رواية كحل عرب الفصل الثاني والستون 62 بقلم زينب ماجد
رواية كحل عرب الجزء الثاني والستون
رواية كحل عرب الفصل الثاني والستون 62 بقلم زينب ماجد |
رواية كحل عرب البارت الثاني والستون
الحلقة_62
( زفاف )
شكثر ليلك چـواني و روحي عطـابه
اعلـ جرحك
( عريان السيد خلف)
هدية : هاااه ؟
ايمان : والله اني شفت هيج شي بالحمام
هدية: مشيت للحمام تنوعت منا ومنا .. كلشي ماكو .
انداريت الها : حبيبة مامش كل شي هو صح جان مسكون بس من يوم الكعدنا بيه لليوم ما شفنا شي ، يمكنج انت موجدة وحاطة هالشي ابالج .
- انتم هم رجعتو متصدكوني ؟
حجتها و هي تمسح بدميعاتها و تصد براسها ليغادي .
- دية عليش هالبجى موش سالفة ما نصكدج لجن ما نريد نفزعج و هالتشوفين ماكو شي ، يمكنج تتخايلين على كثر ما توجدين و تتخوفين .. ضكري الله وردي الفروخ ذول الواكفين حذاج يتباچون .
كضيتها من ايدها ورديتها للبيت و دشينا .. لجن حارة تكتل .. والكهرباء طافية طلعينة حصيرة و فرشناها وكعدنا نحوك بالمهفات و نشتغل .
حجيتلهن اعلى بت سرحان و روحتي ليه وطلبتي شغل ، حجت لاله : خير ما تسوين هلبت يلاكيلج شغيلة معدلة تشتغلين و تكسبين منها ارويتب .
- هو انا هم كلت هيج .. انطر امي واكللها خافنها ما ترضى .
واحنه جويعدين دشت علينا جميرة و هي فرحانة وتصيح : نجحت نجحتتتتتتتتتت .. هلا هلا هلا
- صكد ؟
- اي وعلي نجحت عايني شهادتي ناجحححححححة.
كمت وانا اعاين لشهادتها .. ما افتهمت بس انا اعرف الارقام و هاي ارقام جثيرة اظنن خوش شهادة .
جرتها من اي وفزت تريد تطلع : وييين
- هسه اجي هسسسسسه اجي
طلعت اركض و تعنيت لبيت خنيجر من ابعيد ، شلت حصواية من الكاع و طريتها اعلى بيتهم و لبدت بسد الحايط ..
بس شو ما طلع !!
معكول هو مو بالبيت ؟ .. لا هو مبطل و بس ينام
يمكنه يشتغل ، ظليت اتنوع .. بس مامش احد
مشيت خذت حصواية ثانية ونيشنتها كون اطك باب حجرته ، طريتها وطكت بالباب و صار صوت عالي .. لبدت بساع .
سمعته يصيح : والله اليوم انعل والديكم ولد الجلااااب .
طلع وهو كاض بعصة ، تلكيته من كفاه : عممممممممي
فز اعلى حيله : و عماااااا العماج شمااااالج فززيتيني .
-عمي جيت ابشررررررررنك
- عساج لا بشريتي كطعتي خلفتي بت المطي امشي غاد .
- شمالك عمي جا غير انا فرحانه و ناجحة و اجيت اكللك انا نجحت .. شمالك وياي .
- جا هو هيج يا عمي ، بله اعاين .
خذه الشهادة و كال : عفية بالسباعية ، عفية بالدكتورة .
طلع من جيبه فلوس و اطاني ، كلتله : شني عمي انا ما اريدن فلوس.
- لا استحين هاااج اخذيها.
- جا خوش
خذيتها و خليتها بجواريبي .. وردت امشي حجه
- جا بس على هاي ربدتي الباب بحجارج .
تبسمت و كال : ياله انجحي بعد و صيري دكتورة خاطر نعرس .
- صكد عمي؟
- جا اجذب عليج ، بس اسمعي ، طلعة لا اطلعين بعد صرتي طويلة و الهوبزة و المراكض بالسلف بعد ما تليك بيج خوووش ؟
- خووش .
رديت للبيت وانا مرتاحة كلش .. نشدت هدوة عن امي كالت بعدها ما رادة ... للظهر كلش ياله اجت و بشرتها و اطتني فلوس و حبتني و كالتلي : بس اروحن للسوك اشتريلج نفنوف مال بنيات جديد الج ، بس اريدنج تصيرين حبابة و تنجحين بعد .
- يمه شنجح بعد .. بالسلف مامش مدرسة مالت ثانوية بس مدرسة مالت ابتدائية .
- انا اشوفلج مدرسة غاد جريبة اعلى المجان الاكعد عده .. اخذنج عاد يومية ، انا اخلص شغلي و انت ادرسين.
