رواية مجرد كارثة الحلقة السادسة عشر 16 بقلم أروى طاهر المسلاتي
رواية مجرد كارثة الجزء السادس عشر 16 بقلم أروى طاهر المسلاتي
رواية مجرد كارثة البارت السادس عشر 16 بقلم أروى طاهر المسلاتي
 |
| رواية مجرد كارثة الفصل السادس عشر 16 بقلم أروى طاهر المسلاتي |
رواية مجرد كارثة الفصل السادس عشر 16 بقلم أروى طاهر المسلاتي
أحيانا في أسرار لو تنكشف هلبا ناس رح تختفي من الوجود
هلبا ناس ننصدمو فيها!
وهلبا ناس ننصدمو في برائتها✨
ايات:وهيا سارحه….بجد يافاطمه وربي نحنا مليناش اي يد في موت هدى
لابي السحر ولا بي الموضوع التاني
فاطمه:راقده ع السرير وتعبانه….كملي بعد ما فتحتو التالفون شن صار!
ايات:مشفنا شي ملحقناش ….مياسين بس لحقت تشوف المكالمات
اخر مكالماتها كان مع شخص اسمه امين وواضح ان في مشكله بينها وبينه
فاطمه:مشفتوش المسجات ؟!
ايات:ناضت مريم متكنطيه مشاء الله من كثر طيبتها متبيش اسرار هدى تنفضح!
بعد بشويه كيف خشو على الواتس خشت علينا رفيده مرت عمك
هزبتنا وخدت التالفون وطلعت
فاطمه:يكون احسن …..خير ما تعرفو شي وتندمو انكم عرفتوه
ايات:تنهدت…..البنت ماتت وشبعت موت
عندي فضول نعرف ليش انتحرت وارتحت لان مش احنا السبب
لكن بجد خايفه نكتشفو شي يخرب حياتنا
فاطمه:يكون احسن
ايات:انتي خيرك شن صايرلك مش طبيعيه؟
فاطمه:مش عارف من بكري نرجع وراسي دايخ مفهتش شن صايرلي
ايات:خديت موعد مع الشيخ بكرا رح يفك العمل 💕
وترجعي امورك طيبه
فاطمة:ربي يسمع منك
ايات:سكتت وهيا تقول في خاطرها…..وخلاص شويتين وعزام يكون بين يدي🫶🏻
____________________________
مريم:واقفه قدام المرايا في غرفة نومها وحاطه يدها ع قلبها
تاخد في نفسها بصعوبه وكأنها داهشه💔
سكرت عيونها وذكرت✨
مريم:مرت عمي
انا والله ما نرضى يلي قاعد يصير مهما كان البنيه ميته حرام يطلعو خصوصياتها
رفيده:قامت حاجبها…..اي خصوصيات واي بنت شن صاير !
مريم:بنتك ساره طلعت تالفون هدى والبنات مقعمزين يتسهوكو ويضحكو فاتحينه
رفيد:حطت الفوطه بغل على دولاب المطبخ وطلعت وهيا متكنطيه …..
مريم:فتحت عيونها وهيا تحكي مع نفسها!
المره هادي قدرت ننفذ ومينكشف شي!
كيف بندير المرات الجايه!!
حطت يدها على راسها…..علاش قاعدين حاطين راسهم من راس هدى بعد ما توفت علاش بس!!
شافت لي نفسها في المرايا
اصلا مستحيل يكون شي في بالي موجود على تالفونها …اففف ياربي كيف بندير
بينما كانت مريم غارقه في خوفها وتفكيرها
قاطعها صوت بوسه على خدها وهيا مش منتبها❤️
ناضت من مكانها وحضناته بقوه✨
صدام:غريبه الحلو مش مجهزلي عشي قنين💕
مريم:طارت من فرحتها بكل حرف قاله 🫶🏻….من عيوني ثواني بس !
صدام:ابتسم وهوا يراقب فيها كيف ماشيه للمطبخ
خطر في باله شي وسأل نفسه
لو كان بوي واخد بتول لي سلطان لان بوها عنده مكانه كبيره
ليش خدالي مريم؟
قال بصوت عالي….مريم
جاوبتته مريم من المطبخ…..عيونها وهيا
صدام:وهو يفكر…..ذكريني بوك شنو يخدم ؟!
مريم:ضحكت وطلعت من المطبخ والموس في يدها….نسيت ولا شنو؟😄
بابا دكتور
صدام:سكت شويه وهوا مش لاقي تفسير !
