رواية حرب الملايكة الجزء الثاني والعشرون 22 بقلم أروى طاهر المسلاتي
رواية حرب الملايكة الحلقة الثانية والعشرون 22 بقلم أروى طاهر المسلاتي
رواية حرب الملايكة البارت الثاني والعشرون 22 بقلم أروى طاهر المسلاتي
 |
| رواية حرب الملايكة الفصل الثاني والعشرون 22 بقلم أروى طاهر المسلاتي |
رواية حرب الملايكة الفصل الثاني والعشرون 22 بقلم أروى طاهر المسلاتي
عدي:بي عيون ذابله قرب ع فمها يسأل وتعابير وجها اطير عقل اي حد يوقف قدامه!.....شن يلي مانعك فهميني
ليان:قلبها بيطلع منها ....حاولت ادفع بس كل محاوله تخلي فيه يثبت فيها اكتر ❤️🔥
ليان:اءء انا
عدي:قرب ع فمها اكتر....اي !!!
ليان:نفسها يطلع بسرعة رهيبه....اءء انا
عدي:خطف منها بوسة لكن بسرعة ما باعداته!
ليان:عدي لا....
عدي:يحاول يفهم بنضراته....علاش!!
ليان:لان لا
مستحيل الشي هاذا منقدرش
عدي :مسكها من كتافها...السبببب عطيني سبب واحد يخليك ترفضي !
انا قتلك نديرلك كل شي وكللل شي يبدا تحت امرك انتي !
كل شي يبدا بي اسمك!!
تبدي انتي يلي تحكمي وتطلقي !
قرب يحاول يحضنها ....خليني نرجعلك كل لحضة حنان عطيتيهولي وحني صغار
ليان:نزلت يديه من على خصرها.....صغار صغار صغار خلاااااااص
ياسر الماضي يلي عندك اجتازه عددددي خلاص
كنا صغار حني كنا ملائكة
عدي:حط يديه في جيوبه ورجع خطوتين لتالي 💔...شافلها بكسرة خاطر والف سؤال في عيونه
ليان:زي قبل !
قربت عليه اتكلمت والرجفة في صوتها....معنديش حد!
افهمها عدي ملياش غيرك
خلينا زي قبل
دير بالك عليا كأني اختك الصغيره واحميني من هلبااا ناس بس
عدي:لمعت عيونه كأنهم دموع!
ليان:سيباته ورجعت خشت
اما عدي:سكر عيونه ثواني وهوا قايم راسه فوق ...خدي نفس عميق ورجع فتح عيونه ورجعت نضرته زي قبل!
_____________________________________
ناهد:مدت السفرة....هي تفضل
ضياء:مسك منها السفره وهوا سارح فيها❤️
ناهد:تحكي بجديه....يلي ع اليسار بدون سكر ويلي ع اليمين سكرهم وسط باهي؟؟
ضياء:قتلك انا؟
ناهد:قرنت حواجبها....ع شنو؟!
ضياء:انك سكرة حياتي؟
ناهد:ضحكت....ضيااااء مش وقته 🙈
طلال:احمممم
ضياء:رجع نضرت عيونه زي قبل وهوا ماسك السفرة
بنبرة جافه تكلم ....كلميهم يجيبو الميه
ناهد:نزلت عيونها...حاضر
مشي ضياء وقعد طلال يشوف لي ناهد بنضرات حاقده
ناهد:من اول نضرة انتبهت لي خوها...شنو؟
طلال:يساوي في نضراته....لا لبسك ذبله ولا قري عليك فاتحة اهدي وابري ومفيش داعي ليه الجو هوا احسن ما ندف يبرا وميصيرش منه
ناهد:قلبها طاح من كلام خوها!...كأنها حست انها بتفقد شي غالي عليها.....مدرت شي عطيته السفرة بس
طلال:كلمة تانيه وربي معاد تحلمي لا عرس ولا خطوبه ولا عينك
ناهد:تعبت عيونها دموع....علاش؟!
