رواية اسرار قدس الحلقة الأولى 1 بقلم زينب ماجد
رواية اسرار قدس الجزء الأول 1 بقلم زينب ماجد
رواية اسرار قدس البارت الأول 1 بقلم زينب ماجد
 |
| رواية اسرار قدس الفصل الأول 1 بقلم زينب ماجد |
رواية اسرار قدس الفصل الأول 1 بقلم زينب ماجد
(لقاء تحت ضوء البرق)
هنو ابليس كَلوله التريده ايصير
لا يتعب علينه الخوه مطشرة
تعبتلهم مثل ماتتعب أم التوم
تكَضي الليل حسرة اتدفع بحسرة
الفلح ماعدها غيره وتحجي وي الفاس
مو صافي حليبه اليطعن الشجرة
الذموني بكَفاي استورحوا عطاب
اليذم النار يخلص بالبرد عمره
المجافي الحطب ينجوي من الدخان
هيه من الله تكتل حوبة الفقرة
( للشاعر علي المنصوري)
المكان : بيت ابو وهب
الزمان: ١٢ ليلاً
صوت باب حديد ينفتح السرگي ماله بقوة
وحس جلاب تنبح جوعانة، مربوطة بحزام وهو لازم الحزام
فتح الباب ودخل الجلاب بالغرفة الظلمة ( زنزانة) صوت مرة مسجونة بهذه الغرفة الظلمة كامت تصرخ من كل كلبها وهي تتوسل بيه حتى يطلع الجلاب من عدها .
الكل كاعد
والكل يسمع صوت هاي المرة وهي تصرخ
بس الكل يخاف يدخل ، او يتكفى الشر عنه وما يدخل نفسه
بس صوت المرة وخوفها الطالع من نص كلبها يقشعر البدن وشي ما ينحمل سمعه
بتها كامت تحط اديها على اذانها وتبجي بقوة
وابنها يشيل المخدة ويخليها على راسه ويدنك بين رجليه بس حتى ما يسمع صوت امه وهي تتعذب بهالليل .. وهذا حال كل جهالها البقية
خطاب : حاجة انفضيلج راي كومي للمرة ، حسها يركد الدم ما ينحمل يمة.
الحاجة: لا تدخل بين البصلة وكشرتها يالسبع، عيف خالك ينجاز بحريمه ( نسوانه)
خطاب: خالي كل ما جاله يزيد بقسوته وظلمه الوضع ما عاد ينحمل يا حاجة، انا ما اكدر اكعد اسمع حسها وهي تصارخ .
احمد كام وطلع ما حب يسمع هالحس والبجى وما يكدر يدخل، اما خطاب انتفض من مكانه اول ما طلع لزمت بأيده سراب ( بنت ابو وهب) وهي تترجاه: فدوة خطاب ابوس ايدك بس الحك امي والله امي ما بايكة الفلوس والله امي ما تبوك فدوة امنع ابوي منها راح يجتلها الحكها فدوة.
تنهد ولزم بمحجر الدرج وصعد
طلعت امه : خطاب يمه خلك اعلى حافة الجرف لا تحط جدمك بماي وعرة تاخذك روجتها، احِدر ابني (انزل)
ما سمع منها وكمل الدرج وفات على الغرفة بهمة : خالي احلفك ابخت الله ان ما جنت راحمها، ارحم بزرها .
ابو وهب : تالله ان ما اعترفت ابوگت المال الفكدته، لكص ادينها وازتهن للجلاب يسد جوع بطونهم باديها .
- بحك الله كصت الادين ينرادلها شهود يابو وهب، وين شهودك اعلى بوكتها ؟
- ويا شاهد اجيبه وانا مالي حاطه عدها ومأمنه ؟!
دخلت الحاجة : وان جان البايك مو هي شتكل لله بكصت اديها ؟
- ادافعين عنها يا حاجة ؟
- ادافع اعلى حك الله
تقدم خطاب للمره صاح ابو وهب : حدك يالسبع لا تصلها مالي عدها وحك الله اخذه من عيونها .
دنگ عليها راد يشيلها سبقته الحاجة ودنكت الها وخلتها وراها ووكفتها وكالتله : حد جلابك يمه وسمي بأسم الله .
ابو وهب زاد بشيمته من كاموا يدفعونه منها
يجيب بالجلاب ويريد يكربهن منها والمرة تصرخ بعلو حسها.. تصداله خطاب ولزم ايده وكام يهديه ويبوس براسه خاطر يطلع ويكف من المرة .. جراه ليبرا وكعد يحاجيه : خالي انت النتعلم منك الزين والمسامح على خلك مال مفكود تكص ادين الحرمة تعوذ من ابليس واذكر الله
- حك الله بايك المالت تتكطع اديه
-لو جان اعلى بوكته شهود ، المرة تحلف ما بايكة وماكو احد شهد على بوكتها .. اذكر الله وكوم وياي
صاح على احمد اخوه : احمددددد احممممد
رد الاخر : هااااا
- اصعد جر الجلاب وطعمهن برا .. اصعد
صعد احمد جر الجلاب والحاجة وخطاب يهدون بابو وهب
عد ما هدا صعدوا البنية واخوها لامهم يتلكوها ويساعدوها تنزل .. تخط رجليها ع الدرج وبالكوة تنزل من التعذيب .. وضرايرها الاثنين عفاف واميره يدحكن من باب غرفتهن محد منهن بادرت وصعدت ساعدتها
طبت اميرة لغرفتها متضايقة لما الحاجّة ادخلت وانهت عذاب عواطف وما خلتها تتحاكم بالتهمة الطالتها .