ومريم رجعت للمطبخ
_____________________________
ساره:افففففف عاقبتني ع خاطر التالفون
تو اسبوع بتحرمني من النت ياربي ياريتني ما خديته
مياسين:سارحه
ساره:تصدقي معش نذكر حتى شنو شفت في التالفون
انتي لقطي حاجه؟
مياسين:قالت وهيا سارحه تفكر …. الولد يلي اتصلاته معاه اسمه امين!
ساره:اي وانا منعرفش ولا في حد يقربلنا بي الاسم هاذا
مياسين:حاطه يدها على جبهتها بتوتر….امك جبدت التالفون بعد ما فتحتا الواتس طول
ساره:كان اسمه امين موسى
مياسين:مذكره شكله في الصوره؟
ساره:لا نسيت ملامحه اصلا خطف كله صار
مياسين:امين موسى!….رح ندور عليه الشخص هاذا
بين نلاقيه
اخخخ بس لو تحصلي تجيبيلي التالفون مره تانيه ياساره
ساره:نحاول ليش لا
بس!….انتي ليش مهتمه بيها هكي وتبي تعرفي؟
مياسين:والله يحقلي نعرف الناس يلي عايشه معاي منو وشنو وضعهم …..ولو بس تعاونيني شويه يكون احسن
ساره:نخطف لونها …..انا لو نعرف شي كنت قلتهولك اكيد يعني
مياسين:ان شاء الله🙂
ساره:ابتسمت…..شنو الوضع مع عزام؟😉
مياسين: خيره!
ساره:لا شي ….غير كل مايجي قدامك يتفركس مع بعضه 😌
نضراتكم كاشفتكم
مياسين:ابتسمت ع جنب…..انتي يتهيألك
ساره:ضحكت …..اي اي واضح
بعدين تلاشت ضحكتها …..بس!
ردي بالك مياسين لو كان في بينكم شي ردي بالك حد يعرف في الحوش
لان مش رح يخولك في حالك
مياسين:سكرت الكتاب يلي كانت تقرا فيه…..زي مادارو لي هدى يعني!
ساره:اففف من تفكيرك🤦🏻♀️
مياسين:رجعت فتحت كتابها وكملت قرايه ….
ساره:قوليلي ….امك معش مشيتيلها؟
كيف وضعها وشن صاير فيها
مياسين:ابتسمت وعيونها في الكتاب…..ماما وضعها في السجن احسن مني ومنك
ساره:احكيلي نحب نسمع
مياسين:لمعت عيونها…..ماما واخده راحتها في السجن ❤️
الكل يحترمو فيها وكل شي ليها
اي شي تطلبه تحصله وعايشه مرتاحه
ساره:عقدت حواجبها بي استغراب…..بس!
يعني كيف حبس هوا في النهايه
مياسين:بحتلها بنضرة حاده وهيا مبتسمه….الفلوس ادير طريق في البحر 🔥
ساره:اي والله صدقتي ….ليا اسبوع نترجى في امي على60جني حق شيتات مطنشتني🥲
مياسين:ضحكت وكملت قرايتها
_____________________________
بتول:انت من جدك تحكي ولا تبصر عليا!؟
ايوب:يحكي ع التالفون وميت من الحشم…..امتى في بينا بصاره حني
بتول:مصدومه….قصدي!
يعني ساره ملقيتش غيرها؟
ايوب:عقد حواجبه…..علاش خيرها البنت مرتبطه ولا فيها شي غلط
بتول:لا مش هكي لكن لكن ت اففف
ايوب:تي ادوي …..
بتول:لكن تقول عليها مش طبيعيه ديمه خايفه ومتوتره ودابها داب كتاباتها
وانت اجتماعي وعندك اسلوب في الكلام يعني مش لي بعض ابداً
ايوب:ع اساس انتي زي راجلك الكزمه 🙂
مدخلكش فينا نتصافو حني
بري شوفيلي البنت كان تقبل خلي ندير خطوه لي حياتي
بتول:بصوت متقطع من الصدمه….قصدك بتخطب؟😦
ايوب:امالا بنلعب بيها؟
خيرك بتول تقول متعرفينيش ع الدوا يلي تدوي فيها هيا !
