رواية كحل عرب الفصل الخامس والستون 65 بقلم زينب ماجد
رواية كحل عرب البارت الخامس والستون
 |
| رواية كحل عرب الفصل الخامس والستون 65 بقلم زينب ماجد |
رواية كحل عرب الجزء الخامس والستين
((( بقلم زينب ماجد )))
الحلقة_65
( موقف جمارة )
شني فضلك وحاطني ويه الريح؟؟؟
خانگ فرحتي ورملاتك تذري ..
لا مِثل الخلگ واتدگ عليه الباب
وتسرّ خاطري ،،ولا گلت متبرّي ..
معلگني بأمل يادوب يشفع بيك،،
واتأمل حلاتك واحتمل مرّي..
( عريان السيد خلف)
راديون : فزينا اثنينا اعلى حس الباب
جسام : ياهو هاذ ؟
- ما اعرف ، تكوم تشوف يو انا ؟
- لا كومي انت زحمة خافن يطلعون اهلج معتازين شي .
كمت منه و تعديته وانا امش للباب .. صحت : يااااهو
ليلى : انا ليله فتحي الباب .
فكيت الباب : ها ليلة
- فدوة يمه كنعي هاي وسينه، و ردي لرجلج عرامتها اسلكتنا بس تبجي اعليج ما خلت اعلى حالنا حال .
- يووووي مت عيني تعاي عمة عليش تبجين
بس شلتها ظلت تحضن بيه حيل و تضم راسها بركبتي وتنشغ ... عليش هالبجى بعد عمتج .. شو تنوعيلي
بس تبجي وما ترضى تسكت ، انداريت الليلة وكلت الها : خليها يمي و روحي انت .
.- يااا جا ورجلج ، موش موجود
- ولونه ، افرشلها بصفي وانومنها ولا بجيها هاذ ونشفت افادها عليّ .
- جا بعد احسن .. ياله تصبحين اعلى خير ، بس اكلج هااا .. ترى سرحان و امج تحاجو .
- عليش ؟
- ما راضي بظلت جسام بالبيت و يكللها غير تطيني خبر كبل لا تقررين موش تحطيني بالوجه .
- عودين الصبح يروح جا قابل راح يظل يسكن هنا .. دياله روحي .
- يظهر انج مستعجلة .
- خايبة دروووحي .
خذيت البت و انا الاشيه و ابوس بيها : لا تبجين عمه انا يمج عليش هالبجى .
جسام : هااا ؟
- هاي بت كريم الله يرحمه ، مت عيني الدنيا ضيعت اهلها وربت عدي .. من جنت بالسجن وانا خالية مختلية جابليتها و حطيتها بركبتي .
- الله يرحمه الج اجر بيها جثير ، هاي يتيمة .
- جهال خواني اجمعهم صبحو يتامة ان جان زناد ولا سرحان ولا كريم .. لجن اكولن سرحان موجود و نسوان زناد موجودات يدافعن عن جهالهن الا هاي مالها احد لا اب ولا ام .. تدري شايلتلها هم شلون راح امش واهدنها ، وعلي هم شكبره .
- اذا اتريدين تاخذيها عدج ربيبة انا ما عدي كل مانع ..
- صكد ؟
- اي وعلي ، هنيال اليكفل يتيم ، يعيش بجوار الرسول محمد بالجنة .
- وابوك ؟
- شماله ؟
- ما اظنن يرضى اربيها عدي .
- ماله غرض قابل شايلها اعلى اجتافه ، جاهله و احذانه . نعتبرها بتنا جا يو انا ما مسجون ، ما صار عدنا جاهل بكدها .
- والله الواه اخذنها وياي ما امن اعليها تربى هنا ، ولون امي و سرحان موجودين لجن نسوان الاخوة حيايا و كل وحدة ادافع لجهالها و يظلمنها من جوا الجوا .
- هاهيه جا من باجر تروح ويانه ، شو جيبيها ليجاي.
- انا جبتها وما فكرت بيك ، من كونك جاي من السجن وتعبان .
- شني الحجي الماصخ رويدا ، دسكتي بويه.
مد هاطر ياخذها لجن ما رضت بيه ظلت كاضة بيه ، فرشتلها ومدديتها احذاي و كمت الوليلها ، اجا جسام و تمدد وراي و حط ايده اعلى خصري .. عاينتله
:- اكلك شي ؟
- اي كولي
- ما عشت وياك جثير ولا عاشريتك لجن كلبي يحبك هواي .. وهلكثر يعزك و يحترمك .
حضني و كال : من عبن الكلوب سواجي وانا حبي الج صافي وطلبتج من الله طلبه ليما جابج الي و حنن كلبج علي .. تالي خلاج تحبيني .
- جان بودي احفظ الفرخ ابطني و اجيبن جاهل منك ، لجن..... قاطعني .
