رواية كحل عرب الفصل الثالث والأربعون 43 بقلم زينب ماجد

 رواية كحل عرب الفصل الثالث والأربعون 43 بقلم زينب ماجد

رواية كحل عرب الجزء الثالث والأربعون 

رواية كحل عرب الفصل الثالث والأربعون 43 بقلم زينب ماجد


رواية كحل عرب الحلقة 43

((( بقلم زينب ماجد )))

الحلقة_ 43
(أنتفاضة عشك )

جينة مشتاكَين وبلهفة
اوتسد بابك علينه
(عريان السيد خلف)

سرحان: رديت من كاع ال ثجيل وانا مدوهن، شنهو موقفي ويا صويحبي و شكلله ، تاب و غير حاله خاطر يحظى بحلال .. تالي وصلت للحلك و كالت لاله ..
شكلله .. رفضت وما رادتك .. شحجي .

اسوقن وعكلي مشتت ..
والوم بيها .. شكثر وديت عليها ، شكثر كلت الها هدي بيت زناد خل اخذنج ما ردت تالي ترضى ببن ثجيل ، اااااخ راديون اخ ..

دشينا البيت ، توني كعدت .. حطت جدامي بشرى الزاد .. كلت الها : سهمج العافية ما اريدنه شيلي

- جا ما متغدي

- روحي ما تهوى الزاد ، مبتلش بمصيبتي ، يو اجا خنجر شطلعله و شكلله ؟ سوايت راديون ما تنبلع ... ذبت روحها للنار بديها ، الا ال ثجيل ينبلعون ينجرعون ووحيدهم حاد سنونه اعلينا .

صبيحة : هلا ييمة رديت

ظليت مدنج مشتت بسوايتها، حجت : يمه تراها الخاتون موش طويبة و الزاد من امس ما حاطته بحلكها ، و اليوم حتى الماي كطعته .

- عليش ؟

- ما تهوى ، ساعة ووكتها بايد جسمها وما بيهاش حيل الحجوة .

- اكومن اشوفنها
كمت من مچاني رحت ليها ، كضيت اديتها و حجيت : ها يمة ، شعلومج ؟
ما ردت علي ، بس تأن ، كضيت اطرافها باردات لجن الغرفة موش باردة و هي مدفاية ، اندرت لصبيحة و كلت الها : خلي ادريس يزهب السيارة خاطر اخذنها للمستشفى ، اذا ظلت اعلى هالوضع تطيح .

تعاونت وياي امي و شلناها .. طلعنا بيها من القصر ، توني جاي اكعدنها بالسيارة ، وكف خنجر اعلى راسي : ها كواك الله ابو مأمون .

تنهدت و كلت اله : هلا خوية

- جا وين ؟

- الخاتون مريضة و لزوم اخذنها للمستشفى ، كطعت الزاد من امس .

- امش وياك ؟

- لا يطيك العافية ، انا اخذنها

- جا ما عدي شي ، دمش امش

صعدن امي و صبيحة بالسيارة و ادريس نزل و طلعنا انا و خنجر للمستشفى ، حجه : ابو مأمون انا اعرف الشيخ توه متوفي الله يرحمه ، و الظروف موش مالت عرس ، لجن اطيتك خبر كبل چم يوم ، و جاي اكللك باجر انا و اخوتي و عمامي كعدتنا عدك ، نملچ وناخذ المرة بلا صفكة ولا هلهولة .

تنهد و انا اكلله : خل نشوف الخاتون و نحجي بعدين

- انا اعرف البت عد زناد و زناد مصمصم يطيها لال ثجيل ، هل اريد استعجل ، اخوي اخوي جيبها اليوم خاطر افضنها باجر .

- ما ظل باجر يخنجر و فض الأمر و انتهى

- شنهي يعني ما افتهمت ، زناد معاند ؟

- موش قضية زناد ، لجن البت اطت موافقتها اعلى ابن ثجيل .

- شلون اطت موافقتها ، البت يعني انا ادريها موافكة بزواجتنا ...

- خنجر انا مستحي منك بعلي ، بس اتمنى هالموضوع ما يسبب شرخ بيني وبينك من كونك انت ازود من اخوي ومالي حزام غيرك اشدن ظهري بيه

- السالفة شنهي يسرحان؟

- اخيتي عرست و عكدوا الملجة الظهر و هساها ابيت ال ثجيل .

اندار اليه و ما نطك ولا بچلمة : رحت ليها و اعرفنها مغصوبة لجن هي وافكت اعلى ابن ثجيل ومشت خاطر ما نتكاوم انا وزناد .

- بس انا جهزيت الأخشاب الطلبتهن مني و النيشان ، و خبرت اهلي و عمامي ... يعني شنهي انتهت .

- تنهدت : كلشي بالقسمة و هي هاي قسمتها ..

