رواية كحل عرب الفصل السبعون 70 بقلم زينب ماجد
رواية كحل عرب الجزء السبعون
 |
| رواية كحل عرب الفصل السبعون 70 بقلم زينب ماجد |
رواية كحل عرب البارت السبعين
الحلقة_70
(خنجر يعترف )
دنيه ولاوحتني ملاوح السرحان
غشتني بهداهه وباكت الواحد
( عريان سيد خلف)
هدية : رديت وانا الهوى ياخذني .. واصفن بدربي وضايعة بين شوكي و عشكي و بين واقعي .. اطلكت و بعدين ؟ انا من جنت خالية مختلية محد هدني بحالي، يهدوني وانا عدي بنية ؟
رديت للبيت و خبريت امي و كلت الها : يمه انا رحت لسرحان ووصيته اعلى جميرة وكال خلها تحضر روحها الصبح يمر بيها خنيجر .
جمارة : صكد ؟
- اي والله ..
كواغد: وحيدها تروح وياه ؟ صعبة صارت بنية احديثة و الناس عيونها تلاحكها ومامش محرم عدنا فد ابوج
- لا ياسر ابن زناد وياها يروح .
- جا ياسر شنهي يمة ؟
- احسن ما تروح اعليها دراستها يمة
جمارة: يمة ما ظلي شي واخلص الأمتحانات جريبة
هدية : عدج كميص اسود تروحين بيه ؟
- لا
- جا شلون ؟
- البس الثوب حدر الصدرية و امش واكضي اموري ، جا شسوي.
- يالة ليما يجي ابوي و يشتريلج كميص .
جمارة: كمت منهن ورحت لحجرة ايمان القديمة ، ايمان شالت البغداد والحجرة ظلت خالية بس امي ما ترضى تكعد بيها ، تكول : خلني هنا ما اريدن الحجرة .
رادتها يسرى ، بس هديوة كالت الها : لا اتي عدج غريفة انا ما عدي ، اخذنها و اخلي غريضاتي بيها.
وانا هم ويا هديوة خذيتلي خانة من الكنتور و خليت بيها كتبي و هديماتي وكمت اكعد بيها .
صكيت الباب اعلى روحي واتخايل باجر شلون يجيني خنجر واروحن وياه واظلن كل يومية اروحن واردن وياه .. تمدديت وانا افكر و اسوي افلام براسي .
نمت وثاني يوم كعدت من الفجر مشطيت و عدلت روحي و لبست الثوب وفوكه الدشداشه ، اعاين لنفسي جني مسودنه : شلون اروحن هيج ؟ يشوفني يضحك علي وهو ما يستحي لليوم يسميني المصلبخه جا يو شافني بهالحال شيسوي ؟
كعدت اهديوة تنوعلي وانا اعاين لروحي بالمرايا و انكث بدية وما راضية بهدومي
حجت : شمالج ؟
- ما اروحن ، ابطل ولا اروحن بهالثياب
- جا موس كتلتي روحج اعلى المدرسة هسه تججيتي بالثياب ، موش كلت الج يجي ابوي و يشتريلج .
- معلي وعلي طالعة جني صخلة
- و يطبج احريشي ، عود يو اجا خنجر اكله ما تروح.
- كمت اعاين لروحي و ابجي ، اريدن اروحن بس موش هيج و ما اكدر البس قميصي الابيض ، من كوني محزنه اعلى اخوي .
شوية و اندكت الباب ، كامت هدية وهي تجر بالربطة و تحطها اعلى راسها و تلفها ، فكت الباب ، طلع الها خنجر :، ها اصباح الخير
- هلا بيك خوية اصباح النور
- سرحان وصاني اوصل جلجول ويا ياسر
- اي والله بس كامت تتمزهد من كون ما عدها كميص اسود تطلع بيه و ما ترضى تطلع بدشداشة.
- جا هو وكت تمزهد واتزين ، دخل تمش تكضي مدرستها وترد .
- جا غير جلجول بعد شيقنع راسها .
- دصيحيلها خلني احاجيها.
- جميرة ، خايبة جلجووووول
- شنهي ٠ميرة و جلجول اسمي جمارة ، فوك هدومي كالبين اسمييييي
- ولج من دهر فرج ، حسج خنيجر بالباب
- كليله يروح ما اروحن
تحجي و تبجي
- يا من دهر الدهرج ، ولج البسي الزلمة تنخيته سني يشتغلون عدنا يا تعالو يا ردو .
كواغد : شمالها هاي
- تكول اهدومي موش حلوة
- احنا بحال حلوة وموش حلوة ، امشي لا اكولج بالنعال ، ييييله
جمارة: ما اروح ما اروح
خنجر : خايبة تأخرنا دياااااله
طلعتله وهي تكله : عمي روح انا بعد ما اروحن
-عليش بوية
- دشوف ثيابي هي هاي ما مدرسة
- وعلي تخبلين بوية دمشي
- تجذب علي والعباس بس نعدي تكوم تعيب علي و تقلد .
