القائمة الرئيسية

الصفحات

رواية كحل عرب الفصل الستون 60 بقلم زينب ماجد

 رواية كحل عرب الفصل الستون 60 بقلم زينب ماجد

رواية كحل عرب الجزء الستين 

رواية كحل عرب الفصل الستون 60 بقلم زينب ماجد


رواية كحل عرب البارت الستون 

((( بقلم زينب ماجد )))

الحلقة_60
( طلابة حاكم )

يامناحة ذلتي وليل الگضيته دموع وحدي
( عريان السيد خلف )

حيدرة : متفقين

جمارة : خوش

- جا خل اوصلنج للمدرسة

- اكلك انت شو ما تستحي على روحك ، جا يو شافك احد شيكول .

- خوش انا راح اهدج و نتشاوف بعدين خاطر اكللج على خنجر .

- دروح يله .

هداني ومشى و انا رحت لمدرستي .. بس ظليت احسب .. خنجر يحب نسوان هواي ! هو جان يحب راديون يس هي عرست و بعد ما تريده شني يعني كام يحب وحدة غيرها ؟

رحت للمدرسة و التهيت بدروسي بعد .
بس من طلعت من الدوام .. انا تضكريته و رديت افكر بيه .. من كون حجي حويدر صحيح .. انا شني اظلن احبنه ؟ .. اي جا شني الزلمة يعرس جثير بس انا اكدر اخلي يحبني بس انا .

رديت للبيت فتحت كتبي و ادرس
وامي ما تهون بيه اشتغل وياهم بالكاع من كون عدي دروس و هي تريدني اصيرن مثغفه و الناس تحسدها علي .

بس انا ما اريدن ادرس كثر ما اريدن خنجر ..
جا هديوة موش عرست وما درست .. جا عليش امي تريدني بس ادرس ؟ .. بس حتى لو .. خنجر ما يريد الله دكتورة ، والله هاذ خنجر مسودن .. ابو دكتور اخو دكتور خاطر يريد يعرس من دكتورة .

ثاني يوم مرني حويدر و ظل يمشي من الصبح بوراي .. انا نشدته عن خنيجر .. كال هو امس جان ويا مرة .

كتله : ومنهو يكول

- جا انا شلون اثبتلج و انت بالليل ما اطلعين

- جا شني تريدني اطلع ؟

- لا انا موش اريدنج اطلعين بس غير انت تريدين تعرفين الحك .. جا هو بالنهار لاهي ويا سرحان و بالليل ويا الكح***

- لا تفشر هييي

- جا بعد ما اعيدنها ، بس كليلي شلون ؟

- جا انا ما اكدر اطلع بالليل

- خنجر ما يحبج

- هو يكلي صيري دكتورة ونعرس

- جذاب وعلي يجذب عليج

-انت موش رفيجه عليش تكول عنه هجي ؟

- جا انا احبنج

- وانا ما احبنك

- جا انا رايد اثبتلج خنجر ما يحبج .. و انت ما مصكده .

- اكلك ميل عني .

- اسمعي الليلة اذا خنجر كعد ويا النساوين انا اجي عليج بالليل تشوفينه خوش .

- انا ما اكدر اطلع بالليل

- ابوج موش ما موجود

- جا شني ابوي ما موجود اطلع .. غير امي تكصبني

- بعد بكيفج انا راح اجي خاطر اثبتلج انا موش جذاب ، الاجيتي براحتج الما اجيتي لا تكليلي بعد جذاب .

حجاها و مشى عني
انا رديت للبيت حتى دراسه ما هلي ادرس
ظليت افكر .. لليل و انا نويمة بفريشي بس عويناتي ما ياخذن نوم .. هيسيت احد عد الباب مالنا .. و اسمع حس حيدرة يصفر بنص الليل .

عاينت منا امي نايمة و غاطة بسابع نومة .
وهديوة ابيتها ، و لاله بحجرتها و مامش احد موجود
كمت بهداي و تمشيت اعلى اطراف اجدامي و طلعت ... فچيت الباب و نعله حيدر جدامي

- تروحين

- لا امش اخافن

- جا انا اكول عنج كوية و ما تخافين طلعتي خوافة .

- انا موش اخافن بس امي ما ترضى

- شمدريها ؟ موش هي نايمة .؟

- متوكد هو خنجر هيج

- جا امشي و شوفي بعينج .

عاينت ليه .. و دشيت جريت الربطة ماتي و طلعت اعلى كيف ، صكيت الباب و كلت اله .. امش و انا وراك

- خوش

هو يمشي و انا اضم بوجيهي و امشي .. ليما وصلنا مجان بيه حس غنا و ناس تطبل و تركص ، وكف هو وكالي : تعاي شوفي

كربت وتوعت و لني اشوفن نساوين يركصن و خنجر كاعد و يشرب و يطك اصبع.