- وكف السيارة

- خنجر

- بروح ابيك نزلني ، سرحان وكف

وكفيت السيارة وامي و صبيحة يحجن وياه ويواسنه نزل .. نزلت وياه هو ومشى ، لحكته : خنجر ، اوجب ، خنجرررر .

- ميل عني رحمة لابيك ميييل

- خوية بس احجي وياك

- شتحجي ٥ سنين و انا انطر ، غيريت من روحي خاطر اعجبنكم ، تاليتي يتفضل اعليه ابن ثجيل ... عليش عشمتوني ، عليش خليتوني ابني بيت و ابني احلامي و هديتي وبيتي عليييييش

- وعلي موش راضي و انا مطيها الك و هديت اعلى ال ثجيل و هي ما ردت ، هي الوافكت

- انا ياهو واناسبكم يالشيوخ ، انا العاينت فوكي و نسيت روحي شنهو و منهو ... هدني .

دفعني ومشى .. رديت للسيارة اسوقن : ساعة الكشرة يوم الشفت بيها ملوك و خلفتها ، انا من ساعة الاجيت للدنيا و هي مجابلتني معلعل بروحي ... انا انطيته و كلت الها يراديون عرسج الخميييييييس .. توافك شنهييييي .. فكرت بزناد خافنه يتفشل جدام الزلام و ما فكرت بفشلتي جدام صويحبي ... انا الواعديته و تالي بت ملوك تكسر بيه و تفشلني وياااااه

- جا يمه بهداي ، البت هم مغصوبة

- محد غصبها و الزلمة مخيرها و هي الوافكت ها خاف زناد يتفششششششل ، هاي شكللها كليلي عملتها هاي انا شلون اعديها و شلون ابلعهاااااا ، ثجيل اطي مرة ، و بت شيوخ ... هدوة و هي بتهم سبوها وردوها معيوبة ومامش مجان بجسدها صاحي ... ونطيهم مرةةةة .. الله لا يوفقك يا زناد ولا يوفق امك .. من يوم اللفت امك وابوي ما شاف الخير .. رس كواويييييي* انعل عشايرررررهم .

اطك براسي اتفل بنص هالسلف و اهدنا و امش لبغداد ، انا شعدي بنص هالرعيان ، زلمة اكعد ابغداد و اسكت ، بس هكو غير ابوي الوهدناني بكعدتي بهالسلف ، كتله بوية ما اريدن ، طبايع هالبشر ما اودنها ، ولك بويه عوووووووفني غاد .. جابني و بلاني بهالوادم الما بكصصها حيا .

.....

دش ستار للبيت و هو يشكي من بطنه ... تلكته كواغد : ها يمه سلامات شمالك

- يمه مصارين بطني اهيسنها تتكطع

- خافنك مستبرد ييمه ؟

- هو وينه البرد و استبرد يا يمة

- جا اخافنك ماچل شي موش موالم بطينتك

هدية : استريح يا خوية و خل اسويلك بابنك ..

كعد و سأل : جا لاله وينها ؟

كواغد : اخياتها ملتمات واجا ابوها اخذها .

- وانا شنهي طرطور هنا ما تكلي .

- جا شنهي الفرك ان كالك وان كال لابوك ، غير ابوك جان موجود و كاللها روحي عمي و انا اجيلج باجر اخذنج .

كام يلوي ابطنه و هو يتوعد : تجي يو ما تجي انا اعلمنها هالمستخفه هاي الما حاطتلي كدر .

- يواشك يمه وياها شمالك جا غير خذت شور ابوك .

- لا ادافعين لابت اخيج يمه ، هاي استخفت حيل وينرادلها جرت اذن .

حجاها و كام يعصر ابطنه سكتت عنه كواغد ... جابتله هدوة البابونك .. و شربها و كاللها : انا رايح لبيت غاد

هدية : هم بيه طناطل ؟

ستار : لا موش مثل كبل ما جاي اهيس شي ، بس من انامن اكوبس ..

- احسن ..

طلعت امي وصلته للباب .. و هو راح ، ردت و هي تكلي : مدري شماله هالولد شاد ويا لويله ، و هي موش لين بت اخوي بس والله ما منها صوج .

- يمه ام يسرى مشتغلة جناينها كلها سحورة و حاطة رجلها وولدها محابس بديها .. و بتها على طريجها .

- يا فلك .. خايبة بس لا صكد .

- جا موش بعيدة

- لزوم اخذ لويله و امش للسيد خافنها مسويتلها و كاطعه عنها الحبالة ؟ هل ما تخلف .

- اخذيها جا ما خسرانة شي ، هلبت الله و تحبللها بفررخ.

حجيت و انا اشيلن ابتي امنية ، حجت امي : اليوم سمعت من النساوين العصر بالقراية ، بيت ثجيل ماخذين رايدون

- ياااا ، عليج العباس

- اي والله هيج سمعيت

- مت عيني عليها ... موش خاطبها خنيجر شلون خذوها ال ثجيل .

