رواية مجرد كارثة الحلقة الثامنة عشر 18 بقلم أروى طاهر المسلاتي
رواية مجرد كارثة الجزء الثامن عشر 18 بقلم أروى طاهر المسلاتي
رواية مجرد كارثة البارت الثامن عشر 18 بقلم أروى طاهر المسلاتي
 |
| رواية مجرد كارثة الفصل الثامن عشر 18 بقلم أروى طاهر المسلاتي |
رواية مجرد كارثة الفصل الثامن عشر 18 بقلم أروى طاهر المسلاتي
أحيانا داخل أعماق الشخص يكون طيب ❤️
لكن الناس يلي حوليه غيروله طبعه وخلوه يدير حاجات غلط
لكن مهما صار ومهما دار من اغلاط رح يجي اليوم يلي يبان فيه طيب أصله وحنان قلبه🫶🏻
صلو على النبي قبل ما تقرو ❤️❤️
زكيه:تخبط على وجها….نهاري الاحرف ملقيتيش الا ضيوف جدك 😱
وتي روحك والله لما يقتلوك اليوم
ايات:بغلللل وحقد….تستاهلي ان شاء الله يقطعوك لانك ادخلتي في شي مش لييييك تستاهلي
فاطمه:خدت نفس عميق،…..انا مسحوره مش مسؤله على تصرفاتي
ايات:والله….خودي السحر سبله توا
زكيه:خلي نمشي لي جدك نحاول نلاقيلك حجه اياماتي السود وخلاص منك انتي واختك….وطلعت
فاطمه:اي بنديره سبله
واعرفي كويس ان الاذى يلي انا متعرضتله كله بسببك وبسبب قرفك يا حقيره
آيات:عقدت حواجبها….حقيره!؟
فاطمه:انتي السبب في موت هدى وانت السبب في مرضي وياويلك
ياوييييييلك من ربي على كل شي درتيه
ايات:تعصبتتتت وعلت صوتها….هدى ماتت لانها مدايره مصيبه في حياتها ومش قادره تواجها
وعزام بناخده بلغصب مش لاني نحبه بسس
باش نأمن مستقبلي انا وياك وامك وبوك ونخليهم ياخدو كل شي لان يوم يموت جدك عمامك رح يلوحوك في الشارع ومش رح اضوقي شي من الورث لان معندكش اخخخخ
فاطمه:وبوك وين؟؟؟؟
ايات:ضحكت بهزوه…..بوك هنايا زيه زي قلته ياماما
هاذا لو جدك مكتبش كل شي بي اسم عزام من كثر ما مكبد عليه
فـ حاولي تبري واديري العقل سلم بنتي وسكفري فمك معش تدخلي في حد خليها تتزوج وتفكني
فاطمه:سكتت وهيا متأكده ان خلاص الخطبه خربت لان الشي هاذاكان واضح على وجها هوا وبوه😂💔
________________________
بدريه:تمد في سفرة العشي …..وليدي طمني ان شاء الله قلتو لي الضيوف ان فاطمه مش على وعيها
عزام :تعابير وجها فرح…تو نهدرزو بعدين هاتو المشروب
رفيده:ضحكت
زكيه:شن في يضحك انتي التانيه
رفيده:وهيا تشوف لي عزام….لا شي😅
لكن الباين هكي ان العريس غير رايه
زكيه:تنهدت بهزوه….وكيف عرفتي يا بو العريف انتي
رفيده:تو تشوفو😌
بدريه:فال الله ولا فالك خلي البنت تمشي وتتسهل ترا
وهيا قاعدتلي زي الشوكه في الحلق
رفيده:ابتسمت بهدوء وهيا ساكته
ايات:خشت عليهم المطبخ….ماما شن صار
زكية:خدت نفس عميق…..اهو يابنتي نراجي خلي يروحو الناس ونفهمو
ايات:بابا وعمامي وين غريبه مش حاضرين
بدريه:بوك وعمامك طالعين زرده ياحنه قاعدين فيها غير حني بس
وكان قلتي بنطلعو يديرولك الف قصه وسبله باش تقعمزي في الحوش
مريم:السلام عليكم☺️
وين انادي فيكم من الباب مفيش حد في الصاله كلكم في المطبخ
رفيده:عقدت حواجبها بي استغراب…مريم!!!
