رواية كحل عرب الفصل الثالث والسبعون 73 بقلم زينب ماجد
رواية كحل عرب البارت الثالث والسبعون
 |
| رواية كحل عرب الفصل الثالث والسبعون 73 بقلم زينب ماجد |
رواية كحل عرب الجزء الثالث والسبعين
((( بقلم زينب ماجد )))
الحلقة_73
( خنجر وراديون )
تكتر ...
بلچي اقنع الروح ..
روحي الما عليها اگدر .
(عريان السيد خلف)
هدية : جان الجو ظهرية و امي خلت بنات ستير عدي عبن امهن جالها طلوك مستعجل وركضت مهرفه اعلى الجدة خاطر تجيبها .
لالة جويعدة بحجرتها و ايمان ويا جهالها .. لهساه ابوي ما رد من كون يريد يعرف شنهي تاليت جسام ، دش علينا ونشد : جا امجن وين
- يسرى تطلك و خذتها للجدة .
- وديتو خبر لاهلها لو لا ؟
- لا والله ياهو اليروح ما عدنا احد .
- انا راح اروح اشوفهم ، وانت حضرن فراشها بوية خافنها تجي المكرودة ارملة و الفرخ يتيم ديرن بالجن اعليها
- ما عدنا شي وياها بويه وانا عزلت حجرتها و فرشتها و ناطرة تجي
- خووووش بعد ابوج
مشى عني وانا اعاين لطوله من كون هو موش متواجد ويانا دوم لجن هالكثر احبنه ويو اجا كلبي يفرح بوجودة بالبيت ، احس البيت دافي يو هو موجود.
ويا ما طلع ، انا هم فتحت الباب و خليت البنيات يلعبن بالباب .. واميدي كاعد اعلى كتر يلعب ويا ولد الجيران صگله .. ويا ما طلعوا جهالنا صارت جوكة ابابنا البنيات يلعبن بيت بيوت والولد طوبة و صكله.
عاينت لزمن مكترة روحها عن البنيات .. وكاعدة لوحيدها دايرة وتحجي ويا روحها .. هي حولة و البنات يضوجن يلعبن وياها .. ما تعرف تلعب هالتعزل روحها وتحجي ويا روحها .
صحت اعليها: زمونه عمة
اندارت تعاين جدامها ، كتلها : تعاي حذاي .
اجت كعدت يمي .. لميت شعرها و كتلها : عليش ما تلعبين و يا البنيات ؟
- ما اريدن
- لا عمة حبيبتي العبي لا تظلين وحيدج
- انا العب ويا صحباني
- صحبانج يا هم ؟
- صحباني
كعدتها يمي و كتلها : اكعدي يمي
- امي راحت
- هسه تجي راح تجيبلجن اخو تلعبن وياه و تحبنه
- لا امي ماتت .
- اسم الله لا تكولين هيج عمة هسه ترد الكم ما بيها شي .
- صاحبي كال
- ياهو صاحبج
- هاذ
اشرت بصفها بس هي حولة عدالي تكصد واحد من الجهال ، تشوفه بصفها .. كعدتها و كلتلها : كعدي هنا عمة ليما ترد امج
البنيات يطفرت و بتي زمو اطفر وياهن و جيف نجوى المسيجينة عرجة وما تكدر اطفر ادمغ اعلى راسها ، صحت : ولج نويييييسة لا اطكينها
- ما احبهااااا
- وعساج لا حبيبتيها ميلي عنها .
ذيج جت تبجي و كعدت بصف اختها .. عاينت الهن : لا والحظ من حظجن يا عمة هم مريضات و هم ابوجن مامش .. الله يرحمك يا خوية .
جويعدات يلعبن .. اجت جيرانة كعدت وياي ولالة اجت كعدت .. وكعدنا بعتبة الباب نسولف وايمان واكفه وكاضة الباب و تسولف ويانه بس جميرة داخل تقرا .
نزل المغرب كلت خل ادخل الجهال ما يصلح بعد اللعب والسوالف ، خل انطب ، كمت من مجاني وانا اسولف ويا بت الجيران ولالة كاعدة ، صحت اعلى الجهال : يااااله ولكم دشوا نزل المغرب والمومن يمجد ما يصلح اللعب يااااله .
نويسة عارضتني وما ترضى ترد دشيت خذيت العودة و طلعت خاطر ادخلهم كوة ... ويا ما طلعت ولني اشوفن امي اجبلت اعلينا .. وتركض امي واعرفنها وركضتها هاي موش خالية لزوم جايبة علم موش زين .
ويا ما اجت ولطمت و تصيح : يسرى ماتت
لطمت اعلى خدودي : يممممه صكد ماتت ؟
كامت تلطم وتبجي وتصيح : يحظ بنياتك يستااااااار يمه ، تيتمننننننن ولك يمممه.
