رواية اسرار قدس الحلقة الخامسة والعشرون 25 بقلم زينب ماجد
رواية اسرار قدس الجزء الخامس والعشرون 25 بقلم زينب ماجد
رواية اسرار قدس البارت الخامس والعشرون 25 بقلم زينب ماجد
 |
| رواية اسرار قدس الفصل الخامس والعشرون 25 بقلم زينب ماجد |
رواية اسرار قدس الفصل الخامس والعشرون 25 بقلم زينب ماجد
نحنُ العراقييَن حيَن نعبر عن فرحَنا بشَيء ما نقول عنه "يَرد الروح" وهذا تعبَيري عندما رأيت وجهك إول مَره ..
♡
.......
قدس: ذبيت روحي فرد دور على النوم عبن الليل ما شافت عيني نوم .. والمرة شعلتلي امبردة صالي جثير ما نايمة عليها ابيتنا ما نجيبها لين جول والجو ما كلش حار النسيم يلعب بالبيت لعب من كل صوب والمروحة مشتعلة
وهم ماي ماكو نترس امبردة كل شوي
يا دوبك للسبح وبالتواسيل يلا واحدهم يجيبلك سطلة ماي
عكب هالعيشة الكشرة نمت بهالمكان نومة هنية
لحد كعدني لحد صحاني مشقلين هالمبردة والجو بيه برودة ومتقطية بالبطانية ومدثرة ادثر وما بودي افتح عيني واكوم
كلش ارتاح من اشم ريحة المبردة
فكيت عيني ثكلانة كلش ومتوثة نوم ... دحكت الساعة جدامي ب٤ ونص ... دحكت القرفة بيها ضوا خفيف .. عصر هذا او فجر
حسيت اكو حركة يم راسي
فزيت من مكاني بسرعة وانداريت
الا خطاب كاعد: انت شجابك هين واني وين
- يولي فززتيني نعلعلا غيرتج
- انت متفق ويا امي
- ارتحتي بنومتج ؟
- انتم شرايدين مني والله معدا افتهم
كام من مكانه فزيت بسرعة كضبتوا ومنعته يكوم : وين وين وين هسه تكلي اني وين
- انت بأمان هين
- اي فد كلي اني وين
- وشيفرق عدج اذا كتلج
- اكلكم اني ما حيوان بشر مثلكم واريد اعرف شدا تسوون بيه كافي محد اجالي منه خير كلكم شفت الضيم منكم
- انا !!؟
- انت اول واحد
- وشنهو الضيم الشفتي مني يولي لو ما انت الدكيتي بيه ورديتي لابو وهب
- ما تتصور الشفته منك شنهو .. حجاية اللسان سهلة
رجع لمكانه ودحك بيه : قصدج اللي حبلتي بيه ابطنج مني
اندرت بسع : شمدريك
- انكشف كلشي والدنيا تلايمت وراج ، بس ليش ما كتيلي ليش شلتي حمله وحدج لو واحد منهم فاضحج كدام ابو وهب شنتظرتي يعدمج واجي اكف على كبرج لو شتانيتي
- امك ما رضت احجي لعبت بحالي لعب واني اخاف منها
- وما خفتي تكتلج غير تكليلي اتصرف ... اسمعي يولي بعمرج لا تثقين لو تسمعين من واحد غيري لو ما انوجدت اسمعي لصوت راسج واعملي لا تمشين بشور احد لأن محد غيري يهمه امرج لو يهتملج .. كلمن راح يمشيج حسب مصلحته
- وانت شنهو مصلحتك بيه
مد ايده لخدي : لتفكرين واتعبين روحج بالتفكير منا وجاي ما اريد منج غير ترتاحين وبس .. انا موجود
- بس ما كلتلي اني وين
- هذا بيت اختي سهاد اني بالعادة ابات عدها شاركت رجلها بالايجار واجرت الطابق الفوك .. عبارة عن غرفة وحمام بس احسن من ماكو لبين ما ادبر امري .. بهالوضع لازم تبقين هين خاطر محد يشك بوجودج
- وسراب ؟
حسيته تجاهل الجواب وكام : وين راح تروح وتعوفني
- ما عايفج بس انده على اختي تسويلنا مجال خاطر نصعد فوك
راح صاح : يا الله
اخته صاحت : هلا بيك تعال عثمان نايم جوا
- الفوك محد بيه مو
- اي اصعد
