القائمة الرئيسية

الصفحات

رواية كحل عرب الفصل التاسع والثلاثون 39 بقلم زينب ماجد

 رواية كحل عرب الفصل التاسع والثلاثون 39 بقلم زينب ماجد

رواية كحل عرب البارت التاسع والثلاثين 

رواية كحل عرب الجزء التاسع والثلاثون 

رواية كحل عرب الفصل التاسع والثلاثون 39 بقلم زينب ماجد


رواية كحل عرب الحلقة 39

الحلقة_39
( ثأر لابد منه )

ذَمني ذمّ الماعثر بالمستحى ولانكث زيجه
(عريان السيد خلف )

هدية : دشيت لبيت عيالي و هم ولا وحيد منهم يعاينلي .. و يو تنوعولي من اطراف مناخرهم عودينه ما هاويين جيتي ، يا رحمة الله جا انا شريد غير يهدوني بحالي و ما يعاينولي.

عفتهم و دشيت الحجرتي ..
فليح مامش .. عسني لا شفته ولا كابلت وجهه .. من اشوفنه اكره روحي .. سبحان الله كل المتزوجين الله يحط المحبة بيناتهم الا انا و فليح لا هو طايكني ولا انا اطيكنه .. عليش ظالين ما نعرف .. عيشة و السلام
غم هالعيشة هاي التكضي وياها وياها هلبت تخلص ونفارج .

شلت الفراش عن الكاع.. و طلعته انفضنه ، لجن بيه ريحة ما تنجرح .. ما تعرف ريحة مشروب يو غيرها .
كمت انظف بيها .. جنها مهجورة بس ابطالة العرك تارستها .

رجليه اهيسنهن راح ينفجر اعلى كثر الثكل العليهن.

فرشتلي فريش اعلى كدي و كعديت ..
حطيت ايدي اعلى خدي واخذتلي صفنة بدنياي ..
ليمتها اظلن عدهم ؟ .. و يمتى اخلص ، وشلون يو اجا الفرخ و صار عدي و انا اعلى هالحال لا ابوه يودني ولا انا اودنا و عيشة كايد و مكيود و ناس تحفر لناس .. هم تفرج يربي و اخلص من افليح واهله ينرادلها بخت .

اعلى كعدت و دش المزيون فليح
ساعة الشفته ضاك صدري، تنوعلي و يكلي : هااااا رديتي يهديوة

- هلا

- جر الوسادة من حدري .. كعدت .. و هو حطاها بحظنه و تجتف و هو يكول : ياله اسمعنج .

-شنهي ؟

- رحتي لفاتحة مطير يو لا ؟

- الزلمة مات و الله يرحمة عليش هيج تكول اسمه ؟

- تحنين ليهم ولج ، الفرخ هاذ البطنج امنين ، انت رحتي موش حبله

- جا شني نفخو ابطني و طيكت بساع ، غير انا جنت حبلة و كبرت بطني غاد .

- رحتي للفاتحة يو لاله .. جاوبي؟

- امي نعت العزا .. وابوي كاض ةلفاتحة وياهم وكلنا بخويطنا نصك الباب و نمش .

- يعني رحتي ؟

- جا شني اظلن وحدي ؟

- وشفتي سرحان يو لاله

- اكلك انا بيا حال و جاي تنشدني ، الزلمة معرس و عده مره وجاهل و مرته حبله بالأخر ..

- جا هاي موش بحالة و فزنتي اهله حبله و عدعا جاهل
حجاها و طر الوسادة بوجهي ، و كام جرني من شيلتي : البطنج منه موووووو ، حبلانه منه و جاية تنومين نغل برااااااااسي

- هد راسي شمااااالك ، ما رايدني اكومن اردن لهلي ، و خلي اهلي يبتلشون بيه .

- جا هو ابوج الكوا*** يفرزن يمنعجن يضمجن ، عايفجن هدد هدد .. ااااخ يو ما ابوي موصيني ما اكضنج .. جا هسه كطعتج وصلتين
دفعني من راسي : بربووووووو***

عافني و طلع غميته : انت هم زلمة و اعدنك اعلى الزلم ، من امده الدنيا الجابتني عدك يالاغم .

تنهدت و انا اكومن .. دشت عمتي : شمالكم ؟

-جا ما تنشدين ابنج الجاي متحامي اعليه .

- رديتي ، لا هله ولا مرحبا

- اشكرنج

طلعت و هي تفر بيدها و تغم ، لهناك اجا ابن سلطان ، جايب طشت و چوله و جدر و كال : هاي وداهن ابوي لبت حاكم .

خذيتهن من عده و كلتله : الله يزيد بخيره
شلت الغريضات و العيون امبحلكة اعليه .. كل عين اهيسها تريد تاكلني ، دخلتهن وفرغتالهن امچين .. و حطيتهن .

لهناك اجا ابوي و امي خاطر ياخذون يسرى ، كعدت يمهم امي شواي، و اجت ليه للغرفة : ها شكالولج ما كالولج

- ما كالولي شي

- ما حجت وياج امه نسوان احموينج

- ما حجن ..

- شمالج يمه شو وجهج وجه ارمله .. و الضحكة ما تمر ارسومج ، شبلاج ؟

- ما بياش شي

- جا شماله وجهج محزن .. تريدين شي ؟

- انا ما اريدن غير اثنيوين ينزلوني اللحد ووحيد يقرا اعلى راسي القران خاطر اخلص من فليح و اهله و عيشته .

- اسم الله الزهرة ام الحسن ، شمالج يمه توج رديتي ، عليش تحجين هيج ؟

- يمه ما اطيكن عشرتهم و علي ما اطييكهم

- جا هاي قسمتج يا بنيتي شتسوي، ما تضيج الا تفرج ، باجر اصير عدج فروخ و الامور اتغير .. و يو شفتي ضحجة فريخج تنسعدين و تنسين اهلهم .. ما يصير صاكه وجيهج وجاتله روحج بقهرج ، ذبي احمولج اعلى رب العالمين جا ما يظل حمل مطروح يا يمه . ولاون ربج يسهلها

- والنعم بالله .

- ياله يمه .. انا وصيت جميرة يوميه من المدرسة وتجي ليجاي خاطر تعاونج و يو اعتازيتي شي بس كليلي ، انا عودن يومية العصر امرن اخذ جميرة و اجيبلج التريدينه .