كمت اصرخ و ابجي وياها .. لالة تبجي وايمان و الجهال صاروا هوسة ، الجيران التمن و امي تصيح
كفت صياحها وكالتلي : ابوج و امها خذوها بتكسي للمستشفى ، و الفرخة ظلت عد الجدة ، خايبة تيهيت دربي ولج هديوة يمه .
- شلون ماتت شلووون
- تعسرت ولادتها ونزفت جثير ليما ماتت ، انا لزوم اروحن للمستشفى اخذ المستمسكات واروحن ، انت روحي للبت يمه ..
حجتها و طلعت و هي تحس بدموعها ، انا وصيت البنات يلملمن البيت كبل لا تجبل الوادم ، و كضيت عباتي وردت اطلع ، عرضتلي بتي ، شالتها عني جميرة و كضيت الدرب للجدة .
اول ما وصلت ليغادي و لنها تكلي : البنت الحكي بيها للمستشفى اسبيعية و خافنها تموت ما تحتمل الرية مالتها بعدهي موش طويبة اركضي.
صكد و داشيل البت وانا دموعي هماله مدري اعلى هالبت النولدت لا ام ولا اب مدري اعلى حظ اخوي المايل مدري اعلى حظ بناته الورثن حظه .. مدري اعلى ياهو الأبجي والاجي همه.
طلعت اعلى الشارع العام اركض بالبت ، وكفيت سيارة و نعله ابو السيارة يطلع واحد من ال ثجيل ما عرفني لجن انا عرفته صعدت وياه و كلتله : فدوتك خوية انا بت حاكم اركض بيه للمستشفى البت راح تموت.
شطح السيارة خلى بس الثعوالة وراه وطار بينا طيران من الخوفة كلت راح يكلبها بينا و الطريج موش عدل .. وكضى الدرب ينشدني ليما عرفني مرت فليح ..
انا كلبي خلصان وهو ينشدني اعلى فليح و اهله ، خاب كتله : خوية دمش فضنا البت راح تموت .
والله وصلاني الباب المستشفى .. دشيت وانا انشد اعلى الخدج .. كتبولي بيها مدري شني و دخلوها خدج خلوها هيج بكفص شفاف وهي لحيمه ترفه يخاف الواحد يكضها وياذيها .
كعدت جدام الخدج انوحن وابجي ، صكد و لحكاني ابن عمي التعرفت اعليه من تالي ، جا هم ولد ثجيل ب٦٠ واحد و احفاده احنا لا ننعد ولا ننحصي.
صفنت ويا روحي ودميعاتي اعلى خدي و اتضكريت بت ستار من تكلي (امي ماتت و صاحبي كلالي ) هاي شدراها ؟
مدري حرت بهالبت منين جاها العلم لجن الضيم اعلى افادي نسانياها و خلاني اضكر يسرى ، كمت اتبارى وياها الذمم ، بريتها الذمة و دعيت الله يخليها تباريني الذمة ..
شواي ووكف وياي ابن عمي : اكلج خوية جا هسه شني تظلين هنا يو شلون
- جا يبعد اختك وين امش واهد البت ما تعاين شلون حاطين هالواحد بخشيمها .
- انا ما عدي مانع اظلن بس خاف اهلج ما يدرون انت هنا
- خلني وامش اطيهم خبر .
- جا خوش
شال جم فلس من جيبة و كال : هاي خليهن حدر ايدج ولو ما يسون بس خاف تعتازين
- يطيك العافية خوية
........
جمارة : لالة كضت بنات المرحوم وانا كضيت نوسة و الناس نكلب على البيت من كل صوب ، و كل التجي لزوم نجابلها ونبجي وياها .
انا استحي ابجي و اجابل النسوان .. وايمان ما تعرف ، بس لالة وجيرانة المنا ومنا حبايب امي ،كامت الناس ادش وتكعد .
ليما بالليل جابو التابوت مالت يسرى كمنا نتصارخ ونبجي ، الصكد انا ما جنت احبنها من كون هي جانت تسوي مشاكل بس من شفت التابوت و شفتها ميته ، لا دموعي نزلن وكمت ابجي .. وباريتها الذمة ولالة تصيح : مسيجينه ابرنها الذمة خايبات ماتت والدة .
ايمان: ما احبها و اكرهه بس الموت يخوف واني ما اتمنى الموت العدوي ومن شفتها بالتابوت واهلها يتباجون اني هماتين كمت ابجي ... لما كاالت لالة ابرنها الذمة ... بريتها الذمة و كلت الها : مبرية الله يغفرلج اعمالج .
جمارة : صاحت علي امي و كالت : هدية وين ؟
مسحت دموعي :- لهساها ما ردت
- انا بس كتلها امشي جيبي البت من الجدة وين ولت هاي .