- سلطان و ما ادراك ما سلطان .. و صف ويا زنيد جا شتظنين بعد .

- و شحالها ؟

- تلكين حال الضيم حالها .

- مت عيني اعليها النكتب اعليه انكتب اعليها .

-قسمتها بعد جا شسوي .

حيل ضجت ساعة العرفت راديون عرست وراحت لال ثجيل و هي الناطرة عرسها اعلى خنيجر، حتى بجيت و سجبن ادموعي اعليها ... جن العشك بهالسلف محرم اعلى وادمه .. مامش وحيد يحظى بعشيكته .. ولا فاخ كلب وحيد بولفه .

خنجر يومها هج للجول .. مامش غير بطل العرك يشرب و يحاول ينسى و يجرع مصيبته .. صاح و صرخ بنص الجول و بس رفجانه الشقاوجية مجابلينه .
شرب ليما تاخ ..

ساعة السمع حميد بالديوان بت الشيخ مطر نطوها لابن الشيخ سلطان .. تسودن و طلع يدور اخيه .. لجن ما لكاه ... رد للقصر ينشد اعلى سرحان و سرحان بالمستشفى ويا الخاتون .. ساءت حالتها وزادت ..
المستشفى بلغو سرحان .. ان ساعتها قربت و المرة جاي تعالج .. ردها للبيت و اقرا عد راسها العديلة .

صار الصبح
وطلع فجر جديد اعلى ديرة ال جلوب ، و كل شيال كلب .. كلبه هايم بسالفة ...
صحت كواغد و اهي شايلة هم بت اختها لالة من يسرى و امها ..
و صحى سرحان و هو شايل هم خنجر و متفاشل وياه ، و شايل هم الخاتون الطايحة عده .
وصحى حميد و هو يدور اخيه
و صحى زناد و هو ناطر الظهرية يزفوله مرة جديدة يحطها ابيته ..
وصحت راديون اعلى مصيبتها الما جانت اعلى بالها .

سلطان : نيشان مرتك وينه يجساااااام .

جسام : النطيته الك هاذ نيشانها .
حجاها و هو يدير وجهه و يمش .

صاح سلطان : جسااااااااااام

وكف : شنهو الرايده يبوي ، حدها الروح واصلة الهامة

نعمة : احج ويا ابوك عدل جساااام.

سلطان : جاي تضمضم لبت ال ثجيل .

- ما ضام عنك شي ، و ما عدي شي غير الكلته

مشى سلطان اعلى عكازته و كاله: وايييييدك هاااي

- انخدشت اول امس .. اترخص منك ، عريس و ما نايم ليلي .

كضاه نعمة : من تحج ويا الوالد دنج واحج .. وهد عنك الحجي المعلك .

سلطان : هده ينعمة .

مشى جسام و راديون واكفة اعلى صفحة اطكطك باصابيعها ، من شافت جسام مشى ، صاح جسام : عدج

اندارت ليه ، هو رد لمجانه و كعد و حط ايده اعلى عكازته .. وصاح : نجمممممممممة

- امر يبو نعمة

- رايد اعرف الحك يم جاسم .

- تامر .

راديون:- اعاين الهم وخايفة منهم .. خافنهم يعرفون الصار و يفضحون اعلي ، شما احاول اثبت روحي و ما اهتز .. لجن كلبي يرجف و موهدنه بامري .

اندارت الي و كالت امشي ، مشيت و عفت سلطان .. وولده ياهو اليكعد ينزل يحب ايده وراسه ، اطتني مسطحة وكالتلي : امشي ويا النسوان جيبي ماي و ردي .

حجت ضرتها : خلها تترس من الحنفية .
عاينت الها و هي تخزرها و تكللها : الماي مكطوع

حطت بيدي و خذتني مرت ابنها و مشيت ، لا حجت البت ولا انا حجيت ، كلبي موهدن بمصيبته خافن يعرفون وانفضح و اهلي ينفضحون .

رديت للبيت .. بيته جبير لجن موش قصر مثل قصر ابوي الصار السرحان ، ذاك يكفي عشيرة تسكنه ..

دشيت البيت و انا الماي فوك متني .. حطيت الماي و جرتني نجمة : اسمعي يبنيتي ، حسبيني مثل امج و احجي وياي ، انا ما اريدن افضحنج .

- عليش انفضح انا ما سويت شي

- بس جسام يكول ما طلع منها دم .. و مغتاض ويكل لابوه رايد اطلكها ، و يو طلكج باول يوم عرسج .. تنفضحين عكل اخوتج تطيح بالطين .. وتنكسين روسهم .

- انا بت الشيخ مطر وموش انا الاغلط و اجيبن الفضيحة لاهلي الله يعلم انا ما غلطيت ويا وحيد ، و ان جان ما طلع دم .. موش ذنبي انا جاي اكللكم ما غلطيت ويا احد ولا هاي طبايعنا .

