القائمة الرئيسية

الصفحات

رواية عائلات راقيه بفسادها الفصل الثاني عشر 12 بقلم اروى طاهر المسلاتي

 رواية عائلات راقيه بفسادها الفصل الثاني عشر 12 بقلم اروى طاهر المسلاتي

رواية عائلات راقيه بفسادها الجزء الثاني عشر

رواية عائلات راقيه بفسادها الفصل الثاني عشر 12 بقلم اروى طاهر المسلاتي


رواية عائلات راقيه بفسادها البارت الثاني عشر

وفيت بوعد وبكرا لو لحقت بنزل 13تفاعلو بس❤️🙏🏻
هبه:مجاهاش النوم طول الليل وزاد لما هرب الضي
ناضت من مكانها شافت جنان في سابع نومه
قربت ع البلكونه الارضيه وفتحتها
طلعت قعمزت فتره تتأمل في المزرعه وفي الهدوء يلي هيا فيه!
وفجآه قلبها وقف لما شفاته واقف قدامها!..
امير:عادي نهدرز عليك شويه!
هبه:خبطت ع وجها....انت شن جابك هناااايا؟؟
مش مفروض تكون في الفندق وسط المدينه؟
اليوم دخولك امير !!!
امير:نحكي معاك كلمتين وراجع
هبه:منبيش نسمع شي .....دارت ضهرها ومشت لكن!
مسكها من يدها❤️
امير:مفهمتيش عليا لعند اليوم انتي؟
هبه:شنو بنفهم؟
امير:مفهمتيش علاش اشرتلك اليوم من بين الحضور كلهم!؟
هبه:شافتله بتمعن كويس....لا مفهمتش
امير:مسح على شعرها فتره طويله
هبه:انت فاهم انك قاسي معاي هلبا💔!!!
وتسمع فيا كلام زي السم !؟
فهمني علاش تكرهني امير شنو الشي الكبير يلي انا درتهولك !
امير:مردش عليها بي كلام ....كل يلي دارها عطاها بوسه على خدها واختفى
هبه:اممييير اممممير

جنان:هببببببه ياخرا نوووووضي
هبه:ناضت من النوم وهيا تبلع في ريقها والعرق مغطيها
جنان:بسم الله خيرك داهشه
هبه:حلم حل.....كابوس نقصد
جنان:والكابوس اسمه امير🙂!
هبه:عقدت حواجبها....لا الكابوس كان فيه امير الخرا .....وبدت تقيم في شعرها
جنان:ديري حل الضي هارب وقريب نموت من النو
هبه:خدت نفس.....وناضت
فتحت البلاكونا الارضيه وهيا تشوف يمين يسار
ع امل تلقاه وميكونش حلم !
بس مكانش في حد قدامها غير الضلام وبس!...وقفت هبه هلبا ومحست بي الوقت وهيا تكرر في الحلمه في راسها
كأنه الحلم هاذا حرك فيها هلبا حاجات وخلاها تحس بي حاجات حلوه!❤️

تلفتت هبه وقامت حواجبها بذهول ....انتي امتى طلعتي وجيتي ؟!
جنان:واقفه ماسكه شيشة ببسي كبيره وطرف كيكه ....اسفه كانت ثلاجتكم مفتوحه 🤷🏻‍♀️
هبه:🤦🏻‍♀️🤦🏻‍♀️🤦🏻‍♀️

