القائمة الرئيسية

الصفحات

رواية حكاية قمر الفصل الثاني عشر 12 بقلم ياسمين علي

 رواية حكاية قمر الفصل الثاني عشر 12 بقلم ياسمين علي

رواية حكاية قمر البارت الثاني عشر

رواية حكاية قمر الفصل الثاني عشر 12 بقلم ياسمين علي


رواية حكاية قمر الجزء الثاني عشر 

● الجزء الثاني عشر ●

#حكاية_قمر 💕🌜
#بقلم_ياسمين_علي ••

نسترجع آخر أحداث الجزء اللي فات مع بعض ..

سارة نايمة موبايلها رن
سارة بصت ف الموبايل : وليد بيتصل بيا دلوقتي
سارة ردت : أيوة ياوليد خير ....
وليد : ساررة الحقيني انا بموتت
سارة : ايييييييه ! انت بتقول اييه .. وليد رد عليا انت فييين
وليد : البيت .. بسرعة مش قاادر
سارة : اهدي طيب انا جيالك مسافة السكة هكون عندك

__________________________

اسر : ساكتة ليه
ليل بتوتر : انت فجأتني يااسر .. انا مكنتش...
اسر قاطع كلامها : مكنتيش متوقعة اني اقولها ف الوقت ده .. بس كنتي حاسة
ليل : أيوة بس يااسر .. انا ..
اسر : انا مش مستني منك رد دلوقتي ياليل .. بس انا حبيت اقولها ردا ع كلامك ليا ..
ليل : كلام ايه
اسر : فكري كدا قولتيلي ايه لما كلمتك عن صافي
ليل : مش فاكرة ومش عاوزة افتكر
اسر ابتسم : ماشي ياستي متفتكريش دا .. بس افتكري ان انتي بقيتي مهمة ف حياتي .. ورأيك يهمني دايما
ليل : وصافي ؟
اسر : انا وصافي صحاب واخوات
ليل : بس هي مش مقتنعة بكدا
اسر : والله دا مش زنبي * موبايله رن *
اسر ملامحه اتغيرت
ليل : في ايه !
اسر : سارة بتتصل دلوقتي .. ووليد اتصل من شوية
ليل : طيب رد يمكن ف حاجة مهمة

اسر : ايوة سارة
سارة بتتكلم بسرعة : اسر الحقنيي بسرعة .. في ناس اتهجمت ع وليد ف البيت وانا وهو ف المستشفي دلوقتي .. تعالي بسرعة ..
اسر بخضة : مين اللي اتهجموا ع وليد .. !!
ليل : اييه وليد حصله حاجة

سارة : مش عارفة يااسر مش عارفة
اسر : طيب انتو ف مستشفي ايييه
سارة : مستشفي ****
اسر : اهدي خلاص انا جيلك
ليل : في ايه يا اسر وليد ماله
اسر : معرفش مين اللي اتهجموا عليه .. ادخلي انتي انا رايح

ليل : انا جاية معاك
اسر : تيجي فين ياليل متهزاريش .. ادخلي علشان ميقلقوش عليكي
ليل : هبقا اكلمهم يااسر .. يلا بس نشوفهم بسرعة

___________________________

اسر وليل داخلين يجروا

اسر : ساارة .. وليدد عمل ايه
سارة بتعيط : لسه مخرجش ومحدش عاوز يطمني .. انا خايفة عليه اووي
ليل : اهدي ياسارة ان شاءالله هيقوم بالسلامة
سارة : يارررب ياررب

الدكتور خرج

اسر : خير يادكتورر وليد جراله حاجة
سارة : هو فينه مخرجش ليه طمني
الدكتور : اهدوا ياجماعة الحمدالله هو كويس دلوقتي .. بس لسه مفاقش من البنج
سارة : الحمدالله يارب .. طيب ينفع اشوفوا
الدكتور : لما يفوق باذن الله تدخلوا تشوفوا .. عن اذنكم

ليل : خلاص ياسارة متضايقش ان شاءالله لما يفوق تشوفيه .. الحمدالله ان الدكتور طمنا
سارة : الحمدالله

" ليل بصيت لاسر وبصوا لسارة اللي خوفها ع وليد واضح جدا ان هو مش خوف صحاب ع بعض "

_________________________

قمر صحيت من النوم بتتمطع وداخلة كالعادة تطمن ع تونة وليل صحوا ولالا .. دخلت الأوضة ملقتش غير تونة

قمر : ايه دا هي ليل صحيت ولا ايه .. يمكن تكون ف الحمام ..راحت الحمام بتخبط

ليل .. ليل انتي جواا .. فتحت الباب ملقتهاش

قمر بخضة : بسم الله الرحمن الرحيم .. البت راحت فين من الصبح كدا

جريت ع برا
قمر : خليل .. يا خليل
خليل : خير ياقمر
قمر : ليل خرجت قدامك
خليل : لا ياقمر مشوفتهاش
قمر : يلاهوي يلاااهوي هتكون راحت فيين يعنييي .. استررر يارب
خليل : معرفش ياقمر .. دورتي عليها جوا ف الفيلا
قمر : وايه اللي هيدخلها الفيلا دلوقتي
خليل : شوفيها مش هتخسري حاجة
قمر : ماشي هشوفها .. ربنا يسترررر

_______________________

سارة : ها يادكتورر فاق
الدكتور : أيوة تقدروا تدخلوا تشوفوا
سارة دخلت اول واحدة .. ووليد رجله متجبسة هي وايده وفي كدمات ف وشه

