رواية اسرار قدس الفصل الثاني والعشرون 22 بقلم زينب ماجد

رواية اسرار قدس الحلقة الثانية والعشرون 22 بقلم زينب ماجد
رواية اسرار قدس الجزء الثاني والعشرون 22 بقلم زينب ماجد
رواية اسرار قدس البارت الثاني والعشرون 22 بقلم زينب ماجد
رواية اسرار قدس الفصل الثاني والعشرون 22 بقلم زينب ماجد

رواية اسرار قدس الفصل الثاني والعشرون 22 بقلم زينب ماجد

و آنـة ذاك الـ ظلت عيونه تلاحگك، و ما گدر يخطيلة خطُوة♡
دحكت متعجبة .. ابو وهب شعندو جابنا لبيتنا القديم ؟
وامي شلها بالسالفة وشعدها ؟
اكو رجال جان واكف .. لحيتو عالية ولابس عركجينة ودشداشة ويلگ ودشداشتو كصيرة وداير ظهرو ليقاد .. وابو وهب يقزرنا ويصيح : دخلن دخلن بسع الزلمة منا فوتن .
فتنا فد خطاب ما رضى يدخل
صاح على امه : يمه انا ما اظل هين .. تجين وياي لو تظلين هينا وانا ارد للبيت
ابو وهب : ان جنت زاهد بروحك رد ، اكول اركد ولا تثكل امك بيك .
الحاجة : وكعدتنا هين تطول لو شنهو يبو وهب انا ما اطيك ادوس عتبة وسام واتنجس بدارها
وهب : راح نظل هين راح نظل هدوا عنكم المكاون والحزازيات واركدوا هين الايام الجاية صعبة اتجرعوها خاطر تكضي بخير بعز الله .
خطاب: يما عجل انا اروح لبيت عمي اضل غاد
ريسان : اكضبي ابنج وحطي عكلوا براسو احسن ما يروح وما يردلج مثل اخوه .
واكفة وادحك عليهم من باب المدخل وناطر افتهم شنهو الصاير ، اندار علي ابو وهب وزكح : فوتي يولي لا بارك الله بغيضج .. خشيييي
حجاها ومشى وانا تنحنحت من بكاني فد ضليت ادحك ورا خطاب خفت يروح خاف صدگ قاد خطر ويتأذى
ضل واكف وامه اتناحر وياه وتتكاون .. يحاجيها بعصبية ويحذرها تضل ويا ابو وهب ويكللها خلنا نبعد عنا ليش رايدة تورطينا بمصايبة امشي وياي وخلينا نروح منا لا تذبين روحج وياه
- وين نمش ما تسمعلا يكلك ذيج الديار صعب ما يصير نتخطاها .. بسك عناد ابني واركد هين واصبر نفهم شنهو تالتنا انا مثلك ما احمل شوفة وسام بس لو جانت روحتنا بيها خطر على روحك .. اكعد يما برضاي عليك لا تفجع كلبي
اندارلها يتكاون وانا ادحك .. رد راسو منها يستقفر صدت عينو بعيني .. ظل يدحك بيا ... تنهد اندار وهو يحير بامره شيسوي
فتت اتفكد اركان البيت
شكثر ما جان سجن اليه .. حنيتله
حنيت لايامي ذيج من جنت على لاهيتي ارعى بالحلال واكل اكلي وانام ما عندي هم بالدنيا قير الخبز يكفي عشا لو اعجن للعصر واتعاجز من الخبز العصرية .
