القائمة الرئيسية

الصفحات

رواية مجرد كارثة الفصل الرابع عشر 14 بقلم أروى طاهر المسلاتي

رواية مجرد كارثة الحلقة الرابعة عشر 14 بقلم أروى طاهر المسلاتي
رواية مجرد كارثة الجزء الرابع عشر 14 بقلم أروى طاهر المسلاتي
رواية مجرد كارثة البارت الرابع عشر 14 بقلم أروى طاهر المسلاتي
رواية مجرد كارثة الفصل الرابع عشر 14 بقلم أروى طاهر المسلاتي

رواية مجرد كارثة الفصل الرابع عشر 14 بقلم أروى طاهر المسلاتي

هيا الدنيا هكي وقالوها ناس قبل❤️
يلي تسحتبوه موسى يطلع فرعون✨
لكن ردو بالك تحكمو على الناس من بدايات القصه
مرات فرعون نفسه يطلع فرعون ✨
____________________________
بشير:بتووول يابتووول وينك؟
بتول:ناضت من وسط البنات يلي كانو مصدومات في مريم 
نعم يابوي 
بشير:اطلعي يابنتي نبيك برا شويه 
بتول:شافت لي مريم وباقي البنات وهيا مش قادره تطلع 
تبي تكمل التقعميزه معاهم وتفهم مريم من وين كانت تعرف هدى؟
الفضول بيقتلها لكن استسلمت للامر الواقع وطلعت مع بوها 
ساره:طلعت من صمتها وتكلمت …..متحاوليش تنكري انك تعرفيها مريم ؟
لان كلام فاطمه صح هدى متلاقيتوش معاها الا يوم بيانها 
مريم:بلعت ريقها وهيا تخفي في توترها …..بسم الله خيركم هكي قريب اطلعوني انا يلي قاتلتها 
قصدي انا متزوجه صدام ولدكم ره!
ومفيش راجل ميحكيش لي مرته في كل شي وعلى كل حد في العيله
ايات:قامت حاجبها بس  هدى كانت خوافه ومتشكيش لي حد في الحوش لان عارفه شنو بيصيرلها
مياسين:ردت على ايه بقوه….علاش شنو بيصيرلها مثلا!
ايات:زادت توترت حتى هيا …..شنو !
ضحكت بتوتر ……قصدي واضح يعني محدش يقدر يشكي هكي علناً ويقول صفتهم ونعتهم 
مياسين:عقدت حواجبها…..بس اختك فاطمه ليها ساعه تشكي منهم ومخلت عليهم كلمه!
ليش هدى بس وتحديدا يلي مكانتش تقدر تقول حتى كلمه ؟
ايات:شافت لي اختها وكانت ساكته ومريم وساره مش عارفين شنو يردو عليها 
ايات:يالله عاد وانتي كان شديتي في الكلمه معش ترخيها ندوي عادي انا وصغار عمي صعبين اي وميتحملوش الدوا هيا …..عن اذنكم لان لو قعدت انا اكتر من هكي بنطلعو قاتلينها حني برسمي 
مياسين :ابتسمت….صاحب العله ينخصوه مرافقه ويلي عارف روحه مداير حاجه بروحه بروحه يحس مش لين يقولوله الناس 
ايات:وقفتلها…..شن قصدك انتي؟
مياسين:وقفت حتى هيا…..والله يلي فهمتيه اعتبريه ان قصدي
ايات:تي انتي امتى جيتي للعيله اصلا؟
امتى عرفناك وعرفتينا حتى امك كنا نسمعو بيها سمع ومشاء الله سيرتها زي المسك الله يبارك 
مياسين:عقدت حواجبها….نعم!
ايات:يلي سمعتيه 
مياسين:دفتها بي يديها الاثنين من كتافها وايات توخر ومياسين تقدم 
ايات:ضحكت بي استفزاز…..كنت نسمع بي كلام الحق وجاع لين شفته بعيني 
مياسين:معش تحكمت في اعصابها وضربتها كيف لين راسها لف👌🏻
مخلتلهاش فرصه تفكر او تتكلم او حتى تعطي ردة فعل !