رد للدوانية : لفي حجابج عدل وخل نصعد
بسرعة دنبست ربطتي وشديتها ليورا وجريت العباية خليتها على اجتافي وكضبتها وشلتها ومشيت ورا .. تعديت من المرة لا هي حجت ولا اني السلمت لو حجيت مدري جن بلساني عظم استحي من اي احد ما اعرفه ما عرف اسلم
صعدنا فوك البيت ما كلش حلو تعبان
الدرج صبابة ومعرج ..باية عريضة باية كصيفة
صعدنا وفوك قرفة جبيرة ومنور صقير مسكفه بچينكو هو وحمام .. دخلت ادحك بالحمام كال : هين مو مثل غاد يمتى ما ردتي بس افتحي البوري واسبحي اكو تانكي فوك واختي يومية تترسة
- انت راح تعيش هين
- مو مهم اني وين اعيش المهم انت تكونين بمكان امن وترتاحين لحد ما تكومين بالسلامة
- يعني ما انزل الجاهل
- وعليش تنزلي ؟
اندار وهو يشرحلي دحكي هذا اول امس سكفته هين رايد احطلج ميز واجيبلج طباخ منضدي زغير على كدج ودبة غاز بس كون الله يمكني لان هسه وشلت العدي ذبيته ع الغرفة كشرتها وصبغتها وسكفت هاذ ودفعت الايجار
هو يحجي واني ادحك على المكان : واذا لكاني ابو وهب شراح يسوي بيه
سكت ونزل ايده وكف شرح : لا تحطي على بالج ، شيلي من حساباتج
- فد ما راح ارتاح .... قاطعني بعصبية
- هالكلمة لا تحجينها وانا موجود كل السويته و الجاي اسويه لخاطرج لو ما محسب لامري ما اذبح هيج
سكتت ... اخذ نفس ومشى شوية دخل القرفة حجة : دحكي هين هالساع بس البوفية عدج حطي بيها غراضج وافراش اختي راح تطيج وهاي مبردة
- راح تضل هين
- راح اجي واروح لين امي بعدها غاد ما اكدر اعوفها وهم خاطر لا احد يشك بكعدتي هين ، انت العليج ارتاحي هينا واي شي تحتاجي كلي لاختي راح تساعدج
حجاها وهو يتفكد الصبق
اندار ( محتاجة شي هسه ؟)
- راح تروح هسه
- اي لازم ارجع خاطر محد يشك بيه
- ما معتازة شي فد رايدة اعرف صدك راح تخطب .....قاطعني كبل لا اكمل
- هسه ضلي هينا ولا تشغلين بالج بهالامور
عافني ونزل ، ظليت ادحك وراه .. جاي يتهرب من الحجي
يعني السالفة صدك وما يريد يكولها .. ضجت حيل وكعدت بالساعة صافنة .. كمت اتفكد البكان
لشوي حسيت بروحي خرطت من الجوع
نزلت اسأل اخته على شي اكله .. صحتها : يبنية
صاحت : هنا تعاي
رحت للمطبخ كاعدة وتكشر بتيتة : فد جوعانة اريد شي اكله
دحكت عليه من جوا ليفوك بس بنظرة واحد ضايج منك واشرت براسها للطبخ : ذاك الاكل صبي واصعدي
مشيت خذيت ماعون من السلة وخليت تمن وفوكو مرك اندت ادحك عليه ، حجت : راح تظلين هنا لو تاخذج امج ؟
- ما عرف
- لا تضلين ويا خطاب حتى لو يكلج ضلي خالي ما ينحمل لا تجيبيله الاذية .. خلصج وفكج من ضيمج شوفيلج معبر لو درب وخلصي روحج
- وين اروح
- كاع الله وسيعة شني الواحد ما يعرف يدبر روحه
ما جادلتها خذيت ماعوني وصعدت فد عرفت هي ما رايدة كعدتي ... كليت وكمت قسلت القرفة والسطح ، صعدت كالت : خلصتي التانكي ما يصير هيج هو الماي وينه وتغسلين بالصوندة
- ما ادري هيج .. حسبالي ما يكضي ، بعد ما اقسل
- دسدي البوري سدي
سديته ونزلت متضايكة .. تنهدت : يربي وين ما اروح عاوجة وياي هاي عود كلي فد ارتاحي .. منين الاكي الراحة واني بكل مكان يطلعلي واحد يدوس بمصراني.