زكيه:تشوفلها هيا وايات بصدمه
بدريه:شني اديري انتي هنايا وشن جايه تبي؟؟؟؟
ولا بعد ما تمت العده جايه بتاخدي ماكتب ربي من شقة وليدي؟؟
اطلعي اقلبي وجهك برا ياساقطه ياقليلة الادب
مريم:ابتسمت وتنحي في القوانطي من يديها …..له له يامرت عمي عيب عليك تقوليلي ها الكلام ع الاقل عشان العشره يلي بينا ولا نسيتوها؟
بدريه&زكيه&رفيده&ايات&وفاطمه يلي كيف خشت عليهم
كلهم مصدومين في الحنه العرايسيه يلي كانت على يدين مريم ❤️
فاطمه:تجرأت وسألت….اءء إنتي تزوجتي؟
مريم:قربت وباست فاطمه بوستين….اهلا فطومه ان شاء الله حالك احسن؟
شافت للحنه….اه اي نسيت نقوللكم سامحوني خدتني الهدرزه معاكم من كثر ما استاحشتكم موت😂…اي تزوجت ليا اسبوع بس
وراجلي ياعيني عليه حلف ايمين الله يعرفني على اهل بوه الله يرحمه
ايات:انتي شن تخرفي اهل منو وراجل منو؟
مريم:بعلامات صدمه مزيفه….اااااه مقالولكمش قبل مانجي!🫢
كلهم يشوفولها بصدمه وساكتين بصدمه مش انها وصت حوشهم وتزوجت لااا
صدمة طريقة كلامها وحركاتها كأنها مش نفس مريم يلي كانت كنتهم ابدا
مريم:ضحكت من قلبها….هههههههه والله الباين محدش قلكم😂
واضح من وجهكم واضح واضح
بلعت ريقها وكملت مضغ المستهكه بي تسهويك…..هاذا ياحنه طلعت من الحوش بعد ماكنت كنتكم
ورجعت كنتكم من جديد الله غالب حبي ليكم كبير منقدرش نبعد عليكم
رفيده:خافت وحطت احتمال يكون ولدها تزوجها بدون ما يقول…..كيف!
مريم قولي وخلصينا مرت مني انتي
مريم:ابتسمت مرت نصر الله يحفضه ليا
على طول تمت العده متعي جي طلبني من بابا ودارلي عرس يحكو فيه لعند توا
وحط مهري بي الدولار ياعمري عليه قداش خيره ورزقه هلبا ومش بخيل ربي يزيده يارب 😌❤️
بدريه:حطت صبعها على جنب راسها وهيا تتوجع….صبرك ياربي بسسسس
ارتحتي يا لفعه يلي متتحشميش يا قليلة الربايه؟؟
ارتحتي بعد ما خليتي ولدي يعاني ونفسيته تاعبه لعند اليوم منك
وتمشي تاخدي ولد عمك وتجي هنايا بكل عين وقحه؟؟؟
مريم:حطت يدها ع قلبها وشهقت….بسم الله ياربي
حبيبتي انا لادرت عيب ولا حرام ياغزاله هاذا راجلي على سنة الله ورسوله وزي ما انتم ليكم حصة في الحوش حتى هوا ليه
رغم ان خيره سابق الكل حبيبي لكن الاصول اصول والحق حق
بدريه:نهاااااارت…..طلعوووووها طلعووووها من قدامي خير ما اقسم برب العزه نقتلهااا
فاطمه:بتوتر…..
خلاص مريم اطلعي برا بالله عليك قعمزي في الصاله
مريم:خدت شنطتها وشافتلهم بنضره استهزاء وطلعت….
________________________________
ايوب:الوووو؟؟؟
ساره:اءء انا م اءء…..انا معاك معاك
ايوب:خيرك انتي وين مشيتي
ساره:هه وين بنكون يعني معاك اهو ع الخط
ايوب:ساره فيك حاجه؟
حسيت من لما حكيتلك ع الحادث مش على طبيعتك شن فيه!
ساره:ايوب
ايوب:عيونه
ساره:انا ءءء ااء انا
ايوب:انتي شنو!