اسر : الف سلامة عليك .. مين شلفطك كدا بس قولي
وليد : 3 ولاد حرام هجموا عليا .. خلوني زي مانت شايف كدا
ليل : حمدالله ع السلامة ياعم .. تعيش وتاخد غيرها
وليد : ليل كمان هنا .. الله يسلمك
اسر : صممت تيجي معايا
وليد : فيها الخير والله
ليل : والله ماحد في الخير هنا غير سارة .. كانت قلقانة عليك طول الليل وكانت عاوزة تدخل تشوفك بس الدكتور مناعها
وليد ابتسم لسارة : انا مش عارف اشكرك ازاي ياسارة .. واسف اني تعبتك وجرجرتك ف نص الليل كدا اسف بجد
سارة : متقولش كدا يا وليد انا معملتش حاجة .. المهم انت قوملنا بالسلامة
وليد : باذن الله
اسر : مقولتلناش بردك مين دول
ليل : اكيد حرامية طبعا
وليد : لا مش حرامية .. انا عارفهم
سارة : عارفهم منين !
وليد : دا واحد اسمه ماجد السمري ضربته امبارح ف بعتهملي
اسر : مين دا وضربته ليه
وليد : دا يبقا ابن عم هنا .. غلط فيا امبارح ومد ايده عليها مسكته ضربتوا ف نص الكلية .. ف بعتهملي ع أساس كدا بياخد حقه

" سارة وشها اتقلب وليل لاحظت "
اسر : مين هنا دي كمان .. هو انا مقابلتكش بقالي كتير ولا ايه
وليد : واحدة لسه متعرف عليها .. بس بعد العلقة ديي انا شكلي هقطع علاقتي بيها
"سارة فرحت "
ليل : يبقا تستاهل .. دي اخرة سرمحتك
وليد : خلاص هبطلها
اسر : احلف كدا
وليد : لحد لما اخف بس

* الممرضة دخلت *

وليد : ايه القمر دا بس
الممرضة ابتسمت : اتفضل العلاج .. والدكتور دلوقتي هيجيلك .. عن اذنك
وليد : رايحة فين بس خليكي ..
" سارة بتحاول تمسك نفسها "

ليل : ماخلاص ياوحش مش كنت هتتوب من شوية ..

وليد : بحاول مش عارف
الدكتور دخل : عامل ايه انهاردة
وليد : الحمد لله كويس .. بس رجلي هي اللي وجعاني اوي
الدكتور : هي الممرضة معطتكش المسكن
سارة : عطتهولوا يادكتور .. المهم وليد هيخرج امتا
الدكتور : لا مش هينفع يخرج دلوقتي خالص ..
سارة : مش حضرتك قولت ان هو بقا كويس
الدكتور : أيوة بس محتاج رعاية ..
وليد : بس انا مش هستحمل قعدة المستشفي
سارة : طيب يا دكتور ايه الرعاية اللي هو محتاجة واحنا نعملهالوا ف البيت
الدكتور : ياخد العلاج ف مواعيده وحد يساعده ف كل احتياجاته .. زي مانتي شايفة كدا هو مش هيقدر يتحرك لوحده
سارة : ماشي خلاص يخرج واحنا معاه
الدكتور : ماشي لو هتقدروا انا موافق .. بس لو مش هتقدروا وهو مش حابب القعدة هنا .. ممكن نبعت معاه ممرضة هي هتفهم اكتر
سارة : لا لا متقلقش انا هكون معاه احسن من الممرضة
وليد : لا انا بقول انتي هتكوني مشغولة ووراكي كليتك وأكيد مش فاضيلي .. وانا مش هرتاح وانا معطلك يعني .. ف الاحسن الاقتراح اللي قالوا الدكتور انت تبعت ممرضة معايا
الدكتور بصلهم : زي ماتحبوا
وليد : وياسلام بقا لو يبعت اللي دخلت دي
سارة بعصبية : انت ازاي كدا .. انت اييه يااخي مبتحسش
وليد : في ايه مالك
سارة : ماااليي !! لااا ماليش .. انا غلطانة اصلا اني كنت بستحمل كل تصرفاتك دي وبعدي وبسكت .. علشان ب ... * عيطت * انا كنت بضيع وقتي و انت مافيش فايدة فيك
خدت شنطتها وطلعت تجري وليل وراها
ليل : سارة استني بس

اسر : ليه كدا ياوليد
وليد : اسر روح وراها لو سمحت
اسر : ماشي .. بس هرجع علشان لازم نتكلم

وليد : ماشي بس الحقها

_______________________

نور : اهدي ياقمر ان شاءالله هتكون كويسة متقلقيش
قمر : اهدي ازاي .. دي اول مرة تحصل وموبايلها كمان هنا .. انا خايفة عليها اوي .. لو حصلها حاجة مش هسامح نفسي
زين : هو اسر ف اوضته
عايدة : لا مش ف اوضته
احمد : هيكون راح فين هو كمان
زين : استنا يابابا انا هكلموا

______________________

اسر نازل يجري: فين سارة ياليل
ليل : مشيت وهي منهارة .. مردتش تخليني اروح معاها .. صعبانة عليا اوي بجد وليد حراجها
اسر : مش عارف بيعمل ليه كدا معاها
* موبايله رن *
اسر : دا زين
ليل : يلاهوي احنا نسينا نكلمهم
اسر : أيوة يازين
زين : ايه يااسر فينك
اسر : انا ف المستشفى مع وليد
زين : هي ليل معاك
اسر : اه

قمر : ليل معاه
زين : اه
قمر خدت الموبايل من ايده : أيوة ياليل .. انتي فين .. كدا تخضيني عليكي

ليل : أيوة ياقمر .. انا اسفة والله انا خرجت ومقولتلكيش
قمر : تعالي بس ياليل الأول وبعدين نتكلم . . يلا
متتأخريش مستنياكي

نور : خلاص ياستي اطمنتي .. بطلي عياط بقا
قمر : الحمدالله .. انا متشكرة اوي يازين علشان طمنتني عليها
زين : لا متشكرنيش .. انا كنت بطمن ع اخويا اصلا .. يلا انا رايح الشغل عن اذنكم
احمد : استنا يازين هاجي معاك

قمر بصاله بغيظ : انا غلطانة اني بعبره اصلا .. مبيعرفش يبقا كويس خمس دقايق ع بعض
________________________