بتول:توترت…. يعني
مش عارف اوك تمام كيف ما تبي
الصراحه مكنتش نعرف ان ساره رح تعجبك ومن ستايلك بس حاضر رح نكلمها
ايوب:احكيلها ع مواليدي وحياتي وشوفيها شن رايها وردي عليا غضوا
بتول:قلبت عيونها وهيا مبتسمه…..طبعاً بتوافق هيا وين تلاقي زيك اصلاً زين ورضا الوالدين وخي الغالي
ايوب:اخخ انتم النساوين مكتر دوتكم
طيري توا وغضوا نراجي فيك
بتول:حاضر ….هي تصبح ع خير سلملي ع ماما
سكرت الخط ولمحت سلطان يخفي في ضحكته
بتول؛قامت حاجبها…..شنو يافالح انت ضحكني معاك
سلطان:لا شي
بتول:ادوي ادوي
سلطان:كتم ضحكته…..لاريتله زي لا شي
مابعدها بنت عمي كان قبلت بيه
بتول:من زيها لو ناسبتنا وبدت حرم ايوب البشير
سلطان:تنهد وهوا يغير في قنوات التلفزيون….اي اي
اهو انا مناسبهم مريت منهم كان طول اللسان وقلة الخير
بتول؛اففففف يارب عطيني الصبر بس
سلطان:الصبر يعطيه لي ساره كان وافقت على العجل خوك بس
بتول:والله ما عجل الا انت وخوك التور
سلطان:ناضلها
بتول:ع طول نفس كل مره هربت تجررررررري لي دار النوم وسلطان وراها
سلطان:عجل صار هاذي كلمه تنقال لي راجلك؟
وربي لما نوريك عليها يا بتول
بتول:خشت لدار النوم واول ما جت بتسكر الباب الفرشه يلي تحت رجلها تسلحبت وطاحت
سلطان:بيمسكها طاح جنبها والزوز انفلقو بضحك ع بعض 😂❤️
ضحكو الاثنين وهما ع الارض كأنهم اطفال يضحكو
مصارش لا من طريحه ولا من تطويل اللسان ❤️
هكي تكون المشاكل بين اثنين قلبهم نضيف ويحبو بعض
مهما حاولو يكونو اعداء ميقدروش
الروح الحلوه تغلبهم❤️
_________________________________
طقت الساعه3في الليل✨🦋
وكل واحد لهي بي همه
ويلي معنداش هم لهي بي الحاجه الحلوه يلي عنده❤️
رقدت مريم في حضن راجلها والاثنين كانو مرتاحين ❤️
صح عقل مريم مكانش صافي ونضيف وهادي من الدوشه
لكن كانت اطمن في نفسها باش تقطع سريب الخوف وتستمتع بي حياتها
اما بتول بعد الضحك يلي صار ميبيش اي طرف منهم يتنازل ويتأسف ويرجع لي الثاني
ورقدو الاثنين ع السرير وهما عاطيين نفسهم بي الضهر
لكن مبجرد ما خداهم النوم أختفى الكبرياء
وكل واحد حضن التاني بحب ❤️
عزام:ضحك….والله شنو التفسير الغريب هاذا ؟
مياسين:راقده ع ضهرها وماسكه الكتاب …..وربي
راهو بالك تسحابني مكنتش نقرا
ماما معودتني من لما كنت سنه سادس بين الكتب
عزام:قرب منها شوفي لي عيوني وقولي شن فيهم؟
مياسين:قلبها دق وهيا تشوفله❤️
شايفه شخص طيب وحنين✨…..بس منعرفش علاش
الكل واخد عليه فكره غلط!
عزام:دقات قلبه تنسمع لبرا….وشن تاني
مياسين:شخصيتك قويه والكل معتمد عليك
بس انت تبي حد يكون قريب ليك🥺
مسكت يديه….حد يفهمك
ويحبك من قلبه بدون مصلحه 🥺✨
زادت قربت اكتر……حد يكون قريب ليك قريب لدرجة ان
عزام:زاد قرب عليها اكتر والاثنين قلوبهم عند بعض💕
كان رح يصير شي!
بس قاطعهم الباب ودقاته
عزام:اشر بيده لي مياسين بمعنى اسكتي وقرب ع الباب
زادت طقات الباب اكتر واكتر
عزام:استرجع نضرته وتلاشت علامات الحب والحنيه على وجها ….فتح الباب بهدوء
ايات:اهلين عزام🥺
عزام:احمم اء اهلين
شن منوضك الساعه3
ايات:ابتسمت….لل لا انا مرقدتش
عزام:يشوفلها ساكت ويراجي فيها تحكي ….
