رواية كحل عرب الفصل الثامن والثلاثون 38 بقلم زينب ماجد
رواية كحل عرب البارت الثامن والثلاثون
 |
| رواية كحل عرب الفصل الثامن والثلاثون 38 بقلم زينب ماجد |
رواية كحل عرب الجزء الثامن والثلاثين
هذا سهمچ
والسهم لوعات
والخانه الوكت يرضه بنصيبه ..!
او هذا طبع الناس بيهم بلاوفه
اوبيهم وفي اتجيبه الحليبه
وانتي لا چف الينشف العين
لا دار الولف يمج جريبه ..!
(لـــِ عريان السيد خلف )
هدية : من ساعة الرديت من فاتحة الشيخ و انا موش اطويبة ، لجم صواب گلبي بجلمات خشنات .. انا الكضيت ليالي ما انمن و عيوني يورمن من الدمع اعليه ، تاليته يكلي ( انسي ايام الغوى يهدوة )
جا ليش امناني
وخلاني اتعلك بيك .. جا موش ابن الشيوخ جلمتهم ما تطيح الكاع ، عجب بلوه ليه ؟
اشاف مني و لعب علي
لا بيوم اطيته مجال ولا انا رخيصة حيا و ما يناسني
عليش يكلي اخذ التناتسبني ، البت الجبرك ابوك اعليها و هي دخيله و متهومة بشرفها.. صارت اخير مني وانا الكلبي ما كربه انسان عكبك .
ظليت نايمة بفريشي .. وحسبة تجيبني و الاخرى تردني و اظنوني كل ساع ياخذني بفرد ميل .
اسمع خذوا المشيخة منا ..
واخوه ازناد هو الصار الشيخ .. ساعة اطاوعني روحي و اتشفى بيه و اكولن حوبتي لجن كلبي ما يرضى انطقها .. و انهجم بيته الكلب كل بلواه منه .. و تبرى اهواه منه .. وهو موش راضي يهده و يو سمع بسمه فز فزت جاهل فاكد امه .
كمت اشرد من ضنوني و اطلع للكاع ويا حبوبتي اعاونها ، احلب الهوش .. احوشن وياها من كون امي التهت بالفاوتح و القرايات .. من ساعة النعت و قرا بفاتحة الشيخ و الوادم من كل صوب جت ليه . طابلهم حسها و كامو يطلبوها الجثيرين .. مامش يوم الا وودو اعليها ..
فليح ما بودي اردنله ..
لجن شلون ما اشوفن روحي مالي كعدة عد اهلي ..
الناس ما ترحم فوك هموم عيالي الحك علي و جلمتهم ( هي خذاها مفضوحة الله اليعلم اشاف منها و هدها عد اهلها كل هالشهور ) يو شكثر ما تحجي للناس و تبررلهم .. الناس تلوف الامور و تذبها براس المرة
الزلمة زين شين ما ينعاب
شما يسوي زلمة .. وواجب حرمته تحمله و يو ما حملته موش اصيله ، و التطلك عار و الكل ما يهواها .
ويو شكيت ..
يشرب .. جا ما حملنا زلم تشرب ؟
اهله مو خوش .. جا ما حملنا عيال ؟
فكر و ما يطي .. جا ما حملنا الفكر وربج سهلها ؟
يطك و يجتل .. ياما وياما انجتلنا شنهي متنا ؟
يدور نسوان ... جا ما حملنا و هالكبر و تعدل.
و شما تحجي المرة تنعاب الحك عليها موش الها ، و الطلاك بحجة ابغض الحلال محرمينه، و محللين كل هالضيم .
خلصينا الشغل و جعدنا بالليل .. وامي جابت النسيج و ذبته بنصنا و كالت : انفشن دامجن جويعدات
جسومة : منيلج هاذ ؟
- اليوم بالقراية ام البيت كالتلي ما تردينه رايدة اذبنه .. كلت اخذنه و عدي جرجف و اسوي لحاف مسيجينة زمينة ساعة التغطى ويا جلجلون تتكشف عبن ذيج اذب ازروك و هي نايمة و تكشف بت اخيها ، هالاريد اسويلها لحيف .