شيردني لروحي ذيج ؟
شيردني بلايا هموم .. مشيت على قرفتي اني واخواني
ع المطبخ ، صدت امي كبالي : انت راح تضلين هين
- عجل وين اروح ؟
- يم نهلة وبناتها
- ما صلت نهلة
- عليش شجرالها ؟
- صاحت الصايحة وهجت ببنات اخوج ، بس انا ما اهدها
- وشتريدين تسويلها
- السوالف هواي خليج لاهية بمصيبتج البطنج ومالج غراض بسوالفنا .. شسويتي عليها
- نصي حسج راح تشهريني
- كومي عاد خايفة دلنج .. لو خايفة ما ذبيتي روحج بهيج مصيبة بس عليمن انطلعين ؟
حجتها واندارت للحاجة فاتت للبيت .. تلكتها وهي تكللها : هلا هلا ومرحبا بام خطاب ابيتي .. احسبي الدار دارج وصرحي على راحتج
ردتها : ساعة الكشر الاشوفج بيها بس يا حيف الدنيا التذبنا وتغصبنا نجابلج
عبرتها وفاتت على قرفة نهلة جانت كاعدة بيهن عفاف واميرة وكل وحدة بيهن تكول هاي الغرفة الي ولجهالي .. كعدت الحجية اندارتلها عفاف : شني ما سالتي ابو وهب مطولين هين ليمتى نضل هينا ؟
- علمي علمج
اميرة : الزلمة الواكف ياهو شكلة مو عراقي هيج حسيت
الحاجة : يمكنه اردني سمعته وهو ينادي اعلى ابو وهب لاهي خليجي لا هي سوري .
عفاف : بس كونها تكضي على خير والله طكت ارواحنا .. هسه لو ماخذنا لاهالينا مو اخيرلنا من الهجولة هاي جايبنا مكعدنا بنص هالهيمة
الحاجة: كلها جم يوم وتكضي لا تزنين وتونين بروسنا
اميرة: ونظل هيج شلون نسوي اكل الجهال جوعانين
- كومي واحجي ويا ذيج الوحدة الما احب اطري اسمها
كامت اميرة وهي تتفقد البيت لكت قدس مامددة بغرفتها القديمة وصافنة بالسكف: يخاتون ما كضيتي صفنتج ؟
- شكو
- المطبخ منين نريد نسوي اكل لجهال سالي امج
كمت من مكاني امي ما هي كاعدة كعدت الزلم بالدوانية ..
طلعت برا .. خطاب كاعد ليقاد ووهب وخالد واكفين يمه يسولفون وهو كاضبله عودة يكشر بيها بالخنجر
صحت : وهب
انداروا كلهم : صيح امي
ندهلها، اجتي: ها
- يريدن يركبن مسواك اكو ؟
- كومت زلم هين دزوا واحد يجيب وياه مسواك
- البامية لكطتيها من الكاع
- بعتها ومشت يا بامية التسولفين بيها ..
- اخوتي وينهم
- بالموصل
- وراح تظلين وحدج هين
- لا انتم هين ولو راحن هن انت ما اخليج ترحين اكضي ايامج هينا لين ما تحطين البطنج
- احط البطني شلون ؟
- امشي هسه وعودك بعدين نكعد ونحجي
مشيت لكيت اميرة حاجية ويا ابو وهب على المسواك .. وهب واخوته نزلوا من السيارات وكمنا طبخنا النكدر عليه .. فد بيتنا مو مثل قاد ابيت ابو وهب قاد عدهم بوري .. هين ما عدنا بوري برميل نترسه ونشتقل بيه لكلشي
وكفت عفاف تريد ماي تقسل ابنها الماي كاضي كالتلها امي : اخذي سطلج واطلعي للجول اترسي وردي
- يااااا ونظل هيج
- واحد منكم يروح يترس البرميل بالعربانة ويرد ما ينرادلها هرجة
اميرة : شحالكم غدي شيلحك البرميل طبخ تنظيف غسل شني اليريد يغسل يمسح بسفنجة
وسام : هذا الموجود اميرة خاتون اعذرينا ماحنه مثل قصر اهلج الخير يسفي .. حالنا اعلى كدنا بهالهيمة
تنهدت ومشت عن امي
وامي كاعدتلهن بالهول ع الزردوم شكو وحدة تفج حلكها اداهرها جنها وحدة جانت ضايجة والله جاب هالوادم اتسلى بمداهرهم .
وهب واخوته راحوا ترسوا ماي وكوة كضينا اليوم بعدهم ما متعودين على عيشة الجول وحدتهن على كثر ما تنحست وحجت اليسمعها يكول جانت عايشة بقصر شعشوع مو ابيت ابو وهب ومكضي ايام الله بتيتة صبح وليل .
