عمتك ماليكة ام الطاهر جارهم خشت طول للحوش تجرى سمعت العيطه .. وفتحو حوش الاجنف جارهم باب حوشهم خاطر سمعو دوشه ..

خشو لقو صبريه صايخة بخو عليها شوية اميه وقعمزوها وهاتك يابكى وياعياط ويابنيتى وينك وين مشيتى

___________________________________________

_

فالطريق

فاتح قايم يديه يشالى / البنيه وين الله لاتربحك لا انت ولا خوتك
-معاد/ اسمع يابوى ماتحطهاش فى راسى.. برة شوف صغارك وين رفعوها
-فاتح / ماكم قلتولى قبل العصر تكون عندك .. وينها توة شن بنقول لى امها وشن بندير
-معاد / ياحاج انت خليت مسؤليتك من لما كلمته وقلتله اهو وصلتهالك
-فاتح/ تمثيليه فاشله ... جايبلى خوك كمال ملبسه جلابيه
اهو الكدبة انكشفت والاجنف جارهم قال خشت مالباب وانا قلت خشت مالقراج
-معاد/ المهم توة انك وصلتها وعندك شاهد انك جيت ونزلت البنت ومشيت
-فاتح / وكان يجيبوه فالتحقيق ويقوللهم البنت لابسه جلابيه ويكدبنى خالها ويقول بعتها بقفطان
-معاد / اوووووه علينا يابوى انت جاى تهدى ولا تولع فالنار
-فاتح يعيط / نبى البنيه وين توة وشن درتولها ...خيركم ماجبتوهاش
-معاد / اسأل ولدك نورى انا مانعرف شى ...
-فاتح / الله لاتربحك ولا تربح نورى معاك ....

وبدل مايمشو للشرطة ويشكو .. غيرو رايهم وروحو لى حوشهم وخلو الشكوى بالضياع تجى من خالها احسن

.
.
.
.
وصل فاتح لى حوشه .....

نزل من السيارة يلاقى ولده نورى كيف درس ...
مشاله فاتح يجرى شده من حوايجه/ ياولد الحرام البنت وين
-نورى يفك فى نفسه / تى حول يابوى ...
-فاتح يعيط / وينها البنت قلتولى العصر نردوهالك
جنه بنتهم واقفه فالسقيفه سمعت الكلام كله .. عيونها جاحضات وهيا مخلوعة مالكلام اللى تسمع فيه ...زعما منو البنت اللى قاعدين يتعاركو على خاطرها
-نورى / الليله تكون عندك ياراجل غير خلينى ندير اتصالاتى
-معاد / نبى نفهم ...انت تزلبحت ولا كيف يا نورى
-نورى قايم تليفونه / قاعد منولدش اللى بيزلبح نورى
-فاتح / امالا شنو صار .. قلتلى ساعتين زمان ونجيبها واهى لتوة ماطلعتش
-نورى / اسمع يابوى ... الخبر هدا يموت هنايا ...انتو فاهمين ولا لا
-معاد / احنا درنا كل اللى قلتنا عليه ... ولبسنا كمال جلابيه ووشاح ونزلناها قدام حوش مجيد وشافنا الاجنف جارهم
وجنه تسمع فيهم ..حستهم يحكو على افراح بنت عمها ..
-نورى / ايووووه هكى ... هادى هيا الاخبار الصح مش جايين تعيطو عليا ...
-معاد / لكن فى قطرات دم قدام حوش مجيد شكله خوك كمال مجروح ولا مفهمتش ... انتو تعاركتو مع الجماعة
-فاتح / غير كانكم تفهمونى جماعة شنو ... يارسول الله حاسبينى برانى وماتقولولى فى شى... اهو عمها يبي يبلغ المركز عالافل نعرف شن نقول لما ينشدونى
-فتح نورى تليفونه ويتصل/ غير اصبر يابوى .. بنقولولك امالا بندسو عليك
وعطاهم بالضهر وبعد عليهم شوى / الوو..... الو ... تسمع فيا ... الو .... اهلين.. ااه بين حيا وموت ... غير اصبر بس نرجعلك توة انت وين مكانك ... تى ماهو قلتلى مايصيرلها شى ... الله لاتربحكم ... غير صكر خلى نكلم عرفك

واتصل بي شخص اسمه الازرق

-نورى / الو
-الازرق/ هااا
-نورى / الله عطك لوا فى لسانك .. البنيه وين
-الازرق بهدوء/ اهيا قدامى
-نورى / وشن صار مش قلتلى نص الليل نسلمهالك
-الازرق/ وانا عند كلامى.. ونص الليل قاعد موصلش
-نورى / باهى غير شن صار فيها البنيه
-الازرق يتكلم باجرام / اسمععع... ماديرليش روحك خايف عليها توة ... قلتلك يانسلمهالك بروحها ويانسلمهالك بلا روح وانت وافقت
-نورى / ياودى غير خيرك تعيط .. انا مش هدا المقصود من سؤالى .. انا قصدى امتى بتردهالى
-الازرق/ لما نكمل ... الباب لتوة منفتحش ..دمها ماسدش
-نورى فتح عيونه/ دمها!!!!
-الازرق/ امالا احنا شن نبو منها ...شعرها ولا عيونها ...
-نورى / باهى غير اسمع
-الازرق / اسمع انت .... فوتنى لين نتصل بيك انا
-نورى / لا رد بالك تتصل لان خالها بيبلغ المركز .. نخاف يحصلو على تليفونى ويزبطو رقمك ... خلينى انا تو نكلمك فى نص الليل
-الازرق/ تم الكلام ...
وصكرو الخط.....

بعد ساعه جتهم سيارة الشرطة قالت لى فاتح ان مبلغين فيه وبالفعل مشى هوا وولاده للمركز .... وهدا كله ومرته ماعلمها بشى ... وبنته جنه خاشه لى دارها وتبكى وخلاص بعد اللى سمعاته

_____________________________________________

_

فى حوازة كبيرة

يبان الازرق واقف جنب بير ومعاه زوز انفار .... ووراهم حوش صغيرون بابه لوح ......
مشى الازرق للحوش فتح باب اللوح وخش / شنو يا جماعة مزال
-ممرضه لابسه بالطو ابيض واقفه جنب بنيه مربطينها على كرسى ... البنت هادى تكون افراح يانارى 😨😱
-افراح تبكى وتشبح للازرق / ننبببببي امى
-الازرق / شن صار يا صفاء
-الممرضه صفاء واضح لكنتها من المغرب العربي و مش ليبيه / اهو نشربو فيها سؤال ... البنت جفت بين حيا وموت كان تعصرها عصر ماعاد تطلع منها قطرة دم ....
-الازرق/ اسمعى ياصفاء ماتركبيليش الدمار .. هادى ثالث سنه نحاول فيها والشيخ عرجون اكدلى اننا صادفنا الليلة ليلة الاكتمال
-صفاء/ باهى قوللهم يستعجلو البنية بتموت بين ايدينا وانتم قلتو تبوها حية قبل مايتم كل شى
خلاهم واقغه وزاد تقدم شوى خشى زى الصالة الصغيرة لقى زوز شيوخ لابسين ابيض ومربطين روسهم بي زمالة خضرا

-الازرق/ شن صار ياشيخ رضوان
-الشيخ رضوان يتكلم مكصر زى السودانى / طالبين الدم بزيادة
-الازرق/ المهم البنيه مطابقه للمطلوب ولا لا
-الشيخ رضوان / مطابقه 100% ..وحتى حجمها كويس ...
مشكلتها فالدم ...دمها ناقص ..
-الازرق/ توة مشو اموركم باللى جاكم ماعندى كيف بنديرلها توة ...

افراح تشبح للازرق واقف بعيد وتدكر فى اللى صار معاها ....

تدكر لما جاهم عمها فاتح الصبح ... وطلعت فرحانه فاتحه شعرها وحاطه توكات ... مشت هيا وعمها بالسيارة لحد ماوصلو لى باص لونها ابيض .. درس عمها جنبها
-فاتح/ انزلى فروحة واركبى فالباص هادى
-افراح / مش منمشى معاك ياعمى
-فاتح / انا بنركب فى باص الطلبه وانتى منركبك فى باص المدرسين بيش مايديروليش مشكلة ويقولولى جايب حد معاك من برة
-افراح بادب / حاضر ياعمى ...
وفتحت الباب ونزلت وفى يدها سلة الفطور اللى دايرتهالها امها ... مشت للباص لقت 6 رجالة ومراة راكبين فيه ومعاهم السواق ...قعدت تشبح لى زوز منهم لابسين عِمة زى الشيوخ
وركب وراها كمال ولد عمها
-افراح تلفتتله/ اهلين كمال
-كمال سلم عليها / اهلين افراح كيف حالك
-افراح / الحمدلله .. قصدك ماشى معانا
-كمال ابتسم / ايه قصدى ماشى معاكم ...
واشر عالمراة المقعمزة / تقدرى تقعمزى جنب الابله صفاء
-افراح / حاضر
ومشت قعمزت جنب الابلة صفاء ..وحطت سلة الفطور جنبها