كنزي : صباح الخير ياماما
نجلاء: صباح النور ياحبيبتي .. صاحية بدري كدا ليه عندك محاضرات
كنزي : لا انا اجازة انهاردة .. بس مش جيلي نوم
نجلاء : ايه اللي مطير النوم من عينك
كنزي : مش عارفة ياماما .. متوترة كدا وخايفة .. مش فاهمة ليه الاستعجال دا مش كنتو خلتوها سنة ع الاقل
نجلاء : واحنا مالنا ياختي مش حماتك هي اللي مستعجلة .. متكلمتيش ليه ساعتها ولا القطة كانت واكلة لسانك .. مش ابوكي سألك قولتي موافقة بتتكلمي ليه دلوقتي
كنزي : خلاص ياماما خلاص مش هفضفض معاكي بحاجة تاني علشان ترتاحي
نجلاء : استغفرالله العظيم .. خلاص تعالي متزعليش .. تعالي
كنزي : انا مش زعلانة ياماما بس مش عاوزكي واخدة موقف من مامت حازم كدا
نجلاء : ياحبيبتي انا مش واخدة موقف منها ولا حاجة .. كل الحكاية اني مريت بتجربة مكنتش احب انك تدخليها .. بس خلاص طلما انتي راضية خلاص مش هعترض .. وأن شاءالله يكون حالك احسن مني
كنزي : يارب ياماما
نجلاء : طيب بما انك بقا معندكيش حاجة انهاردة ايه رايك ننزل نشتريلك شوية حاجات كدا لجهازك .. اه بلاش نزنق نفسنا للاخر ومافيش وقت
كنزي بفرحة : موافقة طبعا
نجلاء : خلاص ياحبيبتي انا هكلم ابوكي اقولو ..

_________________________

ليل داخلة وقمر جريت عليها
قمر : كنتي فين ياليل وازاي تخرجي من غير ماتقوليلي
ليل : معلش ياقمر بس ف واحد زميلنا كان تعبان وروحنا زورنا .. ونسيت الموبايل هنا معرفتش اكلمك .. عن اذنك انا هدخل انام بقا علشان تعبانة
قمر : تعالي هنا انتي رايحة فين انا مخلصتش كلامي
ليل : ماشي لما اصحا نتكلم
قمر : مافيش حاجة لما تصحي دلوقتي
ليل : في ايه ياقمر مالك بقولك تعبانة منمتش طول الليل
قمر : وهو حد قالك متناميش .. حد قالك تخرجي نص الليل من غير ماتقولي !!
ليل : واحد تعبان وروحنا نزوروا حصل ايه يعني ..
قمر : انتي شايفة ان اللي عملتي دا عادي يعني ؟؟ خروجك من غير علمي نص الليل .. واكتشف الصبح انك مش موجودة وقلبي كان واكلني عليكي وراسي عمالة تودي وتجيب ياتري حصلها ايه وراحت فين .. كل داا عادي
ليل : قمر لو سمحتي بقولك تعبانة حسي بيا شوية
قمر بعصبية : وانا مين يحس بيا !!! انتي تعبانة وانا ايييه .. عايشة حياتي ومبسوطة يعني .. مانا شايلة الهم ومبتكلمش .. وبقول اسيبك تعيشي الحياة اللي انا معشتهاش .. انا عاوزة ايه غير اشوفكم مبسوطين .. بس تزوديها لا مش هسمحلك مش علشان عشنا ف فيلا تنسي الي اتربينا عليه وتفكري ان كل حاجة بقيت عادي بنسبالك
ليل بعصبية : انا مبقتش صغيرة يا قمر انا عارفة انا بعمل ايه كويس .. وياستي مش عاوزكي تشيلي همي انا اعرف اشيلوا لوحدي ارتاحي بقا ولو انا اللي تعباكي .. انا بقولك اهو شيليني من دماغك علشان ترتاحي وتعيشي مبسوطة .. بس متتحكميش فيا بعد اذنك
قمر دمعت : ماشي ياليل طلما انتي شايفة نفسك مش صغيرة .. ومش لازم اتحكم فيكي ولا عاوزني اشيل همك واقلق عليكي .. زي ماتحبي انا مش هتدخل ف حاجة ليكي تاني ياستي .. عن اذنك

"ليل اتضيقت من اللي قالته .. مش عارفة ليه عملت كدا مع قمر .. جايز تفكيرها ف مامتها هو اللي مأثر عليها "

تونة طلعت من ورا الكنبة.. ليل اتخضت
ليل : يخربيتك.. انتي بتعملي ايه هنا
تونة : كنت قعدة بسمعكم ياختي .. ايه اللي عملتيه دا مع قمر .. اخزقلك عينك دلوقتي يعني
ليل : ونبي ياتونة سبيني انا مضايقة ومش طايقة نفسي
تونة : احسن علشان تبقا تضايقي قمر تاني احسن
ليل عيطت : مكنش قصدي .. انا غبية وبتغبي دايما بس والله بيبقا غصب عني
تونة : طب خلاص متعيطيش .. خلاص بقا متزعليش مني .. انا بس مبحبش قمر تضايق
ليل : ولا انا والله بس غصب عني بقا
تونة : خلاص لما قمر تيجي تصالحيها ماشي
ليل : حاضر هعمل كدا .. ممكن ادخل انام ولا انتي كمان هتمنعيني
تونة : لا روحي اتخمدي مش طايقة اشوف وشك
ليل : يوة مانتي كنتي لسه حلوة
تونة : كيفي كدا بقا يلا غوري
ليل : حاضر

___________________

قمر قعدة لوحدها بتعيط .. حد خبط ع ضهرها بتلف تبص
قمر ابتسمت : كريم .. تعالي اقعد معايا .. عامل ايه ؟
كريم ابتسم و شاور بايده : 👍🏻
قمر : يارب دايما ياحبيبي
كريم مسح دموعها بايده وبصلها وكأنه بيسألها ليه بتعيطي ؟
قمر : اتخنقت انا وليل .. انا مش زعلانة من كلامها ليا .. انا زعلانة علشان مش عارفة اللي جواها .. ليل اختي انا مربيها تصرفاتها دي مبتعملهاش غير وهي جوها حاجة مخبيها .. انا خايفة عليها اوي .. وف نفس الوقت مش عاوزه اضغط عليها علشان تحكيلي حاجة .. مش عارفة اعمل ايه ياكريم

كريم قام وقف
قمر : رايح فين
كريم شاورلها تستنا ✋🏻

" بعد ١٠ دقايق جالها تاني "