- و يو ما رضى ابوي ؟
- لا تشيلين هم ابوج ، انت بس صيري حبابة و خوش بنية و كون ما تنغرين بوحيد يحجي بذنج شي ولا تتبعين احد و يو كرب منج احد تناوشي طويبيجة من الكاع جلمودة هالكدامج و اهبدي بيها و اشردي خاطر بعد يخاف وما يكربج خوووش ؟
- خووش .
هدية: اكلج يمه
- ها
- هاا ..لا هيج .. خل السالفة تصير و عود اكللج بيها
- جا بس ذبيتيها وفلتي ، احجي شعدج
- لا مو اخافن تعارضين و تمنعيني .
- ان جانت سالفة شينة امنعنج منها يو مو تصير ، يو تتلايم الدنيا .
-لا وعلي موش شينة لجن اعرفنج بالج يجرخ و تروحين تتخايلين سوالف بعيدة .
- جا غير اعرف السالفة شنهي ؟
- انا حجيت ويا سرحان .
- دام السالفة بيها سرحان ، جا كولي تطينت روسنا .
- عليش تحجين هيج يمه سرحان خوش زلمة وما طلعت الشية فرد يوم .
- جا انا ذميته ؟ من عبن عداه جثيرين وانت من ذاك الوكت متهومة وياه و اخافن اعلى الجلمة تلوحج .
- لا يمه اتبوش وعلي وما اخلي احد يهيسني .
- تتبوشين ؟!! .. شناوية عليه يهديوة
- يمه كلت اله يشوفلي شغل عده .
- وين عده .. بالمعمل ؟
- اي
- ياااااع شني ولج تسودنتي .
- يمه اعيننج
- وعساج لا عنتيني ، جا يو حصرج و حبلج انا شطايح بجيسي غير الطراكيع ؟
- يممممممممه شنيييي ، جا انا موش كلت الج تكومين تتخايلين سوالف بعيدة ، جا هو من اول ما يسويها ولا دنى الردية هساع .. و حتى يو جا انا ما تثقين بيه .
- جا هي لو تربعت ساعة الشيطان و انت عزبة موش بت مثل اول ، وهو صارله اسنين ما كاض مرة .. امن عليج ساعتها ؟ لا والله ما امن ..
- يمه شني هالحجي هاذ وعلي عيب ، لا ثوبي ولا ثوبه
- ثوبيش يبت حويكم .. اضكرنج الفجريات من جارج للبستان و يحبحب بكصتج .
- يمه حبني بكصتي ما حبني بغير مجان .
- وانا انطر ليما يحطها بغير مجان .. خايبة صمي حلكج و استجني لا وعلي اكضن العطاب و اجويج تعرفين وين .
- جا هو انا شحجاني .
- لا يو ظاله تك**** من وراي .. عليش تكليلي ، خايبة اسمعي لا عدالج عدج بت و احترمج اكومن اكرمعج بالعباس .
كمت منها و ما حجيت وياها ، راحتلها ايمان تشكي من خوفها ، و انا ظل ابالي .. جا هي اجت للحلك و اردنها عليش ؟ اريدن اكضن فلوس بيدي اشتري لبنيتي اعيشن .. جا انا ليمتى اظلن اعاين لامي و ابوي و اخوي يطلعون من جيوبهم و يطوني .. فليح وما حصليت منه لا رويتب ولا هم يحزنون ، صفى كلشي لهله .
صفنت بروحي !
هسه انا عليش متعبة مخي وافكر ، ياهو الكال سرحان يشغلني وياه ، يمكن بغير مجان و امي ترضى .
ظليت اجيبن و اودي .
لليل نمت بفراشي وكلت ما افكر ، اندار والاكي جميرة متبسمة : ها ولج شمالج تضحكين للسكف ؟
- خنجر كالي يو نجحتي اكثر نعرس .
- جا هاذ ما بطل منج
- هديوة شني يبطل انا احبنه .
- خايبة دية وينج ووين العشك .
-شني انا صرت جبيرة
تنهدت و انا اعاين ليها : جا انا ما اتمنالج الخير يخيتي ، هلبت حظج يكعد موش مثل حظي ، و ان جانج تحبين خنيجر الله يسهلها الج .
تبسمتلي و اندارت اتغطت .. اعاين خيال زلمة بالحايط ، فزيت والتفتت وراي . ماكو شي .
رديت راسي و توسدت شواي و فتحت الباب ايمان و حطت افراشها بنصنا ونامت ، خذيتي اميدي منها و خليته بيني و بين جميرة و حبيته و نمت .. وبتي وراي نايمة .
للصبح ..
فجيت عيني ، كمت اعلى حيلي امي ويا الحلال غاد .. و انا عجنت بساع و غسلت ايدي .. نطرت امي تطلع للولاية اعلى شغلها ..
تعنيت للشط و مشيت لكيته واكف .
اشرالي من ابعيد امش وراه .. ظليت امش ليما وصلنا المجان ما يطرى اعلى العين .
وكف و انا كلت اله : عليش جليتنا ليجاي .