- هالموضوع هاذ لا تفكرين بيه ولا تعيدين ذاكرتج لذيج الايام من كون انا شهور ما انامن بسبب هالامر هاذ حيل صعب اعلى افادي .. تعدي و خلينا نطوي ذكراه .
نوميت وسن حذاي و انداريت ليه رفت بحضنه و للصباح وانا بثناياه .
كعدت الصبح تنوعتله .. نايم وغاط بنومته ، حبيته ، صحى و كام يتحرك و اندار لصفحته نام ، غطيته و غطيت وسن و كمت .
تسبحيت و سويت الريوك ، ومشيت عن البستان و دخلت للقصر من البيت لكيت امي عازلتلي ريوك كامل انا ورجلي بصينية .. خذيتها ورديت بيها للبيت ، لكيته كاعد جاي يغسل.
حجه : اصباح الخير
- الصباح النور ياله اجبل ، جبت الريوك.
-لزوم نروح عيب من سرحان خافنه يتضايك
- اي نتريك ونمش ، ياله اكعد .
كعدنا نتريك و وسن صحت اعلى اصواتنا و احنا نحجي كعدتها احذاي و انا اوكلنها .. خلصينا ، كال : ياله البسي خاطر نمش ، بس اسمعي .
- شني
- اخشاب مامش هالفترة اتحمليني ليما يصير عدي و اجيبن .
- جا ابوك ما يطيك حك الاخشاب الباعهن .
- اروح اكله تعال اطيني ، ما اسويها ، اشتغل و اكد و اجيبن ان شاءالله .
- و سيارتك ؟
تنهد .. ردفته : لا تكول هم بايعها .
- شسوي رويده جلمة ليش يو حجيتها ابتلي اعلى روحي ، جفيت روحي هالرطينة و صميت حلكي .
- اكلك فدوة جا شضاللنا ، مكعدنا اعلى الحديدة .
- عدي جم فلس ضامهن عد جاسم .. اداين عليهن وارد اشتغل بيهن ، تهون يمعودة فضيها و خل نمش والله كريم .
لميت غراضي و غراض وسن وياي ، و انتقلنا ليغادي ، سرحان ما موجود .. ولزوم اكلله انا راح اخذ البت عدي ، كلت اله : خل نمرله للمعمل .
اجرالنا سيارة و مشينا للمعمل وكفنا غاد عنها و هو نزل للمعمل ، شواي وطلع سرحان و هو يكول : هااا رادة خوية ، شني البت هاي شو بحضنج .
- هو انا مريت للمعمل خاطر اكلك راح اخذها. عدي .
- وتربى ابيت ثجيل ، لا بويه لا .. رديها وامشي ويا رجلج .
- بس البت تبجي علي .
- يوم يومين و تتعود .
جسام : البت رابية عد عمتها وانا ما عدي مانع تظل عدنا وهي يتيمة نكسب اجر بيها.
- لا جزاك الله الف خير .. بيت عمها موجود و تعيش بيه .
- والنعم منك ، لجن خلها هاليومين عدنا و وانا اردنها الكم .
سرحان : لا خوية ، اخذ مريتك بسلامة و البت مجانها عد حبوبتها.
اضطريت اردن و اهد البت عد امي بس نطت بجي علي ، و انا مشيت عنها و ادموعي يصبن .. وصلت غاد لبيت ثجيل ..
انكبض كلبي ساعة الصفيت ابابهم .. عاينت ليهم وانا اكولن : راح اردن لسلطان لا هله ولا مرحبا.
دشيت انا وياها و هنا جانت المفاجئة !!
ويا ما دشيت و تطلع سليمة ابوجهي .. عكدت حواجبي لما اجت تسلم علي.
سلمت عليها ونشدت : شعدج هنا
- جا ما تعرفين ، عرس علي نعمة و خذيته صالي ثمن اشهور .
ظليت فاكة حلكي لا اطي ولا اخذ ..
سلميت عليهم كلهم ومشيت للحجرة انظف بيها ، الله يهدك يسلطان ما عايفلنا حاجة الا و بايعها .. غراضنا كلخا مصفيها ومخليها حجره ينامون بيها احفادة .
هنوب الجناين كاشات بوجهي ويكولن : جا هسة جهالنا وين ينامون ؟ ، حجرنا ما تكفي .
حجت نجمة :صفيهم بفراش واحد وكفيهم لا تظلين اتبكبكين .. ياله .
جسام شد دشداشته و كام ينظف وياي و يطلع بغراضهم خاطر يغسل الحجرة وياي .. دش ابوه و شافه يشتغل وياي .
حجه : شجاي اتسوي
- جاي نطلع غراض الغرفة خاطر نغسلها ونفرشها ونشولفنا فراش نمده لينا .
