القائمة الرئيسية

الصفحات

رواية كحل عرب الفصل السابع والأربعون 47 بقلم زينب ماجد

 رواية كحل عرب الفصل السابع والأربعون 47 بقلم زينب ماجد

رواية كحل عرب البارت السابع والأربعين 

رواية كحل عرب الفصل السابع والأربعون 47 بقلم زينب ماجد


رواية كحل عرب الجزء السابع والأربعون 

#كحل_عرب

((( زينب ماجد )))

الحلقة_ 47
(الرجوع الى بيت سلطان )

ويظل طرواك
نسمة بر.. لايرخص شرفها
ولاهي تتعـثــّر
يمن طرواك .. خاوه الجدم والمعبر
يمن طرواك.. خاوه الجرح والخنجر
(عريان السيد خلف )

كواغد: عمة انا اخافن عليك لا تتوهدن وياهم و ذول ناس لا حيا ولا مستحى ويتانون الزلة اعليكم .

- لا تخافين ام ستار .. الأريدنه منج يو اجو و نشدوج عن البت ، انصدمي و جنج ما تدرين باحد راح ياخذها .. صايحيهم واهجمي السلف اعليهم و اشهريهم ... و شيعي عليهم ضيعو البت .

- جا و يو درو البت عد هدوة .

- انت سوي الاكللج عليه ، و الباكي افهمنج اعليه باجر.

-خوش .
صكيت الباب و انا احسب ، جا شراح يعمل ، و شنهو الراح يسوي بيهم ، و يو عرفو سرحان ورا السالفة ، جا غير هديوة اتورط و تلزك بيها الفضيحة .

هدية : ها يمة اجا خنجر

- موش خنجر الاجا ، سرحان و يكول البت تاخذها من بيتي باجر .

- يمة دخيلك ربي ، و سرحان شنهو دوره وياهم ، يروح يتوهدن وما يفتك .

- سرحان ما ينخاف اعلية ، وما يوهدن روحه بهيج سالفة يو ما حاسبها و ومتختخها اباله.

هدية: رديت كعدت ، و انا ما بيه كل حيل ، صدري مورم و اطلع منه الحليب خاطر ما ينشف ، و صخنت من ورا ورم صدري و فراك بتي .

انسدحت و انا اونن اعلى بتي ، و جميرة كاعدة عد راسي و تكلي : جا لا تبجين و علي من تبجين اضوجن وابجي .

- هاذ اليوم الثالث و بتي موش بحظني يجميرة ، راح اطكن من القهر .

لاله : جا ما دام سرحان كال يجيبها وخنجر كال يجيبها ، لا يضل بالج ، الا اكلج عمه انا هسه شلون

كواغد :- انت الثانية شمالج ؟

- عمه جا موش كتلج اعلى الشفته ، و انا اخافن هسه حتى ادش للحجرة ، اهيس اعضاي تتراجف .

- باجر اخذنج للسيد و نشوف شيكللنا .

.....

جسام : بوية انا رايد اخذ رايك

- شنهو الراي يجسام ؟

- انا رايد اردن مرتي .

- يا مرة هاي ؟.

- راديون .

- بشوفه منها جرت راسك مثل الطلي و خلتك تحن ليها ؟

-تعرفني انا من كبل لا اخذنها عاشكها ، ومرت ايام و اشوفن مامش شي يستاهل اطلكنها و ابعدها عني .

-انتبه لروحك يجسام ، انا ما احبن الزلمة اليطخ راسه لمه ، و تركب اعلى راسه .

- بويه انا لا طخيت الها راسي ولا هي ركبتني، السالفة وما بيها رايد ارجعنها .

- يصير خير ، امس نمش نشوف زنيد و نذب الحجاية عدهم و نرد .

- الله كريم .
......

راديون: صافنة بزماني و انا متيهة روحي ، اردن لجسام و ارضى بقسمتي، يو اصر اعلى طلاكي و اردن لخنيجر ؟ جا و يو اطلكت خنجر يرد الي عكب هدلتي ليه ، واتأمل و ارد للأمل و انكسر.