- جا يمه مو وكت تلعب لو تمشي اكيد طرالها طاري و اضطرت تتاخر
- جا انا اريدن اروحن للدفنه غير اوصيهاااا .
- وصيني ومن ترد اكللها .
ظلت توصيني على البطانيات و الاستكاين ، و البنات و النضدة وعينج اعلى البيت ولا تخلين الجهال تمش يم الحلال ... ومن هالحجي .
راحوا امي وابوي ويا الدفانه وطلعنا كلنا نشيعها نسوان وزلم ليما وصلناهم لراس الشارع .. عاينت اعلى يمنتي ، خنجر ليغاد يمشي ويعاينلي جيف ابجي .
رديت و شايلة نوسة على اجتافي .. هي جبيرة موش زغيرة عمرها ٦ سنوات بس من تغيب امها تكوم تتعاير علي و الا اشيلنها يالة تسكت ... وهاي امشي وانعثل بيها.
رديت للبيت نسوان عمامي من ال ثجيل كلهن بالبيت .. وخوالي ونسوانهم و الناس هوسة .. ذبيت بت هدوة من افادي ورحت شدشديت غريضات امي الوصتني عليهن.
واحد صاح من الباب : ياهو هنا
طلعتله عمتي و هي تكله : ها محسن
- اكلكم مرت فليح لوحيدها بطرك بت انفاس بالمستشفى شنهي اهلها ما اجو من الدفنه
- خايب توهم طلعو يا دفنه ، للصبح يالة يدفنون بالليل ما يجوز .. هي شعدها غاد
طلعتله سلمت عليه ، كال : انت ياهي
- انا اخت هدوة
- اللهم صل اعلى محمد وال محمد حاكم عده هيج بت وضامها .
ضحكت عمتي و هي تغطي وجهه بشيلتها و تكله : فلشك كون جا وكتها يمدهور .
- هدوة وين ؟
- بالمستشفى يبعد شيب اهلي .
يحجي وهو بالحوش و الباب مفتوح و خنجر ليغاد عن الباب واكف لمحته مر و هو يشيل عيونه طرف و مدنج .. خاطر افهم وادشن .
ما كلت باطل دشيت بساع و هو ظل يحجي ويا عمتي .
تكله : رجلية ما يعنني امش خلها للصبح و نروحلها .
انداريت الاله : اكلج اروحن لهدوة لو عيب ؟
- يا دية شتروحين بهالليل وياهو الياخذج
- جا تظل وحدها
- شعليها اكعدي .
تانيته يمش هاذ محيسن خاطر اطلع واوصي خنيجر يمش لهدوة من كون راحت ومامش وياها خيزدان ولا فلوس بطرك العباة .
هدت الوادم و الليل جلجل وناس هودت .. وناس مشت للصبح ويا الدفانه يجون ... نومت بت اهديوة بحجرة لاله و طلعت وانا اعدل بحجابي .. توني طلعت
اجاني الصوت : هااا
انداريت .. خنجر بس ازلام ليغادي ، اشرتله يجي وهو يخزر ويكلي روحي : تعال شمالك
اجا مهرف : ولج الوادم منا من يشوفونج تندهين علي شيكولون عنج دطبي جوا
- جا انا شعدي وياك جاي اوصيك اعلى اخيتي غاد لوحيدها ؟
- ياهي ؟
- هدوة بايته بالفرخة بالمستشفى .
- اي دطبي وانا اخذ سيارة سرحان و امش ليها اشوفنها شمعتازة
- جا خوش .
- هنااا
- ها
- مرت الاخرى يو طلعتي لولد عمج الغمان وعلي الا احطن الجيلة برجلج و اكعدنج طول عمرج .
- دمش لا يسمعك احد
طلع وتمشى لبيت سرحان .. دك الباب سرحان جان كبل شواي راد من التشييع .. صاف سيارة و داش ابيته ، دك الباب وكال للحارس : بس كل السرحان اريدن السويج مالت السيارة هدوة بت حاكم لوحيظها بالمستشفى .
الحارس اطه خبر للاهل .. مشت ردحة و دكت الباب اعلى حجرة سرحان ، صاح : تفضل
فتحت الباب وفخرية امدده ترضع ابتها ، و الجهال نايمين بالكاع : يمه هاذ خنيجر بالباب يرد السيارة
- لا يمه خنيجر ما ينطي بالليل يروح يسكر و يدعمها .
- لا يكول بت حاكم بالمستشفى لوحيدها ورايد يروحلها
- ياهي منهن
- هدوة
من سمع ياسمها كام من حيله .. جر الدشداشة من الزاوية وبدل بساع
فخرية : شني راح تروح توك اجيت
- خنجر ما اكدر اطي السيارة بالليل .