درت عنه و كلتله انا اريد اردن لهلي
- اي بس شوفي

- ما اريد اشوفن بعد

- اي خوش بس تعاي .

- هدني اريد اروووحن

- اي اخليج تروحين بس شوية

- ميل عني

- تعااااي

كمت اخرمش بيه خاطر يهد ايدي و صحت : ميل عنييييييييييي

سكت حس الغنا هو بساع هد ايدي انا طكيتها ركضة .

طلع خنجر اعلى الصوت .. اول مشى شاف بت زغيرة تركض لجن ظلمة وما فرزن البت ياهي .

اندار لحيدرة : ياهي هاي البت و شنهي هاذ الصوت

حيدرة : مامش شي .. هيج وحدة

- شني الوحدة هاي

- مواعدها و شردت .

- ومني هاي

- تراك طوختها جاي اكلك بت ... اييييه

هده و مشى ، و جمارة تركض بكل حيلها للبيت و تتراجف .. وصلت للبيت ، فكت بهداي و تتلفت .. صكته اعلى كيفها وكلبها يخفك ووجها اصفر من الخوف .

توها جاي تمشي ولن يجيها الصوت : وين جنتي يجلجول ؟

فزت من كل كلبها : ها يمه

- غمة التغمج و سليمة التطمج ..
كربت عليها و جرتها من اذنها : وين طالعة بنصاص الليالي ولج .

- يمه بس طلعت للكاع

- وشعدج بالكاع بهالليييييل

- يمه بس افهمنج

- اششششش حسج ما اهيسنه ، دشي جدامي و يو سمعتج حس منج الا احشن زردومج .

كفختني اعلى راسي و ركضت للحجرة دشيت و هي ما ادري شجاي تعمل برا وتبحوش و انا اطكطك بصابيعي و الخوف جاتلني .

دشت علي و هي توجر بالعطابة ...
شفتها و انا صحت : لا دخيلج يمه عليج العباااااس ، لا يمه لا ، احبن ايدج يمه .

- هشششش لا ما تحجين الصكد هالعطابة هاي انومها بكلبج و اردن ازين راسج و اخليج تتحسرين اعلى شعر البنات .. احجي وين جنتي

- ما جنت عد احد والله يمه .

- ما تحجين مووووو
وكربت العطابة من رجلي و جوتها وانا صرخت حطت ايدها اعلى حلكي : بربوك رايدة تشهريني جدام مرت اخوج خاطر تروح عد اهلها تحجي و اصيرن علج بحلك خلود و اربيعاتها بسبة دياحتج ، تحجين يو اجويج مرت الاخرى .

- احجي ما اجذب وعلي بس لا تجويني يمه ، احبن ايدج .

- احجي ياله

- رحت للجول

نشغت و لطمت اعلى خدها : شعدج ولج بالجول ، ينمررررة احجي شعدج رحتي غاد

- يمه يجيبون مطربات من هاي اليطلعن بالتفزيون مالت ايمان و انا رحت اعاين .

- رحتي تعاينيهن مووووو
و جابت العطابة و كالت : ايدج الفكت الباب و ما خلتج تفكرين بهلج وينهاااااا

وطبعت العطابة اعلى ايدي و انا كمت اصرخ و ابجي ، طكتني وطيحتني للفراس و ذبت البطانية فوكي و سركت الباب خاطر لا يطلع حسي.

وردت علي و كضتني .. ايد اعلى حلكي و ايد حاطتها اعلى خوانيكي و تخزر بيه و تكلي : اطلعين بعد ولج ؟

- وانا ابجي و اهيس روحي راح تنجر بديها

وهي تخنك بيه و تكلي : ولج نمرة انا خلصت من اختج ذيج و كلت علي يابو علي كبرت و ركدت و بطلت سوالفها ذيج اطلعيلي انت يالبربووووك .
اليوم اكضيج بالعباس .

وظلت تجتل وتخوف بيه ليما صارت الصلاة ..
هدتني ومشت و انا ظليت ابجي بخنيك.

ليما طلع الصبح غفيت من التعب ..
هيسيتها تغطيني .. فزيت خوف منها.
حجت : نامي ينمرة .. تفزين خايفة ، لونج خايفة ما خطت جدمج الباب بنصاص الليالي ، نامي نامت عليج اسليمة كون .

- عدي امتحان

- مامش مدرسة بعد ، انطمري

- المعلم يطردني يو غبت

- انطمري لا اجي ادبح بمصرانج يله .

مشت عني و انا ظليت ابجي .. طلعت ولاله تنشدها : جا عمة جلجول ما تمش للمدرسة ؟

- لاله يعمه ما تمش .. امس انجوت بالچولة و الليل كله تون من اديتها ، سوي الريوك و خليني اخذنه للكاع خاطر تتريك هديوة ويانا .

