القائمة الرئيسية

الصفحات

رواية عائلات راقيه بفسادها الفصل الواحد والثلاثون 31 بقلم اروى طاهر المسلاتي

 رواية عائلات راقيه بفسادها الفصل الواحد والثلاثون 31 بقلم اروى طاهر المسلاتي

رواية عائلات راقيه بفسادها البارت الواحد والثلاثون

رواية عائلات راقيه بفسادها الفصل الواحد والثلاثون 31 بقلم اروى طاهر المسلاتي


رواية عائلات راقيه بفسادها الجزء الواحد والثلاثون 

#عائلات_راقيه_بفسادها31والاخيره

سلام:عقد حواجبه....ع ذكر صدام
مش حبيبك كيف تخليه هكي؟
جنان:نخليه ؟؟
اسلام:اي
طيارته بعد ....شاف لي الساعه
ساعه ونص تتخلي عليه معقوله
جنان:ع عع علاش هوا مسافر!!
اسلام:انصدم...مقالكش هوا!
رد بصوت واطي ....اسلام يا غببببي
جنان:علاش بيسافر!!!
اسلام:اءء انا بالك ملخبط مش م....
جنان:مسكاته من يده...علاااااش بيسافر خيره
اسلام احكككككي الله يخليك
اسلام:تنهد .....سمعت من ارسولان ان صدام طلع فيه ورم في راسه
بيطلع يدير عمليه بعد ماتسلف حقها وتسلف حتى من امير خوي
جنان:حست الدنيا ادور بيها ....ورم ؟؟في راسه؟؟
اسلام:اي سمعت ان نسبة نجاح العمليه مش هلبا والله اعلم
متخافيش ان شاء الله يرجع بسلامه
جنان:كمية الصدمه يلي حصلتهااا خلتها معش قادره تفكر في شي !....في اي مطار؟؟
اسلام:والله بكري شفت ارسولان طالع بيوصله قالي مطار معيتيقه مش بعيد
جنان:مسكت شنطتها وطلعت تجري تحت المطر 💔
ركبت سيارتها واسلام ينادي فيها بس ما اهتمتش
مشت بي اقصى سرعتها وطول الطريق تبكي بحرقه💔
كلامه ليها مكانش صح
كان خايف يموت وقلبها متعلق فيك !!
حاس ان نهايته قربت وميبيش يحرق قلبها💔💔
كان يبيها تتأثر شويه بعد ما تعرف انه حقير بس بعدين خلاص ترجع لي حياتها الطبيعيه💔
ميبيش يموت ويقعد قلبها معاه حتى وهوا تحت التراب!!

_________________________________

ماريا:تحبني ارسولان؟
ارسولان:مجاوبش وكمل يمسحلها
ماريا:انت جديات خطبتني ؟
ارسولان:هز راسه بمعنى اي
ماريا:علاش!!
ارسولان:مسح قطرات الميه يلي كانت ع رموشها وباسها بدون ما يحكي❤️🔥🔥
بعد عليها بتدريج وعيونه في عيونها
ماريا:نطقت بصوت هاااادي....علاش خليتني نفكر انك كذبت!!
ارسولان:كنت متعصب منك وقتها
خليتيني نطلع عن طوري ونقول كلام مش مفهوم
وغلط ينقال
ماريا:ابتسمت....يعني تحبني
ارسولا:زاد قرب منها وهز راسه بمعنى اي
ماريا:تموت فيا!!
ارسولان:هز راسه يمين يسار وبتعابير وجه بمعنى ....يعني
مش اوي هلبا
ماريا:خبطاته ع كتفه .....شنو مش اوي هلبا متعك هيا
ارسولان:ضحك وحضنها
ماريا:بادلاته الحضن بقووووه ❤️❤️
ارسولان:بعد من عليها شويه ....موافقه تعيشي معاي تحت اي ضرف كان!؟
ماريا:بحماس.....اي
ارسولان:مسح على شعرها .....توعديني تتحملي طبعي وتسمعي كلامي
ماريا:نخلعت من صوت الرعد يلي سمعاته وكانت رح تعيط وتفضحهم
بس ارسولان ع طول سكر فمها بيده
ارسولان:بعد يده بهدوء وهوا يشوفلها
ماريا:اي نوعدك
ارسولان:ابتسم.....خودي المضله هيا وروحي بسرعه بدلي حوايجك الدنيا صقع
ماريا:دفنت نفسها في حضنه❤️
ارسولان:ايااااه علينا عاد تجري فيا لي حجات منبيهاش تصير بس
ماريا:ضحكت وهيا في حضنه ....صقعانه شويتين
ارسولان:سكر عليها الجاكيت وهيا في حضنه وقعد لاف عليها يديه الزوز❤️

_______________________________

امير:بدون استغباء هبه
هبه:شن تحكي ؟؟؟
امير:رجع شعره للخلف بتوتر وهوا مش عارف كيف ينطقها
اءء انتي
هبه:شنو؟
امير:يلي انتي
هبه:شني؟؟؟
امير:حاول يهدا قبل مايفصل عليها.....علاش فسختي ؟
هبه:قلبها يدق ....مكانش يعرف ان عندي السكر
امير:بس؟؟؟
هاذا هوا السبب يعني ؟
هبه:اي
امير:وهوا متنرفز .....تمام تمام ....ولف جيهة الباب وبيطلع بس وقفه صوت موده وهيا تقول

موده:تحبك ره!!
اقسم بالله تحبك وكل يوم تتصل بيا وهيا تعيط لانك بعيد عليها
هبه:فنصت في موده
امير:وقف وهوا يشبح لموده
موده:ولما فسخت قريب طارت من الفرحه وربي
وكدابه متبيشي هيا من البدايه بوها غصبها عليه وزدت انت لما تعاركتو
هبه:خلااااص موده بطلي
موده:تسلحبت لين وصلت جيهة الباب ....شوف خلفية تالفونها
هبه:حطت تالفونها ورا ضهرها
بس قرب منها امير وفكه منها عشان يلقى صورته وهوا يشوف للبحر خلفيه❤️
موده:طلعت بسرعه من الغرفه بعد مافضحت هبه وقعدت واقفه برا لان فهمت انهم لازم يقعدو بروحهم

