القائمة الرئيسية

الصفحات

رواية عائلات راقيه بفسادها الفصل الخامس 5 بقلم اروى طاهر المسلاتي

 رواية عائلات راقيه بفسادها الفصل الخامس 5 بقلم اروى طاهر المسلاتي

رواية عائلات راقيه بفسادها الجزء الخامس

رواية عائلات راقيه بفسادها الفصل الخامس 5 بقلم اروى طاهر المسلاتي


رواية عائلات راقيه بفسادها البارت الخامس

المديره:هاذا اسمه استهتاااااار بنت اطيح في الحمام وتنزف وانتي السبب ومتجيش تبلغي عليها ؟
ماريا:شابكه يديها في بعض بخوف ....اءء انا اءء
المديره:بي انفعال....انتي شنوووو؟!
خدت نفس عميق...انا ميهمنيش انتي بنت منو وهيا بنت منو هنايا
مفيش فرق زي ما انتي تدفعي هيا تدفع ويلي صار لازم تتحاسبي عليه
ماريا:لا لالا...انا كنت نبصر عليها لا اكتر
بس لما طاحت وشفت الدم خفت قريب متت وطلعت نجري كنت نبي نشوف حد يساعد بس
المديره:بنبرة شك....تبصري عليها!؟
ماريا:اي..... وفنصت عيونها في هبه.....كنا نبصرو هبه صح؟!
هبه:مقعمزه وحاطه يدها على الجرح يلي في راسها وسوريتها البيضه كلها دمم....مردتش وواضح من عيونها انها متنرفزه 🔥
ماريا:ابتسمت بخوف....هبه جاوبي المديره مش كنت نبصر عليك وطحتي بلغلط؟
هبه؛جت بتتكلم وتنكر بس قاطعهم صوت خش بدون استئذان
امير:عيونه في هبه....السلام عليكم
المديره:وقفت وملامح الخوف غطت وجها ....اهلين استاد تفضل
امير:يشوف لي هبه....شن صاير؟
المديره:علمي علمك والله....قاعده نحاول نفهم شنو قاعد يصير بين الطالبه يلي تجي معاكم واختك
امير:شاف لي ماريابغضب....نحلوها في الحوش ان شاء الله
وغير عيونه لي هبه من جديد....نوضي نشوفو وضع الجرح في المشفى
هبه:لاااالا...انا كويسه واي ماريا كانت تبصر بس انتي عارفه يا ابله ماريا يدها ثقيله شوي
المديره:قامت حواجبها مصدومه في كلام هبه!
امير:تبصر عليك ولا متعمده تحركي قدامي للمصحه
المديره:اي سلم بنتي لازم يشوفو الجرح لانه شكله عميق....وانتي ماريا تحركي لي الساحه لين يرجع خوك جرس الاستراحه ضرب
ماريا:طلعت بخطوات بطيئه وهيا تشوف لي هبه وتترجى فيها بعيونها انها تسكت
امير:مسك شنطة وشاف لي هبه...هيا وقت
هبه:طلعت وهيا ماسكه الشاش الابيض ع راسها وقريب تموت لما تذكر انها بتركب مع امير بروحها 🤦🏻‍♀️

ماريا:هبه ....اسفه ع يلي صار تهورت ومنعرفش كيف طحتي وهكي الله يخليك متحكيش لي امير يقتلني
قبل ما تلحق هبه ترد فات من جنبهم امير ع السياره
ركبت هبه لي السياره وزي العاده نضرات بنات المدرسه كلها عليهم

_______________________________________

حسنه:تفضل ياغالي هي
جلال:ابتسم براحه وخدي منها كوب الشاهي
حسنه:رؤى رؤى
رؤى:تردد في المسج بصوت واطي
رعد: (في حد في حياتك!؟)
حسنه:رؤى وين سارحه ساعه انادي فيك؟
رؤى:سرحت شويه نعم
حسنه:شن قال الدكتور؟
رؤى:الحمد الله كويسه والجبس ياخد وقته ويتنحى
حسنه:به الحمد الله
ارسولان:السلام عليكم
جلال:وعليكم السلام ....تعال اشرب معانا شاهي
ارسولان:صحتين ....تاعب شويه بنرتاح
جلال؛وين كنت؟
ارسولان:سكت شويه ...عرس
رؤى:ركزت على جيب ارسولان كان فيه قطعه شويه من الردي البودري ...استغربت !
جلال:ابتسم...هوا في حد يروح من العرس تاعب ؟
ارسولان:بدون اي ملامح على وجها....عن اذنكم
وخش لي داره
جلال:عقد حواجبه...شن القصه؟خيره الولد؟
حسنه:جو الحوش جديد عليه خليه براحته ❤️
جلال:خدي رشفه من الشاهي...نسأل الله السلامه