- ان شاءالله يمه

- ياله يمه هاي جبتلج دهن الحر و تميمنات و هالمخضر هاذ .. لا اطلبين منهم ولا تنشدينهم خاطر لا يخشون كلبج بجلمة و تنقهرين .. انا شتريدين اجيبلج ، لجن لا تظلين هيج مغبره و انت اعلى وجه ولادة

تنهدت :لا تشيلين همي يمه ، روحي والله كريم

- يالله بنيتي اودعنج ..

كامت مني وراحت برا لكت يسرى واكفة لابسه عبايتها و كاضة نجيوة، خذتها امي من ايدها و كامت اتحبحب بيها ، كرب ابوي من عدي ، طلع افلوس من جيبه و اطاني و كالي : ديري بالج اعلى روحج بويه ، و الياذيج كليلي .

استهظميت من حجه وياي ابوي هيج ، دمعت عويناتي، حين الطلعو .. انا دشيت حجرتي ابجي ، جن جاهل و هدو اهله موش جبيرة ، روحي ما تود هالبيت ..

كعدت ابجي لوحيدي ..
واهيس شي يمي فزيت .. مامش احد
عاينت منا .. منا .. مامش ، انا متأكده هيسيت احد يمي ، توني جاي اكومن دش راعي البكى سكران.

اول ما فك الباب ، عثر و تبربد بعتبة الباب ، صحت : اسم الله اسم الله ..
دفعني منه : امشي عني .. نايمة ويسرحان و تريدين اتذبين النغل براسي

- عيب عليك .. انا عرضك عليش تحجي عليج هيج

... كام يعفط و يفشر اعليه ، و هم راد يطكني و دفعته عني و الدفعة صارت قوية ، اجا ظهره بحافة الشباج ، كام يحك بظهرة و يغلط .. كعد بمجانه و هو يغلط ليما غفى و هو نايم ..

مشيت لفراشي خاطر انامن لجن جني سمجة مزوهرة من الحر ، و بطني جن جبل و نايم اعلى صدري منين ما ادور هوى الله ما جاي اهيسنة اعلى كبر ثكلي .

شلت فراشي و حطيته جدام الباب ... ومن كون انامن
لا شفت راحة ولا تهنين بنومة .. حر و بطني هاعلواتها .. مامش هوى

عيالي نايمين بالحوش ، كل واحد بصف حجرته فارش ، الله مصيبة البين العدي .. لا يهيس برد ولا حر من السم اليشربه .

كوة الفجر ياله نمت
اعلى نسيم الفجر العذيبي .. ذبيت روحي ما هيسيت . ما احسن الا و الباب مدفورة ، فكيت عيني ولنه حماي مار وانا مفرعة .. مبربد الباب خاطر اعاين روحي، رديت الباب و كمليت نومتي ليما خلصو ريوك .. لفيتلي اخبيزة بشوية اطماط .. وطلعت اكل بيها بالدرب .

سرحان : جا عمي ما سوينا شي ؟ .. نهوة شني ، انا ما ارضى يطيها عطية ارضى احد ينهي اعليها

- جا هو غير ابن عمها

- ولونه ؟.. البت خاطبينها و الشيخ وافك اعلى خطبتها و جنه ناطرين يخلص اخشابه ويجي ياخذها

- ياهو هاذ ؟

- خنجر و الكل يعرف خاطبها من الشيخ.

- خاطبها شني ، عاداتنا و تغاليدنا تكول ابن العم من حكه ياخذ بت عمه .. يو ما رادها ذاك الوكت عودن تتخير .

- بت الشيخ ما ينهي اعليها يعمي

- جا بت الشيخ تنطي لوحيد نكري

- تاب و الله بكبره يتوب عاليتوب ، احنا ياهو و نطي فرصة

- و تطي اخيتك .. شنهي هالحجي هاذ يسرحان .. واحد شلايتي شقاوجي ، شنهو هو و نطي راديون ، انا اخطبنها لابني و ابني احك بيها

- عمي جاي اكللك هو خاطبها و ابوي وافك .. جا شنعي نعارض ابوي

- انا يو داري اعارضنا

- عليش .. زلمة وراديها ووره الاربعين تتوكل

- وره الاربعين شنهي هاذ مو حجي

- والله عمي هاذ العدي

- لا والله عمي انا هاذ الحجي ما يصرفلي الولد ابني رايدها من زمان و ابوك الما اطاها

- عمي ابنك معرس و عده جاهل .. شنهي رايدني انزل راديون اعلى ضره

- ولونه ؟ الزلمة ياخذ اثنين و ثلاث

- البت خاطبينها و حرام واحد يخط اعلى خطبة الاخر جا مو الرسول يكول ( ولا يخطب احدكم على خطبة اخيه الا ان يأذن او يترك )

- صلى الله عليه و اله بس انا عمك زلمة ما ارضى واحد نكري ياخذ بت اخينا ، خلها ابالك يو صار الحجي انا ما اصفن وياك

- عمي انا ما ناطر احد يصف احذاي من كون جبت عمري اوحيد .. تريد تصف ما تصف براحتك .

مشى عمهم وطلع متضايك من سرحان ..
وسرحان حاط اباله يخلص اربعين ابوه و تعدي فترة ويطي راديون لخنجر .

دش عمه اعلى زناد و زناد معاند الا ينطي راديون لال ثجيل .. و عمه كاله : شنهي انتم واحد منطيها لنكري و انت منطيها لثجيل شمالكم تسودنتم لو شنهي ؟

زناد: جا غير اسويها للرجاب وعلي ، شحده يطيها .

- انا اكول تريث .. ذول ال ثجيل ما ينحزرون ، كلهم ابن عمها نهى اعليها وفضها

- لا حرام بالحرم ما اتراجع ، البت اطيتها لال ثجيل .. انتهت تخلص اربعين ابوي و تروح لبيت رجلها .

أيمان : اكولك حاكم

- ها بويه

- شو احس شي يتحرك ابطني ؟

-يا ستار شنهي ردلج ابو عبيد ؟

- لا ابو عبيد شنو ، بس دا اخاف .. بس لا حامل

- جا انت حتى من الحبالة تخافين

- ما اريد احبل عفية ، والله شفت الموت بولادة ميمو

- خايبة خافي ربج الفرخ ولد لا اتذبين اعليه هالاسامي هاي .

- اووو حاكم شبيك اني وين و انت وين ؟

- خايبة شكالولج علي ، جدة ؟ مجيب نسوان كبل ؟ شدراني انا

- لعد اشون ؟

- انت يمتى اخر مرة غسلتي ؟

- اووو كبل ولادة ميمو ، وكالولي متغسلين مدام دا ترضعين .