مشت الباص فطريق طويلة ... مشت مشت مشت ... لحد مالبنت بدت تتململ
-افراح / كمال ...كمال
-كمال / ايوة
-افراح / مزال ماوصلناش ... نحس فالجو قريب ضهر
-كمال/ مزال
-افراح / بالك غير السواق ريح الطريق
-كمال / لا لا غير شكله الطريق مسكرة ولف لفان
-افراح / انت غير.....
-كمال / توة الناس كلها ساكته الا انتى تدوى
وهدا اللى محير افراح بالرغم من صغر سنها لكن الموضوع وغوشها ليش كلهم ساكتين ....( ممكن بيش ماتزبطش انهم مش ليبيين )
.
.
.
.
قيس العصر وصلو لى بوابه كبيرة ... نزل السواق فتحها ودخلو هاديكة الباص ... والبنيه تتفرج وساكته ... المكان فيه حوش صغير على جنب ... ويبان بير صغيرون فالوسط ...
رجع السواق لمكانه ودخل الباص/ هيا الحمدلله على سلامتكم
-كلهم بالهمس/ الله يسلمك
بدو ينزلو بالواحد ..... ماقعد حد الا افراح ...
رجع كمال للباب متع الباص/ افراح انزلى خيرك
دخلت افراح يدها للسلة متع الاكل متعها.... وخدت منها موس دساته فى كمها ... ومسكت السلة بيدها الثانيه وبدت تمشىوهيا ترعش .... نزلت من الباب وتلفتت للبوابه الرئيسيه متع المكان ومشتلها تجرى لانها مازالت مفتوحه وتبى تهرب منها .... مشى كمال يجرى وراها شدها من حوايجها ....
تلفتت افراح وبحركة سريعه طلعت الموس وضرباته بيه فى يده ضربه قوية وبدت يده تنزف بالدم ... لكن افراح ماقدرتش تهرب لان الازرق والممرضه ونفر ثانى اسمه دحدوح لحقوها طول وشدوها ..... دخلوها لى هداكة الحوش وقعمزوها على كرشى ربطولها فيه يديها .... اما كمال ركب مع السواق ورجع معاه من حيث ماجى لان الازرق لزه لما لقاه ينزف بالدم
خلو هاديكة البنيه مقعمزة دخلوها مرتين بس للحمام .. وهما يشربو فيها فى عصير العنب وعصير الجوافة وهيا مش فاهمه ... وماشادة غير كلمه نبى امى ارفعونى لى امى ...

قيس المغرب .....
واقف قدام باب الحوش الصغير الشيخ رضوان وجنبه الشيخ عرجون ويشبحو للسماء
-رضوان /الحمدلله لم نخطئ الموعد .. شوف انها ليلة اكتمال القمر
-الشيخ عرجون / اى والله هيا
-رضوان / اعطيهم الامر بالبدء ..
فتح عمك عرجون الباب وخش للممر/ ابدأ ياخوى الازرق شغلك ... المغرب سيؤدن فالحال
-الازرق/ هيا صفاء اوخيتى هى... سقدينا معش وقت
مشت صفاء لى افراح وحطت الرباط اللى يديرو فيه فوق المرفق وبدت تسحب منها فى دم ... وافراح تبكى وفى قولت شن اديرو ....

____________________________________________

_

قيس الساعه 1 فالليل ...

الازرق يمولج فى هاديكة الساحه ويولع فى دخان ورا دخان
ويسمع فى ضرب البنادير فالحوش يديرو فى حضرة والبخور طالع من الرواشن ... لا عندهم جيران ولا جنبهم اراضى ... خلا مخلى ماهناك من يقوللهم شن اديرو ...

الدحدوح ومنير رجالة الازرق واقفين جنب البير ....كأنهم يراجو فى حاجه .....
وهما واقفين لين بدى سلوم يطلع من هداكة البير ... وبدى الازرق واللى معاه يتناقزو/ السلوم طلع ...السلوم طلع...

خش الازرق يجرى لى رضوان وعمك عرجون يعيط / طلع ... طلع السلوم ....
طول وقفو الحضرة وطلعو يجرو يشبحو للسلوم اللى طلع وفرحانين
-عرجون / جيبو البنت
خشو الدحدوح ومنير ومعاهم صفاء يجرو ...
فكتلها صفاء ايديها وقاموها منير والدحدوح بين ايديهم وطلعو يجرو وقفو بيها جنب هداكة البير
-عرجون / تنزل انت ولا ننزل انا ياشيخ رضوان
-رضوان / هى ننزلو حتى الزوز
وتلفت لى منير / حطلى البنت على كتفى
بالفعل حط منير افراح على كتف عمك رضوان وركب عالبلوكات اللى من برة وحط رجله عالسلوم وبدى ينزل والشيخ عرجون فى جرته .....
كملو هادوكة الدرجات ونزلو قريب 3 متر .. فتحو زى سرداب صغير طبس رضوان هوا الاول خش منه .. وقعد عرجون يمدله فى افراح وهوا يجبد ... جبدو افراح بالكامل وخشو لمكان مظلم .. فتح رضوان ضى تليفونه ... وطلع ورقة من جيبه وبدى يقرا فى كلام زى الطلاسم ... وجه رضوان ضى التليفون للمكان يلقاه مكان وااااسع لكن يطبق الخلوق .. بعد ماكملو نزلو على ركابهم وطلعو ثانى من السرداب
-عرجون / نصكر باب السرداب
-رضوان / لا خليه مفتوح
طلعو للسلوم ركبو منه لنهاية البير من فوق
-الازرق/ وين البنت
-رضوان / خليناها لوطا
-الازرق/ تى كيف تخافو تتعفن وتطلع ريحتها وننكشفو
-عرجون / وخلى تعفن وتطلع ريحتها منةبيعرف اننا احنا اللى كنا فالمكان ...
-الازرق/ مافيهاش باس ندفنوها ونفتكو من هالموزقو
-رضوان / شن تخرف انت... كانا ندفنوها نحصلو فمصايب مايعلم بيها حد الا ربي
-الازرق/ باهى غير كملو هى

مشو قدام باب هداكة الحوش وبدو يبخرو فبخور ويغنو فى غنى يخوف .............وبدو يسمعو فى حاجات اطيح داخل الحوش ..... الازرق واللى معاه قريب يرقصو من الفرحة
وهاديكة الحاجات اطيح فالحوش بوووم .. بوووم ...
وعرجون ورضوان يقرو فالطلاسم ماوقفوش لحد ماوقف صوت الحاجات اللى اطيح ....

وفتحو الباب وخشو فرحانين يلاقو ثلاث شوالات متوسطه
.. شوال فيه دهب مكصر ...وشوال فيه فلوس قديمة حديد متع استعمال زماااان .. وشوال فيه حجارة

-رضوان / شوال الفلوس القديمة لينا زى ماتفاهمنا مالاول
-الازرق حاط يده عالدهب/ الفلوس خودوهم ماعندى كيف نصرفهم ... لكن قسمه الدهب زى ماتفاهمنا مالاول راهو
-عرجون يضحك / تمام ...غير كلم نورى هيا
-الازرق/ الباص قريب يوصل ... نمشوله احنا ونتفاهمو

وبالفعل جاهم الباص وطلعو من الحوش يشاملو فالشوالات
-صفاء تلفتت للبير / السلوم قاعد
-عرجون / ينزل بروحه بلا تدخل مننا

ووصل الباص وطلعو كلهم ......

قيس الفجر .... الشمس بزغت ... خيوط الشمس نزلو حتى للبير .. وخشت اشاعه من باب السرداب المفتوح جت على وجه افراح .... حركت رموشها ... تاريتها البنت حيه ... فاقت .. ومن حرارة الروح بدت تكر فى روحها وطلعت من هداكة السرداب ... حطت يديها عالسلوم تركب فى درجاته واطيح .. تركب واطيح لحد ماركبت من الدرجات لنهاية البير وطلعت منه ... مشت خطوتين وطاحت ...
رعشت مع بعضها وقلبت عيونها وجتها رجفة ولفضت انفاسها الاخيرة ............ ماتت

يومين وامها وخالها يمولوجو وفتحو قضيه وماخلو وين سألو ... والبنت ملوحة ميته وعيونها مقلوبات .......
لحد ماجى راجل راكب على جمل واضح عليه من الافارقه لقى حويش مبنى على تركينه فتح البوابه وخش ترا شن قعد ينادى بالافريقى ...مارد عليه حد زبط ان الحوش فاضى... لكن شم صنه غريبه ... شاف بير على جنب مشى جيهته يلاقى بنيه ميته ملوحه ... طبعا الراجل مش ليبي ولو بلغ عن الجثة خاف يخش فى سين وجيم ..ولكن سخفاته البنت واكرام الميت دفنه .... قعد يدور حوالين المكان يلقاش حاجه يحفر بيها ... وبالفعل لقى مسحة متع حفر ......حفر حفرة ودفن فيها الجثة😱و غطاها بالتراب وطلع مالمكان ...

____________________________________________

تمت ........ويتبع

توة البنية اندفنت .... عكس مايبو هما
لكن احنا ماعرفناش ليش صغار عمها اختاروها هيا بالدات ..
ومعرفناش شن صار فل امها طول اليومين ... ومعرفناش الدهب اللى طلع شن صار فيه

الحلقه الجاية نعرفو 😊😊

لايكاتكم ياقمرات خلونى نشوفكم🔥

خشو على حساب قيس الفيتوري تلقوه منزل رواية من جزئين اقروها 😊

نحبكم

رواية ليلة اكتمال القمر الحلقة الثالثه - زهور جمال الدين

زهور جمال الدين(3)


_

فى مربوعة الازرق فى استراحته البعيدة ...
مقعمز الازرق يوزن فالدهب وحاط تحت رجله كلاشن .. ونورى مقعمز على فراش ومتكى عالحيط ... والشيخ رضوان والشيخ عرجون مقعمزين جنب بعض ...