شالت الزولية وطلعت الفلوس : لازم الكالي مكان امن اضمهن بيها لا اروح اني الاكع بيها ، بس هين يا عواطف ان طلعتي من هاي من غيرها ما تطلعين اني اميرة تفتنين علي كدام ابو وهب وتخبري بكصة الرمان .. هين
اعلى كعدتها فات ابو وهب للغرفة .. ضمت الفلوس بسرعة وسوت نفسها تعدل بالفراش، اندارتله : ها ابشر يماي عيني .
-ابعدي وخلينا اخذ هوى
- وعواطف تيهتا ابلا حساب ؟
- الحاجة ادخلّت وابعدتها وانا عافي عنها لجل ولدها
- عجل لو تعداك غيرها سهلة تدخل الحاجة ويضيع حكك
-اميررررررررة
-يبعد عيون اميرة وكل طيوف اهلها يا تاج راسي اني حجايتي لجلك حتى لا واحد غيرها يفكر يتعداك لو سامحت بهاي يتساهلون بدوستك بغيرها
-دوستي شنهو ما جابته امه ولا طلع من ظهر زلمه اليتعداني انا ابو وهب اميرررة دحكي بيه عدل واسمعيني مو انا الينداسلي طرف
- بيك وبزودك اميرة تفتخر وتكحل عيونها اني كل الردته ما يعتبرونك مسامح ويتجرون بكل مرة على حلالك وما يهتمون ويكولون ابو وهب كلبه طيب يسامح .. اليبره من العقاب لا تأمنه يتاج راسي .
بقت كعده بصفه وتحش براسه هالحجي .
طلع خطاب لاحمد اخوه الجبير كاعد يوكل بالجلاب: ها ابو شهاب
- خلصت ؟
- لا تهتم فضت الحاجة ادخلت وابو وهب عفى
-وليا وكت نضل بهالحال ؟
- وشنهو البدينه نعمله
- خطاب البيت بيت ابونا وعيشتنا بيه عيشة الخطار لا بالله مو خطار مساجين .. خالي يعامل اهل البيت مثل معاملة المساجين عنده البالسجن
-هذا اللي وعينا عليه من يوم ما مات ابونا وخالي هو راعي البيت
-راعي تره هو المستفاد بينا مو احنا المستفادين مستغل امنا الحاجة ويبوس براسها ومستحل بيت ابونا طول بعرض ومكعد نسوانه كل وحدة بغرفه وانا وياك واخوتنا مذبوبين بالدوانية ولا جن البيت النا
-هاي شبيك احمد من يمتى هالحجي شنو بيتنا شنو بيت خالي
- ايهيييي دروح انت ما تنطي بخالي لو هسه تنزل سورة مثل سورة ابو لهب
- يضل خالنا الربانا شيطلع بيدنا واذا على كعدتنا انا حجيت ويا امي وكتلها نفرغ الفوك ونبني غرف النا
-ااااااالله االله البيت بيت ابونا ونبنيلنا غرف فوك مثل المستكعدينهم
- المطلوب شنو احمد خالي من احنا وصغار هو راعينا والربانا ابوي عافنا صغار
- لا ربانا ولا راعانا .. استغلنا واستغل بستان ابونا .. وامنا بحجة هي مرة وما تكدر تكعد بالبيت وادير البستان وحدها سلمته حلالنا وحطت اركابنا بيده .
- اذكر الله وصل على سيدنا محمد
- الصلاة والسلام عليه بس خطاب اسمعها مني واخذها حجاية من اخوك الجبير خالي لو ما حطيناله حد يجي يوم نكصص اصابيعنا ندم ع اليعمله بحالنا .
-مو لهالدرجة يضل خالنا واله الحشيمة
- انا كلت واتذكرها لتكفر باليوم الصار بيه خالك .
حط بيدي الاكل مال الجلاب وكام ابعد من المكان .. كمت ادحك وراه واطعم بالجلاب وكلمته ترن بذني.
المكان : بيت وسام
الزمان : ليلة ٢٠٠٣/٤/٧
صوت رعيدة قوية تهز الكاع ومطر يزخ اعلى بغداد وكأنما يطفي نار القصف اللي اشتعل فوك ارضها .. لمضت السما ولحكها صوت كراكيع هز البيت هز .
قدس : فزيت على الصوت القوي اسم الله ربي شنهو الصوت ؟ ، شلت راسي من الوسادة وادحج .. الدنيا تمطرر بقوة
كمت اطمش بالقرفة .. عمار ويوسف اخوتي نايمين .. وصوت الهايشة تعجر بهالمطر .. جريت ربطتي وكمت من فراشي .
السما جن انشكت على قوة المطر اليزخ زخ
شكد احب المطر .. وارتاح بصوته بس المشكلة الماي فات للدوانية وكعدوا الخطار
رحت كعدت يوسف خاطر يكعد يشوف حال الخطار ، ما كعد رحت على امي ندهتها : يمه يمه الدوانية قركت (غركت) وخطارنا بالضيم يا حالهم
- كعدي يوسف
- كعتوا وما يرضى يكعد
- هسه حيلي عني اناملي شوية
محد بيهم رضى يكعد .. رحت على قرفة ( غرفة) اخوي مروان ، دكيت الباب طلعتلي ( نهلة ) مرت اخوي : ها قدس شعدج بهالليل
- الدنيا زخت والخطار قركوا ( غركوا) وامي واخوتي محد بيهم يكعد
- البس ربطتي واجي
لبست ربطتها وراحت لكت الماي طايف لنص الدوانية ابو وهب نايم لجن الوياه خطاره الماي واصل عده وكعد .. رادت تمسح نهلة الماي بس ما رضى اسمعو من ورا الحايط يكللها
خطاب : استغفر الله اختي بس جيبي ماسحة ارد الماي عن خالي وروحي كملي نومج ، المعذرة.