__________________________________

ليلى:رقيه رقيييييه
رقيه:نعم مدام
ليلى:بخري الحوش تربحي
رقيه:عقدت حواجبها....انتي بخير ؟
ليلى:تنهدت...ماني عارفه والله
المهم بخري الحوش وافتحي قرآن
رقيه:حاضر
ليلى:اسلام وين؟
رقيه:طلع من الصبح بعد امير على طول
ليلى:بصوت واطي.....معاد يقعد حد في ها الحوش

سرور:امالا انا ووين ؟؟
ليلى:وقفت وهيا مبتسمه.....نورتي حبيبتي
سرور:حضنتها وتحكي بدلع....وينك ياعسوله ليك شهر غايبه على الجمعات يلي نديرو فيها
ليلى:قعمزت ع الصالون ....نمر بي حالة اكتئاب حاسه نفسي
سرور:عقدت حواجبها.....واضح من شكلك
وين الاناقه والدلع يلي تعودنا عليه ؟؟
حطت يدها ع فمها....عندك كم خصله شيب وحواجبك مش مرتبات لالالا جديات في شي
صارحيني في شي بينك وبين احسان ولا صغارك!؟
ليلى:لا الحمد الله مفي شي لكن نحس في روحي مضايقه ويتهيألي حاجات غريبه !
سرور:لا عاااااد بطلي الكلام البايخ هاذا وفكينا من المود المعكر ....نوضي البسي جيتك بسيارتي الجديده خلي نتغدو برا ونديرو جو
ليلى:معنديش نيه مخاطريش
سرور:لاا وربي ميصير هكي نوضي البسي نراجي فيك ....هيااااا متشوفيليش هكي
ليلى:تنهدت وهيا مضايقه وناضت
سرور:ابتسمت بنصر واتكت ع الكرسي

_________________________________

هبه:طول الطريق سكوت تام!....نراقب في حركاته
مكانش يدير في شي غير انه يسوق وهادي جدا
نخلعت لما قرب يده قدامي وفتح الدرج طلع كلينكس ومدهولي
امير:خودي امسحي بيه بدل يلي حاطتيه ع راسك
هبه:خدت منه الكنينكس بدون حرف

امير:على شنو تعاركتو المره هادي؟!
هبه:بلعت ريقها....متعاركناش
بصاره عاديه ورجلي زلقت جيت طايحه وبس
امير:وقف ع الاشاره الضوئيه ....
هبه:وجهت راسها جيهت الروشن ومبين ان ملامحها طبيعيه .....ووكك عليا قلبي بيطلع ياريتني ما قعمزت القدام ...غبيه غبيه غيبه
امير:بعدي على الروشن وقربي مني
هبه:شبحتله مصدومه😳....نعم؟!
امير:خوفتي الصغار يحسابوك زومبي بعدي من ع الروشن ......واشر بعيونه
هبه:شافت لي البيبي يلي في السياره يلي جنبهم يبكي ويقول لي امه دممم يا ماما ميته البنت.....تنهدت هبه ونزلت كرسيها لين بدت كأنها راقده
امير:شافلها بطرف عين
هبه:من البدايه قتلك انا كويسه مفيش داعي نطلع للمصحه وحتى بابا ميعلمش بيا !
امير:حرك سيارته بعد ما عطت الاشاره خضراء ....حاجه فيها صحتك بوك مش رح يعارض
هبه:رجعت قامت كرسيها ولما تساوي في روحها شافت بطاقه شخصيه طايحه بين رجليها
قامتها ويلي لمحاته في البطاقه صورة بنت
قبل ما تلحق تقرا بيانات خطفها من بين يديها
امير:معش تمسي حاجات مش ليك
هبه:مكانش قصدي
امير:كمل سواقته بدون كلام وهبه نفس الشي ساكته