امير:امك تعلم ان في شي بينا !
هبه:حاسه ان في شي اي
امير:وامي تعلم
بوي خوتي والدنيا كلها فاهمين قداش انا مكبد عليك
الا انتي
هبه:لانك واحد كداب
امير:سكري فمك
هبه:خدت نفس....خليني نروح يكون احسن
امير:مسكها من يدها ورجعها لين طاحت ع الكنبه....وين تروحي وين!!؟
هبه:عدلت نفسها وقعمزت وهيا مرتبكه
شابكه يديها في بعض ويديها يرعشو
امير:قعمز جنبها ومسكلها يديها...نفس العاده قاعده فيك ديما لما تخافي
هبه:خفت يديها داخل جيبها
امير:تنهد وهوا يشوف للمطر من الروشن....احكيلي شن يلي تبيه بزبط هبه؟
هبه:منبي شي
امير:وانا نبيك !
هبه:وقفت ....لا متبينيش
انت تبي بنت من نفس مستواك ع قولتك وانا خليتلك الطريق
امير:قرب منها وبدون كلام حضنها
هبه:حاولت تباعده بقوه بس كان حاضنها كويس ومتمسك بيها
نزلت هبه يديها وقعد امير حاضنها ومتمسك بيها ❤️
امير:تاعب نحس في روحي 💔
فديت من كل شي في حياتي واولهم بعادك عليا وخشمي يلي انا قايمه
في داخلي تاعب هلبا هبه
هبه:بلعت ريقها بهدوء بس قعدت بنفس الوضعيه
هوا حاضنها وهيا لا
امير:دفن راسه في رقبتها ❤️
هبه:فتحت عيونها بصدمه من تصرفه
امير:بعد من عليهاومسك راسها بيديه الاثنين ...انسي كل شي صار
ركزي ع الحجات الحلوه يلي كانت بينا
ركزي ع الحاجات يلي درتها ع خاطرك هبه
هبه:هزت راسها
امير:نكملو ؟!
هبه:خدت نفس....اي نكملو
امير:ابتسملها وعاود حضنها من جديد❤️

________________________________

اريج:كانت واقفه ع المرايا ❤️
مشطت شعرها وحاولت تقيمه بيد وحده لكن مقدرتش
الموقف هاذا كان يراقب فيه اسلام من ثقب الباب يلي كان مردود مش مسكر
فتح الباب وهوا مبتسم....تبي مساعده يابنيه؟
اريج:نخلعت....اووف اسلام خلعتني
اسلام:توا تبي مساعده ولا لا!
اريج:تشوف لي نفسها في المرايا ...قيمه فوق بي هاذي
ومدتله التوكه
اسلام:وقف وراها وهوا يلم في شعرها ❤️
يذكر ايام كانو صغار
كان يحبها من لما يقرو في الابتدائي ❤️
لعند كبرو وهوا يحبها ويحب شعرها يلي كان حريص انه يخفيه ع الناس
حست اريج ان اسلام بدي هايم في شعرها وناسي نفسه
لفت ونحت شعرها من بين يديه
اريج:خلاص خليه تو الممرضه تساعدني
اسلام:ارجعي لفي تو نقيمه
اريج:خ خلاص اسلام اطلع احسن ما تشوفك امك وانا وربي ما ناقصه
اسلام:الف مره قتلك امي متاخديش عليها ولا ع كلامها
اريج:حطت يدها ع راسها بتعب ....منبيش نحكي في الموضوع اكتر
خلاص اطلع
اسلام:خدي نفس عميق....تمام تمام طالع
وصل لعند الباب ووقف لما سمعها قالت
اريج:بعد بكرا طالعه من هنايا
اسلام:تلفت ....طالعه؟؟!
وين!
اريج:كلمت خالتي حواء ووافقت تاخدني عندها
ع الاقل لين خلاص نفسيتي تتحسن
اسلام:ضحك بصدمه....خالتك؟
خالتك في تونس ولا انا نخرط!!
اريج:اي في تونس...حكيت معاها الصبح ع النت وقتلي تعالي غادي
شفت الحجوزات ع الموقع ولقيت مزال في اماكن فاضيه
اسلام:بوي اصر انك لازم تقعدي م....
اريج:قاطعاته ....لا اسلام خلاص
تحملت هلبا حجات ومستحيل نتحمل امك وكلامها
اسلام:اقعدي
اريج:خدت نفس....علاش بنقعد يا اسلام ؟
اسلام:ع خاطري مثلا!
اريج:عقدت حواجبها بي استغراب ....خاطرك!!؟
اسلام:اي
ليلى:اسلااااام
اسلااااااام
اريج:نخلعت....خلاص اطلع بسرعه قبل ما تشوفك
اسلام:طلع بعد ما شافلها بنضرات اخيره❤️

_______________________________

وصلت جنان للمطار ونزلت زي المهبوله
كانت مبلوله مع بعضها وعيونها حمررر من البكي
خشت داخل تجري وادور بي عيونها
سألت على طيارته ومشت تجري لي طابرو الشناطي
دورت ودورت عليه بس مش لاقيه صدام

كلام صدام ليها !!

صدام:تنهد بعمق .....اسف جنان
جنان:عقدت حواجبها وهيا مش فاهمه شي !!
صدام:انتي واعره وانا نستسلم تمام؟
صعب ينضحك عليك حطيت في راسي بناخد ام فلوسك كلهم لاكن انتي فايقه مليح لا يأثر فيك حب لا نم