فهمني انت علاش هكي ادير شنو درتلك انا شادها في جرتي
انت تعرف كويس اني مش متع دوة فارغه ويوم نبي انسان وهوا كان كويس وجي بيخطب طول هكي ادير فيا؟؟؟كل شويه تهدد مكأنيش اختك؟
طلال:خلاص اماله مدام لسان طويل هكي كان بوي وافق خودي شن تبي
ناهد:قلبها انحرق .....عل.....
قاطع كلامها صوت عدي وهوا يقول ...
عدي:القصة مش بكيفك ولا بكيف بوك !
اهدى انت ودير العقل خير ما ندفنك في ارضك سامع؟
طلال:بانت على وجها معالم الخوف...كأنه يعرف شي!
يعرف شي وساكت عليه خايف ميبيش يحكيه..
ناهد:خشت للحوش وهيا مبتسمة والراحة ماليه قلبها
مفيش حد يقدر يقطع نصيبها مع ضياء مدام عدي راضي !❤️
__________________________________
جت الساعة 11في الليل✨
وطق باب منى❤️
متلهفتش زي العاده ولا قلبها رفرف من سعادتها زي كل مره!
ناضت من السرير كأنها ميته جسد بدون روح 💔
طلعت من الغرفة واستندت على الحيط وهيا تشوف لي عدي خاش من الباب
عدي:استغرب!؟....كانت منى اول ما تشوفه تجررري وتحضنه ويبدا يدف فيها ويبعد فيها من عليه!
منى:اهلين
عدي:ينحي في جاكيته ...حناي توفت
هاذا باش معش جيت
منى:قريب تسكر شهر عدي؟
عدي:بدون صبر...اياااااه علينا بنبدو تو في النكد عاد
منى:سكتت وهيا تشوفله بخيبة امل 💔
عدي:مدايره عشي؟!
منى:لا
عدي:ديريلي حاجه ناكلها
منى:مريضة مش قادره نوقف
عدي:عقد حواجبه وهوا يشوفلها.....البسي نعاينك
منى:مش لدرجة نعاين عادي
عدي:وتوا شنو؟
منى؛شي
عدي:وقف وهوا يلبس في جاكيته....الباين ان الليله مش فايته من بدايتها
وقرب على عتبة الباب وهوا عاطي بي الضهر ...فتح الباب ووقفاته كلمتها
منى:نبي نطلق💔
عدي:تلفت يشوفلها.....ضحك بهزوة
شني...؟؟
منى:نبي نطلق!
مليت من العيشه هاذي وخلاص تقدر تعيش حياتك معش تربط روحك بيا كفيت ووفيت
عدي:بتعابير وجه معصبة ومصدومه...شن الدوا يلي تقولي فيها انتي !؟
منى:دوتي واضحه عدي ابعتلي ورقة طلاقي
وتكون كريم لو خليتلي الشقه الصغيره هاذي
معتقدش تساوي شي في بحر املاكك ....ورجعت لي غرفة نومها ...
قعد عدي واقف سارح فترة ...شن يلي غير منى لهدرجة؟!
تطلب في الطلاق وهيا مرتاحة وبدون اي تعابير وجه!!؟
🔥رويـــــــات بنـــــوتـــة الــشـــيخ🔥
🔥أروى الطـــــــاهـــــر المسلاتي🔥
👑القروب الاصلي400الف عضو👑
فات على موت مريم اسبوع بس وصدمهم عدي بي الخبر!
نجيب:شن تقول عدي؟؟
يلي ماتت امي ره مش قطوس
كيف مر على وفاتها اسبوع بس وتبيني نزوج بنتي وندير عرس حتى الناس شنو تبيهم يقولو عليا!!؟
عدي:حتى الرسول قال الحزن 3ايام بس
انت اختار لو وافقت بنتك مينقصها شي وتتزوج معززه مكرمة
بترفض لاصاير من عرس ولا خطبة لا توا ولا بعدين!
وانا نعرف ضياء صاحبي الحاجة لو متكونش ليه مستحيل ياخدها غيره!