ضحك : لا والعباس ما اعيب امشي .
كاموا يلحون عليها ، والكل اتكللها اطلعي ، لبست ربطتها و جنطتها و طلعت .. صعدت ورا وياسر كاعد ليجدام و الدرب كله هي تبجي .
وصلوا ياسر و اندارلها كال الها : شمالج بوية ما بيهن شي ، يو بيهن جا ما سكتت عيبت بس غير محزنه ، والزوم الواحد يحترم الحزن .
هزت راسي ووصلاني للمدرسة ، نزلت و انا الفن بردني من كون الردن ها عرضها و احس بروحي افشل ، مشيت للصف .. اول ما دشت المدرسة كالت : جمارة مو بعد وكت على الدوام ؟ لو غايبتلج فد يومين ازيادة خاطر تنفصلين .
- ست ما غبت بطر اخوي استشهد .
- اخوووج استشهد ؟
- اي
- بالحرب
- اي يكولون احتركت الدبابة و طالع منها وجاية جيلة براسه و استشهد بالحرب .
- انا لله و انا اليه راجعون ، اسفة بنتي ما جنت اعرف هيج صاير وياج ، كومي روحي وياي للأدارة اكللهم على حالتج لإن غيابج هواي و رسوب بكل الامتحانات الشهرية للمواد ، امشي .
كامن البنات يكولن : الله يرحمه و انا دمعت عيوني من الكل كام يواسي بيه ، مشيت للادارة ، المدير كال : البقاء بحياتكم وما لازم تحزنون عليه هذا شهيد بالجنة احسن من الكل .
- جا استاد غير اخونا ونسوانه اثنينهن حوامل و جهال عده وحدة عرجة و الثانية حولة .
من حجيت هيج المدرسات كامن يبجن ، جزولي الغياب كله و اعتبروه اجازة .. وكل مدرساتي كاللي لا تخلين على بالج اعتبري نفسج ناجحة بالأمتحانات اللي غبتي عنهن بسبب استشهاد اخوج ونحسبلج درجة الشهر الفات.
حجه المدير : وخمس درجات على كل مادة مني .
- شكرا
حجيتها وانا مدمعة ، والفن ابردني جبير .. حجت وياي المدرسة : ليش هيج قميصج عريض كفي
-موش قميص هاذ ست ، دشداشة ، ما عدي قميص ابيض ، من كون ام الروبة امي مات ابنها واتمرضت وطاحت بالبيت وما عدنا بعد اليشتريلي قميص اداوم بيه .
حجيتها وانا اعاين للمدير .. هو جان متأثر بدموعي حيل رغم جان يكرهني بس كال : ميخالف بابا شدة و تزول و قميصج عليه اني استري الج.
- لا تسلم استاد احنا ما نحتاج لاحد ، اطيب امي و تشريلي .
رجعت للصف ، بس اهيس الكل يحبني ومتعاطف وياي ،رغم ما كربيت من احد خاف يعيبن علي وعلى قميص الدشداشة مالي.
ليما خلصت الدوام طلعت ، و خنجر مامش ، ضجت كلش : بس لا ما يجيني ، شلون اردن وحدي ؟
ظليت واكفة اتنطر و اهيسنه نساني ، اختنكت عوزي ابجي ، الكل طس وبس انا واكفة ، ليما شفته جاي بسيارته من ابعيد ..
ركبت وياه و كلتله : شني عمي عدالي ما تجي طاحن رجلي من الوكفة .
.- موش ان سايك الخلفوج راح جاب هالأغم ابن الأغم ياله اجاج .. مناعيل الوالدين .
ياسر ظل يضحك و انا غندبت ، عاينلي بالمراية كال : شمالج عنطزيتي ؟
-عمي ما بيه شي
- من عمى العماج كون ، عايني اعلى صفحتج شوفي العلاكة شبيها
- تنوعت اعلى كتري ، صكد هكو علاكة سودة ، جريتها بيها جيس اسود فتحتها و لنه قميص اسود : هاذ المن
- لمرت ابوي ، جا غير الج ؟
- لا عمي شكرا ما اريدن
- خايبة من تتعنطزين علي اكومن اركع راسج المصلبخ بالحايط .
- عمي لا تغلط شني وعلي انا كبرت.
ضحك ياسر و هو يكله : شمالك وياها عمي.
ضحك خنجر و هو يكله : خايب خلني ادتهر وياها هاي اذا ما ابجيها انا ما ارتاح.
- ما ابجي
-يطبج حريشي ..
- اي خوش وهاذ القميص ما اريدنه .
ياسر : اخذي وعود من يصير عدج اطي فلوسه ، شكثر فلوسه عمي
- ياهو القميص ؟
- اي
- خايب كل عقلك انا اشتري ، خذيته خاوة من السوك.