كيف مركزتش ان صدام عمره ماطلب منها قرش !
عمره مافتح معاها سيرة فلوس اصلا؟؟!!
كيف مافكرتش في شي غير انه واحد واطي وكسر قلبها!!
اذكرت نضراته ليها❤️
كانت معبيه حب 💔
اذكرت ضحكته لما يشوفها !!
اذكرت كيف ميقدرش يلمس شعره منها لما يعصب بسببها
نزلو دموعها زي المطر وسط زحمة الناس وهيا ادور
بعض الناس يشوفولها ومستغربين من بكاها يلي كان هستيري
طاحت عينها على الطابور يلي بيطلع لي للطياره
لمحت صدام من بعيد
مشت تجري وهيا تبكي بس الامن منعوها
بدت تنادي بأعلى صوتها عليه وهيا تبكي وسط الناس
نصدام:تلفت بسرعه لما سمع صوتها !!
شافها تبكي وتحاول انها تخش من بين الامن 💔
فهم كويس ان جنان عرفت الحقيقه يلي حاول يخفيها عليها
خدي جوازهوعطاها بضهره تقدم لعند صالة الركاب
نادت عليه جنان الف مره والدموع مغطيين وجها وهيا تبكي وتخبط بصوت عااااالي كانت قريب تهبل
من صدام يلي خلاص بيمشي ويخليها 💔
ترجت متع الامن وهيا تبكي وبتطلع من عقلها بس كانت منطقه ممنوع تخش فيها
طاحت ع الارض وهيا تبكي منهاره 💔
لحضات ولمحت صدام راجعلها من بعيد
ناضت تمسح في دموعها
صدام:سيب طيارته يلي كان مزال عليها دقايق وتطلع
ومن بين الناس قرب عليها
جنان:كانت تراجي فيه بي لهفه امتى يطلع من السياج واول ما طلع ارتمت في حضنه لين قريب طاح
بكت في حضنه كأنها بيبي صغير خايف يفقد اغلى شي في حياته💔
كان صدام ماسك دموعه بسيف عشان يبان قوي ومش هامه شي زي كل مره !
جنان:بعدت من عليه وعيونها حمررر....كيف تكذب عليا هكي صدام !
كيف نهون عليك علاش تبينلي انك شخص سيئ !!
كيف هنت عليك تكسرني
صدام :تنكسري توا ولا تنكسري طول عمرك
جنان:مسحت دموعها....فوتها تونس
خلينا نمشو لي المانيا تمام
في دكتور غادي مش....
صدام:قاطعها .....انا ميت جنان
هكي هكي ميت ومشيتي باش نرضي امي لا اكتر تسحابه العمليه بتجيب نتيجه
جنان:تبكي ....لااااا
صدام:صدقيني حاس بي الموت
جنان:خبطاته ع كتافه.....لااااااا لاااااا اسكت معش تحكي كلام زي هكي
صدام:حضنها وعيونه يلمعو كان ماسك نفسه بسيف💔
حبيتك وطول عمري بنقعد نحبك ❤️
حي ولا ميت
جنان:تبكي بشهقه ...حضناته وغارسه يديها في ضهره بقوه وهيا خايفه تفقده
خليك معاااااي 💔💔💔💔
بتقعدلي مستحيل نخليك تموت
صدام:خلاص اهدي ❤️
جنان:لاااا مش رح نهدا لين توافق تمشي معاي وربي لو ماوفقت نحرق روحي وانا حيه
صدام:مفيش داعي ليها العمليه
جنان:صداااام وربي ننتحر
صدام:تنهد ....تمام
جنان:مسحت دموعها ....وطلعت تالفونها لازم اليوم
صدام:قرصها في خدها ...كم مره قتلك معش تطلعي بدون وشاح انا
جنان:رجعت حضناته ❤️

🔥رِوَايـــــــــات بـــَـنـُـــووتِـــة الشـِــيـــْـخ🔥
🔥أروى الــــطـــاهــــر المــســلاتــــي🔥
القــــــروب الاصلي 400الف

في الممر تلاقو ❤️

امير:خيرك مبلوله؟!
ماريا:طلعت ندخل في سبيدرو البنات ...انت كنت في داري ؟!
امير:اي كان عندي موضوع حليته
ماريا:ابتسمت بخبث....انت وهبه؟؟😉
امير:ضربها ع رقبتها.....هييي حسيتك ستانستي تحركي اقلبي وجهك
ماريا:اااااه ....محرها معش تضرب
امير:اقلبي وجهك اقري ياساقطه بالك يصير منك وتنجحي
ماريا:ع اساس حبيبتك ناجحه يعني ماهو زيني زيها
امير:مارياااااا😠
ماريا:ضحكت....خلاص نبصر😂😂
وهربت تجري

موده:تدلع بحركات غريبه على هبه....يشبهك قلبي كنك لقلبي مخلووووووق
وعيوني لاشاافت
هبه:خلاااااص خلااااص درهتيلي كبدي وربي
ماريا:شن صاير 🙂
شن فاتني
موده:نص عمرك فاتك اقسم بالله حب ورومنسيه ياعمري كيف رضاها بوسات ودنيا وووه استاحشت جهاد 😭😭
ماريا:ضحكت ياعيني ياعيني
هبه:ع اساس انتي طلعتي تحلبي في البقر ماهو حتى انتي طالعه لي ارسولان😉
ماريا:لو سمحتي
منسمحلكش تقولي ارسولان حاف معليشي
خطيبك ارسولان
هبه:حليلي🥺❤️
ان شاء الله يارب انتي وارسولان وصدام وجنان
وموده وجهاد
ع سيرة جنان مش بعتتلك انها جايه ؟؟!
ماريا:بالك مصارلهاش ....ووه صقع بنخش نغير حوايجي انا

_______________________________

احلام:وهاذا يلي صار
فركسنا كل شي ومعرفة خير وخلاص
حسنه:صبت القهوا ....فيها خيره حبيبتي
الحمد الله يلي طلع ميعلمش بيها قبل ماتوصل فيه
سيوره يجيها نصيبها
احلام:ربي يسهل
حسنه:تنهدت ....بنيتي انا يلي كلتها بالله
اهو جاي راجل يخطب فيها للمره الثالثه وتفكر ترفض
جتها فوبيا من الزواج الله لاتربحهم
احلام:لا والله لازم تتزوج بنتك وتشوف نصيبها في النهايه مليهاش الا حوش راجلها انتم لعند امتى دايميلها
وبدات توا كان ولدك ارسولان يتزوج
حسنه:تنهدت وهيا تفكر!

_________________________________

#بعد_مرور_اسبوع

خلينا نسترجعو شوي لقطات من يلي صارت في الاسبوع هاذا!