- لي جا لا تطي اكعد
- سحب الغترة مالته و طلع من البيت : ها خنجر
- بس السيارة
- هدوة يو غيرها البالمستشفى
- لا هدوة نايمة ابت اخوها المرحوم لوحيدها ، و جمارة وصتني امش ليها بس وين الاكي تكسي يو سيارة توصلني بهالساعة هاي .
- رد لبيتك وانا راح امش وياك.
- اتروح انت
- اي
صعد بالسيارة و طلع للمستشفى .. وصل غاد صف سيارته و نزل نشد الاستعلامات ما عرف بيا اسم بالخدش ، بس راح للخدج كبل .
هدية كاعدة بالممرة اعلى الكرسي متجية راسها اعلى ايدها ومغطية راسها بعبايتها و غافية، بالممر ، مر سرحان بس ما وجد بيها .. دور راد .. ما عرف .
ليما شبه اعلى المرة النايمة هدية ، كرب بس استحى يحجي و خاف ما تطلع هي ، بس هي هيست احد واكف احذاها ، فزت و عاينتله
سرحان : وانا صالي ساعة ادور عدالي مدري وينج و انت نايمة هنا يا بوية
- هلا لبو مامون
كمت اعلى حيلي : تفضل اكعد ، عليش كلفيت روحك .
- جا تظلين وحيدج هنا شنهي .
حجاها وكعد على واحد من الكراسي الصافيهن .. وهي كعدت بطرف حجت : طلعو للنجف يو بعدهم .
- اي كبل جم ساعة طلعوا .. شمالها البت
- سبيعية ما متتمة شهورها .
- وهالله هالبنيات ذن مكاريد ظلن يتيمات لا ام ولا اب هالنوب مريضات .
- حظهن بعد .
- شلونج انت
- شلوني دخيل بختك اعلى هالوضع هاذ يا حال حالي .
- لا تشيلين .. ربج موجود
- والنعم بالله .
ظليت كاعدة اعلى طرف و هو اعلى الطرف الاخر ، انا و هو بعد ما عرفنا شنفتح من موضوع .. طرى اعلينا السكوت وما اعرف شحجي يو شكلة و المستحى تلاكفتني بهالوضع هاذ .. انداريت اعليه خاطر اكطع هالسكوت : شنهي راح تظل هنا
تبسم : ما تريديني
- لا موش هيج بس الدنيا ليل وما اريدن اتعبنك وياي و اكطع نومتك .
- تكولين ليل و تريدين اهدج وحدج بهالليل
- ويو اجا احد
- لا تخافين محد حاطج اعلى باله غيري خاطر يجيج .
سكتت وما عرفت بعد شحجي ، كمت افرك بديه وكاعدة ، حجيت : البت ما سميتها حتى ما طرى اعلى بالي اسميها ..
- جا شكتبني بالطبلة مالتها ؟
- ما ادري هو الزلمة كتب
- يا زلمة
- الواكف غاد بالاستعلامات
- غليش اجيتي انت جا اهلها وين
- جا غير اهلها
- يا بوية اخوة فليح جثيرين ونسوانهم سرب مامش واحد منهم اجا ابدالج شنهي شواربهم ما تهتز و راضين مرة تبات بالمستشفى ابت اختهم وحيدها .
- جا الما عده احساس منين تشتريلة
- الله كريم .. جويعانة
- لا والله بس قلقانه اعلى امي من كون مشت للمكبرة وهي مريضة اخافن لا تون و تبجي اعلى كبر ستار واطيح .
- ابوج وياها
ظل كاعد يمي ما مشى ، هالنوب نعست واستحي انامن جدامه .. ليما طر الفجر ما ادري شلون نمت .. كعدتني وحدة و هي تحاجيني اعلى البت ..
كمت وياها للخدج .. اجا هو و كال : هدوة
انداريت ليه : هلا ابو مامون
- البت سميتها (ريحانة) وانا ما اريدن اظلن هنا خاطر لا اذيج بالحجي ، هاج هاي الفلوس خليها حدر ايدج وانا راح اخلي واحد من اهلج يجي يبات وياج .
- يطيك العافية انا من يوم يومي لساني معكود بشكرك من كون افضالك جثيرة
- افضال يهدوة ، الحجي هاذ يغثني
- عليش
- انا ما اتفضل عليج ، انت جنتي و لازلتي خاصتي و خصوصيتي وما ارضاها اعلى روحي غيري يكف وياج بساعة الضيج .. اغارن .
تبسمت : يطيك العافية ان شاءالله .
- هاذ رقم التليفون مالت البيت ، يو اعتازيتي خابري للبيت واطليي امي واحجي وياها وهي توصلي يو اعتازيتي شي .