شدتها من شعرها وبدت تحرك فيها بعنف بين يديها وايات تتوجع وتحاول تفك نفسها 
وزي اي شخص مياسين كانت فاقده اعصابها برسمي وضربتها برجلها ع بطنها ولما رخت راسها  رخاته بقوه لدرجة راسها ارتطم بي الارض 
من كثر هول المنضر والصدمه البنات ملحقوش يحزو بينهم !!
استوعبو الموقف لما فاقو ع صريخ ايه وهيا تمسح في الدم من خشمها وتصرخ بقوه 
التمو عليها كلهم ونزلت زكييه تجري 
تباعدت مياسين خطوات ووخرت لكن مصدومه في الشي يلي دراته لان دراته بدون وعي منها بسبب الغضب!
ركبت تجري وهيا فاهمه كويس ان فكرة وموضوع ضبت نفسها معاهم بائت بي الفشل👌🏻✨
_______________________________
بشير:وهوا يسوق ….اسمعيني يابنتي 
انا دويت مع جدهم وبوه 
انتي غلطي في تعلايت صوتك وهلبا كلام يا بنتي 
مهما كان المرا تقعد مرا ولازم تكون رزينه وعاقله ومتطلعش منها العيبه 
بغض النضر على سلطان شن داير او في شنو غلط معاك 
بتول:خدت نفس ….وعلى شنو تفاهمتو يا بوي؟
بشير:الجد والبو ميبوش الطلاق لا ليك ولا حتى لي سلفتك ولا لي بناتهم معندهمش حاجه اسمها طلاق
وانتي وراحتك تبي تكملي حياتك مع راجلك بعد الطريحه يلي كلاها باهي متبيش تقعدي في حوش بوك معززه مكرمه ومقادر واحد قاربك✨
بتول:سرحت شويه وابتسمت بشر…..مدامه رايدني ملياش الا حوش راجلي يابوي ….
لو حد سمع الكلمه هاذي بدون ما يشوف نضرة الشر في عيونها رح يفكر ان يلي قال الكلام هاذا مريم✨
____________________________
رجب:وهوا معصببب……شني القصه بدي يلي يجي يضرب ؟
كيف تخلوها تمد يدها بطريقه الهمجيه هاذي على بنت عمها وين انتم 
فاطمه:الكلبه هاذي ياجدي مقدر حد يشدها شن متوقع منها ترباية حبوس الله لا تربحها ربي يكسر يديها 
ايات:مقعمزه وتمسح في خشمها وتشوفلهم ببرائه 
زكيه:ها الوقحه الاما نركبلها….وهيا في طريقها وقفها صوت رجب 
رجب:تعالي جاي يامرا 
تو نعرف كيف نتصرف معاها محد يكلمها 
تلفت رجب وهوا عاقد حواجبه …وانت وياه لامتى هاذا ؟
مره واحد باعت مرته للعنايه 
والثاني مطلقها 
سلطان:ووجها ويديه كله كدمات …..عاجبك الحال يلي حني فيه ولا كيف؟
صدام:واقف بيتفجررر ويده مجبسه كلها ….حقي من خوتها الفاسده هادي والله ماني ساكت عليه 
سلطان:حرقاته الكلمه لكن مقدرش يرد
رجب:سكر فمك معش تقول على مرت خوك هكي يافرخ عيب 
صدام:قام حاجبه…..شن فيها زايد على مريم باش متتحمل فيها شي ؟
وبعدين هيا بدت طليقة خوي معش مرته
رجب:بتكشيخ…..الناس مقامات 
شوف مرت خوك بنت منو ويلي واخدها بنت منو وغصباً عليه يرجعها من غضوا
صدام:نصدم بي كلام جده وحرقاته وسط قلبه!…..علاش خاطبهالي كان مش عاجباتك ومش عاجبك نسبها؟
رجب:اضم فمك وتسكت …..ناقص عقاب الوقت الفروخ يناقشو في المواضيع هاذي 
تحرك لي مرتك وانت روح ارقد وغضوا من الساعه10الصبح تكون عند مرتك وتتأسف من اماليها 