جنان:من اول ما طلعت الطايره وعيونها على صدام يلي كان راقد
دعت من قلبها يعيشلها ❤️
كانت تتأمل في ملامحه فكرة انه فاقد الامل من الحياة ومتأكد انه بيموت تحرق فيها💔
رقدت في حضنه وسكرت عيونها مش هامها شي
لا بوها يلي ميعلمش بيها حيه ولا ميته
ولا خوها يلي خلتله مسج ومعش ردت عليه
ولا خالتها يلي جايه مكان امها مكلفتش نفسها حتى تسأل جنان وين
سكرت عيونها وزادت غرقت في حضنه اكتر
عباره وحده بس قادره توصف يلي هيا فيه !
(فليذهب العالم الى الجحيم ولتبقى انت💔🔥)

فتح صدام عيونه وشاف لي روشن الطياره
كان يسأل في نفسه لما يموت جنان لمنو بتقعد؟؟!
بوها مش مدورها ولا امها
وخوها ابدا ميقدرش يعتمد عليه
الشي الوحيد يلي فكر فيه هوا جنان وبس !!

زي ما في لقطات واعره وتقسم القلب كانت في لقطات حلوه❤️
كان ارسولان مهتم بي ماريا كويس ❤️
كل شوي يسأل شن صار في قرايتها
ومره جايبلها غدي ومره عشي ومره حاجه حلوه❤️

اما امير كل ما يحصل فرصه يطق ع باب اخته ويخطف هبه منهم❤️
وموده برووورحها يلي كانت هايمه مع جهاد ويخططو لي احلام كبيره

رغم الجو الحلو يلي صاير بينهم بس البنات تأثرو هلبا بقصة جنان وصدام
هل تكمل قصتهم زي اي فيلم رومنسي ويرجعلها؟
ولا تكون نهايتهم مأساويه؟!

في الاسبوع هاذا اريج ذاقت فيهم الويل من مرت عمها
قلبها متعلق بي اسلام وفاهمه كويس انه الشخص الغلط !
بس الحب مش قرار عادي يختاره اي حد
الحب يجيك فجآه بدون مقدمات 💔
ميهماش الشخص هاذا صح ولا غلط كويس او مش كويس !

________________________________

ماريا:هببببببه هيا متحرقليش دمي ديمه وانتي مسكسكه واااك
هبه:تربط في سبيدروها....افففف ديمه وانتي مستعجله
موده:ماسكه التالفون ومتوتره
ماريا:ابتسمت لما شافت ارسولان قدامها
ارسولان:فنص فيها واشرلها ع سيارة خوها
ماريا:جت بتقدم بس وقفت لما شافت بنت من يلي معاها وقفت ع ارسولان

هبه:تعالي وين ماشيه
ماريا:قامت حاجبها....هيا البنت واقفه عليه ولا انا عيوني !!
هبه:ادف فيها لي السياره ...خليها توا خوك واقف يشوف من بعيد ريحيني
ماريا:درقي عليا
هبه:مارياااااا
ماريا:سيبتها ومشت

ارسولان:طلع تالفونه ....مدار ولا لبيانا
البنت:لبيانا 94
ماريا:شن هوا يلي لبيانا تسأل فيها انت ؟؟
ارسولان:تنزفز...خوك يا طالبه مدرس غادي تفضلي
ماريا:طالبه؟؟؟
شبحت لي البنت ....تملي في رقمك ع اي اساس ياماما انتي
البنت:مصدومه...اءء انا
ماريا:انتي شنو يا مانا مصح وجهك جايه م.....
ارسولان:جبدها ع جنب

هبه:وقفت ومسكت امير من يده خلت ضهره مقابل ماريا عشان ميشوفهاش ...حبيبي
امير:مفهمش تصرفات هبه الغريبه ....اركبي شن واقفه
هبه:ماريا بتجيب كتاب نساته فوق
امير:بيتلفت لكن منعاته هبه...
هبه:استنى بنقولك
امير:شنو ؟
هبه:ابتسمت بتوتر....استاحشتك هلبا
امير:ابتسم...بطلي عيب اركبي

ارسولان:هبلتي انتتتي
ماريا:اي هبلت ....انا طالبه صار وربي يا ارسولان لما نقتلك انت والكلبه يلي تمل في رقمها هياااا
ارسولان:مش رقمها النممم مش رقمها رقم بوها تبيه يروح بيها
ماريا:هدت شويه بس قارنه حواجبها .....روح توا
ارسولان:اقلبي وجهك لي خوك
ماريا:اقسم بالله متروحش توا ورانا لما نوقف في وسط الساحه وندير العار
ارسولان:خلاص الزززح مروح مروح فوتي لي خوك
ماريا:قلبت عيونها وفاتت

هبه:شافت ماريا جايه ...فتحت الباب وركبت لي السياره
ماريا:ركبت متنرفزه
هبه:قتلتيها البنت؟؟
ماريا:بزعل....حزو بينا الله لاتربحهم
امير:ضحك...عركه؟
ماريا:اي بياخدو مني حاجتي هكي عيني عينك
هبه:ضحكت
امير:شن حال الدور الثاني؟!
ماريا:ماشيه اموره ناجحين بي اذن ال
موده:ركبت معاهم وواضح ملامحها مش طبيعيه
هبه:خيرك؟
موده:جهاد رقمك مسكر من الصبح
هبه:بالك راقد
موده:مش من عادته ....منعرفش مرات راقد
هبه:المهم هدي روحك انتي توا
موده:سكتت بس كان قلبها قابضها 💔

_______________________________

صدام :لابس بدلة العمليات ومطلعينه للغرفه
جنان:مسكت يده وعيونه دموع💔
صدام:مفيش نعيما؟؟
جنان:شافت لي راسه من الخلف كان محلق عشان العمليه
ضحكت وسط دموعها....نعيما
الدكتور:يأشر لي جنان بمعنى هيا وقت
جنان:مسكت يده بقوه....نحبك ❤️
خليك قوي ع خاطري
صدام:لو صار فيا شي م.........
جنان:قاطعاته لاااااا
متكملش
لان مش رح يصير فيك شي انت بتطلع لي حضني طول وبتفتح عيونك وانا جنبك
صدام:ابتسم وقربو الممرضات رفعوه
نفكت يدها ويده💔
خش لي غرفة العمليات وهيا قعدت واقفه في مبتسمه ومبينه انها قويه !