_____________________________________

رعد:قرب عليها....استاحشتك
وحضنها
بادلاته رؤى الحضن وبعدت من عليه شويه
شافت تعابير وجها تتغير وفهمت انه شم العطر !
رعد:بعد من عليها وهوا عاقد حواجبه ....شن يلي باختيه!؟
رؤى:رغم الخوف يلي فيها حافضت على ابتسامتها ....عطر جديد جبته في بتاتي
ليش ؟معجبكش ولا شني!
رعد:واضح على وجها علامات التوتر ....خدي نفس عميق ورجع ابتسامته
معش تغيري عطرك❤️....عاجبني يلي كنتي تستخدمي فيه قبل معش تحاولي تغيري شي فيك
رؤى:ساكته وتشبحله
رعد؛فهمتي شن قلت؟
رؤى:ابتسمت وهزت راسها بس مقدرتش تمنع دموعها انهم ميطيحوش 💔
رعد:مسح دمعتها من على خدها.....خيرك!
خيرك تبكي تكلمي !
رؤى:منحبش ندير شي ميعجبكش 🥺💔
رعد:ضحك وحضنها....جميلتي الحساسه❤️
رؤى:مسحت دموعها
رعد:خشي دوشي وبخي عطرك انتي وتعالي نراجي فيك
رؤى:قالت في خاطرها....لهدرجه متبيش حد ياخد عطرها ولا مكانها !💔
رعد:تمام ولا لا؟
رؤى:اكيد❤️...خشت للحمام بدون ما تزيد كلمه
اما رعد قعمز على السرير وهوا يفكر في خاطره
لعنتها مستمره في حياتي 💔
متبيش تخليني في حالي حتى وهيا ميته مزال تبي تعيش معاي!؟

______________________________________

ماريا:كانت بتخش للمخزن بس وقفت لما شافت ارسولان نحى التيشرت متاعه
رجعت خطوتين للخلف وقدمت لما شافت ارسولان لبس تيشرت تاني !

ارسولان:بدل تيشرته وفتح صندوق سيارته الامامي يصلح
ماريا:السلام عليكم
ارسولان:قام عيونه ومستغرب...وعليكم السلام؟
تفضلي؟
ماريا:ابتسمت وحطت الصونيه ع الطاوله.....جبتلك من عشي دخول امير وبكلاوه وشوي حاجات حلوه
ارسولان:سيب السياره وقدم عليها....علاش!
ماريا:اختفت ابتسامتها.....كيف علاش !
ارسولان:يعني علاش جبتيلي لعندي عشي شن مصلحتك؟
ماريا:ضحكت بصدمه.....مصلحتي ؟
مفيش مصلحه حسبتك لانك ساعدتني في هلبا مواقف
واي شي حلو بنحسبك فيه !
ارسولان:قرب منها وماريا تراجعت للخلف خطوتين
اسمعي يابنت الناس كويس!
انا مش نفس الشباب يلي تعرفيهم ولا من الشباب يلي من الطبقه متعك وعندهم كل شي عادي
لقائات الليل في المخزن هاذي مش شوري والمواضيع التافه يلي في راسك وتشوفي فيها في المسلسلات لا هي من عاداتنا ولا تقاليدنا فوتيها يكون احسن ومعش تجيني تتلاقي معاي بروحك يابنت الناس تبي حاجه عندك زوز خوت
تبي مني انا شي تقدري توصليه مع اختي ولا امي
ماريا:نصدمت من كلامه!
بغض النضر على انه فهمها غلط!!
منو يلي يرفض يتلاقى مع بنت في الزمان هاذا!؟
ارسولان:سمعتي يلي حكيته ولا لا!
ماريا؛بلعت ريقها....سمعت
اسفه ارسولان متفهمنيش غلط يعني نعتبر فيك زي خوي في النهايه انت ولد عمي جلال ومتربي معانا
ارسولان:شافلها بنضرات غريبه ووخر راجع لي السياره....يكون احسن هكي
ماريا:دارت ضهرها بتطلع سمعت كلمه حلوه طالعه من ارسولان❤️
ارسولان:شكرا على العشي
ماريا:ابتسمت من دون ما تتلفت ....العفو
وكملت طريقها طالعه من المخزن
لكن قلبها طاح لما شافت خوها اسلام طالع من الحوش يعاند في المولد ويحاول يصلحه