- ما اريدن احد يشوفني واكف احذاج من كونج تأخرتي و الشمس طلعت ..
- تأخرت بسبة امي تاخرت ياله طلعت .
- شلونج ، شلون حالج .
- على الله .. ما اريدن اطول الوكفة ، جيت اسمع جوابك و اردن .
- هدوة انت تامرين موش تطلبين ، شفت المعمل و اكدر اشغلنج بيه .. هكو مجان يسعلج اذا تريدين .
- المجان جريب منك .
عاينلي و تبسم.. رديت .. ان جان جريب ما اريدنه
- عليش ؟
- اخافن لا يمسني الحجي و انت تعرف الوضع .
- انت تشتغلين ما جاية تلعبين ، و الما واكف وياج بالضيج ولا نشد عنج ساعة العسرة ماله حك يو وازتج دنياج اعلى الشغل و هو معكل و بيه نسوان و زلم ، و مجان النسوان معزول غاد .
- يعني موش جريب منك ، جا خوش .
هز راسه ... حجيت : سرحان لا تزعل ، انا موش بس اخافن اعلى روحي ، هم اخاف اعليك تصيبك جلمة من حدر راسي .
- كل مجان انت بيه جنة الله اعلى الكاع عدي .
تبسمت .. و صديت راسي عنه ورديت حجيت : امس امي من كلت اعلى الشغل ما رضت و ظلت تحذرني جثير .. شلون اقنعنها
- تريدين انا اقنعنها و اطمننها انا ما اتكرب صوبج .
- هااا .. لاله لا .. اشوفن انا شلون اقنعنها ، بس يمتى ابدي بالشغل ؟
- اذا عاجبج من اليوم .
- خوش
- ياله جا انا انطرنج بالمعمل ، خوش .
- بحيل الله .
رديت للبيت و بتي عد جمارة، كلت الها : جميرة انا راح اروحن بالمعمل اشتغل لا تكليل لاحد انا غاد .
- جا ويو نشدتني وحدة منهن ؟
- كليلهن راحت عد بيت خالي .
خليت بتي و جريت شيلتي اعلى وجهي و طلعت للمعمل . دشيت غادي ، سرحان ناطرني مناطر .. سجلو اسمي و دلاني بيده اعلى الشغل و ابتعد عني .
بس يا فرحة كلبي و انا وياه بنفس المجان اشتغل ، غير اعضاي تتراجف وما اسيطر اعلى كتر منه ، لجن ظليت مخليه شيلتي اعلى وجهي خاطر لحد يلوحني بچلمة .
اشتغلت بهداي لا هو كربني ولا انا كربت ليه ، لجن اسمه كل شوي يطلع من مجانه يوكف يربي من ابعيد و يدورني وين مشيت ووين رحت .
خلصت الظهر شغلي .. لكيته طالع هو ..
صاحلي الحجي يونس كال : بويه هاذ اجرج مالت الاسبوع هاذ .. ويكول الشيخ التوفيج ان شاءالله
- الله يطيك العافية عمي.
كضيت الفلوس وانا ما صدكة صار عدي اجر و اشتغل ويطوني ، كلبي راد يوكف من الفرحة وانا كاضة فليساتي .
ادشن العجد مالت اهلي و اعاين امي واكفة .. وعاي عدالك حزبي واكفة براس الدرب .
وصلت ليغاد ولنها اطلع العودة من ورا ظهرها ..
: ها يمه خير
- دشي وانا اعلمنج الخير شلونه
- شني يمه شكو
- دشي
- لا والله ما ادش ، اذا ناوية اطكيني هسه اروحن لبيت خالي .
- دخطي جدمج لا ما الحكجنج و ادبج بمصارينج ، دشي ياله .
- دشيت وهي طكتني اعلى كفاي بالعودة ، ضحكت وركضت لحجرة ايمان
- وين جنتي ولج
- يمه اشتغلت بالمعمل .
- اشتغلتي موووووو .. وظلت تدفع بالباب و لالة تجر بيها وانا ادفع وايمان كاعدة ترضع و تعاين النا .
وامي تصيح : ولج برااااااابيك احجي من الباجر ما تسمعن حجاية ، انا شحجيت و شوصيت .
- يمه انا ما سمعت غير احجايتج ، جا موش انت الكتيلي محد اله طوع اعليج .. و انت حرة روحج كدي اعلى روحج ولا تنطرين من احد .. وانا خذيت حجايتج .
- وانت اطبقين حجايتي علي و ما تااااااخذين بشورررري.
فتحت الباب : جا عليمن اطبقنها .. دام اعرف روحي شنهي وما غلطانه ما اردن ، و هاي انا استلمت اجري ، و خوش اجر عليش اتعافى و اهدنه .. و الله خاف احد يلوحني بجلمه .. جا هم الناس وينهم من اعتازينه ، من طحنه بشدة و بعت البيت و غريضاتي كلها مامش احد كرب وكال شمعتازة ومن اوكف اعلى حيلي يتعاينون وياي .