طرى اعلى بالي جسام ..
تنهدت و انا اتضكر مشاوره الي و هو يكلي عاشكج ..
مدري شجاني و صرت اتذكر ذيج الليلة ، و ان جانت صعبة اعليه و خلصيتها بجي ، لجن ما يروح من بالي منظره و هو مغندب و محتقن و يطلع الدم من ايده خاطر ما يعيبني .

اتضكر ساعة الفتحيت و هو مكابل وجهي و يوچد بيه ، و ظلت الضكريات تتوالى اعلى بالي وحدة وحدة .

غفيت و هو حاط اعلى اجفاني و افكر بيه ..
الفجر فكيت عيني ، طلعت من الحجرة خاطر اروحن اشرب ماي.

بعد ما مات ابوي ، سرحان سرح اكثر الخدم و الحراس ،خله حارس واحد وحجرة اله خارج خاف القصر يعتاز شي، و خله صبيحة و بتها بس يدارن الخاتون ، ومن ماتت الخاتون عزلهن من الخدمة و كال لمرته : ما عدنا شي انت و امي تعاوني اعلى القصر ، و يو صارت كعدة يو عزيمة انا اجر ناس للخدمة .

وامه ساندته اعلى هاذ الراي ، و اهي بالبيت الامر الناهي ، خلت بس ام سالم و جنتها بالاسبوع ثلث مرات يجن يغسلن الهدوم مالت البيت و يكونها وياخذن اجرهن و يمشن .

ظليت افتر بالقصر و اتذكر اعلى وكت ابوي شلون جان مكتض بالناس، عماتي و خواتي من ابوي ، و امي و كريم زناد و نسوانه و جهاله و الخدم و الحراس اعلى الباب ... وناس تروج ، الف رحمة اعلى روحك بوية ، من مشيت راحت المحنة و الايام الحلوة وياك ، جنت بيناتنا و ما حاسين بنعمتك ليما فكدناك.

جاي اعاين بالبيت ، دش سرحان من برا : ها خوية وين جنت ؟

- اعلى الشط جويعد ، الاهل ما كعدو ؟

- ولا واحد

- تمشين وياي لبيت زناد اليوم ؟ متأذي كلش و فاكد جلوته .

- و عسنى ازود ، لا اريدن اشوفه و لا تهلي شوفته .

- اعلى راحتج ، جسام كال يومين و امرنلك .. شنهو رايج خوية .

- ما اعرف ، ما تهلي الرجعة عكب السووه بيه .

- رايده تظلين هنا ؟

- ما اعرف

- حسمي قرارج خاطر ابلغنه و ما يظل متعلك .

كعدت امه : ها صباح الخير

- صبحج الله بالعافية ، شلونج

- على الله يوليدي ، اسوي الريوك

- تكعد بشرى و تسوي.

- جا ما عدي شي
حجتها و دشت بشرى صبحت اعليهم و حطت مأمون بالكاع ، وهاذ ركض لحضن ابوه ، فك اديه سرحان و شاله : هلا بوليدي السبع هلا .. شلونك ؟

و شال ابنه و يلاعب بيه و يحبحب و ذاك يصرخ و يتصايح بيده و يضحك ، اندار الراديون و كال الها : انا صالي جم يوم مشغول بسالفة زناد و التهيت ، مرت كريم مريتن عليها شفتنها شمعتازة ما معتازة .

بشرى: هي لا تجي ولا تعاشر احد كل وكتها صاكه بابها اعليها.

راديون : والله انا ما شايفتها

ردحة: انا هسه امرن ليها و اشوفن شمعتازة .

كامت ردحة ، و سرحان كاعد ، سوو ريوك و تريكو و لمو السفرة ، و سرحان كاعد و مناطر الساعة ، حجت بشرى: جا اليوم ما تطلع للمعمل للمضي

- رايدة تخلصين مني ؟

- كاعد اعلى افادي و اخلص منك ، بس نشدتك شمالك .

تجاهل الرد و يدور وجهه ، اندكت الباب ، و دشت ام سالم للبيت و خلت جاهلة بحضن سرحان و كالتله : هاي البت جابوها .

اخذها من ايدها و هو يرد : الله يطيج العافية
حطها بين اديه و ظل مدنج راسه ليها و اموجد بيها ..