لليل فرشن شلون ما جان بالهول ونامن
انا تمددت بقرفتي القديمة فد اسمعلهن الحاجة تحجي تكول ( جدرنا ظل عد ام رسول مالت نودي واحد اعليها ايجبه النا )
عفاف : دخيل بختج تلاكي عفن وذبته منيلها الوادم كهرباء وتضم اكلج
- يا ظنج ذبت اللحيمات مالتنا ؟ انا امك يخطاب يمه
تبسمت وانداريت انام
لهناك .. ما احس الا سراب تصرخ وكلنا فزينا على صرختها حتى ابو وهب ع الصريخ اجا من الديوان لهين كلها تكضب بيها وتريد تعرف شجالها تصرخ وتصيح ( شفته شفته )
الحاجة تصيح وابو وهب والكل وهي تصيح ( شفت جني مو بشر والله اني متأكدة شكله مو مالت بشر يابه رجعنا ما اريد اظل هين فدوة )
كلهم استهزئوا بيها وكاموا يصيحون عليها وردوها وكالولها فززت الوادم على ظنونج ما تستحين والله متحلمة بجني
رزلوها والكل رد ينام
ضليت ادحك عليه البنية صدگ خايفة لا هي نايمة ولا هي كاعدة تتلفت يمنه يسرى وتكعد باختها وحنين تجر الجرجف وتكمل نومتها
ما ادري اذا صدك لو جذب فد انا عشت كوم هين ما فد يوم شفت شي يخوف .. يمكن صدگ متحلمة .
عفتها ونمت فد ظلت كل شوية تفزز الوادم والحاجة تزكح بيها وتكلها ( انجعي اشو انطمري منجديتنا بهالليلة ) وهي تبجي لحد الفجر من طلع الضوا يلا هودت ونامت .
الفجر فجت عيني كمت من الفراش ..
مريت ع البيت الكل نايم .. لبست ربطتي وطلعت للمراح فتحت المراح الهوايش والصخول موجودات بس الدجيجات ما هن .. ضجت عليهن .
رعيت الحلال ووردته الماي وكعدت انظف بالمراح والكل نايم .. حسيت اكو احد يدحك علي انداريت ماكو احد ، كملت ، لهناك وهم حسيت واحد وراي التفتت شفته بسرعة انجر ما عرفت ياهو ..
حسبته خطاب .. مشيت دحكت من برا المراح ماكو احد !
رديت كملت بسرعة ودخلت للبيت ، شو بعدهم محد كاعد
مشيت للمطبخ حطيت البتيتة ع الجولة سلكتها .. لما كعدوا تريكنا وكضينا اليوم واحد ما طايك الاخر والكل تدرم وامي متونسة عليهن اداهرهن بخلك اطول من يوم الجمعة .
ثاني يوم .. نفس الشي اكعد الصبح واحس احد يراقبني
ثالث يوم نفس الحالة .. قررت احاجي خطاب خاطر اعرف عليش يراقبني
الظهر واني اودي القدا لوهب وخطاب .. وهب جان رايح يتقوسل وفد خطاب كاعد ، حطيت الأكل وحجيت: شعدك تراقبني ؟
- ياهو ، انا ؟
- اي
- يمتى مراقبج؟
- اني دحكتك
- وين شفتيني
- بالمراح
- شوكت ؟
-الصبح
- يولي انا كبل شوي اجيت
- وامس
- ما ابات هين بس على مود امي اجي الضحى
- يومية ؟
- اي
ظليت ادحك بيه دايخة : عجل ياهو هاذ اليتلحكني
- الصبح
- اي
-ما شفتي منه شي ؟
عفته وفتت جوا ضليت احجي ويا روحي ودايخة ياهو هاذ بعدين كلت اني شبية متعبة عمري بالتفكير الراقبني والما راقبني هن حلال ارعاهن وارد للدار خوما عاملة جريمة
خطاب ضلت هالسالفة اباله مالت احد يراقبني ..