ايات:اممم كنت …قلت يعني بالك عزام
يعني اكيد عزام نايض
درت قهوا وقلت نحسبك شن رايك تنزل نشربو لوطه وناخد رايك في كدا حاجه
عزام:يشوف لي ايه بي استغرب …..كيف يعني علاش ؟
شنو الشي الجديد يلي طالعه بيه هوا؟
ايات:لا مش هكي بس انت عندك خبره مشاء الله في كل شي وقلت نحكي معاك وتعطيني رايك
عزام:تنهد وهوا يحرك في راسه بوجع…..ايات بري ارقدي زيك زي صغار عمك امشي
مياسين:جبدت فردة الدولاب يلي فيه المرايا وقعدت في مكانها تساوي في شعرها بدون صوت
ايات:شافت لي انعكاس المرايا ووقفت مصدومه
قلبها تقطع ومعش قدرت تحكي ولا حرف عيونها تعبو دموع وملامح وجها على طول تغيرت لي حقددددد
عزام:لاحض تغيرها المفاجئ وكيف وجها راح احمررر…..شني في!
ايات:باعت ريقها….تصبح على خير
وطلعت على طول
عزام:سكر الباب وسأل مياسين بي استغراب…..شافاتك؟
مياسين :كيف بتشوفني وانا واقفه ورا الباب
تلاقيها عصبت لانك رفضت بس ….المهم حتى انا بنرقد تصبح ع خير
عزام:مسكها من يدها….خيرك انتي انقلبتي هكي؟
مياسين:اسأل روحك
عزام:مياسين ندوي معاك اناااا
مياسين :الاحسن تخليني نمشي ولو فيه شي رح نحكيه غضوا
طلعت مياسين مخليا عزام وراها مش فاهم ليش حرجت ولا عارف كيف يتصرف
اما مياسين طلعت وهيا عارفه وفاهمه كويس ان لعبت بأعصابه صح✨❤️
معروف ديمه الراجل يحب التوتر في العلاقه ✨
ميحبش البنت يلي تعبيه حب واهتمام
لازم يحس بين فتره وفتره انك خلاص معش تبي وان بطلتي تحبيه
وقتها رح يحاول بكل جهده يسعدك ويرضيك عشان ترجعي زي قبل ✨
ثاني يوم الساعه11 الضهر❤️
ايات:يا امي خلااااص قتلك مافيا شي انا كويسه خلاص
زكيه:تي انتي عيونك منفخات واضح باكيه لين داهشه وتقوليلي مافيا شي؟؟
فاطمه:صباح الخير
زكيه:وانتي خيرك هكي!
فاطمه:خيرني!
زكيه:وجهك شاحب يا بنتي شن صايرلك
فاطمه:انا كويسه يا امي ممكن برده عاديه
زكيه:ان شاء الله خير وخلاص
ايات:ماما انا طالعه العشيه
زكيه:وين ع خير اليوم جمعه!
ايات:اريج صاحبتي اليوم فضانيتها ولا نسيتي؟
زكيه:به تو نشوف بوك
ايات:امها بتخطم عليا متعبيش بابا
بدريه:مشاء الله صاحباتك كلهم تزوجو يا ايات قعدتي غير انتي وفاطمه
زكيه:والله بناتي منعطيهمش لاي حد انا الحق
الخطاب عليهم هلبا غير نحنا مايعجبنا العجب
بدريه:ضحكت بهدوء وكملت شرب الشاهي متعها
رفيده:نزلت وهيا ماسكه سلة الملابس…..ساره ومياسين الله يهديهم وخلاص حوايجهم في كل تركينه مستحيل يرتبو الحوايج النضيفه على المسخه
وقعمزت اطبق
بدريه:انا ماكاسرتلي رقبتي الا فرخه مياسين هيا
رفيده:بلعكس البنت هاديه والله متسمعيلها صوت
زكيه:هاذا يلي تخافي منهم اصلا
بدريه:اي والله تلقيها حيه ولفعه طالعه لي امها
رفيده:تخيلي تاخديها كنه😂
ايات:شافت بشر لي رفيدة
بدري:حشااااااني امالا لي عزام الغالي!