- بعد عليش ما تهفيلها للخاتون .. خاطر ترضى عنك
- ما طالبة مني المرة بوية لجن انا تعبان ورايد افض بساع خاطر انامن.
- تعبان يو مهرف اعلى النومة مالت مرتك .. انت ما تستحي اعلى روحك جدام النسوان و جاي تشتغل شغل نسوان ، شمالك طك خيط براسك يو شنهي .
راديون : يبعد حيلي ، هد عنك و امش ارتاح بالديوان انا اخلص الحجرة و اصيحلك ترتاح .
انا حجيت هالحجاية يو سلطان انتفض وكام اعلى حيله : بعد كربي ليه ومطلي جدامنا .. بعدددددد ، انتم مامش مستحى بكصصكم كااااااولية .
جسام هد البيدة و سلطان يفشر علينا، ندهت السليمة خاطر تجي تعاوني اعلى الحجرة ، و لنها تكلي : عدالج انا خدامة امج الكديمة ، هساه انا سلفتج و اكبر منج و تحترميني موش اتامريني اعلى خدمتج .
- اطلعي عني ولا تكبلين علي ..
مشت وانا غسلت الحجرة لجن غدت ثلج كلش باردة ، طلبت من نجمة بساط افرشنه بالحجرة خاطر تدفه . دلتني اعلى البسط ، خذيت بساط نسيج ثكيل ، ورحت فرشته بالحجرة.
مشيت للديوان جسام ملتف و نايم و سلطان كاعد جدام التفزيون يعاين الاخبار .. كربت اعلية : اكلك عمي اريدن احجي وياك و ناخيتك .
عاين علي : شعدج ؟
- عدي بت اخوي كريم يتيمة و اريدين اجيبنها عدي لجن كلت اخذ اذنك و ترضى ياله ، من كون سرحان ما يطيها وانت ما راضي .
- بت الكاولية يو غيرها ؟
- البت بت اخوي كريم و امها هدتها ومشت و انا ربيتها ، و يتيمة عمي و انا اعرفنك كلبك جبير ويسع وهي مالها غيري .. و ناخيتك اخليها عدي .
- جا ما تخلينها ، كاضج انا.
كربيت منه و حبيته براسه ، حجه : الله يسلمج.
رحت للحجرة كعدت و افكر شلون اقنع سرحان يخليها عدي ، وما جاي افرزن دربي اعلى البرد البالحجرة ، دش جسام : ها يبعد بيتي ، تعبتي .
- موش تعب لجن باردة الحجرة مجرشة .
- راح اسوي جمرية و اجيبنها ليجاي.
وجر الجمر غاد وجمراه ليما هداه . جابه للحجرة و كمبص يعدل بيه و كال : تعاي ليجاي اتحمي.
كربيت و البطانية اعلى جتفي وكعدت اكلك من البرد و شفاي ترجف ، اندار علي و اخذ ادية : عمت عيني ، بردانه بوية .
- لا اسم الله على عينك ، هسه ادفه
- كربي اديج
- اكلك جسام
- ها بويه
- البرسمز و الطشت المشتريهن مامش
تبسم : جا غير مفرهدين الحجرة تفرهد .. ما ظل اعلى حالنا حال .
- وشلون ؟
اندارلي متبسم ، استحيت اعلى روحي : لا تحسبها شي موش كصدي ..
- بس انا كصدي ورايد فروووخ.
- لا تضكرني بوسينة مت عيني عليها تلاكيها مفرفحة خلافي .
- سمعتج تحجين ويا ابوي
- اي كلت هلبت يرضى خاطر اكدر اقنع سرحان .
- باجر انا اروحن وهم احاجيهم ، سويلي مجال
فتحت البطانية و كعد يغطي بروحه بالبطانية و يسولفلي اعلى السجن و شلون حاله غاد و شسوا و شعمل ..
ضربته اعلى رجله: صكددددد ضكرتينيييي
- شني؟
- تضكر الكتب الخليتها عدي
- صكد وينهن
- دفنتهن بنص الفراش مالت القريولة .. اكيد ابوك باعهن ويا الفراش .
- ولج كل كتاب بيش .. وين الكا مثلهم
- خلصنا منهم يمعود .. يروح احد يشوفهن عدك و نبتلي كافي علينا مصيبتنا العدت ، خلنا مرتاحين .
- لا والله حسافة ، حيل مهمات هالكتب .
- غداك الشر.
جاي نحجي و اندكت الباب ، كمت انا فتحته ، مرت جاسم وتكلي : اهلج اجو بالديوان كاعدين
- صكد ؟
- اي والله.
فزيت و انا اشيلن الشيلة والفنها و جسام يعدل بملابسه و بشعره ، طلعنا و سرحان وعمي و امي وعمتي ردحة جايين يتحمدون لال ثجيل اعلى سلامة جسام و طلعته من السجن .