يعني بنتك بتقعدلك في الرقبه ياعمي
نجيب:سكت وهوا فاهم كويس شنو يحكي عدي ولي شنو يهدد!
عدي:ها شنو قلت؟
نجيب:خلي ع الاقل يفوت 40يوم على وفاتها
عدي:بعد اسبوع متفقين يوم واحد بس سادنا ....ناض وقف
ربي يتمم ع الخير ان شاء الله .....
كانت هاذا الكلام بين عدي واب ناهد!
صدمهم بموعد العرس ومفيش حد فاهم السبب ؟
بس مع هاذا مفيش حد يقدر يرفض لان ببساطة عدي يملك كل شي !
والدنيا هاذي بدت مع يلي عنده فلوس وبس✨
____________________________
بدت تحضيرات العرس والكل مشغول ....
جيداء ونجيب يجهزو ومتحشمين من الناس يلي بتاكل وجهم يوم الفرح!💔
وناهد طايره فرححح اخيرا بتنزف لي حبيب قلبها❤️
بس كل ما تشوف امها وبوها مضايقين تتأثر💔
وطلال خوها يلي مكانش راضي ع الزواجة كلها ويدور مشاكل كوم ثاني
من بين كللللل هاذي الضجة في عيون صغيره تراقب وتتمنى!💔
ليان:تتمنى بدون ما تحقق وتشوف في كل شي مستحيل✨
تراقب في فرحة ناهد وتتمنى تعيش الشعور لكن عارفه مستحيل في يوم تكون مكانها!💔
كل ما تشوف عدي يلي يعامل فيها بجفاف قلبها يتقطع
حباته ومتقدرش تكون معاه!💔
ولا قادره تعترفله بكل شي واطيح من عينه
مكانش ليها ذنب في شي
لكن حني في مجتمع مفيش يما ارحميني
لحضات عابره اذكرت فيها حياتها وايامها مع خالتها..
اذكرت كل الحاجات والعلاقات البشعة يلي مرت فيها!
جيداء :ليااان؟؟ليااان
ليان:هاا😨
جيداء:وبن سارحة؟!...اطلعي جيبي باقي الماعين مع البنات
ليان:تت تمام
جيداء:تنهدت وهيا تشوف لي ناهد بحزن
ناهد:تضفر في شعرها....ميبوش يجو عشان حناي كيف متوفيه صح؟
جيداء:معليشي يلي بيجي على سلامته ويلي ميبيش براحته
ناهد:التسمت برضا وكملت لبس البودري❤️
ليان:دخلت الطناجر الكبار وهيا تضحك مع بنات الجيران يلي كانو اصغر من عمرها ❤️
وكان عدي واقف مولع دخانه من بعيد يتفرج!....فرح كبير بعد اسبوع بس من وفاة اكتر الناس يلي جرحاته وجرحت طفولته🔥
كأنه مسداش الانتقام وهيا حيه!!
زادها حتى وهيا ميته ومحترمش الحزن يلي مفروض يديروه اولادها!
كأنه يوري فيها ....شفتي بي فلوسي شنو درت؟؟؟
شفتي كيف خليت صغارك يبيعوك !!
طلعت ليان ماسكة صندوق المشروب في يدها وتشوف لي ولد الجيران الصغير يلي كان يجري حواليها ويلعب مع الصغار❤️....تفضل
قالو هاذا للغدى كان نقصو عليكم
عدي:خداه منها ....تمام
ليان:مسكت يده قبل ما يركب السياره....
عدي:شافلها بي استغراب
ليان:احكيلي خيرك؟
عدي:خيرني في شنو ؟
ليان:لمعت عيونها....تعامل فيا اخي مش زي قبل علاش؟
عدي:ابتسم بجفاف ...انتي تتوهمي
نحيي خلي نرفع المشروب
ليان:عدي استاحشت نحكي معاك!
