القائمة الرئيسية

الصفحات

رواية كحل عرب الفصل الرابع والأربعون 44 بقلم زينب ماجد

 رواية كحل عرب الفصل الرابع والأربعون 44 بقلم زينب ماجد

رواية كحل عرب الجزء الرابع والأربعون 

رواية كحل عرب الفصل الرابع والأربعون 44 بقلم زينب ماجد


رواية كحل عرب البارت الرابع والأربعين 




الحلقة_44
(نار الغضب )

بعد ماگلك كتلني اجفاك والدمعات تسرح…
راح اخلي النار تاكل والدمع معذور لو شح…
( عريان السيد خلف)

ملوك : اسمعني ، حكك و امك ماتت ، لجن راديون ما لازم تظل هنا .. لزوم تاخذها البيت عيالها الساعة ، زناد توه رجع منهم ويو رد يحكونه .. وكريم ما يكدرلهم مثلك .. دوس اعلى جرحك و اخذ اختك و امش .

سرحان : زناد كريم .. توجهو للقصر بسرعة و سدوا مجاني ، نص ساعة و انا جاي، ياله راديووون .

خذت راديون و طلعت بيها لال ثجيل وانا عكل ما براسي ، الخاتون اللي جانت مجانها بگلبي مچان ام جنازتها ابيتي و انا موهدن بغيرها .. التمن اعليه المشتتات من كل صوب ، منين ما اداور راسي ادوخن
امي
صويحبي
واختي ..
عونك ربي .. راسي ما كام يفسر و عيون اعلى كثر الضغط ما كمت اوجد دربي .

راديون جويعده حذاي بالسيارة و تبجي بهداي، درت ليها : لمي دموعج خوية الدمع ما ينفعج بشي و صيري كوية و السانج لا تطينه لاي بشر ، حطي لسانج بحلكج و اصبري ، كلها جم شهر و نخلهم يطلكون غصبا عنهم .

- و يو طلكيت ؟ يرد الجان اليه

- انت الرضيتي بوضعج وانا ياما وديت عليج و انت الخفتي من الجية ، جلمات العتب جثيرة مضغنات حدر افادي لجن ادري الوكت موش وكته و اعاتبنج .. كفي دموعج خوية ولا تخلينهم يركبون حكج بضعف دموعج ..

- الجار اعلى هدوة جار اعليه يسرحان خوية .

- الله كريم ، احنا وياج وبيت ابوج مفتوحلج يمتى ما طرى اعلى بالج ، و حطي بمخج .. انت موش مجبورة بأحد .. اجعدي هالشهرين جفيان شر الوادم .. وبعدها قرري امرج ان شفتي الجعدة تضر .. بس اشري و انا بيدي اجيبنج .

ظلت مدنجة و تبجي بهداي، وصلنا بيت ال ثجيل ، دكينا الباب .. فتحه نعمة : ها خييير يسرحان اشوفنك رديت بيها لينا وما تصرفتو .

- تفتح الباب ونكعد نحج يو الحجي وگفة يبن العم ..

فتح الباب و كال : حياك
دشيت وراديون حذاي، طلعو ولده كلهم .. وسلطان بديوانه ، حجيت : دشي لدارج خوية ، وطلعة من بيت زلمتج مامش .

سلطان : شنهي الراي يسرحان وراد بعاركم علينا

- كض احدودك يعمي واوجف عدك .. الجلمة ثجيلة وما تطيكها صدورنا ، البت امس اجيت وردت اخذنها و انت بروحك ما رضيتلي بطلعتها ، شنهو الصار ورادها بصباحية عرسها ؟

- البت مالها بياض ، ورايتها سودة .. اخذها وامش .

- ان جان الحك بطرف .. كل طرف يكلك انا الحك .. انت عمي و جلمتك اعلى عكالي ، لجن ردة اخيتي بصباحية عرسها ، اعذرني ما ارضاها .. والكلت ما الها بياض ، انا جويعد هنا ، و جيب اخيتي و جيب زلمتها و خل نفصل الحك بيا كتر ..

- البت بصباح عرسها و اهي تترجى و تحبحب بأيد عمتها خاطر تسدسد اعليها .. و ساعة

- ساعة شنهي و انت كاض البت و طارد رجلها من الحجرة و اطك بيها ، هاي الأمانة يا ال ثجيل ؟

- البت مالها بياض

- انا جاعد هنا و صيح اخيتي و صيح رجلها .. ويو اجا و شهد اعليها ، هساه احطن الجيلة براسها و انهي امرها ..

جاسم : ساعة الردنا نحلف جسام اعلى كتاب الله ما رضى يحلف و كال الفضيحة حرام ، حط المشاكل اعلى كتر البت مالها بياض ، هالسالفة حك واحنا ما نرضاها .. تكعد البت ويجي اخونا و نحط كتاب الله و يحلفون ، راضي .

- انا ما ادخل بهالامر .. دام البت عرست وصارت براس رجلها ، الأمر راجع ليه يو رضى يحط كتاب الله و يحلف مرته جدام الوادم اعلى سترها انا ما عدي مانع ، غصبا اعلى راديون تحلف و تبري نفسها .