جاملتو وراحت جابتلو الماسحة وهو رفع البساط وكام يرشك الماي ليبرا .. حس الهايشة ما هدا وانا ضلت بنفسي اطلع بهالمطيرة بس اخاف اتنكع وامي تجتلني
رحت خذيتلي نايلونة وحطيتها على راسي وطفت البستان بهالمطر ورحت للمراح ( بيت الحيوان) دحجت .. الهايشة تطلك بهالجو .. وطلوكتها متعسرة
والمي داخل للمراح وحالتها حالة هالهويشة انكسر كلبي عليها .. رديت للبيت الماسحة بعدها بيد الزلمة كرايب ابو وهب .. خذيت الجولة وسطل ووصلة مسح ورحت للمراح امسح الماي واشقل النار كرب الهايشة بلكي الله وتتسهل ولادتها .
بس الماي مو مالت وصلة .. لازم اجيب الماسحة وارشگو ليبرا . رجعت للبيت ردت افوت على الخطار واذكرت انا بلا عباة : تعزيت تعزيت تعزيت لو شافني واحد من خوتي مفرعة بلا عباة الا يحط اركبتي ويحزها.
فتت على القرفة حيل وبابها حديد انطك بالحايط حيل فز يوسف وهو يصيح : وثووول تمنجدنااااا
- رد نام انت ياهو النادهك اني جاية اخذ العباة الهايشة معوشرة ومتعسرة عدها يضيم كلبي عليها
احجي واني ابحوش البوفيه وادور ع العباة واندار للالة اعلي بيها خاطر اشوف
لكيتها وجريتها .. شلت اللالة بالزاوية حطيت العباة على راسي ورحت اطر .
تكربت من باب الدوانية
زلمة جاي يرشك الماي ، بس مخلص وضل واكف كل ما طب شوية رشكو .. حجيت : فد اكلك شقلة صقيرونة ؟
شال راسه يدور منين الصوت
الكهرباء طافية والضوا مالت البطل ضعيف بالزاوية حجه : هلا خوية ، ياهو ؟
- من رخصتك بس اريد الماسحة شويونة الهايشة معوشرة ومعسرة عدها والماي لاحك يمها اريد ارشكو منها وادفي المراح .
خطاب : كدامج خوية
مدت تاخذها
بنية سمينة وجف ايدها صغير حيل وابيض
على لمحة جف ايدها دحكت بوجهه ما ركزت بيه زين .. اخذت الماسحة مني وراحت بعبايتها اطر البستان .. ظلت عيني ادحك وراها .
رعدت الدنيا وطلع ضوا قوي وهي تركض من المطر جوا بالبستان .. منظرها وهي تشرد جان حيل ممتع وشي يعلك بخانة الذاكرة .
قدس : فتت ع المراح رشكت الماي برا ، وحطيت الماسحة على كتر ، الهايشة ويا صوت الرعد ترعد تمنجدنا .
حرت بين الماي وبين اكضب الهايشة واساعدها تولد .
تصركع راسي ما عدت اعرف كاعي من سماي .. هديت من ايدي وطلعت اشوفلي حل ولو ما ابالي حل بس من حيرتي .
دحكت الزلمة كرايب ابو وهب اول مرة يجيلنا عيب اطلبه ، بس هو بلا طلب حط ايدو فوك راسه واجا يسأل : معتازة شي خوية تربين من بعيد ؟ (تباوعين من بعيد)
- بلا امر عنك تكدر تكضب وياي الهايشة معسرة
- امرج اعلى راسي وينها ؟
- اكرب
فتت ع المراح كضبها هو واني لبست علاكة بيدي وكمت احشرها واسهل ولادتها ، دار عني ما يدحك ، يظهر انه زلمة صدكي عيونه ما تزاقل ( تزاغل).
حشرت ايدي بهالحيوانة يربي ما تسهل
رعت الدنيا وحت الباب من قوة الصوت والهوى انضرب بالحايط حيل ، فزيت من كل كلبي : حيلك يربي ، اسم الله راح كلبي .
- خوية تعرفين تولدينها امشي اندهي على وحدة من الاهل تساعدج
- ما تعاز هي تولد انا بس اساعدها واضل يمها .. جن هالمطر خير اليوم ما قصفت طيارات بوش من نعلت الله على ابو خيره .. منجدنا هالابرش
ابتسم وابعد كضب بالماسحة وكام يرشك الماي
والهايشة ما تبطل صياح : اخوتي عسرين لو كعد واحد منهم ولكاك يطيرون راسي ويا طيارات بوش
ضحك : المعذرة اذا وكفتي بيها حرج انا بس ردت اعاونك
- انت شتكرب ابو وهب
- ابن اخته
- اني اضن ابو وهب رجل امي بالسر
- استغفر الله ماكو هيج كلام
- ما كفرت يا خوية حتى اعلى الضنون حساب
-بعض الضنون اثام
- وانت صادك بس اني امي ما فاهمتها واخاف افهمها .. واخوتي عسرين وهالهايشة معوسرة هالليلة ما جنها تخلص.
