رواية يويو الحلقة الثالثة 3 بقلم لولو محمد
رواية يويو الجزء الثالث 3 بقلم لولو محمد
رواية يويو البارت الثالث 3 بقلم لولو محمد
 |
| رواية يويو الفصل الثالث 3 بقلم لولو محمد |
رواية يويو الفصل الثالث 3 بقلم لولو محمد
احمد / تعرفوا منها احسن
عبير / و لا ما تعرفوش خالص احسن و احسن
احمد / يا طنط انا
عبير / بص يا احمد انت دخلت قولت ظروفى واحد اتنين تلاته و كل يوم تتغير حاجه فى ظروفك و احنا ولاد اصول و نقف جنبك لكن توصل انك تبيعها دهبها و انتوا لسه فى الخطوبه دا ياريتها باعت دهبها اللى انت جايبه بس دا باعته كله
احمد / ما انا كتبتلها بيه نص شقتى و دى قيمتها اقسم بالله اكبر من الفلوس اللى دفعتها بكتير و وريت لحضرتك العقد متسجل فعلا يعني ما سرقتهاش و لا حاجه
عبير / انا ما سرقتكش بس اللى حصل ده مرفوض بكل المقاييس و انا كلمتك النهرده عشان تتصرف و تحله قبل ما عمك ياخد بيه خبر
احمد / احله ازاى طيب ايه اللى يرضي حضرتك و انا اعمله
عبير / ما اعرفش ... انا حرفيا مش طايقه نفسي دلوقت ... انا اول مره تقى تعمل حاجه من ورايا ... و عملتها عشانك و بسببك
احمد يبص فى الارض
عبير / انا عاوزه اعرف راسي من رجلى انتوا هتتجوزوا امتى و با ظروفك دى هتتحل امتى ما انا لازم ارتب نفسي انا كمان
احمد / وقت ما تحبى ربنا هيفرجها شوفى حضرتك المعاك اللى يناسبك و انا هرتب نفسي عليه
عبير / ازاى بعد ما قلبت شقتك مكتب
احمد / هفكر انا و تقى فى الموضوع و نشوف انسب وضع و نبلغكوا بيه
عبير / انت ما لكش كلام مع تقى انت كلامك معايا انا انت هتقلب البت عليا و لا ايه
................................
احمد / ابدا و الله انا بس ما اقدرش اخد قرار من غيرها دى حياتنا و اتفقنا اننا نتشارك فى كل قراراتها
عبير / ما لكش دعوه بتقى تقى صغيره و ما تعرفش مصلحتها كويس و سهل يضحك عليها بكلمتين حب و شويه رومانسيه
احمد / انا ما بضحكش عليها على فكره بالعكس انا كل خطوه باخدها بتبقي بعلم تقى حضرتك
عبير / و هى حماره ما بتفهمش حاجه و اديك عمال تغرق اهو
احمد / ليه بس يا طنط لو على الفلوس انا جبت لحضرتك عقد الشقه و تقدرى تسالى عن سعرها فى المنطقه و تعرفى انى ما نصبتش عليها و لا حاجه و باذن الله اول لما ربنا يفرجها انا هجيب ليها شبكه جديده كامله بدل اللى اتباعت لانى اقسم بالله ما اعرف هى باعت ايه اصلا و لا قالتلى قبل ما تعمل كدا
محمد و تقى يدخلوا احمد يقف يسلم على محمد
محمد / الله اتارى البيت منور ازيك يا هندسه
احمد / ازى حضرتك
تقى / مالك
احمد / مفيش تعالى اقعدى
عبير/ جبتى الحاجات اللى نقصاكى يا ست العرايس
تقى / لا بس اخدنا فكره عن الاسعار و سجلتهااك كلها
عبير / ما لوش لزمه ... كدا كدا الدنيا كل يوم بحال و ما حدش عارف الاسعار وقت ما ربنا يفرجها و نشترى هتبقي بكام ساعتها
محمد / ما عشان كدا بقول ننجز نفسنا دلوقت و نلحقلنا اى حاجه فى الرخص
عبير / و هنحطها فين ان شاء الله انت عارف انى ما بطيقش الكراكيب فى البيت
تقى / فى ايه يا ماما
عبير / مفيش ... انا هقوم اغرف الغدى زمانكوا جعانين
تقى / هاجى اساعدك
عبير / تعالى
تقى و عبير يقوموا و احمد قاعد ساكت محمد يقرب منه
محمد / خير يا احمد يا ابنى شكلكوا مش مظبوط خير
احمد / انا ما كنتش اعرف ان تقى خبت عنكوا حوار الدهب كل ده
محمد / مش فاهم حوار ايه
احمد / كنت بمر بازمه اول ما بدات الشركه و تقى باعت دهبها و ادتنى الفلوس انا ما طلبتش منها تعمل كدا و فى المقابل كتبتلها بيع و شرا نص الشقه بتاعتى اللى عملتها مكتب
محمد / و الله كتر خيرك فين المشكله بقي
احمد يبتسم بحزن
محمد / انت عارف الستات بيحبوا الدهب قد ايه تنام فى الشارع بس تتصيغ وسط الناس ... انا ان كنت هضايق هضايق ان ده حصل من ورايا و انا واثق انك ابن اصول يعني لو كنت عرفت انك مزنوق كنت اتصرفتلك اكيد
احمد / انا عارف يا عمى يديم عزك يا رب
محمد / الغدى يا جماعه
.....................