سويت الجاي و خذيته ليهم و عمي تلكاني بالهلا و المرحبا و هو يوصي بسلطان اعليه ، لجن حجاياتهم ثجيلة من كون عمي ابن ضاحي و سلطان ابن ثجيل و كوة حاملين الجعدة .
اطيت الجاي لعمي انوب لسلطان .. مد ايده وكال (اطي لسرحان ) كربت وانا اطيه الجاي و كلت اله : جا عليش ما جبت فخرية وياك .
تعدى حجيايتي و بدلاها و هو ينشد : استقريتو يو لالة.
- اي الحمد لله خلصيت الحجرة ، لجن غراض ما عدي و الجوا بارد .. توا جسام سوالنا جمرية
حجه عمي : غرفة اخشابج اعلى حسابي يبت ال ضاحي.
حجه سلطان : موش ال ثجيل اليتفضل اعليهم ال ضاحي يا ابو فاضل .
- وكت الاطيكم عود رد عطيتي ، لجن بتنا بت شيوك ما متعودة اعلى الفكر .
سلطان : احنا موش فكور خاطر تحج هجي .. حجياتك ثكيلة يبن ضاحي . وانا ناوي اشتريلهم خشاب ، يسلم رايتك ، لجن عطيتك وفرها .
ملوك : صوبتج علي انا باجر اوديلج ابيد سالم.
جسام : رايتكم بيضة لجن ما يعتاز انا جم يوم واوفر كلشي .
حجه سرحان :تعووون خوية ، و ابو نعمة ما يكصر و ابن خير و ان شاءالله ما يكصر ويا بتنا ، لا اخشاب ولا صوبة ، البت ما معتازة شي ، موش هيج يراديون يو لالة .
- خوية دام جسام سالم كلشي يهون و الغراض تجي وهو كال اجيبن كلشي بس اصبري علي هاليومين .
سرحان : والنعم من جسام
ندست امي : جا غير اسليمة ماخذة نعمة حماي
- ووينها هسه ؟
- داخل بحجرتها .
جاي نحجي و انتبهت لسلطان وهو يكل لسرحان : جنكم نسيتو عهدنا ذاك .. اعلى نهد زناد احنا تصافينا و نطيناكم مرة و اخوك اطانا مرة ، لجن ما خذيتو مريتكم ومرت كل هالسنين و انتم مكفكفين اعلى اختكم وموكفين قسمة البت الانطت بديوان ، لا انتم ماخذينها ولا انتم رادين علينا عطيتنا .
حجه عمي : حك و البت ان شالله جريب ناخذها لواحد من اوليداتنا.
سلطان : سرحان يملج عليها دام زناد ضيعاه البين ..
راد يحجي سرحان سبكة عمي : كل ولدنا خير و بركة.
حجاها و كام و هو يكله : ياله بوية سرحان هم يالة نمش لهلنا .
كامو و هم يسلمون ، كرب من عدي سرحان و شال فلوس و حطاها بيدي و كال : انا ما اريدن حزازية و حدة بين ال ثجيل و ضاحي من كون اعرف مامش اليتضرر غيرج .. لهيج انا مدحت بسلطان و رديت العطايا من الاهل ، هاي فلوس خوية و بينج و بين رجالج بلا ما تورجين احد و اكضي شغيلاتج ، ويو اعتازيتي شي ، انا جريب موش بعيد عنج .
- يبعد كلبي يطيك العافية كون ويعلي علومك ، بس سرحان فدوة ناخيتك اعلى بت كريم و علي كلبي غادي دم اعليها ، جن هادة ارويحتي غاد .
- صعب يا خوية و هي بت .
- عدي وعلي ما اهدنها ، البت يتيمة و متعلكة بيه و حريمة تحرمها مني بعد ما نحرمت من اهلها تلاكيها ادورني بالوجوه و تبجي .
احنا نحجي اثاري امي رابطة ويانا و هي تحج .. كالت : نطت من البجي اليوم ، كوة نوميتها واجيت ليجاي.
من كالت هيج دمعيت و كتله : خوية اروحلك فدووة لا تبعدها عني وانا حاجيت سلطان ورضى بضلتها عدي و انت عود كل يوم مر اعليها و اطيها مصيرفها ولا تخلي ال ثجيل يتمننون اعليها بس لا تحرمها مني.
- الله كريم ، الله كريم .
طلع سرحان من البيت و هو يحاول يدلس اعلى الموضوع من كون ما راضي بتهم تربى عد ناس غربة خصوصا ال ثجيل جثيرين و ما تعرف طبايعهم شنهي .
صعدو بالسيارة و مشوا .. وعم سرحان رافض سرحان ياخذ بت ال ثجيل من كون يخاف اعلى بنيته يثني عليها ، مشى و هو يقنعة يطي بت سلطان لأبنه محمد .