- ومامش غييييير هالمجان تشتغليييين بييييه
- اي مامش احسن منه ، شوفت عينج شغل ماكو ويو ردت اشتغل فلاح بكاع احد ما اطلع نص هالاجر الاخذنه بالمعمل ، عليش شادة وياي انا موش صغيرة .
ظليت اداهر وياها .. و هي تصيح و سابيه البيت .. ليما هدت و اجت تحجي وياي : خايبة انت رايدة شهيرتج ؟ ما تعرفين بت عمه يو درت تكلب اعليج و تشهرج .
- يمه شني اخافن منها .. سرحان لا كاربني ولا كاربته ، و بت عمه هي االزوم تستحي اعلى روحها و تتكتر موش تتصايح وياي اعلى زلمة ما يريده .
- وانت اعلى شنهو ناوية .
- ما ناوية اعلى شي ، رايدة اشتغل واكدن اعلى روحي ، وانا ماخذة بحجايتج ومغطية وجيهي ، عليش بعد مانعتني .
-و سريحان ؟ لا تكليلي شيخ و خوش ادمي الزلم ما تتامن يمه .
- يمه انا موش بطرك روحي خاطر ما افكر باحد ، انا عدي بت وسمعتها اعلى بالي يو غلطت تنعاب ويعايرونها بيه ، و يمن كون التراب اطمني يو سويتها .
- جا خوش ، انطر اعليج و اشوفن ، لجن وعلي يهدوة ، يو غلطتي انا اجتلنج كبل الكل .
- ترباتج انا يمة .
-نشوووف ، يكولون الحك العيار الباب الدار و انا لاحكتج و اشوفن وين تصل وياجن يبنات حويكم .
ورضت اشتغل بالمعمل و الصكد انا هم جنت اخافن اعلى روحي من كون اعرف عدي بت و يو غلطت عمامها يتانون الزلة علي خاطر ياخذونها.
وظليت اشتغل بالمعمل و ما اكرب سرحان ، ولا هو المكرود يكربني ، يخاف علي ، لجن يو طلعت تبوشت و مشيت .. حتى عيوني بوشيتها خاطر لحد يعاينلي و يظل يتربصلي اعلى الطلعة و الرجعة .
ابوي من درى اشتغل بالمعمل ما رضى .. بس امي كدرت تقنعة و تكله خلها بس هالفترة و هي مبوشة و ما يشوفها احد .. و من هالحجي .
فترة و اندكت الباب علينا ..
ونعلها ام يسرى .. دكت الباب اعلينا و تكول : ذني بناتكم احنا تعبنا و ما بينا حيل نحمل ضنا موش ظنانا.
وهدت البنيات ومشت و هن عليلات .. وحدتهن حولة و الاخرى عرجة.
ظلينا انتصفن وحدة بوجه الاخرة .. البنيات يتباجن نطن من البجي يريدن امهن .. كضيتهن .. شلتهن اسكت ولج عمه .. خايبة يمه .. فدوة اغديلج .
ماكو ما يسمعن بس يبجن اعلى امهن .
لليل و اجتنا يسرى اعلى الباب تبجي و تتوسل بامي و تصيح : بناتي لا تحرموني منهن .. انكطع افادي اعلى فركتهن عمة احبن ايدج .
امي كالت الها: خل يرد عمج والله كريم .
يس هي ظلت تتوسل بامي و حتى الجيران طلعو اعلى صياحها، امي ما رضت من كون اخوي راد يموت بسببها ، ما رضت رجعتها .
ردت لبيت اهلها و هي تنوح ..
والجيران وكفن ويا امي يقنعنها هلبت ترضى ترد ، شما يصير تظل ام و الام ما تحمل بلا ظناها .
امي كالت الهن .. الله كريم
لثاني يوم و اجا عمي يهوبز بالبيت .. لا انا ولا امي موجودات .. ظال يصيح بالباب شلون بته هاذ حالها و كال الهم : يسرى يو ما ردت ، ظناكم عدكم ، وضنانا يرد لينه ..
ساعة الرديت و سمعت .. تسودنت كلت الها : يمه فدوة اغديلج بتي ما اطيها و اخافن لا ياخذونها مني وانا اموتن يو بعدوها عنيي ، ردي يسرى و تجفي الشر .
صرخت ايمان : لا ما ترجع ، هي بزوجها و هي سوت وراد يوموت وبقى يزوع دم ، احنا شتسوي بينا ، اني ما ادا انام الليل من الخوف انوب ترجع هي .
كواغد : جا انت شلج غرض بيها ترد و تكعد بحجرتها هي و بناتها ... و انت بحجرتج
- لا ما تعوفنا بحالنا، شنو نسيتو لما تزوجت شسوت بيه ردت اموت .
هدية : جا ويو خذو بتي شيفيدتي ، تفكرين بروحج و ما تفكرين ابتي ، يرد ابوي و كليله يحير بيج ، انا بتي ما اكدر اطيها .