فى شقه خالد
ايمان / يعني ايه كتبتلها نص الشقه بانهى حق تعمل كدا و ازاى تعمله من ورانا
احمد / حقها
ايمان / كسر حقها هى هتضحك عليك و لا ايه ما كلنا عارفين تمن الشبكه كويس قول حطت عليهم طلع من كوعها كام يعني تمن نص الشقه و انهى شقه شقتك يا فرحتى بخلفتى افرض يا اهبل ما حصلش نصيب تسلمها رقابتك كدا
احمد / و ما يحصلش نصيب ليه بس مش دى القمر اللى نزلت فى حجرك
ايمان / لاى سبب ... النصيب ... فهمت الحلم غلط ... اى حاجه
احمد / ماما ابوس ايدك الموضوع مش مستاهل
ايمان / لا مستاهل انا لما اديتك دهبى ما طلبتش منك جنيه ضمان
احمد / و كتبتلك نصيبك فى الارض و مدخلك شريكه انا ما اخدتش من حد جنيه حطيته فى جيبي و مساعدتكوا ليا انا مقدرها و بردها فى وقتها
ايمان / اه دخلتنى بنصيبي على قد اللى دفعته انما هى بقي شفطتك يا فالح
احمد / يعني حضرتك عاوزه ايه دلوقت
ايمان / ترجع الشقه اللى اخدتها و تاخد فلوسها
احمد/ ازاى يعني
ايمان / حق ربنا تاخد حاجه مش من حقها ليه
احمد / انا حر
ايمان / لا مش حر الشقه دى طلعت روحى انا و ابوك عشان نجيبهالك و مش من حقك تفرط فيها
احمد / و هى الشقه دى هتروح لمين يعني ما هى ليها و لعيالها من بعدى
ايمان / بعد الشر عنك لما تبقي مراتك تجيبلك عيال ابقي اكتبها باسم العيال انما هى تكتب باسمها ليه عملتلك ايه ادتك ايه شوفت منها ايه ما يمكن تطلع خازوق تربط نفسك بيها بالشكل ده ليه
احمد/ ماما الكلام ده يزعل
ايمان / ما انا زعلانه طبعا زعلانه و مقهوره طبعا
احمد / طب ايه اللى يرضي حضرتك
ايمان / الشقه ترجع
احمد / مش هيحصل و مش هطلب منها حاجه زى دى ابدا و لو حضرتك شايفه انى ظلمتك فانا بمنتهى البساطه اقدر امضيلك على فرق الفلوس و اساويكي بيها عادى جدا بس انا عمرى لو هموت ما هاخد من تقى حاجه انا اديتهالها بكامل عقلى و بطيب خاطر و لعلم حضرتك اللى حضرتك عملتيه معايا انك بتساعدى ابنك دا على راسي بس انا كدا كدا ابنك هفضل ابنك النهرده و هفضل ابنك حتى بعد ما اموت انما تقى بنفس مبدا حضرتك باعت دهبها و ادتنى تحويشتها و عملت جمعيه لسه بتسد فيها عشان تسند واحد ممكن بنتهى البساطه و لاى سبب يعني مش هتطلع بنت اصول معايا و اطلع انا فى الاخر ابن كلب انا اسف
ايمان / تمام يا احمد خليها تنفعك
احمد / ماما
ايمان تسيب المكان و تمشي
احمد / ماما ... ماما ... يوووه بقي
.......................
على القهوه
محمد و خالد باين انهم مضايقين
محمد / دى اخرتها يا خالد يعني انا ما اتكلمتش لما عرفت انها باعت دهبها و اداينت و ساعدته من ورانا و انت بتكلمنى فى فرق سعر الدهب عن سعر الشقه
خالد / انا ما بكلمكش فى حاجه بس الاصول اصول
محمد / و هى ايه الاصول انا لا طلبت منه يكتبلها حاجه و لا فكرنا فى المقابل لما البنت اتصرفت يعني لو فى حد المفروض يفكر فى الاصول هو انتوا و لو عاوز الشقه يا سيدي بسيطه شيل دا من ده يرتاح ده عن عده بكره الصبح نروح الشهر العقارى ارجعلكوا الشقه و ترجعوا لبنتى فلوسها و الحمد لله ان كل ده حصل و احنا على البر واضح ان عبير كان ليها وجهه نظر و انا اللى ما اتخيلتش ابدا انها تكون حقيقه
خالد / احنا ما طلبناش منها تبيع و لا تداين و لا طلبنا منها حاجه خالص فما تجيش تطلب المقابل اضعاف بقي و تحرج احمد و تستغل حبه ليها و رجولته
محمد / و احنا ما طلبناش من ابنك حاجه و لا فكرنا نستغله و يا سيدي انا نهيتهالك شيل ده من ده يرتاح ده عن ده خد يا عم شقتك اللى ابنك اصلا فارشها مكتب و قاعد فيها و هاتلنا فلوسنا و اخصم يا سيدى تمن شبكه ابنك احنا مش عاوزينها و كتر خيركوا لحد كدا
خالد / هو ان ما اخدتوش الشقه
محمد/ احنا ما اخدناش حاجه و مش عاوزين حاجه اقولك حاجه و لا حتى فلوس البت و دهبها عاوزينه اشبعوا بيه اياكش تنبسطوا
محمد يقوم يمشي
......................