قمر : روحت فين وسبتني
كريم فتح ايده كان فيها سلسلة رقيقة جدا وفيها قلب صغير ♡

قمر : جميلة اوي ياكريم.. دي لمين
كريم شاور عليها
قمر : ليا انا .. انا اول مرة حد يجبلي هدية .. متشكرة اوي ياحبيبي .. ممكن تلبسهالي بقا
كريم فرح انها عجبتها ولبسهالها
قمر حضنته : اوعدك مش هقلعها خالص

___________________________

نادر فتح باب الأوضة
نادر : سارة ياحبيبتي انتي نايمة
سارة عدلت نفسها : لا يابابا انا صاحية ..
نادر : كنت عاوز اتكلم معاكي
سارة : عارفة يابابا اللي هتقولو
نادر : لا مش عارفة .. انا فكرت ف اللي اتكلمنا فيه .. ولقيت ان معاكي حق مش علشان سفري اغيرلك حياتك .. موافق انك تفضلي هنا طلما هتكوني وسط صحابك والناس اللي بتحبيها
سارة : لا يابابا انا مش هفضل هنا .. انا ماليش حد هنا غيرك انت وبس .. وبما انك هتسافر .. انا هروح اعيش مع ماما واختي ف اسكندرية
نادر : بتتكلمي جد .. انتي متأكدة من قرارك ياسارة
سارة : اه يابابا متأكدة

نادر : الحمدالله .. انتي عملتي الصح ياسارة .. انا كنت هبقا قلقان عليكي وانتي لوحدك .. بس مكنتش عايز ازعلك .. من بكرا هجهز نقل ورق كليتك .. انا هروح بقا افرح مامتك بالخبر الحلو دا .. عن اذنك
سارة : اتفضل

______________________

قمر راجعة البيت
تونة جريت عليها : حبيبتي ياقمر .. اخيرا جيتي ..
قمر : كلتي ياتونة
تونة شاورت ع ليل : اه البت دي اكلتني
قمر بصيت لليل : طيب ياحبيبتي صحة وهنا ع قلبك .. انا داخلة انام
ليل مسكت ايدها : استني ياقمر .. انا اسفة .. انا غبية وعبيطة وهبلة وصغيرة .. وحقك تعملي فيا كل اللي انتي عاوزة كمان ... بس متزعليش مني
قمر ابتسمت : للاسف مش بعرف ازعل منك .. تعالي ف حضني بقا

ليل جريت حضنتها
تونة : الله انتو هتسبوني واقفة اتفرج كدا خدوني معاكم
ليل : تعالي تعالي
قمر : ربنا ميحرمنيش منكم ابدا
ليل : يعني دلوقتي مش زعلانة مني
قمر : لا مش زعلانة .. بس انتي فيكي ايه مخبية عليا احكيلي
ليل : انا مافيش حاجة مخبيها ياقمر
قمر : مش عليا الكلام دا ياليل .. دانا الي مربياكي يابت
ليل ضحكت : ماشي ياستي هقولك .. فاكرة لما حكتلك قبل كدا ع ان ف حد انا معجبة بيه
قمر : اه فاكرة
ليل : اعترفلي بحبه .. ومتلغبطة مش عارفة اعمل ايه .. هو كويس وجدع وانا كمان بحبه
قمر : اممم بس انا مش موافقة عليه
ليل : ايه دا ليه بس مش لما تعرفي الأول
قمر : يعني يجرجك ف نص الليل علشان تشوفي صاحبه ف المستشفي وف الاخر عاوزني اوفق
ليل بصدمة : انتي قصدك ع مين
قمر : هو فيه غيره ياختي .. الأستاذ اسر
ليل : انتي عرفتي منين .. وبعدين هو والله قالي مروحش بس انا صممت اروح
قمر : مش موافقة يعني مش موافقة
ليل : لا ونبي انا كدا هعيط
قمر ضحكت : لا خلاص متعيطيش يابيضة انا بهزار معاكي ..
ليل : بجد يعني انتي موافقة ع اسر
قمر : موافقة من وقت ماهو كلمني
ليل : ايه .. اسر كلمك
قمر : اه كلمني من فترة واستأذني ان يتقرب منك .. وحضرتك الي اسمك اختي محكتليش حاجة
ليل فرحت : انتي بتتكلمي جد ياقمر .. اسر كلمك عليا
قمر : شوفي انا بقول ايه وانتي بتقولي ايه .. اه ياستي كلمني عليكي
ليل : طيب انتي شايفة اني اوافق
قمر : والله طلما انتو الاتنين بتحبوا بعض وافقي .. بس يكون ف علمك مافيش حاجة هتحصل غير لما اشوف تقدير اول سنة ليكي .. وهو كمان ينجح .. غير كدا مش هوافق .. قولتي ايه بقا
ليل : موافقة طبعا

__________________________

بعد مرور اسبوع □
- في الكلية اسر وليل قعدين .. وصافي جاية من بعيد شافتهم اتعصبت بس حاولت تكون هادية وراحت عليهم

صافي : هااي ياشباب عاملين ايه
*ليل مردتش عليها *
اسر : الحمدالله كويسين ..
صافي : وحشتوني اوي .. بقالي كتير مجتش ولا شوفتكم
اسر مستغرب انها متعصبتش لما شافته مع ليل .. وليل مستغربة انها متعاركتش معاها !
صافي : اومال فين وليد و سارة مش ظاهرين يعني ..
اسر : وليد في البيت من ساعة ماخرج من المستشفي
صافي : مستشفي ليه
اسر : في ناس اتهجموا عليه ف بيته
صافي : بتهزااار .. دا حصل امتا محدش قالي يعني .. طب وفين سارة
اسر : معرفش آخر مرة شوفتها ف المستشفي
ليل : انا كلمتها امبارح .. وعرفت انها سافرت اسكندرية عند مامتها ..
اسر : بتتكلمي جد .. مقولتليش ليه
ليل : نسيت وانت مسألتش
صافي : سارة تروح لمامتها اسكندرية .. ازاي متقوليش وتقولك انتي
ليل : نعم !
صافي : اقصد يعني اننا اصحاب اوي من قبلك
ليل : والله انا اللي كلمتها اتطمن عليها .. وتقريبا لو كنتي اتصلتي بيها كانت هتقولك ولا ايه
صافي : اه صح انا مكنتش بكلمها خالص .. هبقا اطمن عليها .. المهم انتو هتعملوا ايه دلوقتي
اسر : انا لازم اروح لوليد.. ليل يلا علشان اوصلك
ليل : ماشي يلا
اسر : عن اذنك ياصافي
صافي : اتفضلوا