- خوش عمة .

طلعت كواغد للكاع لكت هديوة سابكتها وطالعة للكاع

هدية : ها يمه اصباح الخير

- عسنة لا شافنج الخير

- ها يالحبيبة شمالج

- من كونجن معلعلات افادي بنماريتجن .

- عليش شصاير ؟

- اخيتج النمرة ذيج فزيت بالليل و انا اسمع الباب ينطبك بهداي ولنها طالعة .. و الساعة ٢ بالليل .

- يممممه صخام الصخمني ووين راحت ؟

- تكلي اعاين اليركصن بالجول لجن كلبي يكلي تجذب و جميرة هكو شي ابالها .. انت اختها و متورجه اعلى اسرارها شنهو البفادها يهديوة .

- مامش شي عدها

- جاي تضمضميلها

- انت شعملتي بيها

- جويتها بديها ورجليها

- عليش هيج يمه تلاكينها ظل ابالها اليركصن بالجول وراحت تتنوعلهن .

- خايبة جميرة بتي و اعرفنها و كلبي ما مرتاحلها ولا مرتاحلج .. ومن تجي ساعتها وعلي احطنج انت وياها و اكصبجن.

- يا يمه جا رديتي علي ، انا ياهو ماتي ؟

- نسيتي كوا***ج يو ما نسيتيها ، شكثر حجيت وشكثر ردمت ليما صخمتي راسج وراسنا .

- يا يمة شني تضكرتي

- جا غير يو اتوبين خايبات انتن بنات حويكم ما ترتاحن لا ما تربلي علة بفادي .. اكلج انت عزبة تكليلي اريدن سرحان .. جا تستحن تعرفن المستحى .. ضالات مثل ابوجن اليتمعشك .

- ادور كلبت على ابوي

- اشتغلي لا انوم هالربد براسج وعلي .
من اكللهم البت ما اريدنها .. يكللي شمالج يكواغد ما تريدين البت .. هاي مصايب البت ما تنام ليلة بأمان الله يمن كونك تكعد تتفطنلهن خوف ينزاحن ووادمنا ما تخاف الله بلسانها .

هدية : صميت حليكي و اشتغلت بحس خافت عبن امي موجرة نار اخافن لا اداهرها بالزايد و تكوم تذب حركتها بيها و انا اعظامي بايدة ما بيه جتله .

خلصيت شغلي و خليت امي ولالة يتريكن .. كلت الهن بس اروحن اغسل لبتي .. امي عرفتني رايحة انشد جميرة سوت روحها ما سمعنني ولا حجت وياي.

انا خذت بتي ومشيت للبيت ..
لكيتها نايمه ندهتها : اكعدي يمفلوكة اكعدي

- ها

- وين جنتي امس و امي هيج موجرة نار ؟

- ما جنت عد احد

- رحتي تشوفين خنجر ، موش يو لاله .

- طلع يركص ويا النسوان

- انهجم راسج كون .. و تنت شعدج رايحة ليعاد ولج لمة هتلية و سلابة ماشية ليغادي ما خفتي وحيد منهم يكضج و يو يعمل الفاينة وياج .

- ما خليته يكرب طكيته وركضت

- ياهو الما خليتي ؟

- حيدرة

- حيدرة ياهو هاذ ادور ؟

- رفيج خنجر

- ولج هو خنجر سرسري ادور راكضة وراه صدجانه .. من دهر الدهرج كوووون ، خايبة امي تنلام بيح ، ولج جاي تدرسين و شاطرة توهدنين روحج ويا هالسرسرية ذول شنهييييي .

سكتت .. و دميعاتها يجرن
انكسر خاطري عليها حبيتها براسها و كلت الها: يلا يحبيبة حسي دموعج ، جا احنا نخاف عليج وعلي ذول هتلية و ياذونج .. اكبري و صيري دكتورة خنجر و جماعته يكومون يحبون تراب رجليج موش انت التدورينهم .

- امي جوتني

- خاطر ما تعيدينها مرت الاخرى .. يلا يخيتي كومي غسلي وجيهج و كومي وياي للكاع خاطر تشتغلين و تنسين

- لا اريدن انامن

- نامي يلا .

نامت و انا دثرتها و حبيتها براسها ، خنكتني العبرة من هيسيت الشهكة بفادها و تشهك .. دمعت اعويناتي .
وينج وين العشك يجميرة من خرب حظج اي والله ، شحصلت اخيتج خاطر انت تحصلين ، ما يطول اغطانا وال ثجيل بكتارنا.