يومها ما راح بات برا .. قرر يبات هين بالچول .. للمقرب سعله ابو وهب ( راح تضل هين )
خطاب : مو رايح
- صارلك من يوم الجينا ولليوم انت ما تركد هين شصار وقررت تظل تبات
خطاب : من شنهو خايف خالي ؟ احجيهن
- يخسى اليخوفني انا ابو وهب ارعب امه بحالها ومحد يهز مني اشعرة
- طالما هيج عليش خايف من ضلتي هين
-من عبن لضلتك اسباب مو خالية
اجت ام خطاب : شنهي خوية سالفتك عجل وين تريده يبات انا الردته هين
- ابنج هاذ لو فچ حلكه ما يلوم الا روحه
- يفچ حلكه بيش
- هو يفهم انا شقصد خليتي حاطلج كدر ولهساع متحمل ابنج
خطاب : انت المتحملني لخاطر امي .. انت تعرف متحملني ليش وما اريد اكول ليش خلي السوالف مجودرة
- شنهو التقصدة يخطاب
- لو تكدر تكتلني جان كتلتني من زمان بس انت تعرف شنهو الكاضبك
- تهددني ولك ابن *****
بس فشر على ابوه خطاب فز وتلازم ويا ابو وهب
وام خطاب ذبت روحها بيناتهم تفازع .. وهب واخوته جروا ابوهم والحاجة جرت ام خطاب وهي تكله ؛ ادخيلك وادخيل الله يمه امش من هين ولا تظل
بعدها من عنده وطب بالبستان لحكته : كل يوم انت ما تبات هينا شنهو الجرى اليوم وتريد تبات ما اريدك تضل جدام عين ربعة
- لا هو ولا ربعة يكدرون يطخون شعرة مني
- شنهو الضامه ولك خطاب يمه لا تورط روحك ويا ذول ما تكدرلهم
- نشوف منهو الما يكدر لمنهو .. ابعدي وخليني بروحي
- يمه خطاب اروحلك فدوة اكصي الشر وعوفهم
بعد امه منه وراح لوحده
ما عرفت شبيهم وشنهو الوراهم جني اطرش بزفة
نمت ومثل كل ليلة تعودنا سراب تخبص ليلتنا هذا اجا شفت واحد وتتخيل جن كبالها .. فد محد يصدكها كلها تصيح عليها ..
كعدت الفجر ضنيت محد كاعد ..
جاي امشي حجت امي : كعداتج هاي ما راح تجنين عكبها غير المصايب
- يمه اروح اسرح بالمراح
- واليناظرج برا المراح مكيفتله
- ياهو
عدلت المخدة واندارت للجهة الثانية تنام ..
عفتها وخذيت ربطتي لبستها وطلعت خذيت سطلت الماي ترستها ومشيت للمراح فكيت الباب ووردتهن .. وكعدت انظف مجانهن .. دحكت من بعيد خطاب واكف ليقاد يراقب .. ما فهمت شنهو امره ، فد لا هو كرب ولا اني كربتله
ظليت اشتقل وكل شوي ادحك عليه
دنجت للصخلة احل عكدة بجدمها .. شلت راسي خطاب ما هو
تعجبت كبل لا ادنج هو موجود .. طلعت اتفكد ما هو
وين راح
مشيت للبيت تفكدت الكل نايم
دحكت من برا على الديوان الكل نايم حسيت بحركة يم الجول وشي طاح بالكاع .. اندرت بسرعة جاي امشي للجول ، انصاح من وراي : تعاي جاي
انداريت خطاب : شجاي يصير
- ادخلي ومعليج
اتعداني وهو يروح للجول : شنهو
- ردي للدار
جاي الحكه وكف وخزرني : جاي تسمعين الاكوله لو لا
- شنهو الصاير
جا عليه بهمة كضبني من زني حيل وحجه وهو صاك على اسنانه : طلعة من هالدار ما اريدج تطلعين ، ابالله لو شفتج رحتي للمراح مرت اللخ لا اكصهم لجدامج
دفعني .. ضليت ادحك عليه بخوف وعجب
هذا شجراله ؟ وشجاي يصير ؟
مشيت واني ادحك وراي .. على خطاب وين راح اندرت وما احس الا امي بملابسها سود وشيلتها سودة وعيونها من الكحل السايل سود واكفة جدامي اجيت انضرب بيها فزيت من كل حيلي من شفتها : شبيج يمه خذيتي حيل حسبالي مدري شنهو متت خوف
ظلت ادحك عليه واني اتعديتها وفتت للهول جاي افوت للقرفة
ورد شي قريب ( غريب ) اني بحلم لو جاي اتخيل .. انداريت امي نايمة بمكانها وعلى حطتها كبل لا اطلع للمراح ونازعة شيلتها ونايمة .. فد اني هسه شفت امي جدامي
هي جانت واكفة
شجاي يصير ؟
مشيت بس يا ثكل خطواتي من الخوف
رعب سراب وتخيلاتها كلها جت بمخي .. بسرع ورد ابالي الجاي تشوفه سراب حقيقة هي ما جاي تمثل هي صدك جاي تشوف اشياء .. امشي والخوف يسري بكل جسمي واحس على يا ساعة راح انصدم بشوفة ما اطيكها
تفكدت الهول كلشي ما بيه
المطبخ القرف مظلمة ما شفت منهن شي ..