- عوينة ابيهم هم سمته ميمو .. انا شجاني و طاوعيتكم و سميته هالأسم العاوي يو مسمي فاضل موش اخيرلي ؟

- حاكم شلون يعني

- بويه روحي لامي خلها تاخذج و تمش للجدة ، جا انا شنهي و تنشديني ، دكومي هدي الفرخ عد مرت ستير و امشي .

ما جذبت خبر خذت عمتها وراحت للجدة ، بشرتها هي حامل ، بس أيمان ضاجت حيل وكت العرفت بنفسها هي حامل .. من كون تعذبت حيل ولادة ابنها وجيابته ، وهم راح ينعاد الضيم فوك ضيم مؤيد .

كواغد ساعة العرفت بأيمان حامل، اندارت الاله : جا عمه انت يمتى تحبلين ، راح يصير سنة اعلى عرسج ولهساعج لا حبلتي ولا سمعنا طارش ، شنهي شو هادينها سكته ؟

- جا عمه هو جاي وانا كايلتله رد ما اريدن ، غير رزق ربج والله لهساع ما كتب لينا رزق

- خافنج عاكر ييمة

- لا عمة شني عاكر انا كل شهر اغسل .

- جا شنهي الاسباب؟

- شدراني ؟

- لزوم اخذنج و اروحن للسيد يكطعلج ، خافنج عدج تابعة .

ملوك ... وصلت القصر و نزلت اعليه
دشت ليه .. ظلت تعاين لحديقتها و لقصرها الجانت عايشة بيه .. وين جانت ووين وداها زمانها

ظلت موجفه برا ، ليما طلعت ليها صبحية : هلا ام ازناد

اندارت الها : الشيخة ام ازناد

- راديون بحجرتها .

- ما اريدن ادشن داخل ، خبريها تجي نكعد بالحديقة، الجو طيب .

- تامرين

د٨لت و طلع سرحان : عليش واكفة عدج ، و ان جان القصر يتعذرج لجنه تعود ما يرد ضيوفه .. تفضلي

اندارتله : انا ما جاي اتفضل ولا اكعد ، رايدة اتفاهم ويا بتي .. و احلن هالامر

- الامر محلول و ابوها اطاها .

- زناد ما يرضى بخنجر ..

- ولا يرضى ، شنهو زناد فد مندله ؟ ان جانه شيخ فعلى روسكم موش عليّ .

- هدنا من سالفة خنجر ، انا اكولن يو اطلع راديون من السماوة و توديها يم اخوها كريم غاد تكعد عده ليما تفض هالعجاجة .

- كريم بلغني هالاسبوع جايب مرته و جاي ، فلس هناك ومامش وحيد وياه و قرر يرد ويكعد بالبيت البكفا القصر ، انا كتلهم يزهبونه لجيته .. و راديون مالها طلعة من القصر الا لبيت رجلها .

طلعت راديون اول ما شافت امها ركضت لحضنها تبجي، سرحان هدهن و طلع .

- يمه ادخيلج خلصيني من زناد

- خلصي انت بالاول من خنجر

- خنجر رايدني و خاطبني وابوي الله يرحمه وافك .. عليش لهساعكم موجفين بطريجي .

- ابوج لا وافك ولا هم يحزنون ، ابوج اخر ايامه صار اعلى كيف سرحان و هو القنعاه بصويحبه النكري

- الله اكبر انا راضية يوادمنا نكري شلايتي سرسري انا راضية وعلي راضية انتم شلكم غرض .

- شيوخ اجوج و تجار .. رفضتيهم و ترضين بوحيد يشتغل عد اخوج

- وانا ياهو الكالج جاي ادور اعلى واحد زنكين ، يمه انا بت خير و الفلوس موش هي مرادي ، انا رايدتلي فحل و مامش غير خنجر يحلالي .

- واخوووج ؟ انت عليش تخلين اهلج يتكاصبون

- مامش احد متكاصب غير زناد .. يمن كض المشيخة وليجاي و اهو متولينا طرد كريم و اخذ حك سرحان ورد اعليه .

- لا تحجين هيح اعلى خوج يراديون

- انا ما مجذبه

- اسمعي اكللج ، خنجر ما يصير و يو زوجج سرحان غصب عن اخوج .. راح يتصادم سرحان و اخوج .. و خنجر راح يطيح بيها وموش بعيدة يجتلونه .. اتجفي الشر و ابعدي عن خنيجر

بچت : يمه حرام عليكم وعلي حراااام ، مات ابوي و استحكرتوني بسكم عني، كافي عليّ فكد ابوي ..والعباس كلبي تلوع بسكمممممم عني بسكممم.


( بستان ال ثجيل )

هدية :حماي الجبير صاعد اعلى النخلة ويكص بهالعثك و يذب اعلينه .. و احنا حاطيلنه فريش حدر النخلة و العثك اليطيح نشيله و نلم التمرات اليطيحن و نفلس بهالعثك و نحطه بصندايك ... خاطر ياخذونه يبعونه رطب كيلوات بالولايه .

من كون التاجر ياخذه برخص الماي و يبيعه غادي بسعر غالي .. فزلمنا اعتمدوا اعلى ارواحهم و هم كاموا يصدرونه و يبيعونه .. و خير من الله لجن الله ما مبارك برزقتهم .. كلهم فكور يجيبون الفلس منا يغدي تراب منا ..

وانا وياهم وياهم اشتغل بالكاع .. اشيل بالعثك وبطني عالي و ثكل علي .. هيسيت الوجع اتلاكفني .. كلت شياع فرخ .. موش ولادة ..

وظليت اشتغل ما هديت الشغل .. الشمس صكعتنا والوذان اذن .. و عمي ما يرضى نرد نستراح شواي ، يكول فضو البديكم ياله تردون .

اجت اعليه جميرة كامت تعاوني و تشيل وياي .. لجن وصلت بحد ما اكدر احرك رجليه ، وكفت و صرخت : عممممممممممممه ، الحكيلي عمه

جميرة كضت بذيالي و تبجي : شمالج هدوة اصيحن امي ؟

- روحي صيحي امي روووووحي

حماي اعلى الشجرة صاعد و عمي وراي و اهيس الفرخ صار بين رجلية ، تراكضن ليه نسوان حمويني وعمتي تصيح : امشي نوديج

- ما اكدر امش ،بس اتحرك من جدمي يطيح الفرخ ، عمة فدوتج ، الحكيني راح اموتن

كعدت بمجاني و نسوان حماي فلن اوزارهن وكفكفن اعليه بعبيهن ، و انا اصرخ ، حماي نزل من الشجرة و عمي يكله : امش صيح فلاح ، بسااااع

بس كل لروحي هيج و تحركت .. الفرخ طلع من بطني ، رديت ظهري للكاع و سندت روحي بعچوس اديه و كمت اصرخ من كل حيلي ..