_______________________________

احسان:كيف هكي ؟
طالعه لاتقولي عندي اهل ولا عزوه ولا ناس تاخدي في قرارات من راسك وتسافري ؟
اريج:ماسكه دموعها....حساك ياعمي لكن خلاص
طيارتي بعد ساعه بس
والقرار هاذا انسب ليا وليكم

خشو امير وماريا وشافو اريج واقفه بشناطيها
ليلى كانت فرحانه واسلام واقف وواضح ع ملامح وجها كسرة الخاطر💔

احسان:لا قرار لا طبيخه تحركي اركبي ورفعي شناطيك فوق وسكري ها السيره
اريج:بحزم.....اعذرني عمي بس قعادي في الحوش هاذا مستحيل نتحمله
اسلام:خلاص مش ضروري تقعدي هنايا
اريج:فهمت ان اسلام لزها
زاد قلبها انكسر اكتر ماهوا مكسور💔
كمل اسلام كلامه وهوا يشوف لي امه وبوه بتحدي....ناخدك ونأجرو برا
ليلى:طلقتها صيحه من بعيد....نعممممممم؟
ماريا:😧😧😧
اسلام:شاف لي بوه وتابع كلامه....بنت عمي ومعندهاش خد وانا راضي بيها !
خليني ناخدها ونأجرلها برا يابوي احسن ليها وليكم وليا
ليلى:لااااااااا لو تموت ما......
احسان:حرف تاني اقسم بالله متقعديلي دقيقه هنايا
ليلى:خافت من تهديد لحسان وسكتت
احسان:شاف لي اريج يلي كانت تشوف لي اسلام بصدمه....قابله بيه يابنتي؟
منبيش نضغط عليك ولا نعطيك بسيف هاذا حوش عمك تقعدي فيه امتى متبي
اريج:نزلت راسها ودمرعها يطيحو ع الارض
احسان:موافقه ولا لا؟
اريج:هزت براسها
احسان:لا قوليها نبي نسمع
اريج:اي ياعمي موافقه
احسان:ابتسم لي ولده....ع بركة الله
ماريا:بصوت واطي ....تبصروو!!
اسلام:ابتسم بفرح لي اريج
وهنايا ماريا ضحكت بفرح عرفت ان في قصة حب اكتملت في العيله ع الرغم من كل المآسي يلي صارو💔

_____________________________

رؤى:مذنبه شي هوا باش نحكم عليه بي الباطل
بس انا مفهمتش علاش ياخدني انا يلي مطلقه مرتين وهوا قاعد شاب عزري!
حسنه:تتكلم بهدوء....مرات يابنتي شاف فيك شي مش موجود عند اي بنت بكر
رؤى:بتردد....قررت نوافق
حسنه:ابتسمت....الف مبروك ياربي
ان شاء الله ربي يثبتك عنده ويرزقكم بي الدريه الصالحه
رؤى:نزلت راسها بخجل

🔥رِوَايـــــــــات بـــَـنـُـــووتِـــة الشـِــيـــْـخ🔥
🔥أروى الــــطـــاهــــر المــســلاتــــي🔥
القــــــروب الاصلي 400الف

الدنيا هاذي كل ماتلقى شي حلو لازم تلقى عكسه بزبط✅
كمية الحب يلي موجوده في عيونه جلال لي بنته رؤى
وفي عيون احسان لي بنته ماريا !
ابدا مش موجوده عند جمعه لي بنته جنان

جلال طول الوقت يفكر في مستقبل رؤى
ولو مات منو بيدير باله عليها غير راجل يسترها🤷🏻‍♀️
عكس جمعه يلي بنته سافرت المانيا وميعلمش بيها حتى طلعت من غرفتها
احسان يلي حريص بزياده على بنته ويبي يوفر كل شي يقدر عليه
عكس جمعه يلي كان معتمد على فلوسها
وميبيش يصرف عليها قرش بحجة ان هيا عندها ثروه اكتر حتى منه!

فرحت هبه بي امير❤️
وفرحت ماريا بي ارسولان❤️
فرحة اريج بي اسلام❤️
عكس موده يلي بدت تبكي من لما اذن المغرب وجهاد معش رد عليها
تسكر تالفونه ومفيش خبر عليه!!
وعكس جنان يلي دموعها موقفتش وطول الوقت تدعي
صدام كان واخد قلبها وقاعد تحت العمليات💔
وعكس رؤى يلي معرفتش تفرح بي يوسف
ولاتخاف يطلع نفس يلي قبله!

فرق كبير بينهم!!
وصعب اي وحده تحس بي الثاني لان كل وحده لاهيا في همها
او لاهيا في فرحتها .....

الوقت يمر بسرعه والايام بسرعه ماتفوت
محدش فيهم حاس بسرعة الايام لين فجآه ماريا كانت واقفه ع المرايا ومكياجها يجلط❤️
شعرها نازل فلو ع كتافها والفستان محليها !
واقفه ومرعوبه وخايفه من الزحمه يلي تحت
بس كانت هبه وموده يصبرو ويهدو فيها
رغم ان موده وجها بدي شاحب من كثر التفكير !!
اليوم جهاد غايب عليها اسبوعين 🤷🏻‍♀️
خشت اريج وهيا ماسكه المبخره والذبله تلمع في يدها
نصدمت ماريا والبنات وسألوها امتى صار!!؟
جاوبت اريج والضحكه ع وجها...قبل شويه❤️
باركولها وتمنولها الفرحه الكبيره❤️

هبه:هكي تمام هي تنزلي ؟
ماريا:وين جنان مش قالت طيارتها توصل العصر؟
موده:ابتسمت بتعب....تلقيها لاهيه مع حبيب القلب بعد ما نضلها بسلامه
ماريا:خدت نفس....تمام هكي سادني خلي ننزل
هبه:هي❤️