عدي:ليان مش وقتك بعدي من عليا
ليان:نزلت يديها وهيا تشوفله بصدمة على اسلوبه معاها
عدي:جي بيركب السياره لكن مقدرش💔
بيعطيها بي الضهر لكن رجعلها.....هاذا اسلوبي ليان
ليان:بس انت مكنتش هكي!🥺💔
عدي:منعاملكش بي اسلوب اني نحبك وانتي رافضة
سكري امه الموضوع ومعش نبيه ينفتح وارضي بي الموجود سامعة!
ليان:تعبو عيونها دموع....عدي
عدي:تنهد....شنو؟
ليان:نبي لكن منقدرش💔💔
عدي:رجعت اللهفة لي قلبه❤️....ككيف؟؟؟
ليان:بصوت واطي ودموع ينزلو....منقدرش💔
عدي:يشوفلها واللهفة عليها سابقة صوته ...علاش
ليان:منقدرش وبس 💔
عدي:لعند امتى؟!
ليان:طول حياتي 💔...وسيباته
طلعت للحمام طول والخنقة قاتلتها💔
خشت بكت من وسط قلبها وتحسبت في خالتها الالف المرات💔
وسط كل شهقة من بكاها كانت تطلع دعوه وقلبها موجوع!
_______________________________
يبدا الانسان حياته بورقه....تتسمى شهادة ميلاد!
وتنتهي بورقه ....تتسمى شهادة وفاة
لكن في ورقة تنهي حب !
وتنهي حياة طرفين والاثنين عايشين!...تتسمى ورقة طلاق!
نفس الورقة يلي وصلت لي منى بزبط💔
مسكتها منى بيدين يرجفو وقلب مقبوض!💔
شافتها وتمعنت فيها كوووويس
كل كلمة قرتها الف مره وشافت لي التاريخ مئات المرات
سكرت عيونها وطلعت صرخة من وسط قلبها كانت داخلها سننننننين !
بكت وبكت وبكت بي الصوت لبن فشت كل غلها وارتاحت
قعمزت ع الارض وحطت راسها على الكنبة وغمضت عيونها عشان تخش في نومة عمييييقة ليها هلباااا عليها✨✨
_______________________________
فات يوم الغدا على خير ✨
وعدد الحضور كان شووووية لان باقي العيله محضروش بسبب الموته !
ويلي كان يسمع بي العرس يعيب عليهم!💔
كانت ناهد راقده ويديها ورجليها محنيات غارقه في تفكيرها...
من يوم العرس وضياء معش اتصل!
وتتصل بيه ميردش شنو يلي صاير؟؟؟
كل يوم يفوت عليها خايفه اكتر من اليوم يلي قبله 💔
كانت ناهد تصبر في روحها وتتأمل ان كل شي رح يتغير للاحسن رغم كل الضروف البشعة يلي هيا فيها...
اما ليان تشجعت لي دقايق وبدت تفكر هل فيه حل يخليها تقدر توافق على عدي يلي سرق قلبها؟
كانو دقايق
دقايق بس وسكرت الموضوع مع نفسها بعد ما عرفت ان حرفياااً مفيش حل....
🔥رويـــــــات بنـــــوتـــة الــشـــيخ🔥
🔥أروى الطـــــــاهـــــر المسلاتي🔥
👑القروب الاصلي400الف عضو👑
بسرعة ما فاتت الساعات....
كأنهم دقايق ومرت عادي....
بسرعة ما فاتو الشهور على موت ساره ونسوها خلاص...
كل حد يفكر في نفسه توا!!!
كل حد يبي يعيش احسن من التاني!
كل حد يبي يحب ويتحب
مقعمزه ناهد على الكوشة وقلبها قابضها...
ضياء وين؟؟؟؟
علاش ميردش ومحكاش معاها؟؟؟
مسكت الباقة بغل وهيا تذكر في كلام بوها قبل شهر
نجيب:راهو الولد من دار الرعايه
ناهد:ضياء؟!😨
نجيب:اي ....يعني معنداش اهل وخش للحبس تعرف على عدي لانه ضرب ولد بي السياره وامالي الولد مبوش يعطوه التنازل
ها شنو موافقه؟!