بس شسوي جان لازم اتحمل
ضليت هينا يومين حاربتني حرب نفسية دمرتني
فد تسمع افتح الماي صاحت : ما مليتي من الماي خلص عليج بسج
الاكل انزل مرة اخذ اكل واستحي مدري اخاف انزل مرة لخ واطلب .. خطاب بالليل يجي واني ونايمة فد الكاه نايم بالسطح ما بالقرفة .. ويحط يم راسي جيس بيه لفتين فلافل وجبس وشربت لو نستلة ..
فد افرح من اكعد والاكي ذني يم راسي بسع اكعد اكلهن كلهن فرد مرة فلا احسب حساب واكول ابقي للنهار من اشوف اكل افقد .. اكلهن كعدة وحدة وامل من الكعدة وانام ومن اكعد ثاني يوم الصبح الاكي خطاب طالع .. والاكل ماكلته وارجع اتحرمص شلون اجيب اكل واخته ما اطيك تشوفني .
ثالث يوم كاعدة الظهرية جانت الكهرباء طافية فد الجو ما كلش حار كسر .. اجا خطاب وهو شايل تلفزيون صقير يصعده كمت من مكاني بساع خاطر اتلكاه من ايده ، زكح بيا : دوخري يمعودة شتشيلين
- فد اشيله عنك
- يولي مو حبلى انت دوخري
ركضت بسرعة فتحتله باب القرفة نزله وكال : اكعده ع البوفية مو احسن
- بكيفك
جر البوفية وكعداه وضل يشتغل بالوايرات ويصعد للطابق الفوك ويرد ، انوب كالي : طبي للحمام
جاب رجل اخته وكاموا يشتقلونه .. ليقاد كملوا وصاحلي : يول دبة تعاي هين
طلعت من الحمام : منهي الدبة ؟
تبسم بتعب : جبتلج التلفزيون هذا وجريتلج واير من الصحن مال الجيران
- يعني بيه افلام
- اي بيه فوك المية قناة
شال الريموت وهو يكلب بيه : هاي روتانا سينما كلها افلام راح اخليها الج رقم واحد .. يعني دحكي بس ادوسين على هذا الواحد هي تطلعلج بسع .. خوش
- خوش
سواها ، حجيت : ابو وهب شسوا
- محتار بروحه ابو مصعب طلع من الجول غضبان .. ويريد ينفذ بروحه باسرع وكت
- انت جنت متفق ويا امي
هز راسه وكال : كون حجيتي شي لاختي ؟
- لا فد هي ما حابتني
- معليج بيها ما كاعدين عليهم جاي اطي وياهم ايجار وفلوس مولد
- ما ادري ما ترضى افتح الماي
- هسه انا احاجيها .. محتاجة شي هينا
- رايدة تضل هينا جاي اخاف واضوج وحدي
- بالوكت الحالي ما اكدر .. اذا تحتاجين شي خابريني منها
- ما راح ترضى تطيني اخابرك
- عود كليلي اذا ما رضت
- اروح افتن وتكرهني بالزايد .. انت يومية تعال
تبسم وباصبعه طخ خطي : مرتاحة
- اي احسن من العيشة قاد
- والحمل خو ما مأذيج
- ما متعودة احد يسالني عني هواي لا تعوديني وبعدين تعوفني وانكهر
- اعوفج ليش من كل عقلج تضنين بيه هيج ، ما وعدتج اخلصج منه وخلصتج ؟
هزيت راسي وما حجيت جنت اقصد قير شي مادري فهمني وتجاهل لو ما اعرف شنهو وضعه .. ما حجه واي ولا حاول يعرف ليش كتله هيج قير المرضوع وكال
- تدرين شلون اليوم راح اضل وياج للصبح يلا اروح
تبسمت له جر الصوندة وبلل حيطان القرفة من برا وكالي : امسحيها خاطر نكعد .. مسحت وشعلت المروحة وجاي اكعد كال : شتريدين اجيب عشا ؟