-نورى فرحان / امبحبحة الحكاية يالازرق
-الازرق يضحك / غير اسكت بس خلى نكمل الوزن
-نورى / مش قادر نهدا .. رانى فرحان بنرقص ... لتوة واصلين 11 كيلو دهب
-الشيخ رضوان/ ومزال ...هدا دهب زمنى .. دهب الجان والكهوف مايتخلطش .. صاغ سليم مش كيف الدهب متع السوق يغشو فيه
-نورى / كيف يغشو فيه .. قصدك يخلطو فيه بالمعادن الثانيه
-الشيخ عرجون مقعمز وراه يضحك / تى كيف يخلطو فيه شنو تحساب الميزان ساهل ... يغشو فيه قصده يشكلو فيه زى الورقه الرهيفة .. مش كيف الدهب هدا كبير ويوزن
-نورى يصفق فى ايديه ويغنى / والحال تساوى الحمدالله والحال تساوى ....
-رضوان يضحك / هادى اغنيه ولا شنو
-نورى فرحان / هادى تأليفة منى توة رانى مالاقى الفرحة وين نحطها
-الازرق/ ياودى خلاص راكم بتلخبطونى
-عرجون / لا تتلخبط لا شى .. حتى احنا نعدو معاك واصل 17 كيلو توة
-الازرق ضحك / صار راد بالك ياشيخ
عرجون / كيف عاد 😁

وزنو هداكة الشوال لقوه 23 كيلو دهب .. وبدو يقسمو فيه بين بعضهم ... نورى مالاول شارط عليهم بياخد الثلث كله وهما يقسمو الثلثين ...

رجع الازرق يوزن لعند وصل ثلث ال23 كيلو .. حطهم فى كيس كبير ... ومدهم لى نورى
-الازرق/ هاك ثلثك يانورى
قام نورى راسه يلاقى افراح واقفه جنب الكيس وهيا مادة يديها الزوز وتضحكله ... جاته رعشه وفمه اتسبت ...وعيونه جحضو
الازرق لاحظه / خيرك يانورى
-نورى يرعش/ افففففف.. افرااااح .....

_____________________________________________

_

فى حوش مجيد

الحوش يملا ويفرغ ...

صبريه / يابنيتى ...يلى ماريتى يوم باهى لا انتى ولا امك ..
يلى مات بوك وخلاك لحمه حمرا .. لا ادلعتى ..ولاركبتى سيارة ولامشيتى للالعاب ولا قلتى يابابا
-عمتك فاطمه تبكى/ قولى ياربي ... اطلبى الله يردهالك سالمه وانتى تعددى عليها وهيا حية
-صبريه تبكى / خليييينى ...خلينى ياام نعيط على بنتى مكسوبي .. حاق تحسابيها بتولى .. حاق تحسابينى مزال بنحضنها ولا بنلبسها ولا بتمشى ولا بتجى ياحليلى على بنيتى اللى مشت ومعاد بتولى .. اهو يومين يفركسو لا السمى قالت ريتها ولا الوطا قالت ريتها
-عمتك ماليكة جارتهم / يابنيتى ياسرك مادايرة فى روحك .. خالها مامخلى جهد بلغ المركز وهوينهم يجرو ويدورو
وقف حسناء بنت جيرانهم / عمتى فاطمه ... مدرسات افراح جايين يسألو
-فاطمه تمسح فدموعها / دخليهم للمربوعة تو نمشو غادى .. نوضى يا ماليكة هى
-ماليكة / صبرية يابنيتى .. على خاطرى نوضى اغسلى وجهك وبدلى حوايجك هادو ناس برانيه وجايين ينشدو مش باهية عليك يشوفوك هكى
-صبريه تبكى / فرقت غسيلى وتبديلى يااااربي كانك واخد بنتى خودنى معاها يااارب
-فاطمه / اللطف علينا

بالفعل طلعت فاطمه للمدرسات استقبلتهم وسلمت عليهم وقعدت عمتك ماليكة مع صبريه بدلت جلابيتها ووشاحها وطلعت لى مدرسات بنتها ... ولقت حتى المديرة والاخصائية جايين معاهم ... شوره وقت استراحة وملمدين بعضهم

-ابله امنه المديرة /افراح من اوائل الطالبات واكثرهم ادب صدقينى والله ماتخافى عليها وبأدن تروحلك سالمه
ابله سميرة ابلتها العربي تمسح فدموعها / الاسبوع اللى فات درتلهم امتحان ..جاربت فيه ثلاثين من ثلاثين
-فاطمه / الله غالب
وصبريه تبكى وخلاص ...
خشت حسناء جايبه اكواب عصير ( حسناء بنت جيرانهم وجايه تعول عليهم عارفتهم ماعندهمش صبايا)
-ابله سناء الاخصائية خدت صاسة عصير / سبحان الله ديما الطالب المشكور نلاقو مواقف مش محمودة تصيرله .. ندكر بدايه الشهر اللى فات جتنى للمكتب تبى تشكى من بنيه شورة خدت منها سلسلتها....
-صبريه بصوت واطى/ سلسلتها !!
-ابلة سناء كملت / نادينا البنيه وواجهناها .. قلنالها سلسلة افراح اللى خديتيها من شنطتها اطلعيها .. والبنت رقت الازرق وقالت والله ماريتها
-ابله امنه المديرة / ندكر فيه الموقف ... سبحان الله افراح من ادبها سكتت وقالت عادى بالك راحت منى فمكان ثانى.. سيبنا البنت ..ولاويتها جايبه لى افراح هاديكة السلسله .. يعنى قابلت احسان افراح بالاحسان
-ابله فوزية / افراح قمه فالاخلاق ...حتى الطالبات يتعلمو من حسن تصرفها ....
-ابله سناء/ وللعلم افراح كانت تبى تعطى السلسلة للبنت .. لاولى انى وقفتلها وقلتلها مدامها هدية من ولد عمك احتفظى بيها وماتعطيها لى حد ...
-صبريه شبحتلها / ولد عمها!!!؟ ... منو ولد عمها اللى هاديها سلسله
-ابله سناء /قالت ولد عمها اسمه نورى هوا اللى عاطيهالها
-صبريه / وكيف شكلها هالسلسله ممكن توصفيهالى .. مندكرش ان نورى ولد سلفى عمره جى لى افراح ولا شافها ولا هدالها شى
-سناء/ هيا سلسله طويلة .. نهايتها قلادة على هيئة كرة ارضيه لونها سماوى ... وقالتلى اسمها ..القمر... الاكتمال .. مش عارفة نسيتها
-امنه/ خيرك ناسيه ... قالتلك اسمها قلادة ليله اكتمال القمر
-ماليكه / اللطف علينا سمعنا وسلمنا
-صبريه اتمتم / ونورى وين شافها .. وامتى عطاهالها ...
تلفتت لى حسناء بنت جيرانهم / قتلك ياحسناء
حسناء تلفتتلها / نعم صبريه تبى حاجه
-صبريه/ فدوى بنت خوك فالمدرسة توة
-حسناء/ فالمدرسة ايه .. قالت امها والله ماناضت ومشت الا خلينى ونخليك .. تبكى حاله على افراح صاحبتها الليل كله
-صبريه / باهى ابعتيهالى لما تروح نبى ننشدها على حاجه
-حسناء/ حاضر

____________________________________________

_

نورى صار فيه ماصار لما وصل للدهب ... رعش مع بعضه وتخايل بنت عمه اللى خان الدم اللى بينه وبينها وسلمها للموت بالعين الباردة ...
مشوله الازرق وعرجون يجرو شدوه من ايديه ورجليه وهوا يخض مع بعضه....
-الازرق/ اهدا يا راجل خيرك ... بسم الله العظيم ... بسم الله العظيم
عرجون بدى يقرا فالقران بصوت عالى ... ونورى يخض مع بعضه يرعش يرعش وهما يقرو فالقران لحد ماهدى
-الازرق وجهه متغير / خيره شن صارله
-رضوان / عادية جدا وتصير ديما متخافوش..غطوه بس
-الازرق خدى كلاشنه و طلع من المربوعة يجرى مشى للصالة جاب لحاف ملوح عالصالون ورجع يجرى لى نورى غطاه......
-رضوان / هوا مش متعود .. والضحية كانت من طرفه والباين ان عقله الباطن دايرله ضغط فمتحملش
-الازرق/ اعطينى بالمختصر المفيد خيره يدكر فى اسم بنت عمه شافها ولا شنو الهم لاحرف
-عرجون/ طبيعى انه يتخايلها .. قلتلك عقله الباطن تغلب ورعشاته مدت الدهب ...مهما يكون الحكايه فيها موت ومهما دار روحه مش مدور لكن النفس ليها خكم علينا وتغلب فالاخير
-الازرق/ صار قلتولى طبيعى بيتخايلها .. بالله تعالو نقسمو باقى القسمه وكل حد ياخد حقاته ونتفارقو بالمليحة
ودار ركبة ونص وبدى يوزن فللى فاضل من الدهب

بعد ماكملو عد .. الشيوخ الزوز روحو ... ونورى راقد على تركينه بعد هاديكة الخضه اللى جاته 😁...