فى شقه تقى
احمد / لا طبعا انا ماليش دعوه بخلافاتكوا دى و انا مش هسيب تقى لو يجرا ايه حتى
محمد / الموضوع خلص يا احمد مفيش نصيب و تقى جوه بتلملك حاجتك
احمد / حاجه ايه يا عمى انا الحاجه الوحيده اللى ليا عندكوا جوه هى تقى اصلا
محمد / يا ابنى انا فاهم انك شاب طيب و ابن حلال بس النسب زى الميه اقل حاجه تعكره و الجواز مش اتنين بيتجوزوا دا عيلتين و اللى حصل ده بوظ كل حاجه بينا
احمد / مفيش حاجه باظت و مفيش حاجه هتتغير انا مش مسؤؤل عن اى كلام انا ما قولتوش تقى ليها نص الشقه و باذن الله لما ربنا يفرجها هجيب لها شبكه جديده دا الكلام الوحيد اللى خرج من بقي و دا الكلام الوحيد اللى انا مسؤل عنه
محمد / مفيش نصيب يا ابنى عن اذنك
محمد يقوم يدخل جوه و يروح اوضه تقى بتعيط
محمد/ لمتيله حاجته
تقى / ما لمتش حاجه و مش هلم حاجه
محمد/ مش هتفرق اشبعى بيها يبقي يخصم تمنها من فلوسك اللى كلوها
تقى / يا بابا حرام عليك احمد ما لوش ذنب فى كل ده
محمد / يا ريت تكونى استفدتى من الدرس ده و اتعلمتى اى حاجه
تقى / درس ايه بس ... بابا هو مش ده احمد اللى انتوا دخلتوه البيت مرتين و قولتوا انه شاب ما حصلش مش دا احمد اللى حضرتك وافقت انى احط مكياج بره البيت لاول مره عشان اقابله و وافقت تبعتنى الرحله اللى بزن عليها بقالى سنين لمجرد انه طالعها ايه اللى اتغير بس
محمد/ مفيش نصيب يا تقى
تقى / مش بمزاجكوا على فكره احنا مش يويو فى ايديكوا حرام كدا
محمد يضرب تقى بالالم
محمد / صوتك ما يعلاش .. انا قولت كلمه و مش هتنيها الولد ده انتهى من حياتك
تقى / ربنا مش هيسامحكوا على فكره و لا انا عمرى هسامحكوا
تقى ترمى نفسها على السرير و تعيط
محمد يطلع بره يلاقي احمد لسه قاعد
محمد / خير مستعجل اوى على حاجتك
احمد / يا عمى ابوس ايدك تهدى بس دا خلاف بسيط و هيعدى
محمد / لاخر مره بقولك انسي بنتى و ما لكش اى دعوه بيها نهائى و بكره الصبح هاخد تقى و نروح نرجعلك زفتتك اللى محروقين عليها دى و اتقضل عشان بنام بدرى
احمد يبص لمحمد و يتنهد و يمشي
.......................
فى المكتب عند احمد
ايمان / بركه دى حتى كان وشها فقر من يوم ما دخلت حياتك و كل حاجه بايظه ما تعرفش ازاى سبت شغلك اللى كنت طاير بيه و خسرت صاحبك اللى ما كانش عندك اغلى منه من يوم ما وعيت على الدنيا و اداينت و اضغطت و يا ريته عاجب انما نقول ايه ناس طماعين ما عندهمش ده .. و لا يهمك بكره اجيب لك ست ستها
احمد / وفرى مجهودك انا مش عاوز منكوا حاجه
ايمان / ايه بقينا احنا الوحشين دلوقت يعني
احمد / اه يا امى انتوا اللى وحشين انتوا اللى ما اعرفش ايه اللى جرالكوا فجاه بدون اى اسباب و بدون اى وجه حق
ايمان / مش معنى اننا ربيناك انك راجل و كبير انك هتكبر علينا
احمد / لا كبير ايه ما انتوا صغرتونى خلاص انتوا صغرتونى لدرجه انكوا انتوا شخصيا ما عدتوش شايفيني
ايمان / صدقنى اللى حصل ده خير كبير اوى هتتاكد من كلامى بعدين
احمد / خير ليها مش ليا ... اذا كنتوا عملتوا كدا و هى فى بيت اهلها لما كانت هتيجي تعيش هنا وسطيكوا كنتوا هتعملوا فيها ايه
ايمان / ايه قله الادب دى ايه كنا هناكلها يعنى احنا كل اللى طلبناه حق ربنا ادتك جنيه تاخده جنيه مش تاخده عشره
احمد / انا حر فى حياتى و فى فلوسي اديتها جنيه اديتها عشره انا حر
ايمان / لا ما انتش حر
احمد/ شوفتى بقي انى لا كبير و لا راجل و لا اى حاجه من الكلام الجميل ده ... ماما انا روحت لتقى غصب عنى عشان ارضيكى و الموضوع باظ و رجعتلها عشان ارضيكي برضه جايه بعد ما اتعلقت بيها و حبيتها تبوظيلى الجوازه بالشكل الحقير ده للدرجادى هان عليكي وجع قلبي
ايمان / دلوقت بقيت انا الوحشه و الشريره يا احمد
احمد / لا يا امى انا اللى طلعت واطى و قليل الاصل انا السبب فى كل ده انما هى شابوه طلعت بنت اصول لاخر لحظه و كل كلامكوا عنها كان حقيقي
ايمان / انت شايف كدا ؟؟
احمد / انا مش قادر اشوف اى حاجه خالص انا داخل انام يمكن ما اصحاش و اخلص
احمد يسيب امه و يدخل
.....................