ساره:تقدر تجي بكرا نحكي معاك ؟
ايوب:وين؟
ساره:في الكليه في شويه حاجات بنحكيهولك
ايوب:ساره الف مره قتلك انا منحبش نتلاقى معاك في اماكن هكي
ساره:خدت نفس تحاول تكمل كلامها…صدقني نبيك ضرووري
ايوب:سكت شويه وتنهد….به خلاص الساعه كم
ساره:انا عندي امتحان من الساعه10لعند 12
12ونص نكون طالعه ومكمله
ايوب:خلاص تمام….بس شنو الموضوع ؟
ساره:بكرا نهدرزو
ايوب:احكيلي حتى شوي ع الاقل
ساره:ايوب خلاص والله قتلك بكرا ن……
مياسين:فتحت الباب بقوه خدت جاكيتها وطلعت وهيا مضايقه
ساره:مياسين ميااااسين وين طالعه
ايوب:الووو؟؟
ساره:ايوب شوي ونكلمك
ايوب:تنهد بملل…به تم
_________________________________
سلطان:نزل على ركبيه الاثنين جنب السرير وابتسم…خيرها بنتي
بتول:سلطان بعد من عليا مش متحمله روحي
سلطان:بتول ليك 3ايام على الحاله هاذي راك خوفتيني عليك شوفي وجهك كيف اصفر
بتول:عطاته بضهر…..خلي نموت بالك ترتاح مني
سلطان:عقد حواجبه….شنو الكلام يلي تحكي فيه خيرك؟
بتول:انت كان مهتم ومدورني راهو مش هكي
على اساس هاماتك صحتي ولا معدل عليا
سلطان:مصدوم مش فاهم شي….بتول شنو الكلام هاذا؟
بتول:بدت تبكي بشهقه
سلطان:قعمز على السرير جنبها ويمسح على شعرها…تي خيرك يابنت الناس شن صايرلك
بتول:من بين شهقات بكاها….انت متحبنيش علاش متزوجني
سلطان:ضحك….وربي انتي ما طبيعيه يالله معليشي هرمونات هرمونات 😂😂
بتول:كملت بكاها وهيا في حضنه وسلطان ماسك ضحكته بسيف ومش فاهم خيرها
____________________________
مياسين:طلعت لي جنان الحوش وحضنت نصر يلي كان يراجي فيها
حضناته بقوه وقعدت تبكي
استمر الحضن دقايق طويله لين هدت
نصر:بعد من عليها شويه وهوا ماسك يديها الاثنين….معقوله هكي يصير في مياسين؟؟
كيف تولي ضعيفه هكي!!
مياسين:تعبت نصر💔
تعبت حتسه اني بروحي وانت من يوم تزوجت معش عرفت نوصل فيك
نصر:اهدي ومتشغليش بالك مفيش ولا حاجه رح تصبر بدون ارادتك وهاذي كلمه مني
مياسين:ابتسمت….عمرك ما عطيتني كلمه وخلفت بيها❤️
نصر:هوا انا نقدر ؟
قلبي انتي
مياسين:حضناته بقوووه❤️❤️
لكن الحضن هاذا نفك💔
نفك لما جي عزام وباعدها بقوه لين نصر رجع خطوات للخلف وكان رح يطيح
عزام:بي اعصاب وعياط…..شني العاااااار هاذا!!!
شاف لي مياسين…انتي من وين تعرفيه هااااا؟؟؟
وانت؟؟
وانت حاسبينك راجل ومدخلينكش حوشنا باش تجي تدحنس على بناتنا ؟
وهادا وانت عريس هكي؟
نصر:ابتسم ع جنب وهز راسه مرتين كأنه يقول…لاحول ولاقوة الا بالله
عزام:انتي اقلبي وجهك فوق تحركييييييي وجهك معش نبي نشوفه
مياسين:وقفت في وجها وقالت بكل هدوء….معش دخلك فيا
عزام:مسكها من يدها بعنف وكلن رح يمد يده عليها من كثر الاعصاب….
نصر:خش بينهم وهوا يتكلم ببرود…..هي هي هي
يدك يددددددددك غادي على اختي
عزام:رخي يده بصدمه وهوا مش فاهم!…شني!