ناهد:هزت راسها بي اي بدون تفكير❤️
ناهد:تبتسم للمعازيم وقلبها بيطيح من الخوف
عقلها يجيبلها في افكار....لو تخلى عليك اليوم؟!
هوا عادي معنداش شي يخسره في النهايه ولا حتى عنده اهل يحكمو فيه ناهد؟؟؟؟
كيف بندير💔💔💔💔💔💔
وسط كلامها مع دماغها والتخاريف هاذي قاطعتها اغنية
بسم الله على قلبك❤️
وشافت حواليها كل الموجودين يتغطوو
وقفت وهيا تشوف للباب ....هوااا؟؟؟؟
وقلبها كأنه جمره وحطوه في اميه لما شافاته خاش والبسمة معبيه وجها❤️
قعمزت لان رجليها معش حملوها خلاص✨
ركب للكوشه ومسكلها يدها وهوا يقول...عارفك معصبة
لكن وربي مفي واحد من الشباب حن عليا وعطاني تالفونه حتى بعد الفاتحة ...انتقاااام داروه
ناهد:وبدون اي سبب بدت تبكي
ضياء:له له له😯خيرها عروستي
ناهد:تأشرله بيدها بمعنى شيي
_______________________________
ليان:لابسه عبايتها وواقفه فم باب الصالة وهيا تشوفلهم كيف ضياء يركب فيها بشويه لي السياره❤️
تتفرج وتبتسم✨
ركبت مع طلال هيا وجيداء وروحو للحوش بعد ما خلاص كملو كلللل شي والحفلة تمت على خير
عدي:وقف قدام المرش وهوا يشوف لي رفيق عمره يلي يااااما تخطو الف مشكله ومشكله مع بعض!
ضياء:ابتسم....شنو
عدي:كان في قلبه هلبااااااا كلام بيحكيه!!
لكن اكتفى بي ابتسامه وقال....ربي يهنيك
ضياء:ردله نفس الابتسامه وعيونه تلمع❤️ودارله كلاكس وطلع ....
خذت جيداء تركينه بروحها تبكي على بنتها الوحيده يلي سيبتها وتزوجت في ضروف سيئة
وعلى الكلام يلي ينقال عليهم من الناس بسبب العرس يلي داروه!
اما ليان مكانش في حد غيرها في القصر الكئيب يلي اغلب سكانه توفو او رموهم في الشارع!💔
بدلت ملابسها وبدت تحاول ترتب الفوضى متع العرس !
_________________________________
منى:سمعت الباب طق مرتين ووقف
ناضت تشوف منو بس لقت ورقه ع الارض !....واضح ان في حد دخلها من تحت الباب ....فتحتها وكان مكتوب فيها ❤️
سمعت بي خبر طلاقك وعارفك في العدة حاليا
كل يوم بنشوف تحت بابك اكتبيلي كل النواقص يلي تبيها وخلي الورقه تحت الباب ...نادر
منى:ابتسمت وحست بشعور زي....بداية جديدة مثلا!✨
_________________________________
ليان:شافت من روشن غرفة الضيوف سيارات شرطه وتيوتات مدرسين!
وسمعت صوت عراك بين الغفير متع القصر وبين الناس اصحاب السيارات هاذم!
بسرعة دخلت لي غرفة عدي وقلبها بيطلع منها .....عدي جاييين ناس لوطه م.....
عدي:يجهز في شنطه....عارف
ليان:علاش العراك؟
ومنو هاذم
عدي:مقامش عيونه فيها ابدا وهوا يرتب في اغراضه....بنرجع مكاني يلي جيت منه
ليان:عقدت حواجبها...وين؟!