رجعت بسرعه ويدها ع قلبها
ارسولان:قام حاجبه ....شن في!
ماريا:خخ خوي اسلام برا
ارسولان:تنهد بي ملل ونزل سرلانتي المخزن(الباب يلي شبه باب المحلات)
نزل الباب وفتح باقي الاضائه وتلفت ....شفتي كيف!
ماريا؛شنو!
ارسولان:لما تبدا الحاجه حرام ومش في شرع ربي تخافي حتى لو مش مدايره شي
ماريا:به خلاص !
كل ذنبي اني اعتبرتك زي خوي يعني وجيتك هنايا !
ارسولان:مردش عليها ورجع لي السياره
ماريا:تفرجت ع المخزن بعيونها وسألت....كل ما نجي نشوفك تصلح في السياره هاذي
مكملش تصليحها؟
ارسولان:عيونه داخل السياره....مزال تبي
ماريا:هيا مش سيارتك صح!....يعني مكتوب فيها تبع كتيبه
ارسولان:نصلح فيها للعمل مش ليا
ماريا:سكتت فتره ورجعت سألت ....انت وين تكون طول اليوم؟
علاش كل يوم تروح متأخر هكي
ارسولان:شافلها.....متتعبيش من الاسئله انتي ؟!
ماريا:سكتت
ارسولان:بدل ما تشديها ورا الناس بي الاسئله هاذي وتقيمهم من حالتهم الماديه بري ديري شي كويس ينفعك بدل ما حياتك فارغه هكي
ماريا:ليش انت من وين تعرفني باش تحكم عليا بطريقه السيئه هادي؟

طق طق طق طق
اسلام:ارسولاااان ارسوووولان نايض؟
ماريا:انخطف لون وجها من الخوف ....هاذا اسلام 😧
ارسولان:لوح الاداة يلي كان يصلح بيها
ماريا؛وين نممممشي لو شافني هنايا يعدمني
ارسولان:فتح باب السياره....خشي داخل ومطلعيش صوت
ماريا:خشت داخل السياره وسكر الباب
كانو الرواشن مضلمات طبيعي اسلام مش رح يشوف شي !

ارسولان:فتح الباب وابتسامته الجافه ع وجها زي العاده ....اهلا
اسلام؛سامحنا ازعاجات في ها الليل
ارسولان:ولا يهمك تفضل
اسلام:اءءء امم...سامع انك خبره في التصليحات وهكي
المولد معش بي يشتغل من بكري نحاول معاه تشوفه ؟
ارسولان:تمام شوي وجايك
اسلام:تم ياغالي منور
ارسولان:هز براسه ورجع سكر الباب

ارسولان:فتح باب السياره....متتحركيش من هنايا لين نجي
ماريا؛تمام
ارسولان:سكر الباب وهوا في خاطره يقول....هاذا جزاء يلي يتساهل مع بنات زيها ويعطيهم مجال!
طلع من المخزن وفي الوقت هاذا كانت ماريا تتفرج على حاجات مش مفروض تشوفها💔

ردي بودري وشرايط شعر ورديات
خواتم وذبله نفسها يلي خدتها قبل 💔
مروحه بودريه وقميص يلتبس تحت الردي !!!
من منضر الحاجات بس كانت ماريا قادره تسمع اصوات العرس 💔
قادره تتخيل فرحة العروسه يلي كانت لابستهم !
قادره تسمع الاغاني يلي غنوها في نفس اليوم

(عروسه طلعت من الحمام ان شاءالله يواتوها الايام)
(عروستنا تقول حمامه لبست بوخطين توامه)
(لبس البودري محلاه كل بنيه تتمناه)

كانت قادره تسمع وتتخيل زغاريط البنات كبار وصغار جنب العروسه!
بس هاذا كله اختفى اما شافت الدم يلي كان ملبز على القميص الوردي وخربه💔
الشق يلي كان فيه جيهة القلب💔....خلا ماريا تتخيل كيف فرحتهم خربت💔
كيف انقلب الفرح في ثواني 💔💔
خلاها تسمع عياط ناس نفسهم يلي كانو يزغرطو
منو هما ؟وشنو يلي صار!؟....مكانتش عارفه