- لو عدنا جولة جان اني ركبت
- بس خلي الله يرزقني اروح اجيب طباخ ودبة بس الغاز غالي حيل يمكن اجيب جولة ندبر نفسنا بيها لحد ما شوية الله يرزقني واجيب ، هسه كليلي شتريدين اجيب
- تذكر اللفة الكليناها كبل البيها لحم حامض
- كص
- اي عفية لحد هسه طعمه بحلكي شكد اشتهيته واني اتنسى فد ما كلت لاحد
فتح محفظته حسب فلوسه وكال : تريدين شي ثاني وياه
- اذا ما عدك عادي جيب فلافل هم طيبة
تبسم: ول يدبه خايفة علي وما تريدين تكلفيني
- لا تكلي دبه
ضحك - الا دبة ونص يولي
- والله حرام عليك لا تقلط
- يول يدبه هو انا شمولول گلبي بيج غير الدبدبة مالتج والقلقلة البالسانج نايمة بكلبي
سكتت : اروح اجيب الكص لابني واجي
- ابنك ياهو
- حمودي اللي ابطنج
تبسمت وهو قمزلي وكام .. تنهدت شكد حلو وجوده
من هو موجود كلش ارتاح ما اكوم اتضايك من شي احس هو يشيل عني هم التفكير بكلشي .. واكثر كلمة تهيم كلبي من يكلي ( انت بس ارتاحي) ويدور راحتي .. اول واحد بعمري يهتم بيه ويهتم لامري ويفكر عني كل عمري منسية محد حاطني على بالو
فد يضوجني من يكلي دبة
يعني صح سمنانة كلش على الحبالة فد ما يصير يعيب عليه
هو مو يحبني .. دبه .. شني دبة
شلون اضعف يا الله والله ما اعرف اضعف
راح ورجع جايبلي لفتين كص هينا اني نسيت الدبة وفتت باللفتين كول .. بعدين دريت هو جايب لفتين لفة الي ولفة واله فد اني حسبالي بس الي لحد ما شفت يدحك عليه ومتبسم
- شبيك
-بقى الطرشي تريدي
- لا اكله انت شني ما تشتهي
شو اني حجيت هيج وهو طك من الضحك : يولي اتعشى طرشي ابخت الله
- عجل ليش ما جبتلك عشا
ضحك : نسيت
- فد لا اللفة الكلتها الك ؟
ضحك : هههههههههههه الف عافية
- والله حسبالي بس الي هسة شلون
- هسه انزل اخلي اختي تسويلي فد شي لا تهتمين الف عافية ابطنج وعلى اللي ابطنج
- يعني تريده الطرشي لو اكله
ضل يضحك بقوة وانطانيه قد يريد يسكت ما يكدر : عفية والله اني احب الاكل اكثر شي احبه بحياتي الاكل فد يعني اكل انسى روحي ما حسبالي تريده
- يولي دكلي الف عافية هسه انزل اجيب بعد واجي
نزل يضحك واني ضليت مركزة ويا الفلم صعد اخته مكليتله طاوة طماطة ومتروسة زيت دهينة ولاجعة وريحتها طكت بعظم خشمي
كال : تريدين
- لا فد اشرب جاي عادي
- دكومي لج دبة كومي كابليني
ضحكت وكعدت اكل وياه بالطماطة وجاي وهو يشرحلي ع الفلم ويسولفلي ضلينا نطمش ومندمجين
دك تليفونه ، دحك ، حجيت : منهو ؟
اشرلي اسكت ورد : الو
وهب : هلو خطاب اني وهب
- شرايد ولك
- عليك الله اسمعني اني اورطت روحي وتورطت ادري بس والله ما عندي مكان اروحله ولا ادري وين اروح وابوي اذا يكضبني يكسم راسي عليك القران ساعدني والله صارلي ٣ تيام بالشارع
- واميرة وينها ؟
- وصلتها لبيت واحد من كرايبها
- ارجع للبيت القديم