نصر:زي ما سمعت وزيد غادي من عليها راهو مخليها الايام يلي فاتو بي مزاجي وبي رغبه منها كنهادا دقيقه ما تقعدها عندكم
عزام:يشوف لي مياسين يلي كانت ورا نصر متخبيه….شن يقول هوا؟؟؟
عيط عليها….شن يقووووول هاذا ندوي معاااااك
نصر:دفه بهدوء….كلامك معاي انا
اي مياسين اختي
عمتك يا سي السيد لما جابتها في الحبس مفيش حد سأل عليها فيكم الا بوي بسس
كان يمشي يزور فيها هيا وامي لان مرت بوي ام هدى الله يرحمها ويسامحها رفضت تمشي معاه وتبعت عيلتكم الفاسده
وعمتك كانت تعاني من هلبا مشاكل بسبب الولادة مش قادره ترضعها
فـ خدتها امي ورضعتها
عزام:بعدم تصديق….شني تدوي انت شن الكلام الفارغ هوا
نصر:قرب منه بتحدي…..نقدر نثبتلك
ان ها اختي بي الرضاعه ونقدر نثبتلك ان كل نهاية اسبوع كانت تجي حوشنا وتربت معاي ومعندهاش غيري في الدنيا
بس مش وح نعطيك قيمه اكتر من يلي عطيتهالك
عزام:غير نضرته من استغراب لي حاده 🔥….نصر حاسب على كلامك لعند توا قاعد محترمك رد بالك تغلط
لو كان صح وانها اختك من الرضاعه فـ هاذي تكون بنت عمتي
نصر:يلي ماعمرك سألت فيها وتسب فيها صبح وليل؟
عزام:ترا ق……
مريم:نصر
نصر:ابتسم …ايوا
مريم:ابتسمت….مش فاضيين العيله داخل
هيا نروحو نرجعولهم يوم تاني شن رايك
نصر:تمام….شاف لي مياسين….بتجي معانا؟
عزام:مش على كيفهاااا
مياسين:شافت لي عزام
نصر:اشبحيلي هنايا بتطلعي ؟؟؟
عزام:يمين بالله ما عافسه خطوه برا الحوش
نصر:متجاهل عزام….ادوي مياسين
مياسين:اءء خ خليها مره تانيه انا مش واتيه توا
نصر:تمام تحتاجي شي كلميني
مياسين:هزت راسها بمعنى تمام
نصر:خدي مرته وطلع
عزام:مسك مياسين من يدها بقوه….تحركي اقلبي وجهك فوق بعدين نجي نفهم منك حياتك المفركيه هيا
مياسين:بعد يدددددك
عزام؛دفها ….ضمي فمك واركبي
نصر:كيف استقبلوك؟
مريم:فرحو فيا❤️….يحبوني الحق وقعدو يقولولي الحمد الله رجعتي للعيله
نصر:وقف وهوا يشوفلها….لانك تنحبي💕
مريم:ابتسمت ….حتى انت تجنن مفيش منك اثنين
صدام:يشوفلهاوبيمووت
نصر:فتحلها الباب….هي اركبي وغطي حنتك هاذي
مريم:ههههه حاضر
صدام:سكر الروشن بهدوء وقعد واقف دقايق
خبط الدولاب بيده من الغل يلي فيه وكل المرش طاح دفعه وحده
___________________________
مفتاح:لا حول ولا قوة الا بالله….خيرها البنت؟
هيلت ولا شنو
جهاد:والله كان البنت مسحوره حق توقع انها مش في وعيها
فاطمه:اي ياعمي حتى انا هكي قلتلهم لان مندكرش شنو قلت
زكيه:فنصت فيها….سكري فيك انتي اسكتتتتي
فاطمه:سكتت وهيا متكنطيه
رفيده:شنو اجراء الزرده
جعفر:على الكيف والله قنينه
شاف على جنب….والله عمكم جهاد اليوم رقصه رقيص يلي يشوفه يقول هاذا وين كان
ضرار:ههههههههه ايوا ايوا اطلع يامدسوس
جهاد:وجها احمرررر….وخيرك متقوللهمش على عمايلك
مفتاح:شني عاد بتقعدو تعرو في بعضكم توا كنهاذا فوتو الزرادي من توا ايواااه
جهاد&جعفر:ميتين ضحك
جهاد:خيرك ياولد وين سارح؟
وخيرك هكي ضاعف وحكايتك تاعبه
صدام:مردتش
بدريه:من يلي ما تتسمى الله يلعنها الكلبه ولا يوجهلها الخير
جعفر:لا حول ولا قوه الا بالله …..الدنيا نصيبات يامرت هوي معليشي نصيبه مش فيها
زكيه؛عاد والله ما تجي خلاص من بين ولاد الدنيا كلها ملقتش الا ولد عم طلقيها؟؟؟
مفتاح:حسستيني ان هيا يلي مشتله
ماهو هوا الراجل مشي خطبها وطلبها خلاص
بدريه:والله بنات الحرام توقع منهم كل شي حسبي الله فيهم
رجب:السلام عليكم
وقفو ولاده سلمو عليه وقعمز
مدوله طاسة الشاهي والكل يراجي فيه شن يحكي وفاطمه ميته خوف
عزام:سحب روحه من جمعة العيله وركب
رجب:شاف لي فاطمه…..مش رح نحاسبك على حركتك لي سببين
الاول بسم الله العضيم يلي راكبك هاذا
والثاني ….وابتسم
جعفر:ياودي الضحكه هاذي نعرفها يابوي ان شاء الله خير😀
رجب:الولد عجباته فاطمه وطلبها هيا لزواج
زكيه:شافت لي بنتها بفرح
ايات:حطت يدها ع راسها وهيا مضايقه كل ما تفكر حاجه لازم يصير عكسها…
__________________________
مياسين:بعددددددد من عليا زيد غادي
كنت نسحابك صاحب مسؤليه وتعرف كيف تحافظ على بنت حباتك صح
بس من اول موقف ع طول رميتني بسبب جدك الحقير زيك
كان عندها حق هدى لما انتحرت بسبب انها مش لاقيه راجل تستند عليه
عزام:شكل يده على هيئة قبضه وكان رح يضربها بس ع اخر لحضه ضربها في الباب
مياسين:فتحت عيونها ببطئ بعد ما سكرتهم بخوف….
