رواية عائلات راقيه بفسادها الفصل الحادي عشر 11 بقلم اروى طاهر المسلاتي

 رواية عائلات راقيه بفسادها الفصل الحادي عشر 11 بقلم اروى طاهر المسلاتي

رواية عائلات راقيه بفسادها الجزء الحادي عشر

رواية عائلات راقيه بفسادها الفصل الحادي عشر 11 بقلم اروى طاهر المسلاتي


رواية عائلات راقيه بفسادها البارت الحادي عشر

ارسولان:مبعد يده يلي تقطر دم ويفتح في دولاب المخزن بيده الثانيه
قلب الدنيا ومفيش اي شي يربط بيه يده خصوصا انه ميقدرش يخش للحوش وهوا هكي !
تكنطى لما ملقاش شي قدامه وضرب الدولاب برجله بقوه وهوا حاط يده على عيونه من الاآم
تلفت بيطلع شاف ماريا واقفه وواضح على وجها علامات الخوف
كأنها ندمت انها جت
ارسولان:شن تبي !
ماريا:بلعت ريقها وقربت بهدوء ....شفت حالة يدك من فوق
قلت نجي نعطيك هادم ممكن تكون بحاجتهم ...وحطت الشنطه قدامه
ارسولان:قرب فتح الشنطه وكان فيها كل شي يبيه تقريبا ....قام عيونه دقايق
صحيتي ....ونزلهم بسرعه يطلع في الشاش الابيض
ماريا:س سلمك....وطلعت
وصلت لعند الباب بخطوات متردده بس وقفت عند الباب
ادرقت وهيا تشوفله بحذر عشان ميحسش بوجودها
كان ارسولان حايس في روحه ومش قادر يخدم بيد وحده
استمرت ماريا تشوفله بدون صوت لين خلعها ارسولان وهوا يقول
ارسولان:شن مزال تبي واقفه!
ماريا:بصوت هاااادي...وووك عليا
ارسولان:طاحت من يده الشنطه
ماريا:طلعت من خلف الحيط بشويه....كنت نفكر لو محتاج مساعده ولا لا!
ارسولان:تمام كويس مش محتاج شي
وطاحت من يده شيشة المعقم تكسرت
تنهد ارسولان بتعب وقام راسه لي ماريا يحكي بتوتر
كان تعرفي اديري العفن هاذا ديريه
ماريا:كانت ملامحها من برا عاديه بس من داخل تنقز من الفرح اخيراااا ارسولان طلب منها شي ممكن تبيض صفحتها معاه!
من فرحتها استمرت تشوفله زي البلهاء
ارسولان:يشوفلها وقام حواجبه بمعنى شنو!!؟
ماريا:اااءه اي صح اسفه

خذت صونيه قريبه ليها وطلعت لي الشيشمه يلي برا عبتها اميه ورجعت
خذت قطنه وقعمزت تمسحله في الدم
مشهد رومنسي زي هادا مفروض البطل يتأمل في ماريا ويتفرج عليها
بس للاسف ارسولان مش هكي🤷🏻‍♀️
اول ما بدت ماريا تمسحله في يده ارسولان مسك تالفونه بيده الثانيه
كملت ماريا مسح الدم والجرح قعد واضح
وقفت تفكر في المطهر يلي طاح تكسر وارسولان لاحظ الشي هاذا
ارسولان:افتحي قجر السياره من داخل تلقي كحول
ماريا:قربت على السياره وهيا واخده بالها كويس متبيش ادير شي غلط قدامه
فتحت قجر السياره ونصدمت!
سوارات لبسة البودري شنو يديرو عنده!؟
حتى رؤى في عرسها ملبستهمش امالا هاذم متع مني
ارسولان ؛شن صار معاك!
ماريا:بلعت ريقها.....اي لقيته
خذت المطهر وسكرت القجر كأنها مشافت شي

_____________________________________

رؤى:حست بي حركه على السرير !
قررت انها ادير روحها راقده
لان طول الاسابيع يلي فاتو اول ما تفيق رعد يرجع لي السرير وحتى تسأله ميجاوبهاش!