ضحكت واني داير عنها .. ما ادحك بيها كمت امسح المي برا وهي حايرة بامرها طلعت الماي ليبرا .. اجت هي
الليل بعده مخيم البنية مدبدبة الله يستر عليها وملامحها وهي شايلة الفانوس، وجهه عبارة عن خدود .. بلا سبب ضليت كاضب الماسحة وادحك بيها .
- شلون بهالهايشة والمطر الما عديوكف
- وانت راح تضلين رايحة رادة والدنيا مطر لو تضلين جوا وما تطلعين
-خوية انت ياهو مالتك اني اخوتي عسرين ولو شافوك هنا ر……. قاطعة
- يولي بالله وسماواته عرفت اخوتج عسرين، يولي مختلي بيج جايج شفتج ليوحدج بهالمراح وكلت اساعدج من خرب ببليسج
-ماله خلكك ضيك
- هاك وتسال شبيه خلكي ضيك
اندار راد يروح صاحت : اييييي يا الله جابت
افتر وركض للمراح حتى يدحك جيابة الهايشة وهي تطلع الفرد من بطنها وكف وهي تكله : اكضب اكضب عني .
وانطته الفانوس هو هم اخذه الواهس لازم الفانوس ويضوي بالمراح ويدحك بهالهايشة شلون تجيب ، حجة : يولي ساعديها وجري الفرد عنها .
كضبت بالفرد وجرته كام يطلع كومة مي ودم من رحم الهايشة وهي شالت الفرد شمرته على كتر وكامت تساعد الهايشة
خطاب : فضت ؟
- اي ابخت الله سهلت اروح ابشر نهلة اكلها الهايشة ولدت اليوم نشبع حليب هوش
هي تحجي وهو مكشر خشمه يدحك بالدم اللي بالكاع ولعبانة نفسه : عليش ادحك ما يجوز تروح تنفسها
- انفسها عليش .. انفسها لان تخلف واني لا لو شلون ؟
- خوية انت مال بختك ؟
-هو لو بختي ما مصخم ما جابني بهالليلة المصخمة لهالدار .. اكضبي فانوسج لشوف .
-اتعذر منك انا بس اخوتي عسرين واخاف احد يكعد وهم ما يتفاهمون
-يابووووووووووويه
عافني ومشى طاكة روحه : ماله هذا ؟
عفته ودفيت المراح والهايشة هدت
طلعت الصبح توا يريد يطلع فجر وكوه الدرب ينشاف.. جاي اكرب للبيت ادخل .. صفت سيارة وبيها ناس
نزل منها زلمة وكال : السلام عليكم
- وعليكم السلام
- المنطقة مكطوعة ما بيها ناس
- اي بس مزرعتنا وبيتنا بهالمجان .. منين مجبل
عديحجي وكف الزلمة كرايب ابو وهب كاله : حيهم
- حي الله الكالها اني زلمة طلعت بعائلتي من منطقة الشعب وعلكنا بالعاصفة الرعدية الصارت ونريدلنا مكان نرتاح بيه تعبنا
- وين حدك تروح
- والله كلت اطلع لديالى لان بيتي قريب من المركز وقصفوه
- انا ضيف عد اهل الدار بس حياك .. نزل العائلة وادخل بالدوانية ارتاحوا وكملوا طريقكم
كام الرجال يتشكر من كرايب ابو وهب
وهو اندار يحاجيني .. دحك بوجهي
طلع ضوا الصبح ووجهه مدور وعيونها مثل اثنين اشموس بوجهه والنمش على وجهه وخشمها زايدها حلاة .. دنجت عد ما دحكت بوجهه وخجلها رف بكلبي كتلها : خوية كعدي واحد من اهلج ، انا راح اكعد خالي ونطلع
- اي
حجت ومشت بكل هدوء
اخذت نفس قوي .. الجو رطب وهوى يجي من البستان والريحة طيبة تنعش الافاد .. دحكت وراها فاتت للدار
وكف الزلمة والعايلة وياه دليته على الدوانية
وكعدت خالي : ابو وهب .. خالي
فز - ها سكطت بغداد ؟
- لا اسم الله بس ذوله ربع شاردين من ديارهم وعلكوا بالعاصفة - نطلع لو بعد .
- طلعت الشمس ؟
- لا بعدها بس اكو ضوا
- انطر تطلع الشمس ونطلع .. كلت لوسام تحضر النا غرفة للغراض ؟
-لا والله خالي لحد هساع ماكو احد من اهل البيت كعدوا .
-عجل خليني انام نص ساعة وكعدني وشوفلي اكو بطانية باردة .
شلت ظهري منه بعد ما جنت مدنج احاجيه .. جريت بطانيتي وخليتها على خالي وانا اندار للزلمة واكلو : حياك الله تفضل .
قدس : فتت داخل واخوتي لهساه نايمين ، ندهت يوسف ما يكعد .. كمت انده بعمار الا كوة شال روحه من الفراش طلع للوادم .