- يعني ساعة الكربج ما طلع منج دم ؟

- ما اعرف شنهي الأسباب ، لجن وعلي انا مالي ذنب ، وروح ابوي ذاك العزيز من عسنه العباس يعابيني ويموتني بهالساعة يو غلطيت و شوهيت عكال ابوي .

-بيش صوب ايده هو ؟

- ما اعرف ، بس عمة دخيلج انا .. بريه وروح ابوي .

- والله ييمه ، انا شكدر اعملج ، راح اروح اترجاهم و احبن اديهم هلبت يرضون .

حجتها ومشتني و هي اتفوتني داخل، مشت للديوان ، و انا مشيت للحجرة ، جسام متمدد وايده اعلى راسه ، ساعة الدشيت ، كعد من حيله : وين رحتي

- اجيبن ماي

- موش البوري يجري ، عليش طلعتي ؟

- نجمة كالت ما يجري .

- توني غسليت مننننننه

- عليش تصيح من ساعة الدشيت بيتكم و انتم اتكشون بوجهي و تصيحون علي ، شنهو الجنيته وياكم .. حلفت الكم انا ما غلطيت ويا احد و روح ابوي انا مالي ذنب .

- هشششش حسج رايدة تشهرينا انت

- انا اشهر روحي يو انت التكل لاهلك ما طالع منها دم .. كتلي نامي و تطمني ، و اطلع و تروح تشكي لاهلك و تفضحني جدامهم .. هاي موش فعايل زلام ..
حجيتها وانا ابجي.

فتح عيونه حيل و هم من مجانه و اجا عدي : شحاجي انا، ما حجيت شي موش جدامج كلت له هو هاذ النيشان .

- توها حجت وياي نجمة و تعرف بالموضوع ، جا ياهو الكللها غيرك .

- شتعرف ، انا ما كايل ، لا تكليلي سحبت السانج ؟

سلطان : جساااام

التفت و هو كاض براديون و يسمع ابوه اعلى الباب ، همس : لا تحجين اي شي
وحط ايده اعلى حلكه

فتح الباب لابوه وظل واكف اعلى الباب، شال عكازته و حطها اعلى صدرة : تجذب اعليه ولك

- عليش اجذب

- لا تتراوغ وياي .. و احج ولك

- حياك دش

- جسااااام

- بوية البت نيشانها عدك .. رايدني اجذب عليك و اكلك لاله ؟

دفع ابنه بعكازته و دش للحجرة ، انا بسمريت بمجاني ، يعني نجمة جذابة و جسام ما حاجيلهم و انا شكيتلها و حلفت الها ؟

تكرب مني و حجه : وانا الانشد عليش سريحان اجا ليجاي يهادد وما يريدج تظلين ، اثاريج معيبوبة يبت مطير .

- يعيب اللي يعيبني ، انا بت الشيخ مطر و الزود لابوي ، و موش بنات الشيوخ الينعابن .

- و تحجين بزود ولج
دفعني بعكازته و صاح : و تحلفين بنجمة تستر اعليج وجدامي تحجيييين بزوووود يالمنهوووووبة

هم جسام و كض ابوه ، دفعه و هو يصرخ : ايدك عني وووووووولك

ككت اعلى حيلي و حجيت : موش انا الحلفيت نجمة .. ولا انا التوسليت بيها ، ان جان نجمة تجذب خاطر تعيب اهلي ، فعدي اهل ياخذون حكهم وزايد .

نجمة : طكج العباس كون ، انا الجذب ولج .

جسام : بويه انا جاي اكللك ........ قاطعه سلطان و هو يصرخ : جسااااام اطلع منا

- بوووويه

جراه نعمة و هو يكله : هده وامش

وضل يسحب بجسام و يطلعه .. خاطر ما يشهد وياي ، كليبي يرجف ، بس جان عيني اهتزت يو دمعيت كبالهم ، يالكوة النزلت علي بذيج الساعة لجن ما عدي غير اجذبنهم و اذب الحك عليهم .. دام رجلي صاف وياي و مجذبهم .

طلعوا جسام و سلطان حجه : اكعدلج يبت مطير و ما اهدنج الا وانا مطلع الحك .

راديون : الحك سمعته يعمي و غيره ما عدي .

جابتله نجمة السكملي حطو وكعد و هو يكول :- ولج انا سلطان .. وانشدي عني وخلهم يحجولج .. افرن اعكول و انا بمجاني موش تجي بت بكدج تجذبني و اطلعني اعلى باطل .

- حاشى اجذبنك و انت عمي .. لجن ما عاش اليدور الفضيحة لاهلي يو يطش بسمعتهم .. ضاحي جدي و ثورة العشرين تشهد لامجاده .. و اليدور الزله اعليه خل يدور بعيد عني من كوني طلعت شجرة زيتون ما تذب الثمرة الردية .