فى اوضه تقى
محمد / اصحى يا تقى مش عاوزين نتاخر على الشهر العقارى خلينا نخلص من ام السيره دى
تقى قاعده مكانها ما بتتحركش و واخده وضع الجنين محمد يروح يقعد جنبها
محمد / انا عارف ان احمد شاب كويس و انك حبيتيه بس لازم تبصي لقدام ... اهله ما طلعوش كويسين زى ما كنا فاكرين و هيسودوا عيشتك يا بنتى الجواز اندماج عيلتين مش مجرد اتنين يا قلب ابوكى
تقى مش بتتكلم محمد ياخدها فى حضنه تنهار من العياط
محمد/ رجعيله حاجته يا بنتى و اللى ليكي نصيب فيه هيحصل
تقى / حاضر ... هقوم اللبس
تقى تقوم تفتح الدولاب و كل شويه تمسح دموعها اللى فى وشها
.........................
فى شقه ايمان
احمد / اتفضل يا بابا دا عقد بيع الشقه كلها باسم حضرتك
خالد يبص لاحمد
احمد / و باذن الله هندفع ايجارها كل اول شهر لو سمحتولنا نفضل فيها
خالد / انت فاكر انك هتضغط عليا بهبلك ده
احمد/ ابدا انا بس برجعلكوا الشقه اللى طلعت عينكوا عشان تجيبوهالى
خالد/ و انت فاكر انك كدا يعني اديتنى حقى عليك
احمد / لا طبعا انا مهما عملت عمرى ما هوفيكوا حقكوا ... بس انتوا كمان مهما عملتوا مش هتعوضونى عن اللى خسرته بسببكوا ... عن اذنكوا
........................
على القهوه
محمود / يا ابنى خد علبه حاجه حلوه و روح اتكلم مع ابوها تانى و حاول تصلح الامور بينكوا
احمد / بانهى وش و انا ما رجعتلوش حتى الفلوس اللى اخدتها من تقى
محمود / يا ابنى الراجل عاقل و فاهم الدنيا كلمه و قوله ... قوله انك شارى بنته و بتحبها قوله انك مستعد تديله الضمانات اللى هو عاوزها و امضيله على حقه عندك شيكات و قوله انك ما لكش دعوه باهلك و ان ما ينفعش ياخدك بذنبهم
احمد/ قولت الكلام ده بدل المره عشره
محمود / قوله مليون ... انت بتكلمها ؟
احمد يهز راسه لا
محمود / و هى ما حاولتش تتصل بيك و لا مره
احمد يهز راسه لا
محمود / طب ما تحاول تكلمها زى ما كلمتها المره اللى فاتت قولها انك شاريها و بتحبها و انك ما بعتهاش قولها اللى جواك يا ابنى
احمد / و لو ابوها عرف انى لفيت من وراه اسيبها بقي تواجه غضبه بقي و انا قاعد هنا و لا على بالى يا ابنى انا لما كلمتها المره اللى فاتت كنت عارف ان اهلها موافقين لكن دلوقت ما ينفعش
محمود / اهى شهامتك دى اللى مودياك ورا الشمس من الاول كلمهم يا ابنى هتفضل باقي عمرك حزين اوى كدا
احمد / بالله عليك تسكت يا محمود انا مش ناقص
.......................
فى اوضه تقى
عبير تدخل تقعد جنبها
عبير / عاوزه اتكلم معاكى فى حاجه
تقى / خير
عبير / فاكره طنط علياء اللى كانت ساكنه فوقينا و سافرت لما جوزها اتوفى لابنها فى دبى
تقى / اكيد فكراهم طبعا
عبير / كلمتنى امبارح على الفايس و قالتلى انهم نازلين مصر الشهر الجاى
تقى / اهلا و سهلا ينوروا ايه عوزاكى تجيبي ينضفلهم و لا ايه
عبير / و انا مالى انا بحاجه زى دى و لا هو انا معايا مفتاح شقتهم اصلا
تقى / ما انا مش فاهمه ما يجوا نعمل ايه يعني نعملهم اكل طيب
عبير / ابنها عاوز يشوفك و يتعرف عليكي
تقى / قوليله ما عندناش بنات للجواز تعال كمان سنتين تكون اختى كبرت شويه
عبير / ممكن تبطلى استفزاز
تقى / هو انا تقيله عليكوا اوى كدا ... لقمتى ضلعاكوا يعني مش قادرين تستحملونى وسطكوا و بتفركوا تخلصوا منى يعني
عبير / لو كانت كدا كنا جوزناكى حبيب القلب و خليناكى مرماطونه عند امه
تقى / تمام كتر خيركوا سيبونى فى حالى بقي اشتغل و اتعب و انام و اكل و خلاص يومين هنعيشهم و خلاص
عبير / طب قابليه يمكن يعجبك ما انتى كنتى رافضه احمد و لما اتكلمتى معاه حبتيه
تقى / اديكى قولتيها بحب احمد ارحمونى بقي كفايا ضغط عليا انا تعبت اموت نفسي عشان اخلص يعني
عبير / انت بنت قليله الادب و انا غلطانه انى بعبر اهلك اصلا
تقى تعيط و تبص الناحيه التانيه عبير تقوم و ترزع الباب وراها
..............................