بشرى : منهي هاي

سرحان ساكت ، و امه سألت كلهم مستغربين ، اندكت الباب و حجه سرحان : يمه اخذي قوطية الحليب و الممة من الحارس ، و سوي للفرخة حليب علما تجي امها .

راديون ابتسمت : بت هدوة ؟

شال عينه راديون و ابتسم الها ، ضحكت هي ، وردت نشدته : و شلون خذتها ؟ جا ويو دروا اهلها .

- ما اريدن اي احد يجيب سيرة للموضوع .

راديون : اكومن اعاون عمتي اعلى حليب الفرخة .

ام سالم : و انا اردن للبيت ييمه تعتاز شي يبعد عيني ؟

- سالمة حجيه .
شال من جيبه فلوس و اطاها و هي ظلت تتشكره ، طلعت ، و بشرى حجت : عليش جايبها .

- تعرفين بعد شواي .

- وعليش مدخل روحك وموهدن نفسك بسالفة ما تخصك ولا انت طرف بيها ، هدية وعيالها انت شعدك بنصهم .

- اخذي مأمون و دشي بحجرتج

- لا ما ادشن ، و انا اعايننك حاط عيونك بهالفرخة و موچد بيها و تتخايلها امها .

راديون : ترى ما تسوى يا بشرى ، لا تزودين حجي ، بت راح تجي امها و تاخذها .

كام سرحان من مكانه و هو يكول : رايح للديوان ، ما اريدن احد يتبعني .

مشى للديوان و صك بابه و كعد يعاين بوجه الجاهلة ،شعرها ثخين ولادي و زلوفها نازلات . كام يمسح على شعرها و ويلعب بزلوفها ، و يغني بهداي :

- يا زلف يتغاوى وي الليل بطراف الكصيبة ، ها عمري الما غفى و بالليل ما مرة حبيبه
..... هاك عمري الضاك حنظل وانت برحي
..... هااااك عمري الضاك حندل و انت برحي
يا حريمة الشوك مر بوحشة تايه ، يا حريمة يا حريمة .

دشت راديون و هي كاضة بال ممية و القوطية و تكله ، اكللك : انا ما اعرف هاي شلون اسوي الحليب اخافن غلط و تتزوهر البت .

كض قوطية الحليب وكال الها ، حطي ٤ مجيالات .
حطت و خضت الحليب و كالته : عنك ارضعنها .

- لا لا اطيني ، انا ارضعنها .

ابتسمت و انطته و هو حط الممة بحلك الجاهلة و كامت ترضع : شو البت بس نايمة ما بجت عليش ؟

- والله ما اعرف .

......

هدية اندكت الباب اعلينا الصبح و دشت مرت عمي و هي تصيح : الفرخة وينها ، طلعنهااااااا ياله

كواغد : يا فرخة

- الفرخة بت فليح طلعنهاااااااااا لا اهجم البيت اعلى روسكم ، يااااااااله

هدية: بتي موش عدي و ما جايبينها ، وين وديتو البت ؟

- البت عدكم طلعوهاااااا

كواغد : ضيعيتوووووو البت

هدية : يممممممممة بتي ، بتي يمممممه

كامت هدية تصرخ و ادك اعلى راسها وكواغد تصيح ، هدية ما طخ ابالها اي شي عدالها البت صدك مخطوفة و اطت ردة فعل حقيقية كامت ادك و تلطم اعلى راسها ، و كواغد تعرف لجن كلتهم و شربتهم بالحجي .

و طلعت و هي تصيح ، عمتها جرت بوش ساعة الشافتهن هيج و البت دورتها ومامش ، ظلت مصفصفة وردت لبيتها و كواغد تبعتها و دشت اعليهم ...شهرتهم شهيرة و لمت السلف كله اعليهم .

ناصر و اهله يكلولها كعدنا البت مامش ،ماكو غيركم خذها و كواغد ما خلت جلمة وما ذبتها اعليه .

وكالت الهم : هاي لعبة منكم خاطر ما تردونها .

و هدية وياها تصرخ و تبجي و تدعي عليهم و تصيح بتي خذيتوها ، الى ان خرت وطاحت من طولها .

انخبصو اعليها .. و ال ناصر توهدنو .. البت مكمطة و نايمة بفرشها وينها ، و حاطها ناصر عد مرت ابوها ، كضوا مرت ابوهها صياح و طك .. عبن البت مامش .