بس سرحان اطباعه طبايع ابوه .. السكوت دومه غالب اعليه .. ويفرزن الامور ليما يريد يقرر ذاك الوكت يحجي، لهذا سكت وما كال اي ولا كال لا .
وصل ليغاد و كعد وعمه يحجي اعلى سلطان ، حجه سرحان : عمي انا ال ثجيل اكرهنهم ما احبنهم بس اخيتي ابيتهم و الحجايات الثكيلة اطيح اعلى افادها ما مجبورين نحد وياهم .. نلين الامور لنها تلين.
- يعني انت راضي تاخذ بته ؟
فخرية : بته شنهي.
ملوك : موش سلطان مطي بته لزناد لجن زناد ظت عيني اعليه غابت اعلومه هاليريد سرحان يملج اعليها.
فخرية : ها يمه اسم الله يملج اعلى بت ال ثجيل شنهي ، غدي منهم و من شرهم .
ملوك : ما بيها شي و الشرع حلل اربع .
فخرية : جا من هيج عميتي عيون الخاتون و طلكاج عمي .
صاح سرحان : فخررررررررية ، الحجي هاذ شنهو معناته .. يو نعاد ما تلومين الا روحج .
فخرية : كول راضي تثني يبن عمي.
- الاثني و اربع انا اعلى كيفي و الما يعجبه يطخ روحه بيا حايط يعجبه و ما يكعد يحجي عني و يفرض .
اغتاضت حيل وهو كام و كال لعمه : السموحة عمي هالحلمات ذن لا تعيدهن جدام احد انا وياك نكعد و نفرزن امورنا بعيد عن هالتذربن هاذ .
ومشى .. وملوك كامت و هي تكله : ابن ابوه .. ما يرضى الياهو الجاي يفج حلكه و يذربن اعلى هواه .
اغتاضت منها فخرية كلش..
راحت ملوك البيتها و لجن وسن بت كريم الليل ما نامته ولا ضاكت طعم النوم من البجي اعلى راديون ، بنص اليل ملوك خذتها وودتها لسرحان وتكله : ما جاي تنام هسه يو مخلي البت عد عمتها .. عليش حرمتها و علعلت افادها.
سرحان اخذ البت منها و كام يهدي بيها ما تهده ، نده فخرية خاطر تكوم تشوف البت شبيها ما كعدت و احتاروا بيها الليل كله الى ان تعبت ونامت.
......
جمارة :- امي كملت معاملتي مالت النقل ، و نقلتني للولاية خاطر ادرس و فرحانة بيه من كون صرت ثانوية وكبرت وتتأمل بيه اصيرن دكتورة و انا فرحانه اعلى فرحتها.
خيطتلي صدرية عد وحدة صويحبتها واطتها قميص ابيض ، وان كونه جبير علي شواي لجن اسرفنه ويصير اعلى كدي
لبست ورحت للولاية داوميت و فرحانة ، بنات جثيرات ومامش ولد .. وكلهن حجيهن حلو موش مثلي .. حتى كمت ما احجي جدامهن عبن من احجي يظلن يغلدن علي و يكللي : انت مبينه عرب جول .
واغتاض واكومن اريدن اطكنهن ... لجن اكضن روحي و ابعد عنهن.
انا جانت امي تشتريلي جنطة لجن امورنا داجة هالفترة و امي تريد تلم الفليسات وتطيهن لاخو ايمان من كونه عيرانه بفلوس ابوه جيف ايمان اطتهن لابوي ، وامي قررت تضم وكل شهر تسدد ليما تفضهن ..
لهسبب ما كدرت تشتريلي جنطة وانا ما احبن اثكل اعلى امي من كونها تعيبانة وتركض خاطر تلحك اعلى عيشتنا.
كمت احطن كتبي بعلاكة . اخذهن واردهن وياي ..
بس البنات كامن يعايرني وويصيحلي ( ام علاكة )
عديت مرة مرتين لجن فاض غيضي منهن لما اجت وحدة و تكلي : ام الخضرة ام الخضرة ابيش علاكة المخضر هاي .
كمت اعلى حيلي و كضيتها من راسها و كلت الها : بسعر ابوج بت المطي
وملختها .. و لن تهد علي تكافشني هي و اصويحباتها ، واكومن اعليهن .. راس براس طكيتهن و كضيتهن من شعفاتهن و سحلتهن للزبالة وكعدتهن بصفها و تفلت عليهن و طلعت من الصف ابجي .
رحت بالساحة كعدت بالشمس وابجي .
ليما اجا علي المعاون وكال : انت جمارة حاكم .
- اي استاد انا .
- امشي للادارة بسرعة .
- عليييش ؟
- امشي بلا لغوة.
مشيت وهو وراي وصلت الادارة و هن واكفات عد المدير يتباجن .. نشدني : ليش ضاربة صديقاتج واملخة شعرهن ؟
- عبن يستاهلن .