ظلينه ننفش بالنسيج و امي تخيط .. على الكلوب الاصفر .. طفت الكهرباء كاظت امي جابت فانوس و حطته و ظلينا نسولف ونشتغل، دش ابوي : هااا الله يساعدكم .
- هلا بيك
- هدوة بويه شنهي وراج جيابة يو مطولة ؟
- والله يا بويه انكطع حيلي ومامش ، حتى وجع ما عدي .
كواغد : اوصيج يو جبتي شيلي الجارة مالت الفرخ و ادفنيها بمچين تندلينه و اقري عليه الحمد و الاخلاص و المعوذات ..
- عليش ؟
- فليح خلفته ما تنراد .. عليش تكومينهم اعلى كلبج .. اكطعي الخلفة وخله يولي ، من ادفنينها بعد ما تخلفين و يو ردتي تخلفين ردي للمچان الدفنتي بيها طلعي و ذبيها بماي .. ترد خلفتج .
حاكم : شنهي رايدتها ترد ؟
جسومة : جا بت صالها ٨ شهور جويعدة ابيتك وهي حبلى .. شتحصل من كعدتها ؟ ويسرى غاد يمها بس انجيوة و تودي اعلى بنياتها و هاي حولة .. و البت بلايا امها تضيع .. شنهي كعدتهن .. هاي هنا و ذيج غاد ، خلها ترد والله يسهل الامور .
- ترد و هم يطكونها .
- جا هاي قسمتها يا وليدي
- جا مو عدنا نسوان و جارية قسمتنا وياهن .. اثنين مامش فرد يوم مديتي ايدي اعليهن ، ال ناصر ما ينحملون .. خلها جويعدة هنا تاكل اكلتنا و تشرب شربتنا و عوينت ابيهم .
- ليمتها ؟
- ليما الله يفرجها .
كواغد : هم صار ثالث مرة يجون و تردهم .. وردتك الهم ما منها حل .. مرت ستار غاد تبجي .. و الناس تحجي .
- انعل ابو ستار لابو يسرى ، يو طكها و عابها انا شمحصل من فليح و يسرتهم .
- حط شرط ، ولا تخلي الحجي اعليك ، كلهم بتي ما ترجع لا ما تعزل .. گدرها لوحيدها وچولتها حذاها و طشتها بكترها ... وخل البت ترد .
- ساعة الجبتيها شديتي حزام هديوة ما ترد .. هسه كلبتي يكواغد .
- انا قابل رايد خراب بتي .. ساعة الشفتها انطكت جبتها و ما جاي اكللك ردها اعلى حالها ، اشرط هالشرط الرضو رضو الما رضو يطبهم هرش ، بنيتنا عدنا و بنيتهم عدنا ، لجن لزوم نتحرك شنهي كعدتهن بلايا حل ، ذب شرطك ساعتها اتلوف الحك اعليهم ما يصير اعليك و يكولون حاكم عاصي ابته و حارم مرت ابنه من الرده .
حاكم : بويه اهديوة شنهي رايج .
جسومة : امش ومالك غرض برايها ، جا نظل عليها كل عمرها ملفلفة هنا و هادة بيت رجلها ، امش و كللهم شرطك .
حاكم : غير اخذ رايها ، جا هم تكول ثكلت لكمتي اعلى ابوي وردني ، انا ما رايد اوهدنها ، الرضت اكللهم بالشرط و النا رضت .. عوينة ابيهم انا يو ما فضيحتهم ذيج وعلي يحلمون اطيهم اظفر من اظافرها .
حجت بضحكة كواغد ؛ اعلى حورها و جاتل روحك اعليها .. يو ما زريكة ..