_______________________________

رؤى:مش مفروض تسلم ع اختك قبل ما تلبس الذبله؟
ارسولان:حضنها ...طالعه احلا عروس شافتها عيني
رؤى:نزلت عيونها بخجل....بطل يالله
اول ما تشوف عروستك بتغير رايك
ارسولان:ضحك من قلبه....الولد مستنيك ليه ساعه برا يالله اطلعي
رؤى:شافت لي نفسها بي الفستان الابيض البسيط ولبست عبايتها وطلعت لي يوسف❤️
طلعت وسط زغاريط امها وبنت عماتها ❤️
وليلى وغيرهم من البنات
ركبت جنب يوسف وطلع بيها ووراه صحابه والالعاب الناريه وراهم وقدامهم

ارسولان:خدي نفس وشاف لي امه
حسنه:هيا خش لبس عروستك تحرك
ارسولان:ابتسم وخش مع امه وعيونه لوطه❤️
كانت ليلى راضيه بي الامر الواقع رغم انها تمنت شخص معبي فلوس اكتر من ارسولان
وبنت تانيه لي اسلام ...بي مفيش شي بيدها🤷🏻‍♀️
خش ارسولان وقام عيونه في ماريا يلي خطفت قلبه للمره الالف❤️
مقدرش يدير اي ردة فعل وسط الناس وزحمه 🤭
لبسها الذبله ويده ترعش وماريا تضحك من قلبها عليه
ارتفع صوت الزغاريط من جنبهم
عرق ارسولان مع بعضه ومعش تحمل يقعد اكتر من هكي من كثر ما متحشم❤️
قربت عليه ماريا بعد ما اشرلها انه بيقلها شي!
ماريا:نعم!
ارسولان:بنطلع
طالعه تهبلي اليوم عروسة قلبي نحبك❤️
ماريا:بعدت شويه من عليه وهيا مبتسمه❤️
طلع ارسولان وبدو يقسمو في التورته

جنان:خشت عليهم وبدو البنات يتعايطو وكلهم يحضنو في بعض ❤️
كانت جنان فرحانه !!
تقريبا اول مره تكون فرحانه ومرتاحه بطريقه هاذي❤️
صاحباتها ينحطبو قدامها وحبيب قلبها ربي عطاه فرصه يعيش معاها ويطلبها باش تبدا حلاله
في شي احلا من هكي!!!
قعمزو البنات جنب بعض نفس ايام القرايه❤️
هدرزت جنان تفاصيل ايامها مع صدام يلي كان رومنسي ويضحك حتى في عز مرضه
خشت ليلى عليهم فجآه وطلبت منهم يتغطو
وكانو مستغربين علاش ؟؟!

قاطع استغرابهم امير خاش لابس نفس بدلة ارسولان بزبط
هبه:بسوط واطي وصدمه ...لا تبصرو!!
امير:خش وهوا مبتسم وطلع الذبله
طلعت اول زغروطه من احلام ونطلقت هلباااا زغاريط
مدت هبه يدها ولبسها ذبلتها
امير:منخليش اختي تلبس الدبله قدامك وانتي لا
وباس راسها❤️
كانت الصدمه ماليه المكان بس هلبا ناس فرحانتلهم لان يلي مرو بيه مش شويه❤️
جنان:والله الغبيه دارت ثمره في حياتها وخطبها
ماريا وموده:هههههههههه
جنان:وانتي خيرك قارنتيهم
موده:اختفت الضحكه من ع وجها ومجاولتش!
جنان:خوي ولا!
موده:هزت راسها بمعنى اي
جنان:قتلك من البدايه خوي في اي لحضه يسافر ويخليك واهو سافر
شوفي وجهك بدي يخوف من كثر ما اصفر نوضي كولي حاجه وانسي
موده:ناضت بعد ما تعبو عيونها دموع

في الدور الثاني كانو الاثنين يتفرجو:-
اسلام:لو يرجع بينا الوقت ويبدا معندي شي
تعيشي معاي تحت الكوبري ؟
اريج:ونبنو حوشنا بي احلا زينقو 😂
اسلام:خطف منها بوسه ...ايوا كده

_______________________________

3ذبلا يلمعو في اليد
وكل وحده فرحانه بيها اكتر من الثانيه !
لحقت عليهم الذبله الرابعه في نفس اليوم
كيف؟!
خلينا نرجعو لحضات للخلف....

جنان:فتحت باب الغرفه وخافت
طلعت تجري للممرضه....وينه؟؟كان هنايا صدام وينه!!
الممرضه:موجود يا انسه بالك انتي غالطه
جنان:رجعت للغرفه شافت صدام طالع من الحمام وراجع لي السرير
جنان:خوفتني عللللليك صدام مبردك
صدام:شنو خلاص معش نخش حتى الحمام بلا هبال
جنان:حطت الصونيه جنبه ....هاذي تورته من حفل خطوبة صاحبك
صدام:ابتسم....جاني الصبح هوا وامير
جنان:ابتسمت ....الله يبارك ع الصحبه
صدام:مسك يدها وباسها ❤️
3ذبل في يوم واحد!....اسلام وامير وارسولان
جنان:خدت نفس....اي ربي يهني
تحس ان ربي عوضهم من كثر ماصارو موتات في حوشهم
صدام:شن رايك نخلوهم4
جنان:عقدت حواجبها بي استغراب...كيف!!
صدام:طلع من جيبه باكو صغير
حطت جنان يدها ع فمها بصدمه!!
صدام:بوك عطاني الموافقه الصبح....وانتي !!؟
جنان:ابتسمت وقلبها بيطير من الفرح
ايييييييييي
صدام:ضحك ولبسها الذبله❤️
باس يدها .....خلي يفوتو ايام الملاحضه هيا يلي درهتلي كبدي
ونديرلك عرس نحتل بيه ليبيا كلها
جنان:ضحكت من قلبها....وهيا تشوفله كأنه اعضم انتصاراتها في معركة الدنيا يلي جايه ضدها❤️

وبهكي خشت رابع دبله في صبع جنان❤️
به شن صار في ذبلة الزواج ؟!!