سلطان : يظهر الحك يسرحان وانا بنفسي اطلعنه ، هد كتاب الله اعلى كتر و ناخذ جسام و مرته لابو فاضل و يحلفون غاد .. و الحك اطلعنه و انا سلطان اغلب ما انغلب .

- لي ذيج الساعة البت بحجرة رجلها موش خارج ، واي جلمة بحك اخيتي و سترها ، هي جلمة بحك عكلنا وناخذ ثارها مربع ..

كام سرحان .. وهو يوصي براديون تكض حجرتها و ما تطلع منها .. ليما يرد رجلها ويو رد خليج حذاه وفتحي اذنج اعلى كل حجاية يحجونها ..

راديون : صار
طلع سرحان من البيت وانا مشيت لحجرتي ، ما ادري هاي حوبة خنجر بيه يو الله كاتب اعليه الشكى .. ساعة ابجي اعلى حالي و ساعة فكد ابوي و ساعة اعلى خنجر و سنينه و ارد اتضكر وفاة الخاتون ويشتد مصابي .

دشت اعليه نجمة و هي تغلط و تصيح بالحجرة و تشتم جيف جذبتها و ما اعترفت بالحجيته وياها الصبح .. ظليت كاضة روحي و ساكتة عنها .. ما حجيت ولا نطكت .

ساعة الطلعت صكيت حجرتي وكعدت وحيدي ابجي .. اليوم و بهالساعة هاي بالتحديد جان المفروض انزف اعلى ولفي و انسعد ويا بحجرته و خشابه الصارله سنة يجمع و يأثث بيهن .. الله لا يوفكك يزناد ساعة الذبيتني هالذبة هاي و دوهنتني ويا ال ثجيل .

رد سرحان لقصره و الناس كلها ملتمة اعلى القصر .. لجن لا صريخ ولا وحيدة التشك ثوبها ولطامة لطمت اعلى جثتها .. من كونها بغدادية وغريبة عنهم ..
النسوان لابسات اسود وكاعدات بالحجرة و الزلم لابسه يشامغها و لافته اعلى وجهه و باب القصر مفتوح طلاقتين .

عاف السيارة سرحان و نزل مسرح ، ساعة الدش هم متكابلين اعليها خاطر يشيلونها ، وكفاهم سرحان و حط راسه اعلى راسها و كام يصرخ : يا يممممممممة ، يا حسنية يا يمة ، ربيتي و تعبتي ونصحتي ووفيتي يا يمممممة .

ارتفع صوت البجي اعلى صريخه و هو حاضنها و حاط راسه اعليها وينحب ، جراه منها كريم و كاله : هاذ يومها الله يرحمها تعذبت جثير ، عونك خوية .

جراها كريم و سحبه و شالوها للمستشفى ، ويا ما جاي يطلع ، كضت ايدة مرة منكبة ، ابتعد هو حسباله مره غريبة ، لجن ساعة الحجت عرف حسها

ملوك : هاي انا ، كلي شصار وياك اعلى راديون وديتها .

سرحان : هدي راديون تدفع اثامج و اتباري الذمم ويا الشايلنها عسى تبريج الذمة اعلى العملتي بحالها .

حجاها و طلع و هو يلف اليشمغ اعلى وجهه، ويا ما جاي يطلع ، دشت كواغد و هي تصيح : ولج يمممممممممه ، يخاااااااااتون يحبيببببببببة ... خلصت وانتهت وياج والعشرة كضيناها ، خلصت وانتهت وياااااج

والتمن النسوان اعليها ولطمن وياها، وراها ايمان شايلة ابنها و تبجي ، وهدية شايلة بتها ، و جمارة كاضة بهدومهن .

خلصت الهوسة ، سرحان صاح : ام ستار

- اي يمه جيتك ، كول يبعد امك .

- امشي انت ويا ام ادريس ، خاطر ناخذها للمستشفى ، واخذي وياج ايمان .

هدية : انا واكفة و هو جدامي لاف الغترة اعلى ركبته و يحجي ويا امي ويوصي بيها .

اندارت امي لينا وصاحت: ايمان تعاي جاي ، حضري روحج خاطر تروحين ويانا للمستشفى ومناك نطلع بيها للنجف .

ايمان : راح ادفنونها بالنجف لو تنتظرون عمامي لما يجون ؟

حاكم : انت دطي ابنج لهديوة و اصعدي ويا ام ستار ، ياله بوووية

سرحان : ابوووو ستااااار

- جايك بويه .

هدية : ناوشتني الفررخ و صعدت ويا امي و انا شايلة بتي ، وهاذ نط من البجي اعلى متني ، ذبيت بتي اعلى جميرة و طلعت امشي بمؤيد و اهود اعلى ظهره .

سرحان ما عاين ليه ولا دار عينه ، اهيس الدنيا محملة و حاطة اعلى امتونه ، وانا ابتعدت منه ولا كربيت يمه ، طلعوا امي و ايمان و ابوي راحو ويا سيارات الخذت الجثة ، و انا دشيت لبيت سرحان و اسكت بمؤيد وما يسكت ..

شفت الناس جثيرة ، ونسوان ما اعرفها .. ونظرات مرت سرحان وهي تداورني و تتبعني ما تخليني استراح ، خذيت جميرة وطلعت من البيت و انا اسكت بهالفرررخ المعذرب ، جا غير يهيد .. ما تكلي شمالك

جمارة : انا عليش ما احبنه عبنه وكح وما ينجرع

- بعده جاهل انت لا تكومين تمصرنين .