انا حتى هدى كنت مش راضيه عليها بي اذن الله رح ناخدها سيدة بنات العيله
رفيده:ضحكت ……والله حاسه رح تاكلي كف ويجي يقولك بناخدها
بدريه:بكل ثقه….هه لا طبعا مستحيل
رفيدة:ضحكت كأنها عارفه شي
والضحكه هاذي خلت ايات تتأكد من هلبااااا حاجات
_____________________________
عزام:مسكها من يدها بقوه …..تلعبي بي اعصابي انتي ولا شنو
مياسين:شن يلي درته انا بعد يدك من عليااااا
عزام:علاش امس طلعتي هكي!
واليوم قالبه عليا بدون سبب
مياسين:فكت يدها…..بعد من عليا عزام خلاص فوتني
وجت بتطلع من الدار مسكها من رقبتها…..خيرررررررككك
شن صاير متهبلينيش وتخليني ندير حاجات غبيه
مياسين:مش انا يلي تخليني في دارك انس وتخاف على بنت عمك تشوفني
انا جيت نهدرز عليك عادي لا اكتر
بس حتى انا في النهايه بنت خالك ويلي مترضاهولهاش حتى انا مترضاهوليش
ولا هيا عندها اهل وانا لا
عزام انا مش فاسده باش تخاف ان يشوفني حد في دارك وانا مش دايره شي غلط معاك
عزام:تنهد…..انتي هكي حسبتيها مياسين!؟
مياسين:اييييي ولانك مجيتش بنت انت مش رح تحس
دارح معش رح نخشلها ولو سمحت اطلع من غرفت ساره قبل ما تجي
عزام:معش تكلميني بي الطريقه هاذي
مياسين:بنكلمك 🔥
وانا مش ايات باش تعطيها اوامر وهيا تنفد وفمها ساكت
عزام:مسكها من حنكها …..افهمي انتي مش زيها في فرق كبير
مياسين:دفاته بضربه على كتافه والله؟
وشن هوا الفرق ان شاء الله!
عزام:مياسين اهدي
مياسين:معصبه …..قوله الفرق قوووله هيا عندها اب وام وانا لا
هيا عندها……
عزام:قاطعها…..انا نحبك
وهيا اا هاذا الفرق بطلي تفكير اخييييي
انا منديرش معاك في شي غلط
مياسين:قلبها دق وكل التعصب راح من على وجها!
يلي تبيه وصلتله
بس بعدين؟؟!
شنو بيصير!
عزام:وقف يشوفلها بعد اعترافه ومياسين تشوفله بدون ولا حرف
نضرات طويله والاثنين ساكتين
لحد ما جي الصوت يلي قاطع هدوئهم
ساره:بسم الله خيركم متنحين في بعض هكي!
عزام:تلخبط وتفركس
طلع بدون ما يحكي ولا كلمه
اما مياسين كان داخلها شعور غريب!
خوف اكتر من فرح بعد ما وصلت لي هدفها!
______________________________
الساعه6العشيه:-
بتول:بي قرف…..امممم مشاء الله متغير صار
مريم:هلبااااا يابتول يجنن كيف يعامل فيا يهبل
بتول:اي ان شاء الله دوم 😒
ساره:تمسح في يديها ….شني بتول كملت الماعين شنو الموضوع؟!
بتول:ضحكت ….اي تعالي تقعمزو في التركينه
مريم:نجي معاكم؟
بتول:لا موضوع خاص😌
قعمزت ايات مع فاطمه ومريم ومياسين
وجنبهم بدريه ورفيده وزكيه ❤️
يهدرزو وكل مره يفتحو في موضوع
بتول:زي ما حكيتلك وتبي الحق خوي في العاده والله معنده ع البنات مش نشكر فيه لان خوي بس بجد هاذا الحق وانتي وراحتك سروره
ساره:ضحكت بتوتر….مش عارف صدمتيني الحق
بس انا
بتول:انتي مرتبطه؟
ساره:لالا طبعا
بتول:معجبكش ايوب؟
ساره:لا بلعكس مشاء الله عليه بجد
بتول:امالا المشكله وين
ساره:مفيش مشكله بس لو في امكانيه تقوليله ان نبي نكلمه ونتعرف عليه قبل ما يخطب او يكلم بابا
يتول:اي عادي بيك حق تطلبي الشي هاذا
خلاص بكرا نرد عليك
ساره :خدودها حمررر ….تمام🤭
كملو بتول وساره موضوعهم ورجعو للباقي يهدرزو ويضحكو وجوهم مليح❤️
رفيده وزكيه وبدريه رغم كلللل التلقيح والعراك يلي بينهم بس مستحيل يصير قطيعه او يطول الزعل اكتر من يوم
اما فاطمه بدت نفسيتها تتأثر بسبب سورة البقرة يلي كانت ع التلفزيون رفم صوتها يلي مكانش عالي
ومياسين تهدرز معاهم وبدت تنسجم اكتر لكن عزام وكلمته قاعدين في قلبها قبل عقلها وتفكر في الخطوه الجايه !