عدي:قام عيونه وابتسم ع جنب....وين كنت قبل ما نجي؟
ليان:توسعو عيونها بصدمة...الحبس؟؟
عدي:لبس الشنطة وجي بيطلع
ليان:مسكاته بقوووه من يدها وتحاول ادخله...لا عدييييي خليييييك💔💔💔
عدي:يشوف لي عيونها...مفيش مكان
مفيش مكان ليا هنايا لا بين الناس ولا عائلة ولا حتى معاك انتي
ليان:منقدرش😭💔
عدي:مسح ع خدها....نفس قبل سنين فاتو كنتي كل شي ليا وقاعده
لكن معنديش مكان هنايا
وصوت العياط برا يعلى اكتر واكتر.....
ليان:بي نضرة حادة ودموعها ينزلو....تبي تعرف علاش منقدرش نكون معاك؟؟؟؟
عدي:قبل حتى ما يجاوب بدت ليان تتكلم .....
ليان:لاني مش بنت💔
شرفي ضاع من بداية عمري مع خالتي
دخلتني على حاجات ورررررربي ما كنت نعرف انها حرام وربييييي
هااا؟
ترضى بي وحده هكي لا اكيددددد💔💔💔
عدي؛واقف يشوفلها ومصدوم
قبل اي كلمة سمع باب الحوش انفتح وخشو سحبوه وكلبشو يديه وهوا يشوفلها ونجيب يحاول يهديهم 💔
اما نضرات طلال كانت منتصره!
اخيرا قدر يجمع كل الادله ويقدمهم للمحكمة يلي ليها سنين مسكره!
___________________________________
مسك يديها وهوا يشوفلها وقال !
ضياء:رغم كل ذنوبي وسيئاتي يلي درتها ربي بعتلي هديه
ممكن ربي بعتلي الهديه هاذي باش نتوب على كلللل شي اخي درته في حياتي ❤️
الهديه هاذي انتي ✨....وصدقيني حاجه من ربي بنحافظ عليها لاخر يوم في عمري ❤️
ناهد:نزلت عيونها ومسكت يديه بضغط اكتر.....منخليكش لاخر يوم في عمري ❤️
___________________________________
كانت حرب ملائكة وهما صغار !
وبدت حرب شياطن لما كبرو....
طلال رجع عمامه الاثنين وصغارهم للقصر
ورجع لم العيله من اول وجديد بس المره هادي بدون عدي يلي كان متهم بي قضية قتل واكتر من قضية تهريب ونصب 💔
اللوم على منو؟
طفولته؟
عيلته؟
ولا انتقامه!....
كملو حياتهم لكن في رعب!
شبح عدي كان محاصرهم وفي اي لحضة يتوقعوه يرجع ويوريهم الويل
خلاهم ميتهنوش بحياتهم حتى وهوا مهناش ؟
شهرين بزبط..60يوم مسكرات وليان اختفت
معش حد شافها ولا سمع عليها شي !
وعدي معش ليه اثر في الحبس!...وين اختفى قبل محاكمته بي اسبوع؟
محدش يعرف
عدي سيب كلللل ممتلكاته واختفى زي اختفاء ليان بزبط
كأنه اكتفى بي شي واحد؟
لكن محدش يعلم لعند هاذي الساعه؟!
هما مع بعض؟
كيف حياتهم؟؟
تحاسبو على اغلاطهم ولا تعوضو على حياتهم التعيسه يلي عاشوها؟....مش معروف
لكن واضح من الاختفاء يلي بدون رجعة للاثنين ان في مستقبل احسن من الماضي
وفي قلب احمر 🥺❤️
مش يقولو ان مهما تعبتي ربي يعوضك؟
ومرات انتي تبي حاجه ربي يبعتلك يلي احسن منها؟؟؟
شوفي بعينك كيف منى خداها نادر❤️
ويخاف عليها من نسمة الهواء عكس عدي!!
لولا تجربة عدي الفاشله ويلي كسرتها
مكانتش رح تقابل نادر ويسندها❤️
يعني كل شي ربي مرتبله اسبابه❤️
اما ناهد وضياء
كانو احسن مثال لي كلمتي (الحب في كل مكان بس انتي دوري واختاري صح❤️)....حقيقه بدون اضافات مبالغ فيها
لقراءة باقي الفصول اضغط على (رواية حرب الملايكة)