اني لميت القرفة وكشيتها ( كنست الغرفة )
صاحت علي نهلة : قدس ، خايبة قدس شني ما كعدتي
فاتت لكتني اعزل بهدومي : وانت كاعدة
- وانا شفت النوم خاطر اكعد ؟
- كومي وياي جايينه خطار
- اي شفتهم .. عالكين بالعاصفة واجو يدرون مجان يستراحون بيه
- فلك صاب راسج وانت طلعتيلهم
- اني جنت بالمراح الهايشة معوشرة وعتولد وهم اجو سعلوني ( سألوني)
- يولي ما اتوبين الا يكضون براسج التوبة عجل لو شايفج عمار لو يوسف الا يحطون ظهرج ويكصمونه
- عجل لو تدحكين كرايب ابو وهب طول ما الهايشة تطلك هو كاضبني اليكول انا الاطلك مو العايشةً
- فلك صاب راسج صدك يولي
نحجي ونسينا يوسف نايم لحد ما تحرك .. فزيت من مكاني كمت اضرب على وجهي : تعزيت تعزيت تعزيت .. سمعني يمه يمه سمعني
كمت طفرت من الغرفة : عزا براسي اليوم يمسح بيه المراح الا يكضي براسي الونة
نهلة : يولي السانج هذا لو تكضبينو جان احنا بخير ، امشي خل نكضي الريوك
رحنا للمطبخ طلعت البيض من الفلينة مالت الثلج نضم بيها ثلج بالصيف وبالشتا تصير مخزن للشقلات الزايدة .. طلعت الدهن حر وكعدت اسوي الريوك .
جاي اطبخ يوسف مر معنجر خشمه واني ادحك بوجهه وادعي الله بلكت ما سمعني وين الله .. عاد الله سهلها وما حاجاني يمكنه ما سمعني .. يا راية الله بيضة
كمت اطبخ مترهية هم زين الله ما سمع
كمت اطبخ واقني: ودعتك انا بليل قصبا عليه
عيني العمى ولا اشوف عيني العمى ولا اشوف ذيج المسية ودعتك
صاح عمار : هيييين انت يولي
- ها
- ووجعاه وطك رحاه ما عدتسمعين ناس وزلم بالدوانية جاية تغنين ادفرج انومج بالطاوة
- الله الأحد هي اقنية شبيكم
مشى صحت وراه : حكه صدك عماااااار عماااااااار
رد علي بحيله : يولي انت جلدج يحكج مو عدكلج ناس مكومة غاد شبيج
- كضينا ماي كلش
- اي وشني ؟
- عجل روح جيبلنا ماي
- انت عليش تزرعدين اكول اطبخي وانجعمي
- عجل شلون نضل بلا ماي ؟ امش انا اجيب
عافني ومشى صحت : يمممممه يممممه هي امي وينها ما تجي تشوف عمار لا انطيك ولا اخلي رحمة الله تنزل عليك .. لا هو يجيب ماي ولا يخلينا نطر نجيب
فاتت امها
وسام : صياحج من صباحات الله يا علواته انا شلون اخلص منج ؟
- يمه انا فرد هالبت ما عدج قيري عليش تخلصين مني
- ساعة الهنا الاكلعج من هالبيت وافتك
- يمه الماي كضى وعمار ما يرضى يجيب وما يخليني اطر الجول
عافتني ومشت
هي امي هيج عود اني هالوحيدة عدها بس ما احسها تحبني زايدة على كلبها تفضل ولدها اكثر مني .
فاتت نهلة : يولي هاذ الچيم كلو مبلول شلون اخبز ؟
-وماي كاضي منين اجيب ؟ دحكي المطبخ قادي سيان
-عجل شلون
-اكو جم حطبة بالمراح اجيبهن واجيم بيهن وانت روحي جيبي الماي وتعاي خاطر نكضي شغلنا
- خوش ديله
كمت من المطبخ طفت بالبستان رحت ع المراح لميت الحطب بخركة وشلتهن على ظهري ودرت بكفا البيت حطيتهن بالتنور الطين وچيمتهن ، عصت بيدي خشبة ما نكسرت وهي جبيرة ، حطيت رجلي وهبدتها هم ما انكسرت .. دحكت زلمة ليقاد : خوية ابخت الله ما تكسرها الي
اندار وطلع نفسه كرابة ابو وهب
تكرب ليها خذاها من ايدي داس على طرفه وجرها من طرف ، انكسرت بيده : ايييي يوم عرسك كون
تبسم وهو ينطيها الحطب بلا ما يدحك ويكلها : وعرسج ان شاءالله .
- وياهو الشايفني بهالجول خاطر ياخذني ؟
من انطاها اندار يريد يمشي على ردها استغرب ووكف : عليش
- دحك حولك بيتنا والبستان بهيمة وعيشتنا على الله مالنا كرابة ولا واحد يمرنا غير خالك ولو اجا بس امي تكعد وياه انا حتى ما حافظه وجهه من اصادفه ما اعرفه عيشتي بهالجول اطبخ واخدم اخوتي .
- كرابتكم وين عجل ؟
- بالموصل ومتبرين من عدنا
-ما اعرف اللي اعرفه امي جانت محكومة مؤبد وطلعت من يوم طلعتها ما شفت احد كربنا
- وامج عليش انحكمت مؤبد
- ما عرف .. تشوف ذيج الصخلة
دحك ع الصخلة وهي تحجي وكالتله : حالي من حال هالحيوانة بهالبيت جثير اسرار اتمنى اعرفها بس لو فكيت ثمي ( حلكي ) يا انصكع يا انجتل يا اكلي حفنة رزالة تعودت اسمع وتدور هالاسئلة بباليل بس اكول ليا وكت نضل عيشتنا بهالجول ؟
سكت وبقى بمكانة مدنج ما يحاجيها
بقت تصفك بالعجين وتخبزه وتوجر بالنار .. تصادفوا بالحجي هي سألت وهو بادر بالكلام : ابو وه…
_انتو اصلكم …
سكت انطاها مجال تسأل
- لا ردت اسعلك ابو هم شنهو شغلته
-سجان ، انتم اصلكم من الموصل
- والله ما ادري شكلك اصلنا ضايع
- عليش
- اصلنا بدو من السعودية ومن الاردن وسوريا واستقروا فترة بسهل نينوى عكبها ترحلنا واجينا بهالجول ليش وشصار بس الله يعلم والعدهم خبر .
