رواية كحل عرب الفصل الحادي والستون 61 بقلم زينب ماجد
رواية كحل عرب البارت الواحد والستون
 |
| رواية كحل عرب الفصل الحادي والستون 61 بقلم زينب ماجد |
رواية كحل عرب الجزء الحادي والستين
الحلقة_61
( موقف ايمان )
على چف المناية مچرغدين انام
ونلهث على الدنيا ونبني بيها ابيوت ..
ونتعافه ونذم بالخلگ هذا وذاك
وعلى غفلة وزرگ جدامنا التابوت
(عريان السيد خلف)
هدية : طاحت امي و كمنا نتصارخ كلنا و الفشك اعلى بيتنا ما نهيس الجيلات وين اطيح بالبيت .
كمت اصيحن : ولج يمه ، يالحبيبة يمه عاينلي ، ولكم امي راحت من اديييييييييييييييه ، ولك بووووووووووووية .
اعلى حس الفشك فزعت الديرة و طلع اهل عرب ال جلوب بخويطهم .. نسوان و زلم .. و اعترضولهم ويتصايحون وياهم .
ذولاك يصيحون ابنه مات
و الناس تصيح البيت بس تساوين و جهال .. تهدون اعلى نسوان ، شنهي جا شواربكم ما تهتز و تكولون فزعنا نساوين .
انا هيسيت وكف الرمي و الصياح برا عالي ، طلعت ليبرا و صحت : دخيلكم الحكونا امي طاااااااااحت.
هم شعدالهم امي لايحتها جيلة و ما اهيس الا الزلم تغتاض و تفزع .. دفعوا الباب و هم يصيحون : سون درب سون درررررب .
النسوان دخلت وياهم و انا ركضت لامي و كاضاتها خياتي .. صرخن النسوان : ام الحبايب يمه ، دهر الدهركم ، ام ستاااااااار ديه.
انخبص البيت خبيصه ..
تكابلن عليها النسوان و شالنها ، انا ما دريت عن بتي وينها .. كضيت عباتي وركضت وراهم اشيلن بأمي ، ويا ما شايلينها صفت سيارة عم سرحان .. نزل ينشهد : عليش هاااااذ الفشك .
بساع كضوا سيارته و كالوله : الحك المرة طاحت .
ثغب هو و صاح : اح بووووويه ، ام ستار .
فتحنا باب للسيارة ، صعدت انا ومرة جيرانه و زلمة جبير صعد وياها ، و ظلت الزلام تتطالب ويا الهدادة .
ساك السيارة و هو يكلي : شلون تصوبت ، ووين تصاوبت .. تاذت
حسيت عويناتي اليبجني بشيلتي وكلتله : لاله يعمي ما تصاوبت لجن برد حيلها ساعة الهدوا علينا و احنا بس بنيات بركبتها ، بادت و طاحت اعلينا .
- ايييييي دكولي من الاول يا عمي كلوبنا التوت عدالنا تصاوبت ، اخوج ستار وينه
- بالعسكرية عمي ما ينزل من وين ليوين حرب و الدنيا متلاطمة غاد .
قاسم: منين اجتكم ما تكلولي ، ما يستاهل حاكم ، شلون زلمة معدل ، ينزع هدومه و يطيها يو احد اعتاز .. وين جانتله هاي .
- جا موش نكول الله يچفينا شر التايهات ، هاي التايهات يبوي ، لا اعلى البال ولا على الخاطر اطيح الطركاعة اعلى راسك و تبتلي بلوة ، بس كون البشر يتعض ويتقي الله ، ظالين واحد يهدد بالاخر وواحد ياكل بالاخر .. هالالله وهدن حالنا و ابتلانا بالحرب الخذت نص وليداتنا .
وصلنا للمستشفى .. نزلناها و علكولها مغذي .. يالة فكت و فتحت عويناتها ، حبيتها براسها : ها يالحبيبة يمه ، خذتي كلوبنا وعلي انا مدري ابجي اعليج مدري اعلى ابوي مدري اعلى حالنا و هجولتنا .
- خياتج وين
- بالبيت
- ياهو وياهن
- مامش احد
كعدت من حيلها: وين
- النوم موش ليه يمه .. كوميلنا .. بس الله و اهل البيت اليوكفولنا بهالمصيبة هاي يهديوة يمه ، خوفي اعلى ابيج لا يروح بيها .
- جا خلصي المغذي مالج و نكوم .
جاي احجي دشت المرة و الرجال جيرانا يسلمون على امي ، كامت تتشكر منهم و تحمد بيهم ..خلصت مغذيها و كمنا ، صار بوجهنا سرحان : هااا سلامات ، راحت كلوبنا وعلي .. كالو تصوبيتي .
كواغد : لا الله يسلمك يمه ، ما بياش شي .. جا يو طايحة بيه اهون هلبت تشيل عن راعي بيتي.