- ما اكدر عليك بروح احمد ساعدني خطاب بروح احمد اذا تعز احمد صدك بالقران بالشارع
يحجي وبجى
سكت خطاب : لا تحلفني بروحه يول وانجب .. وين انت هسه
- بالطارمية
- اخذ سيارة وتعال للدورة
- انت بالدورة ؟
- اني الاكيك هناك
سد التليفون : راح تجيبه لهين ؟
- ما ادري والله بس حلفني وخطية اميرة غوته وابوه اذا كضبه بدون تفكير يفرغ شاجور براسه
- فد وهب مسموم منهو الكال اذا عرف بيه هين ما يفتن لابوه
-وشحده يكرب ابوه الا ما رايد روحه
كام من مكانه وطلع مستعجل خطاب شكثر ما هو نشمي واخو خيته ووكف بوجه خاله وما خاف بس عيبة طيبة كلبه بسع ينقهر ع الواحد ويفزع .. وراح يفزع لوهب يركض
جابه ب٢ بالليل ..
وهب جان مكسور وحالته حالة ويبجي ومنقهر كعد بالنص ساعة يبجي ، حتى اني انكسر خاطري عليه ، كتلو : لا تهتم ماكو واحد ما يقلط عيفها وابتعد منها وضل هينا بلكي الله يتحسن الحال ونطلع من بغداد ونروح نعيش بمكان بعيد عن العين ونكف على حيلنا
حجه خطاب : هو اني كلت بس شوي اوكف على حيلي نطلع للموصل لو للشركاط غاد عندي عرف
وهب : والله اصيرلكم خادم بس لا ترجعوني لابوي والقران يذبحني اذا كشفني
خطاب : ضل هينا هالفترة يم قدس ودير بالك عليها لحد ما الله يفتحها ونشوف وين ننتقل بس كبل هاي لازم اقنع امي تجي ويانا
قدس : امك ما اطيكني ولو درت بيه وياك تفتن علي
- امي تكرهج بس ما تضرني ولو فتنت عليج تضرني والا جان فتنت عليج من كبل يم خالي وخلته يذبحج بس تخاف علي .. لا تفكرين بامرها بس خل اقنعها بالاول ويصير خير
- ما راح ترضى
- ولو ما رضت شسوي اذبها ؟ امي مجبور بيها الرضت بيج والما رضت مجبور اتحملها واتحمل غيضها وانت هم تتحمليها وياي
سكتت اندار لوهب : هالفترة لا تطلع ابد
فترة ادبرلك شغل بمكان تشتغل من الفجر لحد المغرب ترد هين حتى نتساعد اني وياك ونطلع من بغداد باسرع وكت
- والله مستعد بس الكالي شغل اشتغل حتى لو ادري اطيك فلوس الشغل كله بس بروح احمد لا تفتن علي يم ابوي
- يولي شفتن اني افتن عليك بس انت اركد هينا الباب لا توصله احتمال يطلع خالي يراقبنا .. اني من كبل كاعد هينا وما دامني رايح جاي مو غريبة الصورة
كعد وهب وضلينا نتابع الفلم
اني سلمت اول وحدة وهم طلوا سهرانين يتابعون
خطاب للفجر نام كعدت الصبح اثنينهم نايمين للظهر خطاب راح .. جان يوم جمعة
ابو وهب والعايلة قاد كلهم انتقلوا من بيت الجول للمحمودية
وكعدوا غاد .. خطاب رايح جاي
ووهب كاعد يمي اليوم كله
باسبوع خطاب كدر يجيبلنا جولة ودبة نفط
ونقللنا قراض من ذاك البيت بالخفية .. بردات فراشات مروحة كاعية بطانيات .. وراها باسبوعين دبرلنا سنك من جماعتة بس حديدة وبواري وكعده ونصبله بوري هو ووهب شدوه .. حيل فرحت من سوا السنك اول مرة بحياتي اقسل مواعين واني واكفة خلصت من كسرة الظهر كاعدة واجلف .