شالو هدية وودوها للمضمد .. قاس ضغطها و اطاها دوا و هدوها هي و امها و راحو .. كعدت هدية و هي تنوح : يمه بتي راحت من ايدي يمه ، ابنيتي راااحت .

- يممة ليمتها تظلين غمة جا امس شحجينا

- شحجينا ؟

-جا موش كتلج سرحان يكول بتها تلكاها عدي ، تجي و تاخذها مني .

- يعني عد سرحان؟

- اي .

- امشينا .

امشي جدامي ، و انا وراج .. خاطر لا وحيد يتبعج .

مشت هدية و نزلت للبستان و مدشت لبيت سرحان ، لكت سرحان كاض الجاهله و راديون كاعدة عدها ، صرخت : بتييييي

سرحان : بهداي يواشج بهداي ، البت نايمة .

حطتها اعلى كلبها و كعدت و نحبت بصوت عالي اعلى بتها و هي حاضنتها ، وراديون كاضتها و تكللها : بهداي جا هاي بتج شمالج .

دخلت ردحة و بشرى و سرحان واكف ، حجه : ياله بويه حسي دموعج ، البت و ردت و عدت سلامات ، لا تضايكينها ووهي نامت

هدية : شلون كدرت تجيبها ؟

دشت كواغد للقصر ، فاتت ع الديوان و عاينت بتها كاضة بتها ، دارت لسرحان و كالتله : ما اعرف شلون اتشكر منك .

- يو انا غريب اشكريني

- لا حشى والله ، والنعم منك .. الله يطيك العافية .

- كون شكو بيج انت جاية لهنا

- لا ساعة الطاحت هدوة هم اندار راسهم .. و طلعو يدورون الفرخة ، ليما تأكديت محد وراي اجيت وهسه اروحن لسلطان و اخبرنه وهم اكلله رحت لبيت الشيخ مطر احشم ولدة يدورونها بالسلف ، خاطر لا احد يكول شعدها دشت بيت سرحان، بس كلي شلون جبتها؟

- امس بلغت جماعتنا بالجول ، ياخذون ابنهم الزغير حفيد نويصر يطلع عمره ب١٣ سنة ، و يخوفونه و يرهبونه .. خاطر يجيبلهم البت بلا ما يدري احد منهم .. وهيج لا وحيد ساطي عليهم ولا يجيبونجن بحك .. من كون يو سطو جماعة خنجر و خذو البت .. معروفه مامش غيرج و غير بت الدازينهم و هاي موش هينة .. جلمة ودت عصابة ادوس البيت خاطر اتجيب البت ، موش بصالحجن .

- و يو حجه الفرررخ ؟

- ما يحجي ، و يو حجه ما يعرف الهدداه منهو .. ولا هم شنهو ..اللبس جان اعربي موش شقاوات .

- وليمتها تظل البت هيج ظامينها ، جا السالفة ما تظل مضمومة .

- ليما يرد حاكم من الواجب ، ساعتها هو يتصرف ويا خوانه و يقرر بيهم ، انا افضل اتخلينها عد ام مؤيد و توصينها تسركي الباب و ما تفتحة لاي احد يو شما اندك الباب الا اذا جان انت او هديوة ، كلها اسبوع ويرد حاكم .

هدية : انا ما اعرف شلون اشكرنك، و يو اطيك ماي عيوني ما اجازيك .

ابتسم : فرحتج هاي عدي مامش شي يضاهيها .

كامت كواغد و هي تكللها : ياله بتي ، كومي .

سرحان : ام ستار هدي البت هنا ، و اخذي هدوة وروحي لال ثجيل و تلكين البت عد ايمان ، ولا تنسين هاليومين .. جثري بروحاتج ليهم تنشدينهم اعلى البت .

- اكلك جا يو رد حاكم .. ما يكلوله منين خذيت البت ، انا راسي كديور و ما جاي اوجد دربي .

- هو يرد حاكم .. وعود وكتها بيهم زود يحاجونها .. سهله ان شالله .