- لا اسم الله لا تكولين هيج ، ان شالله يطلع وتنحل .
مشينا و سرحان جدامي نشدته امي: جا يو طلع شلون تنحل ؟
- والله يا ام ستار السالفة موش هينة من كون الولد مجتول .. انا يو ردت ادخل ..ال ثجيل اعرفهم ما يرضون بدخلتي .. بس انا اكولن يو يظل ينحكم .. اهون اعليه من الطلعة و العرف العشايري.
- عليش ؟
- يو تنازلو اهل المجتول و طلع .. ما جدامه غير يطي فصل .. و بيتكم و كاعكم .. ما يجي نص الفصل ، كول تحقن الدم و تطي فصلية .. تطين ياهي فصلية؟
- اسم الله يمه .. دخيلك يا علي .
-الولد حسب ما سمعنا من حاكم من رحناله .. متعدي اعلى كاعة و عادم زرعاته و غالط اعليه و حاكم منهد بيه .. وطاكة بس موتت الولد من الصخرة المفشوخ راسه بيها موش من الطك و حاكم كال طاح اعليها .. يعني هلبت يتخفف الحكم .
- جا انا كضيت ٦ سنين من عمري شايله حمله و هو بالسجن يرد ينسجن .. ولكم طركاعة يربي طركااااعة وطاحت اعلى روسنا منين ما نعاين ليها .. جبيرة .
- الله كريم ، الله اكبر من الكل ، صعدوا خل اوصلنكم خاطر نشوف شنهي الراي .
.....
جمارة: شلت بت هديوة اعلى كلبي و افرن بيها و ما تسكت ، تعارضت من حس الجيلات الطكت بيتنا . ما جاي تسكت .
خذيتها و نزليت للبستان حاطتها اعلى جتفي و اهود اعليها و الاشيها خاطر تسكت .. صفت سيارة سرحان .. ظليت اعاين له من ابعيد .. نشد عن امي واخذ سيارته و مشى .
ظليت اراوح بمجاني و الوليلها و انومنها ...
ما هيسيت الا صوت يجي من وراي
خنجر: جلجووووول
درت ليه .. كرب من عدي : شنهي شجرالكم .. كون صابكم شي .
- مامش شي .
- وامج ؟
- خذوها للمستشفى
- وعليش تحجين وياي معلك ، شمالج
- ما بياش شي عمي ، بيتنا توه فكه الفشك و كلوبنا راحت شني تريدني اضحك يو شنهي .
- الله يساعدكم بويه وعلي مصيبة هو ابوج صكد ردي و ما بيه خير لجن ما يستاهل.
سكتت ما رديت عنه ، و انا ادكن اعلى ظهر نويسه خاطر تنام .. عاينلي : شنهي سالفتج ويا حيدرة ؟
- كله من حدر راسك
- انا اخوك .. انا شنهي .. كايلج تروحين وياه يو تواعدينه ما تخافين اعلى روحج ساعة الخطيتي للجول ، غاد شلة سلابة و حرامية و بالليل سكارة ما يعاينون احد جا يو ملتمين عليج و هم سكارى ياهو اليخلصج منهم .. ما فكريتي بهاي
- لا .. بس انا طكيته وركضت
- شطكيتي جا غير صاحي والله هداه و هد ايدج يو سكران و ما يعاين دربه .. غير يفين بختج و اطيحين بيها يا بويه ... حيدرة لا تكربين منه واحد شلايتي خوووش .
- انت تكول عنه شلايتي و هو يكول عنك ابو النسوان والعرك
- اي جا ياهو اطالبتي بطلابة يو دورت نسوان و عرك .. ما مأذي احد .. وما مكرب منج .. انت تسمعين يو طرشة حسدرة لا تكربين صوبه يو شما يكلي ، و بعدين تعاي جاي انت من الاساس شعدج اجيتي ليغاد ؟
سكتت ما رديت عليه : موش احاجيج ؟
- عمي بسك كافييي
وبجت
- اها عليش تبجين
- امي حركتني وبطلتني من المدرسة.
- عليش ؟
- لين رحت للجول بنص الليل .
- حيييييل وعلي تستاهلين.
- اي خوش ياله روح
- ولج بويه انا ما رايد اذيتج .. جوزي من الهوبزة والفرارة ، كبرتي و صرتي مرة اركدي و صيري حبابة .
ما رديت عليه، رد حجه : حسي ادموعج و انا اخلي سرحان يحجي ويا امج و تردين للمدرسة بشرط تبطلين سوادين و تركزين بدراستج خوش ؟
هزيت راسي ، ظل يعاين علي .. ضحك و هز ايده و هو يكول : طركاعة و علي .