ليل : اسر انت لاحظت ان صافي هادية
اسر : اه بقيت غريبة اوي ..
ليل : دي لا غارت عليك ولا اتعاركت معايا ..
اسر : اكيد مامتها فهمتها ان انا وهي أصحاب بس .. كويس بردك علشان ميبقاش ف مشاكل بينكم
ليل : بس انا مش مرتاحة .. هدوئها دا مش طبيعي
اسر : لا ان شاء الله ميكنش ف حاجة ..
ليل : ان شاءالله

______________________

في المطعم ○
الجرسون : حضرتك تأمر بحاجة تانية
سائر : لا شكرا اتفضل
نور : ها بقا قولي كنت عايزني ف موضوع مهم
سائر : نور انتي لسه كل دا ثقتك فيا مرجعتش
نور بخبث : لا
سائر : للدرجة دي يانور مبقتيش قادرة تثقي فيا
نور : بصراحة اه
سائر : طب وبعدين فضلك وقت قد ايه علشان ثقتك فيا ترجع وتوافقي اني اتقدملك
نور : يعني سنة سنتين تلاتة
سائر : نعععععممم
نور : وطي صوتك ياسائر الناس
سائر : حاضر هوطي صوتي .. قولي بقا
نور : طيب هقولك .. بصراحة انا ثقتي فيك موجودة مراحتش زي ماقولتلك .. لو مكنتش واثقة فيك مكنتش اديتك فرصة .. انا من وقت ماسافرت وانا واثقة انك هترجعلي تاني
سائر فرح : بجد .. طب حلو اوي .. اومال كنتي بتقولي كدا ليه
نور : بصراحة كنت عايزة وقت افكر ف الموضوع
سائر : طب ها فكرتي ولا ايه
نور هزت رأسها وهي مبتسمة
سائر : ايه ؟
نور : موافقة

_________________________

وليد : اسر .. ادخل
اسر : عامل ايه انهاردة
وليد : الحمدالله بقيت احسن من الاول بكتير طبعا .. انت ايه اخبارك وليل عملت معاها ايه
اسر : كويسين .. اومال فين الممرضة ..
وليد : ممرضة ايه .. اه انت صدقت ولا ايه انا مجبتش حد يقعد معايا .. انا ساعدت نفسي.. واخد ع كدا ياما تعبت وكنت لوحدي

اسر : وايه لازمة الشويتين اللي عملتهم قدام سارة
وليد : عادي المهم هي عاملة ايه
اسر : سارة سفرت اسكندرية وهتستقر هناك
وليد اتضايق وملامحه اتغيرت : كويس كدا احسن لها .. المهم تشرب ايه
اسر : اشرب ايه ؟.. انت معندكش دم يابني .. البنت سفرت بسببك
وليد : ليه يعني وانا عملت ايه
اسر : معاملتك ليها دايما بتتعمد تتجاهل وجودها .. وتصرفاتك مع البنات اللي حواليك .. كانت مستحملة كل دا بس انت زودتها عليها ياوليد
وليد : مكنش ينفع اعاملها بطريقة غير دي .. واهي الطريقة نجحت وبعدت
اسر : اشمعنا هي اللي تعاملها كدا .. مانت كويس مع كل اللي حواليك ليه هي بالذات
وليد : علشان هي غيرهم .. هي مش زي ولا واحدة فيهم علشان اعاملها زيهم .. سارة كانت مختلفة دايما ف نظري .. ومش هقبل اخليها زي اللي عرفتهم ولا تكون واحدة منهم
اسر : معني كدا انك بتحبها
وليد : يوووة اه يااسر بحبها ارتحت
اسر : طيب ليه بتعاملها كدا طلما انتو الاتنين بتحبوا بعض ليه تخليها تبعد عنك
وليد : علشان مش عاوزها تنجرح .. بعدتها وعملتها كدا .. من وقت ماحسيت حبها ليا وانا بحاول ع قد مااقدر اتجنبها وابعد عنها ..
اسر : مش فاهمك بجد بتحب واحدة وهي بتحبك ايه اللي يمنع
وليد : وايه فايدة الحب و ف النهاية مش هتجوزها
اسر : مش هتتجوزها ليه ؟؟
وليد : علشان انا مش هتجوز اصلا .. مش هكرر اللي اهلي عملوا فيا
اسر : يعني ايه مش فاهم وايه اللي اهلك عملوا
وليد : يعني مش هتجوز انا هعيش حياتي لوحدي .. لحد مااخلص كلية واسافر لوحدي بردك .. متجوزش و اسافر اشتغل برا وارمي ابني هنا يعيش لوحده زي ماهما عملوا فيا
اسر : ايه التفكير دا ياوليد ! انا اول مرة اسمعك بتقول كدا
وليد : دا مش تفكير دا قرار مش هسمح لابني يعيش العيشة الي عشتها تاني
اسر : وليه كدا اصلا ماتتجوز وتعيش هنا عادي
وليد : مش بالسهولة اللي انت متخيلها دي يااسر .. دا نظام عندنا ولازم اتخرج واسافر امسك شغلهم ..
اسر : يعني هتسيب حبك كدا يضيع علشان خاطر تفاهات ف دماغك
وليد : اسر دا قراري خلاص .. وسارة سفرت وان شاءالله هتلقي الاحسن مني .. انا مستهلش سارة اصلا
اسر : فعلا ياوليد انت متستهلهاش
__________________________

صافي : بابا انا كنت عاوزة اتكلم معاك ف حاجة
فاروق : اتكلمي ياحبيبتي
صافي : لا ف المكتب لوحدنا
هدي : اسرار بقا وكدا ماشي ياستي انا ممكن اقوم عادي
فاروق : لا خليكي انا هقوم معاها ع المكتب .. يلا بينا