رجعت ماريا كل شي في مكانه وهيا حاسه بضيق داخل قلبها💔
كأنها قرت روايه فيها تفاصيل كل شي شافاته !
صح يلي شفاته كان مجرد ملابس لا اكتر
بس كأنهم يحكو روايه تامه💔

🔥رِوَايـــــــــات بـــَـنـُـــووتِـــة الشـِــيـــْـخ🔥
🔥أروى الــــطـــاهــــر المــســلاتــــي🔥

هبه:مقعمزه على سريرها سارحه
اما جنان دارت لي روحها جو بروحها 🤷🏻‍♀️
خدت السجاده يلي كانت في غرفة هبه وفرشتها في البلاكونا الارضيه
حطت شوية مخاد وجابت الحاجات يلي خنبتهم من المطبخ وقعمزت
هبه:لحقتها وقعمزت جنبها بعد ما عجبتها الجلسه يلي دارتها جنان

جنان:تاكل....ها؟؟؟بتحكيلي ولا مزال !
هبه:شنو بنحكي!
جنان:السبب القوي يلي خلاك تهلوسي بي خو اللفعه ؟!
هبه:حلم مفركس فوتيه ....انتي يلي باين عليك متبيش تحكيلي
جنان:قامت حاجبها ....شنو بنحكي !
هبه:شن صاير معاك في الحوش ؟
منعرف شي على عيلتك لا انا ولا حتى البنات
شنو الشي يلي خلاك تباتي عندي اليوم
جنان:حطت الببيي ع الارض ....لومتبينيش عادي ع فكره نروح سيارتي قدام الباب
هبه:تي قعمزي اما تروحي خيرك انتي هبلتي؟
لو تقعدي عندي سنه معنديش مشكله بس انا نبي نطمن عليك انتي
جنان:رجعت خدت الببسي....اصلا حتى لو قلتي اي مش رح نمشي
هبه:ضحكت:يعني مصره متبيش تحكي ؟
جنان:مخاطريش
هبه:بنبرة صوت جديه.....امك عايشه؟
جنان:تعيرت ملامحها بس حافضت على هدوئها
عايشه بس في حياتها مش حياتي
هبه:كيف!
جنان:كملت الكيكه وتحكي وفمها مليان...منفصلين
بوي ويلي اسمها امي
هيا تزوجت وكونت اسره هكي كبرها
وبوي نفس الشي ....وانا مره هنايا ومره هنايا
هبه:يعني بوك عنده حوش!؟....ليش انتي عايشه في جناح في الشركه!
جنان:نحب هكي اريحلي....تعمدت تغير الموضوع بسرعه ....ان شاء الله بكرا تجي مرت خو اللفعه نبي نشوفها بلا مكياج
هبه:فهمت كويس ان جنان في حاجات توجع في حياتها متبيش تحكيها!!

_________________________________________

طلعت رؤى من الدوش
مكانش دوش عباره على اميه وصابون بس !
كان دوش معبي افكار واسئله داخل الحمام مليهاش اجابه
طلعت رؤى....ووقفت قدام المرايا بخت عطرها هيا❤️
قضت الليله مع راجلها رعد❤️....عاديه جدا گ اي راجل ومرته بينهم مشاعر حلوه
بس السيناريو نفسه تكرر!
اول ما يحس ان رؤى رقدت يسيبها ويطلع يصلي ركعتين ويرجع يرقد في غرفة مرته الاولى

رؤى مكانتش راقده والمره هاذي خلاص فاض بيها لازم ادير حل !
قررت من ثاني تجمع معلومات على نجمه وتكون نسخه منها🔥🔥

_______________________________________

ارسولان:خلاص اطلعي خوك رجع لي داره
ماريا:نزلت من السياره بهدوء...اسفه حطيتك بموقف بايخ
ارسولان:ضحك وهوا يهز في راسه وقدم على سيارته من جديد
ماريا:علاش ضحكت!
ارسولان؛مردش عليها
ماريا:نسأل فيك اناااا
ارسولان:يصلح ويحكي....مكنتش نعرف ان المسمومات يلي زيك يعرفو يتأسفو
ماريا:محاولتش تبرر نفسها للمره الالف لان يلي شفاته في سيارته كان مسيطر على تفكيرها!
طلعت بدون ما ترد عليه حرف ....