مشى عني وانا ظليت ويا للبت .. ما طلعوها .. للمغرب يالة اجتني امي : ها ييمه
- ظل بالي يمج اخافن لا تبجين و اطيحين اعلى كبر استير
- كلبج يعلم يهديوة يمه ثغبت و صيحيت و طحت و علكولي مغذي
- عليش هيج يمه
- جا يمه هالوضاع هاذ شنهي امهن وابوهن ماتو و خلوهن اعلى افادي ، انا الياهو اعاين وياهو المنكم اعيننه انت و ابنيتي يو اختج ومدرستها وكتبها يو لاله و البطنها يو هالبنيات المريضات ذن.
حجت ودنجت تبجي : يمه جا انا وين رحت وياج وياج ما اهدنج
- الحمل صعب ييمه هد امتوني شبابي كضيته شايلة حملكم بلا والي و تالي شيب ما ارتاح اشيلن حمل الكل.
- جا ابوي موجود يمه كولي يالله و احنا موجودين لا تبجين هيج وعلي ينفطر كلبي و ما اتحمل دميعاتج يبعد اهلي و عشيرتي كلها انت
حبيت راسها و هي تحس بدموعها
- ظليتي وحيدج ييمه امس مت عيني
- لا اسم الله اعلى عينج يمه ، سرحان اجاني بالليل ظل للصبح
- ياااع اجا ليجاي
- اي والله المكرود كضى الليل جويعد بهالمجان ، نمت انا شواي وهو مسميها ريحانه و اطاني عالفليسات ذن ومشى .
- الله يطي العافية ، خايبة هديوة هم يكعد بختج ييمه وتحظين بهالزلمة هاذ
- جا موش جنتي ما تريدينه
- يمه ياهي الما تتمنى البتها وحيد مثل سرحان خيرة الزلم بس هسه و بعد صعب دام ثجيل وراج ما يطول اغطاج .
- الله كريم .
ظلت يمي شواي و مشت للبيت انا لا حضرت الفاتحة ولا دريت عنها كضيت ثلث تيام الفاتحة بالمستشفى ، اهل يسرى ما مروا ليجاي غير مريرة وحيدة وبعد ما مروا ، بس سرحان ريوك و غدا و عشا يجيب بوكته و بالليل يظل وياي خاطر لا يخليني وحيدي بس ما يكرب مني يظل برا خاطر لا يجيبلي الجلمة .
ظليت ويا البت هاي .. ٥ ايام ليما طلعوني للبيت ، بعدني اول يوم كضيته بس نوم من كثر ما تعبانه بالمستشفى ، لا جابلت احد ولا كعدت ويا احد رغم الناس تجبل اعلينا تواجب بموتت جنتنا .
وامي ناصبتلها مجلس كل يوم العصرية بحجة الفواتح تقرا و تنعى اعلى الحسين ونسوان السلف يلتمن عدنا .
لجن ما صفيت ولا كعدت بس نايمه ، ثاني يوم صحيت ولن لالة تطلك .. ونسوان عدنا عيب تهدن امي وتطلع ، هم خذيتها ورحت للجدة ..
كالت ما دامها والدة عملية كبل اخذيها للمستشفى ..
خذيتها ورحت لبيت ابوها خذاني خالي ومرت خالي ورحنا للمستشفى وياها .
ظل ابوي يركض اعلى الدم و انا اعلى الطبلة .. و مرت خالي وياها وخالي جويعد ، ليما دشت للعمليات نص ساعة و اجانا العلم ( جابت ولد )
يا فرحتي بهالعلم هاذ شيوصلني لامي واكللها ستير صارله ولد يشيل اسمه ، فرفحيت وعلي بذيج الساعة يامن يوصلني لامي .
ابوي ظل يبجي من الفرحة ساعة العرف جابت ولد .. امي ورا المغرب اجتنا درت بيه ولد بجت من الفرح ، رادت تسمي ستار ابوي ما رضى و كال الها : لا تفاولين الولد بحظ ابوه .
كالتله : انت سمي
سماه ابوي (عبد الله )
وردت لالة ويانا و خواتها اجن باتن عدنا من كون بيتنا ما بيه ولد احنا فد نساوين وظلن يعاوننها ، بس وحدة من خواتها خافت تكول احس باشياء غريبة للبيت.
ظلت يوم واحد ومشت .
وردينا لحياتنا الاولية
ابوي رد البغداد ويم عايلته غاد
امي تروح و ترد ويا جميرة و تشتغل
جميرة تحب خنجر و خنجر كل فترة يدز وحدة من اهله اعلى امي تخطبها لجن امي موش راضية ، تكول نجر ونشمي اي بس مال نسيب واطي بتي لا خلك شقاوجي سكير ينام ويا الكحا** بالدين و اطي بنيتي .. حلم ابليس بالجنة.