كال : بعد بس غسالة هدوم ان شاءالله ادبرها والكا بسعر مناسب
ورا شهر كدر يدبر قسالة مال هدوم ..
هينا اخته سهاد تضايكت حيل لان هي ما عدها قسالة : كالتله تجيب للغريبة وتحط واني اختك كاعدة وياك ما فد مرة جبت وحطيتلي
كال الها : كدامج يمتى ما ردتي اغسلي بيها
كاللها كدامج جن كاللها الج شحدني اشقلها تكوم تصيح وتصعدلي من فوك : يومية مشغلتها راح تخرب انت ما تعرفين تحافضيلج على حاجة
اكلها : سبحت واريد اقسل ثوبي
تكلي : بالحمام وانت تسبحين اخضه واطلع الثوب وياي واشره لو الا غسالة متعلمة على غسالة بت الجول ما تغسل ثوبها الا بغسالة
وبعدين شعدج هلكثر تسبحين انت حتى عقد ما عاقد عليج اخوي شني جاي يكربج
- عيب ترا وهب هينا خطاب يجي ويطلع ما بيناتنا شي فد بطني كبرت وجاي احتر حيل من اشتقل اطب اسبح
- فرحانة بطني كبرت مخلفة من الحرام ومفتخرة يولي المثلج اطم روحها وانت لا حيا ولا مستحى مسعدة وهالمصكوع على راسه يجيب ويحطلج حطاج سنك وتلفزيون وغسالة عاي كله وما معرس عليج عجل لو عرستو شني ينام على شليلج .. الله يعلم انت وامج شلاعبات براسه وهيج فاراته
- اكلج هسه اني نازلة يمج محاجيتج جايتج حتى اكل ما عدت انزل واخذ عدنا مسواك اسوي ما عدنا اتاني خطاب ليما يجي
-وشني شايفة روحج علي بخطاب تراه اخوي وكله هذا خير اخوي انت مكانج الجول وزايد عليج هم
ما رديتها عفتها شسويلها اني حملت قاد جيش من نسوان ابو وهب لبناته تعجز عليه هاي .. وعازلة منها فد تشمر علي .. هينة اتحملها شلون ما جان
كام خطاب من يجي بالليل يجيب النا وياه اليكدر بيده يوم بيذنجان طماطة خيار على نص كيلو نص كيلو فد البتيتة والبصل يجيب هواي جيف ما يخرب بدون ثلاجة
وانضل اليوم اطبخ اسوي مركة وتمن اني ووهب وناكل.
صح العيشة هينا هادئة وما مثل كبل متعلعلة فد كمت احس امور مو زينة .. وهب ما مرتاحة لوجوده .. روتانا سينما كله اطلاع افلام مصرية والمصري متروس شقلات سخيفة بوس وحضن وسوالف من هيج .. اني اكوم من تصير لقطه هو ما يدورها ولا يقير الاذاعة يضل يدحك مبحلك باللقطة ويكوم يسوي افعال ما حلو اضطر انحبس بالحول يم الطباخ واسوي روحي الهي نفسي بشي
فد مرة مدنكة على الجولة اكلب بالتمن طكيت المس بالجدر وحطيته جاي اندار لكيته يدحك عليه من ورا بنظرات ما حلوة
حجيتله : شبيك
- لا ما بيه شي بس صبيلي اذا خلص بعدني جوعان
- بعده ما خلصان
- اي زين دكملي شغلج
- شتريد
- ما رايد شي اكلج
رديت الباب مال القرفة اللي المطبخ يصير جدامه وسديته صاح : ليش ؟
- هوى جاي يجي للجولة ما عد يستوي التمن
سكت فد كلش تضايكت ...
كمت اتغاضى منه ، صح اضوج بس شيوي مجبورة اتحمله بهالحالة ..