على القهوه
محمد قاعد مع احمد
احمد / دى الفلوس اللى اخدتها من تقى كامله و اسف جدا على التاخير
محمد مش بيبص لاحمد
احمد / لو حضرتك عاوز الدهب جرامات قولى كام جرام و انا اكملهم
محمد / احنا ما لناش عندك اى حاجه شبكتك و اخدت تمنها و الباقي اعتبره الفلوس اللى صرفتها هدايا و فسح و خروجات و الحاجات دى كلها
احمد / طب انا عملت ايه لكل ده طيب .. شوفتوا منى ايه وحش
محمد / مفيش نصيب يا ابنى
احمد / ماشي و انا همشي و اكيد مع الوقت كل واحد فينا هيتجوز حد تانى بس تقدر حضرتك تقولى تضمن منين انه يكون احسن منى تضمن منين يحبها قدى او حتى تحبه قدى تضمن منين انها مش هيجي عليها يوم و تلومك انك حرمتنا من بعض تضمنها يا عمى
محمد / ما انا كنت ضامن اهلك و ايه اللى جرا
احمد / سوء تفاهم و هيعدى انا اصلا مش عاوز من اهلى حاجه انا سبتلهم الجمل بما حمل انا مش عاوز غير تقى
محمد / النسب يا ابنى مش اتنين
احمد / عيلتين عارف عارف بس دا موقف و الشيطان دخل بينا و بعدين ما طنط عبير بهدلتنى انى بيعت تقى دهبها و انا سكت و ما اتكلمتش و حضرتك نفسك تفهمت الموقف و استوعبته ليه لما حصل من ابويا حضرتك مش قادر تعديه
محمد / و هو كان جه و لا اعتزر حتى
احمد / انا ما اقدرش اجبره على حاجه زى دى و جايلك بطولى المرادى و بقول لحضرتك انا شارى تقى فى الحلال
محمد / اسمع يا ابنى اقسملك بالله انك فعلا فى غلاوه بناتى و ان غلاوه ابوك عندى ما كانلهاش حدود بس على قد الغلاوه على قد الزعل و انا مجروح اكتر منكوا بكتير
احمد / انا ما ليش حكم على اهلى
محمد / و انا مش هجوزك بنتى من غير موافقه اهلك انا اسف
احمد يهز راسه و يبص الناحيه التانيه و يقوم و يمشي
.........................
فى شقه خالد
خالد / و ايه كمان يا باشمهندس عاوزنى اعمل ايه تانى مش عاوزنى اروح ابوس رجليهم بالمره
احمد / يا بابا حضرتك ربتنى ان الاعتزار مش بيقل من البنادم بالعكس بيكبره و دا صاحبك من سنين هتخسره عشان سوء تفاهم زى ده
خالد / انا لا غلطت فيه و لا فى بنته هم اللى بياعين و ما لهمش امان
احمد / يا بابا تقى كل اللى عملته انها وقفت جنبى و انا كل اللى عملته انى وريتها انى مش اقل منها و انى ابن اصول زيها بالظبط يبقي ده جزاتنا نتحرم من بعض
خالد / تغور من وش ابوها و عقله الصغير
احمد / يا بابا حضرتك احرجتنى و صغرتنى قدامهم
خالد / انا ابوك و ادرى بمصلحتك
احمد / طب ما تعتزرش بس تعال معايا نطلبها تانى و نصلح سوء التفاهم ده يا بابا انا مدمر حرفيا لا عارف اركز فى شغل و لا فى غيره يا بابا اقسملك بالله نفسيتي مدمره بسبب حاجه انا ما ليش اى ذنب فيها
خالد / احمد احنا نهينا الكلام فى الموضوع ده خلاص
احمد / لا ما انتهاش انا مش لعبه فى ايدكم مشاعرى و حياتى مش حاجه بسيطه تجربوا فيها انا ليا عليكوا حقوق
خالد / اتكلم مع ابوك باسلوب احسن من كدا يا ولد
احمد / انا اسف ... انا حقيقي اسف
احمد يجي يمشي خالد يناديه
خالد / انت رايح فين
احمد / ما اعتقدش انها هتفرق عن اذنك
احمد يمشي و يرزع الباب وراه ايمان تطلع من الاوضه
ايمان / لسه برده نفس الموال يا خالد
خالد / لا و عاوزنى انا اللى اروح اراضيهم بعد كل ده انا اللى اروح اراضيهم ... انتى عرفتى انه اول فلوس جاتله راح الفالح اداهالهم عشان يرجع للمحروسه فلوسها ... لا بما فيها الفلوس اللى دفعها فى شبكتها يعنى كل اللفه دى و الزعل و الخناق ده كله و برده اداها كل حاجه و برده مش عاجبهم و عاوزنى اعتزر
ايمان / طب و اخرتها
خالد / هو حر بقي اللى بيشيل قربه مخرومه يستحمل انا مش هتعب نفسي معاه اكتر من كدا
ايمان / كان مستخبيلنا فين بس كل ده يا ربى
خالد / بقولك ايه ما تضايقيش انتى نفسك و اهتمى بدواكى هو كدا كدا فتره و هتعدى و هينساها و هيحب غيرها و لا كان حاجه حصلت و ساعتها هيفوق لنفسه و يعرف اننا كان كل همنا مصلحته و بس و لحد ما الوقت ده يجي من فضلك تاخدى علاجك و تهتمى بنفسك
ايمان / مش هاين عليا زعله و الله ساعات كتير بقول اروح اراضيهم انا و خلاص احنا يعني يهمنا ايه غير سعادته و البت برده مش وحشه و دا موقف و عدى
خالد / انا اخر حد كنت اتوقع منه كدا هو محمد و انتى عارفه و حقيقي مش مصدق انه بياع بالشكل ده
ايمان / طب هنعمل ايه
خالد / زى ما قولتلك انتى ما تفكريش فى حاجه غير صحتك و بس و الباقي سبيه على ربنا هيفرجها ما تقلقيش
ايمان / و نعم بالله
.....................