عزام:عطاها بضهر وقعد يتنفس بعمق عشان يهدا
ورجع شافلها ….علاش منعلمش انا بقصة نصر؟
مياسين:مسألتنيش
عزام:بالله؟
مياسين:اي
عزام:تنهد وتنفس بعمق…..مياسين انتي عارفه كويس قداش نحبك!
مياسين:ضحكت بهزوه ….اي هه لدرجة رح تزوجني من كثر حبك جايبلي عريس الله يبارك
عزام:خليني ندوي مياسين راهو اقسم بالله نمد يدي
مياسين:سكتت ونزلت عيونها لوطه
عزام:بعقلك انتي رح نخليهم يزوجوك لشخص تاني؟
كل يلي في بالي منوقفش قدام جدي خليه يتصرف كيف ما يبي
وبعدين نطلع الف عيب في الولد ومحد يقدر ياخدك ويقرب جيهتك
مياسين:ربعت يديها….عزام
انا اسفه معش نتحمل الوضع هاذا
عزام:وضع شني؟
مياسين:انا مش فاسده باش ندير علاقه مع ولد خالي ونقضي يومي كله معاه ومفيش حد يعلم وبدون صفه رسميه
الحرام منبيش نطيح فيه اكتر من هكي يكفي
عزام:شن شش شن تدوي انتي
مياسين:عزام نبي نمشي نعيش عند نصر
خلاص
عزام:عصببب…..تي منو الاخ يلي طلع فجآه هاذا مياسين متهبلينيش
مياسين:نهبلك لان قتلك منبيش نطيح في الحرام
عزام:قرب منها….بطلي اسلوبك المستفز وربي نقتلك مياسين وربببببي
مياسين:خدت نفس….مش رح ننكر اني نحبك وقاعده هنايا عشانك بس
لكن خلاص عزام بجد معش نقدر
يا اما تخليني نمشي عند نصر
يا اما تعطي على للكل بي الشي يلي قاعد يصير بينا
عزام:بثقه….تم خلي الموضوع عليا
مياسين:عقدت حواجبها بي استغراب….شني بدير يعني!
عزام:مليكش دخل
امشي دارك توا عندي ما ندير
مياسين:شافتله بنضره اخيره وطلعت بدون ما تزيد تحكي ولا كلمه
ثاني يوم 🪐✨
رفيده:ههههههه اقسم بالله تجي مسلسل
خشت تعيط عليهم ناض الولد عجباته وخطبها 😂😂
بدريه:متنرفزه….اففففف
زكيه:فرحانه…..صبح يابدريه العفو خيرك مكشره
بدريه:تشرب في الشاهي ….لا مكشره ولا شي متنرفزه من الله لا يربحها امس
رفيدة:والله قادره بصراحه ها البنت كيف جابت راسه نصر هاذا
وهوا الله يبارك ذوق وادب وفلوس
لا وفوق من هكي عزري وهيا مطلقه
ايات:تاكل….وكان مطلقه يعني
رفيده:تنهدت والله وقتنا المطلقه عندنا كأنها مدايره عار وتندفن في الحياة
زكيه:شافت لي ايات….وين اختك؟
ايات:راقده الليل كله مرقدتش ولا غمضه
زكيه:فرحانه حبت عيني ☺️….الفال ليك حتى انتي ياربي تاخدي يلي في بالك
بدريه:ان شاء الله ربي يعجل في نصيبهاااااا ….(وكانت تضرب في المعني)
سلطان:ماسك بتول وخايف عليها اطيح ويساير في خطواتها …السلام عليكم
بدريه:اهو جي ولدي اخيرا ليه 4ايام مريتش وجها جاي يديدش في مرته
صدق من قال الوساده تنسي الولاده
سلطان:غير ردي السلام يا امي قبل
رفيده:بسم الله عليك بتول خيرك شاحبه هلبا
سلطان:ساعد بتول لين امتدت ع الصالون
بتول:هادي جيتي من عند الدكتور والله
زكيه:ان شاء الله خير شن في
بدريه :تشوفلها بحقد وتقلب في عيونها