هدية : شنيييييي يمه
حاكم : عوينة ابو اصلج .. عليش ولج تحجين هيج اعلى اهديوة شني اخير منها انت
- جا جذب زركة لا انا ولا انت زركان طفرت من عدنا و طلعت زركة
حاكم : اخوج صلاح اسمر
-جا بس اخوي .. خوانك ناصر و واذاك اللاخ دبس .. هالدور بنيات ستير كلهن جرن اعلى اثرها .. كلهن زرك .
- شنيييي يمه لا تعيبين .
ظلت تضحك و لاله جابت بطل مشعول و صينية جاي ، ردفها ابوي : ايييي رحمة الله اعلى ابيج الازرك صويلح .. والله خوش زلمة
ضحكت لاله و حجت كواغد : جا انت مدحته مدحته الا تكول ازرك .
- صالج ساعة اعلى بتج زركة و زركة من وصلت اهلج فزعتي يكويغد
هدوة : اي والله صكد ابوي اعلى حك
لاله : تسكتين لا و علي اهفنج بهاي الصينية اعلمنج الحك وين .
ضحكنا كلنا بصوت عالي و نشرب جاي ، ولاله كعدت تعاونه اعلى النسيج ، دش ستار : بويه بووووووويه .
- هااااا
- حريجة بالسلف .. كاعد الشيخ وجتتتتتتتت
- اناااااا اخوك
هد الستكان منه و هو يصيح : فد لا كاع سرحان ووووووولك ؟
وطلع .. كامت امي من مكانها شالت عباتها ، انا اعلى الواهس تبعتها ، فز كلبي ساعة الكال كاع سرحان .. طلعنا للعجد نتراكض و الناس كلها فازة و طالعة من بيوتها و تصيح : شكو ؟
- كاع الشيخ گب الهيبها .
تراكضنا و انا كوة اجرن بروحي ورا امي . ليما نوصل و نسمع الناس : كاع الشيخ اللي بطرف السلف الصارت لزناد كلها احتركت .
- ياهو الحركها .
- اظنن ولد الشيخ اتكاومو .. سرحان يكول الشيخ وصى المشيخة اليه .. لجن تنازل بيها لاخيه و طرده من القصر .
كواغد : وعلي هاي موش اطباع سرحان ، الزلمة اعرفنه ما يكرب الردية .
- احنا ما نكول سرحان الشعلها .. لجن من مدة و هم ما يتوالمون .. و حركت كاع زناد بهالوكت موش زين .
- الله يستر اعلى الوادم .
خنجر وهو يدك باب القصر بقوة : سرحاااااان ، سرحااااااان
طلع سرحان بسرعه : ها خنجر شمالك ؟
- كاع زناد احتركت
- شلووووووووون ، شحركها
- ما نعرف امش
طلع سرحان و خنجر مسرعين من القصر ... ويا ما جاي يريدون ينزلون للكاع .. لاكاهم حميد : انت هنا يخنجر و انا ادورنك بكاع زناد
مشى مشيتهم و يركضون و خنجر يكله : ياااااا كاع زناد احتركت
سرحان وكف : شعدك بكاعه ؟
حميد : ادري احتركت لجن اجاني وحيد يكلي طكو خنجر بكاع زناد ورحت فزاع .
خنجر : ياهو اليطكني شمالك الكاع ما كاربها .
سرحان : الشيطان دش بيناتنا و رايدها اتطيح براسي خاطر اكاوم زناد ... امشوووو
تراكضوا .. ووصلوا الكاع .. زناد يصيح و يهدد و موهدن .. ساعة الوصل سرحان كضاه من هدومه : مامش غيييييييرك الوجرت كااااااعي يسرحااااان
- نزل ايدك عني و احترم وووووولك
دشت الزلم بيناتهم وسرحان يكله : يو رايد اكاومك ادش بعينك و احركنك انت موش كاعك ما اكعد ابيتي و العب هالالاعيب الما يسويها بس الجبان والردي، انتبه و اعرف ياهو التتهمه زنااااااد .