ضحكت كواغد : جا هو مطر ما مات هالواكف جدامي ، من اغديلك فدوة ييمة ... اضكر موقف لبوك الله يرحمة ساعة الكاطع تهم حاكم متعدي اعلى مرة .. جاب حويكم و حطه احذاه و خله البت ادس وذيج تصرخ و تبجي وتكله حويكم تعدى اعليه .. و حاكم جدامها ما تعرفه .. وبرى حويكم من تهيمة كويطع ، ولا انت .. داورتها و لفيتها اعليهم و خليتهم مشوشين ومديور راسهم والشهيرة اعليهم ... جا هي المشيخة اعكال يو عكل ؟

- ههههههه الله يرحمة عد عيناج يم ستار و هديوة عزيزة وتستاهل .

طلعت و هدية متبسمة و توصي براديون اعلى بتها و ذيج تكللها : لا تشيلين اعلى بالج .

طلعت كواغد و هدية لال ثجيل ، و ردحة وراديون طلعن مبوشات لبيت حاكم و حطن الجاهلة بعلكة مسواك خوص و مشن لبيت حاكم و دكن الباب اعلى ايمان و انطنها البنية وراحن .

وكواغد ما خلت جلمة اعلى ثجيل ما ذبتها ، لعبت بحاله لعب من كونه هو تكفل الموضوع و كلشي ما سوا ...

طلع ثجيل اعلى بيت نويصر ، و كواغد و هدية ردن للبيت ، و العصرية وردت كواغد ليهم تنشد .. ما خلو امن و شرطة ما جابوها للبيت مالت حاكم خاطر يحققون البت وين راحت.

و الشرطة كالت الهم : لو داخل احد غريب او ساطي عليكم حرامي ، جان شفتو بس البنية الصبح موجودة ومحد داخل عليكم ، يعني البنية عد واحد من اهل البيت الموجودين هو الماخذها .

تهمو مرت فليح و هي تحلف و تتكفر البت جانت بفراشها .. وظلو يدورون اعلى البت .. و هدية خلت البنية عد ايمان بس وكت الرضاع ادور ليهم ترضعها و ترد ، و يو اجوها سوت روحها كلش .

جمارة : هااااا انا شكلت الكم ، موش خنجر يكدر يرد البت ، شفتووووووو

كواغد : الله يطيه العافية

- لا يمه انا اريدن اتزوجه

- ولج شلون وياج ، اشعل العطاب و اجويج ، بكد النعال و تحجين بالعرس ، عييييب لا تحجين هيج.

- جا يمه شني ما اعرس .

- خايبين ما تناوشوني النعال الطمها اعلى حلكها ، ولج اكللج لا تحجين بالعرس .. عيب .

- يمممممممه اكومن منج انت بس تغلطين علي .

كامت منها ، و تسرسحت ومشت لمجان خنجر : هلا عمييييي

- هلا هلا بالتمصرن .

- انا اشكرنك

- عليش؟

- لين رديت بت هديوة ، و هسه امي خلتها عد ايمان خاطر لا احد يعرف هي عدنا ، و يسرى من تجي ما تشوفها عدنا .

- اكللج هاي السويلفة بس انا اعرفةبيها يو مذبنتها يم جم واحد غيري .

- لا وعلي ما حاجية لوحيد بس انت

- ديري بالج ، يو كلتي لاحد هديوة يطكونها و ياخذون البت .

- خوش خوش ، بس عمي انا اريد اكللك شي

- شنهو

- تزوجني ؟ انا احلى من راديون و احبنك .. ويصير عدنا جهال مثل اميدي و امنيوة .

ضحك بصوت عالي ، دار ليها :- كربي

كربت .. حجه : تعرفين شنهو العرس ؟

- اي ،يعني احط ازواكات ، و اعيشن ابيتك .. اسويلك غِده وعِشه ، واجيبن افروخ .

- وبعد ؟

- جا بعد شني ؟

- اسمعي ، من يجي ابوج كليله خنجر يريد هايشتين هاطر يتزوجني ، خوووش ؟

- يعني ما نعرس الا يطيك ابوي هايشتين

- اي جا شني موش انت خطبتيني و الزوج و تطيني مهر هايشتين .

- خوش
حجتها وركضت للبيت ، تنشد امها : يمه ابوي يمتى يرد؟

- خايبة ذلفي عني لا والعباس ارفسنج .