امشي و اشحط بنعالي و اهفي بعباتي .. وكومة الفروووخ وياي ، سبگلي فليح و طلع بوجهي : هااا اثوفنج طالعة ولج .

وكفت وكضيت اخوتي : شرايد مني ؟

- انا ما جاي اتعارك وياج

- ابعد غاد و خلني اردن لبيت ابوي .

- رايد اتفاهم وياج جا ثنهي نظل هيج .

- شعدك وياي بعد ، ردة ما اردلك ولا اردن لذيج ايامك المعسرات ، ميل عني و خلني امشي بدربي .

- خوث خوث ، جا انا ما اريدن اغثنج ، انا بس رايد اثوف البنية .

حجاها وهو يمد ايده اعلى امنية و ياخذها من جتف جمارة ، ردت اجرنها لجن سبكني و شالها و جمارة تكله : هده ياله هي موش بتك .. اطينييييي

شالها بين اديه و يعاين بيها ، حجيت : شلك بيها و انت التكول هاي موش بتك ، شلك ابت موش منك .

- انا رايد افتح ثفحة جديدة ، رايد اردنج .

- صفحتك خلها ليك ، ما لي رده عكب السويته بيه بجيابتي .

- غلطيت وياج ورايد اثلح غلطتي .

- سواياتك ما يتصلحن .. امش عني و هدني .

سكت و هو يمشي ، كضيت بهدومه : اطيني البت وين تريد بيها ؟

- اوثلنج للبيت جا تردين وحيدج .

سكتت و خليته يمشي وانا كاضه بميدي الما يسكت دوهناني و انا عكلي ويا بتي الكاضها فليح .

وصلاني للبيت ، نزليت مويدي من ايدي و كلت اله : ياله اطني البت

خها بيدي و كال : ثدي الباب و لا اطلعين بعد ، خووووث ؟

- خوش خوووش روح

دشيت و صكيت الباب ... وهاذ بعده يصرخ يريد امه ، اطيت فلوس لجميرة راحت اشترت له مصغول من الحجية وردت اطتهن اله ياله سكت وهود ابو راس .
.......

خنجر : ذبيت جسام بنص الجول وربطته بالعمود مالت الخمية مالتنه ، و حطيته و جعدت كباله .. سنين احلم بيها و ما خليت شي بيه ما غيرته خاطر احظى بيها و يجي هاذ الاخبن ياخذها و تصير مرته .

ورثيت الجكارة .. و كربيت منه و انا عكل ما براسي ، حطيت الجكارة اعلى ركبته فز بسرعة ، حجيت : يو ما انت الساعة راديون مرتي، حلالي ، المرة التمنيتها طول عمري يووووو ما انت .. جا هسه هي عدي .

جسام : فكني ووووولك

- احجي ياله .. كربيت منها .

- فكنييييييي

- وكت الكربيت منها بجت ؟ .. دفعتك عنها يو رادتك ؟ ... بدموعها ما شفتني .

- انت زلمة فكني و انا اعلمنك هالحجي شلووووون تكوله فكنييييي .

- انا يو زلمة جا نهبتها .. الزلمة بهالسلف الينهب اليحبها .. ما اخلي طبايع هالسلف تركبني و تخلي التمناها تنغصب اعليك .

- ما انغصبت واخذت الجلمة من حلكها ، وهي الكالتلي اريدنك .. عاين روحك يالاجرب وشوف انت ياهو و رايد بت ما تجي لنص من نعالها .

راد يهم اعليه ، صرخ جسام : زلمة فكني و لاويني زلمة الزلممممممة.

كام خنجر و مشى ليه و هو يفكه ، ويا ما فك اديه جسام ، جر روحه و كام لخنجر ، خنجر سكران ، ابوكس واحد من جسام طاح ، و هاذ وجهه و ظهرة ينز دم .. كوة يوكف اعلى حيله ، داس اعلى جرحه و تربع اعلى صدر خنجر ، و خنجر يتلاوى وياه ..

اعلى صوت صياحهم و مجاتلهم ، اتراكضو صحبان خنجر و دشو .. لكو جسام متربع اعلى صدر خنجر ومتوليه .

اتكاومو اعليه و جروه .. وتولوه رفسات و شدو بعمود الخيمة ، و شالو خنجر و هو مهدود حيلة

- شمالك يخنجر ما عرفنك رخي ، شد حيلك خووووية

- راح الحيل يخوتي ، خايبين وجرو افادي وخذوها مني .... اكظنك يزناد يو لا ... ال ثجيل ما اهدنكم والله ما اهدنكم لا ما اهجم دياركم اعلى روسكم جزات عملتكم وياي ..

- جا شنهي نظل مجابلين خنجير و هو يشكي و عوزنه ننعي و نلطم حالنا حال النساوين

- جا شنهي بيدن اعلى صويحبنا و ما عملنا ؟ .. البت عرست و هاذ زلمتها بيسينا بمصرانه .

خنجر : ما يكفيني هالكوا**** لا ما اهدن الخذوها مني واوجر افادهم مثل ما وجرو افادي .