ظل يضحك وياه ياسر ، وصلوني للبيت ، نزلت و ما خذيت القميص ، اول ما صكيت الباب و لنه يطر القميص من فوك و ينركع براسي
ردت اطلع سمعت للطبة مالت باب السيارة ، اول ما فكيت الباب شطحت السيارة .
دشيت للبيت وانا كاضة القميص ، سولفت لامي على المدرسة وشلون اتعاطفوا وياي ،ردت افرحها شو كامت تبجي ، و هدوة شالت النعال علي و تكلي : ولج هو انا اريدن انسيها ، تكليلها العالم كامت تستخطينا .. كومي .
كمت منهن ورحت للحجرة ، اعاين للقميص ، هاذ عمي مسودن ، من يغيب شكثر اشتاكله . ومن اصيرن وياه يكوم يجفص بمصارني يخليني اسبن الساعة الطلعت بيها وياه.
لبست القميص و الصدرية ، القميص فيت عليه، كمت اغنج بروحي و امش منا واجي منا و اتنوع لجسمي ، ليما سمعت يسرى كامت تتعارك ويا لالة وذيج ترد بيها و يتغالطن .
صكيت الباب حيل خاطر لا اسمع حسهن و حس هديوة و هي تفازع بينهن .. خليت كتبي و كعدت اقرأ.
ثاني يوم لبست القميص الأسود وكعدت انطر خنجر ليما اجاني .. صعدت وياه .. حجه : هكو وحيدة امس تتعنطز و اليوم لابسة الجايبة الها ، جا موش كلتي ما البسنه ، عليش لبستي
- موش انت الذبيته من فوك الباب
- وما عوليتي تلبسينه
ياسر : عمي خطية عليك العباس عوفها
- خلني اداهرها ، اي شعدج لبستي
- جا غير انت كتلي
- جا عليش تتعنطزين امس ؟
- عمل ذليتني هسه انزعنه وعلي
ضحك بصوت عالي و هو يكول : ياله فنج
ظليت اعاين عليه : وعلي انت ما تستحي .
ظلو يضحكون بصوت عالي هو وياسر ليما وصلوني ، كلتله : مر بيه اول انا اطلع ب١٢ ، و ياسر ب١٢ ونص لا تخليني اتنطر بالشارع
- جا موش انا سايك الخلفوج .. انعل ابوج لابو ثجيل تتامر علي بت المطي .
- عمي شمالك بس احجي تغلط علي ، لا تجي انا اردن لوحيدي .
حرك السيارة و مشى عني، مشيت مغتاضة منه ، وكفت بالصطفاف .. جان يوم الخميس و بهاذ اليوم رفعت علم عدنا يطول الأصطفاف فد نص ساعة ، كردوس العلم يرفعون العلم العراقي و نلقي التحية للعلم ونحيي و نحيي الريس ونشعر .. اللي يطلع يقرا نشيد و العده صوت حلو يطلعونه يقرا للعراق و للحرب و هيج ...
وختمناها واحنا نقرا النشيد الوطني
وطن مد على الأفق جناحا
وارتدى مجد الحضارات وشاحا
بوركت ارض الفراتين ... وطن
عبقري المجد عزما وسماحا.
خلصينا وكمنا نصفك ، مشونا للصفوف ، وانا جلي ادشن ، المدير صاحلي ، رحت وياه اطاني جنطة جديدة و قميص و كال : هاي الج
- لا استاد.... قاطعني
- يله امشي الصفج
خذيتهن ورحت للصف ، لكيت المدرسة واصلة ، كتلها : ست جنت يم المدير
اشرتلي اطبن ... دشيت وخلصيناها دراسه من كون صف ثاني متوسط و الأمتحانات مالت اخير السنة كربت علينا ولزوم نخلص المواد .
كملت دوامي اول ما طلعت لكيت خنجر صاف السيارة ليغاد وواكف ، كربيت منه : هااا
-وطاك ارحاه ، ياله اصعدي
غندبت و هو يشغل اغاني ، كلتله : عمي ترا انا حزينة على اخوي طفي الغنا
- وتتأمر بت حويكم .. وهاي طفينا ، دياله
حرك السيارة و مشا لمدرسة ياسر .. ظلينا كاعدين هو صاد ليغاد صافن و انا اعاين بعيونه ، ما دريت هو منتبهلي .. اندار علي : شمالج ؟
درت عنه استحيت .
طلعت من المدرسة مال الولد ، مدرسة بس لابسة تنورة و قميص ، تعدت السيارة و مشت هو ظل يتنوع وراها ويعاين وصفر .
انداريت اشوفنها .. بس راحت لافت ، طنكريت بالزايد ، ضجت حيل اختنكت وصلت بيه الحالة بجيت ، هيس انا كاعد ابجي من جرة خشمي ، اندار : هااا شبلاج
- ما بيه شي
- جا عليش تبجين
- انت عليش تعاين لذيج والله عيب
- عكد حواجبه : جا انت ياهو مالتج .. تراقبيني .