فاق لقى روحه بروحه ... حول الغطا ووقف..مشى خطوتين وطلع للصالة متع الاستراحةة.. يلاقى الازرق حاط ارقيله ويشرب فى طاسة شاهى ويتفرج على مبارة

-نورى / وين الجماعه ...
-لازرق/ روحو
-نورى حاط يده على راسه/ خيرنى انا شن صارلى
-لازرق/ وين نندرى عليك قعدت تدكر فى بنت عمك وطحت ترعش
-نورى يتمتم / اففففراح ...
وانتبه / والدهب .... دهبي
-لازرق/ دهبك هوينا جنبك فمكانك
-نورى / وانا شن يضمنى انهم ماخنبوش منه
الازرق شبحله على جنب
-نورى خاف/ انا مانقصدكش انت راهو .. نقصد الشيوخ اللى كانو هنايا
-لازرق تلفتله/ مصح وجهك .... هادى عملية تابعه الازرق راهو مش تحسابنى نلعب ولا اول مرة نتعامل معاهم ... وبعدين هما يقولو الدم يولى ... ماياخدوش اكثر من حقاتهم
لانهن يخافو ...
-نورى / وعلاش خليتونى راقد امالا
-لازرق/ الحق فينا احنا مفروض صبينا عليك سطل اميه
-نورى / معليشى بنتعبك ترا اوزنلى حقاتى مرة ثانيه
-لازرق شرب الشاهى ويتفرج عالمبارة / الميزان قاعد جنبك اوزن براحتك
خش نورى للمربوعه لقى كيسة الدهب متعه محطوطه ورا الباب ... خداها وطلع الدهب وبدى يوزن فيه مزال مصر عالشك ... وزن الدهب لقاه ثلث القيمه كاملة ... فى خاطره حاير علاش ماخنبوش الدهب بالرغم انه كان فى غيبوبة ومش دارى بيهم وسهل انهم ياخدوه ...
طلع للازرق برة / مش تفهمنى غلط عاد
-لازرق/ لالا فاهمك صح ... خود حاجتك وبالسلامه هى مصلحتنا تمت
-نورى / هاا شفت كيف تغششت من كلامى
-لازرق / لا تغششت ولا عندى مامغششنى .. مصلحتنا تمت وشنو بتخلل جنبى
-نورى / باهى كيف بنتصرف فيه الدهب توة
-لازرق/ من امس قلتلك .. تبيه دهب خوده ... تبيه فلوس خليه ويوصلوك بعد 15 يوم
-نورى / خلى نفكر ونرد عليك ... وبالك الليله نبات هنايا
لازرق شبحله مايبيشى يقعد
-نورى / الليله بس ... وغدوة بادن الله نروح
لازرق/ باهى خش ديرنا حاجه ناكلوها
-نورى / انشاءالله

____________________________________________

_

نورى حط الطاوة عالنار بيطيب شى ياكلوه ... وبدى يدكر ليله اللى دار مجيد خال افراح حادث ..ممكن قبل 5 شهور... مشى بيحمدله بالسلامه ... هدرز عليه وشرب الشاهى وطلع للجنان لقى افراح كيف خاشه كانت فى دورة التقويه ...
-نورى / اهلين فروحه
-افراح / اهلا نورى .. كيف حال مرت عمى وجنه
-نورى / الحمدلله امى كويسه وجنه كويسة حتى هيا ..وين كنتى
-افراح / كنت فى دورة التقوية
خدى نورى كراستها / ترا نشوف شن خديتو
فتح الكراسه وبدى يتصفح فيها / ماشاءالله عالخط انتى الباين عليك ممتازة ... ويتصفح فالكراسة
-افراح / الحمدلله انا الاولى عالمدرسة
-نورى / واضح عليك ممتازة من نضافة الكراسة والترتيب ..
وصل لى نص الكراسه لقاها راسمه رسمه مخيفه
نورى استغرب/ هدا شنو !!!؟
-افراح ضحكت ومدت يدها بتاخد الكراسه/ هدا شى
-نورى / لا بجد شنهوا هدا
لقاها راسمه القمر ملون بالاحمر ... وجنبه شخص واقف وراسه حيوان فيه قرون ..
-افراح ببراءة / هادى صورة انا صورتها بتليفونى ... وقعدت ديما نرسم فيها
-نورى استغرب/ صورتيها !!؟ ... وين صورتيها ...
-طلعت افراح تليفونها / اهيا نوريهالك ...
وتلفتت تتصفح فالصور اطلع فالصورة / يومها شفت القمر احمر وصورته وبالصدفة طلعتلى صورة الشيطان معاه
-نورى / بسم الله الرحمن الرحيم ...شيطان شنو يابنت عمى تعودى بالله
-افراح / اهيا الصورة شوفها .. ولعلمك انت اول واحد نوريهاله .. مابيتش نوريها لى امى وخالى خفتهم يمسحوها
-نورى ياخد فالتليفون / وانتى ليش محتفظه بيها
-افراح / اهو تقعد دكرى
نورى شاف االتليفون يلاقى كلام البنت حق .. صورة فى تليفونها القمر احمر ... وجنبه شخص واقف وراسه حيوان وفيه قرون كبار

الازرق واقف قدام باب المطبخ / يانورىىى
نورى انخلع وفاق من سرحانه / خيرك ياراجل خلعتنى قريب الطاوة تبزعت عليا
-لازرق/ من بكرى وانا انادى وانت متردش استغربت فيك
-نورى / وخيرك شن تبى
-مشى لازرق حطوتين خدى طاسه / نبى طاسة اميه ... ولكن تو ناخدها بروحى .... خداها وطلع

وسرح نورى مرة ثانيه ... يدكر لما تلاقى مع الشيخ عرجون فى استراحة لازرق ممكن بعد ماشاف الصورة بي ثلاث شهور
هوا كان صاحب لازرق من زمان ... لكن عمره ماخش فى هالسريب ... ليلتها كانو بالصدفة مقعمزين يهدرزو وهوا كان اول مرة يشوفهم ...

لازرق/ ياودى ليله اكتمال القمر موضوعها خرافى ..وماهناش منه
-عرجون / تى اسكت ياراجل ماتتبلى واطلع من فمك كلام يغضب الاسياد
-رضوان / اكتمال القمر فيه شغل غير طبيعى .. من ايام اساطير اجدادنا زمان الى تاريخنا الحديث الحالى حتى بعد اكتشاف التكنولوجيا
-لازرق / كيف
-رضوان / يقال انه ذا التقطت صوره بالكاميرا في يوم اكتمال القمر .. فإنك سترى اشباحاً ويمكنك ملاحضتهم بوضوح ... المفارقة انو الشخص اللى يلتقط صور بهدا المعنى يكون دو اتصال قوى مع اسياد الاكتمال ويمكن استعماله لهدا الغرض
( حقيقه وواقع 100% ... لكن هااا ردو بالكم تجربو شى زى هدا .... خطير جدا)

-نورى تقاعد / اااه .. شن قلت
طول خطرت عليه الصورة اللى ورتهاله بنت عمه ...
-عرجون / اكتمال القمر يكون يوم 14 من كل شهر .. يعنى ليله 15 ... ويحدث فيها هيجان للانسان والحيوان وحتى النبات ....
-رضوان / حتى البحار يحدث فيها المد والجزر
-عرجون / ويحدث فيها الهيجان حتى لى بنو الجان
-لازرق/ اووووو الموضوع كبير
-عرجون / لهدا امرنا الله بالصيام فى الايام البيض اللى تكوت منتصف الشهر... لان 80% من جسم الانسان ماء.. والهيجان يحدث بالمد والجزر .. والصيام يطفئ الماء
-لازرق/ كلام غريب
-رضوان / ارجع فكر فالكلام ببساطه حتفهمه .. ليله اكتمال القمر تبدل الحال والاحوال .. بس الحصول عالوسيط صاحب الاتصال هوا الصعب
-نورى / واللى يجيبهولكم
عرجون ورضوان تلفتلوله مع بعضهم .....
.
.
.
.
.
.
بعد نقاش بينهم وحكالهم عاللى شافه عند بنت عمه وحكوله عالشروط اللى المفروض تكون فيها البنت ....بكر .. ليست بالغة .. دات شعر طويلة... وغيرها من الشروط

عرجون ورضوان حسو بفرحة عارمة
-رضوان / لازم البنت تلبس السلسال عالاقل لمدة شهرين
-نورى / اى سلسال
-رضوان / تو نحكيلك