كمت منها جاي اطلع ولن امي جدامي .. طويلة ولابسة اسود و معبسة .. و علي عدالي ملچ الموت عرضلي ، خرطت ارويحتي من الخوف : يمه ادخيلك يا علي

- شكالتلج

- يمه شمالج وعلي ردت اسويها اعلى روحي من الخوف ، تتصنتين اعلينا خو دشي

- احجي شنهي البيناتجن و يا عشك هاذ التحجين عنه

- لا عشك ولا هم يحزنون كل السالفة نصحتها و طيبيت خاطرها

- اطيبين خاطرها موووش
كاضة المنجل بيدها و لنها اطكني بيه و تكرمع اركبي

- يمه جا انا شلي غرض واطكينيييييي

- من عبن الكوا****ة كلها تعلمتها منج يالبعيرة ، عليتي افادي ليما كبرتي و هالدور اجه على اختج .. ما ترتاحن يبنات حويكم لا ما تموتني .

تحجي و تفر وراي تريد اطكني و انا الخوف كاضني واشرد عرضتلي ايمان ، لبدت بسدها ، حجت : هاي شكو شبيكم ؟

كواغد : انت مالج غرض صمي بوزج ، ما الله ياخذني و يخلصني منجن يالبرابيك عليتن افادي.

تحجي وتمشي .. ليما طلعت برا .

توها طلعت و جاي احجي ويا ايمان و طب ابوي
تلكينا بالهلا و المرحبا و احنا نحبحب براسه .. خليته ينفرد هو ومريته يتحاجون و انا طلعت للكاع ، لاكتني لاله و هي ترد للبيت ، اطيتها بتي و انا مشيت .

مشيت للكاع و امي تحوش .. كلت الها : يمه اجا ابوي

هي من سمعت فزت وراحت مهرفه اعلى البيت .. انا كضيت شغلي ، ردت اردن للكاع ، لجن ظلت ابالي سالفة خنجر .. حليت اوزاري و حطيت عباتي اعلى راسي.

عاينت لبيت اهلي : ابوي ما يطلع هسه من كونه تعبان ، اروحن بساع و اردن .

طلعت من الكاع و انا الفن الشيل اعلى وجهي ظلت بس عيوني طالعة و تربي ، وصلت للمعمل مالت سرحان ، كربت

- اصباح الخير عمي

- هلا بيج بوية

- جا الشيخ سرحان وينه ، ما هو ؟

- داخل دشي تلاكينه بغرفة الادارة .

- لا يعمي انا ما اكدر ادشن ، الواه يو انت تندهه اليه ، كله مرة معتازتك بالباب .

- خوش بوية

دش ندهه لجن طول ربع ساعة ياله طلع و هو يكله : ها حجي يا مرة الطالبتني

- هاي

اندار و انا بكتار المعمل لافيه .

كرب و كال : ها بويه كولي
من تكرب ازود و ركز بعيوني عرفني : هدوووة ؟

- اي يسرحان انا

- امري يهدوة معتازة شي

- المجان موش مالت حجي بس انا مستعجلة ، لجن انا جاية اريدن منك توصي خنجر من كونه رفيجك يبعد عن جميرة ولا يكربها .

-وخنجر شعده ويا جمارة

- الواحد يحجي حك الله هو ما عده شي لجن يحسبها زغيرة ويلاشيها و هي توها شابة تحسب هلاملاشاة عشك .. و امس رايحة للجول بلايا علم احد وهكو واحد اسمه حيدر ما ادري شني متعرض الها و هي طاكته و انا خايفة الامر يكبر.

- يواش يواش وحدة وحدة ، شنهي المتعرضلها ، ويمتى هاي ؟

- امس بالليل رايحة للجول خاطر تشوف خنجر

- اي

- وواحد من الشقاوجية متعرضلها مدري هو الكايللها خنجر هزا ما اعرف .. بس انا جاية خاطر تحجي وياه ينهرها و ما يطيها وجه خاطر لا تظل تتامل بيه .

- لا تشغلين بالج يجي خنجر وانا اوهدن حاله و اخليه يبعدها .. معتازة شي اخر .

- هكو بس المجان موش مالت حجي من كون الحجي المعشعش جدر الفاد ينرادلة وكت واذن تسمع وكلب يفهم ... خاطر يطيب افادك .

- انا ما اكرب ليج اخافن لا اذيج بكربي بس اذا عدج حجي نكدر .....

- وانا هم اخافن ، بس اريد اكللك لا تتامل بيه جثير واولادك معتازين ام ، و العشك ماهو انانية بكثر ما هو تضحية ، عرس يسرحان و حطلك مرة تخدمك انت و فروخك لا تظل تتعشم بيه من كون الوكت ذابني و ما بيه رجعة ودربنا ما يصح .

دنج و تنهد : الكلب غيرج موش هاوي ولا هو الراضي ينسى خاطر يبدلج و يحط وحدة و يتسلى بمجانج .