انداريت عنه ما نطقت اي كلمه ، بس امسح بدموعي ، هو ظل يعاين وينشد ما جاوبيته ... ليما اجا ياسر ، صعد ومشينا للسلف ، وكفيته اعلى راس الشارع كلت اله : عمي هنا اوكف اريدن اتمشى .
وكف السيارة ونزلت ، بس جان اعلى الشارع واكف حيدرة ، صدت عيني بيه و هو ظل يعاين اعلينا.
تمشيت للبيت ، خنجر مشى ، هو لحكني للبيت ، هو من زمان كلما يشوفني يذب حجي ويتغازل .. بس من شاف خنجر يوصلني كرب يحجي : شعدج صاعدة ويا خنجر
- وانت ياهو ماتك
- جاي انشدج جاوبي
- امي مريضة و هو كام يوصلني للمدرسة .
- انا عدي سيارة اذا تريدين انا اوصلنج
- ومنين بايكها ؟
- جا هو منين بايك هالسيارة
- سيارة الشيخ سرحان و جاي يوصل ابن زناد بيه
- خنجر موش زين ، نصيحة بطلي منه و اذا تريدين انا اخذج واردج .
- مشكووووور
مشيت عنه و دشيت للبيت .. لكيت امي تنعى و تبجي، ظليت موجفه و هي تصيح : ليش هديت امك استير يمه ، بناتك ذن ياهو الألهن ، ولك هديت حيلي ستاااار يمه.
وهديوة تجر بيها و تكللها : بسج يا يمة هسه يرد يصعد للسكر و تطيحين بسج.
- ولج نارة ابفادي ما تطفى يهدوة ، ولج جنت يو كعدت بهالمجان واصدن لحجرته اشوفنه امدد جدامي يعاين للتلفزيون ، ولج مجانه فارغ يمه ، راح وبعد ما يردلي .
انا عيوني يابس بيهن الدموع ، من شفت حال امي كمت ابجي وياها ، كامت امي ادك اعلى راسها و تصيح : ربي وليدي ربي ..
وتنعى : رتك لحد ايام كبري .. ورتك تنزلني بكبري
راح الولد راح ..عفيه اعلى صبري ..
راح الولد يمه.. الف ويل اعلى كلبي ..
يمه وانا بفكد الولد ما اشوف دربي .
ظلت تنعى و حاطة اشيله اعلى وجهه و تبجي بهضم مكسورة ما نشفن دموعها اعليه .
ليما تعبت كلش و هديوة تهدي بيها ، بادن اديها و طاحت اعلى صدر اهديوة ، كمنا نتصارخ كلنا .. بس نسوان مامش ولد عدنا ، لالة و يسرى كاضات عدة ما يطلعن و هديوة ابتلت بامي .
طلعت انا اركض للشارع ، حيدرة جان واكف براس الشارع .. ما لكيت غير وانا اتنخى بيه و اكلله : فدوة امي طاحت تخربطت الحك .
هو مكرود فز وياي وركض جدامي ، ويا ما وصل للبيت ، يسرى و لالة دشن لحجرهن و هو يصيح : فتحولي الدرب .
وانا اصيحن اعلى اهديوة ومرا جيرانه فزعت و زلمتها وكف بالباب، حيدرة شال امي اعلى ظهره و الزلمه يكله : عدك خل اجر سيارة
كاله : سيارتي اعلى راس الشارع
يركض هو و امي اعلى ظهره شايلها ، ليما وصل الزلمة اخذ المفاتيح من جيبه ، فتح السيارة و رفع الدكمة و فتح الباب الورى .
حط امي .. صعدت هديوة و الزلمة و جيرانه صويحبة امي ، شالوها للمستشفى و انا ظليت اعلى الدرب اربي و ابجي .
رديت للبيت صكيت الباب علي و بجي لينا انهد حيلي ، ما نشفت دمعتي اعلى امي ليما ردوها ... طلعت بساع ، هديوة و جيرانة كايدينها و هي كوة تمشي و عباتها اعلى راسها .
حضنتها و كمت ابجي ، ميلتني عنها هديوة وكالتلي : خليها ترتاح .
ناومنها و هدية تكلها : سمعتي الدكتور شيكلج . القهر موش زين .. لا تبجين بعد
وهي تردهن : جا هو بالكيف ، وحيدي الراح موش اي احد .
- جا البجي يرده يا يمه ، اعلى ساعة اتمونين ياهو الألنا ، لا تكولين ابوي ، عكب عينج وعلي نضيع.
كامت تهز براسها وغمضت عيونها ، كعدت عد راسها احبن بيها ، و المرة جيرانه ظلت كاعدة وتحجي وياها و تواسيها . خوالي اجو علينا و نسوان خوالي وصرنا هوسة .