رؤى:كانت مبهوره!
متفاجآه بي العرس يلي مدايره يوسف!!
نصدمت بي خيمه من الطق لا الطق والزحمه الموجوده
نحرجت بي فستانها البسيط يلي لابساته 💔
بس يوسف مسكها من يدها ودخلها كأنها احلا شي شافه في الدنيا❤️
رشو الورد عليها هيا ويوسف والالعاب الناريه موقفتش
حست رؤى بي الهيبه!!
حست ان يرسف دارلها قدر كبييييير في عيلته رغم انها مطلقه مرتين بس عاملها كأنها اول مره تتزوج

حضرت رؤى الدخول بعدين رفعها لي احلا فندق❤️
خشت رؤى رمت عبايتها وكانت محضره هلباااا كلام لي يوسف
سمعاته خش وتلفتت جيهته
رؤى:شبكت يديها في بعض بتوتر....انا منبيش منك شي !
لافلوس ولا لبس لا شي .....نبيك تخاف الله فيا بس
عاملني كويس
نبيك تعاملني گ زوجه ومنبيش اكتر من هكي
يوسف:مردش ولا كلمه
استمر يشوفلها بعدين قرب وباسها ع راسها....مسك يديها الاثنين وقال
عهد عليا نحطك في عيوني ❤️
ونعاملك بيلي نحب تتعامل بيه اختي ونخاف ربي فيك يابنت الناس ونحافض عليك لين نموت
رؤى:حست كأن قلبها كان جمره وبعد كلماته طاح في اميه❤️🔥

__________________________________

يجي وقت والعبد يشوف نفسه احسن شخص في الدنيا ومفيش حد يقهره
والمرحله هاذي وصلها جمعه!!
بس انقهر لما شد مرته راقده مع غيره 🤷🏻‍♀️
ونجلط لما شاف بنته نيروز منتحره!!!

طاح مجلوط عليهم
لامات ورتاح !
ولا قعد بي صحته !
الوقت هاذا بدات منفعتاش فلوسه ولا نفعوه البنات يلي يعرفوه !

ويجيك وقت وربي ياخد منك كلللل شي
بس في المقابل يعوضك بشي احلا
زي ما اريج فقدت عيلتها في ثانيه
عوضها بي اسلام يلي مش مخليها تستحق حاجه!!
اسلام يلي يخاف عليها من نسمة الهوا وميشوفش لي غيرها!!

ويجيك وقت تشوف الحلم يلي كنت تسحابه مستحيل قاعد يتحقق قدامك !
زي ما هبه وماريا وجنان يشوفو لي ذبلاتهم بصدمه حب❤️

ويجيك وقت تفقد كل شي في حياتك وانت تراجي 💔
وتكون ع حافة النهايه وقاعد تراجي

زي ما طلع جهاد من الحبس زي المهبول اتجه للمشفى
فتح الباب عشان يشوف عيونها ذابلات وضحكتها يلي كانت تسمع الشارع كله مختفيه 💔وقاعده تراجي
قرب منها طاح ع الارض مره واثنين وهوا يحاول يستوعب يلي قدامه
قعمز وصدمته منعاته حتى يبكي
حط يده تحت راسها وهوا يحكي بصدمه....مم موده؟؟!
موده انتي بخير ؟!
موده؛فتحت عيونها بصعوبه وين كنت؟؟!
راجيتك هلبا جهاد
جهاد:نحبست وربي
درت اكل شي في بالك باش قدرت نطلع
ابتسم.....خلاص عاد معقوله برده عاديه ادير فيك هكي
نوضي
موده:يعني مسيبتنيش؟؟
جهاد:كيف بنسيبك ؟!
في حد يسيب روحه!!
موده:ابتسمت ...الحمد الله
ع الاقل قصه وحده في حياتي طلعت صح ومش من خيالي
ع الاقل طلعت تحبني مش نتخيل زي قبل
جهاد:ضحك....هبله وربي
خلاص نوضي روحي قعدة المشفى تمرض
جيتك انا نداويك❤️
ناخدلك احسن دوا عندهم نوضي
موده:بدت تبكي بهدوء ....جهاد معش ينفع معاي دوا💔
جهاد:ضحك....مع جهاد مفيش شي مليشي حل
نوضي هيا
موده:انا عندي سلطان
منتشر في جسمي جهاد 💔
جهاد:ضحك ....قالولي برااا
قلت اكيد موده تكدب لاني عطلت عليها
ابتسم....تذكري ايام نتعاركو تبعتيلي رساله تقوليلي بندير عمليه باش نخاف عليك ونكلمك؟؟
خلاص توا نبيك متخوفينيش عليك موده كنت محبوس في تهمه مش ليا واليوم بس قدرت نطلع
موده:بكت.....بس ها المره منكدبش جهاد💔
جهاد:تكدبي تكدبي موده بطلي حركاتك هادي خلاص الف مره نقولك اعقلي
انا ناخدلك صندوق كندر ونتزوجو من بكرااا
بس قولي انك تكدبي الله يخليك
موده:خدت نفس ووجها ذابل.....منبي شي
امسك في يدي بس
جهاد:مسك يدها ودفن راسه في في السرير ودموعه زي المطرر
قام راسه .....موده نوضيلي
نفسرك وربي لي اي مكان تبيه نعاينك
موده
قاطع صوتهم بكاء امها من الخلف
موده:خليك ماسك يدي جهاد❤️
الحمد الله يلي جيت اليوم
شفتك الحمد الله
جهاد:لاااااااا وراس امك مديريهاش فياااا موده
الدنيا كسرتني انتي لااااااا
موده الله يخليك لاااااااا وراس امك متكسريهاش فياااااااا 💔💔💔
موده؛تشوفله وساكته
مكانش عندها حيل ترد بحرف 💔
جهاد:يبكي بشهقه....وربي نشوف فيك انتي الشي الوحيد الحلو في دنيتي
الله يخليك لاااااا مديريهاش فياااا متقتلينيش
خليك معاي

قاطع الموقف اب موده يلي بدي يعيط عليه بصفته منو خاش وجاب الامت يطلعوه💔
طلعوه الامن وفكو يده من يد موده💔💔💔
طلعو جهاد يلي كان بيهبل وزاد هبل لما سمع الدكتور يقول البقاء لله البقيه في عمركم

عيط وخبط بهستيريا عيط وسمع المشفى كلها💔
حتى يلي مش فاهم القصه بكي من منضره وكلامه يلي حكاه💔💔
وسط المشفى كان يحكي ويبكي بصوت عالي
لما خلاااااص حبيتها حبها السرطان ياربي 💔💔
ياربي قلبببببببي
قلبي بيووووقف 💔اااااااااااه
لما حبيتها حبها السرطان💔💔💔
ضحكتها خلاص معش بنشوفها💔
ااااااه قلبي محروق ياربي
قلبي محروق خداها السرطان 💔💔💔💔
حبها وخداهااااا
كمل يبكي وفجآه خلاص اغمى عليه!!