رعد:باعدها من على حضنه بشويه وبهدوء وناض من على السرير
وكانت رؤى ياذوب فاتحه عيونها تراقب فيه
طلع رعد من غرفة النوم والمره هاذي ناضت لحقاته رؤى
قامت شعرها ولبست الطرف الفوقي لي الروب ومشت وراه

رعد:نزل لي الطابق الارضي وخش الحمام ورؤى تراجي
هل غلط يلي ادير فيه؟هل رعد ميدير في شي نزل للحمام بس؟!
لكن في حمام في غرفة النوم ليش ينزل لوطه؟
قاطع تفكيرها رعد وهوا طالع من الحمام لي الصاله
كان الحوش كله ضلام وهدوء
وقف رعد في نص الصاله وفرش قدامه المصليه وبدي يصلي
زادت حيرة رؤى اكتر واكتر بس مع هاذا صبرت بالها لين كمل صلاته
رجع ركب لي الطابق الثاني وهنايا ماتت خوف لو خش للغرفه وملقاهاش شنو بتقوله؟
بس مصارش يلي في بالها!
ورعد كمل مشي وفات غرفة نومه ....
تبعاته رؤى بي الخطوه ....لين خش رعد غرفته الاولى هوا ونجمه💔
هنايا فهمت رؤى ان يلي كانت شاكه فيه صح
هوا تقريبا كل يوم يرقد في نفس الغرفه!
منساش مرته ولا رح ينساها بس شنو ذنب رؤى من هاذا كله!!
وقفت قدام الباب وحطت يدها ع المقبض بتفتحه
بس بعدين تراجعت ورجعت لي غرفتها💔

________________________________________

كل الهدوء يلي كان في اي عيله طبيعيه الساعه 3في الليل
مكانش موجود عند حوش العروسه!
لانه الساعه3في الليل طلعت عيطه قويه من حوش العرس....
وكانت صاحبة العيطه هاذي هناء ام العروسه
لما شافت رحمه مقطعه وريدها ومقعمزه تبكي كأنها تراجي في دمها يكمل وتموت
خشت هناء وهيا تخبط على وجها وتعيط ورحمه عرفت ان خطتها في الانتحار فشلت 💔

______________________________________

ماريا:لفت يد ارسولان ولصقتها گ خطوه اخيره !
ارسولان:حرك صوابعه بقوه
ماريا:لاااااا!...خلي يدك ترتاح معش تكثر عليها الجرح قاعد جديد
ارسولان:تمام....وناض من مكانه عطاها بي الضهر وهوا يصلح في السياره
نوضي روحي الدنيا ليل ومعش تعاوديها وتجيني في وقت زي هاذا
ماريا:وقفت ....لو مشفتش ان يدك مصابه هكي مكنتش جيتك!
ارسولان:تلفتلها ....بس ديري بالك وقت زي هاذا ميطلعوش فيه الا البنات يلي مش مزبوطات
ماريا:عقدت حواجبها في بعض وارسولان لاحظ ملامحها الزعلانه على وجها
ماريا:سكرت الشنطه يلي جابتها وطلعت وهيا متنرفزه بس اول ما وصلت ع الباب ....
ارسولان:وانتي كويسه منبيش حد يشوفك ويفكر انك مش مزبوطه !
ماريا:وقفت وهيا مصدومه من الكلام يلي سمعاته ❤️
ارتسمت على وجها ابتسامه كبيره وطلعت بسرعه وقلبها يطير من السعاده بشكل مش طبيعي ❤️
ارسولان:كمل تصليح السياره وهوا يبتسم بسخف على ماريا
كانت في نضره مجرد بنت مدلعه تافها وعقلها صغير!

🔥رِوَايـــــــــات بـــَـنـُـــووتِـــة الشـِــيـــْـخ🔥
🔥أروى الــــطـــاهــــر المــســلاتــــي🔥

ثاني يوم الساعه10الصبح :-
كانت رحمه مقعمزه بتعب على الصالون وتتفرج على الفيلو يلي قدامها وشنطة دخولها
نوال:(مرت خوها):قربت منها بهدوء وقعمزت جنبها
رحمه حبيبتي قاعده متبيش تحكي شن صاير ؟!
امك امس مرقدتش حتى غمضه وهيا تفكر فيك شن صاير معاك
رحمه:بلعت ريقها ومسحت دموعها.....منعرفش هكي فجآه حسيت روحي مضايقه والشطان زين الموت في عيوني
كأن مدايريلي شي امس
نوال:وربي حتى انا قلت هكي ....تو نطلعلك امية رقيه اشربيها وارفعيها معاك للمزين بالك تحسي بتحسن شويه
رحمه:ان شاء الله
نوال:هي نوضي خوك يستنى برا