وعمتي تصيح : حسج شمالج شهرتينا .. الزلم منا كصت ليه المسر و شالت الفرخ و انا ابجي ..و الوبن من الوجع ..

ردتني : خبصتينا و دوهنتينا و تالي جايبتلنا كليعة لا والغسمة اي والله ، جا يو جايبتلج ولد شتسوين

رديت راسي و بس دموعي تجري منا و منا من الوجع .. كصتلي المسر و مرت حماي نظفتني ، وشالن الفرخة ولفنها بجرجف كله تمر .

كامن يصيحن علي : همي نفسج ياله كومي خلصت ..
كومني .. كوة امشي .. اجا فليح يتسرسح و يكل لابوه : شنهي بويه عليش صحتني

- خايب مرتك جابت بالكاع ، شيلها و اخذها للجدة خل تعاينها .

- انا اخذ هاي هي و النغل الجابته

- استحي اعلى روحك نغل شنهي ، جا غير منك

- مشت منا موش حامل شحبلها عد اهلها ؟ جاي تنوم نغولتها براسي ، انا الفرخ هاذ ما اريدنه .. و يو ما انت رادها لخاطر يسرى انا ما ارضالها ترد ولا ارضى تظل اعلى ذمتي .. بت اخوك كح... بويه .

- خايب انت ليمتها تظل اغم .. جا المرة معوشرة و بشهرها و هي ما صارلها سبع شهور من زعلت يمتى حبلت و يمتى دخلت بالعاشر .. استحي اعلى روحك لا يسمعك عمك و يبلينا بلوة ، اخذها ياله.

موكفيني يمشوني كوة و انا ابجي ، اجتني امي و جميرة وراها تركض : ها هدوة يمه بنيتيييييي

- كضيني يمه .. متت يمه متت

- مت عيني اعليج يمه ، جبتي

حجت عمتي : اي زودتنا كليعة خافن احنا ناكصين مبارك بهالجناين يجيبن بهالبنات و يذبن اعلى روسنا.

جرتني امي منهن و سندتني .. كالتله : خل اخذها للجدة

فلاح ما رضى كام يصيح علي : امشي للبيت جدامي ياله

كواغد : خايب تمشي شنهي المرة والدة خلنا ناخذها للجدها تشوفها خافن بيها شي .

- ما بيها شي هاي كامت جنها حصونة عرب

- ابو فلاح شنهي راضي اعلى حجيه هاذ .

- بعد رجلها و الزلمة ما راضي شنسوي

عمتها : جابت وخلصت عليش تكبرينها بعد .. خل ترد المرة و تچفى الشر .

-كولو ما نريد نطي فلس للجدة خافنها تدفع فلوس ، بتي والدة بكاعكم وجايبتلكم فرخ و انتم تتراجفون اعلى الفلس من عمت عيونكم ان شالله اعلى هالنفس الضيكة

ردتها عمتي : عليش تغلطين يكويغد يوما جايبة بت و مطينة روسنا ، شنهي جايبتلنا ولد ورايدة بشارة .

- جا وجابت بت تموتونها خافو ربكم لا يكلبها بيكم

فليح : فلس احمر ما اذبن اعليها و الفرخة هاي الجابتها ما اريدنها .. امشي للبيت يله

هم اعليه راد يطكني ، و شكفته امي عني : خايب يالأغبر انت اطك بتي من عمت عين الدين اي والله ، امش عنها

جاي تحجي و صاح ابوي : هااااا ام ستار شنهي
وكوة يجر النفس جاي يركض ساعة الكالولة هدوة تطلك

كواغد : اريدن اخذنها للجدة و ابن اخيك يهوبز فوك روسنا ، البت والدة و جاي تنزف

حاكم : انعل ساسة ... امش صيح الجدة لمرتك يااااله

فليح : اخذها عدك و جيبلها انا بتك ما اريدنها

يحجي و يشامر بديها و هدهم و راح ، تبعه ابوي راد يكضه ، كضاه عمي و كاله : الزلمة عصبي شمالك ، خلنا نرد البت للبيت و نجيبلها الجدة عليش بعد هالمصايح

رادن يمشني ، امي ما رضت وراحت جابت ابو العربانة ، كعدتني بيها و خلت الفرخة بحظني و كالتله : امش.

ردتني لبيت عيالي ، و تصيح اعلى نسوان حمويني خاطر يفرشلي فراش نظيف .. جرن فراش و فرشنه ، وراحن جابن صينية و طلعت امي جهاز الفرخة ... نظفتها وداوت الصرة و كمطتها .. رادت تخليها بحضني بس انا الوبن و الدم يجري من عدي .. وبطني وجع موتاني .

دخلت علي الجدة .. نظفتني وفحصت السرة مالت الفرخة .. واطتني كبسون .. و كالت لامي تجيبولها العلاج الاكللكم عليه خاطر لا تشكل وياها الالتهابات من كون كاصين المسر بمكص موش معقم .

ناوشتني الكبسون .. شربته ورديت راسي انامن .. وكفت الجدة خاطر تروح .. لا عمتي ولا جناينها كلهن اختفن ..

طلعت امي خاطر تطلب فلوس الجدة ما شايله الفلوس التكفي تطيهن .. حجت ويا عمي .. عمي يكللها : خل يجي فليح

- جا هو ابنك موش تبرى و مشى ، المرة واجفة

حاكم : هاج يمعودة بس فضيها و اشتري ارويحت بتج و كرامتها ، الله لا يعوزها لهالكراميد .

خذت من ابوي و اطت للجدة و اجت اعليه .. تعاوني ارضع الفرخة .. كح ابوي و صاح : هااا بويه هديوة

امي لملمت غريضاتي و صاحت : دش ابو ستار دش

دنج راسه و فات لاحجرة و صاح : الحمد لله اعلى سلامتج بويه ، تتربى بعزكم .

- الله يسلمك بويه

- بالله كواغد جيبي البت خل اشوفنها

كواغد : لا لا حليوة .. احلى من امها ، بيضة ومعانيها مخرطة .