جانت ليلة جمعة امي ما رضت الا نسوي ثواب ، ما نعدي الليل حتى يو عي مريضة ، كمنا سهينا تمر بدهن حر و خبزنا صفطة .. وسوينا ثواب خبز و اصابع تمر و خضرة ، طلعت انا و نوسة وياي نوزع اعلى البيوت ونكللهم : اقرو الفاتحة لستار ابن كواغد .
وهم يترحمون اعليه.
ردينا المغرب امي كعدت تصلي وتسبح ، و شغلت كاسيت قرأن وبيه سورة يس ، يقرا وهي تردد وراه ، بس ما تلحك ، هكو جلمات صعبات وما تنطقهن .
كلت الها: يمه موش عدنا قرأن اقرالج انا ، كالت : نسيت انت تقرين ، كربي اقري لاخوج .
كعدت اقرالها و هي سبحتها بيدها ومدنجة و تستمعلي .
ثاني يوم جان عطلة .. يوم جمعة
ما داوميت بس ظل فكري عد خنجر لمن يعاين للمرة ، كلما اتضكره اتضايك و حيل انقهر .
داومت يوم السبت و هو اجاني من الصبح لا حجيت وياه ولا كربيت ، بس من نزلت من سيارته خاطر اتمشى للمدرسة ، صفت سيارة لخرى ونزل منها حيدرة، استحيت انهرنه و هو الفزع النا بطيحة امي .
من شفته كلت اله : انا اشكرنك اعلى وكفتك ويانا وشيلتك الها .
- لا جا هي بحسبة امي وهاذ واجبي
- اي بس لا تكرب من كون الحارس يو شافك تمشي حذاي يكل للمدير علي
- انا ما رايد اضوجنج بس ،انا رايدج اعلى سنة الله ورسولة ، اذا ترضين اودي اهلي اعليكم يخطبونج الي.
- جا وكت خطوبة ، الأربعين مالت اخوي ما طالعة بعدها
- جا انا ما كلت هيج ، حجاية بس احجزنج الي .
- امش هسه وبعدين عود
- جا خوش ، انت شتكولين تامرين.
ضحكلي ومشى ، داومت بمدرستي ، ليما طلعت .. شفت خنجر و حيدرة واكفين ، و خنجر معصب و ذاك داير عنه .
كربيت .. خنجر خزرني و كال : اصعدي .
حيدرة ظل يعاين علي ، صعدت ويا خنجر وهو صعد بساع و حرك السيارة اندار علي و كال : شعدج ويا حيدرة هااااا ؟ .
- لا تصيح عمي شمالك
- انا مو عمج ولا ابوج الكو*** اخوي ، خوووش
- لا تغلط
- عبنج تستحكين .. بت و ساحلة وحيد من السلف ليجلي مناطرج بالباب شنهو معناتها .
- هو لحكني انا شعلي
- و عليش يلحكج ؟
- كالي اريدن اودي اهلي خاطر يخطبونج
- وهو منيله اهل هالمسربت هاذ لا تخلينه يبع بعكلج حلاوة و يخدعج ، عيب
- عمي انا لا كتله تعال ولا ضحكت وياه عليش تحج وياي هيج .
- وما نهرتي
- جا غير ساعد امي
- وساعد امج شنهي تحنيلة ركبه
- عليش تصيح انته
- فتيتي افااااااادي ، هاء لو شفته بعد كرب مدرستج الدنيا احركها
- واذا شفته شعليك ... انت موش ولي امري ، خليك تعاين للرايحة و الرادة .
- ها يعني مكيف للوضع انت
- ما يخصك .
- هيج الحجي، جا خوش .
وكف السيارة اباب مدرسة ياسر ، و نزل من السيارة وكف ليكدام و يدخن تتن ، ظليت كاعدة واعاين ليه و ابجي ، ذب جكارته بالكاع ، سحكها و اندار يعاين علي بعصبية.
شافني ابجي تغيرت اعلومة و توجهه للسيارة صعد و كال : عليش تبجين .
- ابجي منك.
- ما عاد اصيح ولا الي غرض بيج ، كفي
- انا موش من صياحك ابجي
- جا منيش ؟
- ابجي عبنك ما تفهم
- افهم شني ؟
- اللي ما رايد تفهمة
- عشكج ذاك مالت طفولة وطيش جهال .
- وانا كبرت وصار عمري ١٤ سنة والبكدي بالسلف عدهن جهال .. انا مو جاهلة .
تنهد : انا ما اعرف شكول ، بس انا جبير وموش بعمرج ، افهم موش غبي وما افهم نظراتج واول امس من عاينيت للبت جدامج متعمد هلبت تصدين عني ، بس جاي تجريني ليج .
باجر تتخرجين و تشوفين الشباب اشكال وارناك وكتها تكولين (انا شعدي عشكت هالشايب هاذ المهتلف لاهو دارس ولا هو بعمري ولا يناسبني ) واطيحن انا بضيمي .
