القائمة الرئيسية

الصفحات

رواية كحل عرب الفصل الثامن والستون 68 بقلم زينب ماجد

 رواية كحل عرب الفصل الثامن والستون 68 بقلم زينب ماجد

رواية كحل عرب الجزء الثامن والستون

رواية كحل عرب الفصل الثامن والستون 68 بقلم زينب ماجد


رواية كحل عرب البارت الثامن والستين

#كحل_ عرب

((( بقلم زينب ماجد )))

الحلقة_68
( الهجرة الى بغداد )

تعبان أشتم الحزن من واهس المهضوم
من صبر الشمس
من طور المغنين
(عريان السيد خلف )

راديون:- كام يهدد و ييهادد الا اسوي و الا اعمل و البيت انكلب فوك راسي .. انا عزلت روحي بحجرتي ، عسى ما يحرك البيت مالي غرض دام حركت الكتب و خلصت منهن.

لليل دش جسام ما يعرف شنهو السالفة .. تولاه غلط و فشاير و يا مرتك الكح** و يا مرتك ال*** ..

هداه جسام ودش خاطر يتوكد عليش ابوه معصب مني، دش وانا جويعدة اوكل ابوسن.

- شنهي راديون شصاير ؟

- شفت الكتب الهدداك بيهن وانا انظف ، خليتهن ابعبي و رحت ورا البيت خاطر احركهن شافتني نجمة و ابتليت اعلى روحي من الصبح ليجاي ما خلوا اعلى حالي حال و القران
حجيتها واختنكت ، هملن دموعي ودرت عنه احطن بحلك البت .

كرب من عدي و هو يحب راسي و يكلي : لا تبجين يا بعد حيلي ، دموعج تسوى ال ثجيل بخويطهم وعلي .. حسي دموعج .

- انا موش على شي لجن يسب بابوي وانا هالامر ياذيني، خله يطكني ولا يشتم ابوي ، شنهي مخربط يو سرسري و ينشتم .. هيبة الزلم ابوي ياريت لو هكو احد يلحكه.

- الله يرحمه و يجعل مثواه الجنه ، لا تكدرين خاطرج ... حركتيهن الكتب يو كضتهن نجمة

- لا حركتهن

- نجره وعلي ، خايبة تسوين اهلي كلهم والله .. من كونهم موش اهل عدوين ، بس انت الوكفتي احذاي .

- جا شني انا غريبة ، غير مريتك و انت خيمتي .

- حب راسي و هو يدنج الوسن يلاشيها اعلى كيفه خاطر لا يسمعونه .

خلصت ، خذيتها غسليت الها ، و ورديت و هم بالهول ، لا حجيت وياهم ولا واحد حجه وياي ، بس نجمه صاحت ( خفى هالطول و بلى)

ما حجيت تعدستها و دشيت ، نومتها ونمت ، لا غدا ولا عشا ، اعلى لحم بطني ، للصبح كعديت مثل كل صباح نظفيت نفسي ورحت لسلطان جاي اخذ ايده بعدني عنه بعوجيته و هو يطكها اعلى وجهي ، فزيت من الطكة بساع .. انهضمت حيل .

شال عوجيته و بعدني من جدامه و صاح : جساااام

- ها بوية

- حضر روحك الليلة

- عليش ؟

- قرريت اخطبلك مرة من ابنيات عمامك
توه راد يحجي جسام ... سبقه و صاح : وما اريد تعارضني وتكسر جلمتي من كون اليكسرها اكسر ظهره ... وتعرس بحجرتك هاي ، و بت ضويحي تريد تنام بالهول هنا ويا الجهال ، تريد ترد لبيت ابوها الحرامي .

جسام : بويه وياهو الكالك انا رايد اعرس.. انا وحدة وكوة وافكت .

سلطان : انااااااا ابوك ما انطر تكلي يو ما تكلي. ، من اكلك تعرس تكلي اي يابه تامر وامرك اعلى راسي .. اغممم

- بويه انت اعلى راسي و حجايتك اعلى راسي لجن سالفة العرس ما اريدنها .

- الليلة تجي وجرب كول ما اريدنها.

- اي خوش كتلي ، خاطر ما اردن للصبح .

- اكسر ظهرك جسااااام ، الأبو ما ينحط راس وياه جلببببببب ... تعرس ورجلك اعلى راسك افتهمت يو لا ، سكطططط.

كام من مجانه كله و طلع ، كام سلطان اعلى حيله و هو يصيح : ولكم هاذ مستهتر علي ، غشته بجم حبه ونومة و غيرت الولد اعلى هله بت اضويحي الحراااامي ، و علي اكصبنج اليوووووم .

هديته ومشيت و هو يصيح و يهادد وولده كاضينة ، خلصوا الريوك وانا اكشن برا و اغسل ، طلع سلطان وحكو سندانة مالت ورد بالحوش، ادفرها برجلك و تكرب علي : يو ما خليتي يعرس الليلة ، انجوم الظهر اشوفنج افتهمتييييي.

- ما رديت ولا حجيت ، شتمني : انعل ابوج لابو طاهركم كواويييي*

سكتت بس حيل انهضمت ، كل زوده بس يكسرني و ذنبي بس حركت الكتب خاطر لا ينعدم ابنه ، الله اعلى كل ظالم يسلطان .. الله اعلى كل ظالم .

مشيت وانا اشتغل ونجمة اتجيب و تكوم علي بالشغل ، خلتهن يجيبن ملابسهن و ملابس جهالهن و زلمهن وذبنهن اعلى الحوض و كلهن اغسلهن .

كعدت اعلى الهدوم من الظحى ليما كال المغرب هاذ انا .. ياله خلصيتهن لجن اهيس بعد ما بيه اعلى الكومة ، رجلية تكرمن و ظهري ركس لا اكدر اتحرك ولا اكدر امشي .