ناوشته ، و انا اعاينلهم بتعب ، خذها بين اديه ، و صاح : اللهم صل على محمد وال محمد ، بويه كمر

- جا موش كلت الك حليوة ، الحجي بيناتنا همزين ربك ما طلعت اعلى امها

ضحك و هو يكللها : يعابيج العباس كون ، خايبة شمالج ويا هديوة ، و علي هم اكو بجمالها

- ياااااع جا غير مريم العذراء بزمانها .

ضحك و هو يعاينلي : شمالج بويه ، شو حتى الضحكة ما تمر اعلى ارسومج

- تعبانة بويه

- هانت هانت سباعية و كمت بسلامة و ان شالله يومين و تكومين ، وبويه اسمعي مني لاتتكدرين ولا تسمعيلهم .. شما يحجون صكي اذانج عنهم

كواغد : سبحان الله حجايتي

حاكم : لا تتعينين وياهم ، الطوج نعم الله اعليهم الما اطوج يطبهم هرش ، انت نا طالعة من فطر الكاع ، شتعتازين انا وامج موجودين بس امري و التريدينه يمج .

كواغد : لا عليش تهتم الهم ، يولون، بس اكلك عاين جا غير للمرة جايبة يجيبولها غدة لگمة

- ولج ذوله طردوني وانا بالكماط خاطر انا و امي ما ناخذ حصصنا ، الفكر يجري بدمهم .. لا تعاينولهم هسه انا اوصي لاله تشويلها ذيج السمجة التطيب افادها .

جمارة : بويه خن اشوفنها

ضحك و هو يناوش جمارة ، صاحت كواغد : يا على بختك تطي بت انفاس لجميرة

- لا تخافين كاضها

جمارة تعاين بيها و تكله : بويه هاي بتي

ضحك حاكم و هو يكللها : اثنينكجن بناتي

ابتسمت هدوة اندار الها حاكم و هو يكلها : اي هيج و اضحكي يا بويه عليش مكدرة روحج ، اعوينة ابيهم ابوج بالحياة و تعاينين ليهم .. ان جانن عدي اثنيوين انت و جميرة هساع صارن تلاثه .. انا ابوها لا تعاينين لذاك البغل فليح .

- الله يديمك بويه و لا يحرمنا منك

كواغد : فروخ البت عزاز يحاكم . الا اكلك ازود من فروخ الولد .

حاكم : جا اعلى معزة الام ، من كون فروخ الولد جدام عينج لجن هاي بعيدة ، وتشتاك ليها و من تجي تحطها هي و فروخها بلبة كلبك .

كواغد : اي والله ضكرتني ببوي عده ٨ اولاد و هو يغبش اعليه عمت عيني ، يتمدد ويا فروخي يحبب بيهم .. خوبن ستار لا تحجيها اعز حتى من ولده ، ولو واحد من ولده صاح بستير جا شيخلصهم من ابوي . مت عيني عليك بووووووية

وبجت و كامت تنعى : اااااااخ بويه يا بويه
غاااااالي الأبو و ظله شحلاته
حلوة بسمته و حلوة صفاته
ويلتمن بكتره بناته
يحبن راسه و يشمن عباته
بس شحال المودع حياته
يجوي جمر بالگلب موته

وكامت تثغب و تبجي ، و هدوة تبجي وياها ، حاكم عافها براحتها بس من زادت بالبجي و كامت تلطم اعلى رجليها .. صاح : هااااا كواغد شنهي القضية ، جا هي فاتحة يو جيابة ، بسسسسج .

- اي وعلي اتضكرت ابوي

- جا ضكرتي دمعي ابجي موش تنعين و تلطمين ، البت توها جايبة و خليتيها تثغب وياج .

- مت عيني اعليك بويه ومت عين التراب الطمتك يا بويه .

- خايبة بسسسسج شجاج
اندار لهدية و حاجاها : البت شتسمونها بويه ؟

- انا جنت مغررة يو صار عدي ولد اسميه عباس و يو بت اسميها دموع .

- شنهي دموع بويه ، لا موش حلو

- بويه جبت حبالتي بيها بس دموعي هماله، ما يلوك الها غير اسم .

- لا بويه لا ما ارضى ، سميها ( ازهار ) دامها البت حلوة و جنها زهرة ، لا تظلمينها باسم يظلم بختها ما يصير .

كواغد : جا انت تسميها يو اهلها

- عوينة اهلها ، هم وينهم من ساعة الجينا وليجاي ، كرب منهم وحيد شفنا طوله .

ياله بويه انا اروحن ظلي انت كواغد يمها ، انا بالليل امرن عليكم ، اشوفنها و اخذج وياي .

- الله وياك ، لا تنسى السمجة حاكم

- لا لا ما انسى .

راح و جميرة و امي مكابلتني و كاضات الفرخة .. نومتها امي بمهدها خاطر لا تتعود اعلى الحضن و كامت تهز بالصينية و تصيح : يممممه البنات اثنيوين و اصيح ازدحاااام

- يممممممه شني

- يمه جا جذب .. البنيات همجن ثكيل ، الولد تعرسيله و ما تدرين عنه ، الا انتن ، الكعدتن عدي ها طلعت ها ها شسوت ، ها شافوها ها كربوها .. و يو راحت عد رجلها همها زاد ها هضموها ها طكوها و ليل نهار همجن اعلى الفاد.

.. وحيدة انت و ما حطيت الزاد جدامي لا ما عرضتي بعيني و اظل احسب هدوة كلت يو لا جويعانه يو لا مرتاحة يو لا .. وهاي انت وحيدة و مدوهنتني جا يو ١٠ شيظل بحالي .
ازدحام يمة ازدحااام

تبسمت ليها بتعب ، و غمضيت اعيوني ، حجت : لا تنامين يمه اكليلج لكمة كبل لا اتنامين

- ما اشتهي الزاد

- ولونه .. اجبري ارويحتج خاطر يصير بصدرج حليب ترضعين البت .

كامت من مجانها وراحت خاطر تشوفهم وينهم و تلكاهم كل واحد بحجرته متمدد ، و عمتها نايمة ، دكت الباب اعليها فزت : ها ام ستار ها

- جا البت جايبة و انتم نايمين ادري احسبو احنا اهلها مامش شنهي تموت وما تدرون عنها .

- تعيبانه والله و خذتلي غفه ، جا شني ما كلت

- جا انتم حطيتو اچل وما كلت ..

- هسه اكلل لوحدة من الجناين تسهيلها تمر بدهن الحر

- بس هاي ؟

- جا شسويلها ، غير يجي رجلها يشوفها ، احنا اشبلانا ؟

- خايبة يمه جميرة ظلي يم اخيتج خلني اروحن للبيت ازهبلها الزاد و اجيبنه .