- بس انا راضية .
- بعدج بعمر الطيش و يو كبرتي تتندمين اعلى عشكج هاذ .. وتلكيت الأحسن مني.
درت عنه من شفت يصدني عنه .. ظليت دايرة عنه و عيوني موجرات بس احد يحاجيني ابجي .. اجا ياسر صعد ومشى بالسيارة ليما وصلني للبيت .
وصل ياسر لبيته ، و اخذ السيارة و صفاها غاد عن المضيف و نزل ينطي المفاتيح السرحان
- هاك
سرحان :- شو هاك بلا سلام .
- لا اريد اروحن دايخ شوي
- اوووكف
- شرايد
- هكو شي
- لا هيج متضايك شواي
- اعلى بالي نطلع بر الليلة دام ما عدي طلابة ولا شي بالمضيف ، خلنا ناخذ الخيمة و نخيم بالبر و نصيد طيور .
- تسوي فضل محتاج اطلع للبر .
- انطر ليما اذبن عكالي و الفن الغترة و اجيبن الكسرية و اجيك .
طلع سرحان للبيت ... اول ما وصل ملوك تلكته و كالتله : ابشرك
- خير ان شاءالله
- راديون جابت ولد
- ع الخير عالخير .. صكد .. يمتى ؟
- امس جابت و خابرتني اليوم جسام فرحان الدنيا ما واسعته من الفرحة .
- الله يديمها ان شاءالله
فخرية : يو جايبة انا تفرح بيه هالكثر
ملوك : جا انت حطيتي عيونج اعلية عبن فرح لاخته ، شكثر نفسيتج ضيجة
سرحان : انا راح اطلع برا ويا خنيجر ... ياله اترخص منكم
- جا نمش ليها ؟
- باجر انا عدي كعدة ويا ال مطشر ، بعد امس نمش ان شاءالله .
- ان شاءالله .
دشيت لبست الدشداشة السودة و اشماغ ابيض لفيته اعلى راسي ، وحطيت حزام .. وبيه سجاجين و خنجر وورور .. اعلى كتر ، خذيت كسريتين و تضكرت ابوي ساعة الجنت اطلع وياه بر .. ترحمت اعليه و طلعت .
خنجر واكف ناطره ، ذبله الكسرية و كاله : اصعد .
صعد سرحان بالصدر و خنجر احذاه و طلعو للبر ، يصديون طيور .. صادولهم خمس طيور حرة ..
واختارولهم مجان ، سرحان وكف ينصب بالخيمة و خنجر شعل النار ، وكعد ينظف بالطيور و يشويهن.
ليما خلص سرحان الخيمه اتكرب لخنجر : هااا
- كاعد اشوي
- الجو هنا بيه چوية برد ، يو مزودين البطاطين ، موش احسن .
- حلاتها ابردتها اكعد .
كمت احطن الطير بالعود و اكضنه اعلى انار خاطر ينشوي ، كام خنجر يطرب و يغني : عمري جزة تلاثين وانت زغيرة وانت زغيرة ، اسكت اظل محتار و السكته حيرة و السكته حيرة.
- ها يخوي شو جنها السكته حيرة.
- اي والله يابن امي .. السكته حيرة و حيرتني وياه.
- الله لا يحيرك يخوي ، كلي شمالك ؟
- الضيم متلتل اعلى افادي يسرحان
- عليش ؟
- الحجي هواي .. مدري موش هواي لجن مدري شلون اشرحنه .
- افتح كلبك واحج
- يصعب
- كلبك طايح يخوي
- اردن للعشك يو عيب
- مامش بالعشك عيب غير الفراك يخنجر .
- وانا هاذ الخايف منه .
- ويامن موهدن كلبك
- ويا بت يو انا معرس بتي بكدها .
- هههههههههههههههههههههاي
- شمالك ؟
- عرفتها وعلي
- كول
- اخت العاشكها كلبي يو انا غلطان.
- الا هي يخوي .
- عشكهن يشيب الراس يخنجر ، لا اتبوب منه ولا هو يتوب منك.
- البت زغيرة يسرحان
- لا موش زغير ، البت تدرس بس البكدها وازغر منها معرسات و هالامر بالسلف ماشي عليش محرم العشك اعلى كلبك .
- جبير اعليها وموش بكد احلامها
- شكثر عمرك ..
- ٣٧ سنة
- بعدك شباب يخوي كول يالله.
- كول عشكتها .. و التالي هم ارد للعشك واهوى و انصد وارد انكسر ، بعدها ذيج السالفة تلجم بكلبي .
- انا اكولن يو تنجب و تروح تجيبلنا البصل و الطماطة البسيارة هواي احسن ، ياله.
ضحك .. وكام يجيب ، ورد كعد حطينا الطيور واتعشينا ، وصوت الواوية ابعيد عنه .
كملينا و كعدنا جدام النار نذب اشعار .. هو يشعر اعلى هديوته و انا اشعر لحالي ..