____________________________________________

تمت ...... ويتبع

الحلقة الجاية نكملو 

رواية ليلة اكتمال القمر الحلقة الرابعة 4

نورى قاعد فى استراحة لازرق .. واقف فالمطبخ ويدكر فاللى صار معاهم كله من اول الحكايه ...
يدكر لما قعمز مع رضوان وعرجون فالاستراحة وحكالهم عالصورة .. ولكنهم فى نفس اليوم طلعو وفاتوه كأنهم حسوه يلعب بيهم وبيجيبلهم صورة مزورة لان نورى شكله مايدلش عالثقة ....
يدكر انه بعد يومين اتصل لازرق بي نورى
-الازرق/ الجماعه يبوك تجى هنايا للاستراحة
-نورى قص عليه / اسمع .. تقعدو تلعبو بياااا .. مايمشيش معاى راهو ...
-لازرق بكل برود / تى خيرك ياراجل
-نورى / قالولى سلسله ماسلسله وخلونى نحوس لا جابولى صورتها ولا من بيشريها انا ولا هما وتوة جاى تقولى يبوك مش لعبة انا راهو
-لازرق / ايييه علينا عاد .. الجماعه يبوك بتجى ولا شنوو
-نورى / بنجى امالا كيف .. وين هما توة
-لازرق/ امالا ليش تكثر فالدوة عندى فالاستراحة .. تعالة هى
-نورى / تم
جى نورى للاستراحة .. وسلم على عرجون ورضوان .. ولقى معاهم شخص ثالث
عرجون/ شنحالك يانورى
-نورى يشبح للشخص الثالث / الحمدلله باهى
-رضوان / هدا الحاج بشير ..
-نورى / اهلا وسهلا
-رضوان / الحاج بشير يبي يشوف الصورة
-نورى شبحله بهزوة/ اى صورة
-عرجون / صورة القمر اللى حكيت عليها
-نورى / وعلاش
وتلفت لى عرجون / تى انتم من يوم حكيتو على هاديكه الامانه ماعاد شفتلكم وجه
-عرجون /اللى غبناهم كلهم يومين بس .. مش حاجة كبيرة
-رضوان تقاعد قعمز ركبه ونص / اسمع يانورى .. شنو تحساب من حيث ماقلت عندى صورة بنصفقولك ... الصورة لازم يشوفها الخبير ويتاكد انها حقانيه
-نورى / ومنهوا الخبير انشاء الله
-عرجون / الحاج بشير ... امالا احنا علاش جايبيينه
بعد نقاش وتحاور .. وافق نورى انه يجيب الصورة بيش يتاكدو منها .. ولكن طلب يومين عالاقل كيف يوصل للبنت وكيف يزلبحها ويفك منها الموبايل او الصورة بس .. وبالفعل مشى لى افراح وقت المرواح مرة ومرتين يشوف في طلباتها وشن ناقصها ويشريلها .. ويقوللها ردى بالك تعاودى لامك انى نجيك هنايا
( هدا الغلط .. كيف عيلة زى هادى لا تسألها امها من ريتى ولا مع من تلاقيتى فالمدرسة )
ياستى قولو حصل الصورة ورفعهالهم وشافها السى بشير وقاللهم الكلام حق والصورة اصليه وخدى اللى فيه النصيب ومشى على حاله ... وقعدو نورى والجماعه يتفاهمو .. اول شى عطوه السلسله اللى بتلبسها البنيه شهرين ولا اقل شوى
-نورى / لكن انا عندى شرط
-عرجون فرحان ان الموضوع طلع جديات/ شن شرطك
-نورى / تحكولى باللى بيصير شنهوا ... وشنو الفايدة
-رضوان / اللى بيصير هدا مش شغلك ..احنا نبو البنيه بأى طريقه
-نورى / تبو البنيةةةةة.. كيف يعنى
-لازرق/ يعنى ياتروح يا متروحش.. العلم عند الله
-نورى / لكن هادى مش ساهلة ... وخطيرة .. تى والله خالها يقلب الدنيا
-عرجون / هدا عليك انت وشغلك انت .. جيبت السقيطه وظروفها احنا مالياش علاقة بيها
-نورى انخلع / السقيطه !!!
-رضوان / انت كبر قلبك..وجيب البنيه وثمرة الموضوع كله مش حاجه ساهلة .. راهو دهب ...اللى يرفعك فووووق سابع سمى
-نورى داير روحه يتخوبث/ امالا تعرفو كيف ..اللى بيطلع من الدهب ليا ثلثه
-رضوان / لااا هلبا
-لازرق/ حقه ياراجل
-عرجون / لكن اسمع .. فى فلوس بيطلعو ..دراهم قديمة
..انت ماليكش علاقه بيهم
-نورى / شنو شنووووو... فلووووس... كل شى نبى منه ..والفلوس قبل الدهب
-لازرق/ فلوس فيهم الصنه وفيهم الخميرة انت شن لازك عليهم ..
-نورى / صنه شنو وخميرة شنو
-لازرق ضحك / صنه هادوكة الناس
-نورى / منو هادوكة الناس سمعنا وسلمنا
شرين تليفون نورى مالخلعة قريب طاح من يده😁 ...
وقف لبس شبشبه ووجهه مقلوب وتلفت بيطلع/ خلاص تفاهمنا هيا سلامتكم توة
وطلع
لازرق تلفت لى عرجون / الدراهم وين بتبيعوهم المرة هادى فالمغرب ولا فالسعوديه
-عرجون / فالسعوديه كانا صخر ربي ..
-لازرق/ وكيف بتوصلوهمله ... المغرب اسهل عالاقل بالبر بالتقطيع توصلو
-عرجون / لا احنا ماليناش علاقه هوا قال ناخدهم ونخلص من غادى لغادى
-لازرق ضحك / ونسبتى محفوظه عاد .. اهو حتى نورى زلبحته فالفلوس ومشيتهولكم
-عرجون / لا كيف عاد .. زى كل مرة حقك محفوظ
ولبس نورى لى افراح السلسله قاللها البسيها فالنهار ولما تروحى من المدرسه للحوش دسيها فالشنطه وماتخبري حد .. العجيبه كيف زلبحها وكيف اقنعها البنت 11 سنه مش صغيرة المفروض تكون اوعى من هكى ... وفاتو الشهرين وجابو البنت وصار اللى علمكم بيه
_____________________________________________
_
فى حوش صبريه ..
صبريه فالدار تبكى .. وعمتك فاطمه واقفه على ولدها مجيد بعيد شوى فالسقيفه
-مجيد يعارك / يااام قلتلك سكتى بنتك خير مانخشلها
-فاطمه / ياوليدى وخيتك كبدها نسحنت على بنتها ساير حتى شوية .. غير كانا قالو ماتت راهى بكت ريشت وسكتت لكن المفقود راهو غصة
-مجيد يصفق فى ايديه/ يعنى هدا كلامك يمى بدل ماتعقليها وتسكتيها
-فاطمه تلقى فى ايديها / نسكت فيها امالا شنو .. انا نقولك انت فالكلام هدا .. ياوليدى حن على وخيتك ماعندكمش غير بعض
-مجيد / وشن لقيتينى شادلها مسواق ونضرب فيها ولا شنو
-فاطمه / خلى نخش للنساوين انا وخلاص..تبى حاجه وليدى
-مجيد / نبى امالا شنو ديريلى ماناكل طول اليوم وانا نجرى بين المركز والمستشفيات والثلاجات
-فاطمه/ ثلاجات شنو اللطف علينا
-مجيد / كل مرة يورونى جثة بنت صغيرة بالك تكون افراح
-فاطمه / ياحليلى .. رد بالك اتقول هالكلام قدام اختك ..احنا هكى ومش سالكين
-مجيد / غير ديريلى ماناكل
-فاطمه / وعمها فاتح كيف صار فيه
-مجيد / طلقوه مالمركز .. مشى شهد معاه الاجنف المسخ قال حق ريته موصلها ليلتها
-فاطمه / اسسس .. اسس علينا .. بنته حسناء فالمطبخ قايمتنا من اول يوم وهيا ضمان ومدان وانت تقول على بوها هكى .. نقص صوتك
-مجيد تلفت بيطلع / غير ديريلى ماناكل
ومشى وخلاهم ...
خشت فاطمه للمطبخ بدير لى ولدها نص بالدحى حلفت عليها حسناء وداراته ومدوهوله ...
-صبريه / حسناء.. وين فدوى بنت خوك ..مش من بكرى لما المدرسات هنايا قلتلك نبيها
-حسناء طلعت تليفونها من جيبها / شوى هى نكلم مرت خوى تبعتها ..
وبالفعل جت فدوى .. وسألتها صبريه عالسلسله اللى جابها نورى لى افراح ... لكن طيرة الشر فدوى رقت الازرق وقالتلها ان افراح شاريتها من محل الخردوات اللى جنب المدرسه ..