حجاها و مشى عني و انا اعاين ليه .. لابس بنطرون اسود و قميص ابيض و العركجينه اعلى راسه و الغترة اعلى اعلى اجتافه ونافخ اجتافه من يمشي بمشية شقاوجية .
انداريت لبت هديوة نامت .. رديت بيها للبيت و نوميتها بحجرة امي و غطيتها و كعدت يمها .
.....
هدية : صعدنا بالسيارة ويا سرحان ومشا بينا ... وصلانا للبيت، لكينا خالي جبار و محيسن واكفين عد الباب ساعة النزلت تلكواها
- ها خوية سلامات ، جا صلاح وعليوي راحو وراج ليغاد عدالهم بالمستشفى
- يطيكم العافية خوية ، ما يصيبني شي .. من كوني فكرت زلمتي بصياحي و عصبيتي .
- لا تكولين هيج ياخوية
دخلنا و هم ظلوا يسلمون على سرحان، دشينا و امي تعاين .. البيت من جدام متزرف زرف .. وصفحة من الحايط طايحة .
تلكنا البنيات يحبحبن بأمي و يفرشلها .. ولاله تشرح الها وين الجيلات طايحة وبيا مجان .
- هم ردوا مرت الاخرى ؟
- لا عمه ما ردوا لجن ادينا اعلى كلوبنا من الخوف ، من عبن الهبطة الاجلناها .. موش هينة اعلى اكلوبنا .
انداريت لجمارة : كون بجت نويسة اعلية
- نطت من البجى عليج . كوة سكتيتها .
- مت عيني عليها .
- اكلج يعني ابوي بعد ما يرد
- لا اسم الله كولي يالله ، ان شاءالله خير.
توني جاي اكوم دشن نسوان خوالي و بناتهم . و خوالي عد الباب واكفين ، طبوا ويا طبتهن و صار البيت هوسة .. انا من امس ما نايمة رحت تمددت يم بنيتي و نمتلي جم ساعة .. كعدت الغروب.
كتلها : ها يمه شني ما شني
- يمه ربج ظلت
- ال ثجيل نا راحولهم
- اسمع راحولهم بس غير سلطان نعرف منه حك و باطل .. امس اجا يهوبز فوك روسنا و احنا ما محصلين منكم غير الطلايب و ساعة السودة اللفيتو اعلينا ، و ذاك الحجي اليعطب الفاد .. مت عين الدنيا الذبتني اعلى سلطان و خلاني اعتازه ... امداها شلون دنيا .
- جا و هسه شلون ؟
- انا ادري ييمه شلون تنحل هالمكابلة هالسجادة هاي و ادعي الله و اتنخى اهل البيت هلبت يطلع منها ابوج سالم
- نذرت من امس سفرة لام البتين يو تعدينا هالطركاعة هاي .
- وانا نذرت ذبيحة لبو الجوادين .
جمارة : وانا نذرت اذبح اميدي و اخلص منه يو طلع ابوي سالم .
كواغد : ولج عليش ما تسكتين و تصمين حلكج. . و علي غيضي لهامتي واصل منج و يو كضيتج اكطعنج وصل .
- يمه يواشج ما كالت شي البت تتغشمر .
- تشوفين الوكت مال غشمرة .
- ولونه تراها جاهله لا تشوفينها خذت طول و صارت جنها زرافة .. اخذي عكل و هي عكلها بحلها.
- لا موش بحلها .. من كون عكلها بنماريتها بصلافتها ، جا يو ما طلعتها اعصب انا و يهج ابيج من البيت ويبتلي بهالولد هاذ المكرود .
- يومه ييمه عاد لا تحطينها سبب ما يصير
- ظلي حاميلها ظلي .. من كونها مثلج .. يالبربابيك .. ما ترتاحن لا ما موتني .
ندست جمارة تكوم .. صارت عصبية و كامت تخبط اثنين اثنين ، ظليت يمها لثاني يوم الصبح .. اندكت الباب طلعت امي : يااااهو
- انا انا
- ياهو انت
- انا المعلم مالت جمارة
فتحتله الباب : يا هلا بالمعلم ، هلا يمه شلونك شلون علومك
- بخير و صحة جيت انشد عن جميرة صارلها جم يوم ما مداومة
- والله يا يمه تلايمت الدنيا اعلينا و ما كدرت بعد تروح للمدرسة .
- لا حجية ام ستار انا جنت اكللج الاحبنه بيج حرصج اعلى بتج خاطر تكمل ، احنا بالسلف هنا ذيج من ذيج التدرس ويخلونها اهلها ادش مدرسة .. وجمارة شاطرة و حرامات هاي امتحانات و البكلوريا كربت .
- جا يمه شسوي ، بعد ابوها انسجن و ابتلينا ييمه
-لاه مو خوش خبر والله
- جا هذا حظنا بعد
- والله يا ام ستار انتم طيبين و جميرة شاطرة و من اشطر طلابي هالتعنيت خاطر اتوسط لرجعتها لو جانت مبطلة .