سمع بأسم جدي وهو انتفض من مجانه : نعلت الله اعليج واعلى جدج ولج ... ضااااااحي ما ينضكر ابيتي ..
وانهم اعليه يطكني بعكازته .. ويضرب و يصيح ما ينضكر ما ينضكرررررر .
ويشتم بجدي .

طلع و هو يصيييييح : نعمممممممة

- امر بويه

-تاخذ هاي المعيوبه و ترد بيها لبيت زناد و تكله يغسل عاره ، اخيته موش بت وبياضها ما طلع ...
صاح : فهمت يجساااااااام

جسام : البت بريه و رايتها بيضه ، وما يجوز هالحجي

سلطان : جسااااااااام

حجاها و طلع للديوان وولده ملتمين اعليه ، صاح : جسام يو نطك و حجا غير هاذ الحجي ، ما اتفاهم ويا واحد بيكم ... كلكم اجمعنكم.

نعمة جر راديون من راسها و حطاها بالسيارة و شحطها لبيت ازناد ، و اخوة جسام التموا اعليه

- غير الحجاه ابوي ما ينكال .. فهمت

- المرة ملجت اعليها وهساها عرضي ، شلون راضين الفضيحة ليه و انا اخووووكم

- البت خذيتها يو لا ؟

- خذتها ورايتها بيضة و الجاي تسوونه ما يجوز .

- ابوي يكول جذب

- موش جذب و نيشانها طلعته امس

- تحط ايدك اعلى كتاب الله و تحلف

- الله و كتابه ما يرضى بالجاي تسوونه

- تحلف .

- امشووووو عني

-تعال جاااااي ، لو نطكت بغير الحجاه ابوي ، ما نسلم جساااام

- ابوك رايد الفضيحة

- و ينفضحون دام بتهم معيوبه .

- صلاتك وين وانت مستسهل الفضيحة ، خايبين خافو ربكم ، هاي بت و احنا عرب شلون ترضونها تفضحون بت و تشهرون بهلها .

وصل نعمة لبيت زناد ، و دك الباب و صاح : يبو يااااااااسر ، وين الشيخ زنااااااد .

فز زناد و نسوانه الأثنين و ملوك و طلعو اعلى صريخ نعمة ، اول ما فك الباب ، دفعها نعمة و صاح : اغسل عاااااارك يزناد البت موش بت بيوت و بياض ما الها .

زناد : شنهي الحجي ينعممممممممة

- هاذ الحجي يزناااااد البت معيوبه، و العار لزوم ينغسل

صرخت ملوك و زناد كض براديون : صكد الحجي هاذ ولج .

- جذابين و جاي يتهموني و يعيبوني باطل ... انا بريه وعلي .

كامت تصرخ و نعمة يكله : البت ما طلع بياضها يزناااااااد ..

ملوك كضت بتها و زناد جراها و كام يجتل بيها و يدفر ، و ملوك و نسوانه يجرن بيه و هي تصيح و تصرخ : وروح ابوي جذابين وعلي جذابين ، انا مالي ذنب.

نعمة هدهم ورد البيته .. وزناد يصيح : اليوم اجتلها و اغسل عاري منها ، اليوم اطهر سمعة ابوي من گليلة الشرف

يصرخ و يجر بيها من ورا امه و ملوك واكفه بعينه و تكله : حيلك عنهاااااا

- اطيني البت يمممممممه

- بتي ما غلطت يزناااااااد ، ال ثجيل رايديلك الفضيحة

- شلوووون وبياضها ما طالع.

راديون : طلعلهم بياضي جسام و ابوه جذباه وعلي هاذ سلطان ... انا مالي ذنب وروح ابوي ما غلطيت ويا احد .

- بياضج الطلعاه جسام وينه ؟

- حدر الجودليه ، و سلطان جذباه .. وروح ابوي خوية انا ما غلطت ويا احد و جاي يتهموني باااااطل .

كامت تبجي و تصرخ و هي لابدة بسد امها و كاضة بذيالها.

لبس زناد و طلع من بيته ، اندارت ملوك و بعدت نسوان ابنها و انفردت ابتها و كالت الها : احجيلي الصدك بياضج طلع يو لا ؟

- يمه وعلي ما غلطت ويا احد

- انا امج تحجيلي يراديون موش تحلفيلي .. سترج و غطاج احجي يبتي

- يمه كربني ومامش دم

لطمت اعلى وجهه : شلون دم مامش ولج

- ما اعرف يكلي مامش دم ، جرح ايده و مسح الدم و اطاه بياض و لهساع هو ما معترف ويكللهم هاذ بياضها .. و انا حجيت حجايتها ما لي غير الوذ بسد حجايته

- وشلون هسه ولج

- سلطان مصمصم الا يفضحني يمه و اظننه راح يجبر ابنه اعلى فضيحتي .