لبست عباتها ، و عمة هدوة ما اهتمت ردت نامت ، راحت كواغد اشترت الها سمجة و مشت البيتها ، لكت حاكم هم مشتري كالت : ضميها الها بثلاجة المتيريسة ، باجر انسويها ، و هاي احمي الدهن خلني اكليلها بسرعة

سوت الها صينية تمر و دهن حر و جوز .. كلت الها السمجة اعلى السرعة و خبز و كرفس زودت الها خاطر يعوض الدم عدها ، و خذت الصينية اعلى راسها ومشت ، دشت حجرة هدية كعدتها ووكلتها ، و خلتها ترضع البت .

ونومتهن اثنينهن وظلت كاعدة يمهن .. لليل شافت هدوة زينة تكدر تكعد و تكوم ، اجا حاكم كعدو شوية و كام اخذ كواغد و جمارة و كال الها : الصبح يجن يمج .

طلعوا .. ليغاااااد اجا فليح سكران .. دش اعليها متحلف بيها ، اول ما فات و دفرها .. وشايل البت و راكعها ، مجروحه الفرخة بكصتها و كامت تنز دم ، و هدوة يدفر بيها و يصرخ : جايبتها من سرحان
ويفشر ذاك الفشار اليكشش البدن و يجتل بيها
كاض راسه و متوليها بوكسيات اعلى وجهه .. اسنونها طاحن بحلكها و الدم ما يعرف منين يجري .

متلاحكيلها عمها و عمتها داشين اعليه ، جارين هدوة منه .. و شايلين الفرخة وطاردينه ، هدوة كوة تجر النفس .. و البت ناطة من البجي تصرخ.

صايح ناصر لنسوان ولده يجي يعاونن عمتهن .. شالن البت مسحن وجها من الدم و لفلفنها و البت تصرخ ما تسكت منين ما يحطونها تلوع .

عمتها التهت بهدية وجها ازرك وكله دم و ابوها كال الهم باجر الصبح احنا عدها .. يو اجا و شاف بته هيج شيسوي ، و تقنع بهدوة خاطر يو نشدوها تكللهم : جاي امشي انا والبت و طحت اعلى وجهي وهيج صار بيه

هدوة ما نطقت كلمة ، الدم اعليها زاد ووجها غدة اصفر فد نوب ، كواغد ظال بالها اعلى هدوة .. و استحت تبات عدها .. عيالها كلهم موجودين .. ويا ما طلع الضوا و اجت لبيت ناصر .

دشت و شافت بتها هيج و هي كامت تلطم و تزلغ بخدودها ... وتصيح : خايبين ءهلا يهالوادم الحكوووووووني بت راح تموووووت .

شايلتها ، من نار كلبها خاطتها اعلى ظهرها و مطلعتها و ناصر يصيح بيها و يكللها : رديها ما بيها شي ، طاحت و هيج صار بيها

صاحت : تميل عني لا و حك داحي باب خيبر اصيحن و افزع الوادم و اشهركم ، مييييييييل عني

مطلعتها برا ، و موكفة سيارة حمل مارة ، وكفت خاطر تحجيله الحال ، الزلمة ساعة الشاف بتها هيج حالتها ، نزل من سيارتها و شالها ، كواغد نزلت و جرت الفرخة من ادين عمها و ما هلت كلمة ما غلطت و فشرت عليهم و طلعت و هي تصيح : احسابكم وي ابوها و اخوها

صعدت بالسيارة و كالتله : خايب يمه اطلع بيه للمستشفى ، فدوة اغديلك استعجل .

هاذ داسلها و كواغد تنعى اعلى راس بتها و تبجي ، ولا واحد من عيال هدوة لحكها .. و هي تتوعدلهم .

وصلتها للمستشفى و دخلتها ، كايليلها : هاي وين جانت شوفي الوجه صاير كركم البت ما ظال بيها دم .

وكايمين الدكاترة يصيحون و هي تكللهن : توني جبتها من عيالها طاكينها و يتكفكفون اعلى عملتهم كوة جريتها و طلعتها والله يمة

الزلمة السايق واكف وياها ، كالتله : خايب يمه انا كلفيتك لجن طالبتك

- كولي يمه شتعتازين عد عيناج .

- يبعد كلبي يايمة ، اريدنك تروح للمعمل مالت ابو مامون ، الصاير بطراف الديرة

- مالت سرحان ابن الشيخ

- اي والله ، اريدنك تروح غادي و تنشد اعلى حاكم و يو لكيته كله الحك وديت بتك و مرتك للمستشفى بيت نويصر طاكين اهديوة وهساعها ما ادري عنها ميته يو عدله ، الحك .

- صار يمه ، رايح .

الزلمة طالع من المستشفى كاض سيارته و رايح للمعمل ، واصل غاد نشد : تعرفون وحيد اسمه حاكم ؟

راده الحارس : حاكم ابو ستار ، اي شرايد منه ؟

- بته بالمستشفى واصلة الموت

- انا اخوك ... خايب حووووويكم ، ابووووو ستااااااار

- ها ها حجي ، شنهي

- خايب الحك .. بتك طاكينها و بين الحيا و الموت

- شلوووون ؟ ياهو الطاكها

السايق : عمي ما اعرف مرة جبيرة منكبة ولابسه اسود شلت وياها البت و وديتهن للمستشفى والدكاترة اتسودنو يكولون عنها موشلة دم و ميته .. و المرة كالتلي كله بيت انويصر طكو اهديوة .

ركض حاكم و صعد ويا الزلمة و راح للمستشفى بسرعة ، شواي و اجا سرحان للمعمل : ها حجي اصباح الخير

- هلا بويه

- شنهي الاخبار

- المعمل نعمة مامش جديد ، لجن غهرني ابو ستار والله

- شماله ابو ستار

- طاكين بته و هساعها بالمستشفى يكولون ميته

- ياهي منهن

- والله يا ابني ما اعرف ، السمعته يكول بيت نويصر طاكين اهديوة وموشلة دم .. و ادري ميته عدله هالظال بالي اعليه ، ساعة الدرى اتوهدن

سرحان : انهد حيلي ساعة السمعت اسمها ، ما اهيس بروحي الا صاعد بسيارتي و صايح : حجي بلغ خنجر خل يلحكني للمستشفى

- اي بويه تامر .