____________________________________

ليلة صيف !
حرارتها عاليه وناااار خلت هلبا ناس مترقدش
بس مش رح تكون نارها زي النار يلي موجوده في قلب رؤى💔

ولا رح تكون زي النار يلي موجوده في قلب امير يلي رقد في كافي الفندق!

ولا زي النار يلي كانت في قلب ماريا تموت وتعرف شنو قصة الحاجات يلي لقتهم عند ارسولان!!؟

_____________________________________

ثاني يوم🌤🌤⛅️

احلام:نوضيها صاحبتك هادي يلي متمرقده لضهر
هبه:حطت باقي الفطور....بشويه يا امي خيرك مش حابيتيها البنت
احلام:امهات الاشكال هادي نعرفهم كويس تلقيها حتى شهادة اعدادي مش واخدتها مستعجله على الزواج والجياب بس وبعدين تلوح صغارها
هبه:مش صححح يا امي مش صححح
جنان:صباح الخير
احلام؛قعمزت ع الفطور ومن راس خشمها...صباح النور
هبه:قعمزي جنونه افطري هي
جنان:قعمزت وبدت تاكل بدون اهتمام لي ام هبه
احلام:شافت لي هبه بنضره حاده.....متعانده انا وهبه بنتي على امك شن تخصصها في القرايه!؟

جنان:تاكل وتحكي بدون اي اهتمام ....شهاده جامعيه وخدمت دكتوره في الجامعه فتره طويله
هبه:شافت لي امها بنضره....شفتي كيف؟؟
احلام:قامت حاجبها بحسد....وتوا شنو تخدم!
جنان:حاجه في الطيران تسافر وتسافر وتسافر وبس
احلام:لمعو عيونها....وبوك ؟
هبه:خلاص امي خيرك تستجوبي في البنت خليها في حالها
احلام:نهدرزو شن فيها
هبه:هي نوضي جنان ياسرك ماكله
احلام:وين؟
هبه:جنان خاطرها تشوف المزرعه بنديرو دوره وراجعين
احلام:ارفعي الصواني يلي فوق البار ع طريقك لي ليلى نحت فيهم العشي لي بوك امس
هبه:به....نوضي جنان
جنان:ناض من مكانها ومالبستش شي !
لا حجاب ولا حتى جاكيت !لبست شبشب في رجليها وطلعت مع هبه

____________________________________

ماريا:نزلت من غرفتها شافت العيله كلها متجمعه على الفطور
رزان واريج خوات حسام زي العاده يتصورو مع الاكل عشان ينزلو سناب
نصدمت بي رحمه يلي كانت مقعمزه وشكلها كيف واصله!
ماريا:من اول يوم هكي 😧
رحمه:وقفت سلمت عليها....اي مستعجله عليكم
وضحكت بنفاق
ماريا:قعمزت جنبها.....مش ع اساس اليوم بتسافرو؟
امير:قاطعها....رحمه تعبت واجلناها شويه
ماريا:الف سلامه ....كان خاطري نتجكتر بيك ونقول خوي مشي اسبانيا بس الله غالب 🤦🏻‍♀️
امير:هاذا فاش فالحه

رقيه:تفضلو
هبه:كانت ماسكه الصواني هيا وجنان وخاشين الاثنين لعند المطبخ حطوهم وطلعو
هبه:قتلك ماما صحيتي وربي يكمل فرحتكم ع الخير
ليلى:سلميلي عليها
هبه؛تتجاهل في امير ونضراته....الله يسلمك
امشي جنان
رزان:هاذي يلي قاصه شعرها زي الولد شنو ادير هنايا !
اريج:تقصقص شنو ادير يعني
جنان:شافت لي ماريا.....مش هاذي مرت خوك!؟
هيا ولا انا منفرزش؟
ماريا:تتكلم من راس خشمها....اي هيا
جنان:ياريتها قعدت امكيجه زي امس مافيها لون هكي
هبه:نصدمت......جنان امممممشي وطلعتها بسرعه