ماهو افراح تفاهمت مع فدوى عالكلام هدا فى حال امها سألت .. وفدوى عابيه على افراح بترجع ماتبيش اديرلها مشكلة مع امها
-فدوى/ منو نورى يا خالتى صبريه.. افراح شرت السلسله من محل جنب المدرسه
-صبريه / الاخصائية متعكم قالت ان نورى ولد عمها جابهالها
-فدوى / افراح قالت هكى بيش الابله تردلها السلسله لكن فالاصل افراح شاريتها
-صبريه غمضت عيونها / باهى.. صحيتى بنيتى
كان عندنا امل انهم يشكو فى نورى لكن فرخة فدوى لغت كل شى
.
.
.
.
.
.
.
.
.
.
.
.
.
.
ولحد هنايا القصة وقفت ...... البنت مفقودة مالقوهاش ... وتصكر ملفها فالشرطة تحت بند مفقودة .. والكل عاشو حياتهم عادى ماعدا امها قعدت حزينه عليها .....
وحزنت عليها جنة بنت عمها هلبا ..ممكن ضميرها مأنبها لانها سمعت الكلام كله وغصاته فى قلبها وسكتت .. عارفة ان اختفاء بنت عمها سببه بوها وخوتها .. ومع هدا ماقدرتش تقوللهم سمعتكم ...خافت
.
.
.
.
فى نهاية نفس العام ....
فاتح وصغاره احوالهم تغيرت ...
فتحو معرض سيارات الرايس فيه نورى ... وكمال ومعاد تباعه ... ولكن الثراء بدى باين عليهم .. من سياراتهم ومن لبسهم ومن ماركات ساعاتهم .. وتزوجو الثلاثه فى نفس السنه فى ليله وحدة ... خدو فيلا كبيرة وداروها اجنحه .. نظام مناسيب الكناين الثلاثه ساكنين معاهم وكل وحدة بابها بروحه ...والثلاثة حوامل
لكن ماحد ربط الاحداث وقال وفاة بنت عمهم هوا سبب الغنى اللى هما فيه .. لانهم لا ورثوها ولا قربو امها ..
عمك فاتح دارله ولده سوق كبير ومقعمز فيه مدير ...
حتى امهم عمتك زهرة بدت لابسة الدهب ومتكمه اما البنيه جنه ماصارلهاش من الحزن وبدت طالعة زى الغزالة مابين لبس وسيارة ...
.
.
مجيد خطبوله حسناء بنت جيرانهم وتزوجها ...
وصبريه كل مرة تشوف بنتها فالحلم لازم تشوفها مدفونه فى قبر .. تقول لى خوها نحس فى قلبي مرتاح على بنتى اكيدة ترا من لاقيها ودافنها .. وكل ماتحلم حلم يفسروهولها ان بنتها مدفونه تحت الارض ولكن مش مرتاحه
.
.
.
.
وفاتت 4 سنوات على اختفاء افراح ..
نورى عنده بنت وولد وخوته كمال عنده زوز بنات ومعاد عنده زوز ولاد .. اما مجيد ماعنداش صغار ....
.
.
.
ومشت الايام ...
وفى يوم كان نص الشهر .. كان الوقت ممكن عشيه ..
مجموعة شباب ماشيين يديرو فى مخيمات فالصحراء...
كانو قريب 18 شاب ... مخيمين هادوكة الخيم ويبان حوش بعيييييد عليهم بالسور
الشباب يهدرزو وواحد يحكيلهم ان الحوش هدا مسكون وان صايرة فيه حكايات ويحدر فالشباب ان يمشو جيهته ...اصلا هما مخيمين الليله بس وبيطلعو مالمكان
4 شباب راكبين سيارة ويسخنو فيها
واحد يسأل فيهم / وين ماشيين
-الشاب فالسيارة اسمه وجدى/ شوية بس غير بنركب الشباب عالعرق فوق وانزلهم
(العرق/ هوا حاجه زى نتوء رمال كبير زى الموجه منضره.. تركب فيه السيارة الستيشن بصعوبه واول ماتوصل راس العرق تلف السيارة وتنزل بسرعة رهيبه وتكون خفيفة زى الريشه ...يورو فيه ديما فالسباقات)
تلمدو قريب سته ولاد فالسيارة وبيتوكلو يرقو للعرق
-وجدى / راهو الرقيه فوق للعرق والنزلة منه تبي قلب قوى
-حاتم مقعمز جنبه/ تى توكل ياراجل
-وجدى / مانيش طالع لين تغنو
-صلاح راكب من الخلف / نغنولك اغنيه يالاندروفن عالاقل هاك مركبنا فيها
-وجدى يضحك / غنو هى
-بدو الشباب يصفقو ويضحكو / يالاندروفن يازينه يلاندروفن يازينه يا شاقة الصحراء بينا ..
وجدى ضغط على سيارته لاندروفر طلعت بكل قوتها .. باقى الشباب واقفين يتفرجو ..
ممكن ثلاثين ثانيه ووصلو للعرق ركبت منه السيارة الشباب ايغنو ويعيطو لان رقيه العرق فيها رهبه ... وصلو لى راس العرق فووووق
وبدى حاتم يعيط / البنيه ... رد بالك .. بتضرب البنيه
وجدى ركز قدامه لقى بنت واقفه وفاردة ايديها كأنها تبى اضمهم ليها .. مقدرش ايشد فرينو وضرب البنت وخش من خلال جسمها لانها لاتحركت ولا تنطرت ...
فى خلعته بدل مايلف بالسيارة ويرجع من نفس العرق .. تلخبط ونزلت منه السيارة من الجهه الثانيه وايطيحو فى هاديكة الرملة واطيح السيارة على وجهها ... وتنقلب قلبتين لحد ماستقرت فالارض ...
ومشولهم صحابهم يجرو بالسيارات .. طلعو احبال وكرو السيارة اللى طاحت جبدوها من الرملة ... وطلعو منها الشباب فى اللى انضرب وفى لا وهما كلهم فى كلمه وحدة
البنت شن صارلها 😨😱!!؟؟؟
____________________________________________
_
رجعو الشباب بالسيارات للخيم متعهم
قائد المجموعة اسمه محمود / تى بنت شنو فى عز الصحرا يا وجدى ... هيا سلم اوخى ما ديرليش مصيبه فى هالليل
وتلفت لى المساعد متاعه/ لميتو حاجاتكم ولا شن صار
-المساعد وسام / اهو نصكرو فى الخيم ياعرفى
وتلفت للشاب اللى جنبه / ياراجل كنا بنباتو ونريحو عضامنا شن لازنا عالمشى بالسيارات توة فى هالليل
-حاتم يبكى/ والله ريتها .. بنيه لابسه قفطان ابيض وفاردة ايديها .. شفتها يا لامين ولا ماشفتهاش
-لامين / شفتها امالا لا
-صلاح حاط ثلج على فمه / مش عارف ليش ماتبوش اتصدقونا حتى انا شفتها
-محمود / نوض لم حاجتك انت وياه ياسركم دوة عاد
-وجدى / انا رجلى انضربت ومانقدرش نتحرك
-محمود / نوض انطمر فالسيارة .. اصلا كله منك .. تو بعد نوصلو لمقر الكشافه نتفاهم معاك
-وسام / قصدك بنروحو لى طرابلس طول توة
-محمود / لا بنروحو للمعرض متع السيارات انسلموهم سياراتهم اللى مأجرينهم وبعدها نروحو طرابلس
-وسام / تمام ..
وجدى يوقف فيه شاب ثانى/ ااه رجلى .. بالشوى ياوخى
قامه الشاب ركبه فالسيارة من قدام جنب السواق ...
لكن السيارة ماكانت فاضيه ... كأن فى حد مقعمز فيها من الخلف ... ترا شكوون .. خلى نشوفو منو .... افراح😱..
افراح لابسه ابيض ومقعمزة من الخلف ولابسه هاديكة السلسله الملعونه 😨😱..لكن المرة هادى وجدى ماشافهاش
وبالفعل الشباب كملو لم بضاعتهم وركبو السيارات وتحركو كل سيارة فيها اربع اشخاص زوز من قدام وزوز من الخلف
ماعدا السيارة اللى فيها وجدى تبان فيها خمسة ..زوز من قدام وثلاثه من الخلف.. زوز شباب ومعاهم افراح ...
ياوالله عملة ......... افراح مشت معاهم لى معرض السيارات
وبالفعل وصلو لى معرض السيارات وسلمو الستيشنات لى صاحب المعرض يقولوله نورى ... نورى😱😱!!! حيه عليه
طلعو الشباب وخلو السيارات وخلو افراح مقعمزة فالسيارة
وطلعو روحو ... وحتى نورى روح فى نفس الوقت .. صكر المعرض من برة وروح