طلعت للكراج خطاب جان راجع بهمة وعصبي ، من شافني : انت ما تنردين يولي ؟
- اني شفتي شي
- دخلي جوا
- والله شفت شي ما اعرف شنهوة يعني اني شفت امي واكفة فد هي نايمة
عكد حاجبه وهو مستغرب من كلامي .. اشر براسه على ناحية المراح مشيت جدامه ، وكفنا قاد حجه : شجالج يمرا
- من صحت علي وردت افوت شفت امي واكفة فد لابسة شيلة سودة وصاحبة ادحك .. دخلت للهول شفت امي نايمة
- يولي لا تصكعيني
- والله ما عدجذب هذا اللي شفتا
- تتخيلين
- انت ما جاي تصدكني
- مو مهم اصدكج المهم لا تطلعين للمراح .. جوزي طلعت الصبح يولي كل الصار بيج من هالطلعة .. لا تطلعين
- عجل ياهو اليورد الحلال
- الحلال بيج وبلاياج اكو اليسرح بيه هذه مو شغلتج يا مرا .. لا تطلعين واذا ردتي اطاعين اطلعي بوكت الكل كاعد ومنتشر بالبيت مو غبشة
- عليش
دحك بوجهي تنهد : شبالية كلبي يولي
طلع جكارة من جيبه وكعد يورثها : الشفته صحيح لو اني جاي اتخيل
- اسألج سؤال
- شنهو
- مرة كلتي اني اشك ابو وهب رجل امي صحيح
- كبل جنت شاكة هيج
- شنهو الخلاج تشكين هيج
- هواي امور
- منها ؟
- هذا البيت اله ومكعدنا بيه وجان حاكمها وتمشي بامره
- وبعد
- بعد هواي امور ما ترضى احد يحجي عليه لو احد يجيب سيرته، ووكت اليجي جانت تحكمني ما اكعد بالليل ولا اطلع من قرفتي
- اي
- واكو بعد شقلة
- شنهو
- كبل لا يجي جانت تفرك سنونها بديرم
- بس
- اي يمكن بس ما ادري فد هاي اكثر شي
- شكج ما جان غلط
- يعني شنهو
- ما اريد ادوخج بس هالجول عالم من الاسرار وانت مثل الغركان بهالعالم بس ما يعرف عنه شي .. تاكلين اكلج وتشربين شربج وتنامين وعلى ربج حسابج
- قصدك امي جانت مرته لابو وهب
خطاب:- اكو امور ومواضيع لو ما نفهمها احسن، مرات نبقى جاهلين افضل مما نفتهم لإن الفهم راح يأذينا هواي
- شتقصد يعني
-ارجعي ولا تفكرين بشي التفكير يتبعج قدس ، ريحي بالج انا صاحيلهم
ضليت ادحك عليه اول مرة اشوف خطاب بهالغموض
حسيته واحد ثاني ... فد راسي انفر شنهو امي جانت مرت رجلي السالفة منين ما اريد اعقلها ما تنعقل
شلون تطيني لواحد جان رجلها ؟
خطاب قلطان اكيد ، هو لو رايد يشاقى وياي لو .. ما ادري ما ادري معقولة يتشاقى
احجي ويا روحي وامشي للبيت فد ابد ما خاشة السالفة بعقلي
كلش دوختني سطرتني سطر .. رديت اكضي شقلي فد عقلي مشوش فرد نوب
كضيت شقلي ومشيت لسراب .. جانت عتقسل بالمواعين وصافنة .. حجيت : اني اليوم شفت شي
- زلمة عيونه سود وجنهن بيهن كحل مو
- لا
دحكت بوجهي : عجل اشفتي ؟
- شفت امي فد هم عيونها مكحلة وتخوف ردت انطخ بيها خليتها وراي وفتت بس عد ما دخلت الهول لكيت امي نايمة مفرعة انداريت ماكو واحد وراي
- اني الجاي اشوفهم جثيرين مرة جاهل مدمى مرة زلمة عيونة كايلة ليبرا .. ومرة ... سكتت
- شنهو
- جاي اشوف واحد يشبهج فد زلمة مو مرة
- شلون يعني
- ما عرف حسب ما شبهت هيج
- لا تخوفيني ازود هو اني هيج جاريتها تحتي
- الليل ما جاي انامه كل يوم بهالبيت جاي ياخذ من حيلي وصحتي ما جاي احس نفسي مثل كبل على طول خاملة وحيل ما بية والجاثوم كل ليلة يكضبني ياخذ ثلثين حيلي .. غير الافز والكا الوجوه فوك راسي واليكتلني من اصرخ وافزع اهلي محد منهم يصدكني وضالة علتي نايمة بكلبي
تنهدت : كلش احتاج امي
احتاجها تسمعني اطمني تمسح على راسي تقرا قران اهود بحضنها .. حيل جاي افتقدها .