سلطان:ابتسم….قالو جايكم بيبي في الطريق
بدريه:تغيرررررررت ملامحها ….قول والله😧😧
ايات:صفقة….اخيرااااا بيبي في العيله
بتول :ابتسمت
رفيده:الف الف الف مبروك صدام يااااارب يكمل ع الخير
زكيه:مبروك ولدي يتربى في عزكم يارب
بدريه:رورورورورورووي
سلطان:يضحك….يبارك فيكم يارب صحيتو
بدريه:لا من اليوم بتول مدامها تاعبه متروحش بيها خليها هنايا نخدمها بعيوني
سلطان:😧شنو؟
بدريه:تصب في العصير….حامل المرا وشكله وحمها واعر وتبي ماكله باهيه امشي جيبلها ملابس نوضي نوضي سلم بنتي اشربي
اهو درت عصير ليم طبيعي الصبح
بتول مصدومه
ورفيده وزكيه وايات صايخين بضحك❤️
_________________________________
ساره:تبكي ….اقسم بالله ما كنت نعرف كيف نتصرف ايوب
ايوب وحق ربي من يوم الحادث ما قدرت نكمل حياتي طبيعي
ايوب:يشوفلها وهوا مصدوم
ساره:تحكي وهيا متوتره وتبكي…..والله والله ما كنت نلعب وربي
كل القصه ليلتها باعتين خوي ضرار عشان يجيب بطاطين لان كان الجو صقع شويه وفي ناس من عيلتنا بايته عشان ععع عشان بنت عمي هدى بيانها
وانا مشيت معاه وقال هيا نعلمك السواقه
نهارت بكي …..وحق ربي ما عرفت شن كان يدير هوا كيف طلع فجآه هكي
ايوب:وقف….ع الاقل اسعفتوه
بدل ما كنتو رح تدفنوه وهوا حي
ساره:تبكي…..وربي كنت نبي نعترررررررف والله ما كنت نبي ندير شي زي هاذا ورررربي
هوا غصب عليا خوي 😭💔
ايوب:شافلها بنضره طووويله…..زيك زي خوك مفيش فرق
ولازم تتحاسبو الاثنين
طلع وسيبها في وسط الطريق وهيا تبكي بحرقه
________________________________
عزام:ابتسم وحضن خوه…..الف مبروك
سلطان:يبارك فيك يارب الفال ليك
رفيده :تصب في القهوة
عزام:خلاص حتى انا معش معطل
بدريه:شافتله بفرح بدون ما تتكلم
عزام:حرك فنجان القهوه …..خلاص امالا مدام خش الفرح للعيله خلي نفرحكم حتى انا
ايات:تشوفله بشوووق تبي تعرف
زكية:ابتسمت….فرحنا ياولدي
عزام:قررت نخطب ونتزوج بأسرع وقت معش نبي نأجل
رفيده:سبقتهم سألت وكانت عارفه الاجابه….منو سعيدة الحظ هاذي
عزام:شافلهم كلهم وجاوب بهدوء…..مياسين
_______________________________
مياسين:انا ءء
امين:تي منو انتي؟
مياسين:بلعت ريقها….انا مياسين بنت خالة هدى ونبي نشوفك ضروري ممكن؟
امين:سكت مدة طويله
مياسين:الو؟
امين:ليش تبي تشوفيني !
مياسين:صدقني مش رح تندم لو عطيتني فرصه نشوفك
امين:سكت
مياسين:ارجوك
امين:تمام
مياسين:سكتت وهيا تسمع في العنوان واي يوم رح يتلاقو والساعه ونهت المكالمه بي …..شكرا ❤️
سكرت الخط وهيا تشوف لي تالفون هدى في يدها
رجعت ضماته بين حوايجها وطلعت من الغرفهيتبع...
لقراءة الفصل التاسع عشر اضغط على : ( رواية مجرد كارثة الفصل التاسع عشر )
لقراءة باقي الفصول اضغط على : ( رواية مجرد كارثة )