ماتت موده !
كلهم لاحضو اعراض تعب غريبه عليها
بس مفيش حد كان حاس انها مريضه!!!
مفيش حد جي في باله انها تعااني
كلهم نصحوها تنساه لكن هيا قعدت تراجي فيه💔
تراجي فيه لدرجة روحها قعدت معلقه ولما شفاته روحها طلعت ورتاحت💔

🔥رِوَايـــــــــات بـــَـنـُـــووتِـــة الشـِــيـــْـخ🔥
🔥أروى الــــطـــاهــــر المــســلاتــــي🔥
القــــــروب الاصلي 400الف

اي مأساة بنحكيلكم؟
واي معاناة بنشرحلكم عليها بعد موت وحده من البنات؟!
الكل قريب هبلو عليها💔
ذكرياتها ادور في راسهم كأنه حلم💔
فرحتها بي ايفون جنان❤️
حبها لي جهاد
كلامها24ساعه في التالفون
ضحكتها وهبالها
صعب ع اي حد ينساه ويتخطاه

بس في النهايه هادي الدنيا !
وصعب هلبا توقف الحياة على بني ادم واحد!

فات على قصتنا3سنين:-
عرس واحد جمع ماريا وارسولان
وهبه وامير❤️
عرس كبير كانت فرحتهم ناقصه بدون موده بس الله غالب 💔
حضرو العرس كل الناس
من بينهم رؤى يلي كانت حامل في شهرها الاخير❤️وواضح ع ملامحها الراحه

وجنان يلي ليها شهرين بس متزوجه وحياتها هباااال هيا وصدام لانهم في كل شي عكس بعض!

وحضرو العرس اريج واسلام يلي كانو في العرس لكن عقلهم في شفتهم الجديده وكيف بيأثثوها❤️

لازم نعطو لي نفسنا فرصه تانيه وتالته ورابعه وخامسه مدام فينا نفس حي وقاعدين عايشين

______________________________

تزوجو البنات ال3اي
وقعدت ذكرى موده في بنت هبه ❤️
كل ماينادو بنت هبه بي اسم موده يدكرو صاحبتهم يلي حتى لو ماتت مستحيل ينسوها بي دعاء او حتى صدقه ❤️

وماريا يلي سمت ولدها جهاد واتفقو اما يكبرو يزوجوهم لي بعض ويكملو قصة الحب يلي خطف السلطان جزء منها❤️

اريج يلي سمت ولدها ع اسم بوها
مهما كان سيئ في النهايه هوا بوها يلي رباها وحماها لين كبرت💔❤️

جنان:بعد سنين وسنين وكانو خلاص قربو يأيسو بس حملت ❤️
وكانت في الشهر الاخير
تغيرت جنان هلبا وبدت اعقل بي الف مره من قبل
وكل الطياشه اختفت خلاص!!

رؤى يلي جابت توأمها زوز ولاد حسن الحسين❤️
كانو احلا نعمه هما وبوهم❤️

جهاد اكتفى ان يعتني بي بوه بعد ما جاته الجلطه
قعد وفي لي موده طول عمره❤️💔
وحلف ماتخش وحده تانيه غيرها
غيرها هيا وموده بنت هبه الصغيره يلي كان يقطع في مسافه طوووويله عشان يشوفها 💔❤️

رعد قلبه انحرق💔
لما توفى ولده غارق في البحر💔
ولما سمع بي رؤى خلاص بدت ملك غيره
محسش بي للشي لين فقده للابد خلاص💔...النهايه

_______________________________

اكبر غلط ممكن الشخص يرتكبه لما ياخد حد بي العشم ويخليه ينصدم فيه💔
ممكن انت تراضيه وتنساها
بس ربي مينساش ويردلك الكف اضعاف مضعفه يدمرلك حياتك💔

والغلط الاكبر لما عيونك تتسكر ع صغارك وع طريق ربي
وكل يلي تفكر فيه هوا الفلوس والعز والجاه
لان مهما تعليت وبديت فوق سيوره ربي يهبط بيك!💔
وقتها بس لما اطيح تعرف ان مليكش حد غير الناس يلي من دمك
او الناس يلي تحبك❤️

بعد وقت لما تصيري ام او تصير اب وتكون مسؤل
لازم تفهم ان صغارك بيقلدوك في كل شي وبتكون ليهم قدوه❤️
لازم تفهم ان يوم القيامه بتتحاسب ع ربايتهم
من اي مال وكلتهم كيف ربيتهم كيف حافضت عليهم
متجيبوش صغار لي الشارع يربيهم🙏🏻

عمره ماكان مرض السكر عيب او شي مخجل مفروض يتحشمو منه!
ارتقو شويه معش تتعاملو معاه انه يعدي او انه طاعون او يلي مريضه بيه غلط تفكر في الزواج حتى!!
خليكم راقيين بتفكيركم

مهما مريتي بتجارب فاشله مره واثنين والف وعشره
تأكدي وكوني ع ثقه ان ربي بيعوضك بشي احسن
مهما طوالت المده!
مهما مرت السنين
ربي مش ناسيك
لانه مخلقكش باش ينساك
ربي احن حد عليك في الدنيا هاذي واكتر واحد يحبك❤️
اشكيله هوا !
احكيله هوا
اطلب المساعده منه هوا
لان الوحيد يلي مش رح يردك ❤️

وزي منقول انا (اروى)بنوتتة الشيخ
الحب في كل مكان بس انتي دوري كويس واختاري صح
لقراءة الفصل التالي اضغط على (رواية عائلات راقية بفسادها
reaction:

تعليقات