______________________________________

هبه:اءء..صباح الخير
ليلى:صباح النور اهلين
هبه:قتلك ماما هاذي فطيره درتها على خاطرك سمعاتك لما تحكي لي حسنه انك خاطرك فيها
ودارت بكميه كبيره ليك وللعويله يلي بايتين عندك
ليلى:ابتسمت....صحييييتي ليش متعبه روحها
هبه:ولا يهمك تفضلي
ليلى:صحيتي ...خشي تفضلي مع ماريا والبنات داخل
هبه:ءاا ل لا والله مستعجله بنقعد مع خوي الصغيره لان ماما عندها مشوار
ربي يكمل عليكم بي الهير
ليلى:سلمها ياربي صخيتي هلبا اشكريلي امك
هبه:يوصل....طلعت هبه من حوش احسان وهيا متمنيه متتلاقاش مع امير!

وصلت لعند البلب الكبير وسمعت حد ينادي عليها
حسام:هبه؟؟
هبه:تلفتت وتنهدت بضيق....اهلين
حسام:ابتسم....اهلين بيك كيف حالك
هبه:بخير الحمد الله
حسام:صار طلعتي قريبه هلبا علينا
هبه:اي
حسام؛كويس معناها بتبدي تمشي معاي انا للمدرسه ولا!؟
هبه:قامت حواجبها بصدمه....اءء ام ا
امير:علاش لسمح الله انا بنموت ولا شنو؟!
هبه:😧
حسام:ضحك....لاطبعا بعيد الشر عليك
لكن خلاص خشيت القفص الذهبي يابرو خلي الطريق لي غيرك
امير:قام حاجبه....طريق!
حسام:نقصد يعني لازم ترتاح وتلهى بي مرتك ولا شنو
امير:شاف لي هبه وهوا يدخن....صعب هلبا الايام هاذي تأمن على بنات في عمرهم مع اي حد
حسام:ضحك ببصاره....مصحك انا طلعت اي حد توا ؟
امير:الكلام هادا قاله بوها ....هيا وماريا في مسؤليتي وصعب هلبا نخليهم لي اي حد
حسام:فهم قصد امير كويس بس مع هاذا شافله بنضرة تحدي
هبه:حست ان الوضع متوتر سيبتهم واقفين وطلعو
حسام:يعني نفهم منك منركبش بنت في عمرهم لين تكون في علاقه شرعيه بينا؟!
امير:ساكت ويشوفله
حسام:ضحك....لو هكي خلاص نديرو علاقه شرعيه مع وحده منهم علاش لا مش صا......
امير:قاطع كلامه ودفه بقوه لين طاح ع الباب ....رد باااالك اول واخر مره بنحدرك رد بالك تفكر حتى انك تقرب
حسام:عدل حوايجه ...الكلام هاذا قوله لما نجي نطلب اختك
امير:اختي ولا يلي معاها
حسام:ابتسم بي استفزاز،.....علاش!!
شنو ليك دخل بيها البنت وانت دخولك اليوم
امير:يلي عندي قلته ....ورجع للحوش

______________________________________

رعد:خش لي غرفة نوم رؤى وكانت رؤى واقفه بين زوز فساتين كأنها حايره بينهم !
حضنها من الخلف ❤️
رعد:شنو ادير اميرتي الحلوه ع الصبح
رؤى:ابتسمت بسيف.....دخول صاحبك امير ولا نسيت!
رعد:راحت عليا بكل 🤦🏻
رؤى:شن رايك اي واحد احلا؟
الاحمر ولا الا المشماشي؟
رعد:امممم منعرفش الزوز حلوين عليك
رؤى:كل مناخد رايك في حاجه تقولي نفس الكلام🤦🏻‍♀️
رعد:لان هاذا الحق ❤️...وباسها ع راسها
انا طالع للعرس بنشوف امير كان ناقصه شي وقاعد معاه لعند الليل
اول ما توتي روحك اتصلي بيا
رؤى:تمام
رعد:لاحظ على رؤى من ملامحها ان في شي ...خيره جوك اخي ؟
رؤى:ولا شي ليش شن في؟
رعد:حسيتك زعلانه!
رؤى:لا يتهيألك.....وخشت الحمام
كان خاطرها تسأله ليش كل يوم يصير نفس الشي!
ليش ميكملش الليل كله معاها!؟
لو قلبه قاعد متعلق بي وحده ميته علاش واخدها؟!
بس مسألتش لانه كل مره يتجاهل في سؤالها ولا يرد عليها ابدا!