- اتأدبي و احتررررمي لا افصلج من المدرسة و تحلمين تشوفين المدرسة بعد ، يا ما محترمة .
- اي انا ما محترمة وموش مثقفة و عرب جول ، اتريد تطردني اطردني ، وخلي اذني المحترمات.
كتب ورقة و كال : ولي امرج لو ما اجا باجر تنفصلين ، امشي يااااااله .
طلعت من الادارة و رحت للصف كعدت مغتاضة ، وهن ملتمات غاد عني ، وانا حاضنة علاكة كتبي ، و كاعدة و مغندبة .. دشت مدرسة الجبر و كعدت تشرح النا المادة وانا مركزة وياها خاطر الهى عن ذن اليتمسخرن علي.
خلصت الشرح و كالت : منو اللي افتهمت .. تكوم تحل ؟
رفعت ايدي وكمت ، كضيت الكتاب و انا اشرح لروحي و احلن اعلى الصبورة .. والمدرسة وراي جويعدة و تتنوعلي .
خلصت و انداريت الها : صح ست .
تبسمتلي و كال : ممتاز ممتاز ... تصفيق .
الكل صفكلي الا ذن ما صفكلي ، كتلها : ست ذنيج ما يصفكن.
عاينتلهن و كالت : صفكلها .
صفكن من وره خشومهن .. فرحت حيل من خليتهن يصفكلي .. عبن هن موش مثلي شاطرات انا اشطر منهن.
خلصيت و طلعت من المدرسة رحت لامي كلت الها : يمه المدير يكول يو ما اجا ولي امرج باجر تنفصلين .
- اسم الله يمه عليش شعامله ولج .
- ما سويت شي .
- جا عليش هيج طالبنا
- شمدريني ، روحي باجر و انشدي .
ما كلت الها تعاركت ويا البنات اعلى الجنطة من كون اعرف امي تغتاض و تنقهر بساع عبن امي روحها عزيزة وما تحمل جلمة الذلة .
ردينا للبيت و انا ذابه كل حيلي بالدراسة خاطر اصيرن اشطر منهن .. ويشوفن هاي ام علاكة احسن منهن و من الجنط الملونة الشايلاتها اعلى اجتافهن .. عدالهن الشطارة بالجنطة امهات الكلك .
ثاني يوم رحت وامي عافت غريضاتها يم ابو الصمون ومشت وياي دشت اعلى المدير و حجت وياه ، لجنه جان يحجي وياها معلك من كونها عُربية و حجاياتها ريفية وشادة وزرهن ومبينه عرب جول و يحجي وياها من طرف خشمه .
لجن امي ما تنحط بالعب و كالتله :، عليش يمه تحجي وياي من طرف خشمك ، من كونك مستحكرنه جيف بابة عرب ، جا وين ثقافتك يمه و انت مدير ، شخليت لرعيع .
- انا ما مستحكرج بس بتج ما مؤدبة
- عليش ما مؤدبة شسوت .
-اكثر من مرة وصلتنا شكوى بحقها و لو نعادت افصلها من المدرسة ، مدرستنا مو بحاجة طلاب همج ما يعرفون معنى الثقافة.
- يمه هاذ حجيك ما يجوز و عيب عليك .. البت....
قاطعها : لا تكولين عيب عليك
- لا عيب عليك و ما يصبر تحج هيج ويا الوادم ، بتي غلطت كلي غلطت و صلحيها وانا احج وياها.
كام المدير يترادم ويا امي لجن المعاون ادخل و فضت ووهم يطوني فرصة و يو انعادت .. انفصل من المدرسة.
البنات من شافن امي اجت للمدرسة عرفنها هاي ام الروبة التبيع اباب الفرن مالت الصمون ، كامن يدشن للصف و يصيحن : روبة رووووووووبة ، منو يريد طاسة روووووبة ووياها علاكة مال مخضر .
ويتضاحكن .. وكعدت وحدة منهن بالكاع و تسوي روحها تبيع روبه و تقلد اعلى حجي امي و تكول : يمة جا عليش ما تشرن مني روبة .
وكامن يتضاحكن بصوت عالي ، يو كمت و تعاركت وياهن يفصلوني من المدرسة عبن المدير نذل و شاد وياي .
طلعت للساحة ابجي لوحيدي .. ليما صار الدرس دشيت وانا ما اعاينلهن .. كتبن بورقة صغيرة ووصلنها من وحدة الوحدة ، ليما حطنها جدامي ، عاينت للورقة مكتوب بيها ( بيش الروبة ).
اغتاضيت كلش وكمت كلت الها : ست انا اريد اروحن
- اندارت متفاجئة و هي تكلي : شبيج ماما شنو الصاير .
اطيتها الورقة و كلت الها : انا افتخر بأمي التبيع روبة خاطر تعيشنا و تخليني ادرس و اصيرن احسن من بنات السلف الما داشات مدرسة .