مشت الايام ويوم على يوم كامت بطني تكبر والهدوم تضيك عليه وجسمي يبين من ورا واستحي اطلب من خطاب هدوم لان هو كوة مدبرها العيشة ووهب كاعد وساكت يمي لا اشتغل ولا طلع يخلص الليل سهر والنهار نايم
تحججت بالجو وكلت لخطاب :جاي ابرد اريد قمصلة فد طويلة تصل لركباتي وكون عريضة رايدة ادفى بيها
راح خطاب للبالة جابلي دشداشتين قديفة من البالة عربضات وروب شتوي قديفة ينلبس كامل حيل فرحت بيه كمت البسه كل الوكت
مرت الايام والاسابيع ..
وخطاب ما كل الايام يجي هينا بسبب امه ما ترضى تهد ابو وهب وخطاب عجز بيا طريقة يقنعها لا بكدر يعوفها قاد ويجي هينا ولا يضل يمها ويعوفنا ضال رايح جاي
كمت الح على خطاب يطلع وهب للشغل
كال : بس اريدله شغله زينة ما جاي الكا
كتله : اي شي حتى لو عماله شني انت متحمل كلشي وهو اكل ونوم
- ليش مضايقج بشي ؟
- لا مو هيج فد ماخذ التلفزيون خاوة بالليل بيده وبالنهار نايم لازم ما اعلي خاطر لا يزعجه شني مليت اني هم اريد اطمش
- سهلة
صح عايشة عد خطاب فد خطاب حبه اتحول فد اهتمام ابد حتى عين زايقة ما شفت منه حتى ما فد مرة ضايكني لو دحك بنظرة مو زينة ، عيشة والسلام بس وهب عينة كلش ماصخة
لكاله خطاب شقلة صانع عد واحد من الستة الصبح لل٦ العصر
هم ياله افتكيت شوية وافترهت .. من يرجع بالليل اكون مخلصة كل شقلي ومسوية العشا نتعشا سوية واني اندثر بفراشي وهو يندثر بفراشه .
ابو وهب ما بطل يدور ورانا انا واميرة
فد كرايب اميرة مفتنين عليها ورايح ابو وهب ع البيت شاردة وعايفة جهالها .. ماخذ الجهال وذابهم على عفاف وضال كل وكته بس يدور على اميرة اكثر شي عبن جانت هي اكثر وحده يحبها حيل اذته من درى بيها ويا ابنه كل اليريده يكضبها
حتى ما ضيع وكته بالدوارة علي بكثره
لين ما صدك جذب اميرة من تهمتني ويا خطاب واصلا هو طلكني ورمى يمين الطلاك ما اهمه بكثر اميره .
فد مرة واني نايمة بالليل
صوت الفلم عالي وصوت الهام شاهين والممثل مدري شلونه شلت راسي اللقطة مو زينة ووهب بسرعة فز من مكانه وتقطى
صحت : نصي شني اريد انام
- اي
نصاه ورجعت نمت فد كلش طالعة روحي من الحالة مدري شلون راح اخلص منه .
مرت مدري جم دقيقة وما احس الا وهب يحشك روحه وياي بالفراش بسرعة انتفضت وكمت : شعدك يمي
- باردة وكلت اجيب الغط ونتغطا بثنينهم حتى ندفى بدل ما كل واحد بطانية
- دوخر قاد روح
- هسه بيش مضايقج دنامي
- شني ما احب احد ينام بفراشي دكوم
- هسه نامي ما راح ادنى يمي
- شيل افراشك روح هناك
بعد فراشة مسافة شبر ، حجيت : وهب رد لمكانك لا والله احجي لخطاب عليك
- شتحجيله بتل بتل ن**** اني
- لا تفشر عيب عليك
- دولي جاية تستشرف براسي وهي *****
- واذا اني هيج شعدك كاعد وياي
- مو كاعد ابيت الخلفج خلف الله على ابن عمتي لفاج انت والنغل اللي ابطنج انا منه اخذ الاريده واذبج للجلاب تاكلج وتشبع باللي ابطنج
- دكوم مني لا اصيح وابليك والله ولي مني
تفل عليه وكام من عدي ..