- تحسين السر وين بهالسالفة
- عد امي وامي فرد انسانة عشرتها مرة اني بتها ما حاملتني لا تجامل احد ولا تكرب احد وهذا هم سر ينضاف لكومة الاسرار ابالي ما عرف حله
- عجيب
- الوجه يضحك والثم يزرعد لجن كومة هموم شايلتها على كلبي من ورا هالاسرار الما عرف حلها
تحجي وانا ادحك عليها وهي تخبز
مشيت عنها ما طول اخوتها عسرين ما اريد واهكها بمصيبة اخرى .. البنية الضاهر من اهل الله ما تعول تلكالها احد تكركر وياه وتحجي وبنص حجيها تكول اخوتي عسرين وترد تكمل سوالفها .. ولو بنية عايشة بهالجول منين تتعلم الحيلة .. طبيعي تطلع من اهل الله ان جان عايشة بهالبستان تشتغل وتنام تلكاها حالها حال كل زرعة طبيعية بهالبستان ما يصايبها الدغش
بعدت منها وانا بالي كلو صب عدها
انا جم مرة جاي لبيت وسام بس ما شايف بتهم هاي اول مرة المحها .
كضبت عودة وبالسجين اكشر بالعود وبالي يمها حتى نسيت اكعد خالي ، لحد ما زهب الريوك والناس كعدته طلع وهو ينده : خطاب خطاب
- هلا يابه
- وين سارح عكلك ؟
- لا هيج جنت افكر بالشغل
- عليش ما كعدتني
- كلت فد مرة تكعد تتريك ونطلع
- يا سبع لزوم نطلع بسرعة اكو ملفات مهمة بالسجن لازم اجيبها واضمها كبل لا تسقط الدولة بيد امريكا
-يلا خالي انا ما عدي شي ناطرك
- عجل خل ناكللنا لكمة ع الماشي ونمش
- يلا
فتنا تريكنا بسرعة واخذنا سيارتنا البيكم ورحنا للسجن حملوا ملفات ما اعرف شنو هي وحطوها بالسيارة وهربوها وطلعنا رجعنا لبيت وسام ام البنية النامت براسي .. طول الطريق عكلي تايه بيها
شي اذكر عيونها الجنهن شمس والنمش المطشر مثل النجوم بوجهه … وشي اذكر خبزها وحركتها وشي سوالفها وفطرتها
البنية صح سمينة بس من وجهه مبينه صغيره يطلع عمرها ١٦ او ١٧ سنة .. بس ملابسها ولفت ربطتها وتوزرها بعبايتها مال كبار .
رجعت للبيت تعبان كلش
بالليل ما نايم وشغل عندي باجر
اشتغل عمالة وولازم اطلع ويا ولد صاحبي مر علي نروح لبيت تاجر جاي يبني سرداب جوا الكاع يضم فلوسه بيهن خاف تسقط الدولة على يا ساعة ولازم بيوم واحد نكمله مطلع ب١٥ عامل .
ما فكرت بشغل باجر على كثر ما شغلت راسي هالبنية .. كمت اتكلب بمكاني سارح النوم ما يكربني بحضورها .
فاتت الحاجة امي ع الدوانية جيف باردة تتفكدنا انا واخوتي جنا صغار ولا يكول واحدنا زلمة مشورب .. غطت احمد وانا حاط ايدي على راسي مغمض خاطر تحسبني نايم .. بس وهي تغطي باخوي علاء حجت : عليش ما نايم يالسبع يمه
شلت راسي من المخدة اللالة مخفتين ضواها بزاوية الغرفة : يمه لو خلصت ازمتنا هاي رايدج تخطبيلي
- سلامات ياهي الشاغلة فكر السبع بنصاص هالليالي ؟
- وحدة يمه
- وياهي هاي الوحدة
-وجهه مدور مثل كرص الكمر و النجوم مطشرة على وجهه مثل نجوم الله بسماه .. يمه شرعت بيبان كلبي وفاتت بحيلها ، من ساعة الشفتها ولهالساه دربي ما اندله ولا عيوني تندل النوم
- عشك من يوم .. عشك الغوى يمه هاذ
- لا تسمينه عشك كولي اعجاب
- الشي اليعجبك ضاهره يصدمك داخله يوليدي
- البت من اهل الله يمه لا تعرف احد ولا احد يعرفها
- بتمن ؟
-بت وسام
-اووو غدي لا هلا بهالطاري
جنت منسدح وطابك الوسادة جوا جناحي وكاعد صفح وسرحان احجي لامي عليها ، من حجت هيج فزيت من مكاني وكعدت : عليش يمه ؟
- وسام انكس ما خلك ربك بهالكاع
- عليش
- الحجي جثير
- رايد اسمعه
- ما اريد احجي بذمم الوادم وبختها لجنها مرة معذربة كشرة معشر ، لا تكرب صوبها ولا صوب اهل بيتها .