حجت ودموعها صبن
كمت اربت على رجلها واكلها : ميخالف الله كريم الله ما ينسى عبد
- قدس رايدة منج طلب
- شنهو
- اني ادري تريدين خطاب وادري خطاب رايدج ، الاريدج تايسي منج وما تكربين منه
- اني ما كاربتله وادري بدربي ودربه مستحيل ، فد هو متأمل هواي
- كطعي الأمل اني من بعد الله ما الي غير خطاب يسندني يتيمة ومالي احد خليني اكسبه الي سند وامن روحي بيه
- عجل اني كاضبته اني مالي غرض
- الاريده منج تكرهينه بيج كون يبزع كل ما تشوفينه تغلطين عليه ترزلي تكليله شنهو لازك بيه ما تحس ما عندك كرامة هو راح تلعب روحه منج ويكرهج
- فد اني ما اكدر اسوي هيج
- وليش ما تكدرين ، تعرفين بس تتمسكنين جدامه وتتنخين بيه
- ولا متنخية بيه اني فد معليه بكلشي ما كاربه صوب احد هي المصايب تجرش فوكي ليوحدها
- كولي رايدته لا تتحججين
سكتت عنها وگمت ..
ثاني يوم كعدت من الفجر فد ما طلعت للمراح ظليت كاعدة بمكاني .. عد ما حسيت اكو حركة برا طلعت لكيت خطاب يفتر ، كربت منه ظل يدحك عليه كربت احاجي بسالفة امس بعدني ما حاجية سبكني وكال : يولي مكورشة
حجاها وتبسم
عكدت حاجبي وظليت ادحك لبطني
هالمصيبة نسيتها ابطني .. لا اصلا ضعفانة
تبسم وكال : اي صحيح جاي اتشاقى وياج ، تسمنين تضعفين انت حلوة
- خطاب بيش متأمل ؟ احنا ما نصير عليش توهم روحك وتوهمني
- تصيرين
- ومنين اجتك هالثقة خاطر تكول هيج
- الالي ما يصير لغيري والايام راح تشهد
- لا تشهد ولا هم يحزنون خلينا لا نأذي ارواحنا
- انا لا كاربج ولا واصل صوبج خاطر لا اذيج بس اني ما ناسي حكي ولا ساكت عنه
- ما اجيت احاجيك بهالسالفة
- عجل شنهو
- سالفة امس
- شبيها
- انت متأكد من الحجيته
- شراح يفرق وياج
- هي امي شلون تطيني لواحد جان رجلها ما يصير
- كل الجاي يصير ويانا بالاحلام ما يصير عليش مستغربة هالسالفة هاي
- ما تنعقل
- عجل لا تعقليها انا كتلج التفكير الزايد بالامور ياذي انسي وجنج ما سامعة
- ما اكدر اعيش جاهلة
- الجهل الج رحمة احسن ما تعرفين شي عن هالجول
- اني فد رايدة افهم شنهو سر هالجول سنين عايشة بنصه وما اعرفه شنهو
- مو اذا حجيتلج شي اخر .. راح اتعبين اكثر
- لا اني اريد اعرف ما اريد اضل نايمة على اذني
- شنهو التريدين تعرفين عن هالجول
-شنهو سره
- اول سر بهالجول هو مو جول
- عجل شنهو ؟
- مقبرة جماعية
سكنت وظليت ادحك بوجهه ، كمل : وكل الداير ما دايرج هم اموات وناس اندفنوا غصب
- جنت شاكة هيج الوضع فد هسه من اتاكدلي ما ادري احس جلدي كشعر .. شلون الواحد يهج من هالجول
- الميت بهالجول ما ياذي مثل الحي .. شفايدة تهجين من الجول واهل الجول مرافكينج