رواية ليلة اكتمال القمر الحلقة الخامسة 

بعد ثلاثة ايام ..
نورى مقعمز فى دار نومه الصبح يشرب فالقهوة..
-نورى / لالالا تعرفينى نخاف عليهم الصغار .. لا رحلة لاسو
-فايزة زوجته / ليش دايرلولدك هكى .. كل ماترفعهم الروضة لمكان ترفض وتقولى لا
-نورى / انتى خيرك دماغك هكى زى الصعايدة ... قلنالك معش تناقشينى فالموضوع .. عيل عمره ثلاثه سنين ونص نبعته بروحه للالعاب ماندرى عليه يطيح ولا شن يصيرله
-فايزة / ربي يهديك وخلاص
-نورى وقف ياخد فى تليفونه وحاجاته/ عيل صغير تقول عليه الا بيفهم انه مشى ولا مامشاش
-فايزة / والله يفهم .. الرحلة االلى فاتت علقو صور الصغار .. وقالى ياماما علاش انا صورتى مش معاهم
-نورى / حمودى ولدى قالك هكى هاهاها
-فايزة واقفه جنبه/ امالا نكدب عليك
-نورى / انا عطلت هى السلام عليكم
وطلع من حوشه نزل مالباب وخش لى باب حوش امه
-نورى / صباح الخير ياام
-زهرة / صباح الخير وليدى خش
-نورى / شنحالك يااام وشن حال بوى اليوم
-زهرة/ الحمدلله وليدى
-نورى / وين فطورك ياغاليه ولا فطرتى وكملتى
-زهرة / الحمدلله صايمه..
-نورى استغرب / اليوم لا اثنين ولا خميس
- زهرة / احنا فى الليالى البيض للشهر العربي... صايمه امس واليوم وغدوة بادن الله
-نورى / صيامك فالجنه ياغاليه
زهرة شبحتله / سلمك وليدى.. لكن حسيت وجهك متكدر خيرك فى حاجه
-نورى حط يده على صدره/ حاجه غامه عليا هنايا
-زهرة / بالك عندك حموضه ولا المرارة راقيه عليك
-نورى / لايمى .. غمه مش وجيعة
-زهرة / ربي يفرج عليك وليدى استغفر ربي وادكر الله وصلى عالرسول احوالك على طول تتبدل
-نورى / لا اله الا الله ولا حول ولا قوة الا بالله ..
وطلع وخلاها .. ركب سيارته ومشى للمعرض
____________________________________________
_
فى حوش مجيد
مجيد فى دار نومه يبدل فحوايجه بيطلع .. وحسناء مقعمزة على كرسى الزيانه وتنقرز
-حسناء/ مش تقول عليا مش بنت اوصول ولا مانتحملش .. لكن مهما يكون حتى انا نبى الخصوصيه وباب مصكر عليا
-مجيد / مشكلتك انك مش فاهمه نفسك ومش عارفه روحك شن تبى .. هنايا فالدار منكدة عليا وعلى روحك وشادتهالى امك واختك دارو وفعلو ... ويرة معاهم تهدرزى واطيبي وجوك مليح .. والله مافهمتك
-حسناء/ انا ماقلتلكش نكرهم .. انا قلتلك نبى باب بروحى يصكر عليا ..عالاقل مطبخ نديرلك فيه فطورك براحتى نحوس انطيب اندير اللى يعجبنى
-مجيد /باهى باهى انشاءالله خير
-حسناء/ باهى امتى بتكلمهم وانت ليك شهور تقولى انشاءالله خير
-مجيد / ايييه علينا عاد
وفتح الباب وطلع لقى امه واخته مقعمزين فالصالة .. هوا فالحقيقه حتى مجيد مضايق من وضعه فى دار مع امه غير ساكت
-مجيد / صباح الخير يااام
وتلفت لى اخته / صباح الخير ياصبريه
-صبريه وامها / صباح الخيرات
طلع مجيد قعمز فالصالة لقى فطوره عالطاولة موتياته حسناء
قعمز يفطر وامه تشبحله حست ان عنده كلام بيقوله
-فاطمه / خيرك وليدى فيك شى
-مجيد / مافى شى خيرك يااام
-فاطمه / حاساتك عندك مابتقول ياوليدى
طلعت حسناء قعمزت جنبهم فالصالة
-مجيد بيغير الموضوع / صبريه هيا اللى ساكته ترا شن عندها بتقول
-صبريه / وانا شن عندى غير موضوع واحد مفيش غيره .. ونحس فى روحى مللتكم حتى انتو معاى
-مجيد / لا قولى وكان حكيتى شن فيها
-صبريه / امس فالليل اماخر .. بعد توضيت وقعمزت انراجى فالفجر .. شورة زى اللى خدتنى عينى بين وقضه وحلم .. نشوف فى افراح بنيتى ادور فالشوارع وادور فيا
-فاطمه / رحمه الله عليها بنيتى
-صبريه عيونها دمعو / وبالك مازالت عايشه يمى
-فاطمه / اييييه يابنيتى ..حلم الجعان عيش
-مجيد / سبحان الله ياام خيرك ديما هكى كلامك
-فاطمه / كلكم تسايروها .. الا انا مانسايرهاش ..هادى بنتى ومانبيهاش تعيش فالوهم
-حسناء باهتمام / غير كملى كملى .. وفالاخير لقاتك ولا لا
-صبريه مسحت دموعها/ الحق ماعرفتش طريقى .. نشبح فيها تخيط فالشوارع وادور فيا وخلاص
-حسناء/ ياريتك ناديتيها عالاقل فالحلم شفتى وجهها واضبطيها
-صبريه / الله غالب مش كاتبلى ربي لا فالحلم ولا فالعلم
-حسناء ناضت حضنت صبريه / ربي يبرد قلبك ياوخيتى ويطفى نارك
-مجيد شبحلهم / ياودى والله اللى ايتبع دوة النسي الا فاضى ( يتكلم على حسناء😁)
طلع ... وقامت حسناء صفرة الفطور وتراجى فى عمتها تخش تصلى الضحى بيش تكلم صبريه بروحهم
____________________________________________
_
فى معرض السيارات ...
خش نورى بي سيارته العالية ودرسها برة ونزل .. ويسمع فى عركة واصلة للسمى ...
خش يجرى / خيركم شن فى
-العامل الافريقى / العارف وبلال يتهاوشو من الصبح
نورى خاش يجرى / يتهاوشو ... شنو يتهاوشو هادى
خش لقى الجماعه تضارب فى بعضها ...ياوالله عملة ...
بدى يحز بيناتهم والعمال واقفين ...عنده قريب عشر عمال افارقة فالمعرض ..ويخدمو عنده خوته الزوز وهادو الشباب الزوز العارف وبلال وواحد ثانى اسمه فتحى
-نورى يعيط / ياكمشه مسخين ... تتعاركو هنايا فالمعرض يا صياع ...على خشه زباين يشوفوكم هكى ولا يصوروكم شن يكون موقفى بعدين
-بلال يمسح فالدم من فمه / انا مش عارف شن صارلنا عالصبح طحنا نتعاركو
-العارف / لا حول ولا قوة الا بالله
-نورى / انتو على شنو تعاركتو
-بلال / شى نقاش بسيط على نوع سيارة صبح مشكلة واضاربنا
خش العامل الافريقى/ فى زبون يبي برة
-نورى / ناديه تو نشوفه انا ..
وتلفتلهم / كيف بيشوفوه هادو بوجوهم المضروبه توة .. لكن ويعيط/ لكن والله ماكم باردين بيها .. برو اغسلو وجوهكم
مشو خشو الزوز وهما مزال عندهم نيه يتعاركو
-العامل /الزبون يبي يشوف السيارة برة
-نورى / باهى تو نطلعله هى
وبالفعل طلع نورى للزبون برة ... الزبون يحكى لى نورى انه يبي ياخد السيارة لى بنته ... وعمك نورى يورى فالسيارات للراجل ... ولكنه يتلامح فى بنت لداخل تشوف فالسيارات وتختار... طبعا هوا للوهلة الاولى ربط الاحداث وتوقع ان البنت اللى تتفرج لداخل.. هيا نفسها بنت الراجل اللى واقف قدامه وجاى يشوف فالسيارات.. وبالطبع احنا الليبيين نتحشمو مدامه بوها واقف لايقدر نورى يخشلها ولا يكلمها
-نورى / هيا خلى تختار السيارة بنفسها واللى تعجبها تاخدها ومانختلفوش فالسعر
-الزبون / لالا عادى مفيش داعى تختار هيا تو نختارلها انا وخلاص
نورى سكت ماباش يقوله هوينها البنت تشوف وتعاين من سيارة لسيارة
-الزبون / السيارات الجهه هادى بكم
نورى/ كل سيارة مكتوب عليها سعرها .. وفالاخير زى ماحكيتك مانختلفوش
-الزبون / عموما تو نشوف روحى ونشوف فلوسى ونرجع هنايا نتفاهمو بادن الله
ومشى لى سيارته ونورى وراه يبي يسقده ..
فتح باب السيارة وركب / هيا بارك الله فيكم
-نورى مستغرب / وفيك بارك الله ..بتراجى العويلة ولا
-الزبون / منو العويلة
-نورى / مش بنتك لداخل تتفرج عالسيارات من بكرى
-الراجل / لالا انا جاى بروحى بنتى مش معاى!!😨
طبعا نورى سكت وطلعت سيارة الزبون وخش نورى لصالة السيارات لداخل لقاها فاضيه
-نورى يعيط / بلال... يابلال
-طلع بلال من الممر متع الحمام والمطبخ والملحق / ايووه
-نورى / وين البنت اللى كانت تشوف فالسيارات توة .. من كان معاها
-بلال / مندرى انا كنت لداخل نغسل فى وجهى
-نورى يعيط / احمد ... يا احمد
-جى العامل الافريقى احمد / نعم
-نورى / وين البنت اللى كانت اتشوف فالسيارات توة
-احمد / مافى بنت ولا شى... زبون واحد كان معاك انت
-نورى تهلوس بدى يضحك / انتو شن مدايرين عليا الكاميرا الخفيه ولا شنو ... البنت كانت لابسه سروال ودجاكه بيض وبلا حجاب .. كانت تفتح فالبيبان متع السيارات وتتفرج
-احمد / انا والله ماشفتها ...خلى نسال الشباب