- بس بتها يمه زغيرة ومن اهل الله
- خذ الوريدة وشمها تطلع البنية اعلى ذويل امها .
- يمه بلا هالامثال ، البنية خوش بنية
-تصبح على خير يمه
تنهدت بكهرة وخذيتلي جكارة وكعدت اورثها
شكد جنت سرحان وشعوري حلو
الحاجة خربت كل واهسي
البنية ما تدري شنهو امها ولا شنهو عملها
…. هفففففف اكول خطاب انجعم وانطمر نام اخيرلك انت وين العشك والزواج وين ..
طفيت الجكارة بطرف الحايط وزتيتها ليغاد وجريت الغطا فوك راسي بس حرام لو شفت النوم من ورا هالدبة .
ما غمضت عيني الا وجه الصبح
ندهت بيه امي لحد ما ملت ما كعدت .. غير الضحى على صوت احمد وهو يرفس بالباب ويصرخ : من دنعل ابو هيج بيت صاير مرعى مال *****
شلت راسي كوا افتح عيني : هاي شكو ؟
- امك لا ما سوتلها جارة وياه بيت اخوها لا اهججهم بليلة ظلمة وبخت الله وصلاة نبيه اهججهم
عكدت حاجبي واني ادور ساعتي
دحكت الساعة ١١ وربع … يا شغل يا بطيخ
هاي ليش ما كعدوني
- دسكت يمعود لخاطر ربك انت مدري بيش لاهي عكلك لبالك يندهون بميت .
- عليش تكاونت ؟
- يول عايشن بالتكحيط يكحطون عليك رزك الله بكطارة خير البستان يدر والسلبوح سيان ترد بكل عين صلفة تكلي ما ندري الحكومة شيصير ما يصير خلنا نضم الخبز بت ***** جايب الخبز من بيت الخلفوها .. وامي ما عدها غير احمد السانك احمد اتهدا
عكدت حاجبي : سلبوح سيان ياهي ؟
- اكو غيرها خ***** اميرة
- طبت امه : جبتلك خبز كوم تزوهر
- خله لاخوج من يرد يتزوهر بيه
-انت عليش ما تستحي على روحك خالك هاذ بحسبة ابوك
- ابوي نايم بكبره لا تشابهينه باخوج السجان
خطاب : احمد مو هيج الحجي تهدا شوية اعصابك
- اي اعصاب انت يول
ردته الحاجة : لا بارك الله بعمرك من ولد ، تمش وتزاكط بخلك الله
- مطي انا مطي وازاكط اكول حلي مني لا هسه اكوم اهجملج البيت والله
- انت ابالك مالك رداد انعل اصلك .. امك انا يالنذل
خطاب : يمه هسه تشوفينه عصبي وجاي يمصرن دهدي تذبين بهالنفط فوك النار دفكي منه
- بدال ما ترد اخوك تردني اهمداكم لونكم بزر بطني
غمتهم وطلعت
وخطاب دفع احمد : دكعد يمعود من صباح الله مكاون .. اكعد .
جريت باكيت الجكاير وكعدت على صفحك سحبتلي جكارة وجريت الجداحة من جوا الفراش ورثت .. واحمد كاعد ليغاد مغندب
طلعت روحي
شغل ما طالع
واهلي مكاون
والوضعية مال البلد كلش خربانة فاتح رجلية وثانيهم وادخن وصافن بهالوضع الخربان .. بنص هالتفكير والوضع الطايح حظه .. طرت على بالي كلمتها وهي تسترخص من ( فد شقلة صقيرونة )
ضحكت على شقلة صقيرونة
تفل الشيطان بحلكي حسبالي اضحك بداخلي طلعت اكهكه واهز بيدي لحد ما حسيت احمد يدحك بوجهي مصدوم
احمد : اتسودنت انت ؟
- يابه هيييج سالفة طرت على بالي
هز ايدا ودار عني
غير تروح من بالي صقيرونة وشقلة
كل ما اتذكرها وهي تكول شقله اضحك مني ومن كيفي .. والله هالبنية هاي عشعشت بمخي من امس ولليوم .
كمت من مكاني فتت للبيت
الحريم تفتر تشتغل .. اللي تدنج واللي تكنس والتطبخ مو مالت افتر بينهن ما تمشي عدنا حتى لو نسوان خالي وبناته
طبيت لغرفة الحاجة ؛ ها حاجة كواج الله
- منين اشوف الكوة منك لو من اخيك
- وانا ياهو ماتي ؟ انت واحمد تكاونتو انا شكو وحطيتوني بالوسطية .
- عجل وسوالفك مالت الليل حاط عينك على بت وسام
- هسه بهاي كضبتيها علي رايد بت وسام خوش ادوريلج زواغير .. الا اكلج صدك هي ليش اسمها وسام ؟ اسم مالت زلمة
- عوذة من اسمها ومن شكلها مسخ حتى وجهه مال زلمة مو مالت مرة
- غير افتهم سالفة وسام شنهو وليش انحكمت مؤبد
- ياهو الكالك انحكمت مؤبد
- ما ادري غير هيج سمعت
- اول مرة ادري وسام محكومة مؤبد وانا اكول منين عرفت ابو وهب .. ثاريها جانت مسجونة
- خالي متزوجها ؟
- انت منيلك هالسوالف بتها سولفتلك
- يابه لا بس جاي اسأل هيج
- ابعد يمه هاي ملة ما تتعاشر
- بس يمه يخرج الخبيث من الطيب والعكس هم صحيح ؟
- انت رايد تقنعني ابتها
- يمى انسى الموضوع عوفي .