_________________________________

هبه؛خلاص يا امي فهمت وربي
احلام:زي موصيتك مش معطلين ووتي روحك بكري للحفله ديري شعرك بالك يهرب الضي وانا تو نخطم على اي مزين ندير شعري فيه ونمكيج هنايا
هبه؛حفلة شنو !...دخول ولا!
احلام:مدايرينها حفله مشتركه اهل العريس والعروسه البسي احسن حاجه عندك
هبه:به يا امي 🤦🏻‍♀️
احلام:هي بسلامه ....وطلعت وسكرت الباب

هبه:رجعت للمطبخ واول ما وصلت !...
طق طق طق طق
هبه:شنو نست يا ربي عاده في امي مستحيل تتغير 🤦🏻‍♀️
فتحت الباب
هبه:😧😧😧😧
امير:يشوفلها بدون مايتكلم
هبه:بلعت ريقها ولبست برنوص التوته ع راسها....بوي طلع
امير:لو شفتك انتي ولا ماريا راكبه معاه السياره
رجليك يلي واقفه عليهم توا بنقصهم
هبه:ضحكت بصدمه....مريض انت!!
فاضي لي الدوه هاذي اصلا في يوم دخولك!؟
بعدين انت شن دخلك فيا برا احكم في اختك
امير:انا تكلمت وانتي جربي ياهبه ....ومشي
هبه:سكرت الباب ويدها على راسها .....مش طبيعي ياربي مش طبيعي

طق طق طق طق
هبه:فتحت الباب وخيا تتكلم....نسيت تقتلني ولا ن
ماريا؛قايمه حاجبها ....منو يبي يقتلك هاذا
هبه:نسحابه بابا خشي
ماريا:خشت بسرعه وهيا تشوف لي هبه
وهبه نفس الشي لانها مكانتش فاهمه سبب جيان ماريا في وقت زي هاذا !
ماريا:صار معاي شي ومنعرفش هكي حسيت ان لازم نحكي لي اي حد وخلاص
هبه:ابتسمت.....شي حلو ولا اخي !
ماريا:امس ارسولان
هبه؛ربعت يديها ....خيره؟
ماريا:قالي انتي كويسه منبيش حد يشوفك ويفكر انك مش مزبوطه !....وحطت يدها ع فمها
تخيلي وربي قالها امس
يعني منعرفش حسيته هوا فاهمني ان انا يعني مش زي مافكر فيا قبل صح؟!🥺
هبه:كان خاطرها تضحك على تعابير وجه ماريا بس مقدرتش 😂💔
ماريا:احككككي
هبه:صح مدام قال هكي معناها فاهم انك كويسه مش متع دوه هادي بس قبل يحرقلك في دمك لا اكتر
ماريا:حتى انا قلت هكي وربي .....حضنتها وبعدت عليها بسرعه
يالله باي ...وطلعت تجري
هبه:قاعده واقفه مصدومه من حضن ماريا ليها !
سكرت الباب وهيا تضحك على هبل ماريا وفرحتها بي الكلمه من ارسولان كأنها ربحت شي كبير

المشهد تكرر!
مشت خطوتين اتجاه المطبخ ورجع الباب طقطق من جديد!
هبه:اياااااه علينا....وفتحت الباب

جنان:بملامح ممله...هاي
هبه:جنان!😧
جنان:جهنمات....بعدي من طريقي
هبه؛سكرت الباب وهيا تشوفلها مستغربه!
جنان:لوحت شنطتها ع الكرسي وقعمزت....متسأليني ع شي
هبه:سكتت
جنان؛اوووف بطلي نضراتك الغريبه هيا
هبه:تي به احكي
جنان:الخرا اللفعه عزمتني ع حفلة خوها الدراه
وانا صاير عندي شي في الحوش خلاني نهرب ونجي الحفله
منعرفش كيف لقيت روحي عندك
هبه:ضحكت....خلاص وتي روحك هنايا ونطلعو مع بعض
مش قادره نصدق انك بتمشي وربي😂
جنان:اصلا كان عندي شوية فضول نشوف عروسته😒