فى الموقع
احمد قاعد مع محمود و العمال شغالين
محمود / و اخرتها طيب هتفضل قاعد حاطط ايدك على خدك كدا يعني
احمد ساكت
محمود/ يا ابنى روح لابوها و قوله انا ما ليش دعوه و كلمتى من دماغى و بتقدم اهو
احمد / قالى لازم اهلك الجواز بيتم بين عيلتين مش شخصين و بعدين انا ما اقدرش ازعل اهلى بالطريقه دى مش هستحمل تانيب الضمير لو جرا لحد فيهم حاجه
تقى تدخل
محمود / تقى هنا
احمد يبص يشوفها واقفه بعيد و مش فى حالتها يقوم يجرى عليها
احمد / تقى ازيك وحشتيني عامله ايه انتى كويسه
تقى تديله دبلته احمد يتفاجئ و هى تتكلم و بتعانى تمسك دموعها
تقى / انا ما بعتهاش و كنت محتفظه بيها بس احنا مش هنضحك على بعض
احمد / هنرجع انا مش ساكت و الله اقسم بالله كلمت باباكى و بابايا اكتر من مره
تقى / احنا مش قدهم يا احمد احنا من الاول بدانا كل ده عشان احنا مش قدهم انا مش قد الضغط اللى اهلى بيفرضوه عليا و لا انت قد تعب والدتك و زعلها رضخنا لرغباتهم و ارتبطنا غصب عننا عشان نرضيهم و ربنا اراد نحب بعض زى ما كانوا عاوزين و القدر برده اراد انهم يتخانقوا و يبعدونا عن بعض و يكملوا ضغط علينا
احمد / بس انا مش ساكت على فكره انا
تقى / مش مشكله العنوسه اللى فى البلد اتحلت الحمد لله ... اصل كميه العرسان اللى بتجيلى مش طبيعيه... و اهلى ... اهلى ما شاء الله ما عادوش بيصفوا من بره بره لااااا... لاااااا... دول بيضغطوا عليا و مستعجلين على جوازى اكتر من الاول
تقى تعيط
تقى / انا لا باكل و لا بشرب و لا بنام و لا فارقه مع حد اصلا ... و هم مكملين عادى ... المهم اتجوز بسرعه من اى حد عشان تقريبا مش واثقين فيا و خايفين اغلط و اجيلك زى ما جيتلك دلوقت
احمد / تقى اهدى هتتحل انا هروح لابوكى النهرده تانى و هكلمه تانى
تقى / انا بابا لاول مره يمد ايده عليا عشان رفضت ارجعلك حاجتك و ما بنتكلمش من يوميها
احمد / هكلمه و الله ما هسكت
تقى / انا جيتلك عشان تعرف انى مش بياعه و انى بقيت عليك لاخر ثانيه بس انا تعبت بقي مش قادره ... فاكر لما قولتلك انهم هيفضلوا يضغطوا عليا لحد ما اقبل باى حد لمجرد انى اخلص من العيشه فى البيت ده
احمد / لا مش هيحصل
تقى / كسر بكسر بقي اياكش اموت و اخلص
احمد / طب اهدى بس و هنتكلم
تقى / سلام يا احمد كانت فرصه سعيده اوى
احمد / تقى طب بس اسمعى ... طب بصي تعالى نروح اى مكان نتكلم و نفكر و باذن الله
تقى / خلاص يا احمد خلصت الحكايه على كدا ... مفيش نصيب
تقى تمشي احمد يجرى وراها
احمد/ مش بمزاجهم انا مش هسكت و مش هتروحى لغيرى تقى انا بكلمك اقفى تقى الموضوع ما خلصش و مش هيخلص كدا دا على جثتى مش هيخلص كدا
تقى تعدى الشارع و هى بتجرى من احمد و بتعيط احمد يعدى وراها من غير ما ياخد باله عربيه تخبطه يتنطر بعيد تقى تبص تصرخ محمود و العمال و الناس تتلم عليه
.....................