اما انا و لالة جويعدات بهالبيت نداري بجوكة هالجهال .. ونشتغل هاليطلع بدينا حصران ومهفات خاطر نحصل فليسات حدر ادينه من كون امي شغل ادينه ما تاخذه تخلي النا خاف انا اعتاز اشتري البتي ادللها .. يو لالة تشتري لروحها ولابنها ، ولو خالي ما مكصر ويا بنيته بس تخليلنا مصيرفنا النا لوحيدنا .
بس انا كلبي ما يطيني من اطلع تشيه بعيني شغلات البنات واجيبن لجميرة و انسى بتي، من كون جميرة طالبة وتحب الغوى لجن امي ما تلحك اعلى العيشة وتطيها يا دوب مصاريف مدرستها .. هي هم ما تطلب تعرف حالة امي بس انا ينكسر كلبي اعليها و اشتريلها شنهو يحلالي واحسن هي معتازته .
ومن كونها ما تمشي لجن ما باليد حيلة ونمش ويا الدنيا وياها وياها ..
......
راديون : انذليت مذلة حدر طوع سلطان .. ما عشت هالمذلة بعمري لجن ما بيدي غير اصبر لجل ابني ورجلي ، حتى بت اخوي غاد تبجي وتنط علي ما اكدر اجيبنها من كون انا بلا حجرة و انام بالهول ومعاند ما ينطينا مجان خاص .. الا جسام يخضع و يعرس ويكسر خشمي جيف خذيته ابنه منه ورحت شردت بيه لبغداد .
جسام ما راضي يعرس وصابر اعلى هالوضع هاذ ولا طلبت ابوه من كون ابوه موس مكتفي منه بعرس، يريده يعرس ويطيه حجرته الكديمه اله و للعروس الجديدة و انا اظلن بالهول مالي مكر ..
هالجسام رافضها كلش
بس طللت وارواحنا طكت وشكثر ما يحجي ويا ابوه ما ينفع ، يا يطلكني يا يعرس ويخليني بالبيت وياه هيج ..
فاضت بجسام طلع العمامه و لمهم و كللهم ابوي اذاني و انا عدي ابن من بت الشيخ مطر وما اكدر اطلكنها و سالفة اعرس وتظل بلا حجرة ما اسويها وانا رايد الحل منكم ، من كون ابوي يو ظل اعلى حاله هاذ التجى للقانون واطلع جدام الله عاصي واشهر بابوي وانا نا اريدن اوصل لهالمواصيل .
التموا عمامه اعليه و كالوله : شنهو الراي شتريد .. كال الهم اعرس وانفذ اليريده بس بشرط يرضى اطلع بت ضاحي ابيت لوحيدها انا مالت يطلع ثار ضاحي بمرتي ما ارضى ، هاي مرتي موش بت ضاحي .
راحو عمامه و طاحو اعلى سلطان و جيب عمك وودي خالك و حجي جثير خلاصتها سلطان رضى جسام يطلعني ابيت و يعرس بس شرط ما يجبل علي غير يوم واحد بالاسبوع .. وباكي الايام يباتهن ابيته .
رضوا و حتى جسام رضى .. بس كون يهدنا بحالنا ويخليني اعيشن ويا ابني ورجلي وبعيدة عنهن ، ولو عرسه صعب علي وما اكدر احمل بس ما بيدي غير ارضى : كتلى وافك دامك بخير و اتشم الهوى و تروح و ترد اعلينا يكيفي وانا واثقة بعشكك الي ما تغيرك علي مرة.
هو كال : بالاول ابني بيت بالبستان و اكعدكم وامن عليكم يالة ذاك الوكت اكل لابوي اعرس ، ابوي واعرفنه يو طاوعيته كبل .. يخلف وياي ويطلعلي بدرب ما متوقعه و يبعدج عني دامه يكرهج ما يخلينا نرتاح .
انا من عرفت راح يبنيلي بيت .. كلتله : جا وديني لاهلي اخير من هالذلة هاي العايشتها عد ابوك .
من كون بكعدتي عدهم هاي شبعت ضيم و عرفت امور جثيرة ما اكدر انطك ولا احجي بيها ضامتها حدر افادي تطحن بيها .. منها حركة بستان اخوي زناد سلطان الحركه .. و البلغ اعلى اهلي وخلانا ننسبي و الامنزياخذونه هم سلطان ، بس يو حجيت غير سرحان يتخبل و يفوت بال ثجيل ما يخلي وحيد منهم و يعلك الثار وما نفتك من الدم ساعتها هالصابره اعلى هالاسرار الموجرة بفادي .
يو للشيطان اخ .. سلطان اخوه اعلى الكباحة واللئامه الحاملها .