كامو الكبار يهدون بيهم و اخذو كل واحد بصفحة والناس طفت الكاع .. لجن ماتت الكاع كلها صبحت سوادة .
حضروا المضيف كلهم .. و حضر الحارس مالت الكاع .. سألوه : شنهي الصار ما شفت وحيد ؟
- اخر واحد شفته .. حميد اجا ينشدني عن خنجر يكولون مطكوك بالكاع .. وراح بعدها بشواي التفو اعليه ازلام و جتفوني و سمعت الصياح و الحريجة .. وعلي بويه الناس هي الفكت عيني انا مالي غرض .
زناد : شفت يسرحاااااااان ، حميد هو الداش كاعي بساعة الحريجة .
سرحان : حميد زلمة ابوي
- و زلمتك من بعد ابوي .
- من كون ابوي وصاه بيه و كاله ظل بكتره .. اخير من اخوي الدك وياي الردية
- و انت حركت كااااااعي ، جاي تاخذ حيفك بالكااااع يسرحان
هدوهم الزلام و حميد يصيح : افا تشك بيه يزناد و انا الكل عمري وفاي ليكم تالية عمري اطلع انا الحرك كاع الشيخ الغوركني بأفضاله .
حجاها حميد و طلع مكتاض ، حجه سرحان : اجيت اوكف وياك و ادوس اعلى الصار كله و اكولن اخوي ، لجن يظهر انت ما رايد الخوة يزناد .
- انزع عنك وجوه الملايكة .. انت شيطان و تسللت القصر و حصليت اعليه .
- جلمتك هاي ذكرتني بال ثجيل .. روح دور حراك كاعك عدهم .. لا تكرب يمي ، امش يخنجر .
طلع سرحان من المضيف و ترك زناد موجر .. و الزلام تلوم اعليه شلون يتهم اخوه ، حتى يو هو الحارك اشتري كرامة ال جلوب و اسكت لا تخلي سيرة الشيوخ اعلى لسان اليسوى و الما يسوى و تخليهم يعيبونكم ، وصية ابوك ما تهد اخوك
- واذا اخوي ردي و ما يردني جا شسويله
- احمل اخاك سبعين محمل ... اسكت ولا تجيب سيرة و تكول سرحان .. يو تطابختو بيناتكم كون نسوانكم ما تعرف بثاركم ابوك عدوينة جثيرين لا تشمت اعداه بيه .
وظلو يقنعون بزناد .. بس ازناد انترس غيض من سرحان من كون الكاع هاي ما يملك غيرها بيتين و جم فلس ما يسواش ربع من الوارد التجيبه الكاع من محصولها .
رد للبيت و امه تحشد بيه و هاذ بايكم و ماخذك حقك. و لا تسكتله .. و هو اخذ القصر و البستان و الحلال كله اله .. و رايد يكعدك اعلى الحصير خاطر يذلك .
بس ما بيد زناد غير .. يو يسكت .. يو يكاومه و يطرد اخوه من العشيرة .. جان اباله يطرد سرحان من العشيرة ، من كون سرحان رغم تنازل عن المشيخة ليه بس ما بطل كل يوم يجي للمضيف و يحضر الكعدات ويناقش امور العشيرة و يطي رايه و ياخذون منه .. بعد الحريجة ... زناد كل ودة يطرد سرحان من العشيرة و يذب بيه سند .
ثاني يوم الحريجة .. اجا سلطان و دك باب زناد .. و سلم اعليه و اعلى عمه و كاله : احنا نوثق بيه و خير ما اختار الشيخ عكبه من كون سرحان زلمة حضيري وجديد عهد اعلى المضايف و اصولها .. و سمعنا من الناس تاهمينة بحركة الكاع .. و احنا جايين نبري الذمة جدامكم .. ورايدين احنا ال ثجيل نفتح صفحة جديدة بتاريخنا و ننهي العداوة .