- و احنا وياك يخنيجر ، البالك اشر اعليه و اخوتك عد عيناك .

حط ايده اعليهم و هو يتوعد لزناد وال ثجيل.
.........

سرحان : اخذنا جثة الخاتون للمستشفى ، خاطر يكشفون عليها و اخذ شهادة الوفاة .. ظلينا موجفين برا ننطر ليما يطونا شهادة الوفاة .

اندرت لحاكم ، موجف يم ايمان و ايمان تبجي و كواغد واكفة احذاها و اتصبر اعليها ، تكربيت منهم ، و جست حاكم ، عاينلي ، اشريتله يجي .

مشا وياي واخذيته اعلى كتر : ابو ستار انا و ان جنت احتاجك بالدفنة لجن عكب خنجر مالي غيرك احطه عيون اليه بهالديرة ، لزوم اوصيك .

- شنهي شصاير ؟

- امس جان عرس اخيتي
قاطعني وهو يكلي : اي سمعت ال ثجيل ماخذين البت

- وعساهم لا خذوها .. ردوها الصبح ويكولون مامس بياص و البت معيوبه ، و زلمتها موش راضي بحجيهم و هي تكول طكوني خاطر اعترف بشي جذب وما صاير

- هاي شنهي ، عود صكد

- اي والله .. رديتها الهم كبل شوي لجن ما حظيت برجلها ... الحجي هواي ما اكدر احجيه الك هالساعة ، الاريدنه منك تظل هنا بالديرة وتمش لكريم يفهمك السالفة بما جرت و ادور اعلى جسام ويا ريت تختص بيه انته و تتفاهم وياه كونك من ال ثجيل وتمون اعليه .

- لا لا اطمن هسه اردن ليغاد و افهم من كريم و ان شاءالله خير .

- انت تعرفهم ازود مني ، جسام شظنتك بيه

- هو زغيرهم وما عدي معرفة قوية بيه لجن الاعرفنه هو زلمة متدين ويخاف الله ، وبكعداتنا من نحجي ، يجثر بالدين .

- الزلمة حسب ما عرفت موش راضي اعلى تصرفات اهله و طالع منهم و هم نفسهم ما حاظين بيه، هلبت تحظى بيه انت و تتفاهم وياه و تسدها من عدك .

- لا لا يظل بالك ، امش و انا اظلن .

- الله يطيك العافية ولا تهم بعويلك ، انا عيني اعليها.

- لا ظام ام ستار وياها مطمن ، ياله ، البكا بعمرك بويه و يجعلها خاتمة الاحزان .

- الله يسلم عمرك .

طلع حاكم من المستشفى و توجه للبيت ، كعد ويا كريم و فهم السالفة منه .. و راح يدور اعلى جسام لجنه مامش ... و ظل يدور اعلومه و ينشد اعليه ، حتى لال ثجيل مشى و دش اعلى بيت سلطان خاطر يجس الوضع .. و هم نفسهم ناطرين جية جسام .

جثة الخاتون ما رضوا اخوتها تندفن بوادي السلام .. رادوها بمكبرتهم ابغداد ويا اهلها .. و ما اختلف سرحان وياهم .. بسيارة طلع لبغداد ويا شوية ازلام من ازلامع والنسوان صبيحة و كواغد و ايمان و امه ردحة .

زناد نصب فاتحة للخاتون بنص السلف من كونها مرت الشيخ ابوه .. و كامت الوادم تجبل من كل صوب تعزي .

سلطان اول يوم ما اجا ولا كرب اعلى الفاتحة من كون كل باله عد ابنه .. نزل الغروب وابنه مامش و هو كاعد اعلى نار و بت ضاحي بنص داره واعترفت بلسانها اعلى بياضها ونكرتها و ما عده حجه اعليها ، ظال يغلي بمجانه و يهيس بغلب و هو مجبور اعلى بت ما الها بياض، وضف كل ولده يطلعون يدورون اخوهم .. لليل و جسام مامش .. تسودنوا .. اجبلوا العمام و كلهم طلعوا يدورون على جسام موش عوايدة يهد البيت ويطلع بلايا اذن ، الا اذا جانت طلعته لمجان جريب .

جلجل الليل وكل واحد بهالديرة دش الداره
وظلت جلاب الديرة تنبح و صياحها يدوي بنواحي السلف ...

سلطان ما طبكله جفن و ابنه مامش ... وموهدن بيه
و راديون مجابله مصايبها و تسجب بدمعاتها اعلى بلواها .
و هدوة تنوم ابتها و بالها مشدوه بطلعت فليح ليها و تخاف لا تنجبر اعلى ردتها ليه.
زناد ضاعت اعليه العروس الجان المفروض ياخذها ويدش اعلى عروسته اليوم وما جابل غير المصايب ، ظل هو وامه و نسوانه ابيت سرحان من كون اخوه موش موجود و بايت ابغداد .
وظال مجابل امه طول الليل و يفكرون بمصيبتهم .
وكل واحد بهالسلف حاط همه اعلى كلبه و يساهر الليل بيه .

الا خنجر !!
الشال من عينه دموعه و بدلاهن بجمرة وجرة بفادة .. و قرر يوجر بيها الوجرها بنص دليلة ..