سائر داخل مبسوط : باباااا
فاروق لف : سائر .. خير .. شكلك مبسوط
سائر : اه جدا .. كنت عاوز اتكلم معاك
فاروق : لوحدنا بردك ؟
سائر : لالا هنا عادي .. انا عاوز اخطب نور
هدي بفرحة : الف مبروك ياحبيبي الف مبروك
فاروق : نور الألفي ؟
سائر : أيوة يابابا هي في غيرها
هدي : مالك يافاروق
فاروق : لا ماليش بس مستغرب هي وافقت بعد اللي حصل
سائر : أيوة وافقت يابابا الحمدالله
فاروق : معني كدا انك مش هتسافر تاني
سائر : لسه مقررناش بس اللي يريحها انا هعملوا
فاروق : اذا كان كدا ماشي انا هكلم احمد ف الموضوع .. مبروك مقدما
سائر : الله يبارك فيك يابابا
صافي بتكلم نفسها "حلو اوي كدا جتلي ع طبق من دهب مفضلش غير اني اقول لبابا "
صافي : مبروووك ياسائر ياحبيبي
سائر : الله يبارك فيكي .. عقبالك ياصغنن
صافي : ان شاءالله .. يلا يابابا بينا
سائر : ع فين
صافي : عاوزة بابا ف موضوع كدا
سائر : خير
صافي : هتعرف بعدين .. يلا عن اذنكم بقا

هدي وسائر : ربنا يستر

_________________________

ف أوضة نور ○

احمد : ممكن ادخل
نور : بابي طبعا اتفضل
احمد : اخبار عروستنا القمر ايه
نور اتكسفت : تقصد ايه بعروستنا دي
احمد : ع بابي بردك .. ماشي يانور ع العموم فاروق كلمني عن سائر .. وهما جايين بكرا
نور بفرحة : بكرا بكرا انت بتتكلم بجد يابابي
احمد : والحاجات دي فيها هزار بردك .. الف مبروك ياحبيبت بابي
زين : مبروك ع ايه متفرحوني معاكم
احمد : فاروق جاي بكرا يطلب ايد نور لسائر .. لازم بكرا تكون موجود
زين : طبعا هكون موجود .. مبروك ياحبيبتي
نور : الله يبارك فيك يازين عقبالك
احمد : اتكي ع كلمة عقبالك
زين : لا متتكيش اوي لتستجاب بجد
احمد : يا سلام وانت مش عاوزها تستجاب ليه يعني .. هتفضل قاعد ف ارابيزي كدا كتير
زين : مش وقته يابابا .. المهم دلوقتي نفرح بنور
احمد : ماشي يازين بس هنتكلم تاني ف الموضوع دا
زين : ان شاءالله
_____________________

○ اليوم التالي ○

عايدة واقفة ف المطبخ وقمر دخلت
قمر : عيودة حبيبتي .. بقولك اخلعي بقا انتي انهاردة شوفيلك حاجة تعمليها علشان الليلة دي انا هقوم بيها .. وهعمل الاكل كله للضيوف اللي جايه
عايدة : ابدا مايحصل ياست قمر دا فيها طردي المرة دي
قمر : طردك ليه انا اكلي معجبهمش ؟
عايدة : لا طبعا دا عجبهم جدا وبالاخص الأستاذ زين .. بس احمد بيه محرج عليا انك تعملي حاجة تاني وقالي دا شغلك ياعايدة.. وانا مش هكسر كلامه
قمر : شغل ايه ياعايدة احنا كلنا قعدين ف بيت واحد مافيهاش حاجة لما نساعد ... وبعدين دي حاجة مني ل نور ودا اقل حاجة اقدمهالهم يعني من اللي بيعملوا معايا
عايدة : ابوس ايدك ياست قمر خرجيني من الموضوع دا .. ردي الجميل ف حاجة تانية .. انا ماليش مكان غير هنا ومعنديش استعداد اخسره
قمر : طب انا عندي فكرة .. انا هعمل الاكل وكأنك انتي اللي عاملة
عايدة : لا بردك هيعرفوا
قمر : ياستي هما هيركزوا في مين طبخ ومين مطبخش .. هما هيركزوا مع الضيوف .. اسمعي مني بس .. الاكل كتير اوي هتلحقي تعملي كل دا .. انا هساعدك .. وانتي روحي اعملي اي حاجة تانية ..
عايدة : ماشي ياست قمر بس محدش هيعرف زي ماقولتي .. وتاخدي بالك لحد يشوفك
قمر : من عنيا

_______________________

ريم بتضحك : بصي ياماما الحتة دي بتفصلني
مني : سارة ياحبيبتي تعالي اتفرجي معانا ع الفيلم
سارة : اتفرجي انتي ياماما .. انا هنام علشان تعبانة
ريم : هي من ساعة ماجت وهي تعبانة كدا
مني : بس يابنت عيب تكلمي ع اختك الكبيرة كدا
ريم : اقول ايه يعني مش دي الحقيقة .. وبعدين انا لسه متعودتش عليها
مني : طب اتفرجي وانتي ساكتة بقا ممكن
ريم : حاضر حاضر

___________________

زين بيدور ع عايدة ودخل لقي قمر ف المطبخ هي اللي بتعمل اكل ..

زين : انتي بتعملي ايه هنا !
قمر بخضة : بسم الله الرحمن الرحيم .. مش تكح وانت داخل ولا اي حاجة فجعتني
زين : ردي بتعملي ايه هنا
قمر بتوتر : بعمل ايه هنا .. انا
زين : ها ؟؟
قمر : طيب هقولك بس اوعدني انك مش هتقول لحد
زين : ع حسب
قمر : بص بصراحة انا اللي هعمل الاكل انهاردة .. بس متقولش للاستاذ احمد
زين : مقولهوش ليه بقا .. علشان لما تحطي سم ف الاكل عايدة الغلبانة تلبسها
قمر بعصبية : سم ايه اللي احطه انت عبيط
زين : احترمي نفسك .. انا برغي معاكي ليه .. انا هروح أبلغ بابا