_____________________________________

طق طق طق طق

رحمه:لبست توب التوته بسرعه ....تفضل
هناء:خيرك منزلتيش تغديتي؟
رحمه:مخاطريش امي تعرفيني منتغداش
هناء:سكتت وهيا تركز في بنتها بنضرات مهتمه
رحمه:تحاول تخفي وجها ....خيرك ؟
هناء:انتي يلي خيرك؟شنو الكدمه هاذي يلي في وجهك!
رحمه:حطت يدها ع فمها....ااه هاذي خبطتني سمر صاحبتي اليوم بدون قصد من بكري تتأسف مسكينه
هناء:رحمه وضعك مش عاجبني
عارفتيني انا ام والام تحس بي بنتها
رحمه:تنهدت بي ملل.....وااااك يا ماما وربي مفي حاجه خيرك عليا انتي !!
يلي في وجهي حادث بسيط ومشي لي حاله خلاص
هناء:تمام اهم حاجه انك بخير
رحمه:اطمني بخير ☺️
هناء:طلعت من الدار بس لما وصلت لعند الباب وقفت ورجعت تلفتت لي بنتها....رحمه
رحمه:نعم
هناء:كان الخطوبه هادي مش مرتاحه فيها قولي وتتفركس بكرا
رحمه:بخوف.....لالالا بلعكس مرتاحه الحمد الله
امير كويس هوا صح يبان هكي صعب ومتعجرف
بس قلبه طيبه
هناء:خدت نفس عميق....تمام
حكيت هكي لان كل شي يتصلح قبل البيان
والبيان معش مزال عليه شي
رحمه:ارتسمت على وجها ابتسامه صفراء....صدقيني مرتاحه وهلبا
هناء:ربي يريحك❤️

🔥رِوَايـــــــــات بـــَـنـُـــووتِـــة الشـِــيـــْـخ🔥
🔥أروى الــــطـــاهــــر المــســلاتــــي🔥

موده:بصوت واطي ....ماتت ولاتشوهت
ماريا:شنو الاجرام يلي انتي فيه جرحه بسيطه على خليقتها هيا حساسه
موده:وين هيا توا!؟
الابله:موده وماريا انتبهو
ماريا:بصوت واطي.....المديره اتصلت بي امير رفعها
موده:تبصررررري ....وين؟
ماريا:وين بيكون يعني !...اكيد للمصحه بيخيطها ولا منعرفش شنو بيديرلها الخريه هيا
موده:وهكي خليتيه عادي 😳
ماريا:قامت حاجبها....يلي في راسك طلعيه سلم بنتي امير بيانه قريب والعرس مستعجلين بيه
وميهمنيش يرفعها ولا يسخطها المهم تسكر فمها متحكي شي وامير ميشبحلهاش الشكلات هادي
موده:وجها تغير الوانه.....مكانش قصدي شي خيرك انتي امير زي خوي
ماريا:الكلمه هاذي قنعي بيها روحك مش انا
موده:اليوم يلي متجيكش فيه المشاكل من تحت راسها منبداش اسمي موده
ماريا:فكيني ترااا
الابله:ماريااااااا ويلي في جنبها اخر مره ندوي
ماريا:اسفه يا ابله ....وربعت يديها وقلبت عيونها بملل