هدية : شتريدين ؟

- عدي سالفة ويا ابوي .

- موش وكتج اكعدي .

......

راديون رديت من بيت حاكم و نزلنا للبستان نمش كلت الها : عمة ردي انا راح اظلن هنا بالبستان افتر

- خوش

مشت وانا ظليت بالمجان المشينا بيا امس انا و جسام .. و ظليت ارواح بيه ، و فكرة تاخذني و الاخرى تردني .

مدري شجنت انتظر ، جنت متوقعة جسام يمر منا، بس ما مر ولا اجا ظلت اروحن و اردن بالمجان .. وافتر .

ليما ورى ثلث ساعات يلا رديت للبيت ، جانت بشرى تحضر بغريضاتها ، حجيت : وين ؟

- رايحة لهلي

- عليش

- خلي البيت لخيج ، يفرح لفرحة اهديوة و مكضي وكتها لخدمتها و ناطر هلبت يطلكونها خاطر ياخذها .

- شني هالحجي هاذ

- لا حجي ولا هم يحزنون ، انا رايحة و هدوني بروحي .

- اذا جنت طالعة مسيرة ، اخذيلج جم يوم و ردي و ان جانت طلعتج زعل ، خلي ابالج مالج ردة للبيت ..

- لا لزوم اظلن هنا و اعاين نظرات العشك بينه وبينها و ارضى بذلتي هاي

- ما خدعج هو ولا املج بايام و كالج اعيشنج بزهو .. من اول عرسج كالج يبت انا عاشك و يمتى ما احظى بعشيكتي اخذنها ، تريدين تظلين تريدين تروحين

- هاي اول و المرة عرست و هو ما كاطع الظنه منها .

- المرة شحالها و انت غيرانه منها ، عيالها لا يطلكونها و يو طلكوها ما يخلونها تعرس ووالبت عدها .. وهدوة ما تهد بتها ، يعني السالفة مستحيلة ، لا تفكرين بيها .

-انا ما اكدر بعد .. تعبت راديون تعبت ، وكل ما احجي ويا ما يرد يفت كلبي ابروده و ما يرد اعليه بجلمة .

- ضكري الله و ردي هديماتج و اكعدي يا دية ما تكليلي شمالج ، حمدي ربج ظال اعليج الا اثار ابوي و اجدادي كلهم يثنون ، ابوي ماخذ ٤ فرحة و ردحة و امي و الخاتون ، و جدي ضاحي ٩ .. و جدي جلوب ٢ و ... واخوي زناد هالتشوفينه حاط اثنين حدره ، حمدي ربج القصر بس الج لا وحدة مشاركتج بيه ولا سرحان يومية مثني ... دكعدي

كعدت و هي تبجي و تكللها : ما تحسين بالانه احسنه الا تمرين بيه يراديون .

وارديون ظلت تصبر اعليها ..
للعصر ، طلعن بشرى و ردحة لليت زناد خاطر يتحمدله بالسلامة وويشوفنه .. وارديون ما رضت تروح .

اندكت الباب، طلع الحارس ، و دش و هو يبلغ راديون : جسام ابن سلطان اعلى الباب و البيت ما بيه احد ، شكلله ؟

- خله يدخل للحديقة ،و انا راح اطلع ليه .

حطت الحجاب اعلى راسها و طلعت من البيت ، هو واكف وناطر : و شعندك راد ؟

اندار ليها : جلمة هلا مامش .

- شح بكلبي كل حلو وما عادت الجلمة الحلوة تطلع من افادي .

- انا جاي اعلى سرحان من كون واعديته امس

- بس مواعدك اعلى باجر

- مامش فرك بين اليوم وباجر و انا حجيت ويا هلي و ابوي مستعد يجي .. و ننهيها .

- تنهي شي انت نهيته كبل مدة

- السالفة مشت وعدت

- عدك موش عدي

- وهسه ؟

- من يجي سرحان احجي وياه ، و عودن اخذ الحجي منه

تكرب : و عليش مو منج ؟
حجاها و مد ايده للشيل نزلها من جتفها ، كضت ايده .