سلطان:طلع وهوا متكنطي 
وصدام قعد وقت طويل سارح بخيبه 💔…وطلع 
_________________________________
طق طق طق 
ساره:مياسين مياسين افتحي انا ساره 
مياسين:فتحت الباب بي المفتاح وردت قدام المرايه تجهز في قناع تستعمله 
ساره:تشوفلها بي استغراب 
مياسين:خيرك؟
ساره:صراحه توقعتك مسكره الباب ع نفسك لانك خايفه منهم 
مياسين:ضحكت من قلبها…..اي خوف ؟😂
تي نعجنهم كلهم في بعض ونعجنك حتى انتي معاهم 
ساره:تنهدت…..يلي يقدرك ياكبدي 
طقتين خفاف والباب انفتح 
عزام:والاعصاب باينه عليه…..ساره اطلعي برا 
ساره:شافت لي مياسين وهيا مبتسمه بي استهزاء…وكانت واثقه كل الثقه ان مياسين رح ترد عليه برد يسكته سنين القدام 
مياسين:في لحضات نضرات القوه وعدم المبالاة تحولو لي برائه وخوف وعيون تلمع وتبرق برق✨
شبكت يديها في بعض بتوتر وقعدت تتكلم بخوف….عع عزام اسمعني 
عزام:عيط ع ساره…..قتلك اطلللللعي
ساره:طلعت بسرعه وهيا مصدومه من مياسين!
قالت في خاطرها ياربي شني يلي شفته؟
معقوله مياسين تكون مريضه نفسيا؟
عزام:قربع الباب……انتي شنو العار يلي درتيه لوطه؟
كيف تمدي يدك عليها بي الهمجيه هيااااا
مياسين:يا عزااااام افهمني 😩….راهم كلهم عليا مفيش حد واقف معاي كلهم 
كل وحده تلوح في كلمه وانا ساكته لين تفجرت عليها 
حط روحك مكاني مهما كانت امك سيئه مترضاش فيها شي 
قصدي يقهر الموضوع ره!!
ومعش تشوفلي هكي راهو وحق ربي خايفففففه 
عزام:كان بيفصل عليها ….لكن الحاله يلي هيا فيها سادها 
وقف يفكر شويه وهيا قدام عيونه!
كلامها صح!
وهوا عارف كويس عيلته كيف يتعاملو مع بعض ومفيش حد يرحم التاني !
والبنت مليهاش حد ويلي ماشي ويلي جاي يعاير فيها بي امها 
مياسين:التوتر ماليها….به شنو بديرلي لان ضربتها به؟
قصدي انت الوحيد يلي ممكن تسمعني شويه حتى انت بتجي عليا!
كنهاذا ردتي وين ما كنت 
بس متكونش مسؤل عليا ومشردني 
عزام:تنهد….خلاص اهدي 
معش تتعرضيلهم وتباعدي عليهم ايات نزبطها هيا واختها متع مشاكل 
مياسين:حضناته…..وربي حنين هي ومعنديش غيرك😭
عزام:كأن حد كب عليه اميه ساخنه 
ساره:فتحت الباب ….ونضرات صدمتها تكفي 😲
مياسين:باعدت من عليه وهيا ترتب في ملابسها بطريقه غريبه 
عزام:تلكمس مع بعضه ومعش عرف كيف يدير قدام ساره!
ساره:اءءء انا اسفه انا….جيت بناخد ال ضرار يلي. انا 
عزام:طلع وهيا قاعده تحاول تبرر 
مياسين:ابتسمت ع جنب وهيا سارحه 
ساره:خشت خدت تالفونها وطلعت تجري 
مياسين:حطت يديها في جيوبها ….صدقت ماما وربي 
____________________________
مريم:خيرك صدام ؟
صدام:مقعمز ع الكرسي وسارح 
مريم:يدك توجع ؟تبيني نديرلك حاجه؟
صدام:شافلها وسرح …..مريم 
بصوت هادي 
مريم:خيرك؟؟
صدام:انتي طيبه هلبا مريم !
مريم:ابتسمت….شن خلاك تقول هكي!
صدام:مريم سامحيني على هديك الليله!
مريم:بي استغراب…..اي ليله؟
شن تحكي انت!