- والله ييمه انا فكرت ابطلنها .
- لا ام ستار .. البت شاطرة و حرامات تروح عليها البكلوريا .
- ان شاءالله ييمه
سلمت عليه و ردت : ها ؟
- المعلم مالت جمارة ينشد عليش ما تداوم ويريدها اداوم .
- و هو الصادك ييمه عليش تبطلينها
- التخطي جدمها و تعدي باب البيت بنصاص الليلالي ما امن اخليها بمدرسة يهديوة .. هاي و احنا نايمين داحت ، جا بالمدرسة شلون
- لا تحجين هيج يمه، البت بعدها جاهل و تتعلم ما يصير تكسرينها بسة غلطة
- والله ييمه ما بعد بيه احمل ، انا شطايح بيدي ، اعلى ساعة و صخمت وجهي .. جا ما يكولون انت الخليتيها تدرس .
- لا يمه بهداي عليها .. نتعاون انا وياج عليها ووراها وراها ما نخليها تزيح.
- خل تشوف شنهي مصيبة ابوج و الله كريم
.جاي نحجي ودش ستار جاي من الدوام ... تسودن ساعة السمع ابوي هاذ حاله .. بملابسه العسكرية فزع لال ثجيل يعرف الحاصل .
ليما مشى غادي .. كايله سلطان كعدنا ويا اهل الولد و اتفكنا وياهم يتانزلون ونحول عدهم ناخذ عطوة و يطلع ابوك و نجعد و نشوف الامور وين تصل .
ظلينا وحدتنا مكابلة الاخرى و مامش نذر و دعى ما دعينا ونذرنا بس نخلص من هالطركاعة .
ثلث تيام .. و طلع ابوي من السجن .. تنازلو اهل المجتول بالمركز و حولوها طلابة عشايرية .
جابه ستار و خالي صلاح و جبار و اجو لينا .
و امي واكفة بالباب تنطر و انا كاضة جيس الواهلية .. و اجميرة كاضة بتي وواكفة بكتر امي ، و ايمان مكعدة هنيدة اعلى خصرها و اميدي احذاها.
جابوه لينا و تولته امي هوسات وتهوس بعبايتها وهلهلنا و طشيت واهليه فوك راس ابوي و نهوس ... دش لينا و احنا نحضن بيه و هو عيونه مدمعة .
دش وكعدنا و الناس اجبلت ما شفنا من كثر الخطار رايحين رادين .. لينا لليل فضت الناس وكعدنا بس احنا و خوالي نسولف وياه .. شصار و شجرى وياه بالسجن و هو يسولف .
ثاني يوم الكل نايم كعدت جميرة و كلت الها: البسي اهدومج و اطلعي للمدرسة بساع .
توها جاي تلبس .. كعدت امي شافتها تبدل وانا واكفتلها .. ما حجت تعدتنا و فاتت .. كلت الحمد لله و الشكر ربي .. لبست ربطتها بساع و جلي تطلع .. صاحت امي
- هديوة وصي النمرة الواكفة احذاج ، يو زاحت و تسرسحت بالمدرسة و ظلت تفر بالسلف بكيفها و علي ابطلنها ومن غين باجر اطيها لاول واحد يدك بابها و يخطبها و اكسر ظهرها بحمل ما ينشال عنها طول عمرها .. خوش .
- لاله لا يمه جا هي خوش بنية و ان غلطت تعلمت و بعد ما تعيدها .
ندستها : موش هيج
جمارة : لا ما اعيدنها بعد .
- خوش يلا امشي
فتحت الها الباب و طلعت.
وانا رديت احضر للريوك .. فضينا شغلنا و الالزلام كامت تجبل اعلينا ، انوب احنا ما عدنا دوانية .. هول و غرفنا داير ما دايرة و احنا بنات ، ابوي ما رضاها كام و حول الكعدة عد ال ثجيل و ضل غاد .. خاطر اليجي ينشدنه عنه نكله عد بيت سلطان .
بس النسوان تجي عدنا .
خذوا عطوة و دانشوا امرهم .. ونعله سلطان يكول : نطيهم مرة فصليه و نفضها مالنا خلك نظل نجرجرها .
حاكم: فصلية شنهي بوية ، نطي بنت فصلية .
- جا انت موش عدك بت زغيرة ، اطها فصلية و اطلع من السالفة و هل نهدي الدم .
- انت تحجي صكد يو تشاقه .. انا اطي بتي فصلية ؟
حاكم : جا اول وحدة اخر وحدة تروح فصلية غير بتك و تشيل عنك .. احسن ما ينهدم بيتك اعليك .. و ينهدر دمك .