- احسن

- بس انا اكولن موش احسن

- الجاي تسوي عيب ، احنا مطلكين و انت داش ابيت اعلي و جاي ...

- جاي شنهو

دارت خاطر تمشي ، كض ايدها : ما كتيلي جاي شنهو

- جسام امش

- انا جذبت عليج

- ليش ؟

- كلت الج جاي على سرحان بس انا اعرف مامش احد بالبيت غيرج .

- احنا مطلكين

تكرب اكثر و هو يوشوش : شنهو نسيتي الزلمة انا و العصمة بيدي و الطلاك ما وكع ساعة القرريت اردنج ، و هساج اعلى ذمتي .

- ما يصح

- رويدا

- لا تندهني بهالاسم .

- احبنه بكثرج

- يو اجا سرحان و شافك راح يتكاوم وياك، امش .

- خايفة علي يو عليه ؟

- امش جاي اكلك ،

- ما امشي لا اما اخذ جوابي

- جواب شنهو

- كولي اردنلك .

- يجون هلك ويصير خير

- كوليها

- اطلع عاد

- واذا ما طلعت

- اهدنك و ادش للبيت

- ويو تبعتج

- شحدك

- تتحديني ؟

- لا ... امش

- كولي اريدنك

- ما اريدك

- احسبنها العكس ، يووو .

- ابتعد مني

- كربي جاي

- لا يجي احد ، جاي اكللك امش

- حيييييييييل احبنج

ابتسمت : اي دميل

- اهلي الليلة عدكم

- موش اليوم ، باجر

- ما اتحمل ، يو ما اجيتي الليلة

- اي

- اتخليني اصيرن حرامي تالي وكتي و اسطي اعلى بيتكم و ادشن حجرتج .

ضحكت ، حجه : ضحكة هاي يو روجة ماي بارد تمر اعلى كلبي المجفجف بفركاج .

ابتعدت منه : هدي ايدي عاد ، وامش ياله ، وباجر يجون اهلك واردن وياهم .

- الليلة

- ما الحك

- لا تلحكين اعلى شي انا رايدج هيج .

اطركعت الباب و انفتحت .. جريت روحي منه ، و هو كام يعدل بغترته اعلى راسه .. و مشيت ، دش سرحان و امه وبشرى .. عاين اعلى يمنته و انا امش و جسام واكف وراي . عكد حواجبه ساعة الشافنا واكفين بالحديقة

جتف اديه و كال : هاي شجاي يصير هنا

- اهلا ابو مأمون
كرب ينطي ايده ، سرحان ما مدها و كاله :

- البيت مامش احد بيه يبن الاصول

راديون : انا انا ... ااااا انا كلت اله يدخل للحديقة .

جسام : جيت عليك خاطر احجي وياك ، لجن حجيت ويا المرة و هي راضية تردلي ، و انا بعد العشا اجيبن اهلي و اجي .

سرحان ظل يعاين علينا و متفاجئ ، وحجه : انتم موش صغار خاطر نشير عليكم ، و دامكم راضين تردون ، الله يكتب البيه الخير ، و انا ما راح اطلع ناطر اهلك .

- تسلم ابو مأمون .

سلم على سرحان و انا دشيت جوا ، متفشلة حيل منه ، صاح علي خاطر يفهم مني، ما طلعت ليه و لا وصلت يمه ، خليت عمتي ردحة تطلع و تتفاهم وياه .

حميت الماي الحار و سبحت بهداي و تعطرت .. و انخبصت بروحي .. حتى وفاة ابوي نسيتها و جريت كحل العرب و خطيت عيني .

لورا العشا ، اسمع اهل جسام اجو ، لبست ثيابي و حضريت كواري ، و ظليت اتصنط اعلى الديوان ، سلطان و نعمة يحجون ويا سرحان اعلى سالفة بت فلاح الضايعة و يحجوله شلون موهدنين بيها ، و يتعذرون منه ما كدروا يمرون لزناد و موهدنين بسالفة هالبت ومن هالحجي .

لهناك طلعو و صاح سرحان ، و انا كلبي دكاته ما ادري شوصفهن .. عمتي ردحة تحجي و توصي و انا ما اسمعنها اعلى توتري و رجفتي.