صدام:يوم ضربتك ورميتك برا 
انا اسف 
مريم:ضحكت…..مسامح 
واضح ان الكسر اثر ع عقلك 
ربي يكسر يديهم ان شاء الله 
انا بنمشي نديرلك قهيوة روق بيها 
صدام:ابتسم وهز راسه بدون ما يحكي…
احياناً الانسان ميعرفش قيمة الشي الا لما يفقده لكن الواضح ان صدام عرفه قبل ما يفقده ويبتعد عليه❤️
_______________________________
فات نص الليل وكل حد عنده مشاغله وهمومه حتى يلي يبان مرتاح❤️
ناس تخطط وتفكر لي حياتها القدام وواكله هم عيشتها كيف رح تكون!
وهل الخطه ماشيه زي ماتبي او لا؟
زي مياسين وضرار وايات وحتى زكيه
وناس بايعتها وفي اي لحضه متوقعه انها تنكشف وتتحاسب بي اقوى عقاب!
زي ساره وفاطمه 
بدريه كانت تخمم في ولادها وعزام تم مخصوص من بياخد؟
وتدعي ربي ميلعبش جده في دماغه ويخليه ياخد شخص غلط!
اما ولاد رجب ال3 في عالم تاني 
كلهم يراجو في حصتهم من فلوس اختهم يلي خداها بوهم 
وكل الناس في روايتنا كوم❤️
وعزام كوم تاني خالص !
عايش حالة صراع داخله ….حاله صعبه لكن حلوه!
والباين انها اول خطوات الحب✨
    🔥أروىى الطـــــــــــاهرالمــــــــســـــــــلاتـــــي🔥
🔥روايــــــات بنوتــــــــة الشيــــــــخ400الف عضو🔥
ثاني يوم☀️☀️
ساره:تلم في شنطتها….متأكده متبيش تطلعي اليوم؟
مياسين:راقده ومتغطيه كويس….لا حاسه روحي مريضه 
ساره:قربت منها وحطت يدها ع راس مياسين….الحمد الله مش ساخنة 
مياسين:شن يهمك انتي بري لي قرايتك فكيني من دوشتك 
ساره:تنهدت وهيا ماله من اسلوب مياسين الصعب وخدت بعضها ونزلت 
رفيدة:والله منحب العراك والنشاف 
لكن قسماً عضماً لو انا مكان زكيه راهو ركبت وريتها 
بدريه:خليها تستاهل حتى ايات مش ساهله اشبح شنو قتلها واستفزتها 
ساره:صباح الخير 
رفيدة :صباح النور 
بدريه:بنضرات شك …..
ردي بالك يابنتي من المجرمه هاذي يلي قاعده معاك في الدار ادير فيك العمايل 
ساره:ترتب في الجبنه على الخبزه…..والله يامرت عمو يلي ميدير شي ميجيه شي 
وامس مياسين مجتش لي ايات لقتها في حالها وضربتها هكي 
بدريه….ريتي ريتي كيف لاحستلها عقلها !….ردي بالك ع بنتك 
ساره:تشوفلها بتقزز وطلعت 
رفيده:خدت نفس عميق….يستر الله وخلاص 
بدريه:والله الوضع معاد يطمن 
امس ولادي الزوز بسبب هديك الحربه واليوم بنت زكيه 
خافي ع صغارك حتى انتي 
ساره:طالعه من الحوش تسكر في شنطتها 
ضرار:استنب تو نوصلك انا 
ساره:لا بنمشي مع بابا 
ضرار:بلا جو واركبي 
ساره:ضرار خلاص باعد من عليا كرهتني في عيشتي 
ضرار؛زيدي فكري في يلي قتلك عليه 
ساره:تعيط……. قداش وليت مقرررررف ومقزز 
حرفيا ع قد ما كنت نحبك كرهتكمككككك
قالت ها الكلمه وخدت نفس عميق وشافت يمينها 
وتلقى ايوب خو بتول واقف ويتفرج عليهم الاثنين 
ايوب :خش ونضراته كلها على ضرار 🔥
كلم ساره لكن عيونه على ضرار….خيره هاذا؟
مضايقك ولا شني 
ضرار:رد بقوه……نعم ؟؟؟
انت في حوشنا وانا خوها انت منو
ايوب:شاف لي ساره وكمل كلامه…..يضايق فيك ولا شن صاير 
ضرار:تي خووووها نقولك انت يلي منو 
ايوب:بهدوء ….هني روحك خير ما تاكل طريحه زي ولاد عمك وخلي اختك في حالها
جعفر:هيا ساااره
ساره:عيونها في ايوب والزوز يتبادلو في نضرات عجيبه❤️☀️
________________________________
عزام؛فتح الباب وهوا يدور فيها بعيونه ….خيرك قاعده راقده؟
مياسين:مش قادره ننزلو وربي لما يعقو عليا بعد يلي صار امس 
عزام:يسكر في بطمة اليد متع سوريته …..نوضي البسي وقت على محاضراتك 
مياسين:لكن انا م….