كمت اتجى اعلى الحيطان شوية شوية و امشي عدالك امشكه اعلى كثر ما جدامي انشلن من الكعدة اعلى الحوض .. عصرت الهدوم و شريتهن .. ليما خلصت الشر ، الجوع خواني كمت ما اعاسن دربي ، اهيس بطني تنلوي .

صعب اعلى المدلل و ابن عز يعيش هالضيم و هالذل هاذ ، لجن يكولون لجل عين الف عين تكرمون وانا صابره لرجلي من عبن ابوي جان يكول ( جهاد المرة صبرها اعلى رجالها ).

خلصيتهن توني دشيت للمطبخ ، صابين العشا و جاي يتعشون و ظال هكو بعد .. خذيتلي خبزة وكمت اغمس بالدهن مال الطماطة المكليات بيه .

اجن هن ناكلات الصحون مالت العشا يم الحوض ، وسليمة تعلج بحلكها و تكلي : عمة نجمة تكول خلي تموص الصحون مالت العشا .

- ظليت اعاين ليها بعلي ما بيه حيل حتى افچن حلكي و احجي ، ظلت دموعي اتصب اعلى هضيمتي .

رديت للحوض غسلتهن و دشيت لحجرتي ،ظليت ابجي ابجي بيما خوا راسي ، ووسن يمي تبجي وياي ..

لهناك سمعت حس جسام وسلطان يتعارك وياه ومنعه ما يوصل ولا يكربني ليما يوافك اعلى بت ابن عمه و يملج اعليها.

بس جسام عاند و سلطان عاند
ويوم يجر يوم و جسام ما داش حرجتي ، و يو حاول يجي سلطان يكلب البيت فوك حدر يكلي الكل تبول اعلى ارواحها من الخوف .

طال هالحال ١٥ ..
جسام يشتغل و يرد بالليل بوجهه للديوان ما يدش لحجرتي وانا يو مطي بمچاني هم جا فطس ومات اعلى التعب الأتعبنه من ضيمهم .

الا بيوم .. جان جسام عطلة وما طالع و متلفلف نايم بالديوان ، سلطان كعد ويا الزلم شواي وطلع بطلابة عشايرية ، لهناك انا خلصت الصحون و التنظيف و الحوش ، ظلي بس الديوان اكشنه و ابخرنه و اطلع .

دشيت هو متلفلف .. غطيته عدل و حبيته براسه و انداريت اكشن .. هو كعد و عاين : ها يبعد حيلي .

- هاا

- مشتاكلج حيل وعلي .

- يحفظك الله بجاه علي .. جا شبيدنا غير جور ابوك اعليه.

- عالوضع هاذ بعد عيب احملنه و جاي اجمع العدي خاطر نطلع

- و يرضى نطلع.

- زور غصب انا اطلع ، مشتاكلج حيل .

- الله كريم .

حجيتها و مدنجيت اكشن بالكاع ، صاح : رويدا

انداريتله : ها يبعد حيل رويدا .

- جا انا مسلوك ابو ابوي وانت ادنجين جدامي يرويحتي شيظل بيه .

ضحكت : لا وعلي موش ابالي بس اريدن اخلص الشغل خاطر امدد رجلي شواي من عبن حيل دايخة.

هز راسه و انا كمت انكش ... خلصيت و لميت الزباله هو طلع جدامي وراح للحجره من عبن البيت مامش احد من اخوته موجود .. حتى نجمة طالعة مسيرة.

صاحليي ، انا رحت ليه و صكينا الباب اعلى ارواحنا ، وواحد تلاكف الاخر جنه سنين محد شايف الاخر .

مرت جاسم كومي وودي ابنج اعلى عمة نجمة وموصية ابنها يكللها : عمي جسام و عمه راديون بحجرتهم دشوا .

وذيج اجت اعلى عمى عينها .. ما كربت من حجرتنه ، ودت اعلى سلطان ، سلطان جاي كبل لا يوصله الطارش ..

انا غفيت اعلى ادية بطرك الاتك .. وهو هم غفى ، و البت غاد تلعب ويا الجهال ، وما نهيس الا الباب يندفر و يجفت اعلينا جسام و احنا عرايا .

اريدن اكضن ثوبي و اتضكر ويز ذبيته ، كضتني نجكة من راسي و جرتني من اديه ، جسام فز بس عريان .. بطرك الغطا .. يجرني من ايدها و سلطان يصيح : كواااااا* تكربها من وراي و عدالك ما اعرررررف ، ولك انا تكسرلي جلمة اليوم اخلي اخوتك يكصبونك اليوم.

وانا اصيحن و اكللها : بس ثوبي عمة استريني فدووووة ثوووووبي ..

وهي تشيل بيدها و اطكني اعلى جسمي و ذاك الفشار و الغلط اليكشش البدن .. كمت اغطي جسمي بشعري انزلنه اعلى اديه من جدام و اديرن كفاي للحايط .

كومي و جريني و ذبيني بنص البيت و حمويني كلهم موجودين و تصيح : كح*** ميته اعلى ****

واخوة جسام دشوا الجسام السلطان تولاه بعوجيته و هو اعلى حاله ، التمن علي نسوان حمويني و هن يحاولن يدفعن عمتي نجمة و دفعني لحجرة حمدان ،

و الجهال جاعدة من الخوف مصطكة وموش زغار تطلع اعمارهم ب١٠ و ال١٢ سنة .. و ازغر
ابجي واصرخ و اكللهم : ناوشوني جرجف ، ناوووشوني .

ناوشاني جرجف لفيت بيه روحي و نجمة تفشر علي بنص البيت ، فكيت الكومدي مالت مرت حكدان خذيت ثوب لبسته وشيلة و طلعت .

وكتلهم هاذ : حدي وياكم يا ال ثجيل ، ولكم واحدكم لقندرة ابوي ما يصل و تفضحون بعرضي و اطلعوني مصلخة من حجرتييييي

كمت اصرخ و الزلم مخبوصين داخل و النسوان يدفعن بنجمة و انا انهديت : انعل ثجيل لابو الخلافكم لابو البزركم ، ضاحي يفتهم من ما اطه المشيخة لابن العبدة من كون يعرف موش كلم كام و كال انا شيووووخ يالفكوووور .