طلعت ليهم و سرحان يكللهم : السالفة صارت بساع بساع حتى زناد و امها ما يدرون برجعتها ، لجن هاي بعد قسمتها .. ما اوصيك جسام البت تحطها بعيونك ، و يو تأذت انت حصتي .

- احطنها بعيوني

تنهد سلطان و هو يكول : اييي ياله بويه اخذ مريتك خل نمش .

شال فلوس سرحان و حط بيدي و حجه : شتعتازين بيت اخوج سداد

- حظنته و سلمت اعليه ، حب راسي و هو يوصي بيهم علي ، جسام حط ايده اعلى ظهري و طلعنا ، سيارتين جانن ، سيارة نعمة و اخوته و سلطان صعد ويا جسام بالصدر ،و انا ورا .

الدرب كله ابوه يحجي وياه و هو ساكته و عيونه معلكات بالدرب و المشوافه .

وصلنا البيتهم ، نزلت و نزل جسام ، سلمت اعليهم ، و ظليت كاعدة شواي ، و تسرسحيت عنهم و دشيت داخل ، و جسام كاعد يمهم .

حطيت غراضي و صفطيتها بالكومدي ، و نزليت شعري و جريت المشط امشط بيه انعم بيه .. دش جسام ، اول ما صد بوجهي ابتسم ، صك الباب و كرب وكف وراي

- ضوت الحجرة بدخلتج ليها

ظليت اعاينله بالمشوافه ، و انا اسرح بشعري ، اخذ المشط من ايد و كض شعري يمشط بيه ، و يحجي : كلتلج الليلة فرغت اعصابي و انا ناطر هاللحظة يمتى تجي .

مشيت منه ، جريت جودليه و مديتها اعلى الكاع ، عكد حواجبه : عليش تفرشين بالكاع جا القريوله المن ؟

- الك

- و الفراش ؟

- الي

- هاااه ، جا عليش ردينا

- انا رديت لجن موش الك .

- جا عليش ؟

- شي ابالي وسويته .

- اهااااه ، هيج الحجي يعني ؟

- اي

- جا خوش ، نامي ، ولا اكرب ليج .

- اي لا تكرب

- ولا اسويها

- اي لا تسويها ، جا ياهو العاتب عليك .

- عدي كرااااااامه انه موش وحدة مثلج تلعب علي .

- مثلج يعني شنهو ؟

- خوش خوش ، جاي تختبريني كرامتي و تتلاعبين بيها ، فلا اكربنج .

- اي لا تكرب

- ما اكرب

- دنصي حسك لا تلعلع .. هسه عدالهم جاي اتعارك وياك خاطر تتكرب .

- ما اكررررررررربلج ، لا تلحين .

- يا فدوة ، و انت ياهو الطالب منك

- ما اريد انا عدي كرااااامة ، كراااااامة .
وكعد على القريولة ومدد رجليه و داير عني .

هزيت ايدي ، جريت الغطى و وسادة من القريوله ، جراها مني : هاي الي

- انت موش عندك

- القريوله الي ، موش فرشتي بالكاع ، توسديها لا تجرين وسادة من قريولتي .

- لا والله جرنها ، ومو ش بكيفك .

جريتها غصب ، حجه : كرامة مراح انزل روحي الج لخاطر وسادة .

- بعد احسن
ذبيت الوسادة اعلى الفراش و انسدحت ، درت ظهري اطيته اله و خليت الغطا اعلى رجليه .

-عود شني معناتها

- انت ياهو يمك

- جا شني حايط انا و مطيتني ظهرج ، نامي عدل

- اي لا تعاين ، والا اگلك اطفي الضوا

كام بنترة طفى الضوا ، و رجلية دبجتهن اعلى الكاع اهيسنها ، لجن ما مشى لقريولته ، كرب من فراشي و تمدد حذاي

- خير ؟

- شكو ؟

- شعدك يمي ؟

- مرتي وحلالي و يحلالي انت ياهو مالتج

- جا و الكرامة ؟

- الكرامة !!

- اييييه ؟

- نايمة ع القريولة

- هههههههههههه دكوم مني ياله

- عود بالحلم اكوم ، كررررربي .....يتبع

لقراءة الفصل التالي : اضغط هنا 
reaction:

تعليقات