____________________________________

رؤى:كيف!!
رعد:بصوت متوتر...منفهمينيش غلط ولا شي
بس كان غرضي فطور بسيط برا
نحكو فيه ع كم حاجه وهكي ولو تبي جيبي معاك بنتك
رؤى:واقفه وهيا مش مصدقه يلي تسمع فيه
كأنه يعزم فيها ع فطور !؟؟
اسلوبه بدي حلو معاها!❤️
رعد:الو؟؟
رؤى:اها معاك....تمام عادي بس وين ؟
رعد:ابتسم...حلوه
في مكان عام اكيد نعرف قهوا اطلالتها ع البحر حاجه قنينه نمر عليك ناخدك؟!
رؤى:ضحكت....وين تمر عليا تسحابنا في اروبا😂💔
رعد:ضحك....اسف نسيت روحي
رؤى:بكرا بنطلع للخدمه بناخد اذن عشان نمدد الاجازه وهكي
لو تحب بعد ما نكمل نطلعو
رعد:تمام حلو بكل ❤️
رؤى:بلعت ريقها.....اممم ...اوكي
رعد:شن اسم بنتك؟
رؤى:بيسان❤️.....
رعد:عاشت الاسامي
رؤى:تعيش وتسمي ربي يخليك
رعد:خدي نفس.....تمام نتلاقو بكرا
رؤى:ان شاء الله ❤️
رعد:سلام
رؤى:سكرت الخط وحطت يديها على فمها مش مصدقه!
كأنه عزمها بطريقه حلوه. ؟؟؟؟
طلعت من الدار وهيا تعكز ع رجلها وتنادي....ماااما
مااااما؟؟

بس مكانش فيه رد !
قربت ع غرفة ارسولان وهيا تسمع في صوت كأنه حد يطق ببطئ على الحيط ....طق .....طق ...طق
قربت رؤى عينها على فتحة الباب ويلي شفاته كان غريب !
كان ارسولان واقف قدام الحيط ويخبط في راسه عليه ببطق !
ميتكلمش ولا يدير في اي شي غير ان يضرب في راسه ع الحيط يبعد شويه ويعاود نفس الشي
حسنه:مش عيب تتجسسي ع خوك؟
رؤى:نقزت في مكانها بخوف .....اءءء لا مش قصدي
حسنه:خليه في حاله انتي وبوك
رؤى:بس هوا ي......
حسنه:خلييييه محتاج يرتاح شويه مليشي يومين بس مروح
رؤى:خدت نفس.....به تمام
حسنه:تعالي نقيلي العدس سلم بنتي بندير العشي
رؤى:حاضر🤦🏻‍♀️

_________________________________

هبه:فتحت باب السياره وركبت
امير:حط كيسة الدواء قدامها ....امشي على تعليمات الدكتور اعتقد انك سمعتيها
هبه:اي عارفه ....نزلت الشمسيه متع السياره عشان تشوف شكلها في المرايا
واول مانزلتها طاحت ع رجليها ورقه مسكتها بيدها وزي العاده خطفها من يدها امير
هبه:كان تحليل حمل ....وربي تحليل حمل وانا متأكده !
ماما دراته مرتين قدامي الورقه والتحليل هاذا حافضاته كويس!!.....شن المخلوق هاذا ياربي مره بطاقة بنت وتوا تحليل !
نهار اسود شكله واحد وسخ شن ركبني معاه لو يعرف بابا بسسسس🤦🏻‍♀️🤦🏻‍♀️
امير:خدي الورقه حطها تحت الكرسي
اما هبه تعاملت مع الموقف عادي جدا وبدت تشوف في اللصقه يلي ع راسها
وقف امير السياره وفتح الباب
امير:نازل للقهوا شويه وجاي
هبه:هزت براسها.....ممكن بسرعه لان بنروح منبيش نعطل اكتر من هكي !
امير:تتأمري كأنك؟
هبه:من حقي مدام اختك يلي كانت السبب
امير:قام حاجبه
هبه:قامت حاجبها حتى هيا وعطاته نضره بمعنى اي يلي سمعته
امير:شويه وجاي .....ونزل وسكر الباب
هبه:كان الفضول قاتلني ....مديت يدي تحت الكرسي بناخد الورقه نبي نشوف الاسم
خليت راسي فوق عشان نراقبه وهوا يخلص ويدي ادور تحت الكرسي بس موصلتش فيها
فتحت درج السياره نبي نشوف بطاقة اسم البنت وملقيتهاش
وقريب متت لما شفته راجع من بعيد وووه عليا💔
رجعت طبيعيه وانا متحشمه من روحي ....شن دخلي فيه وعلاش ندور !!
غلط مفروض ما نخشش في مواضيع زي هاذي ونتبع حاجات خاصه ملياش فيها دخل مهما كان فضولي كبير