سطوا اعلى مخازن المحصول مال ال ثجيل ، جروا الحارس جتلوه و حطوه اعلى كتر ووجرو النار بمحصول ال ثجيل ..
ومشوا اعلى بيت ال ثجيل ، حطو النفط ابطل، ونصه شعله وسطو اعلى حايطه وطرو ١٥ بطل نفط ووجرو ديوان ال ثجيل ... و شردوا .

- وزناد.؟

- هاذ الحصة الجبيرة ، ما يبرد افادي بحركة بيت .. لا ما احركنه هو بذاته ما يرتاحلي كلب.

فزوا ال ثجيل اعلى النيران لهبت محاصيلهم .. و بيت الشيخ مالهم موجر ديوانه

راديون : جويعدة بحجرتي و لامه ارويحتي و ابجي و احس بخشمي و عيوني وارمة ، ولني افزن اعلى حس انفجارات بنص البيت .

كمت من مجاني بساع ، سمعت هوسة صارت و حس نعمة اخو جسام يصيح بنص البيت ويصيح : ناااااااااااار وينكممممممممممم خايبين خريجة حررررررريجة ، البيت احتررررررررررك .

طلعت من حجرتي و عيني ما اشوف النار تلهب برا و ثعوالة نفط ودخان ترس البيت .. ما تعاين ايدك من الدخان .

كامن النسوان يتصرخن و سلطان موجف بطرك الدشداشة و يصيح اعلى ولده و ذوله جرو البطاطين و نكعوها بماي ويطفون ، اجت النا تتراكض اطفي وياهم .. و لن النار تلكف دشداشة نعمة .. و نعمة كام يصرخ .. نزعها بساع لجن جسمه اخذ حرك .. كام يصيح من الوجع : خايبين راح اموت تلاحكووووولي .

اثنين من اخوته خذوه و طلعو من البيت ، و زلم و نسوان اطفي بالنار و انا كاضة بالجهال مجلبين بذيالي ويبجون .. ما خليت نبي ولا امام ما نخيته خاطر تطفى هالنار .

كلبي من الخوف .. اهيسنه فرغ .. وحس البجى و الصياح و الصريخ .. و النار .. ليلة ترهب وكلوبنه تتراجف.

ليما طفوا النار لجن الدخان ملى البيت .. طلعنا كلنا برا .. و نكحكح اختنكنا ، اجا الخبر مخازن المحصول وجرت بالنار ، فز سلطان وولده للمخازن .

عرب ابوي موش بعيد من كونه جانت كلها تابعة لجلوب و نكسمت ، حتى عرب ابوي فزوا اعلى ال ثجيل و فزعو يطفون النار .. و الوادم كلها بالشارع زلم و نسوان ..

طفوا المخازن بعد ما صار المحصول رماااااد .
الزلم تسلحت و تصيح ثار الكاع و نريد الثار .. ياهو الحرك ؟ محد يعرف ...
الحارس مالت المخزن كال شفت فرد وحيد لابس بنطرون وقميص وملثم ، ومرت جاسم كالت انا شفت واحد لابس قميص ابيض وملثم و صعد اعلى السياج مالت البيت .. كعدت جاسم ولني اسمع حس الطبة بالبيت .

بيت ووكف اعلى حيله بذاك اليوم ..
ظليت موجفه وياهم .. و الزلم كلها محروكة افادها و سلطان ابنه محروك و مضيفه محروك و محاصيله احتركت ... و البيت ما فضحى طلع الصبح و الناس كلها مكطنه عدنا .

وكفت ويا النساوين احضر بالجاي و اصبن .. بعد ما جانو امس يروحون ويردون يغلطون علي اليوم مامش وحيد عاين ليه .. وواكفة وياهم حالي من حالهم .

طلع سلطان للمستشفى يتبع ابنه الجبير نعمة و يتطمن اعليهضمدوه و لفو جسمه و طلعو .. جسمه لايحته النار لجن حركته موش جايدة .

زناد ساعة العرف بحرجة ال ثجيل ودى زلام من مضيفه لال ثجيل تبلغهم بالعونه وتوجبهم .

حتى شرطة و دوريات اجت و صفت بالباب مال بيت سلطان و يحققون ويا الولد .. وسلطان متسودن .. ابنه جسام غايب ، و نعمة محترك و محاصيله احتركت ومضيفه وجر ... جا ياهو اليهدي سلطان و غيضه .

وصل سرحان للديرة الضحى ، نزل للفاتحة ، و الناس اجبلت اعليه تعزي ، صف احذاه زناد

- امس ال ثجيل احتركوا

- يا ستار ياهو الحركهم ؟

- ما اعرف ، لجن السلف مكلوب اعلى حركتهم ، ويكولون جسام ابنه ما مبين من امس ، و سلطان ما يتأمن اخافنه يلوفها و يذبها اعلينا ، حشديت ازلام من الصبح طلعت لكاعه خاطر يواجبونه و يبلغونه شيعتاز الركاب سدادة .

- زين ما عملت ، بس جسام وينه ؟

- ما ادري عنه ، انا وصيت زلامي يدورونه خاطر نتفاهم وياه و ضايع .