من سمعتني حجيت هي ، جرت جهالها ومشت لحجرتها ، حسيت روحي دست اعليها .. ومشيت ليها اتعذر منها .. بس هي تبجي وتكلي والله اخاف .
- انت ليش ايمانج ضعيف ، الله اكبر منها و من كلشي يو دفع عنج اذى لا هي ولا كل بشر يكدر ياذيج.
وظليت احجي وياها لينا طمنيتها ورديت لامي كلت الها : رديها و امرنا لالله .
ثاني يوم امي ردت من الشغل ..
راحت ليها جابتها و اجت من كون البنيات غدن اتراب اعلى امهن .. و حجت وياها امي : اسمعي يسريوه ، يو رديتي لفعايلج ذيج و دوريتي ويانا سحورة ، و علي ابن ابي طالب احطنج و اكتلنج خوش ؟
- عمه انا من ايدج هاي لايدج هاي و كل الرايدته بنياتي ورجلي اكفكف اعليهم و استر اعلى رويحتي .
- خلنا نشوف .
......
راديون .. سمعت بحس سرحان بالباب يصيح اعلى فروخه يلعبون بالماي .. ركضت ليهم شلتهن و كلت الها : ابو مامون فارغ ؟
- شنهي ؟
- رايدة احج وياك
- كولي
- لالة لا اروحن البس فريخاتك و اردن خاطر نحج بهداي .
- جا خوش حضريلي الغدا بدربج حيل جوعان .
- تامر
دشيت داخل وانا بيدي مروان و مامون اسحب بيه لاكتني فخرية : شني اجا سرحان ؟
- اي وشاف الفريخات بهالحال و عصب، رايحة ابدللهم و اسويله غده
- يا انا اروحن اسويله ، ما عدالي توه يجي كلت يتاخر.
- لا جا انت ما مسؤلة بيه .. وفضل منج خدمتج هاي
- يا شتحجين ديه غير وليد عمي و اشيلن عنه صكد جذب .
رحت ابدل الهم من حجرة الجهال ، اجا سرحان ينزع بعكاله و يبدل درت ليه : خوية ردت اكللك .. الخميس امش ازورن جسام بالسجن و كلت اطيك خبر .
- ياهو الياخذج ؟
- امي
- ولوحيدنج تروحن سجن ، شلج بيها هاي بويه ، اكعدي .
- جا ياهو اليروح ويانا .. مامش احد و انت مشغول وانا صالي ٦ اشهر ما رايحة ليه .. و طاك كلبي.
- اخلي سالم يوصلكم ... بس استعجليلي بالغدا .. رايد انام
- جاي تسوي فخرية .. شني هيج الشغل متعب .
- موش بس الشغل ، من الشغل للمضيف من المضيف اطلع بطلابة و اكعد و احج و اسمع و رد للمعمل اشتغل و اوكف اعلى روس عمالك .. حاسب و دقق و شوف ورد للكاع شوف الفلح و المحاصيل و شنهو الشغل .
جا هاذ كله و ما تريديني اتعب .
- الله يساعدج ، بس ما طول هديوة غاد .. جا يخف .
- هو انا شايفها شايفتني ، باليوم يو تصدف احجي وياها حجاية عابرة يو ما تصح .
- عليش ؟
-البت وراها ال ثجيل يراديون ما رايد اوهدن حالها و تزود الحمل عليها ، كافي عدي حدر عيني و مرتاحة ما رايد اكرب اكثر و اذيها .
.- و جا راح تظل هيج
- انا بيدي وما عملت شي ، ما اعرف الله يمتى يمن علي و يطيني مرادي بيها .
جاي يحجي و دشت فخرية حطت الزاد بالكاع و كالتله : تعتاز شي يبو مأمون ؟
- لا بويه ما تكصرين ، الله يطيج العافية .
يحجيها و هو مدنج عنها ، طلعت من الحجرة و انا ظليت انوم بفرووخه .. مروان نام بس مامون چلب الا ياكل ويا ابو .. كعداه حذاه و ظل يوكل بيه .
فخرية سامعة بحجايات سرحان .. و عرفت هدوة جاي اشتغل عده .. وهو ناطر هلبت تصح و يحصل اعليها ..
من عرفت بهالسالفة تسودنت .
مشت لامها تبجي و تشكي
وانا شايلة عياله و هو امناني وكال اخطبج و هسه عرض عني ، شمالني و شبيه .. ومن هالحجي .
امها موديه الحجايات ذابتهن بحلك عمه ..
عمه كضاه بالمضيف .. وكال : الله بالخير عليك بويه ؟
- هلا عمي الله بالخير .
- اسمع سرحان بوية ، انا عمك والي حك عليك و صالنا بالسنتين احنا ببيتك .. وبتي مدارية وليداتك وراعية بيتك و انت اطيت جلمة و كلت اخذنها و سكتت عنها ، سكتك شنهي بوية .. رايدها يو لا .