امير:فتح الباب وركب
مد لي هبه عصير طبيعي
هبه:شنو هاذا؟
امير:معطر جو ....واضح يعني عصير
هبه:ضحكت....عارفه بس ليش
امير:سكر الباب وحط القهوا جنبه....نقصتي دم عوضي شويه
هبه:شكرا بس انا عندي السكر ومحافضه
امير:نعلم....هاذا عصير طبيعي ومفيشي ذرة سكر
هبه:تعلم؟....من وين؟
امير:بوك نبهني
هبه:سكتت وخدت رشفه من العصير .....حاس انك مدين ليا بسبب يلي دراته اختك صح!
امير:ابتسم ع جنب ....مش صح للاسف
هبه:لا حسيتك هكي .....لو تبي اديرلي شي مقابل يلي دراته اختك عندي طلب
امير:جت في باله الف طلب وطلب بس سألها اخيرا .......يلي هوا! ؟
هبه:كلم بابا واعتذر منه انك معش تقدر توصلني
امير:علاش!؟...شنو يلي مضايقك!
هبه:كلام البنات والجو الزايد في المدرسه خصوصا ان مفيش بينا صلة قرابه
امير:زاد السرعه وهوا يشوف لي الساعه وعيونه ع الطريق ....فاهم كويس الطروحات يلي اديري فيها باش تلفتي الانتباه ونشوفوك مختلفه عليهم
يلي كل وحده تتمنى تكون مكانك وتركب في المكان هاذا
هبه:ضحكت بصدمه.....علاش راكبه مع حد من الصحابه ولا المبشرين بي الجنه وانا منعلمش ؟!
امير:درس السياره في نص الساحه ....راكبه مع امير
هبه:حاجه والله كبيره....ونزلت قربعت الباب وركبت من الخلف

ماريا:ركبت في السياره وهيا تساوي في وشاحها....كيف حالك هبه؟
شن صار فيك
هبه:بدون نفس....بخير احسن
ماريا:الحمد الله ...كنت عارفه خوي حبيبي بيدير بالك عليك
طيب وحنين ويعرف يتصرف
امير:عيونه ع الطريق .....متاخدينيش بي الكلام حسابك في الحوش
ماريا:بلعت ريقها بخوف
هبه:استمرت تشرب في العصير ومره مره تجي عينها في عين امير في المرايا !

_______________________________

سرور:قعمزت ع الصالون بتعب ....مش قتلك جوك بيتغير ؟
شوفي كيف حتى وجهك جري فيه الدم
ليلى:الحمد الله
سرور:بيان ولدك الغزال امتى!؟
ليلى:تنحي في وشاحها ....الخميس كان سخر ربي
كل شي واتي ليا شهرين واخدتهم ومسخرش ربي
سرور:ربي يتمم عليك
ليلى:يارب.....رقييييه رقييييييه
رقيه:طلعت من المطبخ تجري ....نعم مدام
ليلى:ديريلي فنجان قهوا انا وصاحبتي نعدلو راسنا وبخري الحوش
رقيه:ان شاء الله وابتسمت لي سرور ...ورجعت للمطبخ
سرور:بملامح مصدومه ....جديات انتي؟؟
ليلى:تمروح ع روحها....خيرك بسم الله
سرور:تقوليلي رقيه ورقيه نسحابها مرا كبيره في السن طلعت فرخه
ليلى:لكن فالحه تعجبك لو تبيها يوم كلميني تنكتلك الحوش وخلصيها الله يبارك خدمتها
سرور:انتي مش خايفه على ولادك؟....
ليلى:حرام عليك البنت ع قد حالها وتخدم من الحاجه
سرور:ياستي مش خايفه عليها هيا؟؟....البنت صغيره وانتي عندك زوز ولاد والشطان شاطر
ليلى:ريحيني من الكلام الفاضي يشوفو فيها زي اختهم وهيا نيه شويه مسكينه
سرور:مهم ركزي ع حجابها بس
ليلى:كويسه ولبسها مستور كنهادا منخليهاش

🔥رِوَايـــــــــات بـــَـنـُـــووتِـــة الشـِــيـــْـخ🔥
🔥أروى الــــطـــاهــــر المــســلاتــــي🔥

في هلبا حاجات نشوفو فيها في حياتنا منقدروش نحكمو عليها في البدايه!