قمر مسكته : لالالالا استنااا بس
انا اسفة ارجوك متقولهوش .. انا وعدت عايدة واستاذ احمد لو عرف انها خلتني اعمل هيطردها .. وانا مش عاوزة اتسبب ف اذي ليها .. انا بس عاوزة افرح نور واشرفها قدام الضيوف بس مش اكتر .. لا سم ولا غيره
زين بصلها وساكت
قمر : ها قولت ايه .. هتقولو
زين : لا
قمر فرحت
زين : مش علشانك علشان عايدة غلبانة بس
قمر : المهم متقولهوش وخلاص
زين : ماشي بس انجزي علشان الناس زمانهم جايين
قمر : حاضر
زين خرج
وقمر بتتريق عليه وبتقلده : مش علشانك دي علشان عايدة غلبانة .. انسان لزج

تونة : كلامك لوحدك كتر هنبتدي نجبلك دكتور كدا يطمنا ع حالتك
قمر : خدي ياتونة تعالي عاوزكي
تونة: عاوزة ايه انا مش فضيالك
قمر : ليه ياختي وراكي ايه
تونة : عاوزة اطلع اساعد العروسة
قمر : تساعدي العروسة ولا تحطي من الي هتحطوا العروسة
تونة : الاتنين ✌🏻

قمر : لا بصي فكك من الكلام دا انا عاوزكي تقعدي قريب من المطبخ .. اي حد يجي تيجي تبلغيني بسرعة مغهوم
تونة : هتدفعي كام
قمر : مادية حقيرة
تونة : انا اطلع اشوف نور حبيبتي
قمر : لا استني هديكي اللي انتي عاوزة بس يلا روحي بسرعة
تونة : ماشي

___________________
فاروق : انا جهزت
هدي : وانا كمان خلصت .. وسائر كمان جاهز من نص ساعة
فاروق : مستعجل اوي
هدي : اه طبعا بيحقق حلمه ربنا يفرحه
فاروق : يارب .. اومال فين صافي
صافي جاية تجري بالفستان : انا جهزت خلاص
هدي باستغراب : ايه الحلاوة دي ياصافي .. انتي عاوزة تغطي ع العروسة ولا ايه
صافي ضحكت : لا مش هغطي عليها بس مش بعيد اكون انا كمان زيها
هدي : انتي تقصدي ايه
فاروق : متقصدش حاجة يلا طلما كلنا جهزنا يلا نروح
سائر : اومال فين سهر

سهر : معلش ياسائر مش هقدر اجي
هدي : ليه ياسهر كدا تعالي معانا فكي عن نفسك
فاروق : محصلش حاجة يعني تبقا تعوضها بعد كدا .. دي قعدة كلام بس مش لازم تكون موجودة
سهر : فاروق عنده حق .. وكمان انا راجعة تعبانة مش هقدر اجي متزعلش ياا حبيبي ماشي
سائر : ماشي هسامحك المرة دي بس بعد كدا مافيش اعذار
سهر : باذن الله
فاروق : يلا بينا
صافي : يلا باي ياسهر
سهر : بااي

موبايلها رن
سهر : الو .. ايييه انتي متأكدة .. رجع من السفر انهاردة .. ماشي .. تمام .. تمام .. شكرا اوي انك قولتيلي .. بااي

_______________________

العيلتين سلموا ع بعض وقعدوا .. ونور وسائر جنب بعض ومبسوطين

احمد : منورني يافاروق والله انت و مدام هدي وصافي حبيبتي .. وعريسنا
فاروق : منورة بيك يااحمد .. ياااه اخيرا من زمان واحنا مستنين اليوم دا .. فاكر وهما صغيرين لما اختاروا بعض واحنا قولنا هنجوزهم لما يكبروا
احمد : واهو كبروا وكبرونا معاهم
الكل ضحك
نور : نكبرك ايه بس يابابي انت لسه صغير
اسر : طبعا دا لسه شباب كمان
احمد : يابكاشة انتي وهو .. قال شباب قال

" الكل ضحك ومبسوط ونور بتبص ل سائر و صافي بتبص لأسر وهو مستغرب "

هدي : طيب عن اذنكم انا هروح الحمام
احمد : استني اناديلك عايدة توصلك
هدي : لا لا خليها انا هعرف السكة متقلقش
*موبايل زين رن *

زين : طيب استأذن بس ارد ع المكالمة

احمد : اتفضل .. ها كنا بنقول ايه

فاروق : كنا عاوزين نعرف انت موافقتك ع سائر
احمد : انا موافق طبعا وانا هلقي احسن من سائر لنور
سائر بفرحة : طيب نقرأ الفاتحة بقا
فاروق : استني

_________________________

هدي بتدور ع الحمام مش عارفة فين دخلت المطبخ
هدي : بعد اذنك ياحبيبتي الحمام منين

قمر لسه بتلف شافت هدي وقفت مصدومة : انتي !!!
هدي : قمرر انا مش مصدقةة .. قمر ياحبيبتي كبرتيي ..
" راحة تحضنها قمر منعتها "

تونة داخلة تجري ..
قمر : تونة ايه جابك هنا
تونة : جاية اقولك ان الست دي جاية ع المطبخ زي ماقولتيلي
هدي بفرحة : مين دي ياقمر بنتك
تونة : لا مش بنتها .. انا اختها
هدي : اييه ؟؟

________________________

سائر : نستنا ايه يابابا مش كلنا فرحانين وموافقين .. يبقا نقرأ الفاتحة
فاروق : لا نستنا لغاية لما نخلي الفرحة تبقا فرحتين .. ولا انت عاوز تفرح لوحدك ياسائر ..
احمد : انت تقصد ايه يافاروق
فاروق : احمد بيه انا بطلب ايد نور ل سائر ابني .. واسر لصافي
الكل وقف من الصدمة

______________________

تونة : اختها .. اختها
قمر بتوتر : روحي ياتونة دلوقتي العبي برا
تونة : في ايه ياقمر انا عملت حاجة
قمر اتعصبت : تونة بقولك اخرجي اسمعي الكلام
تونة : حاضر

" طلعت قدامهم بس وقفت استخبت "

" وزين كان معدي من ناحية الباب اللي ف الجنينة شافهم وقف يسمع "