_____________________________________

رؤى:ساعدت سلفاتها في المطبخ واول ما كملو غسل اماعين الغدي ركبت عشان تبدل وتجهز نفسها
بس وهيا ماره جنب الغرف طاحت عينها على غرفة نجمه!
فكرت بشي بس حاولت تتجنب يلي في راسها
حاولت!
بس مقدرتش
مقدرتش واستسلمت لي افكارها وخشت لي الدار💔
خشت وهيا تتفرج على تفاصيل الغرفه
كانت لونها بيج في الابيض ....الوانها حلوه ومشرحه

قربت على صوره كانت معلقه فوق السرير ❤️
رعد واقف جنب بنت عروسه❤️
ملامحها متواضعه وحلوه
واضح انها نجمه
شافت رؤى الصوره وقعدت هلباااا تتأمل فيها بعدين تلفتت وشافت وجها في المرايا
قالت رؤى في خاطرها....انا احلا!
لو على الجمال انا اجمل منها علاش متعلق بيها هيا!!
فتحت الدولاب ونصدمت !
ملابسها كأنها قاعده حيه 💔كل شي في الدار قاعد زي ماهوا كل شي
فساتينها بلايزها بيجاماتها عطورها على الطاوله ومكياجها
قربت يدها على العطر وخداته !
شافت للمره الاخيره للغرفه وطلعت بسرعه

________________________________________

ماريا:واقفه قدام المرايا تلبس في اكسسوارها ...رقيه مديلي الخاتم
رقيه ندوي معاك
رقيه:فاقت من سرحانها.....هاااا حح حاضر
ماريا:كملتي لبس؟؟
رقيه:اي
ماريا:تلفتت شافتلها من فوق لعند لوطه وكملت لبسها
كانت ماريت طالعه تجنن بقفطانها الفضي الطويل
ضيق على الجسم وقايمه شعرها مع بروش ورد فضي ومكياج خفيف

نفس الوقفه بزبط عند هبه بس كانت سارحه
شنو يلي صار مبكري!!
كيف امير يجي من حوشهم في يوم دخوله عشان يهددني لو ركبت مع حسام ؟!
خدت نفس....امير مجرد نموذج حقير زي اخته
مستعد يدير اي شي عشان يقهر شخص
والواضح انه متعارك مع حسام
اكيد مفيش سبب تاني
جنان:امتى بتمشو؟
هبه:تلفتت.....جديات هكي بتمشي الحفله !
جنان:شافت لي نفسها في المرايا
لابسه بالطو طويل لونه على البيج وسبيدرو ...ليش حيرني طالعه نهبل
حتى درت روج احمر!
هبه:ليش ملبستيش قفطان!قصير
او بدله قونه او اي شي
جنان:قلبت عيونها ريحيني من العفن متاعكم بالله عليك
هبه:🤦🏻‍♀️استني لين ماما تروح
جنان:وقفت على الروشن....المغرب اذن وبدو يطلعو السيارات
هبه:واقفه ع المرايا ادير في المسكره
جنان:شوفي شوفي حسام كيف طالع بي البدله زي العصبان اليابس
امالا خو اللفعه اسلام تقول حكة فليت لابس موڤ
هبه:تلفتت...وانتي شن عرفك بي اسمه ؟
جنان:سمعتهم ينادو فيه 😒
هبه:ضحكت....ع فكره سألني عليك وقتلك جنان مش متع الجو هاذا ابدا
جنان:ناقصني مفرخ
هبه:ضحكت وكملت مكياجها ....صوت الباب اكيد ماما روحت
جنان:تتفرج من الروشن ....اطلعي قوليلها خير ما تنخلع لما تشوفني
هبه:طلعت وهيا تضحك على عفوية جنان

🔥رِوَايـــــــــات بـــَـنـُـــووتِـــة الشـِــيـــْـخ🔥
🔥أروى الــــطـــاهــــر المــســلاتــــي🔥

الساعه8ونص ليلاً ....في القاعه:-

رحمه:ااااه متسكريش هلبااا
نوال:تسكر في الڤيلو.....بطنك كبرت يارحمه مش مدايره داايت؟؟
مش معقوله هكي بدي عندك كرشه ره!!
رحمه:هوا راضي يكفي
نوال:ضحكت....ايوا ياحركات انتي ❤️
رحمه:تنهدت وهيا خايفه من يلي جاي !
امير احتمال يقتلها!
فات شريط حياتها قدامها في لحضه
كيف عجبها جو انها تكلم وتصاحب وحتى تطلع مع راجل كبره زي بوها عشان تحصل فلوس ولبس وكل شي خاطرها فيه!
وكيف قرر احسان يزوجها لي ولده لان البيبي يلي في بطنها مش معروف من منو؟
من احسان ولا من صاحبه!!
كم مره جربت ادير اجهاض بس كل دكتور تمشيله يفهمها انه خطر هلبا على حياتها واحتمال تموت بسبب بنيتها الضعيف !