وهن تولني ، و الناس برا اعلى الصياح كامت ادك بالباب ، نعمة راد يطلع ويصك الباب علينا وعلى صياحنا ، لجن تكاوميت وياه ، و بعدته عني و طلعت من البيت ، بس عز علي افضح بروحي جدام الوادم .

كامت الزلم تصيح : شمالج بويه شنهو الصوت هاااذ ، شجرى .

كلت الهم : البگلبه رحم ياخذني لهلي ما اريدن منكم شي بس تاخذوني لاهلي .

نعمة كام يتصايح ويدفعني ليجوا .. و الزلام واكفه و تصيح بيه لجن انا ما خضعيت ، طلع سلطان من البيت ، وصاح : استحي اعلى روحج بوية ، ولج فضحتينا بويه ، حسنا محد سامعة من دشيتي لينا وليجاي يومية عركو والف كوامه من حدر راسج ، ولج بووووويه فضحتينا.

وسواني جدام الزلام انا المو خوش وفاضحتهم .. انا الله ذب علي بس بواجي ، شكل للناس جتلني جيف نمت ويا رجلي ، صعب انطقها وصعب احجيها.

كمت ابجي وهم يجرون بيه و يكلولي : عيب بوية اسرار بيت و ما يصير المرة اطلع حسها اعلى عيالها .

- ما تعرفون شنهو من عيال و تلومون ، دخيلك ميل عني و خلوني اروحن لاهلي .

- بوية مصارين البطن تتعارك شمالج ما تكليلي ..ددشي داخل ، عيب وعلي .

: هدني عمي رحمة الوالديك ، اذا بيكم واحد خير و ابن اصول بس ياخذني لاهلي ما اريدن منكم شي .

طلع جسام لابس دشداشته ، بس شاد راسه ووجه ما يتعاين اسود ، وكف جدامي و صاح : ابعدو منا ، عمي روح انا احلن .

وسلطان يصيح علي و يكله ؛ دخل مرتك كوا* شهرتونا الله لا يطيكم ... دخلووو .

جر ايدي و كال امشي ، انا ابجي و اشهك و صدري بكل شهكة يفز .. حجيت وياه : عباية ما لابسة شلون امش .

- بس امشي .

مشاني الفرع ، و هم كلهم طالعين ، الناس فهمت احنا متعاركين ويا اهله ، بس شنهو العركة ما يعرفون ، و الله عالم شصفط ورانا سلطان و شكال عنه و عني .

عرضت النا مرة و هو يجر بيدي و اطته عباية و نعال و كالتله : هاك يمه استر البنية واخذها ، ولا تخلي العالم تتورج اعلى مصايبكم و انتم بيت شيخ و ناس اجاويد .

- جسام عصبي .. جرهن منها ، ذب النعال حدر اجدامي ، فزيت و كلت اله : وسن

عاين علي : امشي انا اجيبنها .

- لا ما اهدنها ، خل اجيبنها .

- ظلي هنا و انا اجيبنها.

عافني يم المرة و مشى و المرة من اهل الله تحب حب بيه و تكلي : بنية مزيونة والله يستر اعليج و العيال تجور يمه و المرة الزينة تحمل ، لا تخلين الوادم تتورج اعلى طلايبج و الصار ما يصير .

كلت خل اتغدى بسلطان كبل لا يتعشى بيه ، دامها مرة و من المنطقة احجيلها و هي تحجي للوادم و تشهر بيه ، من كون اعرف سلطان راح يصفط علي ويطلعني انا و اهلي سكط وهو يتمناها اعلى ال ضاحي .

كمت ابجي و احجي للحجية و سولفتلها سوالفها كلها و جناينها و بناتها يسمعن .. كامن يلطمن اعلى اخدودهن و يكولن : الشيخ سلطان الوادم تحلغ براسه هيج يسوي ، عليج العباس لا تخلينا ناخذ غيبته التحجينه صكد يو لاله .

- من عسى العباس يشيلني و يركعني يو جذبيت ، لجن وروح ابوي ذاك العزيز الشفته عدهم لا ينحجي ولا ينكال لجن يا عمه ساكته من كونها شهيرة وانا بت شيوخ ، شيكولون انجتلت عبن نامت ويا زلمتها صعب اعلى روحي اصير حجاية بالديوان هالساكته.

احجي و كل دمعة تهمل من عيني هاكبرها ، و جسام طول بجيبة بت اخوي ، كلت الها : حجية احبن ايدج امشي ليهن و دشي عليهم راح يستحون منج واحجي وياهم و جيبي البت .

اندارت الجناينها وكالت الهن: صبن للمرية اغدي وجيبلها اميه ترتع بيها و يطيب افادها ، وانا اروحن بجدامي اجيبن بت اخيج ، ولا تظلين اتسجبين هالدموع ييمه .

- يطيج العافية حجيه .

مشت الحجية و البنيات صبلي صينية اجل لجن روحي ما تشتهي الزاد بس اخذت الماي و بلليت ريجي .. وهن يحجن وياي ومتعجبات شلون بيت الشيخ طلع هيج يسوي بجناينه .

شواي و اجت الحجية ووسن بيدها ، جريتها لحضني و انا احبن بيها .. عاينيت الها : طكوج عمه .. اذوج ؟

البت ما تحجي بس العرفته ما طاكينها من كون يو مطوكه ما تتنعوص ، تكوم تبجي حيل ، كمت اعلى حيلي و كلت الها : انا اروحن لاهلي .

- انطري رجلج يجي يمه وروحي .