هدي : اييه اللي بتقولو البنت دي اختك ازاي
قمر : اظن دا شئ ميخصكيش ف حاجة ..
هدي : ايه الأسلوب الي بتتكلميه بيه مع امك دا ياقمر
قمر : امي ؟؟؟؟ بآمرة ايه معلش .. انتي مش ام اصلا ولا ينطبق عليكي اي معاني الأمومة . . اللي تسيب عيالها وتهرب تبقا مش ام
هدي دمعت : اوقات بنعمل حاجات بتكون غصب عننا بس مافيش حل تاني غيرها
قمر : بجد والله والحاجات دي كان حلها الوحيد انك تسيبي بناتك !!
هدي : قمر انتي عمرك ماهتفهميني .. ف حاجات مش هينفع اتكلم فيها فات أوانها خلاص
قمر : ومين قالك اني عاوزة افهم حاجة اصلا .. اتفضلي روحي مكان ماجيتي
هدي : بس انا عاوزة افهم البنت دي مين وليه بتقول ع نفسها اختك
قمر : في حاجات مينفعش تتقال
هدي : البنت دي مين وحكايتها ايه ياقمر .. واختك منين انا مخلفتش غيرك انتي وليل .. اكيد كتبتيها بإسمي انا وابوكي صح
قمر بعصبية : اه مش بنتك واه كتبتها ع اسمك انتي و بابا وبقيت اختي
هدي: وهي بقا تبقا مين وبنت مين
" قمر ديرت وشها وحاولت تتماسك .. ومتعيطش "

هدي شدتها من ايدها :بصيلي هنا وانا بكلمك .. البنت دي بنت مين .. متقوليش انها تكون بنتك وانتي جبتيها ....
قمر اتعصبت : لاااااا اوعي تقوليها اوعي .. انا استحالة اعمل حاجة غلط اوعي تجيبي سيرتي بحاجة وحشة .. البنت دي انا لقيتها لما اتولدت عند جامع وخدتها وربيتها .. وربيت ليل اللي انتي سبيتيها وعمري مافكرت اعمل حاجة غلط.. تيجي انتي دلوقتي تتهميني مش هسمحلك ابدااا
" تونة سامعة الكلام وعمالة تعيط جامد وطلعت تجري "

_______________________

اسر : ايه اللي بتقولو دا
فاروق : زي ماسمعت يااسر انت هتتجوز صافي واختك هتتجوز سائر .. والفرحة تبقا فرحتين ولا ايه يا احمد
احمد : بس انت متفقتش معايا ع كدا .. انت اتفقت انك جاي تطلب ايد نور
فاروق : محصلش حاجة يا احمد .. واحنا فيها اهو اديني قولت .. فين الاعتراض بقا ولا انت مش عاوز بنتي يااحمد
احمد باحراج : لا طبعا بنتك يتمناها الف واحد ... بس الحاجات دي مبتجيش كدا

فاروق : انا قولت اللي عندي .. قراية الفاتحة هتتقرأ للاتنين
احمد : افهم من كدا ان الاتنين قصاد بعض ياكدا يامافيش
فاروق : لا مافيش ليه .. انتو خدوا وقت فكروا
سائر بعصبية : يعني ايييه يابابا .. يعني انت جاي معايا علشان صافي مش علشاني
فاروق : علشانكم انتو الاتنين
اسر واقف هينفجر بس ماسك نفسه علشان اخته
نور بصيت لأسر: انا مش موافقة
سائر : ايه اللي بتقوليه دا يانور
نور : زي ماسمعت انا مش موافقة .. انا مش صفقة انا واخويا والدك جاي يعملها ومش هقبل ابني سعادتي ع تعاسة اخويا
صافي: تعاسته !!
نور : اه تعاسته وانتي عارفة كدا كويس .. اسر مبيحبكيش .. وانتي عاملة الشويتين دول علشان تكسري اخويا وتخلي يوافق عليكي علشان ميزعلنيش .. بس انا مش هسمحلك بكدا
صافي : ايه اللي بتقوليه دا .. اسر بيحبني انتي واحدة كدابة
اسر : اخرسيي ... انا كنت بقول احنا عشرة وأصحاب بس انتي واحدة معندكيش دم .. وانتي لو آخر واحدة ف العالم مش هتجوزك بردك ياصافي

فاروق اتعصب وقام : احنا بنتهزق في بيتك يااحمد ..
احمد : انت طلبت طلب .. وهما ردوا عليك يافاروق بيه .. ماليش اتدخل انا
فاروق بيبصله بتوعد: ماااشيي ... هددددي يااهددددي

قمر : مش خلاص عرفتي اللي عاوزة تعرفيه .. اتفضلي روحي ماكان ماجيتي .. وانسي انك شوفتيني
هدي : قمر اسمعيني

فاروق نادي تاني
قمر ديرت وشها : مش عاوزة اسمع اتفضلي ماكان ماجيتي

هدي خرجت

" وقمر زقت الحاجات اللي قدامها كسرتها وانفجرت من العياط "
زين دخل بسرعة مسكها : اهدي انتي كويسة
قمر بتعيط: مش كويسة .. لييه عملت كداا فينااا ليه اتخلت عننا .. انا عاوزة اعرف ليييه سابتنا ليه بعدوا عننا كلهم .. ليه يخلفونا وهما مش عاوزنا .. هفضل لحد امتا استحمل كل دا لوحدددي انا تعبتتت

زين : انا حاسس بيكي .. بس اهدي هيجرالك حاجة

عايدة داخلة تلطم : يلاااهوووي الحقييييييي ياااقمر تونة واقفة ع السطح و عاوزة ترمي نفسهاااا

قمر بخضة : ايييه !!!!!!

________________________

الكل كان فرحان بس مكنوش عارفين اللي صافي مخططاله كسر فرحة نور وسائر.. ياتري سائر هيتخلي عن نور ولالا .. وايه هيحصل لتونة .. هنعرف الأجزاء الجاية .. رايكم يهمني

لقراءة الفصل التالي اضغط على (رواية حكاية قمر
reaction:

تعليقات

5 تعليقات
إرسال تعليق
  1. https://www.facebook.com/ابتسامه-ـ-Smile--104057608439966/


    صفحتي ع الفيسبوك ارجو المتابعه والتشجيع

    ردحذف
  2. حلو جدا بس امتي باقي الرواية بليز

    ردحذف
  3. ارجو الرد بقية فصول حكاية قمر

    ردحذف

إرسال تعليق