رحت لاهلي وكعدت عدهم .. بس بكعدتي عدهم ما ارتاحيت .. مرت اخوي ليلة تشوف ابليس ولا تشوفني و حجي وبسامير ما تخلص ..
و جهال سرحان من يشوفوني جاي يجلبون بذيالي ما يرضون يهدوني عمة و عمة من كون مرت سرحان بس جدام سرحان اداريهم بس وراه عمتي ردحة التطيح بمداراتهم .. وهي فقيرة كلش حتى يو فخرية طكت جهال سرحان تكوم تغطي اعلى فخرية و تضمضم وتاخذ الجهال منها ... خاااف سرحان يدري وهو وياها ما متوالمين ويروح يطكها وتصير جبير و ظالة تضمضم خاطر لا تصير مشكلة .
هل من اجي يلفون عدي ما يروحون غاد .
امي بهالفترة هاي ما مرتاحة لوضعها مرات تتعب وتكضي وكتها بالفراش ونوبات تتخربط و نركض بيها للمستشفى .. وتشكي من اركبها .. خذاها سرحان طبيب كال سوفان .. واطاها علاج بس ما طابت.
خذيناها انا و سرحان و طلعنا البغداد ... ودسناها لمدينة الطب فحوصلت شاملة و التبين عدها ورم خبيث بظهرها
من عرفت انا دكيت ولطمت و بجيت ..
الشيخة الجانت شايخة اعلى الكل بجال ابوي صفت محد الها بس انا .. وسرحان شايل عنه ياخذها ويجيبها لجن اعرفنه موش حبا بيها ، بس كودن هي ام اخوته فما هدها ظل وياي شايلها .
سوينالها العملية ابغداد .. شالوا الورم و رديناها للسماوة كمنا نراجع بيها للاطباء غاد ... وظليت بس انا الها ، انا ايدها وانا رجلها ، انا الاداري وانا الاغسل ووياها وياهم. وكلش قاهرني امرها الشيخة الجانت يا هيبتها المرض دكها وظهرها ما كامت تعينه من الوجع .. ساعة ووكت نايمة بفراشها .
كربت ولادتي .. وجسام لجسام ما مخلص البيت .. ابوه حيل ثكل اعلى ظهره و يعوق اعليه شغله وما مخلي متهني .
فرد مرة اعتازيت اروحن للسوك خاطر اجيبن اقماش اخيطنه للفرخ البطني حضاين كماط لكافات عصابات واثواب ومن هالامور وانا متعودة من جنه ابغداد و السوك جريب علينا الصبحية اروحن اتسوك واردن .. ما يكول جسام ، ومن اجيت هنا هم ما يمانع
.. فمن كلت الجسام على روحتي كال : روحي
بس انا امي وكعت عدي والتهيت اروحن بالوكت الكالي روحي ... سهيت مدري هي تريد تصير ... ما ادري
بعد ٦ ايام ياله صحتي فرصة اروحن بيها للسوك ، خليت ابني عد عمتي ردحة و لبست عباتي و رحت للسوك من الصبح ...
ويا ما جاي اطلع من السوك ،سيارة سرحان عرضت جدامي بس البيها مو سرحان خنجر ، وكف وكال : ها يبت الشيوخ اشوفنج وحيدج مجبلة السوك .
- ما عدت ذيج المدلله الياخذونها ويردونها .. راح دلالي ويا ابوي
- ليش الخذاج ما دللاج
- حشى ما شفت زلمه بكده دلل مرة و عشكها لجن يظل دلال الاب ما يجي مثله .
هز راسه وكال : اصعدي اساسا انا رايح ارد السيارة السرحان .. اصعدي .
المفروض علي ما اصعد من كون اعرف هالزلمة هاذ ، جتل رجلي وحرك ديوان اهله وحرك بساتينهم و سجن جسام جان بسببه واعرف ابليس اهون اعلى جسام من خنجر .
بس ما ادري شصابني وصعدني بهالسالفة وانا اعرف ديرتنا زغيرة ، و سر ما يبات بيها ...
صعدت ورا وهو ساق .. رفع عينه نشد : الاخبار الاسمعنها ما تسر
- هاي الدنيا ما تهد احد بحاله ومامش احد مرتاح بيها
- لجن موش كل هم مثل همج من كون الهم ما راح يفاركج ولا راح تعيشين مرتاحة طول عمرج .
- عليش تحج هيج
- حوبة العاشك و ينخان موش سهلة وما تعدي اعلى ابنادم بخير.
- بس السمعته انت رايد بت حاكم الزغيرة وعاشكها
- وتسواج يبت الشيوخ .
- بالعافية عليك و عليها.