- شني هاي ، الزلمة وين راح ؟

- هذا المدوهني

سرحان : درت من زناد افتر راسي ، ليلة غبت عن السلف كل هالحوادث صايرة ؟ ، عفية سلف ما يهيدلة ليله لا ما مصايبة كايمة .

تكرب مني حاكم : ها ابو مامون الكوى

- هلا بيك ابو ستار ، بشر ؟

- فص ملح و ذايب ماله اثر .

- خافنها لعبة من سلطان رايد يورطنا بيها ؟

- مشيت ليهم امس و سلطان نفسه مشدوه اعلى غيبة جسام ، و ال ثجيل كلهم يدورونه .

- شني هاااي .

- اي بعلي .

هزيت راسي و انا افرك بديه ، درت ابوي حميد موجف ليغاد ، اشرت ليه براسي ، فهم نظراتي و تكرب مني : شلونك بويه

حميد : عز الله مصابك بويه

- الله يسلمك ، الا انشدنك خنجر وينه .

- من اول امس واهو غايب

- مشيت للجول

- لا والله ما مشيت لجن ساعة العرفت عرسه تفردش و الجان رايدها عرست ، كلت اخليه اعلى راحته لجن هاذ اليوم الثالث و خنجر ماهو

- لزوم تلكا خنجر .. اذا استفكدو و طرى اعلى بالهم يكومون كل هالمصايب براسه .

- تظن هو ورى حريجة ال ثجيل .

- غيبة جسام و حركة ال ثجيل مالها تفسير غير خنجر ، لجن هالامر يو درى بيه احد غيرنا انا وياك ، خنجر يضيع و انت تبتلش يبوي .

- جا كلي امش هالساعة

- واستعجل .

طلع من عدي حميد .. وانا ظليت موجف بنص الفاتحة ... كضينا النهار كله .. و مامش خبر لا ابوي حميد ردالي ولا خنجر ظهر ولا سمعيت بجسام رد .

خلصينا العشا ، كرب زناد و كال : انا رايح لال ثجيل .

- روحتك شنهي .

- رجل اختنا ما مبين .. واختنا غاد متهومة و يو ظلينا هنا .. تطولنا التهمة و يحسبونها اعلينا ، خلني اروحن اتفكد راديون ، و انشد اعن ابنهم و اعن احوالهم .

- مو بصالحك تروح ليهم ، ظل بفاتحتك ليما تخلص فتحتنا ، نمش ليهم .

جاي يحجي زناد .. اجا حميد ، خز بعيونه سرحان .. حميد فهمه و ظل موجف بمجانه .. زناد ما رد اعلى سرحان و اخذ عمه و مشى لال ثجيل .

تكرب حميد ، حجه سرحان : ها بويه ؟

- جسام بيدين خنجر و جماعته .. و عجزت و انا احجي وياه ما رد .. و انا خايف يتورط بجتله و نروح بيها يسرحان .

- انت شفت جسام ؟

- بخيمتهم شادينه و مخربطين وجه و داجينه بظهره و حايرين شعاملين بحاله

تنهدت و انا افرك وجهي : شجاي تسوي يخنجر ، انطر يجلجل االيل و انا اروحن لخنيجر و اجرنه ، و اخلي رفجانه يردون جسام .

- و يو شهد اعليه

- جا شنهي نجتله و نتورط بدمه ، خنجر ورط روحه ويا ال ثجيل واشوفن روحي متورط وياه .

- جا نروح بيها يو تورطت انت.

- والله يا عمي تعبت ، بالعباس تعبت .. المصايب وحدة فوك الاخرى جاي يطيحن اعلى راسي ما اعرف المن التفت وياهي افرزن .. انعل ذيج الساعة الاجيت بيها لهالسلف ، وعلي طكت روحي.

ليغاد اجا زناد مورث ، متعارك ويا ال ثجيل و سلطان تاهمة بخطفة ابنه ، و زناد عصبي و نازل بيه و سلطان معايره براديون و متكاومين .. ازلام واكفة بينهم جارين زناد ورادين سلطان عنه ورد زناد شايط منهم، و دش مضيفه .

ظليت حاير بمجاني ليما جلجل الليل ولبست غير ثياب و تلثميت وطلعيت من البستان و حدرت للجول ..

ساعة الوصلت للخيمة .. ودشيت و جسام طايح بنصهم ، ومنتهي .. كضيت خنجر و توليته راشديات و صياح و انا اصرخ : ما تستحييييي ما تخجل اعلى رووووووحك .. ردي سااااااافل

كامو يجرون بيه منه و انا افلت بيهم و اردن اضرب بيه و اصرخ : من سويت هيج ما خفت تضرني ، ما كلت اخوي شنهو موقفه يو تعديت اعلى نسييييييبه ، طال غيضي منك بسسسسسسك

انهد و هو يصيح : مامش غيرك .. انت الواعديتي وخلفت وياي ، انا الحسبيتك اخوووووي و حزام ظهري ورحت اطيتها لثجيييل .

- انا الطيتها ردييييي يو ما انا الوكفت وياك خاطرررررر اعدلناك و انااااااسبنك ، لجن تفتهم وما رضت بيك ، تفتهمممممممم ، عبنك طايح حظ وسكير وموش كفو تاخذ بت شيووووخ .

خنجر : هيج صارت يسرحان ، وانا الموش كفو يصويحبي.