- عمي انا ما رايد اوهدنها وياي من كوني يا عمي صعب و طبايعي صعبة
- جا اذا بت العم ما تحمل ياهي التحمل طبايعك .
- انا ما رايد اظلمها من كون اعرف روحي ما اتوالم ويا وحدة .
- شنهي هاي عمي اعتبرنها ردة
- موش ردة ، لجن الحجي موش وكته
- جا يمتى وكته بوية ؟ اسمع يبو مأمون ، جدامك هالايام ٥ الخمس ذن ، تاخذها اعلى سنة الله ورسولة خير اعلى خير ، تردها علي و تكسر ابت عمك ، اهدن البيت و اطلع .. ولا انا اعرفنك ولا تعرفني .
- لا محشوم عمي ما عاش اليردك ، اعتبر البت ماخذها وان شاءالله راح ابلغ الاهل الملجة الجمعة و اعلى خير ان شاءالله.
- اي هاذ الحجي الخوش ، اعلى بركة الله .
رجع عم سرحان بلغ الاهل ان عرس سرحان و فخرية الجمعة التجي ... بس بلا هوسة ولا عرس .. صفكة بيناتنا ونفضها من كون الكلوب ملجومه اعلى اهلها .
فخرية ما كصرت ..
مرت العصر اعلى بيت حاكم و دكت الباب ، طلعت الها كواغد: هلا يمه ، هلا بيج تفضلي.
- هلا بيج ، شلونكم
- حدر رحمته .. شلونكم مالونكم .
تحجي وهي تدخلها داخل، هدية متمددة وغافية ما صالها ساعتين من ردت من الشغل ، حجت فخرية : الله يسلمج عمه ، يا نايمات شنهي النوم هاذ ، نوم العصاري يجيب الفكر .
- جا موش بطر نايمين .. تعيبانات ... هدية هدية ... اكعدي يمه .
هدية : فزيت و نعلي اشوفن فخرية جدام ، كش لا هله .
كمت اعلى حيلي و كلت الها : هلا دية تفضلي
وكمت رحت اتغوسل و امي تسولف وياها و تنشدها ولاله مشت تزهبلها الجاي ..
اغسل و اعاين اللاله تعصر بوجيهه : شمالج ؟
- بطني مالومة وجمسمي بايد مدري شمالني .
- خاف ثكل مال حمل وولادتج كربت .. هاذ الشهر تخلصينه كله اوجاع .
- الله كريم .
نشفت وجهي ودشيت يم امي كعدت و نعلها تذبها بوجهي فخرية : اجيت اعزمنكم اعلى زفتي الجمعة .
كواغد :زفتج ؟!!
فخرية : اي عبن ملجتنا انا و الشيخ سرحان الجمعة وخليناها بيناتنا ما كلنا احد عبن الوكت موش خوش وكت ، بس انتم موش غريبين .
هدية : انكبض كلبي ساعة الحجت هالحجاية .. مدري شمالني اغتاضت روحي لجن كضيتها و سيطرت اعلى رويحتي من كون اعرفها جاية تغيضني موش تعزمني .
ردفتها : اي جا خوش من سمع الحجاية و رضى يعرس طلع اعلى السانا شعر و احنا نكله عرس و ما يرضى ، بس يكول ما ارضى ما تطيب لكلبي مرة ولا اتوالم ويا وحيدة بس هالحجي ما يصير لزوم يجيب التخدمه و تخدم فريخاته .
عاينتلي امي صفح .. هي اغتاضت حجت امي و غطت اعلى فاينتي و كالت الها : بالخير و بالعافية و شايفة الف خير ان شاءالله .
-اي يشوفون الخير ان شالله .. لا تخافين حبيبة اول الحاضرين انا لاهوس بعرسكم و ادبج دبج عمارة .. جا شيخ السلف هاذ ابو مأمون الغالي .
حجيتها و هي كامت من مجانها و تكللنا : اي عودين انشوفكم بخير .
كواغد : جا ما شربتي جايج
- لا تعرفين عكب باجر عرسي ولزوم اتحضر
- هلا بيج يمه .
طلعت و انا دشيت بحجرة لالة كعدت روحي احتامت و فرفحت اعلى هواها .. يمن كون حكه و اهو شيخ يعرس و عده ايتام ، بس انا ما ادري شصابني و تضعضع حالي.
دشت امي وفكت الباب ، الدنيا ظلمة بالحجرة و بس طولها يتراوالي .. وكفت وهي تكلي : ولج بربوك هاذ ياهو ابوو مأمون الغالي التدبجين بعرسه ؟
- يمه هديني رحمة للعزيز
- شهدج ولج و انت ما خليتيلي جلمة . توليتي المرة اتمطكين بحلكج الغالي و الغالي ، ما استحيتي اعلى روحج ولج .