فى المستشفي
تقى و محمود واقفين قدام باب العمليات ايمان و خالد يدخلوا جرى
خالد / فى ايه يا محمود خير ايه اللى حصل
محمود / ان شاء الله خير
ايمان / و هيجي منين الخير و هو فى العمليات جوه ما ده اللى كان ناقصه ... ما كانش فاضله غير انك تقصفى عمره و عملتيها ... اياكش ترتاحى و تسيبيه فى حاله
محمود / ليه بس الكلام ده يا طنط تقى ما عملتش حاجه
ايمان / و هى النسمه دى بتعمل دا احنا اللى عاملين كل حاجه
خالد / اسكتى بقي يا ايمان لما نطمن على الواد
محمد يدخل جرى
محمد / تقى
تقى تروحله
محمد / روحتيله برضه كسرتى كلامى و روحتيله
تقى / احمد فى العمليات يا بابا .. خبطته عربيه
محمد / تمام هنطمن عليه و نقوم بالواجب و نمشي
تقى / هو بس يقوم و انا من ايدك دى لايدك دى
محمد يهز راسه و يروح يسلم على خالد
محمد / باذن الله خير ما تقلقش
خالد / تعبت نفسك و جيت
محمود / و الله يا عمى احمد طول الوقت بيقول فى حضرتك شعر و عمى خالد كمان ... و الله انا بقول نستغل اللى حصل و تتراضوا عشان خاطر احمد حتى
ايمان / و هو فين احمد هو فين
محمود / باذن الله هيبقي زى الفل و الله العظيم هو اصلا مش مركز فى اى حاجه بسبب الحوار ده و انا كلمت حضرتك و بلغتك
محمد / لو سمحت يا ابنى اجل اى كلام فى اى حاجه لحد ما ربنا يكرمه و يقوم بالسلامه
خالد / فارق معاك اوى
محمد/ ربنا يسامحك مش هرد عليك و انت هتعرف ايه عن العشره و انت بتحسبها بالجنيه
خالد / و انتوا يعني اللى
محمود / ابوس ايديكوا احنا فى مستشفي دا بدل ما تدعوله و بعدين انتوا عاوزين ايه اكتر من المنظر ده دى هتموت روحها عليه
الكل يبص تقى واقفه مكسوره فى جنب منهاره من العياط
محمود / اهدوا انتوا المفروض الكبار و المفروض ان انتوا اللى تلموا مش اللى تفرقوا ... لو لا قدر الله جراله حاجه النهرده هتنفعكوا الشقه ... هتنفعكوا العند و الكرامه ... لا احمد و لا تقى عملوا اى حاجه لكل اللى بيجرالهم ده بالعكس كل ده حصل اصلا عشان يحاولوا يرضوكوا ... و لسه بيحاولوا ... بس انا بصراحه محرج اسالكوا هترضوا امتى
التلاته يبصوا لبعض باب العمليه يتفتح و الدكتور يدخل الكل يجرى عليه و اولهم تقى اللى تعدى بالعافيه من وسطهم
الدكتور / الحمد لله الحاله مستقره و باذن الله هينقلوه اوضته اول ما يفوق
تقى / اقدر اشوفه
الدكتور / مش دلوقت خالص... عن اذنكوا
الدكتور يعدى و يمشي كل واحد يروح يقف فى جنب و تقى واقفه فى النص عينها على الباب
محمود / الحمد لله كنا فين قدر و لطف
خالد / الحمد لله الحمد لله
فجاه تقى تدوخ و تقع محمد يجرى عليها
محمد / تقى تقى
خالد / هنادى حد حالا
ايمان / تقى مالك يا بنتى تقى تقى
.......................
فى اوضه فى المستشفي
تقى ممدده باصه للسقف و معلقه محلول عبير تدخل
عبير / ايه اللى جرا يا محمد مالك يا تقى مالك يا ضنايا
محمد / من قله الاكل جالها هبوط بس الحمد لله الدكتور طمنى هتبقي زى الفل
عبير / طب الحمد لله ... احمد عمل ايه
محمد / بيقولوا طلعوه اوضه خلاص
عبير / هو انا المفروض اطلع اطمن عليه و لا اعمل من بنها
محمد يشاورلها براسه على تقى باصه للسقف و ساكته عبير تروح تمسك ايدها تقى تبصلها
عبير / سلامتك شوفتى اخره دلعك و عندك ايه
تقى تبص للسقف تانى عبير تبص لمحمد محمد يتنهد و يطلع بره
...................
فى اوضه احمد
ايمان / قدر و لطف ابقي خد بالك بعد كدا
احمد / تقى فين
خالد / قوم انت بس بالسلامه و انا هعملك اللى انت عاوزه
احمد / و هو ايه اللى انا عاوزه
خالد / اى كان اللى انت عاوزه هعمله لو عاوزنى اروح دلوقت اراضي عمك محمد و ابوس راسه و اترجاه يرجعلك تقى انا هعمل كدا
احمد / و كان لازم ادشدش كدا عشان توافق
محمود / يا عم ما تحمد ربنا انت فى ايه و لا فى ايه
احمد / تقى كانت معايا راحت فين يا احمد
محمد يخبط على الباب و يدخل
خالد / ابن حلال تعال يا محمد ادخل ... بص يا محمد احنا عشره عمر و عارفني كويس و دا شيطان و دخل بينا
محمد / و انا كل اللى يهمنى سعادتهم ... ايه يا هندسه هتفضل راقد كدا كتير مش ناوى تتجوز و لا ايه
احمد / تقى فين
محمد / موجوده .. و بخير ... هى بس ما استحملتش تشوفك كدا وقعت و مركبينلها محاليل ... ينيله سي الحب
احمد يبتسم
محمد يبص لخالد
خالد / حقك عليا يا صاحبى
محمد / حصل خير يا خويا
محمود / طب و الله القاعده الحلوه دى لازمها ساقع ... عشان تعرف قيمه صاحبك ... ها تشربوا ايه هجيب ساقع للكل و لا تحبوا حاجه تانيه
ايمان / هات شربات و لا ايه يا استاذ محمد
محمد / ربنا يتملهم على خير
........................