عزام:نوضي قتلك انا ننزل معاك …..مش حل هاذا قرايتك قاعده اضيع منك
مياسين:ابتسمت….اوكي 
ناضت:ولما وقفت بان انها لابسه شورت وعزام طلع طول 
سكر الباب 
وقلبه يدق ✨
سكر عيونه شويه واستغفر ربي اكتر من مره وطلع 
__________________________
المؤذون:وبي هكي ياولدي تكون رديت زوجتك على سنة الله ورسولك 
تريثو ياولدي تريثو راهو ابغض الحلال عند الله الطلاق الحكايه مش لعب والطلاق مش على اتفه شي يصير سلم ولدي 
سلطان؛مش عاجبه وتعابير وجها مضايقه…..ان شاءالله ياشيخ 
رجب:نوض لمرتك يالله نوض 
سلطان:ناض من مكانه لي حوشه وفي راسه الف قكره وقكره 
________________________________
عكس الاماكن يلي نشوفو فيها في المسلسلات…..
مكانش في ضباب ولا دخان ولا مبخره 
كان حوش عربي قدييييم وبسيط 
مقعمزه مرا في ال50منً عمرها وواضح من لهجتها انها مش ليبيه!
ايات:حبيبتي اشرحيلي اكتر راهو والله ما فهمت 
البنت:عصبت …..انت ما تفهم ولا ايش؟
خوذي الخلطه هاذي وحطها تحت المخده مالها 
ايات:به؟
البنت؛وهاذا اميه رشها في العتبه
ايات:بس خايفه يتخطاها حد تانيه هيا ساكنه معاي في نفس الحوش 
البنت:غرفتها 
ايات:سكتت شويه…..اي ممكن !
البنت:هاذا اول جزء وبعدين نكمل الباقي هاتي يلي متفقين عليه 
ايات:اخ يا عمتي نجميه اصبري عليا شويه على الاقل خلي نجرب 
البنت:هيييي ردي كل اشي مكانه لو بطلتي 
ايات:لالا خلاص خلاص 
ما بطلت ولا شي افففف 
وطلعت من الشنطه سلسله ذهب وحطتها على الطارله وطلعت مبتعده بسرعه 
_____________________________
في السياره:-
مياسين:تشوف لي عزام بحب❤️
وعزام حاس لكن مش مبادلها بي شي 
مياسين:عزام امتى بتركب غرفتي ؟
عزام:تو نشوفهم اليوم 
مياسين :سكتت والبسمه شاقه وجها✨
عزام:بخصوص اللقطه يلي درتيها امس قدام ساره 
مياسين انا مش هكي 
اهدي وابري وديري العقل انا وصي عليك بطلي حركات المراهقين يلي اديري فيها هادي 
مياسين:بس انا مكان في نيتي شي عزام!🥺
اسفه لكن وربي اءء….افففف 
حطت يديها ع وجها….انا غبيه اسفه اعتبرتك شي و 
اسفه 
عزام:شن قصدك!