سابقني ورايح لخطاب يكله : قدس صايرة كلش لا تسويلي اكل ارجع انام جوعان وكله بس تنتر وتزمخ اليكول عايش عدها وكل ساع تكول ما تروح تشوفلك مكان تعيش بيه شنو ابتلينا بيك احنه
خطاب ما مصدكة وجاي عليه كايلي : شبي وهب وياج
- شبي
- اجاني يشكيلي منج
- يشكيلك والله ما مسويتله شي
- صاير شي بيناتكم
- لا والله فد اكله نصي التلفزيون ما ينصي و يعني
- شنو الصاير اكو شي احجيلي
- خطاب الافلام المصرية كلها لقطات سخيفة ومن تطلع لقطة واني. كاعدة ما يدورها اتكاون وياه اكله ديرها يضل يطمش ويضحك وما يرضى يطني الجهاز
ضل يدحك عليه : بس هذا قدس
- اي
- متأكدة ؟
- اي
كام خطاب وحط البوفية برا وحط التلفزيون عليها .. من اجا وهب لكا خطاب حاط التلفزيون بالمطبخ ونايم بالقرفة ، اجاني : عجل ليش شايله هينا
- مو اني اريد اشوف الفلم وهو يريد ينام فشاله وخلاه الي بالمطبخ حتى اطمش واشتقل .
- ها
سمعها فد ما صدكها بلعها بس عرف وضعه هنا ما مطول
كام يشتغل ويرجع ساكت .. ما صرفله الوضع يريد كلشي على كيفه وهنا ما يكدر التلفزيون بالمطبخ وما يكدر يكعد بالمطبخ ولا يحجي ويا قدس لان سوا وياه موقف ما حلو
من انحصر ..
قرر يخلص روحه ويطلع منها
من الشغل جمع فلوس واشترى كارت رصيد ومعبي بتليفون ابو ابشغل ومخابر على ابوه
رد عليه ... الو
رد عليه ابو وهب : الو
بجى وهب ، حجه ابو وهب : ياهو
وهب كام يبجي بقوة
- منهو انت احجي
- يابه
- منهو انت وهب يول اكضبك يول اكطع راسك نذل وين انت
- يابه والله غلطت ووغوتني حاولت ابعدها مني هواي بس هي جانت تهددني بيك وما ادري شلون
وغص بالبجي يبجي من كله كلبه ويكله : يابه راضي حتى لو تذبحني حتى لو تكص راسي اني استاهل على السويته بيك كلشي استاهل بس ما اتحمل ابعد عنك انت عدي بعد الله من ابعد منك اموت والله صارلي اشهر الموت شايفة بعيني لان هيج سويت وياك كاتلني الندم
- كاتلك الندم ك**** تكرب حريمي يا جلب
- والله زلة يابه واني اكلك اكتلني ما رايد اعيش الندم كتلني اكضبني واكتلني بس لا تعوفني هيج متعب راح يدمرني عذاب الضمير خليني اموت على ايدك وانت راضي عني ولا اموت بعذاب الضمير
- والله ان كضبتك لا املص راسك هالجلب
- استاهل والله استاهل وكلنا نستاهل اني وخطاب وقدس واميرة كلنا نستاهل تذبحنا لان ما قدنا نعمتك وغدرناك ما نستاهل نعيش والله نستاهل تذبحنا
- خطاب وقدس شني ولك
- عايشين سويا وهي حامل منه من جانت على ذمتك وهسه على وجه جيابه
- حامل منه
- اي وفاتحلها بيت وعايش وياها
- خطاب عايش ويانا هينا هو ببدالي يم الحريم
- يوهمك هو غاد حتى لا يخليك تشك بيه هو بس رايد يضبط اموه حتى يطلع من بغداد ويبعد عنك
- وين انت يول ... احجي يمهم انت
- لا والله وروح امي مو يمهم اني جاي اشتغل وانام بالشغل بس عذاب الضمير كتلني راسد بس تسامحني والله بس تسامحني ادليك عليهم كلهم خطاب واميرة وقدس والكل اصير خادم عدك يابه بس سامحني ...
يتبع....
لقراءة الفصل السادس والعشرون اضغط على : ( رواية اسرار قدس الفصل السادس والعشرون )
لقراءة باقي الفصول اضغط على : ( رواية اسرار قدس )