- اذلف عنييييييي ووجهك ما اريد اعايننه ... يااااااااله .

صرخت و انا ادفعنه ، طلع من الخيمة كلها ، و صحبانه يجرون بيه ، فكيت جسام و شاله حميد ، الزلمة يرجف اعلى الماي .. اطاه حميد الماي

كوميته كوة ، يتعثر ويطيح .. كوة يعاين .. تجيته و حجيت وياه : جسام تسمعني ، احاجيييك

جسام : ردني لهلي يسرحان .

- موش لهلك ، انا راح اخذنك للمستشفى ، لزوم يعاينك طبيب .

حجيتها و اشريت لحميد عاوني و حطاه بسيارتي و طلعنا بيه من غير درب و مشينا للولاية ، دخلنا مستشفى .. عاينوه و داوو جروحه .. و حطوه بردهة .

دشيت اعليه هو مغمض ووجهه مضبر .. خياط بكصته و بحاجبه ، و مداوين وجهه ، و مخيطين جرح ظهره .

كربيت منه و كلت اله : الحمد لله اعلى السلامة

ما رد ، حجيت : رايتك بيضة يبن الاجواد و امسحها بوجهي ، الامور تلايمت .. و البت مخطوبة و انا منطيها لرفيجي و اعرف غلطان بحكك .. و شتريد انا حاضر و الركبة سدادة .

- حكي موش منك اخذه ، وانا ما عدي وياك غير اخيتك .. ترد ليكم ولا اعرفنك ولا تعرفني و حسابي ويا التعداني .

- حكك بالتحجي ، بس البت..... قاطعني

- البت مالها بياض يسرحان ، بياضها طلعيته من دمي انا موش منها .

- سكتت ، شردن ما اعرف ، شكلله ؟ و شداري الموقف بيا جلمة ، ما لكيت غير اكلله : راديون اخيتي و اعرفنها ما يطلع منها العيب لجن ما اعرف شنهو الجاي يصير ........

- البت عاشكة غيري ، و ما اعرف حقيقتها شنهو ، وما ارضى بعد الصار ، اخليها ساعة وحدة عدي .

- جسام انا مالي وجه وياك من جهة خنجر و فعلته و من جهة حالة راديون انا ما اكللك اختي غلطانه لجن ما جاي افهم الجاي يصير كله ، و انت زلمة انا داخل ابختك .. البت بت شيوخ .. انطر جم شهر و حكك علي ولا تفضحني باختي .

- جنت ناوي اعمل التحجي عنه و استر اعلى البت و اردنها ، بس بعد العرفته .. تعذرني .

- الامر موش متعلك بيها بس ، الامر يخص سمعة ال ضاحي بخويطهم و هالامر موش هين و انت تعرف ال ثجيل وال ضاحي شنهو البينهم ، و اعلى دفه يو كب الثار ، تروح بيها زلام يابو زلام .. الجلمة عزيزة اعليه ، لجن انا اخينك و طالبها منك .

- ما راح اردنها معيوبه ، انا احطن بياضها عدكم و اكللكم رايتها بيضه ، لجن البت مغصوبة و انا ما اريدنها ، و اترجاك لا تزيد اعليه ، ما اكدر احملنها بعد السمعيته بذني عنها .

- حكك يخوي و يو مجانك كلشي اعمل و انت زدت بفضلك اعلينا ، لجن طالبك . بس تخلص السبعة مال الخاتون و ردها ، يو ردت هسه الف كال و كلت يطلع اعليها .

هز راسه و رضى ...
هديته و حطيت بجيبه فلوس خاطر يرد لهله و عفت ورديت للبيت ، تلكتني ملوك ناطرتني بالقصر ، اول ما دشيت .. عرضتلي

- طلعتك بهالليل ملثم لزوم وراها اسباب ، كلي عرفت بجسام وينه ؟

- بالمستشفى توني رديت منه

- اي وشكالك ؟

- شكال ، راح يرد راديون و يطلكها

- عزا العزاني .. يردها شلون

- يردها مرفوعة راس موش متهومة .. لجن حجته البت مغصوبه و ما رايدته .. وما يكدر يخليها عده وعي مغصوبة .

- والناس شيفهمها هالحجي ، راح يطولون اعليها بحجيهم و شيخصلها .

- ساعة الحجيت و منعت من ال ثجيل ما رديتو و هسه جاية تكليلي شيفهمها و شيخلصها ... وبعدين هدي هالسالفة و حيري .. البت مالها بياض وهاي بوحيدها مصيبة ، ماي ما ظل بوجهي و انا احاجي و اترجاه خاطر يستر اعليها، بتج و تعرفينها غلطانه ويا احد ؟

- انت تعرف راديون وتعرف اخلاقها، و هي ما تطلع الا انا وياها يو وحدة من نسوان اخوتها ..

- جا شنهي الاسباب ، اسود وجهي جدامه ما عرفت شحجي و شنطك ، هاذ يو صف ويا ابوه و حجه الحك غير نصير علج بحلوك ال ثجيل ، الله لا يوفقكم بجاه محمد اعلى عملتكم هاي ساعة الزوجيتوها من ورا ظهري و سوديتو وجهي .

ظلت ساكته و ما حجت ، عفتها و مشيت .