اما ايات يلي كيف روحت من فضانية صاحبتها (ع اساس)طووول الوقت تشوف لي مياسين بحقد وكره مش طبيعي 🔥
بين كل الهدرزه هاذي خش صدام وهوا معصب👌🏻
لو جي اي حد قدامه احتمال يقتله
وقف بينهم وعيونه على مريم
صدام:شني يابنت الحرام انتي يا ساقطه يلي متتحشميش على وجهك يا عزيمة الربايه يا واطيه
الكل يشوفله بصدمه ومن بينهم مريم !
مريم:تشوفله بصدمه ووقفت….ص صص صدام شن تحكي انت؟
صدام:مني الراجل يلي طلعتيله برا مبكري هااااا؟؟؟
منو يا (&؟£& يابنت الحرام
وكل بنات العيله مصدومين من كمية الشتائم الفضيعه يلي نزلت في حق مريم
اما فاطمه سكرت وذانها بيديها وادير في حركات غريبه
مريم:ع من تحكي انت خيرك انهبلت؟؟؟
صدام:ضربها كف لين طاحت ع الارض قدامهم وجي بيكمل عليها ضرب بس امه ونساوين عمه شدوه عليها
مريم:بعدت شعرها من على وجها وناضت من ع الارض
ناضت وكأنها شخص تاااااااني تشوفله واسكته في البدايه
صدام:طلع كلام الجيران صح ياحقيره معندكش كلمه ادافعي بيها ع نفسك يا حرايميه يا وسخه
بدريه:وقفت مع ولدها …..متوسخش يديك بيها يا وليدي الغالي طلقها وارتاح منها مدام طلعت عاهره وتطلع لي الرجاله
صدام:بي انفعال…….انتي طااااااااالق طاااااااااق طااااالق
الكل يشوف لي مريم مستنيينها تنهار!
لكن مريم بانت حقيقتها في الوقفه هاذي
مريم:ابتسمت …..الحمد الله يلي طلعت راجل ودرتها
كانك ع الذكر يلي طلعتله منذوب وخديت منه هاذا باش يتسمسمو اهلك
وقلبت السفره يلي فيها انواع حلو مشكل وكل الماعين يلي فيها تكسرت
كملت كلامها وهيا مش هامها…..لو مطلقتنيش توا كنت رح نطلع ولا نفكر نرجع لي واحد حقير ضعيف شخصيه زيك
شافت لي مياسين وبتول متابعه كلامها …..مش تبو تعرفو علاش هدى انتحرت؟؟؟
ولا واحد من يلي في الحوش رح يقوللكم
ان هدى كانت شغاله ليهم ولي اولادهم
ان هدى وقت يكون مزاج الواطي هاذا متعكر يخش يضربها ويطفي الدخان في ضهرها وهيا ساكته
ان يلي ماشي وجاي ينزل فيها ضرب حتى من زكيه وبدريه
وكلللللل ولاد العيله واخدين فيها حصه
ان هدى اغلب الليالي ترقد بدون عشاء عقاب ع حاجات تافها ويحبسو فيها ترقد فوق الحيط في عز النو والصقع لان معندهاش اهل يحاسبوهم
وانا ولا يمكن نزيد نساير ونافق ناس حقيره زي هكي !
خدت وشاحها وتالفونها وطلعت وصدام يعيط بهستيريا عليها وساره ساكته وتشوف لي مياسين بس !
ساكته لان معاملة العيله لي هدى انكشفت قدام بتول ومياسين 💔
زكيه وبدريه مصدومات ورفيده عرفت هلبا حاجات مكانتش تعرفهم!
طلعت مريم من الحوش مقربعه الدنيا وراها
ومبجرد ما عم الهدوء شويه وحاولو يستوعبو يلي صار ناضت فاطمه ترجع في دم وتعيط وتقول في حاجات صدمت العيله اكتر واكتر …
يتبع...
لقراءة الفصل السابع عشر اضغط على : ( رواية مجرد كارثة الفصل السابع عشر )
لقراءة باقي الفصول اضغط على : ( رواية مجرد كارثة )