كضيت السيارة ودست الها .. واهيس بصدري صار فارغ اعلى كثر وهدنتي اعليها .. ويا طول الدرب اهيسنه .. غير يو اوصل .

وصلت غاد ، نزلت و السيارة حطيتها جدام الباب ما ادري بروحي و دشيت للمستفى، ركضت للاستعلامات ، كتله : بت واصلة اليوم ومتعرضة للضرب .. اسمها هدية حاكم ، وين مكانها ؟

اطاني مجانها .. رحت اركض ليها ، وصلت لكيت كواغد و حاكم يصيح ، و يدفر كتلها : ها ابو ستار

اندار اليه و كال : سرحان جابك الله ، ظل هنا و خلني اروح لذول الكواوي*** وعلي اليوم احركهم حرك

- ياهو الطاكها بس كلي ياهو الطاكها

كواغد : ما اعرف يكلولي طاحت و ساعة الدت اشيلنها و اخذها ما خلوني ، نويصر وكف جدامي .. ليما هدديته اصيح و افزع العالم و اشهره الا هداني

- سرحان ظل ويا ام ستار خلني اروحن

- اصبر خل نشوف حالها ، خاطر تعرف شتتصرف

- ما اصبر ، اوجب اكلك .

حجاها و طلع حاكم من المستشفى ، دش خنجر : ها سرحان ؟

جره و مشى ليغاد عن كواغد : هدوة داخل ..وطاكينها
يحجي و يرجف

خنجر : كض روحك امها منا ، سلامات ان شالله

- البت بين الحيا و الموت خنجر

حجاها و انتبه للسستر تكل لكواغد : الطفلة حديثة ولادة ويحتاجلها مستشفى مال اطفال ، متأذايه بكتفها ولازم مستشفى اطفال .

كواغد : جا انا وين الكا مستشفى الاطفال هساع .

قرب سرحان : انطيني البت انا اخذها للولاية

لفلفو البنيه ، وكال الها : ام ستار انا رايح لمستشفى مالت اطفال بالولاية ، يو اجا حاكم خله يبلغ ستار يجيب وحدة من نسوانه و يجي .

- اي يمه نعم الله عليك
تحجي و تبجي ، اندار سرحان لخنجر : انت ظل هنا ويا ام ستار. و شوف شنهو اليحصل بلغني .

- امش ولا ادير بال .

سرحان: اخذت الفرخة نايمة و شحلاتها ، مجروحة بكصتها ، ضاكت الدمعة بعيني ، انا الجنت اتمنى بس اشمن هواها .. هيج ياخذها النذل ويسوي بحالها و بحال بتها

طلعت للسيارة و حارس المستشفى يصيح ، ساعة العرفني ابن الشيخ مطر ، اعتذر و سوالي مجال اطلع بالسيارة ، طريت الدرب للولاية وصلت غاد صفيت و شلت البنية و نزلت

عاينت بيها .. جن ادور معاني هدوة المشتاكلهن بمعاني بنيتها ... رفعتها ليه وحضنتها و كمت اشمن بيها : جا شيصر يو انت مني و امج حاضي بيها ، دمعت عيوني و انا اعاينلها
لا اعتراض اعلى امرك ربي ، بس ليمتا اظل تختبرني باعز ناسي .

دخليت البنية للمستشفى و هذوها من عدي ، و كامو يستفسرون : شكد عمرها ، اسمها امها ابوها .

كلت الهم هيج و هيج الحال ، خذوا البنية و مشوا .. .. فتحولها فايل و عالجوها و اطوها حليب ، و ظل سرحان واكف اعلى راس البت ..

كالوله : شتسميها

سرحان : امنية

سجلوها بالفايل ( امنيه فلاح ناصر )
وهو وكف يعاينلها ، فاكين الكماط عنها و نايمة و اطرافها ناعمات و البت بيضة ثلج ..

ظل يعاين وذب حسرات .. ويكللها : يو مني جا خليتج ملكة بزمانج .. بس امده الدنيا الحطت امج عد الما يسوى ظفرها .

كملولها الاجراءات ب٣ ساعات و محد اجا السرحان ، انطوه البنية ووياه ممية و كالوله : تجيب من هاذ الحليب اذا طلعت و ترضعون الطفلة و تحتاج لاهتمام عالي ، لأنها بعدها حديثة ولادة

- الله كريم

لفها و طلع دور الها الحليب و جابه الها و خذاها ... وصل غاد ، نشد عن كواغد كالوله : حولو المريضة للردهة رقم ٧ .

اخذ البنية و مشا ، دش تكرب .. هدوة مزوركة وجها ما ينشاف و كواغد تبجي يم راسها : ها ام ستار
حجاها و هو يعاين الهدوة ، اختنك

- ها يمه ، جبتها ، جا ستار و مرته لحكوك

- لا طلعوها ..
حجاها و هو يطي البت و الفايل و العلاكة الها ، و يعاين الهدوة، رد حجه : شنهو الصار

- لهساعة ما صحت ، كضاها نزيف ، راحت كلوبنا كالو يو ما توكف النزيف نشيل الها الرحم ، فكيت سدري الربك و ما قصر فدواته ربي ، ردلي بنيتي ووكف نزيفها .

- ما عرفتو ياهو الطاكها. ؟

- لا والله ، ابوها متعارك ويا ناصر ومتكاتل هو وياه و فلاح مامش ، هاذ العرفته من ستار بعد ما ادري عنهم .

- ما كدرت بعد اظلن بالمجان ، طلع برا ، تجيت ايدي للحايط و انا احاول اكضن غيضي ، اهيس النار وجرت بفادي ساعة الشفت وجهه بهالحال

خنجر : ها ابو مأمون

- شفت الانا شفته يخنجر

- شفت ، الله يعينها البت وجه الميت كاضينها كضينها كضيان

- شنهو حالتها
حجيتها مختنك و كوة اجرن النفس

- مطكوكه و الدكتور يكول جسمها مزورك ٣ اسنون مكسرة من سنونها .

فركت وجهي و انا اتنهد ، درت ليها : اطلعلي فليح من حدر الكاع ، تكضي كضيان .. وموش ٣ سنون . ٦ سنون اريد من اسنونه ... بساااااع

- تامر.

مشى مني و انا وكفت بالصالة ، اراوح بمجاني و حاير بكاعي ، البت الاتمنى اطراف كصايبها ، ياخذها الما سهر بليلها و يردها ميته .

سمعت امها صاحت ، دشيت بساع ، و هي تحجي وياها : ها هدوة يمه .