- اخافن منعوه من الطلعة ، انا اروحن

- لالة لا ، هسه يجي لجنه متكاصب وياهم ، يخلص طلابته و يطلع ، هو الطاني البت ، بس يعمه جن الحجيتي صحيح غدي من اوجوهم تنكط سم ، انا بالباب و اسمع فشايرهم اعلى ابنهم ما ينلبس اعلية ثوب يديه .

- الله يجازيهم عمة ، مامش احد ظالم يفلت من الله يدور بيه زمانه ويطيح شما جان كوي.

-اي والله وانت صاجه ييمه لا و الكفل زينب مامش ظالم يسلم من الله .

شواي و اجا جسام ، بس محترك بناره .. صاح من بعيد : ءءءءءهلا وين المرة .

طلعت و الحجية وياي ، اشرالي امشي ومشيت وياه ، لا حجيت ولا هو حجه بس يتمتم ويا روحه و يرجف من العصبية، مطكوك اعلى عينه الجفن جاري دم ، و كصته ، وورم من يم عظمة خشمه و ما ادري بعد وين طاكه هالظالم ابيه و اخوته الجنهم اخوة يوسف.

خذاني مشي ويمشي بساع و ما يدري بروحه ، بس البت كامت اطيح ، وكفت ، اندار بعصبية و كال : هاااا

- بس البت اشيلنها .
دنجيت خاطر اشيلنها تكرب هو وكال : عنج انا اشيلنها

- خافنك ما تكدر

حجيتها هو حطها اعلى اجتافه وكال : امشي

مشينا لاهلي مشي ، وصلت ليغادي ، بس عاينت باب بيت اهلي و انا يا دموع صبي .. مدري شمالني كضتني الهضيمة ساعة الكربيت من اهلي .

ضكرت ابوي ووكفته بهالباب و هيبته ، هضيمه وانا بته تجرى الدنيا اعليه و يصبح هاذ حالي .

وكف اباب اهلي ، دكاه ، انا دفعته و دشيت هو نزل البت من اجتافه و صاح : رويدا.

انداريتله و دموعي بعيني : ها

- ما عدي حجي احجي لجن حطيني اعلى بالج بكل جلمه تحجينها .. بس هاي الاكولنها الج .

هزيت راسي و دشيت للبيت ، ولد عمي طلعوله من الديوان و دخلوه .. كعدوه .

انا دشيت داخل ، كعدت بالكاع و اهيس البيت بيه ريحة ابوي ، تربعيت وكمت ادكن اعلى الكاع و اصيحن : وينك بووووويه تعاين عحااااالي ، تشوف شنهو الجرى علي بعدددددك ... مامش وحيد تأذى بفكدك كثري ، ولك بوووووووية انذليت ، ولك بوووووووويه انطكيت وعلي مهضومة يا بويه.

محتاجة لجلماتج ذنيج التطيب افادي بيهن ، محتاجة اتضمني بعباتك واشتمن ريحتك وارتاح ، وعلي تعبت بويه من يوم الرحت مني وانا مامش مصيبة ما طاحت اعلى راسي.

اصيح و ادك اعلى الكاع و ارد اعلى راسي ، و بنات عمي و عمتي ردحة ونسوان عمي كلهن التمن احذاي و ينشدني : ولج شكو ، ولج عليش هالبجى ، دجحجي شجرالج .

وانا فاكده جن ابوي جدامي و احاجيه و اشكي واصرخ من كل كلبي ، ودن طارش لامي .، وكاللها راديون هيج و هيج تعاي

مامش دكايك و امي اعلى راسي و هي تصرخ : هاااا ولج ؟ شماااالج ، عليش تبجين يمه ، ولكم شمالها

وطاحت اعليه تحضني وبلا ما تعرف شبيه اعلى صياحي وبجاي كامت تبجي وياي و تحضن بيه ، ضمتني بحضنها ، شميت ريحتها كمت اونن و اصرخ اعلى افادها .

ودو طارش لسرحان بالمضيف .. اجبل راديون مدري شمالها وزلمتها مطكوك ووجه مدمى و بالديوان مالت البيت جويعد .

كض الدرب سرحان و دش ، رايد يفوت للديوان ، لجن اعلى صوت صياحي و بجاي ، هد الديوان و دش للبيت ، و على حسه و هو يصيح : شماااااللها ، ياهو وياها .

امي حاضنتني و هن يكلله : من اجت وليجاي و هي بس تبجي ، جنها متعاركه ويا عيالها مدري ويا زلمتها ما ندري .

حط عباته المصفطة حدر كتره و دنج كبص كدامي و كال : بعد اخوج ، شو يواشج خل اعاينج ، راديون ، احجي وياي انا اخييج وعلي اصلبنه المتعدي اعلى حكج .. شو .

جرني من حضن امي ، و كض راسي و كال : شنهو الصاير
دنجيت وانا ابجي و اكلله ، كل لجسام هو اليكلك .

- اكله عليش غير تحاجيني ياهو وياج

ملوك : مامش غيرهم سلطان وربعة

- اي غير نفهم خاطر نتصرف وياهم ، شمسويلج.

كمت اشهك و ما احجي بس الدموع تتجارة وانا محني ظهري ، حبني براسي و كال : كومي اعلى حيلج ، بويه نسوانه عيننها و غسللها و خلنها ترتاح ، خاطر تهيد ونفهم منها .

كومني و ضمني ليها و كال : دموعج غالية خوية ، اهدي وكلشي ينحل .

وبعدني وامي تكودني و النسوان وياي و هو مشى للديوان ، دش اعلى جسام و حجه وياه : ها الله يساعدك بويه .

- هلا ابو مامون .

- خير شماله وجهك ، شو انت مدمى و راديون تتباجى ، هكو شي .

- تعاركنه ويالاهل ، وصارت بعد

- عليش

- السوالف هواي يبو مامون ،بعلي مستحي احجي لجن اهلي ومحسوبين علي ومعيوب بيهم و الجلمة تتعثر اعلى شفاي من اريد اطلعنها .

