رواية لقيط الفصل الخامس 5 مصطفى مجدي
رواية لقيط الجزء الخامس
 |
| رواية لقيط الفصل الخامس 5 مصطفى مجدي |
رواية لقيط البارت الخامس
الفيديوهات اللى شافتها كريمة واللى سببتلها الاغماء كانت عبارة عن فيديوهات ليها مع اصحابه ، ولما فاقت من الاغماء ، كان حواليها زمايلها من ادارة الدار وبيحاولوا يساعدوها ، فتحت عينها وبدأت تدور على تليفونها زى المجنونة قبل مايقع فى ايد حد من زمايلها وتتفضح ، خدت الموبايل فى حضنها وجابولها مياه واول ماقعدت التليفون بتاعها رن ، وشها بان عليه الغضب الشديد ، وخدت ركن لوحدها وبدات تتكلم مع سعد اللى اول مافتحت قالها:
= اعتقد دلوقتى تقدرى تفكرى فى موضوع القضايا اللى عايزة ترفعيها ، يعنى ولا نفقة ولا متعة ولاطلاق ، كل اللى هتعمليه انك هتخرسى خالص وهتنفذى كل اللى اقولك عليه وتعيشي تحت رجلى زى الجذمة اللى انا بلبسها
يادوب قدرت تاخد نفسها وردت عليه وقالتله:
.. هو انت ايه يااخى متعرفش ربنا ، انت مخلوق من ايه ؟! ، ازاى تقبل على نفسك كده ؟!!!! مش هقولك عليا علشان انت معندكش نخوة ، لكن ازاى تخلى اصحابك يعملوا معايا كده وتقف تصورنى كمان!!!!! ، انا مش مصدقة منك لله
= لا ماهو انا قولت بقى اضرب عصفورين بحجر واحد ، منها انى امسك عليكى زلة واشيل فكرة القضايا اللى ناوية ترفعيها دى من دماغك ومنها اخلص من ايصالات الامانة اللى عليا لاصحابي اللى صورتهم معاكى
.. يعنى بتبيع مراتك بايصالات امانة ، انت مش قُرنى بس ، انت اكتر من كده بكتير ، انت غلبت القوادين ، انت المفروض بالفكرة دى تشتغل مع الشياطين
= لا متظلمنيش الفكرة دى مش بتاعتى ، الفكرة دى بتاعت نيرمين ، البت طلعت بنت جنية بصحيح ، عموما علشان رصيدى قرب يخلص وانا مش فاضى للرغى بتاعك انا محتاج 500 جنيه تتشقلبي وتجيبيهملى ومن هنا ورايح اى حاجة هطلبها منك تبقى مجابة يااما والله هنزل فيديوهاتك وهرفع عليكي قضية وهحبسك وهشهر بيكي ومش هخليكي تعرفى تعيشي من الاساس
قفلت المكالمة مع سعد وقعدت طلطم على وشها ، وانا قعدت ابص عليها من بعيد وكنت مبسوط اوى انى شايفها متضايقة وبتولع من جواها ، وفى وسط ماهي بتعيط جالها حبيب القلب الجديد طارق وقعد يواسيها ، بصتله باهتمام وقالتله :
= انا محتاجة اتكلم مع حد وانا خسرت كتير ومش هقدر اخبي عليك موضوع زي ده
وهي بتتكلم معاه وبتحكيله على اللى حصل ، لا وكمان وريته الفيديوهات ، كان باين على وشه انه متأثر لكن اول مااداها ضهروا ومشي ، مكنش باين عليه انه مصدوم ولا حاجة ، يعنى لو اى راجل فاهم بص على شكله هيعرف على طول ان طارق واخد كريمة علشان ياخد منها غرضه ويرميها مش اكتر من كده وانها ولا تفرق معاه بجنيه.