- من كون عشكي موش جذابي خاطر كلبك ينسى ، جا موش يكولون الكلوب سواجي ؟ لجن ولون هيج حط جرحك حدر افادك .. و شوف روحك .. انت شيخ و ما يصير تظل عزابي .. و انا اعرف انت ما تخط خوفن اغتاض .

- و يو عرست ما تغتاضين ؟

- لا وعلي اموتن مو بس اغتاض

تبسم : جا عليش تموتين روحج

- جا موش كتلك العشك تضحية موش انانية و ان جانك ما معتاز فروخك معتازين .

- ردي يهدوة و امني انا ما معتاز غيرج ، خاطر ارضاه ، و سالفة خنجر انا احلنها.

- اودعنك

- هدوة

- امر يشيخ

- شيخ السلف عاشكج يهدوة و جيتج هاي شالت من افادة هموم يابو هموم .

تبسمت و بانت الضحكة اعلى عيونها و اندارت تمش و هي جنها طير مرتاح بجناحاته ويرفرف بعشكه .

انداريت و انا اتنهد و مرتاح كلش
يا مرتها اعلى الفاد الجنها نسمة اعذيبي يمر اعلى واحد خانكة البين .

التفتت لابو حسن الحارس كلت اله : حجي خنجر وينه

- ما جاي اليوم ، و تريد الصكد يا وليدي انا ما اريدن افتن اعليه لجنه يومية هالتاخير هاذ .

- زين ، خوش .

مشيت للادارة كتبت بحكه .. ينطي كامل هاذ الشهر .. و ينفصل من الشغل .. انداريت و انطيتها للمعاون مال الشغل .. كلت اله : يو اجا خنجر تطي حكه و تفصله من الشغل .

- تامر اعلى راسي .

طلعت من المعمل مشيت للمضيف تغديت و بعد الغدا جانت عدنا اطلابة خذينا ازلام و مشينا .. ليما رديت خنجر واكف اعلى باب المضيف ..

خنجر : خايب عليش طاردني من الشغل

- موش نشوفك بالاول خاطر اخليك

- خذتني نومة وعلي

- لا تجيب طاري علي ، كول سهران و سكران و متخم ليما متختخ .

- حكك ثكلت البارحة ، بس اجيت الضحى كالولي الشيخ طردك

- عبنك تستاهل الشغل ما بيه محسوبية يخنجر و انا عدي عمال من يشوقوني مفضلك عليهم و هم يشوفونك واحد شقاوجي شيكولون عني .

- جا هيج صارت

- انت موش مالت شغل ، هدك من السالفة هاي ، احجيلي شنهي سالفتك ويا جمارة بت حاكم .

- هاااا ؟

- جاي انشدنك

- خايب شعدي وياها .

- امس البت جاية للجول و متعرضلها حيدرة يخنجر .. العب بس لعبك خله اعلى الكاولية موش اعلى بنات السلف .

- خايب شمالج احج عدل .. شنهي لعبك جا انا يمتى لاعب اعلى مرة .

- جمارة شنهي سالفتك وياها .

- انت تحجي صكد يو تتشاقه

- اي وعلي امس اجت و حيدرة متعرصلها

- لا يردي تضكرت وعلي .. انا شفت بت هيج زغيرة ركضت بس ما لبالي جمارة .. شعدها هاي جاية للجول

- تنشدني ؟

- خايب هاي مسوچة وعلي .

- شنهي سالفتها وياك

- خاب شوف الحظ ادور سالفتي ويا جلجول ، ولك البت مثل بنيتي واحبنها جيفن ملسنة وتهذري يو مرت اتونس اعلى حجاياتها و هي تنشدني يمتى نعرس ، بس لا هاي صكد ناوية اعلى السالفة.

- عوفنا من هالسالفة .. و روح شوف حيدرة شنهو العاملة و تصرف وياه

- هاذ انا نشدته و كالي بت مواعدها بس انا اله ، لا ما ***** ***** ما اتسمى باسمي .

طلع خنجر من سرحان و مشى للجول ، نده حيدرة بدفرة و كاله : اكعد لك ، اكعد ياله

وجراه من ياخته و كعداه و جر الخنجر حطاه بزردومه

- شمالك خنجر تسودنت ، شيل السجين مني .

- البت اللفت امس بت حاكم

- وانت ياهو مالتك

- شعدك وياها ؟

-مالك غرض

طكه بوكس ونام بخوانيكه و ذاك كام يتعارك وياه .. دشو الجماعة و جروهم و هم يفاككونهم .

- شمالكم تسودنتو كولو ياله

- اسمع لك ، البت هاي يو كربتها وعلي راسك احشنه افتهمتتتتتتت .

- اكربها و اشوفن شلون تحش راسي

- تتعاركون اعلى بت وعلي ما تستحون ، خنجر شجالك تهدا .

