رواية شهرزاد وقعت في حب معاق الفصل الرابع 4 بقلم شهد محمد

رواية شهرزاد وقعت في حب معاق الحلقة الرابعة 4 بقلم شهد محمد
رواية شهرزاد وقعت في حب معاق الجزء الرابع 4 بقلم شهد محمد
رواية شهرزاد وقعت في حب معاق البارت الرابع 4 بقلم شهد محمد
رواية شهرزاد وقعت في حب معاق الفصل الرابع 4 بقلم شهد محمد

رواية شهرزاد وقعت في حب معاق الفصل الرابع 4 بقلم شهد محمد

هو انت بجد كنت خايف عليا انا كمان؟
اتكلم وهو بياكل وقال:
_ااه
_ليه
كمل اكل وهو بيقول:
_مش عارف بس حسيت إن زايك زاي رونزي طفله مش هتعرف تتصرف مش عارف اشرحلك بظبط بس يعني انتي في نظري لو حد قالك تعالي معايا اجبلك شكولاته هتروحي
بصيت ليه وبعد تفكير قولت:
_ومروحش ليه ماهو هيجبلي حاجه انا بحبها 
ضحك وقالي:
_شكرآ انك اثبتي ان شكوكي صح انتي ورونزي محتاجين اللي يهتم بيكم اصلآ 
_محدش في الدنيا مبيحتاجش الاهتمام على كل حال متشكره اوي على خوفك عليا .. تصبح على خير 
ابتسم وقالي:
_وانتي من اهل الخير 
سبته ودخلت اوضتي جيت انام بس مجاليش نوم فضلت قاعده سرحانه
_هو ليه خاف عليا؟
_قصده اي ب اني زايي زاي رونزي؟
_معقوله انا مهمه عنده؟
_معقوله في حد بيخاف عليا؟
روحت في النوم وانا بقول لنفسي فوقي يا روز انتي ولا حاجه .. ولا حاجه 
عدا اسبوع علينا ف تركيا خلص شغلو ورجعنا تاني معملناش اي حاجه ممتعه طول اليوم هو في الشغل وانا بهتم ب رونزي ده الروتين اليومي الدايم 
رجعنا القاهره وهو راح على شغلو كالعاده وكنت قاعده انا بحكي قصة الجميله والوحش ل رونزي 
_راحت الساحره لعنته وخليته وحَش مخيف وكل اصحابو بقو ملعونين زايه برضو اللي بقت دولاب واللي بقا ساعه واللي بقا فنجان واللي بقت براد شاي 
لفت نظري وانا بحكي خيال حد بصيت ورايا وكان هو كان قاعد بيستمع ل الحدوته رونزي شافته جريت عليه 
حضنها وباسها وهو بيقول:
_انا قرارت اخدكم ونخرج انهارده اي رايكم؟
_هيييه هطلع البس يا بابي 
قالتها رونزي وجريت على اوضتها وانا فضلت واقفه في مكاني 
_عندك مانع يا روز؟
_لاء خالص 
_طيب اتفضلي ده مرتب الشهر بتاعك 
_يااه عدا شهر 
_ااه ياستي شفتي 
_بس انا مش محتاجه الفلوس انا عايشه معاكم باكل وبشرب ومش ناقصني حاجه حقيقي مش محتاجها
_ده حقك انتي مش بتشتغلي ل الله والوطن الشغل شغل اتفضلي يلا وحصليني على العربيه
قالها وساب الفلوس على التربيزه ومشي 
خدتهم وخدت رونزي وخرجنا 
روحنا مول دخلنا مطعم طلبنا بيتزا بعدين دخلت رونزي الملاهي بعدين جبنا غزل البنات واشترينا قصص جديده وعرايس وألعاب 
وبفلوسي انا اشتريت تيلفون وهدوم جديده 
خلص اليوم وده كان أجمل يوم يعدي عليا من وقت ما سبت القريه 
وهو كان متغير مش حاد وصارم لاء بيهزر ويضحك كان جميل .. جميل للغايه 
رجعنا البيت هو راح على مكتبو وانا فضلت مع رونزي لحد ما نامت ودخلت البلكونه فتحت التيلفون الجديد 
بدأت اعمل اكونتات على السوشيل ميديا واول حاجه عملت سيرش عنها كان اكونت ياسين وبعد الكثير من السيرش لقيته باين من الصور بتاعته انه اتجوز..
عاش حياته من بعدي وكمان مبسوط!
طب انا زعلانه ليه دلوقتي؟
مش انا مبقتش احبو اصلآ؟
ليه في جزء ف قلبي زعلان بقا؟
افتكرت كل اللي حصل وعيطت وانا صعبان عليا نفسي
ليه حياتي مش عاديه؟
ليه محبتش واتحبيت زاي اي بنت؟
قطع عياطي وجوده جنبي وهو بيقول:
_سمعك!
مسحت دموعي وبصيت ليه وانا بقول:
_حضرتك عايز حاجه رونزي صحيت؟
_مش القصد يا روز قصدي سمعك احكيلي اي سبب عياطك 
اتهندت وانا بقول:
_ولا حاجه بس افتكرت حاجه حصلت زمان 
_الماضي مؤلم بس يا تهربي منو يا تتعلمي منو 
قالها ومسك الموبيل من إيدي وبص على صورة ياسين وقال:
_كان حبيبك؟
_كان جوزي 
_انتي كنتي متجوزه؟
_ااه بس غصبن عنه هو جوازي منو كان رد جميل عن جمايل اهلي 
_عندك مانع لو حكيتي التفاصيل؟
_لاء خالص 
بدأت احكيلو حكايتي من اول يوم اتجوزت فيه ياسين لحد اليوم اللي لقيت فيه اعلان الشغل  
_يااه يا روز مريتي بكل ده 
_طبعآ مش باين عليا 
_خالص انا كنت فاكرك لسه صغيره متعرفيش اي حزن ولا اي مشاكل كنت مستني اسمع منك رد تافهه لما سألتك بتعيطي ليه كنت مستني تقولي ضفري اتكسر ولا رمشي وقع طلع مشاكلك اكبر من ان اي بنت زايك تستحملها 
_للدرجه دي بتشوفني ساذجه؟
_طفله بشوفك طفله 
_الطفله دي من بره يبان عليها اي دونت كير بس من جواها مفيش حاجه بخير 
ضحك بصوت عالي ضحكت معاه ونزلت دمعه من عيني غصبن عني بص ليا وبعد دقايق رفع إيده عشان يمسح دموعي بس مطالش 
نزلت انا على رجلي عشان اكون في مستواه ابتسم وبكف إيده مسح دمعتي من على خدي
_متعيطيش انا معاكي 
_وجنبك انتي مش لوحدك 
_زاي ما انا سند ل رونزي هكون سند ليكي 
_زاي ما رونزي بنتي انتي كمان بنتي هو اه يمكن سند عاجز شويه بس في الاخر سند 
بصيت ليه وانا بقول:
_متقولش كدا زاي ما انت هتكون سند ليا انا هكون عكاز ليك وكدا كملنا بعض 
ابتسم وقطع الحظه القمر دي صوت رونزي وهي بتنادي روحنا ليها سوا انا وهو 
_عايزه تشربي يا حبيبتي؟
_لاء كملي الحدوته
_عيني حاضر 
قعدت جنبها على السرير وهو قرب مننا وبدأت احكي وهما الاتنين بيسمعوني 
_بعدين راح الوحَش خرج باباها وحبسها هي و..
بصيت على رونزي كانت نامت بصيت عليه كان قاعد حاطت إيده على خده ويسمعني
ابتسم وقال:
_كملي
_طب في البلكونه عشان رونزي متصحاش 
خرجنا انا وهو من الاوضه ودخلنا البلكونه وكملت الحكايه 
_وبس كدا ياسيدي رجع امير من تاني واتجوز الجميله وعاشو في تبات ونبات 
_تفتكري لو كانت هي مكانو كان هو هيحبها؟
_وليه لاء الحب مش بشكل يمكن كان هيحب روحها شخصيتها اكتر من شكلها 
_المرادي البنت اللي قدمت قلبها مش الراجل 
_مظبوط 
_امم حكايه لذيذه 
_امم هو انا ممكن أسألك سؤال 
_اتفضلي 
_انت ليه بتحاول تخلي نفسك شخص غاضب وعميق وغامض ؟
_ليه هو انا مش كدا؟
_لاء خالص انا اللي قدامي دلوقتي طفل عنده خمس سنين 
ضحك وهو بيقول:
_كدا هنتخطى حدودنا بقا بعدين انتي كام سنه اصلآ ؟
_انا هتم شهر ٦ الجاي ٢٢ سنه 
_يعني انا مكدبتش لما قولت عليكي بنتي عارفه انا كام سنه 
_كام يعني!
_انا ٣٣ سنه 
_طب ما حلو مش كبير اوي على فكره ولا انت مصمم تكبر نفسك وعايزني اكون بنتك؟
_انتي بنتي من غير اي حاجه يا روز بنتي اللي هقف قصاد اي حد يفكر يأذيها تاني 
_هو انا ممكن أسألك سؤال تاني؟
_طيب اسأل انا الاول ممكن؟
_اتفضل
_مرتاحه في البيت في الشغل في المعامله في حاجه مضايقكي؟
_الامان حاسه ب الأمان وده اهم من كل اللي انت قولت عليه 
_طيب اي كان سؤالك انتي؟
_كلمني انا مامت رونزي!
يتبع...
لقراءة الفصل الخامس اضغط على : ( رواية شهرزاد وقعت في حب معاق الفصل الخامس )
رواية باقي الفصول اضغط على : ( رواية شهرزاد وقعت في حب معاق )
تعليقات



حجم الخط
+
16
-
تباعد السطور
+
2
-