كلهم طبعا رقو الازرق وماحد شافها
-نورى يعيط / تى شنو تخرفو انتو ... البنت نشوف فيها من بكرى هنايا
-بلال / وخيرك ماجيتش كلمتها
-نورى / تحشمت من بوها نحسابها بنت الراجل اللى كان توة هنايا وفالاخير قالى انه بروحه وماجاى معاه حد
-بلال/ بسيطه ..تمشى تمشى يانورى
-نورى يعيط/ تى بسيطه شنو طلعو الربي وينها ولا جيبولى الكاميرات توة خلى نشوفها فى اما مصيبه خشت
-بلال / انت متاكد مالموضوع
-نورى / نقولك شفتها بعيونى
بالفعل جابله بلال الكاميرا متع الصالة طلعو منها الشريط ووخروه بيش يشبحو منو اللى كان فالصالة
____________________________________________
_
فى حوش مجيد
فاطمه خشت للدار بتصلى الضحى ... وحسناء وصبريه خشو للمطبخ
حسناء/ غير كان تسمعى كلامى بس وتخلينا نمشو لى امى الخير اللى تحضر فالارواح
-صبريه/ ياحسناء راك تحرقيلى فى دمى بي هالكلام .. هادو تخاريف ومهناش مهنااااش
-حسناء/ شوفى بنتك كيف ادور فيك من مكان لمكان .. ومن شارع لى شارع
-صبريه تبكى / هدا فالحلم وبس
-حسناء/ انتى عمرك ماشفتى فيلم اجنبى يحضرو فى روح ويدخلوها جسم انسان ويبدو يسألو فيها وترد... لعلمك مش كلهم مستاحشين امواتهم ... فى اللى عندهم حاجه رايحة وبيسالو المتوفى وين حطها
-صبريه / ياحسناء هدا شرك بالله
-حسناء/ انا نكلم فيك على علم موجود فالدنيا .. تحضير الارواح هدا علم .. عالاقل اسألى بنتك وين مشت من رفعها .. من زلبحها
-صبريه / من زلبحهاااا!؟؟ .. شن قصدك بيها الكلمه هادى
حسناء لقت الكلمه استفزت صبريه .. فحبت تستفزها اكثر بيش توافق انها تمشى معاها للمراة
-حسناء/ طبعا من زلبحها .. انتى بتحطى كل الاحتمالات .. لانك ماتعرفيش بنتك شن اللى صار معاها
-صبريه/ باهى دبرينى كيف ندير .. حتى المراة هادى فى منطقة ثانيه بعيدة علينا ساعات .. كيف ندير بيش نوصلها
-حسناء/ كيدك على فلوسك .. وهيا اللى تجينا هنايا لحد عندنا ..
-صبريه / وخوى مجيد ... وامى شن منقوللهم
-حسناء/ غير اقتنعى انتى قبل .. وبعتالى تو نفكرو شن منقولولهم عمتى ومجيد
____________________________________________
_
فى المعرض ....
نورى يتفرج عالشريط بروحه ... حاط الصورة عالتسريع ...
ماهناك شى ... هدوء وخلاص ... ياودى نورى خاف .. وقلبه توغوش .. شنو بيكدب عيونه ..هوا بالفعل شاف بنت تقلب فالسيارات ...
طلع يبي يقوللهم جيبولى شريط ثانى ... فتح المكتب وطلع لقى صالة السيارات فاضيه .. واحمد الافريقى واقف بعييييد جهه البوابة الرئيسيه وفى بنت لابسه ابيض وحاطه شنطه كيف طالعه من البوابة
نورى ضحك / ياصغار الكلب دايرين روحك تلعبو عليا بالبصارة ... مثقلكم ومثقل بصارتكم ...
طلع بخطوات سريعه لكت مالحقش عالبنت كانت طلعت مالبوابه تمشى على رجليها ..
نورى شد احمد من كتفه/ اهيا البنت كيف طلعت توة علاش تلعب عليا يا مسخ
-احمد شاد طوبو ويبخ فالميه / وينها البنت
-نورى / حسكم زودتوها راهو
وطلع يجرى للبوابه بيشوف البنت وينها ... لما طلع سرع خطواته زعميتا بيش يلحقها فيسع .. واحمد لوح الطوبو ومشى يجرى وراه .. فى طلعة نورى بسرعة تجى سيارة كانتر كبيرة فايته بسرعتها القوية .. ع شوى ضربت نورى ونطراته ...لولا رحمه ربي ان احمد العامل جاى وراء نورى بالزبط لما شاف السيارة شده من حوايجه وجبده وطاحو الزوز للخلف ...
صاحب السيارة الكانتر شد فرينو قوى ووقف على جنب ونزل من سيارته ومشى يجرى لى للبوابه الكبيرة متع المعرض يلاقى نورى طايح وجنبه العامل ويرعشو مع بعضهم .. المهم صارت حوسه
سواق الكانتر / ياوخى سلامتك كبيرة .. ياوخى قريب ضربتك
وقف احمد العامل ومد يده لى نورى بيش ينوضه
نورى رفد يده عالتراب ومد اليد الثانيه لى احمد / لالا حصل خير ..متخافش ياراجل
لما نورى رفد يده فالتراب حس بي حاجه حديد جت مابين يديه .. جبده احمد ... وقف نورى .. وخدى معاه حاجه الحديد اللى لقاها فالتراب ... لما قعد يشبح ويدقق لقاها سلسله .... سلسله ليلة اكتمال القمر ... رعش مع بعضه وحدفها طاحت عالوطا تقول عليه لقى حنش
-احمد / شنو اللى لقيته .. شنو فى
وهاديكة السلسله تلمع فالوطا
-نورى مد يده وخداها / لا لا مافى شى بادن الله
-سواق الكانتر / وخى راهو قريب خليتنى ضربتك بالسيارة ..كنهدا رانى رميت رقبه فى رقبتى .. بالله تنبه مرة ثانيه
-نورى / انشاءالله ياحاج .. وبالله تسامحنى ...اهو معرضى عالرئيسى وسيارات ماشيه جايه ..لكن اول مرة تصيرلى هالعملة
-السواق/ حصل خير
طلع السواق من بوابه المعرض مشى لى سيارته ركبها ومشى
جى العارف لى نورى يمشى بسرعه / ياعرفى ..تليفونك من بكرى مابطلش تشريين
خدى نورى تليفونه بيده اليمين وحط السلسه فى جيب دجاكته بي يده اليسار
شاف الرقم لقاها فايزة زوجته .... فتح الخط طول
-نورى / الو
-فايزة تعيط/ ولدك حمودى طاح فالصوندا تعالة بسرعه يانورى وووك عليا وووك
-نورى يعيط / خيركم ادوى بالشوى مافهمت منك شى ...
وتلفت للعامل/ يا احمد هات مفتاح سيارتى
العارف يسمع فالعياط / خيرهم هادو العيلة ولا منو ياعرفى
-جى بلال يجرى / خيركم شن فى
-نورى / انا عرفته يومى هم ماللى تصبحت فى مشكلتكم .. ويعيط / يا احمد وين المفتاح فيسع
-العارف/ اهو تو نرفعك انا ياعرفى ماتقدرش اتسوق انت
وبالفعل صارت فيهم حوسه وركبو السيارات ومشو لى حوش نورى ... يلاقو عياط النساوين قدامهم ... الولد يانارى طاح فالصوندا غرق ومات وطلعوه
(اللى ماتعرفش الصوندا.. هيا نفسها البير على شكل دوائر فوق بعض وميه تحت متع البير ..عمقها عالاقل 3 متر طاج فيها الولد ومات )
لما خش نورى يوقف ويطيح .. يوقف ويطيح لحد ماوصل لداخل لقى جيرانهم وبوه كيف خاش من المحل ويسمع فى صوت عياط نساوين لداخل شكلها امه ومرته ونساوين خوته قالولهم الولد توفى
وناض عزى الولد ودارو خيمه فالجنان ...
بعد يومين جت صبريه تعزى وقيس المغرب لما بتروح نادت على نورى ولد سلفها بيش تعزيه حتى هوا ... خش نورى جهه ستار النساوين من برة وقف ونادى ...طلعتله صبريه سلمت عليه وعزاته بكل ادب ..لكم نورى انهار لان خطرت عليه افراح واللى داره فى افراح .... وادكر السلسله اللى لقاها طايحة فالوطا ...بدى زى اللى يربط فالاحداث فى بعضها
نادى على مرته وقاللها تمشى تجيبله دجاكته اللى لونها ازرب كحلى ... لانها فاتو يومين هوا بالتاكيد غيرها... مشت فايزة مرته جابتها وجت ... خدى الدجاكه حط يده فالجيب لقى السلسله طلعها وحطها فى جيبه وطلغ منغير ماتشوفها مرته
قعمز عالكراسى متع خيمه الرجالة ويمس فالسلسله ويخمم ويخمم ويتخايل فى هاديكة البنت اللى ادور وتدهور بين السيارات
يخمم فى خاطره/ هادى نفسها سلسله البنت ( خايف مايبيش يسمى اسمها ) ...
ويشبح للسلسله وراكبه الشك/ قالولى السلسله قعدت فى رقبة البنية ..امالا شن جابها لى بوابه المعرض متعى ...بالك سلسله ثانيه تشبهلها .. لالالا معقولة المصادفة هادى .. شمعنى نلاقى نفس السلسله .. الحكايه فيها لعبه
نورى قام راسه ينادى / كمال ... ياكمال
-كمال وقف وجاه / نعم يانورى
-نورى مشكلته قراراته لحظيه مايخممش / نبى نبعتك لمكان
-كمال قعمز عالكرسى اللى جنبه / عادى ماعندكش مشكلة
-نورى يهمس/ راهو المكان بعيد
-كمال / عادى نمشى
-نورى / نبيك تمشى لى هداكة الحوش اللى درنا فيه عملة زمان
وينطفى عليهم الضى .... هرب الضى عالخيمه كلها

هل اعجبك الموضوع :

تعليقات

لو عايز أي رواية pdf .. أو لو عايزنا نعرفك لما الرواية إللي بتتابعها ينزل منها حلقة جديدة، انضم لقناتنا على التيجرام: من هنا 
ما هو الفصل الذي تود قراءته؟