- طلابتك ويا ابوك ؟

هز راسه : اي

- شنهي الطلابة ؟

- رايد اختص بيك الك و بيني وبينك احجيها من كونها فشلة تنسمع .

- خير يا ستار شنهو الصاير ... ياله كوم وياي نمش للبستان نتمشى .

كام جسام ويا سرحان و حجاله السالفة من التهديد بالكتب الى طلعتهم و جيتهم هاي .
سرحان ظل صافن بيه : ابوك صاحي يو مسودن ؟

- ابوي مصيبة لجن خوية الحجاية يو انحجت انا الأتفشل بيها موش احد غير .. الصيت الطلابة جيف نايم ويا مرته .. خوية ما تنحجي .

- جا ونعوفه هيج

- انتم حكم اعلى راسي من فوك ليجوا ، بس سمعتي خوية ، هي عرضي وانا صعبه اعلي انحط علج بحلوك الوادم ، وابوي جار اعلى راسي وانا داخل ابختك .

- سلطان حاسبها ، و الطاك راديون نسوان موش زلام و اكاعدنه و احكنه بعشيرة من كون يحسبونها عركة نسوان .. و السالفة عيب تطلع و ينحجي بيها ، و تهديده الك .. سالفة بينك و بينه انا و عشيرتي ننعاب و ادخلينا بيناتكم ، بس ما اعديها اله ، وعلي ما اعديها .

انت خوية تظل عدنا نشيلك اعلى راسنا ، تكول لا اردن لاهلي اهلك و انت حر ، بس خوية راديون مالها ردة ليغادي .

- لا خلها يمكم ، ليما اشوفن حل ، هلبت الاكيلي بيت و اطلع بيه عنهن

- تظل يمك ، انت وابوك ما ندخل .

- يعني ما تحج بالسالفة

- شنحجي خوية اروحن افضح بخيتي و اخلي الما يسوى يجيبها بالطاري .. لجن ما اعديها اله و دام طك بنيتنا ، خل ينطر شيجراله .

- انا اتشكر منك يبو مامون ، اروحن هسه و المرة عدك ، من اشوفن حل اجيلك .

- هلا بيك بكل وكت .

مشى جسام لبيت واحد من عمامه ، و سرحان رد للبيت ، جمع راديون و ملوك و امه و عمه ومرت عمه ، بس و حجالهم السالفة كلها .

سمعت ملوك و اتسودنت و تصيح : انا اله ، بس خلوني ليه.

سرحان : موش هيج ، سلطان ذيب و حاسبها حساب عرب .. و بتنا طالعة من البيت بأرادتها و هو صايح وراها جدام الوادم وذاب الحك اعليها .. ويو ردنا نحجي ... طلابة نسوان حيب نحط عكلنا بسالفة نسوان ، ويو ردنا نحجي بسالفة ابنه مالنا حك .. فدامه سواها نسوان .. احنا وياه اعلى المنوال .

قاسم : شلون ؟

- الطاكتج ياهي ؟

- عمتي نجمة

- تمش ام زناد و عماتي اثنين و خواتي ، ويدشن اعليهم يكضن مرته يجتلنها ويهيننها ويهننه ابيته ، و فرصتي واتمناها يو تعرض لنسوانا يو صاح اعليهن صيحة وحدة ، الا اهدن ال ثجيل فوكهم وانعل سلفاهم .

ملوك : و هاذ الحل .

- وانت خوية راديون ، زلمتج تحبينه و تريدينه حكج من كون طلابته ويا اهله لجلج يو غيره يتمناها يعرس و يحط اثنين نسوان .. ما اكلج هدي ولا اكلج اكعدي ، شيكلج رجلج تكليله تم .. خوش خوية .

هزت راسه ب(اي)

ياله .. كامت ملوك و اخذت مرت قاسم و اثنين من خوات الشيخ مطر و بناته ، و طلعن البيت سلطان ، ويا ما فتح الهن الباب جاسم .

دفعته عمة راديون و هي تسب و تشتم بال ثجيل بنص بيت ثجيل ، طلع سلطان و تعرضتلهن نجمة ، و ملوك جلمودة بيده .. كضيها ونوميها براسها ، وطيحن اعلى المرة نعنعن اضلوعها تنعنع .. النسوان يفاككن بينهن .

وعمة راديون تنعل بثجيل و بسلطان و تمنت احد يدفعها من ازلامهم يو يطكها ، لجن سلطان طلع بالباب و يصيح : موش نسوان لا خجل بويه و لا مستحى ، زلام وما نكضهم، عاينو نسوان ضاحي .. جا شتسوي اترد اعلى مره ، ابعد بوية ابعد ، هاذ ابتلاء ، ذول ال ضاحي ما نفتك .

اترادمت وياه عمة راديون وهي تصيح : خايب من تروحون فدوة لتراب ابوي ، يكفي معدل وما يغار من اولاده اعلى النومة .. ولا فكور وينكطون بخيرهم تنكط .. شنهي انتم حظ بخت هالمكطمين المهتلفين المذبوبين من العشيرة ، كلها الوادم تتجفى شركم من كونكم غمان و سرسرية .. مت عين الكاع الطمت ابوي ضاحي و خلت الواوية تفج حلوكها و اتحجه اعليه.

وشهرت سلطان بالسلف شهيرة و هو يكلهم : تلومونه من ما نختلط ويا ال ضاحي ، عاينو نسوانهم ، لا يستحن ولا يخجلن ، روحي بويه رحمة الله والديج

- اي يرحم والدي عليش ما يرحم والدي ، ابوي شيخ من شيوخ ثورة العشرين خايب انت شنهو يالاعوج يالاعطر يالاخبن و تجيب اعلى اعلى السانك.

وصياح و شهيرة تسوى عمر سلطان .. شهرته بت ضاحي بنص كاعة و مرته مدماية شالوها و ركضو بيها ولدها وهوسه و صياح و العالم ملتمة.