درت وجهي عنه و هو كام يتنهد ويسوق .. بمفرك الشارع اليطب اعىى عرب ال جلوب اليجمع ال ثجيل و ال ضاحي اعلى الصوبين ... كاعد يمرر السيارة و لن نعمة يعرض بسيارته يريد يمر
صديت وجهي صار بوجه و هو تسودن .. داس اعلى الهورن طورشنا وفات بالسيارة الاحنا بيها ، خنجر و تعدوا اعلي ، نزل من السيارة مهرف نفش امتونه و هد اعليه ، كضه و نزله من هدومه و كال : تدعم السيارة ابن ******
نزلت اركض : خنجر ميل خنجر
تلازمو من الهدوم نعمة و خنجر و فزعت الناس تفاكك بيناتهم و انا الطم اعلى خدي ، جراني نعمة و صعداني بسيارته و طلع لبيت ابوه
طب و هو يصيح : جسااااااااام ... جساااااام
جسام ما جان موجود طلع سلطان والبيت كله اعلى صريخ نعمة ذبني عد رجلين ابوه و كاله : هاي الكح** لكيتها صاعدة و يا عشيكها مفرده وياه بالسيارة بوضح النار لا خجل ولا مستحى .
تسودن سلطان ... حجه واجت بين اديه النسوان حجيهن و صياحهن علي بصفحة ورزايل سلطان وولده عليه بصفحة لخرى
جسام جان بالبيت بعده يبني ... ندهو عليه (تعال شوف مرتك شسوت ) اجا يركض خاطر يعرف شبيه ليما وصل و تلكاه ابو وكاله : اخوك انتشل مرتك من سيارة عشيكها طالعة وياه وانت الاغم طالع غبشية تبنيلها بيييييت ، بنات ضاحي كحا****** ما ينبنالهن بييييت ، صخمت رااااااااسك .
جسام تسودن و يكللهم : جذب مرتي ما تسويها
سلطان : ولك تجذب ابوك يالاغممممم ولك خاينتك يالاخبن يالدثووووو
اندار علي هوسه ، سحب ايدي و صاح بيهم : خلووووووني افتهم
انا ارعش من فوك لي تحت ، كرب راسه من وكال : صكد صاعدة ويا خنجر يرويدا ؟
- بس انا ......
- بدووووووون بس اي لو لا
- جسام بس احج....
-جاااااااوبي
- اي صعدت
ويا ما كلت الأي ، انهد علي بالضرب فقد و يصيح : تصعدين ويااااااه ولج هاذ تعرفين شسوا بيه لوا لاااا الج عين وتركبين وياااااه ما اجيت اعلى باااااالج .
انهد علي ضرب بلا وعي وانا اصرخ وابجي محد ادخل بيناتنا بس سلطان صياحه هرج البيت ويصيح : اغسل عارك واجتلها ..
جسام ما يسمع منه .. انهد علي ما يشوف احد و يصيح : ليش ولج ليش ، اتصعدين ويااااه ليش
جراه ابوه و حط الرشاشة بيده وكاله : اغسل عارك منه وخلها تولي هالنجسة بت النجس.
خنجر من رحت ويا نعمة وما رضيتله يتكاوم وياه ، كض الدرب وروح لسرحان بلغه .. سرحان عرف سلطان راح يستغلها بقضية شرف .. لم ازلام الموجودين من العشيرة و اطلع .
ويا ما وصل سرحان الباب البيت و نزل ولنه يسمع سلطان يفشر علي و صياحهم صاعد ، وكف سرحان رمى ثلث جيلات بالجو صاح : ثجييييييييييل الايد التنمد اعلى بنات ضاحي تنكطع يااااااا ثجيل
طلعوا ولد سلطان بخويطهم واعلى راسهم سلطان ليجدام : شنهي الراااااي يسرحااان
- الايد التنمد اعلى عرضي تنكطع و اللسان اليجيبه بالشين ينحشششش .
سلطان : اخيتك فاسدة وصاعدة ويا عشيكها وهاي موش سواية بت شيوووووخ يا شيخ سرحان
- حدددددددك سلطان
رمى بالجو و صاح : الصعد وياها سايك عد ال ضاحي موش عشيك يبزر المالهم اصل
عرضله نعمة وصاح : ياهو الماله اصل يابن الحرامي عرضكم سايب وبناتكم كحا** سترناها بلايا بياض ليلة عرسها و جاي تعيرنا باصلنا يبن الفصليييييية .
ويا ما حجاها نعمة و سرحان مغتاض ، شب النار بضلوعه ساعة الجاب عرضه بابشين ، شيل سلاحك ووجهه صوب نعمة وصاح : ابن الجاريييييييه
وسحب اقسام ورماه بطلقتين جابهن بنص كلبه
اشتعلت النار من الصوبين ..... يتبع
لقراءة الفصل التالي : اضغط هنا
لقراءة الفصل باقي حلقات الرواية (رواية كحل عرب)