- ينهدر دمي ولا اطي وحدة من بناتي فصلية ، انا على الله خلصت من افليح و كلت ارتاحت اهديوة من النهوة اروح اوهدن الاخرى بفصل ، الا اتسودنت و علي .
- جا شناطر يحويكم ، بس لا عدالك .. نطي فلوس و نشيل الفصل عنك ، خلها ابالك عمامك كل واحد همه اعلى راسه و يادوبهم محصلين لكمة عوايلهم لا تظن احد منهم يشيل و يعاون بفصل .. تطي بتك خير اعلى خير ما تطي بتك .. دبر فلوس الفلص والا ترا مامش غير رويحتك ثمن روح الولد .
حاكم : ان جان الحجي هيج انا اظلن اعلى القانون اخيرلي ، اقلها انا مسلم روحي و معترف بغلطي و الولد دايس كاعي و اتامل تخفيف بالحكم سنة عشرة اطلع و تنتهي ، ولا اذبن بناتي بهالهبية هاي .
- انت كل عكلك ترد للقانون الناس تنازلوا بحكهم .. شنهي لعب جهال .. اطلع ... ها لا رد .. خوما لعب جهال .. ما جدامك غير هالاثنيوين يا تطي بت و تحقن الدم يا تدفع فلوس الفصل .
طلع حاكم منهم و عيونه بكصته من العصبية ، رد للبيت موجر نار .. تلكته كواغد : هااا
- ميلي عني .
- شنهي غير تكلي شكالولك
- شكالولي يو اطي بتي فصلية يا ادفع فصل .. و الفصل انا يو ابيع كاعي و بيتي و العدي و الما عدي ما اوفي حكه .. كليلي جا هسه شلون .
- سرحان حجاها لجن ال ثجيل ما رضو يدخل ، كال خل لا يطلع من السجن .. حكمه يتخفف بس طلعته ما تفض .. يو فصل يو فصلية .
- الحجي هاذ ما يفيد .. تنازلو بحكي و طلعت يو اطيهم فصل يو نروح بيها انا يو ستار ابني .. فهميني شلون بهالمصيبة هاي .
كواغد : دخيلك يا علي ... جا شلون .. منين نجيب و نوفي .. وين جانت النا هاي ربي ..
هدية نعاين لامي و ابوي .. روحهم محتامة .
وحايرين شلون يفضونها .. حجت امي : يعني اذا تروح فصلية شني ...
قاطعها ابوي : لا تحجينها ولا تجيبينها على السانج ، بناتي ما اطيهن و اخليهن يشيلن اثمي هاطر انا اعيشن و هنه ينضامن ... كل بت ما عدي لفصل .
جاي يحجون .. و اندكت الباب و نعله سرحان و خنجر كال ابوي : دشوا داخل .
طلع ليهم و استقبلهم بالهول و احنا محبوسات بالحجرة و اذانه اعلى الباب ، دش سرحان و هو يكول : اي شنهي شفضت
- والله يابو مأمون طركاعة و ما اظنن تفض اعلى خير .
- يو فصل يو فصلية مو
- و الاثنين ما عدي شلون بيه .
خنجر : بيتك و الكاع ما يجيبن حك الفصل ؟
حاكم : ما يجيب نصه
سرحان : انت دبر نصه و احنا وياك و النص الاخر اعلى العشيرة تشيله
- سلطان تبرى
- اعلى اي اساس يتبرى
- هاذ جلب .. يكلي اطي بتك ، نروح ندفع وواحدهم ما عده فلس بجيبه .. ادفع انت و شيل فصلك.
- جا عليمن منصب روحه شيخ .. اذا ما يشيل عن وادمه .
- هي ما منها ، ابيعن الكاع و ابيعن البيت و العدي و الما عدي .. واكلهم هاذ العدي ترضونه ترضونه ما ترضونه .. ما عدي غير روحي اطيها.
..
هدية : نتصنت و امي كامت تبجي و دموعها يهلن و تتنخى بالامام الكاظم ..
حجت ايمان وهي تبجي ويانا : اني ما افتهم بهالسوالف يعني شنو فصل و فصلية و شلون .
ظلت لاله تسولف الها و تشرح الها وكالتلها : يعني اذا ما اطو فلوس الفصل يجتلون عمي حك دم ولدهم .
ايمان : اسم الله اني اموت لو صار بحاكم شي والله
كواغد : خايبة عليش ما تسكتين انا روحي واصلة ليجاي صمن احلوكجن و خلنا نسمع .
ايمان : زين اني ابويه مو حسبلي حصة من الورث مالته ؟ يصير ياخذها و ينطيها .
صفنت علينا امي : و ترضين تطين ورثج لحاكم .
- شلي بالورث وحاكم متاذي ، لو صار بيه شي اضيع اني و جهالي ميبقالنا احد و اتهجول من بعده .. شنو ورث و شنو فلوس اني روحي ما تعز عليه .