وعمتهم ما خلت حجاية ما حجتها عليهم و تكلهم : هكو وحيد يغار من ولده و ما يخليهم يكربون نسوانهم ، خايبين بلوة وعلي .. ولكم سامعين شايفين .

ما حجت المشكلة بس خلت الوادم تعرف سلطان مانع ولده من نسوانهم وهاي اساس عركة ابنه وياه ، بس شنهو العركة ما يدرون خاطر لا ينجلب طاري راديون بسان السلف .. من كونها بت شيوخ و اسمها عيب ينجاب .

هالجلمات حطهن سرحان اعلى ايد عمته سطرتهن اعلى مسامع الوادم ، وهدن سلفهم وردن .

صارت لسلطان فضيحة ما تتغطى والمرة الحجتلها راديوم هم ما كصرت ، وين مامش حبيبة الها ، كعدي يمه و سولفي ونسوان وبيها هيج سالفة ، اسرع من النار اعلى البارود طشت بالسلف.

وكلها تصيح : الشيخ سلطان هيج ، معكوله ، ما نصدك ، يا خايب شوف الدهر ، يغار من ولده ومانعهم ، جا شلون يخلفون ، شو ولدهم سرب ، اكثر ما بالسلف ال ثجيل و بزريتهم جنهم دود .

وظلو سالفة بحلوك الوادم بين المتشمت و بين المتعجب و بين اليصنف ، راد يشهر ال ضاحي اشتهر هو وولده .

.....

كواغد: خايبة شوفي الفلك ، عود صكد يغار من ولده و مانعهم من نسوانهم .

هدية : يييييي يمه ضيمهم لا ينحجي ولا يتسولف ، غير بيت نويصر اهل فليح .. وارحم منهم من كون مطلك ٥ نسوان من ولده جيفن يعترضن اعلى اوامره ،

التمش حدر طوعه و ترضى بضيمها تسلك وياهم ، و الما تحمل .. تطلك وشحد ولده يفجون حلوكهم .. كلهم ما يطلعون عن شورة ، ربج و جسام ترادم وياه من كونه يعشك راديون ، الا الباكيات مكاريد مكصوبات كصب.

- غدي منه و من شره يمه .. ساعة السودة الصار ابوج من ال ثجيل ما ضامنه البين غير من حدر طلايبهم .. لا سالم منهم ابن ولا وليد عم .

بس لزوم نمش لراديون من كوني احبنها من زمان ، من نهد ما جانت زغيرونة اشيلنها و اداريها و معزتها من معزتجن .

- بس اخافن نمش لال ضاحي ييمه و سلطان يتولانه ، من كونهم شهروه شهيرة بين الطوايف ، ويروح يذب بلواه اعلينا ، و احنا ببيتنا فراري ، نخاف من الجلمه اعلى ساعة يبلغون و اخونا يروح بيها.

- من عمت عينه كون اي والله ، انا سليطين عكروك الشط الابكع يتسلط اعليه ، الا ما بياش خير وعلي ،ظلي انت هنا و انا اروحن ليهم .

- لا لا جا اروحن وياج .

- تروحين وياي ، يو رايدة تتنوعين اعلى صخام وجهج.

- عليش هيج تحجين يمه ؟

- من كون اعرف من انباع المعمل و لليوم و انت تحوسين اعلى الطلعة هلبت ... اه و صايدته .

- يااا يمه شمالج ، وعلي ظالمتني .

- بربوك ظالمتج يو هاذ الصكد .

- ظليت اضحك و انا البس العباية و رحنا انا و امي لبيت سرحان بس الصكد صالي فوك الشهر ما شايفة سرحان، ومن كون لايبة ارويحتي اعلى شوفه بس انا ما جايه اعليه لا.. جاية اعلى راديون .

دشينا و سلمينا و تحمدنالها بالسلامة و ظلت امي تحج وياها و ننشدها اعلى عركتها ، حجتلها بس كالت الها : عمه موش جثيرين اليديرون لجن انا اعزنج و كلتها ، ما اريدن الوادم تحجي ويكولون هيج سوو ببت مطر .. صعبة .

- حكج ييمه صعبة ، صكد صعبة ، لجن الحيف اعلى الما يعرف المستحى ، اسليمة التطمه كون .. الا كليلي رجلج هسه وين شنهي علومه .

- والله يعمه ما يجي ليجاي يستحي ، من كون وجهه مشوه من عمايل ابوه و ظال عد بيت عمه ..

- ما اجاج كلش

- بيا وجه يجي ، سهله يعمه و يجي

- لا والله يعمه موش سهلة ، زين عليش ما تروحين وياي ليغادي ، و اودي اعليه يجي يشوفج ، واتفاهمو انت وياه ، جا ليمتعا تظلون هو غاد و انت هنا تلكينه معلعل بلياج ضايع.

- والله عمة ياريت ، هو يستحي من سرحان يجي ، من كون سولف السالفة السرحان و شرحها و يخجل.

- جا بيتنا بيت عمه ومامش غريي و انت بنيتنا ، امشي لينا و اكعدو غاد احجو و تفاهمو هلبت الله و ترسون اعلى بر و تلاكون حل لسالفتكم .

- احجي ويا سرحان انت ، انا استحي اطلب منه و امي ما يهواها ويرضى منها بس انت يودج .. كليله هلبت يرضى .

- من هاي العين و هاي العين .. ادللي ابطن عيني .

كامت امي وانا ظليت احجي وياها و نسولف ، مرت سرحان ما اجت ولا اجبلت ، حتى ما سلمت على امي ولا راوتنا طولها ، بس ملوك و نايمة .. و الحبايب ملتهيات .

راحت امي و ندهت اعلى ابو مامون ، اجا سرحان من الديوان و كال الها : يا هلا و مرحبا بام ستار زارتنا البركة ، شلونج بوية شلون احوالج .

- والله اعلى الله عايشين بفيه .. انت شنهي علومك من بعت المعمل .