تبجي و تكللها : ظهري ياذيني يمه
مغمضة اعيونها مزوركها مطفايات .. امها تكللها : ياهو العمل بحالج هيج ، كليلي ولج

- فليح ، يمه فليح طكني

- طكاه العباس كون ناخية علي ابن ابي طالب كون كسر بيده ان شالله ... عليش طكج انا مو جنت يمج .. شصار

- يكلي البت نغلة موش مني ، انت حبلتي بيها عد اهلج ، هرمتي ويا سرحان و جاية تنومين نغلتج براسي .

شالت كواغد راسها ليه تعاين وكامت تسكت بيها و تدعي عليه .. كربت منها و كتلها : وحكج ومامش اغلى منج و احلف بحكه ، لاخذلج حكج منه مربع ، بس صبرج علي يهدوة .

هدية : رفعت راسي وانا احاول افتح تك عين من عيوني واعاين الحس الاجاني صحيح يو اتخايل ؟

عاينت و لنه صكد سرحان ، جا غير الله ذب عليه بجي ، انهديت ابجي من كل حيلي ، وهو يتوعد .. و يكلي : دموعج تسواهم و تسوى عشايرهم ما يستاهل تنزلينهن اعليه ، نشفيهن و انا اشفي كلبج بيه.

كواغد : لا تزيد الأمر يمه ، هم ما يعولون اعلى الله يكضون اعلينا عيبة ، و يو طكيته يكلبون الحك اعلينا ويبررون فعلته .

- لا تخافين يم ستار

حجاها دش حاكم : هااا بووويه هدوة

كضت بيد ابوها و كامت تبجي ، و هو يعاين لغواغد و يكللها : الجبان مامش اله اثر ، الا وعلي ما اهدنا الا وروحه بيدي اطلعنها و انعل اليوم للطيتهم بيها بت .

كواغد : ما الها ردة بعد ، تظل عدنا هي و بنيتها و انعل ابيهم

صرخ حاكم : هسه تحجين هاذ الحجي ، من كتلج ما نردها ، خاكم الناس و خاكم الناس، ياااااله جيبي ناسج خل تطيب جروها ، يااااله

سرحان : يواشك ابو ستار بهداي .

- سرحان امش وياي

خذاه و طلعو برا : انا ما اعرف شلون اشكرنك ، وكفتك ويانا دين بركبتي

- شنهي الحجي ابو ستار يو ما احنا اهل .. لا تحج هالحجي .

- و النعم منك ، لجن انا رايد منك شغلة

- شنهي ؟

- تطلع من المستشفى من كون سلطان راح يجي للمستشفى و يو شافك هنا يداور الامر اعليه و يطلع الف تهمة و عيب بينا و يحط الحك اعلينا .

- تامر ، انا هسه اطلع ، لجن راح اخلي سالم يوجف وياكم ، و شتعتاز كله

- كفو يبن الاجواد .

: هله بيك

طلعت من المستشفى توني جاي اطلع .. شفت سلطان و ابنه وصلو المستشفى، كبل لا يعايني داوريت السيارة واطيته كفاها و نزليت راسي ، داير وجهه ليغاد

عاينيت ويا ناصر و ابنه نعمة و اثنين ازلام من ازلامهم ، طلعت من للمستشفى ، دشيت المضيف

كام زناد وتنهد ووكف : شنهي دشتك للمضيف

- مضيف ابوي .. وموش انت التكلي ادشن يو لا

- خلني صابر اعليك و محشم الوادم و ما اريدن الناس تتشمت ببونا ، اطلع و رد راديون .

- توني جاي من المستشفى ، بت حاكم بين الحيا و الموت ، ما رحموها جيفن بيهم خيط من ال ضاحي خايب يو اطيت اخيتك و خليتها بين اديهم شيسوون بيها ، انت مسودن .. كل عمرهم و هم يتحلفولنا .. راديون لا تفكر اطيها الك ، عدي و ما تطلع من بيت الا البيت رجلها .

زناد : البت انطيتها و جلمتي نزليتها يسرحان و علي الدنيا اهدنها فوك روسكم

- احترم نفسك ، اخوك الجبير من تحج وياي ، عيونك ادنجها ، لا تكول شيخ و شخت ع الوادم ، عيونك افكسها ، افتهمت

عفته يهوبز و طلعت ، كضيت بعمي رحيم : خنجر وينه ؟

- مامش

- انا طالع للجول .. خلك عمي هنا و شيصير بالمضيف كلي.

- تامر يوليدي .

عفت السيارة و اخذت الحصان و طلعت بيه ، وصلت للجول صحبان خنجر الشقاوات واكفين ، نزلت : الله بالخير

- هلا اغاتي ، هلا بابو مأمون

- هلا بيكم بويه ، شفتو خنجر

- اي اخذ اثنين من صحبانه و طلع

- وين ؟

- رايد وحيد عده وياه ثار ، و هالوحيد يعرف وين يتواجد و يسكر .

- فليح

- تعرف بالامر

- انا الطلبته

- جا انطر هنا هسه يجي ما يتأخر

ظليت امشي واراوح بمجاني ، چلچل الليل و خنجر مامش و انا افادي موجر ، يو بيدي اكضن فليح واخذ بثاري منه بنفسي .. لجن ما اريد اوهدن حاكم بهالامر .

سمعيت خنجر اجا ، انا اخذت احصاني و مشيت ليغاد .. شفتهم جايبين فليح بديهم ، كضوه ٩ شقاوات ، تولوه دفرات ..

وكعد اعلى صدره خنجر وهو يصيح : خايب يالاغم كدرتك اعلى النسووووووان يالأخبن ..

وتولاه بوكسيات على حلكة ، زوعه دم ..
كام منه و جر راسه وركعه بالكاع ، كام الدم يجري من حلكه و يصيح : دخيلكم هدوني .

خنجر : لا وعلي ما اهدنك اليوم لا ما بولتك دم ما اهدنك

وتولاه رفسات الى ان نسحنت روحه و فقد
تكربيت منه و صويحبنا موجه ضواه اعلى وجهه .. وجهه ما ينشاف من الدم .

خنجر مدنك يلم ... شال راسه و فتح ايده : اعذرني خويي انت كتلي ٦ اسنون لجن بالغلط صارن ٩ ، اردهن لحلكه يو تريدهن ؟

كح فليح وفتح عيونه ..... يتبع


لا تنسى كتابة تعليق ليصلك اشعار بالحلقات الجديدة من الرواية.

reaction:

تعليقات