- ليش هي تعرف المستحى خاطر اعرفها انا ، ظنج متعنية مناك ليجاي خاطر تعزمنه يو تغيضني
- وعليج تطيها مرادها و تغتاضين هو اوله وتاليه موش الج
- اي
صديت عنها و الدمعه تراري بعيوني .
هدتني ومشت .. ثاني يوم .. ما مشيت للمعمل غبت .. هو جان اباله يكلي بيومها بس من غبت ... عرف الموضوع وصلني و اغتاضيت .
يومي كله كضيته اتحسر و اذب حسرات و احاجي رويحتي ( ليمتها الألي يظل موش الي ، وليمتها يزل حكي لغيري؟ وليمتها يظل هاذ حالي )
ابوي من شلنا لهاذ البيت و ليجاي .. كام يلفي عد ايمان ازود ما يجي لامي من كون ايمان تمش وتوجد بالحياطين هلبت تشوفلها جني و تصيح ، و يو رد ابوي كضت بخوانيكه .. وامي مامش حجرة الها .. بردة و تردها .. فشهر اعلى شهر لا يجي لامي ولا يلفيها .
ساعة ووكت هو صاك الحجرة عليه و على ايمان و احنا مكابلين الباب و كاعدين ، يو ضحك وياها نسمع الضحكها .. واي جلمه تطلع نسمعها .. و امي حيل مغتاضة .
ترد تعبانة من الشغل تلاكي مسركي الباب علي و على ايمان .. و اغتاضت كلش من انا كاعدة و اجت ايمان : عدوة خلي الجهال عدج
- اي كعديهم ..
- ما جاي يخلون حاكم ينام .. وانوم بيهم ما ينامون ، هسه اجيهم اني .
حجتها و اندارت للحجرة دشت و سركت الباب ، امي عينها تربي اعلى الوضع وما حجت بس هزت راسها .. جريت هنودة و كعدت الاشيها و الاعبها
التموا علي اميدي وبنات ستير وبتي صفيتهم ومديت ارجيلاتهم و انا الاعبهم ( يحدي يبدي يا ناصر دي هدي الكون اعلى الزنبور ) وهم يتضاحكووون .. اجت البعيرة جميرة ولا جنها زرافة اشطولها ، كعدت و صفت رجليها
- ولج يزرافة شايفة روحج زغيرة دميلي عنهم
- والله معلي العب وياهم.
ضحكت و هديتها هي تحسب و تلعب وياهم و امي مدنجة وكاعدة : ها يالحبيبة اشو موش اعلى طبعج .
- لا ييمه ما بياش شي .
- اعرف شنهي البكلبح و اعرف ابوي صاله مدة ما يكبل ، لجن لا تحطين ابالج .
- لا يهديوة يمه .. انا تعوديت اعلى الهم .. جا الومنه بت زغيرة و حمرة وتحلاله .. يهدها ويعاينلي انا الحارك وجهي الشمس و مضيع رسومي التعب .
- اجت يسرى و كعدت كبالنه و انا اواسيها و احجي وياها .. حجت يسرى : جا حكها شني مرة هي يو موش مرة بس عمي باطل ، انا يو ترضى ما اخلي هاذ حالها .. بس هي ما ترضى .
- شتسويلها ؟
كواغد : لا تسوي ولا تعمل اسكتن ، هاذ الالله كاتبة علي و جاي يختبر صبري ويمتحني و انا راضية بقدر الله ، اكعدن .
ما خلتنا نحجي .. كامت يسرى و اشرتلي كمت وراها.
- شني يعني شتسويلها ؟
- شسويلها حجاب يخلي عمي ما يفاركها و ينام اعلى شليلها .
- بس عمل شيطان والله ما يرضاه .
-لا موش عمل شيطان ، جا يو حبها وكربها ما بيه اذيه اعلى احد .. عليش شيطان .
- متاكدة ؟
- يا يو طاوعتني اخلي خادم عدها .
-وشلون .. اذا ينشرب ما اريده سالفة اخوي و ابوي يروح بيها
- انا مالي بالصار بستار وعمي ظالمني تريدين اصكدين تريدين لا اعلى كيفج .. بس اذا سويت لعمتي ، مامش اذيه لاحد .. بس يكوم يتوددلها ويكربها ما يظل هاجرها اعلى هالحال
- وشلون ؟
- الدشداشة اليلبسها وهو نجس اريدنها .
- نجس ؟ .. نجس شلون .
- يعني مجنب ولابسها .
- وشتعملين بحاله .
- خايبة ديه شعمل ، اقرا عليها جم اية و احطن حجاب كلها جم يوم و يصير خادم حدر رجلها .
- ومامش اذيه بيها لابوي ؟
- لا والعباس كل اذية مامش
- جا خوش ، بس يو صار شي افضحج و اكللهم هي السوت هيج.
- لا تخافين شمالج انت بس طاوعيني .
- انا لعيون امي كلشي اعمل بس كون يرد وجهه يتبس وما تظل مكسورة اعلى هالحال ترد من ضيم الله تتلكه المصايب ابيتها
- عاونيني و شوفي شيجرى .