زي مثلا منقدروش نحكمو على تصرف ارسولان الغريب!....لان المكان يلي كان فيه بروحه يمرض !

ولا نقدرو نحكمو على ماريا وتصرفاتها لانها طول عمرها عايشه في دلال ومتسمعش في كلمة لا!

منقدروش نحكمو ع تصرفات هبه لان الدنيا علمتها الصبر رغم صغر سنها بس ياترى لعند امتى بتقعد رزينه وعاقله هكي !؟

ومنقدروش نحكمو على تصرف رعد يلي انقلب فجآه من وقاحه وقلة ذوق لي كلام حلو واسلوب خيالي ❤️

ولا نقدرو نحكمو ع ناس ونقولو هاذا يحبلنا الخير وهاذا يكرهنا!
مرات يلي بينك وبينه عداوة يقعد اقرب شخص ليك بعد وقت ❤️
ويلي روحك فيه يطعنك💔

_________________________________________

الابله:وبما ان مشروع الاحياء بيندار في المعمل الكبير بنقسمكم مجموعات كل 4مع بعض تمام ؟
البنات الموجودات في الفصل بصوت متحمس ....تمام
بدت الابله تسمي في المجموعات
هبه:مفهمتش علاش كلهم تحمسو وبدو يحكو بصوت واطي

موده:ابتسمت بخبث اخيرااا بنمشو للمعمل
ماريا:بنفس الابتسامه ....بيدا جو الطلوع والهياجه
موده:اسمعي اول حصتين نحضروهم ....والباقي هياجه من مطعم لمطعم وووه مش قادره نصبر

هبه:فاهمه شي؟
جنان:فاتحين كورس مجاني في الجامعه ...البنات ع اساس يحضرو وهما يطلعو يهيجو يلي جايبه صاحبها ويلي الله اعلم وين تمشي وماشيه الدنيا
هبه:قامت حواجبها بذهول....مقوى قلبهم
جنان:حطت رجليها ع المقعد وتلعب بي عود الاسنان في فمها....امورهم

موده:الخريه يلي تالي معزومه اليوم ع بيان امير؟
ماريا:طبعا بابا يفوت عليهم حاجه؟🤦🏻‍♀️
موده:قلبت عيونها ....بارده

قاطع هدرزتهم صوت الابله وهيا تقول ...واخر مجموعه موده وماريا
ماريا:يسسسس...وضربت يد موده بفرح❤️
الابله:ومعاهم جنان وهبه
موده:مستحيييييييييل
هبه:لااااااا
ماريا:تبصرررررري
الابله:سكرت الاوراق يلي قدامها....بدون مناقشه ولا اعتراض وهي اطلعو الجرس ضرب وجنان الف مره نزلي رجليك من المقعد وقعمزي زي البنات بطلي تقعميز الشباب متع القهواي

ماريا وموده تلفتو مع بعض لي هبه وجنان
جنان:وتو روحكم ...يابنمتعكم تمتيع 😂😂
ماريا:وقحه...وناضت طالعه من الفصل متنرفزه
وموده لحقتها بسرعه
هبه:نزلت راسها ع المقعد....اهلا بي المشاكل
جنان:ساكته وعلى وجها ابتسامه

______________________________________

رؤى:فاتحه الدولاب وتختار من بين قفاطينها وتحكي ع الفون ....لا رعد وربي منقدر
الاسبوع هاذا كله طلعات معاك لو خوي عرف يعدمني
رعد:حسستيني ان تطلعي معاي تي انا نجيك قعدت نلود في الجرادين تقول الخروف
رؤى:ضحكت....حاشاك بس خلاص ياسر
رعد:قبل عندي خدمه نبيك تساعديني فيها بس يالله ليا رب كريم
رؤى:ضحكت....والله؟؟؟حسيتك تعردت ع المساعده
شد حيلك واعتمد ع نفسك اصلا مش فاضيه اليوم عندي مناسبه
رعد:لوح البيتزا يلي ياكل فيها وعد تقعميزته في المكتب....معزومه على بيان امير انتي ؟
رؤى:اكيد جيرانهم كيف عاد
رعد:يمسح في فمه....نقدر نشوفك!؟
رؤى:توترت....اءء م كيف
رعد:الكيف هاذي خليها ليا
جايبلك شي ونبي نوريهولك ممكن!
رؤى:ابتسمت...تمام✅