- زناد متهور و عصبي واخافن لا يتورط وياهم وننفض .
كامت من مجانها طلعت وكضت مرت زناد و كالتلها : اتلبسين عباتج و تروحين لبيت سرحان و تكليله يجي بساع ، الفضيحة راح تطول اخيته .

كضت عباتها ليلى و طرت الدرب ودكت باب القصر ، طلعت الها ام سالم : ها خالة تفضلي ؟

- سرحان وينه

- جوا توا كعد

دفعت الباب ليلى و دشت و كالتله : الحك يسرحاااان

سرحان : خير سلامات

- ال ثجيل ردو راديون و يكولون موش بت وبياض ما الها و هساه ابيت زناد و زناد راح ليهم

فز من مجانه بهمه و كاللها : شتحجين انت ؟

- جاي احجيلك الصار .

سرحان : الانسمع ما اريدنه يطلع و اليطلع جلمة لسانه احشه ، ندهولي كريم بساااااع ، ام ادريس

- ها خالة

- وصي ادريس يجيب الشيخ للخاتون يقرالها العديلة ، الزوم اروحن انا .

طلع من قصره ، كض سيارته ، مرت زناد كعدت ورا و طار بيها .. وصل و دش للبيت ، كضته ملوك : الحك يسرحاااان الفضيحة اعلى اعتابنا

- راديووون وينها ؟

- داخل

راد يدش ، كضته : انا احجيلك ولزوم تفهم مني خاطر تعرف شتحجي ، البت مالها بياض و ما طالع لجن ابنها مطلع الدم من جسمه ومطي بياضها .. و لهساه يكللهم البت برية لجن سلطان ما مصكده ..

- لا تسودنيني راديون موش بت

- تحلف و تتكفر مالها ذنب ، ماعرف شنهو الصاير لعبة من ال ثجيل .. شنهو الصاير ما اعرفنه لجن مالنا غير نكض بجذبة ابنه ، البياض الطلعاه ابنهم حدر فراشهم .. لزوم تحكهم بهالجذبة و تذب الحك اعليهم ، الحك زناد تراه عصبي ويو عصب ما يوچد احد.

- اسمعيني عدل ، تاخذين راديون وتخلينها ابيت عمي رحيم و ما احد يعرف بيها و هالامر يضل بيني و بينج حتى زناد لا تكليله .. وانا رايح ورا زناد خاطر افهم السالفة منهم .

مشت ملوك بساع، لبست نقابها و بوشت بتها و طلعت بيها ، سرحان طلع ، ويا ما جاي يوصل سرحان ، زناد لاف بسيارته جدامه ، اشرله ينزل .

ويا ما نزل و سرحان نزل ليه ، ودفعه حييييل : هاذ الجنيته من اااااااااال ثجيل ، كلت الك عدوين ابوييييي لا تصاحبهم .. كلت يوووووو ما كلت .

- انت جااااااي تلوووووومني ، اختنا مامش بياض الها ، و جاي تلووووم بيه ، خلنا نلم الفضيحة ويوما نلمت راديون ينغسل عااااارها .

- العار اعليك يالررررردي ، شعملت بينا بسبب غرووووورك

كضاه زناد : ان جنت رايد تتجاتل وياي موش وكته يسرحاااان ، رحت ليهم و كلهم جلمتهم وحدة و رجلها مامش .

- لزوم نلكا رجلها خاطر نجذب اهله

- و فضيحة سلطان ؟

- دام ابنه موش حدر ايده سلطان ما يكدر يحجي شي اذا ابنه جذباه يتفاشل بين العشاير ويطلع بالوجه الاسود .. ذب البت ابيتك خاطر يفتعلها ، و انا طلعيت راديون من بيتك

- وين وديتها

- مالك غرض ، اللي لزوم نلكاه هساع جسام .

........

سلطان : جسااااااام وين

- عافنا وطلع

- عافكم وطلع شنهيييييييي انا كلت الكم ما يطلع يوووووووو لا .. كلت الكم ما يحجي غير الانا حجيييييته .

- بوية زلمه شكده شكبره شنكدر نكضه ، ما يرد اعلينا و يطكطك بسوالف الدين اعلى روسنا ، شنحج و صاح الله كال و محمد حجه و علي وصى ...

- اطلعون جسااام من حدر الكاع وتجيبونه عد اجدامي ، بساااااااع ياله .

........

رد سرحان لبيته ، و زناد وياه و الدرب كله سرحان يحجي على زناد .. و يتعاركون حجي هاذ يلون وهاذ يرد و لمن توصل للعركة كلش يسكتون .. ويرد سرحان يحجي .. ليما وصلوا القصر .

دش سرحان ، وكف الحارس كاله : ابو مأمون اجا عليك جسام ابن سلطان .

- وينه ؟

- نطرك هنا شواي و كام كال اردله العصر عود .

سرحان : يا الله دامه اجا بدون ابوه و اخوته معناه بعده اعلى رايه .