- منهمه ؟
- خالي
-خالك القدر الما منه مهرب .. مقدر علي
- القدر ما يمشيج انت تمشينه
- انت تحجي بزود عبن زلمة جرب تحط روحك مكاني مرة لا حول ولا قوة ما تعرف كاعها من سماها لا تعرف اصلها ولا فصلها ولا تعرف كلشي عن نفسها
جاي احجي طلعت امي من البيت ظلت ادحك ع البستان شافتنا عفت خطاب ومشيتلها : ما تخافين ابو وهب يطلع ويشوفج وياه
- هم يسهرون الليل كله محد بيهم يكعد الصبح
- وشرايجج ما يكعدن
- يمه شنهو اليربطج بابو وهب
- شنهو سؤالج هذا
- اني فد رايدة اعرف انت شلون تعرفتي عليه وشنهو الخلاج هيج
- هيج شنهو
- مثل الاسيرة عده بحيث يجي يستحل بيتج هو واهله وربعة وانت حرف ما تفجي
- لا ادخلين روحج بسوالفج تضرج
حجتها ودارت عني ، حجيت وراها :
- صدك جان رجلج ؟
وكفت : الجلمة انكالت لو انعادت يا ويلج يقدس
حجتها ومشت مني ..
مشيت من ناحية الجول عين وما تمد هيمة ماكو احد فد هواها يخنك رقم هي هيمة ومساحة مفتوحة بس من تجر نفس تحس النفس يخنكك ما يريحك .. هالنفس الاجره من ريت هالموته ؟ ابو وهب الكتلهم لو امي لو اخوتي لو منهو ؟
هواي اسرار بحياتي شوكت اعرفها وشلون الكل يهددني وينهرني خاطر لا اعرف شي عنها .. تنهدت بيمن احتار بالمصيبة اللي ابطني لو باسراري
مضيت ومضت ايامي يوم يصعب على يوم واحنا بهالجول ليش ما نرد ما نعرف .. حالنا كل ما جاله يسوء اكثر كل واحد بهالجول محد طايك الاخر . واحدنا كوة عايش ع الاخر ولو تكع الفرصة بيد احد يكضي ع الكل ، الكره لامنا مو الحب .
من بعد فترة حالنا مثل ما هو وربع ابو وهب كربوا يسافرون .. دخل ابو وهب وصاح : يا حاجة
- امر يبو وهب
- جهزي سراب لرجلها
- رجلها ؟ شنهو رجلها
- ابو مصعب تكدم لها وبحيل الله الليلة ملجتهم ومن صباح الله تغبش ويا زلمتها
اصطكينا كلنا .. حجت سراب : منهو هاذ ياهو انا ما اعرفه ما اريد اتزوج .. ما اهد اخوتي
ابو وهب : وكت الاجي واكلج راضية لو لا اطي رايج لجن هالساع محد ماخذ رايج تنفذين وتجهزين روحج الليلة
اندار علينا : سمعتن ؟ البت عروس الليلة بأذن الله .. جهزنها لرجلها ... ياله
صرخت وكامت تبجي وتلطم على وجها وتصرخ ما تريد تعرس كامت تحبحب بادين الحاجة وتتوسلها تقنع ابوها ما يطيها بس ابو وهب جان ماخذ قراره ورايد يطي بته لواحد حتى مو عدنا ... لجن ما جان يعرف المطلوب مو بته ...
يتبع....
لقراءة الفصل الثالث والعشرون اضغط على : ( رواية اسرار قدس الفصل الثالث والعشرون )
لقراءة باقي الفصول اضغط على : ( رواية اسرار قدس )
تعليقات



حجم الخط
+
16
-
تباعد السطور
+
2
-