سرحان : حاير شلون اخليها تطلك ، خايب طك كلبي و العباس .
- الوكت موش وكته ، يو مشت بطلاك هسه واخوها ميت راح يلومون و يتحججون اعليها .
- وانا خايف اعلى ساعة يرد افليح ويطلع ما ميت واتوهدن يخنجر .
- جا ويو رد .. هي ناوي اعلى الطلاك
- اخذها مني ، يو رد ما تطلك .
- كول الله كريم .
- الله كريم .. هو انا عايفها اعلى الله وابو الحسن علي.
ظل صافن بالنار .. ورد يغني : عمرج عمر قداح صعبة انتوالم .. صعبة انتوالم .. صعبة علي تدرين جلمة العالم .. جلمة العالم .... ادنيا بيها اجثير مثلج يحبون .. عمري جزه تلاثين نتوالم شلون .
وانا اردد وياه و اغني .. وخلصينا الليل كله نغني ، ليما نعسينا ونمنا بالخيمة .. للفجر طلعنا غبشة للسلف ، انطيته السيارة خاطر يوصل ياسر و يردها ليه.
مشى خنجر واخذ ياسر ورد على جمارة اخذهم وراح للمدرسة ، بس عد ما وصلها ، شاف حيدرة صاف بسيارته .. ظل خنجر واكف خاطر يشوفها لحد ما ادش للمدرسة ..
ويا ما نزلت تمشت حيدرة نزل من سيارته ، خنجر طفى السيارة و نزل بساع ، كضاع من ياخته : لو كربت منها السجينة هاي احطنها بين اضلوعك افتهمت.
جمارة جاي تمشي للمدرسة اندارت وشافن خنجر و حيدرة واحد كاض الأخر ، ركضت ليهم و هي تصرخ : خنجر ابعد السجينة من ايدك خنجرررررر .
التفت ليها و هو يكللها : امشي مناااااااا لج .
فزت من صرخته ، ويا صرخ خنجر بلسه حيدرة و دفعه للكاع و نام عليه ، و انمطلوا بالكاع يتعاركون .
وهي تبجي و الناس فزعت تفاكك بينهم ، جروهم عن بعض و خنجر يكله : يو جنت زلمة واجهني بالجول .
حيدرة : اواجهك و انعنع اعظامك
- نتواجه يحيدررررررة نتواجه.
اندار و شافها واكفة و الناس تجر بيه ما حجه وياها خاطر لا يشركها و الناس تنتبه عليها وتعرف السبب هي بعركة الاثنين .. خزرها خزرة شلعها من الكاع و مست تركض لمدرستها و صاح بياسر صعده ووصله للمدرسة وطلع للجول .
لكه حيدرة متانية وكاعد اعلى البنيد مال سيارته ، صف السيارة خنجر و نزله : شعدك وياها ولك
- انت الشرايد منها
دفعه : مالك غرض شرايد منها
- لا تدفع لك ... انا رايدها موش مثلك العب اعليها .
- البت تخصني ويو كربت منها جدمك احشنها الك افتهمت
خلنا نشوف ياهو اليحش جدم الأخر .
كض واحدهم بهدم الأخر و تماطلو يتعاركون .. بوكس اعلى بوكس ، دفرات مجاتل ، ليما فزعولهم ربعهم وفاككوهم .. اثنينهم مدمايين .
طلعت من المدرسة الساعة ١٢ الظهر ..
هو واكف ووجهه ما يتشوف ، حاجبة مفتوح و حلكه مفشوخ .. و شخوط بوجهه و زراك اعلى خشمه.
جمارة : كربت منه وانا اشوفن وجهه اعلى حال ما يسر ، بساع حجيت : شماااالك شصاير وياك ؟ .
- مالج غرض ، اصعدي ياله .
صعدت وانا عيني اعليه صعد و شغل السيارة و كالتله : ياهو الطاكك
- انت مااااااااالج غرض ما تنشدين .
- عمي شمالك
- انا مو عمج ولا سايك الخلفوج ولا اشتغل عدج افتهمتيييي .
- جا اذا هيج ، وكف خل انزل
- خاطر تروحيله موووووووو
- اروحن الياهو انت شمالك
- لهالقندرة ابن ****** ***** *****
- شني لا تفشر هيج كدامي ما تستحي انت
- لا ما استحي وخارطها كلش وواحد صايح سرسري هتلي وعيني عين كح**** لا اخاف ولا استحي خووووش .
انداريت عنه ما اكدر احمل فشاره ، وكف عد المدرسة مالت ياسر و نزل كعد اعلى البنيد و يدخن .. ما جاي افسر صياحه هاذ شنهو .. و شصاير وياه و هيج وجهه متفشخ ؟
طلع ياسر من المدرسة و صعد وهو ينشده : شمالك عمي ياهو الطاكك
يعاينلي بالمرايا و يخزر و يكول : هيج عمي مامش شي.