مياسين:اتجهت اي الروشن …..شي انسى 
عزام:درس يمين وهوا مصر على سوؤاله كأن يراجي في اجابه ترضي قلبه!…..شن تدوي ؟
مياسين:عزام مقصدي شي انا اعتبرتك زي خوي حتى حضن امس مقصدي بيه شي حضنتك من فرحتي بس انا 
واسفه خلاص 
عزام:مركز في تفاصيلها 
مياسين:بي ارتباك …..شنو؟ 
عزام:قرب شويه عليها…ورجع للخلف بسرعه وحرك السياره 
مياسين:شافت لي الروشن وهيا تقول ….ووصلنا لمرحلة التوتر👌🏻
____________________________
سلطان:جنيتي على نفسك يوم قررتي ترجعي لي ها الحوش  يابتول شهاده من ربي لما نكرهك في عيشتك
بتول:تصب في القهوا …..بالله برا شوف شكلك في المرايا بعدين تعال هدد 
سلطان:تمام يا بتول الحنيه يلي كانت عندي معاد شايفه ربعها 
بتول:خدت رشفه من الفنجان…..حني بيها رجليك 
معش تلزمني 
سلطان؛مسك التحفه بلي جنبه وحدفها ع طول يده وجت مكسره طروف 
الساعه4ونص ✨
عزام:خش على العيله وهوا يحكي لي امه….وتيلي عشي اليوم جايني ولد 
بدريه:وين كنت ادور بيها هادي اقسم بالله تشوفها زكيه لما تقددها
مياسين:وقفت ورا عزام بي ارتباك وخوف 
عزام:شافلها بحنيه….اركبي انتي توا 
مياسين:همستله….بعد شوي بنجيك نبيك شوي 
عزام؛هز راسه بمعنى تمام 
_________________________
كانت فيه اصوات مرتفعه وحقائق شويه شويه بدت تبان❤️
بس بعض ادوشه مكانتش ليها صوت زي مريم مثلاً 
يلي كانت سارحه من لما زلق لسانها وهيا في عالم تاني تذكر في شوية تفاصيل✨
هدى:مبتسمه…..هوا كل حياتي❤️
حاسه ربي عوضني فيه بدل ماما وبابا الله يرحمهم 
هدى:والخوف ماليها……معش قادره نتحمل انا نتمنى لو نموووت من ربي خلاص تعبت 
هدى:كل يلي صاير فيا لاني نعرف كل شي بس 
انا نتهيت حرفياً خلاص معش نبي من الدنيا شي 
_______________________________
ساره:اطلللللللللع اطلع كرهتك ياحقير 
ما سد القصه يلي حطيتني فيها والجريمه يلي خليتني نرتكبها 
ما سد جاي تبي اطبق نفس يلي درته مع هدى لي مياسين 
ضرار:ضمي فممممك وطي صوتك انا مدرت شي 
ساره:الابتزاز متعك ياواطي 
وربي لو نتأكد ان هدى نتحرت بسبب ابتزازك ليها عشان ذهبها وفلوسها لما نفضحك 
جاي طامع في مياسين تسحابها بتخاف منك وربي لما تفرمك فرم يا حقيررررر يا …..
ضرار:شكراها فمها بغللللل…..كأنها لحضة غضب ويحاول يقتلها 
كانت ساره تفرفش تحته بتموت وهوا الغضب مسيطر عليه 
لين خلاص…
يتبع...
لقراءة الفصل الخامس عشر اضغط على : ( رواية مجرد كارثة الفصل الخامس عشر )
لقراءة باقي الفصول اضغط على : ( رواية مجرد كارثة )
reaction:

تعليقات

تعليق واحد
إرسال تعليق
  1. رواااية رااائعة
    احسنتي النشر الكاتبة أروى الطاهر المسلاتي

    ردحذف

إرسال تعليق

ستصدر قريبًا على مدونة يوتوبيا رواية المتداول التي تم طلبها مِنا كثيرًا وهي أول رواية مصرية تدور أحداثها حول تداول الـ فوركس والعملات ستتعلم من خلالها تداول العملات بأقل خسائر مُمكنه وكيف يُمكنك الربح من خلال شراء وبيع العقارات رواية بإمكانها تعليمك كيفية الربح من تداول الذهب والعملات والفوركس كيف يُمكن لشخصًا في بداية حياته مثل (عيسى) في الرواية أن يُحقق ثروة مالية كبيرة فى مدة قصيرة.