_____________________________________

حسنه:الله يبارك على بنيتي طالعه زي الغزاله
رؤى:عيونك الحلوات....وحضنت بنتها
استاحشتها موووت من بكرا بنحكي لي رعد يجيبها هنايا
ناجيه:من الواجب تحكي مع كبير العيله وتستشيريه في شي زي هاذا
رؤى:سكرت عيونها ثواني وهيا تحاول تهدا
اكيد عمتي العين متعلاش على الحاجب ولو !

موده:خشت للقاعه وهيا ادور لين شافت جنان من بعيد
ضحكت واشرتلها بيدها
جنان:شربت من العصير ...هاذا يلي كان ناقص عير تجي تقعمز بحداي لابسه برتقالي بي شعرها هاذا طالعه تقول قرعه حمراء
هبه:مقدرتش تشد روحها وضحكت
موده:اهلين بنات شن الجو
جنان:مليح لين شفناك
موده:قعمزت....انتي منو عزمك !
ماريا:جت من وراهم .....مشتلها رسالة العزومه بي الغلط قلت نعشيها نكسب فيها اجو
جنان:فرحت لما شفت الرساله قلت خلي نجي نضحك شويه
ماريا:شن قصدك انتي !!؟
هبه:هي هي بنات خلاص اهدو خيركم شن جاكم

اريج:صاحباتك هاذم مومو؟
ماريا:ابتسمت ....لا ياعمري هاذم يقرو معاي بس
وهاذي صاحبتي موده تزبطيها
رزان:وقفت جنبهم...صاحبات ماريا؟
عرفينا عليهم ....ووه هاذي خيرها هكي قاصه شعرها!
جنان:ربعت يديها....واضح من كمية السم والحقد والحسد يلي في عيونهم انهم يقربولك
اريج:شافت لي ماريا....خيرها تحكي هكي هاذي !
هبه:اءء لا لا مش قصدها جنان تحب تبصر 😅
موده:ماريا معرفتيناش ؟
ماريا:رزان واريج بنات عمي وخوات حسام 😌❤️

موده:حححي العروسه وصلت
رزان:هيا ماريا تعالي عادي
ماريا:اوكي جايه

هبه؛وين ماشيين؟
جنان:يقفو جنب الكوشه بالك يطيحو في عزوزه حوله تخطبهم لي ولادها
موده وهبه طاحو فيها ضحك من قلبهم

_______________________________________

تسكرت كل الاضراء وعيون المعازيم كلها اتجهت للباب ❤️
انفتح باب القاعه وكانت رحمه واقفه وملامحها واضح متوتره زي اي عروسه
ڤيلو بسيط ونازك
مع تسريحه كلاسكيه ومكياج ترابي ❤️
جنبها امير بي البدله السوداء يلي كانت نفس لون شعره بزبط
واقف بدون اي ملامح على وجها !

جنان:بسم الله خيره خش معاها من البدايه زي المخفوق !؟
موده:بلعكس حلوه اللقطه تجننن رومنسيه هلبا🥺❤️
هبه:تشوفله من بعيد وتسأل في نفسها
علاش انا متأثره بيه هلبا!!
رغم ان مشفتش منه خير!
قالت الجمله هادي في راسها بعدين اذكرت لما رفعها للمشفى وخدالها عصير
غيرت كلامها وقالت!....ممكن شفت منه خير شويه !