- تواجت انت و حيدرة بالجول مو ؟
- هد عنك السالفة ابني ، وركز بكتبك .
اندار عنه ياسر ما سأل بعد ، وصلاني للباب عدل ، الباب جدام الباب ، و نزل من السيارة و كال : عايني
- شكو ؟
- يو شفتج مكربة من حيدرة وعلي لاندمج اعلى اليوم الشفتيني بيه ... افتهمتي .
ويا ما حجه فتحت الباب اعديوة اعلى حس السيارة طلعت ... من شاف هدوة صعد بعصبيه و طلع بدربه .
هدية : شماله هاذ وليش هيج وجهن
- متسودن
- عليش ؟
- جا غير يو افهم انا شكو
- ووجه شماله
- تعارك ويا حيدرة
- دسكتي وفوتي جوا لا تحجين لاحد ...
.......
فخرية : امس وين جنت
- بالبر
- بالبر يو بغيب مجان ؟
- بغير مجان وين
- الدنيا ما تتأمن وما نعرف الدروب شنهي خاطر اكلك وين
- دام ما تعرفين اكرميني بسكوتج
- خو من احجي الحجلية تتنرفز يكوم يحكك جلدك كوة صابر علي ما جني مرتك
ظل يبدل و ما يرد عليها : موش احجي وياك
- شرايدة
- رايدة تحس بيه يو مرة بعمرك وتكول عدي مرة ، انشدها شلونج شيوجعج شنهو حالج
- مقصر وياج بشي ؟
- كل هاذ و تكلي قصرت وياج بشي
- خليني صابر اعلى اهمالج الولدي ، عدالج ما اشوفن امي التلبس واداري و انت كاعدة ولا يمج، خليني بالع همج واكولن حبلى وما احاجيها .
- هالدور الحك صار الك
سكت عنها ، ردت حجت : امس تاخذ ملوك البغداد موش يو لاله
- اي
- اروحن وياكم
- وياهو الكاضج روحي
- بس انا اكعد بالصدر .
- هالتفكير هاذ منين تجيبينه ، ما عدج شغل و عمل تتصفنين و اطلعين هالافكار هاي التسميني بيهن.
- عليش اسمك ، جا شني تريد ملوك تكعد احذاك وانا ورى .. انا الشيخة موش هي
- دامج شيخة اعرفي الأصول كبل لا تشيخين اعلى الوادم ، و الأصول يكول احترام الجبير واجب يو شما جان ردي .
-المثلها ما تستحك الاحترام.
-لا انت ولا هي اخذ امي تكعد احذاي من كون انا يو شما احجي وياج لا انت تفهميني ولا انا افهم اعليج و اعلى افكارج الما ادري منين تجيبينها .
- موش جديدة ، يو هدوة التحجي جا ركزيت بكل حرف بيه و فهمت رطنها بس انا تسمعني من طرف اذنك هالما تفهم علي .
تنهد :- صبرك يا علي بن ابي طالب .
- الجهال اخليهم يم امك
- موش كلتلج امي تروح ويانة
- جا وين يظلون
ما رد عليه و تمدد نام .
لثاني يوم .. كعدوا الصبح ، نطر ليما خنجر جابله السيارة ، ياله خبر الأهل يطلعون .. صعدت امه بالصدر ومأمون ومروان بحضنها ، وملوك وفخرية وليلة مرت زناد و فخرية صعدن ورا وجهال زناد وياهم.
.....
نعمة : بوية بوية
- ها ينعمة
- جايك بخبر
- كلي جسام
- عد يظنك يبوي.
- شنهي الأخبار ؟
- اظنن جسام ابغداد
- وشلون عرفت
- سرحان ذيب يكول ما نعرف بس انا متوكد ١٠٠ بال١٠٠ يعرف و ما يكول ... واليوم شفته الصبح ماخذ ام زناد ومرت زناد و مرته وامه ومعروف مطي وجهه لمجان ابعيد .. دزيت وحيد خاطر اعرف سرحان ليوين متوجه .. و جابولي الخبر ... الشيخ سرحان طلع لبغداد عده شغل غاد .
جاسم : بس سرحان صكد عده شغل غاد ودومه يروح و يرد للديرة
سلطان : لجن ما ياخذ العايلة ، دام ام زناد وياه يظهر السالفة بيها انه من كونه ما يطيكها خاطر يطلع بيها لبغداد الا لسالفة تخص ملوك ...ومامش وحيد يخص ملوك عكب ولدها غير بتها راديون .
نعمة : وهاذ الأريدن اكولنه .
- اسمع تدور بغداد شبر شبر و اطلع جسام منها ويو لكيته ... لا نحسبه اخوك ولا ترحمه .....يتبع
لقراءة الفصل التالي : اضغط هنا
لقراءة باقي حلقات الرواية اضغط على (رواية كحل عرب)