فى شقه تقى
الميكب ارتيست بتزوق تقى و حواليها بنات كتير عبير تدخل
عبير / ايه يا جماعه الزحمه دى يلا الجاهزين يطلعوا بره و يسيبوا الاستاذه تركز يلا يلا
بنت / عاوزه اتفرج
عبير / بعدين بعدين اطلعى بره يلا مش عاوزين عطله هنتاخر
الكوافيره / انا تقريبا خلصت فاضل الرتوش الاخيره
عبير/ تسلم ايدك ... طالعه قمر اللهم بارك
تقى تبتسم عبير تقعد و تفضل تتابع تقى و هى مبتسمه لحد ما الكوافيره تخلص و تبدا تلم حاجتها عبير تقوم تحاسبها و تقى بتتكتب رساله على التليفون الكوافيره تطلع بره و تقفل الباب
تقى / احمد و الجماعه فى الطريق خمس دقايق و يبقي هنا باذن الله
عبير / و كلنا جاهزين بس انا عاوزه اتكلم معاكى فى حاجه مهمه اوى
تقى / خير
عبير / خير طبعا ... باذن الله كل اللى جاى خير ... انا عاوزه اتكلم فى كل اللى حصل الفتره اللى فاتت و اللى هيحصل فى الفتره الجايه
تقى / دلوقت !!
عبير تضحك / هختصر ما تقلقيش مش هدوشك النهرده ... انا كل اللى هقوله ان اى حاجه عملناها زمان كنا بنعملها من حبنا و خوفنا عليكي
تقى / عارفه
عبير / انتى داخله دنيا جديده و احمد انا عارفه انه شاب كويس و شاريكي و عارفه ان اهله ناس كويسين ودا كان شيطان دخل بينا بشكل او غيره بس اللى حصل ده وارد جدا يتكرر لاى سبب
تقى / ايه لزمته الكلام ده
عبير / لزمته انى عاوزاكى تعرفى انك مهما حصل ما تجيش على نفسك عشان ترضي اى حد ... و اننا ديما فى ضهرك مهما حصل و قصاد مين ما يكون ... اتقى ربنا فى جوزك و اتعاملى بما يرضي الله و ما تتنازليش لحد و لا تستنى حاجه من حد
تقى / حاضر
عبير / ربنا يهنيكي و يسعدك و يهدى سرك ... مش قادره اصدق انى جريت الوقت دا كله عشان اجوزك و جايه دلوقت هاين عليا افشكل الجوازه و اقولهم ما عندناش بنات للجواز ما حدش هياخد قلبي من حضنى
تقى تضحك
عبير / احنا مش عاوزين من الدنيا غير اننا نشوف انتى و اخواتك فى احسن حال
تقى / ربنا ما يحرمنى منكوا ابدا
عبير تحضن تقى تليفون تقى يرن تقى تقوم تقف
تقى / احمد جه
عبير تعدلها هدومها و هى بتعيط
تقى / بتعيطي ليه دلوقت
عبير / من الفرحه مش قادره
تقى / خلاص بقي و الله هعيط انا كمان و هبوظ المكياج و الدنيا كلها
عبير / قال المكياج يبوظ قال دا انا اجيب الكوافيره دى من شعرها دى واخده على قلبها شئ و شويات عشان المكياج يكون ثابت ... ضد الميه ضد النار ضد الحشره ضد الفار
تقى تضحك عبير تحضنها الباب يتفتح و محمد يدخل
محمد / احمد بره ادخله و لا اوزعه
تقى تضحك و تحضن محمد محمد يبوس راسها
.....................
فى قاعه الافراح
احمد بيرقص الفيرست دانس مع تقى
احمد / طالعه قمر اوى ... احلى بكتير من ما حلمت
تقى / فلوس الميكب ارتيسيت طلعت حلال يعني
احمد / كل حاجه فى وقتها حلو الا انتى حلوه فى كل الاوقات
تقى / ايوه بقي ... كان فين الكلام ده من زمان
احمد / زمن الكلام فات احنا داخلين على الافعال
احمد يمسك ايد تقى و يلفها و يرجع يسحبها عليه و البنات و الشباب بيصفروا
تقى / لقد هرمنا يا رجل
احمد / ما تيجي نقفل الليله دى على كدا و نروح نكمل باقي الافعال فى البيت
احمد يلفها تانى و يشدها
تقى / بس بقي هدوخ كدا
احمد / و هو المطلوب اثباته
احمد يغمزلها و هى تضحك
يتبع...
لقراءة الفصل الرابع اضغط على : ( رواية يويو الفصل الرابع )
لقراءة باقي الفصول اضغط على : ( رواية يويو )