تقدم خطوات مع رحمه يلي كانت ماسكه فيه كويس بس يده هوا مرخيه!💔
من اول ما خشو والمصورات الاثنين وراهم وقدامهم
وصلو للكوشه ووقفو الاثنين
رحمه تبتسم لي الناس وهوا قايم خشمه ميشوف لي حد
ولع الميش جنبهم يمين ويسار وبدو ياخدو في الصور❤️

موده:اتكت ع حضن جنان....يهبلووو😭
سعدودها الكلبه حسدتها وربي الله لاتربحها امتى نتزوج حتى انا
جنان:لما تلقي تيس ولد جربوع يرضى بيك
موده:زادت ساحت ع كتف جنان....شوفي كيف يصور معاها
هبه:كانت تسأل داخلها....هوا طبيعي نحس هكي انا!
او الشعور هاذا يختفي بعد تكمل الحفله؟

امير:شاف لي هبه ابتسم ودار باي 👋🏻
نفس اللقطه يلي في البيان بزبط
موده:هاذا يقولنا باي ؟؟؟
جنان:بنضرات جاده....كأنه لي هبه؟؟
هبه:ابتسمت بسخف ...شوفي وراك رح تلقي وحده كبيره في السن يأشرها مش انا
جنان:وراك حيط !!!
هبه:شافت وراها بسرعه ولقت حيط ...قلبها طاح
يعني امير اشرلها هيا المره هاذي ؟؟؟
رجعت لفت راسها شافت الابتسامه المستفزه على وجه امير!
جنان:قامت حاجبها....شن قصته معاك!
هبه:تحرك في النسكافي ...ولا شي لان يوصل فيا مع اخته يمكن وبس؟
موده:لاحضت ان في شي غريب يصير بس محكتش!

____________________________________

حسنه:الله يبارك على البنات مقنينهم شوفي شعر ماريا وصاحباتها
رؤى:اي ربي يحفضهم❤️
احلام:ويحفضك حبيبتي
ناجيه:تنهدت....ياحسره
حسنه:اي والله ياحسره على شبابنا يا ناجيه
ناجيه:ياحسره على شعيرات نجمه الله يرحمها
كان طويل واسود زي الليل كنت نمشط فيه بيدي
احلام:شافت لي حسنه وهيا تسأل بي عيونها منو نجمه!
رؤى:تغيرت ملامح وجها وبسرعه ناضت للحمام وناجيه لاحضت الشي هاذا بس استمرت تحكي ع نجمه بدون توقف

_______________________________________

كملو العشي وتسكر الضي وولعت اغاني الهياجه🔥

موده:بالله عليكم ونبي ونبي ونبي
جنان:تشرب في العصير ....قعمزي بلا عار
موده:جنان اقسم بالله نرسملك رسمة الاحياء متع الواجب
جنان:افففف عروض مغريه
هبه:هيا باين انه جو 😂

ناضو ال3لي وسط القاعه وقلبو الدنيا رقص ع الاجنبي لدرجة كل البنات دارو عليهم دائره يصفقولهم
شافتلهم ماريا من بعيد وقدمت بس مسكتها رزان
رزان:لا ماريا بلا عار اضحكي عليك الناس مع المزيتات هاذم مستحيل خليك ارقى من هكي
ماريا:اي صح.....ورجعت شعرها للخلف بغرور
بس كان داخلها بتمووووت وترقص معاهم !

تعبو البنات ورجعو لي الطاوله وهما ميتات ضحك ع الهبال يلي داروه
شافت جنان تالفونها وتغيرت ملامحها !
جنان:هبه
هبه:وي ياقلبي
جنان:تتكلم بتوتر....وصلتني رساله و
صاير شي هكي في الحوش منقدرش نروح عادي نبات عندك؟
هبه:في البدايه نصدمت يعني هيا مش متعوده تبات عند حد من صاحباتها او حتى صاحباتها يباتو عندها بس ابتسمت وجاوبت....اي اكيد ليش لا!
جنان:تنهدت براحه
موده:سعدوووودكم نبي نبات معاكم
جنان:اياه علينا عاد ديمه تبي تلصقي
موده:يوم الاحد بتمشي ماريا المدرسه؟
جنان:علاش خوها المتزوج ولا هيا !
موده:شافت لي هبه....منو بيبدا يرفعكم؟
هبه:اذكرت لي امير وتهديده.....منعرفش
احلام:اشرت لي بنتها هبه من بعيد بمعنى هيا بنروحو

🔥رِوَايـــــــــات بـــَـنـُـــووتِـــة الشـِــيـــْـخ🔥
🔥أروى الــــطـــاهــــر المــســلاتــــي🔥