خنجر : حجيت العندي و يو ما ردعتو عن هاي البت وعلي ابتلي بيكم كلكم.

- تهددنا و احنا ربعك لجل بت

- وانعل والديكم .. ذنيج الكاولية تختخو وياهن انعل سلفاي يو حجيت ، بس اليكرب منكم من بنات السلف والله اكصن زردومه

- مامش احد منا يكرب بنات السلف و هاذ الشي نعرفه ومتفكين عليه ..

- جا احجوا ويا الكديش الجار بت بكد زره بنصاص الليالي و جايبها للجول .. سوايتك هاي يو عدتها و العباس ابتلي بيك .

حيدرة : اكلك تعال جاي اشو انت تستشرف بروسنا وخارطها غاد ، دمش عني ميييييل .

راد يطلع كضاه خنجر وتلايمو و الربع يفازعون بينهم ليما فاركوهم و طلعوا حيدره ، و جروا خنجر عنه .

وخنجر كاعد يهدد بيهم ، ليما طلع عنهم .
رد للسلف ينشد سرحان عن جمارة

- هسه شلونها ؟

- ما ادري عنها

- انت ياهو الكالك

- وصلولي الحجي

- جا غير اعرف

- مو المهم تعرف ، اخذ حذرك و بس و اذا البت عاشكتك .. كللنا خاطر نتكدم و نخطبها الك .

- تسودنت انت ، انا يو معرس بتي بكد جمارة ، شجاي تحجي .

- بس البت عاشكتك ، و متعنية للجول لجلك ، شرايد ازود ؟

- خايب انت تحجي صكد يو تشاقه ؟

- لا وعلي جديات .. ما اشوفن بالامر عيب اخذها و حطها حدر دامها عاشكتك .

- والله يا شيخ السلف اظنن طكك خويط .

- انت كلي ناوي تظل بلا مرة

- السالفة مو هيج ، بس بت زغيرة سرحان .

- البت خواطيبها اعلى الباب و تكلي زغيرة ، باجر عكبك اهلها اطوها ... الماخذها هم يكول زغيرة

- اي خلها تعرس من اللي بحلها موش انا .

- ما رايدها اعلى كيفك ، انا كلت اقلها البت عاشكتك و ما تروح عد واحد ما تهواه وتذبل عده .. تطيح بيك و تحملك و تحمل سوادينك و عربدتك .

-اكلك شيخنا شتكول يو اطكنك بزيج ؟

- خب دميل عني انا هم صوجي احج ويا واحد سرسري مثلك .

- تعال جا انت فاصلني و كاطع رزقي شنهي

- الما يغبش لرزقه لا يدور رزق .

- لا عليك العباس ، ما ابيه اردن للخاوات و اعلك وياهم.

- دخيل العباس مالك رده .

- خايب شيخنا انا بشاربك

- ازين شاربي الانت بيه ، امش عني

- اها خايب اخيك .. ابو مأمووووون .

......

حاكم : شمالج اليوم شنهي طابكات ؟

- صلاوات يوم الطلعت من حجرة الخاتون .. يو ترد وتهدني اخيرلك .

- الله الاحد رديت تعبان ونمت جا كفرت .. بس ما خليتيني انام و انت اتهوسين اعلى الوادم و شاعلة البيت باعصابج شنهي السالفة.

- مامش كل سالفة هدني .

- ام ستوري بويه اعصابج .

دارت عنه وهي معصبة، اندار : جا هديوة وين ؟

لاله : ابيتها عمي

- جماااااارة ، جميييييرة بويه

كواغد :- شرايد منها ؟

- تمش تنهده لاختها تجي ليجاي .

- خلها مالي خلك معارك اميدي و نويسه .. هدنا من المصايح .

- اي انا مشتاكلهم ، خلهم يصيحون .. جمااارة

- جمارة مريضة ما الها طلعة

- شمالها ؟

- انجوت بالجولة

مشى للحجرة وفكها لكه جمارة كاعدة و مغندبه : جميرة بويه تعاي اسلم عليج .

- كامت حبت راسه و سلمت عليه ، اندار ليها : شلون احتركتي ؟

ما حجت ظلت تعاين لامها .. هو اندار كواغد تخزر بيها من شافته دارت عنه : حاركتج امج موو

- لا

- اكعدي استراحي بويه ، انا اروحن لاخيتج اجيبنها

- مجبوبه ابيتها و كاعدة اتجيبها عليش

- جا نهدها ، طفر عليها حرامي طكت عليها جولة صار ما صار بيها شنهي ذابينها .

- شعدها ويطفر عليها حرامي ابن اخوك ما خلا اعلى حالها حال ينباك .. ذهبات و ك*** بيهن.

- اكلج اشمالج اليوم متسودنه اعلى راسي ، ابن خوي شني احجي عدل ..