للصبح طلع جسام من المستشفى، اخذ تكسي و مشى لبيت ابوه ، ساعة الوصل لبيت ابوه ، السايق عاونه و نزلاه للبيت و دك الباب ، طلعو اخوته و تلكوه .

فوتوه داخل .. و التمو اعليه اهله .

راديون : ساعة الشفته دش ، مدري شكض كلبي ، كمت ارجف وانا اعايننه .. صرخت بيه نجمة و هي تكلي : امشي جيبي الجودليه الرجلج امشششششي

جسام : لا لا .. اخذوني للحجرة خلوني انامن غاد

سلطان : شتنام اخوتك فرغت اكلوبهم و هم يدورونك ، وين جنت وياهو العامل بحالك هيج .

- جنت طالع اعلى الشارع الرئيسي ودعمتني سيارة و السايك شالني للولاية عالجاني ..

- من يا عمام هاذ السايك ، وين اهله .

- الزلمة اسعفني و بريته الذمة وراح لاهله .

سلطان : هالكلام صحيح يو دغش يجسااااام

- بويه رحمة الوالديك بس خليني استراح

جاسم : شتستراح .. انولينا وليه محاصيلنا راحت مضيفنا احترك و نعمة اخونا مصوب ، و طيحتك هاي موش خالية .

جسام : ياهو الحركنا ؟

- جا غير يو نعرفه

سلطان : زناد و سريحان مامش غيرهم ، لجن وعلي ما اسكت اعليها .

نجمة : جا وكتكم خلو الزلمة يستراح و عود كعدو و احجو وياه ، ياله كوم خل نشيلك لحجرتك .

تعاونو اعليه اثنين من اخوته وودوه لحجرته ، تمدد و هو يكللهم : بس ماي

راديون : ركضت اجيبله الماي ، ترست الصراحيه العينه و اجيت ، نجمة تغطي بيه ، صبيتله ماي ما اخذ مني، جرت نجمة الكلاص ورادت تشربه ، ما رضه و كاللها

- جزت روحي من الماي ما اريدنه بعد .

ظلت تحجي وياه و هو كوة يجاوب ، ساعة الشافته تعبان هدته ووجهة المروحة الأرضيه الزغيرونه . محطوطه اعلى الميز .. صوبه .. غمض عيونه ، عافته و طلعت ، صكيت الباب وراها .

متمدد جدامي ووجها مضبر ، ومامش بجان بجسمة صاحي .. تكربيت و كعدت اعلى القريوله ، فتح عينه، حجيت : الحمد لله اعلى سلامتك .

ما رد .. بلعت ريكي و كمت ، حجه : جهزي غراضج خاطر تروحين لاهلج .

- عليش ؟

- عشيكج ينتظرج ..

- ياهو هاذ ؟

- الخلاني بهالحال ..

نشغت و حطيت ايدي اعلى حلكي ، يعني خنجر ورا حالته هاي دخيلك ربي ، نطقت : و انا مالي ذنب بفعلته .

- اشششش موش طايك اسمع حسج ، جهزي غراضج سكتاوي ولا تخليني اهيسنج .

التفيت من الناحية الاخرى و كربيت منه : وين اردن ، لا تفضحني وتفضح اهلي ، دخيلتك انا .

- يو خايفة الفضيحة جا خليت اهلج و سمعتج اعلى بالج و ما تغلطين وياه .

- ما غلطت ، يشهد الله و ملايكته و علي ما غلطت .

- الحجي هاذ قنعي اهلج بيه ، انا اسمعنه .

- لا تفضحني دخيلتك ، ما ذنبي بحالتك ، و يو رديت الناس ما ترحمني .

- كلت الج لا تسمعيني حسج .. من اسمعنه تكش روحي .. واضكر السكير الحرك كاع اهلي و عمل بحالي هيج ... لجن هين و انا وياه .. لطلع سوايته من عينه و عينج .

- عمري كله ما مترجيه احد لجن اعتبرني حرمة و اترجاك ..

- واعديت اخيج اهدنج لي السبعة و اردنج ، لجن بعد ما عرفت بحركة المحصول و المضيف ... ما ارضاج ، و الساعة اوصي واحد من اخوتي يوصلج .

دنجيت يمه و حطيت راسي و انا ابجي و اكلله : وعلي ما غلطت ويا احد ، احبن ايدك لا تفضحني
شلت راسي و انا اكلله : ابوك كال يو رديت ياخذنا للعباس و يحلفنا ، انا راضية اخذني لابو فاضل اكض شباجه و احلف ما عدي شي وعلي .

- كالو للحرامي احلف كال اجا الفرح ... انا ساعة الخذيتج ما غصبتج ووديت اخيتي تاخذ رايج وردت بموافكتج ومن شفتج بجيتي شرطت اعلى الملجة رضاتج و اخذت الموافكة من السانج .. تلعبين علي يو شايفة لحايا الوادم لعبة عدج ؟ ساعة الوكفت عليش ما كلتي انا بالي ويا غيرك .. جذبيتي علي و جاية هساع تترجيني ؟ اطلعي منا وولي عني وحسج لا تسمعينه ليه....يتبع

لقراءة الفصل التالي : اضغط هنا 
reaction:

تعليقات