ظلت امي تعاين لينا .. و كامت .
خنجر : زين عليش ما تطي بتك و تخلي احد يملج عليها و خلهم هم يبتلشون بالفصلية ، و ينطونها من بناتهم دام هالكثر رخيصة عدهم البت .
سرحان : شلون حجي هاذ ، شمالك تسودنت ، يملج شنهي موش مالت لعب بهالوكت .
- لا والله جا عمامي الما وكفوا وياي شنهي فايدتهم العب عليهم و انعل ابهاتهم .
حاكم : شلون جا البت من اطيها هيج غير اخذ راي عمامها و اشاورنهم و حتى يو ردت اسويها ، جا انا ما رضيتها اعلى بتي تشيل اثمي ارضى لبنات غيري يشيلن الفصل ويطيحن بيا ذنب .
سرحان : خنيجر حلولك هاي تنفع ويا الجول موش ويا العشاير صف اعلى صفحة وتكتر و لا تطينا هالحلول المامش منها .
خنجر : اممم نعال اعلى العشاير .. هي يو ظاله اعلى القانون اخيرلنا من دخلتو بيها يالعكل و العشاير ***** بوسطها.
سرحان : خنننننننجر ، شني تسودنت ، بسك
وظل يخزر بيه
حجه خاكم : مع احتراماتي لابو مامون بس وعلي حجيه صكد انا يو ظال اعلى القانون اخيرلي من هالبلية الطحت بيها.
فكت الباب كواغد و كالت : ها مسى الخير يمه
سرحان :- هلا هلا بام ستار شلونج شلون صحتج
خنجر: هلا بيج يابة
كواغد : نحمده ونشكره دام اخشومنا تشم الهوى ، ابو ستار ام مؤيد توها كالتلي اعلى سالفة و كلت اخبرنك بيها هلبت تنفعك
حاكم : شني هي ؟
- كالت ابوي مطيني ورث ، خل ياخذه ويوفي دينه.
حاكم عاين لسرحان ، حجه سرحان : ما بيها شي من الزينات هي هم مرته و هي ما الها احد عكب عينه.
حاكم : بس هاذ ورث ابوها انا شلون احطن ايدي اعليه و اكل حكها .
حجت هي من الباب وسرحان و خنجر دنجو وصدو عيونهم عن الباب .. : و شسوي بحكي و انت متأذي اني من يوم اللي تزوجنا لا مديت ايدي على ورث ولا احتاجيته لإن انت موجود وممخلينا بحاجة شي بس اذا صار بيك شي اني وجهالك وين نروح و انت تعرف مالي احد غيرك بهالدنيا.
سرحان : اصيلة وبت خير .. والله يابو ستار مرات الزلمة ما عده سند غير مرة تحبه و تصونه و الله منعم عليك بأثنين نسوان .. خيرة النسوان .
احنا نترخص .. امانة الله ورسولة شتعتاز تمر للمضيف وما نكصر بحكك
- الله يحفظك ابو مأمون هلا بيك .
طلع خنجر و سرحان .. و دخل حاكم و كال الها : ايمان انا ما اريدن اكوش اعلى حصتج و هاي حكج ، انت متوكده تطيني هالفلوس .
ايمان : شبيك حاكم قابل الفلوس اعز من مصيبتنا هاية صارنا ايام مدا انام ولا ديهدالنا بال و تكول متأكدة ، اذا بس فلوس اخذهن اني ما اريدهن .
كواغد : والله يايمان ما اعرف شكلج و شحجي وياج ما ادري بس اكولن الله يطيج العافية من عاونتينا و شلتي الحمل ويانا ... سهلها ربك يحاكم ، بيع الكاع و البيت مالنا و مال ستار و اجمعهن و شوف شكثر يطلعن و زود اعليهن من حصة ايمان و ادفع هالشر عنا .
ما جذب خبر ابوي .. هو وستار دكو اعلى البيوت و باعو الكاع و البيت مالتنا .. بس بيت ستار ما انباع .. شكثر دكينا عليه كل اليجي ما يريده .
وبعد كعدات وروح و تعال .. قرروا الفصل و ابوي تكفل الفصل و كال انطي .. بس فصلية ما عدي .
اجا علينا و كال : البيت بعته .. و الكاع بعتها و بيت هدية ويا الكاع .. بس بيت ستار .. نرد نكعد بيه .
ايمان : لو اعرف انام بالشارع ذاك البيت ما ارجعله.
حاكم : لا تخافين ستار صاله سنين عايش بيه بعد ما بيه لا طنطل ولا هم يحزنون .
- غير مرته هي الطنطل بذات روحها بعد على شنو يستغرب ويخاف ، لا حاكم لا والله ما ارجع .