- جا مجذبه هكو غير اهلك كطو امرارتنا ، هاي بت تخي لا حس ولا نفس مثل ميل الساعة وفليح و يسرى من عبنهم من اهلك هاللعبوا بحالنا لعب .

- اليوم طاكات عدج ، اهدنج و امش احسن ما ابتلش وياج و اشعل البيت بيكم و انعل سلفاكم .

مشى و طك الباب وراه و راح جاب هدية و اجا و خلاها بالبيت ، بس كواغد معصبة و حاكم تضايك منها ، جو للبيت مكهرب كل اليحجي يترزل .. تعشوا وناموا كلهم .

للصبح تريكوا .. و جمارة كاعدة .. اندار ليها وكال الها : شو كاعدة بوية شني ما عدج دوام ؟

- امي ما تخليني اروحن للمدرسة .

عكد حواجبة : بعد احسن بس عليش مكعدتها ، موش انت التتعاركين وياي خاطر تداوم شحصل وبطلتيها .

يعاين عليها و كواغد خازره بجمارة ، كامت جمارة من الصينية و هو موجد بيهن : شصاير ؟

- انا وبتي انت ياهو مالت

- اي حكج مو انا كوا*** جاي من الشارع ياهو مالتي قابل بناتي هن لو انت مرتي .. تحجين عدل لو تخليني البيت هاذ اهجمنه فوك راسج ، متحملج من امس وليجاي و يو فاض صبري من البيت اشردنج .

دفع الصينية عليها وكام .. انجب الجاي عليها فزت لالة و هي تجيبلها ماي ، ميلتها كواغد وراحت بدلت اهدومها و هو كام يصيح و يعربد بالبيت .

كلها خنست .. هدية خذت بتها و طلعت للكاع ..
وهو ظل يصيح الا يعرف شنهو الصاير كالتله : تعاند وموش مؤدبه .. بتي واريد ادبنها عدك شي وياي ؟

ظل يغلط و يسب و يشتم و طلع و هو عصبي ، ردت كواغد لجمارة كتلتها و هي تكللها : ولج يالنمرة فوك شينج كوات غينج تكليله امي ما تخلينييييييي .

اطك بيها بالعودة و لاله و ايمان يفازعلها.

حاكم طلع عصبي للكاع .. يمشي مهرف وما يعاين كدامه .. غير واحد يطلع عمره بال١٥ سنة .. كاض عودة و يطك بالزرع .. وعدم الزرعات كلهن .

كضاه حاكم من علباه و كاله : عدمت الزرعات ابن النعال ، شعدك بالكااااااع .

الولد كام يدفع بيه و خاكم عصبي و يشتم بيه ، ذاك ذب حجاية و كاله : دميل عني لا انعل والديك .

وخاكم تسودن : خايب انت البكد فردة انعالي تنعل والدي ، اليوم ابتلي بهلك اليوووم .

كض الولد و طكه بوكس ، ودفعه للكاع ، و ينردم بصخرة اعلى كاع .. و حاكم ما شافه انطك بيه ، من عصبيته استمر يطك بيه ليما شاف الولد ماعت روحه بالكاع .

كام اعلى حيله و يعاين راسه ينز دم .. تسودن
نزل عليه يندهه يكعده .. ما يكعد الولد .

طلع من الكاع و استاجر عربانة مالت مطي ، حطاها عليها و ركض بيه للمضمد .. و نعله يكله : الولد ميت .

- دخيلك يا علي .. هو ابنمن هاذ ؟

- الولد دايس كاعي و كاض عودة و يعدم بزرعاتي .. كضيته ونهرته .. شتمني .. طكيته ودفعتنه ولنه يطيح اعلى صخرة .

- عمي الولد مجتول مو مالت طايح اعلى صخرة .

- شير علي انا اندار راسي .. وين اخذنه

- خفف اعلى روحك و امش وديه للمستشفى وسلم روحك للامن و انا اروحن اخبر عمامك بالسالفة و نعرف ابن من هاذ .

ما جذب خبر اخذ الولد وراح بيه للمستشفى .. دخله وكال الهم : هاذ الولد داس كاعي و تلايمت وياه و طاح اعلى صخره ومات وانا جاي اسلم جثته للمستشفى و اسلم روحي .

كضوه الشرطة بسرعة وخلوه بسياراتهم .

مشى المضمد للبيت مالت حاكم .. دك الباب
طلعت كواغد : يااااهو

- انا حنون خوية

- هلا بيك خوية ، هلا ومرحبا

- هلا بيج خوية بس انا جاي اخبرنكم

- شنهي ؟

- حاكم تعارك ويا واحد وطاكه .. والولد مات و حاكم راح وداه للمستشفى و سلم نفسه ، انا كلت اخبرنكم كبل لا اروحن لال ثجيل .