روحت العروسه للفندق مع امير !
وروحو العازيم والعيله كل واحد لي حوشه

هبه:خلاص ماما وراس امك نقصي صوتك
احلام:صوت شنو يلي نبيني انقصه منو يلي ترضى بنتها تبات برا في حوش صاحبتها العبرج هاذا عند الاجانب برا مش عندي
هبه:البنت ضروفها صعبه واضح ان تمر بي مشاكل في حوش اهلها اكيد ...خلاص امي الله يخليك فوتيلي الليل هاذي ع خير ياسر
احلام:خذت نفس عميق ....تمام بريلها عطيها بطانيه ومخده
هبه:اخيرا ....ورجعت غرفتها

___________________________________

ماريا:بدلت حوايجها ونحت اكسسوارها بس قاعده بي مكياجها
نزلت بسرعه وهيا تعيط....حد فيكم يقولي رقيه وووووين
ليلى:طالعه اضم برا اكيد شن تبي
ماريا:نبيها ترتب غرفتي حايسه
ليلى:جبتها باش تساعدني مش باش تخدمك يا ابله

حسام:امممي مرت عميي
ليلى:ولد عمك البسي حاجه ع راسك
ماريا:لبست برنوص التوته وتشوف لي حسام
جميله:خش سلم ولدي مفيش حد
حسام:خش وقعمز يهدرز على ليلى وخواته
ماريا:خشت للمطبخ بسرعه طلعت صونيه فتلكتها بي العشي ونضمتها ❤️
وحطت جنب العشي صندوق صغيرون فيه بكلاوه وشكلاته وطلعت

ماريا:تفضل حسام اكيد متعشيتش ❤️
حسام:عيونه في امه....تي وربي زي منحكيلك
لالا صحيتي كليت مع الاولاد
وكمل كلامه متجاهل ماريا
ماريا:وجعتها اللقطه من وسط قلبها
خدت الصونيه يلي وتتها بكل حب وركبت غرفتها💔

_______________________________________

امير:فتح غرفة الفندق وخشت رحمه
مكلفش نفسه حتى يخش وراها اصلا🤷🏻‍♀️...سكر الباب ونزل لي الطابق الارضي تبع الفندق
الموضفين كانو مستغربين بحكم كلهم فاهمين انه عريس !
كيف يسيب العروسه وياخد قسم ال الvipلوطه؟

رؤى:قعمزت تراجي في رعد يروح من زفة امير ❤️
خلت مكياجها ولبست روب جديد رمادي يهبل ❤️
وقفت ع المرايا وقلبها يدق بطريقه رهيبه
بس في الاخر تشجعت وبخت عطر نجمه💔

حسنه:حست ان بنتها فيها شي ومش متريحه خصوصا ناجيا يلي مبطلتش تحكي على مرت رعد الميته
حطت راسها ع المخده وقررت تمشيلها تاني يوم!

______________________________________

الساعه2ونص في الليل🌙💫

ماريا:فتحت الروشن بعد ما هرب الضي
شافت ارسولان وصل للحوش ونزل من سيارته وزي العاده للمخزن طول

رجعت لي سريرها وطاحت عينها على صونية العشي يلي كانت محضرتها في لي حسام
خطرت عليها فكره وناضت بسرعه لبست وشاح وخدت الصونيه ونزلت !

رؤى:سمعت الباب انفتح اخيرااا!
وقفت خدت مفس عميق وابتسمت
رعد:حط مفاتيحه ع الطاوله....عطلت سامحيني
رؤى:وهيا مبتسمه....ولا يهمك حبيبي
رعد:قرب عليها....استاحشتك
وحضنها
بادلاته رؤى الحضن وبعدت من عليه شويه
شافت تعابير وجها تتغير وفهمت انه شم العطر !💔

_____________________________________

ماريا:خذت نفس عميق خايفه كيف تكون ردة فعل ارسولان؟!
وشنو يقول عليها وهل تندم انها جاته او لا
بس مع هادا تشجعت وخشت للمخزن

هبه:مجاهاش النوم طول الليل وزاد لما هرب الضي
ناضت من مكانها شافت جنان في سابع نومه
قربت ع البلكونه الارضيه وفتحتها
طلعت قعمزت فتره تتأمل في المزرعه وفي الهدوء يلي هيا فيه!
وفجآه قلبها وقف لما شفاته واقف قدامها!...يتبع

لقراءة الفصل التالي : اضغط هنا 
تعليقات



حجم الخط
+
16
-
تباعد السطور
+
2
-