_______________________________________

هبه:وصلت للحوش ولوحت الشنطه وللمطبخ طول
احلام:ضربتها ع يدها......اغسلي يديك قبل
هبه:افففف جعانه موت
احلام:من روح بيك؟
هبه:نحت وشاحها....بابا
روح بيا انا والبارده اخت البارد يلي بيانه اليوم لان حضرته مش فاضي
احلام:تحشمي معش تقولي عليهم هكي
هبه:فكيني منهم
احلام:ترتب في سفرة الغدي .....شنو بتلبسي اليوم؟
هبه:شافتلها ........تسحابيني بنمشي بي منضري هاذا !
احلام:وخيره منضرك ؟
هبه:من الشق يلي في راسي امالا؟
احلام:عادي حادث بسيط الشعر واللبسه الحلوه تغطي ❤️
هبه:مش عارف
احلام:امشي غيري جوك شويه ونشوفو عشاهم وحاجاتهم الحلوه
هبه:يصير خير

___________________________________

ماريا:نازله من الدروج تجري ....مااااما
ماااما
ليلى:طالعه من المطبخ وتحكي في التالفون ....نعم.
ماريا:الكندره السوداء متعي وين ؟!
ليلى:وين نعلم بيك.....وكملت كلامها في التالفون
ماريا:افففف يا ربي ....فتحت الباب وطلعت ادور في المخزن شافت ارسولان من بعيد واقف
منحي سوريته رابطها على يده ويرمم في النافوره القديمه بي الاسمنت
وقفت ماريا تتفرج عليه.....كان شكله ملفت!
كأنه طايح من احد الافلام الامريكيه
وكأنه بطل فيلم يخص الحروب ....هيئة جسمه ولحيته هكي تقول !
محستش بي نفسها ولا حست بي الوقت يلي خلاها توقف لمدة 20دقيقه تامه وهيا تراقب فيه
لين قاطعها صوت❤️

اسلام:انتي ياقرده شنو اديري هنايا ؟
ماريا:وكككك عليا نسحابك امير متتت
اسلام:قام حاجبه ....اشي الحقاره؟وانا مش خوك تخافي مني ؟
ماريا:تي انت عسل علاش بنخاف منك .....وبساته ع خده وهربت تجري
اسلام:واطيه شطانه

ليلى:الصبر يارررربي الصبر مفيش واحد يهنيني ع شي
ماريا:خيرك تعطي ؟
ليلى:انتي بدات اسكتي والهي في روحك منبيش نتعطل على الصاله تحركي البسي رقييييييه
وين رقيه ناديها من الصبح مريتهاش
ماريا:عيونها في تالفونها.....ريتها في دار امير
ليلى:دار امير ؟شنو ادير فيها
ماريا:وين نعلم

🔥رِوَايـــــــــات بـــَـنـُـــووتِـــة الشـِــيـــْـخ🔥
🔥أروى الــــطـــاهــــر المــســلاتــــي🔥

الساعه 8في الليل:-
قدام باب القاعه واقفه حسنه وبنتها❤️

حسنه:الله يبارك محلاك قداش ليا مشفتكش مساويه روحك هكي ❤️
رؤى:متبالغيش عاد😂❤️
كانت رؤى لابسه قفطان طول لونه رمادي ❤️
وقايمه شعرها لان كان طويل❤️
حسنه:قربت منها.....الحمد الله رجلك مكسوره والله كنهادا شاطوك بعين
رؤى:ضحكت.....وربي اضحكي كل شي عندك عين عين
حسنه:بيسو تعالي هنايا
رؤى:تعالي ماما نخشو هي