-، والله يا ام ستار الحجي بيناتنا ، حطيتهن بشروع جبير ويا اخوة ايمان ابغداد و شغلتهن ، جا شسوا ، هنا بالسماوة شيخ و الحزب كاضين بذيالي .

- الله يرزقك ييمه و يفتحها بوجهك ناخية علي من كون يو شفتك يتراوالي الشيخ مطر ذيج المشية المرهدنه و ذاك الطول الحلو سبحان الله حباية ومفشوكه من ابوك .

- الله يرحمه و يرحم اموات الجميع .

- امين ، بس يمه ردت اكللك اعلى راديون

- اي كولي

- الزلمة رجلها يستحي يجبل اعليكم من ورا سوالف ابوه الغمه .. ماله وجه ويا الوادم .. و البت مشتاكة الرجلها ولاون يجعدون و يحطون النكط اعلى الحروف و يداورون امرهم

- صحيح

- انا كلت يو اخءنها وياي ، احنا ال حاكم لا لال ثجيل ولا ال ضاحي ، احنا بين الكترين .. ويو دش اعلينا ابن عم ابونا .. وستير بالبيت و يكعدون .

- اي ما بيها شي ، اذا راديون ابالها تروح خل تمش ، والله يا عمه بت مثل الوردة من اشوفنها هيج ذبلانه ينهد حيلي عليها .

- جا هاي المرة ييمه يو عرست تنضام ، شنهي نسيت طلايب بيت نويصر ويا هديوة ، زين راديون بس طاكينها ، الا هدوة جم مرة اعلى مرة يوصلونها لحلك الموت و نكض بذيالها ونتلاحك الها ونركض بيها ومنا و منا خو انت ويانا و متورج .

- ال ثجيل بلوة يا ام ستار ، الا اعلى طاري هدوة شلونها شخبارها ، انا استحي اجي و انشد عنها من كونها بطلت من المعمل و انكطع رزقها ..

- بخير ، جا ما نموت يا عمه ابو خيمة الزركة ما حط وحيد اعلى الكاع و نساه.

- و النعم بالله، بس انا شغليت العمال البطلو ، بالكاع ، وان كون باجر اقل لجن ولا يظلون بلا شغل عدهم عوايل بركابهم وين يروحون ، اذا تريد خل تجي تشتغل وياهم ولا تكطع رزقتها.

-الله يطيك العافية ، والله ما ادري ، انشدها و اكللك .

هدية : شلونك ابو مامون

- اها جا انت هنا و انا ما ادري ، شلونج شلون صحتج ، عافيتج ، بوية الچلب العضكم جتلنا ، لا تمرين لا تنشدين شنهي .

- جا ما بيدي ، جويعدة و ساكته

- الله يستر عليج بجاه علي ، معتازة شي ، فليسات مصيرف .. لا تستحين عليج العباس.

- عساك سالم الله يطيك العافية كون.

فخرية : سرحاااان ، يردونك بالديوان.

- اي .. اسمعي بويه انا كلت الام ستار اذا معتازة موش فضل مني ، كاع ال ضاحي ضخر لناسنا واهلنا ، باريها و تباريج و طلعي رزقتج منها .

- ان شاءالله يجي ابوي واكلله واردنلك الخبر .

فخرية : سرحااااان ، مو جاي اكلك يردونك .

سرحان : شمالج بويه ، هسه جاي

- اي روح

ظل يخزر بيها ، هي دارت عنه بس اغتاضت حيل ، امي ندستني ودخلنا جوا و كلنا لراديون كومي امشي ويانا.

كامت اعلى حيلها بدلت و اطت علم لامها ، سرحان كال انا اوصلنكم ، ومرته وكفت وراه تكله : مروان يبجي عليك .

صاح : دشي داخل و انطي لامي .

ظلت كاضة الباب و امي تكله : امش لعويلك يمه الدرب موش بعيد نتمشى و نحرك جدامنا .

- لا ما يصير ، اصعدوا .

صعدنا وياه و هو بعيون مليانة شوك يدورني بمرايته، جاب الدرب كله ونضراته يحاوطني و انا اعاين المكفاه، عكاله و هندامه وهيبته ، و اتسائل ، هم يجي يوم و هالشيخ هاذ يصير نصيبي؟
حظي واعرفنه واعرف ضمايمه .

وصلنا عد الباب و نزلنا ، نزل هو و فتح محفظته و طلع فلوس و كال : ام ستار

- ها يمه

- ذني مصيرف لهدوة ، لبين ما تشتغل ، خلهن حدر ايدها خاف تعتاز

- عساك سالم ييمه لجن واصلة وداعتك الف الحمد و الشكر الخير جثير .

- الله يزيدكم بحق محمد بس خلها مصيرف الها ، ياله اودعناكم ، خوية تباتين انت هنا يو اجيج بالليل ؟

- والله ما اعرف ، بس اظن اباتن ، معتازة شواي اكعد ويا عمتي ام ستار و البنيات من كون رويحتي متضايكة.

كواغد : يو ما شالتج الكاع تشيلج عيني ، يعزيزتي.

- اغديلج فدوة عمه .

سرحان : الله يثخن لبنكم ، ياله انا امش ، تعتازون شي .؟

- سلامتك .

دخلنا للبيت ، بس امي ما دخلت راحت لبيت عمي وكالت لجسام ( راديون عدنا ورايدة تشوفك )

هو ما صدك اعلى الله حجتها كض الدرب و اجا ليجاي ، ستار رحب بيه ودخلاه بالهول ، كدمناله الجاي شربوا الجاي هو و ستار .. حجه ستار : انا اخليكم تاخذون راحتكم ، من رخصتكم .

- مرخوص خوية .

دش لحجرته اعلى هالتلفزيون الما يفاركه ، امي عصرت روحها خاطر تجيبه اله من كون مكابل الحيطان ، جابته اله خاطر يركد بحجرته وما يطلع و يكضونه الامن.