ماريا:وحده مريضه هاذي متواخديهاش
رحمه:ولا يهمك
رزان:جديات بدي ذوقك في صاحباتك بلدي هلبا يا مومو وربي
ماريا:مش صاحباااااتي افهمو يقرو معاي وبس!
اريج:ضحكت لي اختها لان فاهمتها كويس وعارفه انها متعمده تستفز ماريا!

_______________________________________

هبه:غللللللط غلط جنان غلللط
جنان:بس انا قلت الحق مكدبتش
هبه:الحق مش ديمه ينقال في وجوه الناس
ووووه عليا جنان وربي بتجلطيني

اسلام:انا جلطتني وفات🤤
جنان:اياه علينا
هبه:صح كانت معصبه بس مقدرتش تمسك نفسها على الضحك!
اسلام:نورت المزرعه واشرقت بقدومك وربي
جنان:ع اساس كان انا مش هنايا راهو مأشرقتش
كسوف يجيكم
اسلام:حرفيااااا....اليوم كل شي منور هنايا شوفي الزرع يلي تحت رجليك بيرجع اخضر من جمالك❤️
جنان:يابسه زي شعرك بطل كدب
هبه:هيا جنان
اسلام؛استني مش لما تهدرزو شويه قبل !؟
جايين عشان ماريا ولا؟
هبه:لا خلاص كملنا صحيت
اسلام:يشوف لي هبه وجنان كيف يتباعدو....راح الزين 💔

____________________________________

فات يوم الجمعه والسبت ❤️

رحمه وامير عايشين دور العرسان
مره عدي في مطعم ومرا عشي في مطعم والجو كويس قدام العيله

روحت جنان وخلت هبه يلي كل شويه امها تنفخلها في راسها وتعبي فيه
انها لازم تستفيد من اي صاحبه بوها او امها فلوس!

ماريا:كانت متحمسه لي فكرة حسام واخواته يسكنو عندهم بس بعدين شافت هلبا حاجات خلتها تكرهم💔
التصنع الزايد يلي هما فيه !!!
كرها لي حسام بسبب تصرفاته المقززه في الحوش
فهمت انه مش راجل وعايش ع حساب بوه وامه في كل شي
كل ما تكتشف فيه شي تنصدم انها كانت معجبه بيه ويزيد ميولها لي ارسولان
رغم انه مش فارس احلامها ابدا !
ميلبسش في ماركات ولا عنده افخم السيارات ولا شركه راقيه ولا ڤيلات!
انسان بسيط وجدي واعر بطبعه وديمه متمرد في خدمته !
بس في شي جديد اكتشفاته وعجبها!

رؤى طول اليومين هادم تستدرج في سلفاتها وتفهم في سلوك نجمه قبل ما تموت
بدت تسمع كويس لي ناجيه لما تحكي على نجمه عشان تعرف تقلدها
خشت غرفة نجمه وقلبت في البوم صورها عشان تركز في الطرق المعتاده لي تسريحات شعرها وتركز كيف كانت طريقة لبسها
كيف كانت تتعامل شنو كانت ادير في الحوش هواياتها طرق تعاملها مع رعد كل شي حاولت تحفضه ونجحت في الشي هاذا !
اول طرق دارتهم خدت كم قطعه من حوايج نجمه صورتهم
وكلفت امها تشري قماشات وتبعتهم للخياطه وبعتت صور الحوايج بعد ما بعتت مقاساتها عشان تخيطلها زيهم بزبط
متقدرش تسرقهم من دولاب نجمه وتفضح خطتها