احلام:بصوت واطي ......ياسر عقدتيني انا ويلي مقعمزين في الطاوله
هبه:نرتب في شعري بالك نقدر نخفي اللصقه
احلام:بتجيبيلي الضغط انتي هني روحك اللصقه مش مأثره عليك
هبه:حاضر😒😒
احلام:شوفي فرخه ماريا محلا قفطانها
هبه:ركزت ع ماريا كانت لابسه قفطان وردي قصير شبه منفوخ وشعرها مفتوح
مكياجها خفيف وقايمه قصتها ❤️....ابتسمت هبه
هيا مسمومه بس جميله
احلام:مسحت على شعر بنتها ....جمالك حتى انتي ❤️
كانت هبه لابسه جيمسوت فضي وشعرها الاسود نازل على ضهرها ❤️
وشوية مكياج يحاول يخفي الضربه يلي ع راسها😂❤️

خشت رحمه بفستانها الازرق
واضح عليها التوتر ❤️....مكياجها سموكي وتسريحتها مفتوحه مع نقش حنه بسيطه على يدها
سلمت على كل المعازيم ...وكانت لقطه غريبه وحلوه منها
ركبت على الكوشه ودقايق وخش امير !
وقفت هبه وكان فضولها تشوفه❤️
وكان اسم على مسمى (أمير)....مش غريب عليه يكون متأنق لانه في العاده لبسه يجنن

خش بكل برود !
مفروض اي حد في مكانه يتأثر حتى شويه عشان الزحمه وانه خاش على قاعه معبيه بكبرها نساوين
بس مكانش على وجها ولا اي علامه!
لا ضحكه ولا فرحه ولا حتى حزن ❌
ركب ع الكوشه جنب رحمه وبدت العادات المعروفه
خفت الاضائه ورؤى اختفت من القاعه 🤭

__________________________________

رؤى:كيف قدرت تقنعهم يخلوك تخش 😂🤭
رعد:بلا ضحك سكري فمك ساد جايك من المطبخ زي المخانب
رؤى:😂😂😂😂هههههه
رعد:قتلك نبي نشوفك تطلعي بي عبايه؟🤦🏻‍♀️
رؤى:قفطاني عريان وعيب بطل
رعد:باهي يا ستي المهم شفتك ليا يومين عليك
رؤى:ع اساس يومين هلبا 😂
رعد:ابتسم....عندي انا اي
رؤى:اختفت ابتسامتها وتوترت
رعد:المهم هاذي ليك ❤️....ومدلها كيسه صغيره
رؤى:شن هاذي!
رعد:حاجه بسيطه شوفيها لما تروحي
رؤى:شكرا ليش متعب روحك
رعد:مهما ندير شويه بسببي رجلك تكري فيها لتوا
رؤى:ههههههه
رعد:رن تالفونه....هي نخليك توا ❤️
رؤى:دارتله بيدها 👋🏻👋🏻

تلفتت رؤى واختفت ابتسامتها لما شافت ليلى وراها💔
ليلى:حلو حلو
رؤى:سرعو دقات قلبها بخوف ....اءء ان اءء
ليلى:ولا كلمه ولا كلمه لاني مصدومه فيك !
بنت جلال العاقله الكبيره هكي
رؤى:بسرعه ما تعبو الدموع في عيونها ....لو سمحتي مدرت شي غلط!
ليلى:شن في راسك؟وشن كنتي متوقعه؟
انه يحبك مثلا؟؟؟؟
انتي عارفه يلي كان قدامك قعد مكتئب 7شهور ع مرته يلي توفت وهيا حامل؟؟؟
رؤى:😨

____________________________________

هبه:وقفنا نتفرجو كيف لبس فيها الذبله
وصفقنا مع المعازيم لما لبسوهم❤️
كان كل شي تمام لين فجآه منعرفش شن صار
جت عيني في عينه وكانت المصوره قدامه
نادت عليه تبيه يشوف للكميره وقعد مثبت عيونه عليا🤦🏻‍♀️
كلهم لاحضو وبدو المعازيم كلها يتلفتو يشوفولي
قلبي طاح متت....يتبع

قروب يجنن يا بنات ليبيين مغتربين مسابقات وحاجات جميله هي تعالو غادي بنختارو عشوائي من المنضمين جدد عشان يربحو معانا


يُتبع ..

لقراءة الفصل التالي : اضغط هنا 
reaction:

تعليقات

تعليقان (2)
إرسال تعليق

إرسال تعليق