فى نفس اليوم ده ، كانت العيال متجمعة حوالين ابن كريمة الصغير وبتلعب معاه وانا لما لقيت نفسي لوحدى ، قولت اروح العب معاهم ، العيال كلها كانت بتلعب وهي قاعدة قدامنا ، اول مادخلت وسطهم ، واحد من العيال قرص ابنها وقعد يعيط جامد ، جريت عليه زى المجنونة وسألته :
= بتعيط ليه ياحمزة ؟ مين اللى ضربك
رد عليها بنبرة الاطفال
.. فيه حد قرصنى جامد من رجلى
بصت على العيال اللى حواليه وبمجرد مالمحتنى ، شدتنى من ايدى جامد وجرتنى على اوضة العقاب وقعدت تقرص فى جسمى كله وانا عمال اصوت واترجاها واحلفلها ان مش انا اللى قرصته وانى معملتش حاجة ، لحد ماجسمى كله ازرق من الدم اللى اتحبس مكان القرص بتاعها ، كانت بتضربنى وبتقرصنى بغل شديد جدًا وكأنها بتطلع طاقتها فيا، لدرجة ان من كتر الضرب اغمى عليا .
اتخضت اول ماشافت منظرى وانا مرمى على الارض من كتر الضرب بتاعها وجسمي كلها مزرق ، رشت على وشى مياه وقعدت تفوق فيا واول مافوقت اتنهدت وكأنها ارتاحت ان محصليش حاجة وانها مش هتروح فى داهية وقالتلى:
= زى القطط بسبع ارواح ، ياريتك مت وغورت فى داهية وريحتنا من قرفك
مشيت وسابتنى مرمى على الارض وخبطتنى برجلها وهي خارجة وتفت على وشى وخرجت .
من اليوم ده قررت انى اتعزل عن الناس كلها واعيش سنين طويلة متتعدش عندى فوبيا انى اتكلم مع حد او اتعامل مع حد.
كريمة رجعت البيت لسعد وبقت عايشة خدامه لنيرمين وابنها ولجوزها وبرضو فضلت مكملة فى علاقتها مع طارق ، اول مارجعت البيت وبعد كام يوم من التأديب وكأنهم بيدفعوها تمن فكرة انها تطلب الطلاق ، بدأت نيرمين تغير من طريقتها وتحاول انها تقرب من كريمة وفى قاعدة رايقة قالتلها
= ماتيجي تشتغلى معايا بعد ماتخلصى شغلك اهو يدخلنا قرشين زيادة وبالمرة سعد يهدى عليكي شوية
.. عايزانى الاغى الرجالة فى التليفون !
= اه يااختى تلاغيهم فى التليفون ولو حكمت تلاغيهم فى الحقيقة كمان ، يابت الفلوس هي اللى هتقويكي وهتخلى كله يعملك حسابك وبعدين اديكي مشيتى جنب الحيط ، تقدرى تقوليلي خدتى ايه غير الاهانة ؟!
سكتت كريمة شوية وكأنها بتستوعب كلام نيرمين ، اللى بكل طيبة وحنية طبطبت على صدرها وقالتلها :
= يااختى عندك امكانيات جامدة اوى تأكلك الشهد ، جسمك حلو وصوتك حلو ، استغلى بقى كل ده وانتى صغيرة كده بدل ماكل ده يروح منك بعد كام سنة وتعيشي وتموتى فى الفقر
.. بس ده حرام وانا مش هقدر اعمل كده
= واللى انتى فيه ده مش حرام وبعدين انتى فاكرة انك لو مشيتى جنب الحيط العمر كله الفيديوهات دى مش هتظهر؟ ، الفيديوهات اللى مع سعد مجرد مايتخنق منك ومع اول حناقة هيطلعها وينزلها ويحبسك وفضيحتك هتبقى بجلاجل وهتموتى بحسرتك وبفقرك
.. يعنى اعمل ايه؟؟؟
= جربي مش هتخسري حاجة ، ابدايها معايا فى التليفون ولو عجبك الحوار كملى براحتك
قامت نيرمين وكانت عملت اللى عليها ودخلت فكرة الشيطان فى دماغ كريمة ومش بس كده ، ده سعد كمان معاملته اتغيرت معاها وكانه بيديها اشارة انها تطاوع نيرمين فى اللى بتقوله وتمشى فى الطريق الحرام اللى فى نظرهم هيأكلهم الشهد وفى نظر الناس كلها هيأكلهم النار.
كريمة مكنتش تعرف ان بدايتها فى الموضوع ده هتكون نهايتها فيه برضو ....
انتهت الحلقة الخامسة من لقيط والحلقة الجاية هنتابعها مع بعض ، ولو عجبتك متنساش اللايك والشير علشان دعمك بيفرق معانا وبيخلينا نكمل
يُتبع ..
لقراءة الفصل التالي : اضغط هنا