زناد.: اعلى رايه وماية بس الحك شنهي ، راديون صكد مالها بياض يو بريه ؟

- اختك تصكدها بلا شوف .

- ويو جان صكد مالها بياض ، شنهي احطلي كرون و اصدكها و انطر رجلها يتفضل اعلينا هلبت يسترها و يردها لينا وره جم شهر .

- رايد جتلتها ؟

- البت مالها بياض ، شنهي مكرنين و نسكت .

- و البت تحلف مالها ذنب .. و الشيع اعليها ال ثجيل موش غيرهم ... من هاذ تفكيرك انا بعدتها من بيتك ..

- الفضيحة يو وصلت المضيف انشهر انا و عكالي .

- اللي لازم نلكاه هسه جسام ، وين الله و ابو الحسن علي و نحظى بيه .. جا فكينا الشدة كلهااااا دامه وياها ... بس المشكلة انا حزامي خنجر اللي انت ما رضيت تطيها اله و هساه ما ادري بحاله ... الله لا يوفقك كون بجاه العباس .

- العباس يطكك وافتك منك .
كام زناد و طلع من البيت ، سرحان مشى خابر اعلى اخوة الخاتون خاطر يبلغهم بحالها و يجون للسماوة، انطاهم خبر ، و طلع يوصي سالم يدور جسام ..

راح للمضيف زناد كاعد : كون خبرت احد؟

- شخبر بس وصيت احد وين ما يلكا جسام يصيحه ويكله زناد يريدك

- زين تسوي

- هسه شراح تسوي ؟

- امشنا البيتك لزوم نوصي اهل بيتك ما يطلعون السالفة ، هلبت جسام مار غاد اعليكم .

مشوا للبيت ، كريم كاعد و راديون تبجي وملوك واكفة ، فز زناد و صاح : ولج شوهدنتينا ويا الوااااادم بربوووووووو*

كضاه سرحان ورداه ، و اندار لملوك : انا شكلت؟

ملوك : ان جنتو رايدين الفضيحة هاي هي جدامكم اجتلوها و افضحوا ارواحكم

سرحان : انا موش كتلج وديها البيت عمي كريم ليما نلكا الحل ونكض رجلهاااا

ملوك : الحل مو بطلعتها ، انا خذتها ومشيت و نص الدرب ورديت... اكعدوا الحجي موش مال وكفة ، ان ما كعدنا و شغلنا عكولنا ننفضح .. و الفضيحة اعليكم انتم موش اعلى وحيد غيركم
واشرت على سرحان و زناد و كريم .
كعدوا وخلنا نتفاهم

كعد زناد و هو يهدد و يخزر براديون ، وراديون تبجي ،

ملوك : اسمعني يزناد الوكت موش وكت هواش .. اذا ما حطينا العكول بالراس ، روسنا تصير حدر الرجلين

سرحان : و الراي ؟

- ان جنتم ناطرين الفضل من رجلها .. بفعلتكم هاي تحطون سمعتكم حدر ايده و يو يتكرم اعليكم ويسترها يو يصف ويا ابيه ويفضحها .. و بهالوضع حياة بتي اعلى جرف الموت .

زناد : تستاهل الموت

ملوك : وان ماتت الفضيحة ما اطيح عنك يزناد ، ويضل يتأشر اعليك ....هاذ الاخته معيوبه و جتلها .. اختك هاي يزناد ... يو شفت احد راكبها .. ابريها وكول ما شفت

- جا كليلي شد استيل و اتنومس بيهن

- سمعتك هااااي ، ما تطي بيها زناد انت شيخ السمعة لا تجيبها المضيفك و الجتل لا تحج بيه

سرحان :هدونا من الحجي هااااذ ، فضيني الراي شنهي .

- سلطان جابها لهنا خاطر يفضحها ويفضحكم ، لجن ما عدة دليل اعليها وابنه و هو ابنه موش وياه وناطر ابنه يضغط اعليه خاطر يفضحكم و ينكس عكلكم ... لجن فضحة اختكم بطلعته من بيته .. ويو ظلت راديون خارج بيته حتى يو ما عده دليل راح يشيع اعليها الفضيحة .. و جلمة عروس انردت لهلها مصباح عرسها توفي الفضيحة ان جان طحتو بدليل يو ما طحتولكم.

سرحان : كلامج صحيح .. بس شلون تردها و هم تاهمينها وابنهم ما حاظين بيه ؟

- مالك غرض بأبنهم .. الأريدنه منكم تهدون المعارك بينكم و تحطون مشاكلكم اعلى كتر و تخلون اديكم ايد وحدة و تكفكفون اعلى اخيتكم .. واريد اليكبس .. و اريد اليرفع .

انت يسرحان تاخذ اختك وتمش لال ثجيل و تحكهم بحجاية ابنهم .. دامه كاللهم خذيتها ورايتها بيضه و اطاهم بياضها ، تكض هالجلمة و تحكهم بيها .