- ايمان كول يا الله و كبري عكلج بويه ، جا هالتشوفين حالي .. عدي و رديتج ليه .. لجن من جلة الخيل شدو اعلى الچلاب سروج .. وانا من كلة حيلي جاي اردن لذاك البيت .
- ليش مو بقى من الورث فلوس .. اشتري بيه و خل نكعد بس لذاك البيت منرجع .
- شظل منه .. هو البيت ذاك انا اشتريته من فلوسج و كلت الج اوفيج وما صحتلي فرصه واوفي ورديت خذيت منه للكهوة الفتحناها لستار و خسرت وما حصلينا .. و هسه الطلابة هاي ، من الفلوس كلها ما ظل غير يجيبلج كاع .. موش بيت .
كواغد : اكلكم الله طلعانا من شدة ما جنه نتصور نطلع منها سالمين و سهلت بالله و اهل البيت و تعديناها وطلعنا منها سالمين ، نضك ارواحنا و تحمل هالفترة هاي ليما يفكها الله سبحانه و تعالى و تفرج علينا جا بعد شبدينا .
ايمان : والله اخاف
حاكم : يسرى و ابيت اهلها تخافين منيش بعد ؟
- البيت كله طناطل مو بس يسرى ، اخاف والله .
- دكولي يا الله و خلنا نرد .
كوة قنعينا ايمان خاطر ترد ويانا لذاك البيت ، لجن جانت بيه فد حجرتين .. بعد ما جنه بيت جبير و انا بيت و امي بيت و ايمان بيت .. اعلى غفلة دار دولاب الدنيا بينا وردانا للصفر .. كعدنا اعلى الحصيرة.
وابوي يصيح : فدوة دامنا احنا ووليداتنا و بنياتنا بخير كلشي يتعوض ، درس منه نتقي الله اعلى ساعة يكلبها بينا و نرد للصفر لا جن جمعنا ولا حطينا .
انا رضيت احطن اغريضاتي بالهول و اجعد وياهم . جا شسوي ، و امي حطتلها برده و عزلت غريضاتها وسوت الها حجره ليها و خلت الحجرتين لأيمان و اللاله.
بس البيت عدم موش مثل ذاك بيتنا حوض ومرتب .. ردينا فكور اعلى هالبيت هاذ .. و مدرسة جلجول صارت اقرب من ذاك البيت .
و الحمد لله اعلى كل حال من كونها ايام عسر نكول الف الحمد و الشكر طلعنا سالمين برويحاتنا .
نظفينا البيت و خوالي ساعدونا هاذ الجابلنا حصيرة و اثنين تعاونوا و جابولنا بنكه، و اللي تعاون و جاب جولة ووكفوا وويانة وكفة ما تنسي .
... انظف و اردن بذاكرتي لذيج الأيام و كلما اوجد العجد الياخذني للشط .. تحن رويحتي و اشتاك لهواي الحرمني زماني من اهواه .
خذيت الجرة اعلى متني و انا امش خاطر انكل ماي ... اربي الدرب ومتبسمة .. اغمض عيوني و اتخايل حس اجدام الحصان مال سرحان و هو يلحكني.
وتترد اعلى ذاكرتي من جان حسه مطبك و هوو يغنيلي : نخل السماووووة يكول طرتني سمرة .
وانا اكلله حسك موش حلو ..
اخ يذيج الايام شحلات ذكرهن .
ترست ماي ورديت و انا اعاين هلبت اصيدنه بعيوني و اشوفه ... وظليت انظف وياهن ليما كملينا البيت كله .
كعدنا بالليل ليما ابوي مشى لحجرته و ستار دش ويا مريته و ظلينا انا و امي و جمارة .. لمتنا و كالت النا : بنياتي يمه .. لا تشوفن ابوجن واكف و يضحك بوجوهجن ويكول فدوة ، يو تعاينن كلبه تلكنه كله ضيم .
هدية : جا شبيدنا عليه ييمه من اعاينله حيلي ينهد بس مامش شي بيدي و اسوي .
- لا يمه هاي الجلمة تنكال للكاعد من عبن الله ما يطي لعبد كاعد .. كوم يا عبدي و اعينك اكعد يا عبدي واهينك .. و يو ما كمنا و شدينا اوزارنا ييمه نشبع ضيم و فكر ...
- جا يمه دلينه و احنا عد عيناج .
- اعلى هواجن يمه .. اطرزن .. تخيطن .. تحوكن ليف مهفات مكانيس و انتن بالبيت يمه .. لا ما حطينا ادينا بدين بعض وشدينا حيلنا نظل هاذ حالنا و يجتلنا الفكر .. و احنا لا واحد ولا اثنين .. مرت اخيح حامل .. و الاخرى عدها اثنين و انت عدج وحدة و انا ماشاءالله شكثر ، شيلحك ابوج يكد و ليا حلك يطي .