طفيت الجكارة بطرف الحايط وكطيتها يم الباب وكمت لحيلي ، دنجت وطلعت برا البيت.. وكفت جدام البستان .. ادخنلي جكارة ثانية وادحك ع البستان واجيبها بمخي منا واردها منا .
وكف احمد بصفي : انطيني جكارة
طلعت جكارة وجداحة من جيبي انطيته وحدة وشعلت الجداحة وحطيت ايدي سحب نفس وورثها .. دفع الدخان من حلكه وخشمه ودحك بالبستان وحجه : بالله عليك عدنا هالبستان كله وبيت ب٥٠٠ متر وعايشين عيشة الفكور نشتغل عمال وخير بستان ابونا بجيب خالنا وفوكها يكحطون علينا بخيرنا تكحط ، ليمتى نضل ساكتين
- امي تحب خالي ومن وعينا على الدنيا واحنا تحت جناح خالي ماكو ابو .. من بعد كل هالسنين تريد تطرده من البيت
- ما متفضل علينا .. سبع دحك خالي عاش بخير ابونا اكثر منا انا وياك لو حرثنا الكاع هاي واشتغلنا بيها احسن ما نجدي العمالة جداوة الا تلكة خيرنا يطلع من خشمنا .. ما عدنا صغار اثنينه زلم مشوربه وكل واحد بينا اباله احلام ويريد يكون عائله .. اي حلم وعائلة نجيبها بوسط هالملة ؟
- وشنسوي ؟
- كدامي هواي اسوي بس خلي تصفى الوضع ونشوف الدولة وين توصل .
جاي يحجون ..
فات ابو وهب للبيت ، حجه احمد : دحك اجا العزيز مالت امي مهرف.
- جج صوتك ، هلا يابه شنو الوضع
- نايمين نومت التيس ما تدرون بالدنيا شصاير بيها
- شصاير ؟
- لموا غرضكم واستعدوا نطلع منا
- وين نروح
- امريكا كربت تسقط البلد … والحكومة طفرت
- معقولة صدام يسلمها ؟
- هاي امريكا ما يوكف بوجهه لا صدام ولا غيره
- مستحيل
- المستحيل راح يصير خل نلم غراضنا كلشي يصير يمكن يطلبونه
فات للبيت وصاح : خطااااب
- هلا خالي
- تاخذ السيارة البيكب وتطلع لبيت وسام تكلها الملفات الحطيناها بدارها تلفها بنايلون ثخين وتحفر حفرة وتدفنها بيها .. اسرع ابني .
شمرت الجكارة من ايدي وسحكتها : ما عندي شي هسه اروحلهم
وكفت امي : الدنيا خربانة شياخذك ليغاد
- بالسيارة
- تلاكيها الطرق مكطعة اركد
ابو وهب : خطاب السبع ما ينخاف عليه يحاجة خله يمش
- امريكا ما يوكف بوجهه سبع .. حكومة بكبرها وهتكول راح تسلمها عجل تريد من هالوحيد يوكف بوجهم .
- ما عليه شي اروح
ابو وهب فات جوا وامه كامت تداهر ويا خطاب ما ترضى يمشي بهالوضع تخاف عليه من الامريكان
دخل للغرفة ابو وهب نزع السترة
فاتت اميرة : هلا يتاج راسي الله يساعدك
- يساعد بختج حضرلي جم هدمة خاطر اطلع
- وين
- هساه بهالوضع اطلع للاردن ، ما ادري عكبها شيصير
- بهالوضع تطلع للاردن ؟
- ادبرها لمي غراضي بالعجل
- وتهدنا هنا ابو وهب ترا كوا صابرة ع البيت لجل عيونك الا اليوم على سوايت احمد ما اكعد ساعة وحدة ما اتحمل
بجت .
دحك : شصاير ؟
- يكول انت ورجلج السجان الا اكلعكم من البيت بالقندرة
- احمد كالج هيج
حجاها ونفض عنه وكام كضبته
- ما اريد المشاكل يبو وهب انا بس اريدك سالم فوك راسي ، بس احمد اباله يطردنا بهالبيت كلنا
- اكسر راسو لهالكوا****
- اكعد ابخت الله عليك واسمع مني ، لو حاجيته ما راح ينصفك والبيت والبستان ورث ابوهم وتطلع انت واحنا والعايلة ونصفى بالشارع
- انا ابو وهب احمد النكس يحطني بالشارع غير اكسر ظهره وظهر اهله
- ما طوله البيت بيت ابوه .. ما تكدر تكسر لا ظهره ولا ايده .. والايد ما تكدر تكسرها يبو وهب صافحها
- انا اصافح هالنجس خاطر يرضى اضل بالبيت غير انعل والديه ، تالله ما اخليلو باكية
- اسمع مني للاخير وافهم .. صافحه لحد ما توصل وياها للحافة الجرف زته وعيش جوك بلا سموم .
- شكصدج اكتل ابن اختي
- ابن اختك شاري جتلك لو ما هديتلو كاع ابوه
ضل يدحك بوجهه بغرابة … اجتلو ؟ …
يتبع....
لقراءة الفصل الثاني اضغط على : ( رواية اسرار قدس الفصل الثاني )
لقراءة باقي الفصول اضغط على : ( رواية اسرار قدس )