ويو حجو حجاية لخ .. انت التحكهم ..
وتكللهم : اعلى اي اساس جبتو البت ؟ موش كدم الكم ابنكم بياضها امس ؟ موش الصبح نزلت عد ايدك و حبتها وكلشي مامش ؟

والكالك كاص ايده .. يجذب
جذبه و احجي بحيل صدر و خل الحك اعليهم و كللهم : بناتنا بنات الشيوخ و العيبة ما تطلع منهم و الحجي هاذ ما ينرضي ، امس طلع بياضها و اليوم ياله ذكرتو بياض مامش ، شنهو نمتو و كعدتووووو ؟
وحط الحك اعليهم و خلي راديون عدهم ورد .. الجذبو بعد الحك اعليهم و الما جذبو البت مستورة و القضية منتهية

سرحان : وهاذ الحك .. اعلى عينج نور

ملوك: موش بس هاي .. وتحكه اعلى اي اساس طاك اخيتك بصباحية عرسها ، هي تكله انا ما عدي شي ، و رجلها يصيح ويكللهم بياضها صدكي .. و هو صاك الباب اعليها و يطك بيها والا تكول اللي يرضاه .

سرحان : طاكج هو ؟

- اي

- سهله

ملوك : انت يزناد تكعد بمضيفك .. اليجيب طاري اختك اعلى السانه تحش راسه .. وما تخلي اي واحد يجيب سيرة الشيوخ بشين .. ويو شما جانت الحقيقة تحطها حدرك .. و تنصر اختك و تبيض سمعتك ، خوووووش

زناد دار وجهه و هو يكول : الله لا يوفقج يراديون ساعة الفضحتينة و خليتينا مكرنين نسكته اعلى الفضيحة و نطمطملها .

سرحان : يو ما عطيتك السودة جا اليوم عرسها و فرحة اخيتك شاكه حلكها يالردي و جاااااااي تفك حلكك انت ابووووو الراهي

ملوك : جا كلنا ، موش كلت مشاكلكم تنحل اعلى كتر ، و تخلون اديكم وحدة

اندكت الباب ، كام كريم للباب ، و راديون تلبس بنقابها و تبجي ، دش كريم لهفان : سرحاااان سرحاااان

- هااا

- الحك الخاتون اطتك عمرهااااا

صرخ سرحان و هم راد يطلع ، كضته ملوك : اختك يسرحاااان .

- الخاتوووون امي مااااااااتت

- يو صارت الفاتحة و اختك ما راده لبيت رجلها تنفضح و زناد توه رد منهم ، يحكونه يو رد عليهم .. اختك اولى من الفاتحة يسرحااااان .

......

جسام : طلعت من بيت ابوي وانا كل عكل ما ظال عدي ، البت التمناها كلبي اسنين .. تطلع موش بت ومالها بياض ..

حاير شرد اعمل .. اسكت ابوي موش راضي اعلى سكتي .. ونجمة سحبت السانها ودام عرف الحك ما راح يسكت .. طرد البت من بيته .. شنهو الاسويه

توجهت لبيت سرحان ، خاطر افهمنه اعلى سالفة اخته و اطلع من خطيتها ، مشيت للبيت .. ماموجود ، نطرت شوي ، لجن كلت موش مال نطرة .. خل امش اعلى بيت زناد و احجي وياه .

توني جاي اطلع من العجد مالت القصر ، و يطلع خنجر رفيج سرحان جدامي ، عرفت هاذ الجان خاطبها ، درت عنه و مشيت .. وكف جدامي

خنجر :- وين ؟

- ميل من جدامي

- خذتها ؟

- امش من جدامي لا والكعبة حركة دمي كلها اذبنها بيك

- بيك خير انزل وياي للبستان و نشوف ياهو اليذب حركته باللاخر

تكاضضنا من ياخاتنه و نزلنه و هو يكلي : بجت و رادتني موووووش يو لاله ، غصبتها و خذيتهاااااااا يال*****

ويا ما حجاها ، اطيته بوكس طيحيته للكاع ، وطحت اعليه بوكسيات وريحة العرك تعط منه ، نمت اعليه و انا اخنك بيه ، ما اهيس الا السجين تندج بظهري ، و دفعني من فوك صدره .. و جر حبل من جيبه .

كمت اعلى حيلي ... و هو كام حط القبضة الحديد بيده و ضرب بوكس ابصدري ، اهيس اضلاع صدري تكسرن حدر ايده ، جاب البوكس اللاخ اعلى وجهي ، طحت للكاع فز فوكاي ، كمت اتلوى وياه ، حط رجله اعلى جرح ظهري و جر اديه شداهن بحبل ..

انهد خنجر بلا وعي بجسام و هو شارب ..
وما اكتفى منه ، جراه وخذاه للجول ... يتبع

تعليقات



حجم الخط
+
16
-
تباعد السطور
+
2
-