جمارة : انا اعرف احوكن مهفة تعلميت من هديوة .
هدية : انا وياها نتعاون يومية ونسوي هاليطلع بدينا و نروح نبيعه و نحصل القاسم الله .
- حوكن و علمن ايمان و لويله وياجن و تعاونن ، لحد الظل هيج .. الكاعد يمه الله ما يطي ، الله يحب اليعمل .
ابوي رغم باع كلشي .. بس ما باع حلال امي من كون يعرف روحها بهالحلال و ما راد يقهرها ابيعتهن ... رغم هي جثير لحت عليه كال الها : لا ذني مالاتج تعبج .. خليهن نعيش عليهن .
وما باعهن و كسر بخاطر امي ..
فامي كامت تحلب الهوش و تسوي الكيمر ودهن الحر و جبن العرب و تروح تبيعهن بالولاية من كون غاد ياخذونهن بسعر ازود من هنا .
وظلت تشتغل اعلى هالحال .
واحنا وياها وياها .
الا ما فد يوم انا جاي امرن من البكال خاطر اتسوك للبيت .. صادفتني بت عم سرحان صالي شهور ما شايفتها و بهالساعة طلعت جدامي .
درت عنها خاطر ما اسلم ، بس هي وكفت و كالت : شني ما شفتيني ؟
- يا هلا .. لاهية و ما شفتج دية شلونج
- من كونج لاهيه دية جا الله ما قصر ساعة الاجت امج ورادت تشهرني و تخرب قسمتي ويا سرحان .. هل الله كلبها بيكم .. حوبتي هاي .
- حوبة شنهي شو ما تستحين اعلى روحج هو ياهو الكارب سرحان وياهم الحاطج اباله خاطر يخرب قسمتج ، اذا هو ما رايدج ديه لا تجين تذبين بلواج اعلينا.
- ما رايدني يو انت الما تستحين و تحومين اعليه .
- اكولن اتعارك وياج بهالساعة بس وعلي ما تسوين اعلي حسي و تسمعه الناس واتوهدن بسبتج ... لجن منا وغاد الله كريم .
درت عنها و انا امش واهدنها لجن حركت افادي تغلط وانا لا كاربه سرحان ولا واصلته . جا اذا ما يريدها انا ياهو ماتي .
بس انا ليمتها اظلن اعلى هالحال .. اخافن منها و هي تهادد بيه ووتحرك بفادي ، اشو الا احرك افادها وعلي.
كضيت عباتي و تعنيت للمعمل مالت سرحان .. وصلت ليغادي شفته من ابعيد واكف .. كضتني اجدامي و توهدنت .. هنوب شافني من ابعيد احتاريت اكرب و اكلله اعليها يو اردن و اخليه بحيرته .
ما كصر هو و تعنالي و اجا مهرف : ها يهدوة اشوفنج هنا .
- هاااا
اكلله اعليها يو ما تسوى .. انا مسودنه و علي .. جا شجابني ليجاي .. درت عنه و هو استغرب .
- هدوووة
- هاا
- هي شني الها بوية معتازة شي كولي .
- هاا ، انشدنك .. الي مجان بمعملك يو ردت اشتغل.
عكد حاجبه : معتازة فلوس يهدوة
- لاله لا وعلي ما معتازة لجن تعرف انا عزبة ومالي احد وعدي بت .. ما اريدن انطر هاذ و ذاك هالبت يمد ايده و يطيني خاطر ادللها .. هالرايدة اشتغل .
- اذا متعنية اعلى الشغل ، انت بس امري ويجرالج .
- يعني تكدر ؟
- هدوة تطلب و تكليلي تكدر يو ما تكدر ، يو اعرف احفر الكاع و ادبرلها شغل .
- تبسميت ..جا خوش انطر جوابك
- ووين اشوفج خاطر اطيج الجواب .
- اعلى الشط .
- مبخوت و علي ومامش مثل بختي .
تبسمت ودرت عنه .. وانا روحي طايرة بجنحانها .. بس خوش وعلي انا لا على بالي ولا اعلى خاطري اطلب شغل ، بس يو لكالي شغل واشتغل هلبت اعينن امي واشيلن عنها .
رديت للبيت خاطر تطي المسواك .. والكا ايمان كاضة بجهالها و تبجي و تنوح : ها شمالج
- اني مو كلت الكم اخاف ارجع
- شنهو الجرى ؟
- شفت شي غريب بالحمام
- شنو هو
لاله : خايبة صالي ساعة اريدن اكضنها ما اكدر كاضة بجهالها وتبجي
- عليش اشفتي بس كليلي .
- شفت شعر يطير بدون راس.
- هاااه ؟!!.... يتبع
لقراءة الفصل التالي : اضغط هنا