جسام : شلونج يبعد حيلي .

- حالي احسن من حالك روحي غادية تراب اعليك ، كل بالي يمك .

تنهد : عايش

- ادري عايش ، بس عيشتيش .

- ولج توصل بابوي يهادد و يكلي يو تجي تعرس اعلى بت ابن عمك يو احطن جيله براسك و اجالنك و اكللهم بحزب الدعوة و جالته .. وعمامي طايحين بينتنا تهدي ، راح اطك ، وين اهج من ظلم ابوي ما اعرف

بس اعرف يو كربت من ال ضاحي وهو يدور الحجة اعليهم بعد الشهيرة السوتها عمتج .. يكلب السلف فوك حدر و نطيح بين ال ثجيل وال ضاحي و يكب ثار بالف زلمة ما يهيد ... ومحتار هالحيرة بزماني.

- ما ظل جدامنا غير حل

- شنهو ؟

- نجلي من هالديرة ، ونمش لديرة لا يندلها ابوك ولا يكربنا .

- شلون و هو اله عيون بكل مجان من كونه يتاجر بالسوك .

- نمش لبغداد

- بغداد تكسر الظهر يراديون وانا الفيسات العدي يا دوبعن يجيب بيت حجرة و حمام بالسلف .

- عليش تفكر هيج و ناسي انا شنهو و بت منهو ، انا عدي خير جا شنهو نفع خيري وانا و زلمتي هاذ حالنا ؟

- راديون ما اريد انذل لهالحد .. الذلة اللاكيتها من ابوي كافي احطن راسي بالكاع و ما اشيلنه .. ما اريد ينكال عاش بخير مرته ، يو بخير ال ضاحي و انعاب ، افادي ما عاد يحمل بالقران .

-سرحان اله معارف جثيرة ابغداد يشغلك ، ونأجر بيت غاد ..شتكول .

- اذا يلاكيلي شغل هناك يسويلي فضل ما انساه اله طول عمري

- لا تهم .. انا احاجيه.

ظلو يسولفون و يتسامرون ، و اعلى افتراض ساعة ويمش لجن خذته السوالف ويا مريته وما درى بروحه الا الليل نازل ، وكواغد حطت العشا جدامهم .

كال الها : زاحمتج يا ام ستار ، و كلفيناكم .

- شنهي يمه غريب و تحج هيج ، عيب ولا تحجيها جا انت حسبت ابني.

- الله يديمج .

- عافتهم يتعشون لوحيدهم ، و مكعده البنيات بحجرة يسرى وصاكه اعليهن خاطر ياخذون راحتهم .

ليما خلصوا العشا ، لالة شالت الزاد و كواغد صاحت : هدوة يمه ، افرشيلهم بحجرة ايمان بالكويعة هلهم يتمددون .

جسام : لا سالمة ام ستار انا اروحن ، تاخرت كلش

- اكلك يمه انت عليش مستحي مريتك و مشتاكتلك و البيت بحسبة بيت اخوك وهذاك ستير جويعد موش بلا محرم و نكول صعبة ، دخذ مريتك يمه و دش داخل و ارتاحو وربكم يفرجها تراه ما يخل حمل مطروح يشيله عنك ربك و تكول احيه ..

وفرشت الهم بالحجرة مال ايمان وهو خجلان منها حيل ، بس راديون اصرت عليه و كالتله : ظل البيت موش غريب عنك انت رايح لبيت عمك و هذا بيت ابن عمك.

ودشوا للحجرة باتوا ليلتهم بيها ، وراديون زرعت فكرة الجليه لبغداد براس جسام ليما اقتنع بيها و شاف هاذ الحل الوحيد اليخلص بيه من سلطان و جبروته.

ثاني يوم .. ردت راديون لبيت اهلها و كعدت ويا سرحان و اتنخته .. يشغل جسام بفرد شغيلة خاطر يكدر ياجر غاد و سرحان ساندهم على هالسالفة من كون سلطان مهدد ابنه وواصلة بيه للجتل.

كال الها هاي الوريقة تطينها الجسام يروح لبغداد ويدش اعلى جماعة غاد و يكللهم من طرف سرحان الشيخ مطر ، و هم راح يتولونه.

جسام ما عول اعلى الله لكاله فرج يحظى بعايلته بعيد عن ابوه و سطوته ، اخذ الورقة وغبش لبغداد ومشى للمجان الدلاه بيه سرحان ودخل عليهم ، من عرفوا بيه من طرف سرحان ، رحبوا بيه و انطوه شغل بساعته.

طلب منهم جسام نص الراتب يطونه ليجدام من كونه مستعجل رايد يأجر بيت هنا ، كام الزلمه ابو الشغل و كاله : بيتي يبعد منا ربع ساعة و عندي ويا البيت مشتمل تكعد بيه و على راس الشهر اني اكطع من راتبك فلوس الايجار.

يافرحة جسام بهالفرح .. هيس الله وكف وياه و فتحله باب يخلص بيها من كيوده ، ترخص منه يومين و كاله بس امش للسماوة ، اجيبن عايلتي و اجي .

كاله الرجال : روح وجيبهم و نحطكم بعيونه يابه ، هلا بيك و بيهم .

جسام طار طيران للسماوة .. مر على راديون من الباب و بلغاها و كاللها : باجر غبشة نطلع ، حضري امورج .

راديون لمت فلوسها و ذهبها و العدها و الماعدها ، ونطرت الصبح اعلى احر من الجمر .

بس سلطان عرف جسام بات بالسلف الليلة بعد ما جان غايب ايام ، و عرف ابنه ناوي اعلى الشردة .

جسام كبل ما تطلع الشمس ، اجا اعلى راديون .. خذاها هي و البنية بت اخوها و طلعو البغداد فجرية ....يتبع

لقراءة الفصل التالي : اضغط هنا

لقراءة باقي حلقات الرواية اضغط على (رواية كحل عرب)
reaction:

تعليقات