حجيتها و طلعت من الصف .. و هي تكللهن : منو كاتب هاي الورقة .
كلهن نكرن ، ظليت بالساحة ابجي لوحيدي .
طلعت من الصف و صاحت : جمااااارة حاكم
درت ليها اشرتلي و كالت : تعالي اكعدي هنا.
وكعدتني اول رحلة بالسرة البنص جدامها و كالتلي : ركزي وياي و بالج بدراستج و اي وحدة من البنات اللي بالصف تعيد الصار ، بس اكتبيلي اسمها و اني اتصرف وياهن .
حسيت دموعي وانا اوجد بالصبورة خاطر افهم .
ليما طلعت من المدرسة ، سبكني لامي وراحن .. وهن يكللها : حجية عدج رووووبة
كواغد : لا يمة كضى العدي .
- لااا حرامات ، احنا نريد روبه .
- تعاي باجر و جنج اعلى روبة ، اول طاسة الج.
انا شفتهن ، ذبيت علاكة الكتب من ايدي ، وانهديت بيهن اتكافش وياهن واصيح ، التمت الناس اعلينا و هم يفكوهن من اديه و انا اغلط عليهن : بنات الجلب انعلن ابوجن لابو الخلفجن .
طكتني امي و جرتني و هي تصيح و تغلط علي ، صعدنا بسيارة حمل شالتنا للديرة و هي بديها الجداري و الطوس مالت الروبة و تصيح : وانا الامدح بيج ثاري المدير ما ينلام بيج من يكول ما مؤدبة ، سودتي وجهي يالنمرة بالشارعة و تتجطلين فوكهن و ما خليتي اعلى حالهن حال ، ولا جنج بنية .. لا حرام مخلفة اثنين ولد ، ستار وجلجول .
صرخت : اي انا موش بت ، وموش مثقفة و عررررررب جواله ، ياله ياله .
وكمت انكث بدي و ابجي ، و البسيارة يعانون علي و يكولن : شمالها هاي و امي تحجي علي وتصيح دهر صابج يالنمرة ، عدالج هاي المدرسة مالت الريف و يومية فاشخة ولد ولج كبرتي عكلي و اركدي تعبيتيني .
وتزن براسي ليما دشيت البيت .. وانا اصيح : بعد ما اروحن للمدرسة لو اموت ما اروحن والله ، ياله ارتاحي ما اروحن .
ودشيت لحجرة ايمان و سركيتها و ظليت ابجي ، و هي تغلط علي و تكلي : بكيفج ما تروحين ، ذبيت عليج كوكة فلوس بس فلوس الكراوي بكثر شعر راسج .. ظلن لا بيجن خير ولا نفع .. تروحن لازلم يجتلونجن و تردن اعلى افادي ، ساعة السودة الخلفتجن و ابتليت بيجن يالبرابيييك .
انا جويعدة بالحجرة و ابجي .
دخل سرحان للبيت .. لاكته فخرية : هلا بيك
- هلا يابة
- متغدي
- اي تغديت بالمعمل .
- اي حكك غاد احبيبة الكلب شلون ما تتغده بالمعمل ، قابل شنهو البيت و تاكل بيه مامش احد بيه يفتح النفس و تكابلة ووتاكل .
ما رد عليها ، و دش و هو ينزع بالعكال حجت : اريد اجيبن خدامة للبيت .. وانا فكرت بجنة ام سالم ، و بت صبيحة ، نعرفهن و جانن يشتغلن هنا كبل .
موش احجي وياك عليش ما ترد
-تعبان اريد انامن .
- اي بس جاوبني
- خدم ما اريد ابيتي ، انتم جثيرات وبيكم البركة.
- و شنهي فركي عن ملوك ... ابا عن جد و نسوان الشيوخ عدهن خدامات حدرهن . ان جان ملوك يو حبوبتي يو الشيخة محاسن مرت الشيخ جلوب ، شنهي الجرى و ما اخلي خدامة عدي ، شنهي ملوك بيش احسن مني .
- عاين لأبنه يلعب وملابسه املثكة .. اندار ليها : عليش هيج ملابسه ؟
-اي جا شبيدي امس بدلتله و دمر روحه .
- امس ! بدل ما حاطة روحج و تقارنينها بملوك .. عايني للجهال و نظفيهن شوفي حالهم ، بالله ذول ولد شيوخ .. يو جاني خطار و شافهم بهالمنظر هاذ شكولن و شحجي .
- اي مو جاي اكللك اريدن خدامة تعاوني ، خاطر اهتم بيهم .
- يعني يو ابنج يظل اعلى هالحال و تانين خدامة خاطر تنظفه .. اذا ابالج تصيرين ملوك فأنا كلبي فايض من ملوك و امثالها .. كليلي يو رايدة تصيرين مثلها خاطر اطلكنج و اخذ التجابل عيالي وما تصير مثل ملوك ساعة البهذلتني و غربتني ابيت ابوي .