🔥رِوَايـــــــــات بـــَـنـُـــووتِـــة الشـِــيـــْـخ🔥
🔥أروى الــــطـــاهــــر المــســلاتــــي🔥

الساعه10الصبح :-

في وسط الساحه كانو البنات الاربعه مقعمزين ع الارض وماريا تحكيلهم بكل احاسيسها وكلهم منسجمين معاها

هبه:انتي متأكده البدله يلي ريتيها عنده مش متع اخته رؤى؟
موده:اي صح لانه اخته الفتره يلي فاتت عرسها يعني من مده بسيطه
ماريا:لا
لا ورررربي ما متع اخته وانا متأكده بدات الشق يلي في القميص كأنه رصاصه او خنجر
جنان:خنجر شنو تسحاب روحها في باب الحاره
عادي الموضوع مرات العروسه متعرفش تمشي بي الكعب وطاحت تفشخو سنونها
ماريا:حد فيكم يقيم الكناسه الناطقه هادي من قدامي
هبه:ياربي ميقعدوش5دقايق بدون ما يتعاركو
موده:وهيا سارحه .....ذبله!
بعدين شفتي سوارات
بعدين بدلة بودري تامه وقميص فيه دم
وطول النهار مهناش ويروح في الليل
بالك حبيبته بتتزوج خطفها يوم الحمام وتزوجها بسر ويروح في الليل
هبه:لا معتقدش بس اكيد مزال في دليل في السياره ماريا مركزتش فيه
حسب رائي كل شي موجود في السياره
ماريا:وكيف بنعرف!!
جنان:فتحت عصير مرش تشرب .....وانتي شنو دخلك خلي الراجل في حاله يصلح سيارته 24ساعه قريب يفتح ورشه
ماريا:تجاهلت جنان وركزت مع موده وهبه....شنو ندير؟
هبه:استعدت بتحكي بس قاطعتهم بنت من فصل جنبهم جايه هيا وصاحباتها

حنين::فطووو
فاطمه:وي ياقلبي
حنين:لو تشوفي من لقيت امس في المتوكل
فاطمه:بتعابير وجه مندهشه......منو ياروحي ؟
حنين:موده ....يلي صارعه راسنا بي الماركات لقيتها غادي بتهبل ع التخفيضات زي الكلبه
موده:توترت....كدابه
جنان:وانتي شنو اديري في المتوكل؟تبيعي في مقروض ولا تنشفي في الارضيه
حنين:انتي بدات يلي شعرك تقول شاخ عليه كلب عربي اضمي فمك صوتك منبيش نسمعه خير منطلع عارك زيها
جنان:ضحكت بصدمه.....ممكن نفهم منو!
ماريا:شافت لي حنين من فوق لعند لوطه....منو ميعرفهاش هاذي فضيحة المدرسه كل واحد جايبتله فضيحه مشهدره بيه
جنان:وقفت وفي يدها عصير المرش .....امالا خلي المدرسه تتفرج لايڤ عليها ويلي يقرب اقسم بالله بننطحه معاها

وبدت جنان في البنت 🤦🏻‍♀️
هبه كانت بتموووت من الخوف وتحاول تحز بينهم بس مش قادره اما ماريا وموده مستمتعين بي المنضر ويبتسمو بي فخر
تلقطو بنات المدرسه عليهم يشجعو ويصيحو ويضحكو لين فجآه شافو الدم ع الارض وعم الهدوء
بدرجة اطيح اليبرا ينسمع صوتها!!..

______________________________________

رؤى:درت نفس تسريحت شعرها
كعكه فوق وقصيت القصه حفاري زيها بزبط
لبست القفطان الاسود يلي وصلني من الخياطه
ونزلت للغدي
قعمزت معاهم بهدوء بديت ناكل وانا نلمح في تعابير الصدمه على وجوهم لين فجآه نقلبت السفره بيلي فيها .....

يُتبع ..

لقراءة الفصل التالي : اضغط هنا 
reaction:

تعليقات

تعليق واحد
إرسال تعليق

إرسال تعليق