- جا خوش ، بس الدشداشة شلون اعرف هو شنهو ولابسه اروحن ارغب ابوي ، حتى عيب بحكي .
- من يدش يسبح و يحطها ويالهدوم الوصخة ، ونجري عليها .. خوش .
- خوش بس كون موش سحر
- جا كلتلج موش سحر كلساع نعيدها .
جاي نحجي و ايمان فاتت جدامنا بس مغيرة ثوبها ، حجت يسرى : شني وين تردين ؟
- شعليج ؟
حجتها ومشت للحمام ، و ابوي نايم بحجرته ، بيما كبل الغروب يشواي طلع من حجرته .. وراح تغوسل و غير ملابسه و طلع للمضيف .
دشداشته ظلت معلكه بالبسمار بالحمام ، و يسرى تاشر علي خاطر اجيبنها .. كش كلبي .. ردت اهدنها .. يس كلت لا هلبت امي يصيرلها حل .
خذيت دشداشة ابوي و اطيتها ليسرى ووكفت كلت الها : شراح تسوين ؟
- مالج غرض .. خليها يمي و يجرالج الصافي.
- جا خوش .
مشيت عد لويله و هي تلوب و تكلي : كلش مالومه و مالي خلك اكومن .
كلت الها : اخذنج للجدة
- لاله لا .. خليني بس انامن اهدى و ما يظل بيه شي .
عفتها و صكيت الباب عليها .
كضيت الوكت معلعله شما احاول الهي روحي خاطر ما اتضكر باجر عرس سرحان ... بس كل ما اضكرنه اغتاض و تحتام روحي و اهيس الحسرة تطلع مني نار ، اعلى هضيمتي .
كضيت الليل بالياويل هلبت تغفى عيني ..
بس شما اقارن بين هاي الليلة و بين الليلة العرس بيها .. يطلع هالعرس لا شي من كون ذاك اليوم حرورته من كلبي ما اتروح و من اتضكره اهيس معدتي تحتر من القهر والوب .
وظاله اواسي روحي بهالحال
بس اوله و تالي راح يلفي بحضن وحدة و انا غريبة حال عكبه.
والله اجا هاذ اليوم و جان جمعة ومامش شغل .. حتى امي ما طالعة وكلنا تريكنا .. ندستها خاطر تكله اعلى عرس سرحان ، بس هي كرصتني .
ليما راح تكلي : استجني و حطي بجيوبج اطويبيجات عليش هالطفكة هاي ،وين موليه ورايحة زلمة معرس رايحة تغيضين روحج يو تغيضينه .
- جا موش هي العزمتنه
-لا والله يمه اريد اروحن
- مامش روحه اكعدي .
للظهر و انا الوبن .. بس اريدنها تكوم وياي نروح ..
وما رضت ليما لبست عباتي و تكحلت وكتلها : والعباس تروحين خير اعلى خير ، ما تروحين اهدنج وامج .
- جا ما اعرفنج .. بربوك وما تخافين احد تغافلين وتمشين
- جا امشي .
لبست و راحت وياي و الدرب كله تغم بيه و ترزلني و تكلي :ما شايفة وحيد جايب الغثة الروحه مثلج .
ما رديت عليها .. ليما وصلنا للبيت مالهم
دشيت ليه .. سرحان مامش و لمة اعلى كدهم .. بس اهل البيت و خواتها و عماتها و هيج .
وامي ما كصرت كامت ادكلهن و هن يهزن و انا جويعدة و هي تنوعلي .. ليما صار المغرب .. دش سرحان و ازلام وياه وشيخ للديوان .. وابوها توكل عنها وملج اعليها .
اهيس الدنيا اسودت بوجهي .. يمكني يو سامعة جلمة امي وما جاية اخيرلي .. حيل اغتاضيت .. شجابني و شصابني مدري .
هلهلن النسوان و امي وياهن اعلى نفس الرنة تدكلهن ..
فخرية متزوكه و كاعدة و تتبسم الهن .. و ترد تعاينلي .
تحسرت و ذبيت تنهيدة ضيم اعلى بلوايهاي اليوم تروف بحضنه و تشم عطره و تنام حذاه .. مدري شمالها احلامي مبيوكه وموش الي .
جاي اعاين الها .. وولد عمه صاحو
سووو درب
تباعدنا و دش هو مدنج ما عاينالي .. كعد حذاها .. بس كل فرحة مامش اعلى ارسومه تعابيرة اعتيادية .. ولهساه ما شافني ولا طاحت عينه علي .
تكربيت منه وهو كاعد و كلت اله : شايف الف خير ابو مأمون ..
من شافني تبسم .. و كال : هدوة هنا
- جيت اباركلك .. ان شاءالله شايفين الخير .
- تبسم و كال : الخير راح ويا اهله بويه .. حياج الله
و عدل كعدته ... يتبع
لقراءة الفصل التالي : اضغط هنا