صاح على امه : يممممه ، الجهال يو رديت ولكيت هاذ حالهم وعلي فحل الفحول لاشرد البيت كلهم و ما اخلي نفر .. ومن باجر احطن عروس ابيتي ، الحجي مفوووووم يو اعيدنه ؟ .
حجت فخرية : كول رايد اخذ بت سلطان واثني عليش تتحجج علي .
هداها و طلع من البيت و ردحة خذت الجهال تغوسلهم و تبدلهم ، مر اعلى بيت ملوك خاطر يكللها : بت كريم وديها لراديون اذا بعدها تلجي و احرصي كل جم يوم تمرين عليها و تنشدين وتحطين مصرفها عد راديون ما اريدن ال ثجيل يتمننون اعلى بتنا.
- اي ، بس شصاير عليش هالمصايح البالبيت ، صوتك ليجاي واصل .
- طكت افادي .. ادشن الجهال جاتلهم الوصخ و هي تصيح اريدن خدامة .
ملوك : جا هسه راح تعرف الحك وين ، جانت راديون الشايلتهم تغسل و تبدل ومجابلتهم ٢٤ ساعة وذيج تصيح بدلتهم غسلتهن .. نظفتهم .. خاطر تكوش اعليك ليما نالت مرادها وخذتها .
سرحان : هاذ الحجي انا ما يمشي عدي ، اداريهم خير اعلى خير ما اداريهم من باجر انا احطن مرة فوكها وانعل سلفاها.
- سويها وخلي النسوان تتغالب اعلى مدارات جهالك .. خاطر يرضنك ، الايد الوحدة ما تصفك عدل يبن مطر .
- يصير خير ، اخذي البت و تفكدي راديون شمعتازة .
- تامر .
مشى سرحان و ملوك راحت لراديون اطتها بت كريم ، وذيج طارت بالبنية تحبحب وتضمضم بيها ..
- شنهي اخبار جهال اخوتي مشتاكتلهم وعلي من كون تعودت اعليهم جنهم جهالي .
- بالضيم اخلافج
- كولي وعلي؟
- اي والله و سرحان و مرته غادين دمايا ، تريدلها خدامه الخاتون و تريد تصير مثلي .. ساعة الرحتي بانت جيفتها وطلعت ريحة الخياس ووصلت خشم سلطان .
- يطبها مرض ، جا انا اغسل و اداري واوكل ، و يو دش سرحان تلكته بالهلا و المرحبا و شتعتاز و هيج سويت و هيج خليت و تسوي روحها هي راعية الدار ، جم مرة اكولن احجي لجن اشوفن ما تسوى واسكت من كون ذول وليدات خواني وحسبت جهالي ما مداريتهم لاجل احد يمدحني يو يكلي عفية .
- البت هاي انا موش طايكتها .. ولا جارعتها ومن احطنها ابالي اخليها هي والتراب .
- عيفيها يمعودة شلج بيها .
- لااا .. من يوم العرس عليها سرحان ولليوم ما شايفة احد جدامها تمش وتصيح انا الشيخة و عدالها تاخذ مجاني القديم ويو دشينا البيت تبسمر و ادوس بالمصران خاطر نكش ونكف ما ندخل الفصر ويظل الها تتبختر بيها ، ما تعرف ملوك يو حطتها براسها تلعبها اعلى تك رجل .
- عوفيها يمه مالنا حيل وجع راس .
- لا .. ما اهدنها و اجا الوكت الاحطن هدوة بدرب سرحان و اغيضن هالتتمشيخ هاي .
- هدوووة؟ .. هدية شلها غرض .
جاي نحجي دش سلطان وانا وامي جويعدات بالديوان ، صاح : يا هلا وزين ما اجبل علينا ، يا هلا بام ازناد .
كامت امي اعلى حيلها و كالتله : يا هلا بابو نعمة .
- يا هلا و جثير الهلا بيج .. شلونج شلون الصحة .
- بخير نحمد الله ونشكرة ، يلة يمه انا اروحن .
- وين ما اطلعين الا وعشاج هنا .
- دايم عشاك يشيخ ما تكصر ، لجن البيت غاد تايه ولزوم اردن .
- وياج سيارة يو نزتج .
ملوك : يو وحيد منكم يوصلني ما اكولن لا من كون اجيت ممشى ما تجيت بسيارة .
سلطان : افا امري ويجرالج .. اوصلنج منها واحج وياج جم حجاية بخصوص زناد ..
ملوك : تعرف شي عن ازناد .
- نمش ونحج .. حياج ......يتبع
لقراءة الفصل التالي : اضغط هنا
لقراءة باقي حلقات الرواية اضغط على (رواية كحل عرب)