- يمممممممه دخيلك يا علي .. شنهي مات

- اي والله الولد جاباه ميت ، و انا كلت اله خفف اعلى رويحتك و امش سلم نفسك .. و خلي عمامك تفزع .

- يمه صخام الصخمني ، انهدم بيتي يمممممه .

لاله : ها عمه

- ولج عمج طاكله واحد و اموته يمه ، راح زلمتي وعلي ، انهجم بيتييييييييي انهجم بيتي .

نشغت ايمان ، و لاله صرخت وكامن يتباجن ، اجت هدوة : هااااا شنهي

لاله : عمي طاك واحد واموته وراح سلم نفسه

- يييييمه ابوي ، مت عيني بويه .
كامت يتلاطمن ، كواغد جرت عباتها وراحت تركض للمستشفى .. و المضمد راح على بيت سلطان ال ثجيل يبلغه .

وصلت كواغد للمستشفى : خايب يمه انشدنك عن وحيد اسمه حاكم ال خضير .. طاكله واحد و هالواحد ميت بيده ..

- حجية الرجال هاذ سلم نفسه وخذوه الامن بسياراتهم .

- مت عيني يمه ، تصخم راسي يمه ، هاي التايهات موش اعلى بالي .. دخيلك يا امير المومنين ... انهدم بيتييييي يمه وين جانتلي يممممه .

ظلت تلطم و ادك اعلى راسها و تبجي ، صفت سيارة سلطان وولده ، كرب منها : شنهييييي طلابة رجلج يكواغددددد

- طلابة ما منها طلابة يمه ، وين جانتلك يحويكم ، امداني يو خالته يشعل البيت بعصبيته ولا هالطلابة هاي ، امداني وامده فركي ساعة الخليته يطلع يمممممه .

راح سلطان يستفسر من الامن .. كالوله خذوه .. هد حاكم وراح يستفسر اعلى الولد لهساه ما طلعوا اهله .

للمغرب واهله ما دارين عنه .. شيعوا بالسلف .. ولد هيج مواصفاته انجتل .. ابنمن .. محد يعرفه

كواغد : اعوينة ابو الحظ .. عسه يطلع بلا اصل ويروح حاكم ينسجن ، تصخم وجهج يكواغد .. اعوينة ابو الجاب مثلي ، كله مني ساعة الفكرت الزلمة بعصبيتي و هججيته .. الله لا يطينيييييي يمه .

هدية : يمه يواشج بروحج بهداي عليج العباس .

- راح ابوجن يممممه ، ستار يمه وينك .. وينكم يخوووووتي .. زلمة بيتي راااااح يمه .

دك الباب ... ولنه سرحان و عمه ابو فاضل و حميد طلعت الهم كواغد ، حجه : ها شنهي سالفة ابو ستار

- طركاعة وطاحت اعلى روسنا ..مدري منين طلعتله هالمصيبة هاي .

-ووينه هو هسه ؟

- خذوه الامن

ابو فاضل : لا تخافين ان شاءالله محلولة بس خل يلكون اعل الولد خاطر تطلع مشيه ليهم .. ولنها تكضي بفصل و يطلع .. بهداي يم ستار .

- جا غير يو نعرف اهله ، صار الليل و الولد ماله اهل ينشدون عنه .

للصبح .. و لن ناس من عرب ال مطشر .. ينشدون عن ولد توه شاب .. طلع امس الصبح و ما رد .

كالولهم هيج و هيج مواصفاته ؟
كالولهم .. اي

تلكونه بالمستسفى الولد اطاكم عمره ..
واهله تسودنو ... امه شكت زيجها و ابوه كام يدك اعلى راسها .. و زلم تفاكه طلعت و هدت اعلى بيت حاكم .

ظهرية و كواغد و البنات كاعدات بالبيت وينوحن و ناطرات خبر عن اهل و الولد .. ما يهيسون و الا الرمي اشتعل اعلى بيتهم و كامن الجيلات يدشن للهول .

كضتهن كواغد و شردن للحجرة يتلبدن بيها و يتصايحن و يتصارخن ..

هدية : سركت الباب امي وجمعتنا كلنا بالزاوية مالت الحجرة انا وبتي و جمارة و لاله و ايمان و جهالها . مچوچبه اعلينه و تنخى : ها يا امير المومنين .. ها يداحي الباب احضرنا .

الطك و الفشك اعلى البيت يفزع الكلوب و احنا فد نساوين .. اعاين لامي وجهه كام يصب ماي ، تحس بوجهه و تنخى ، كضت بيدي .. واطرافها بردت .

- ها يمه

- كضيني يهديوة يمه غوشيت .

كضيتها و تجيتها اعلى افادي ، ونعلها اطيح و تتخربط .....يتبع

لقراءة الفصل التالي : اضغط هنا
reaction:

تعليقات