زناد : انا من زمان اكلل للشيخ الله يرحمه ننهي العداوة ، لجن ما صارت نصيب اعلى عهده .. و بشرة خير يو فكينا العداوة ونهيناها .. و انا اتشرف بعمامي ال ثجيل .
كام سلطان و حط ايده بأيد زناد .. و زناد اقترح .. عزيمة يعزم بيها زلم ال ثجيل بمضيفه . و سلطان كاله : نتشرف .
سرحان و سمع زناد حط ايده بأيد سلطان .. و اهو تسودن .. كض عكاله و مشالة : انت صكد عازم ثجيل ؟
- اي و انا قررت انهي العداوة البيناتنا .
- شنهي انت و اتقرر ، ذول عدوين ابوي شلون تحط ايدك بديييييييهم ... كل مصايبنا و بلونا من حدر روسهم شلون تخلي ابوي ورا ظهرك و تحط ايدك بديهم شلوووووووون
- ابوي بكبره موش بكفاي، و عهد ابوي خلص .. ليمتها نظل بهالعداوة خل الوادم تستريح .
- و انت مصدك ال ثجيل رايديلك الراحة ، خايب زناد اصحى ذول ذياب ، رايدين يتربعون بمضيفك خاطر يهدمونه اعليك .. لا تدناهم .
- سرحان انا حركة الكاع سكتست عنها لجن كلبي مورث منك وتريد الصدك جلمتك ثكيلة اعليه و ما احملناها .. اذا ما تريدنا نشمت الوادم بينا و احنا ولد الشيخ مطر .. لا تكربني ولا تطني رايك .
- ولك يخايب طلبو مني دمك و حطو ازلامهم حدر ايدي و كالو بس امر .. و يو كايل جلمة انت الساعة بكبرك لجن ما هانت اعليك الخوة يزناد .. تالي تهد اخيك و تحط ايدك بيد عدوينك.
- وان جانهم عدوينا .. نخلهم جدام عيونا ولا يحفرون بورانا .
- اليكرب النار يحترك .. جلمة كالها ابوي ليه كبلك و ما سمعتها منه ورحت ليهم و احتركت .. و انطر دورك بعد كاعك ، يزناد .
حجاها و طلع من المضيف ، طلع وراه رحيم : راح تخله يعزم ال ثجيل بمضيف ضاحي .
- جا شسويله .. اطيته النصيحة و ما يسمع مني .. شبيدي يا عمي ؟
- ال ثجيل مامش غيرهم واجين الكاع
- جا غير لو يفرزن .. احج هاذ الحجي لوحيد يفرزن عدوة من عضيده ، و زناد معاديني انا و مكرب ثجيل .. خلاه و نشوف وين يوصلونه.
- راح تحضر العزيمة ؟
- انا احضر عزسمة ثجيل شمالني مسودن .. خلهم يولون .
خنجر : خايب ما تنطي رخصة اوذرهم خصوص هاذ زنيد المتطين وعلي لخلي ما يندل دربه .
- هده خنجر .. هده و خلنا نشوف شنهو تاليته
حميد : تاليته يطلعك من العشيرة .
- وطلعتهم . اخذ عويلي و اهج البغداد و انعل العشيرة لابو اهلها ، الجابني من بغداد ابوي ومامش غير وصيته المركدتني هنا .. الا اهج و خل نارهم تاكل حطبهم .. انا زلمة دارس و تعبان اعلى روحي و معاملي تشتغل شلي بسوالف العشاير و طلايبها .
رحيم: وعلي ما يتوفك و كول عمي كال ، اليعيش بالحيلة يموت بالفكر .. و زناد اخذها بحيلة و ننطر ساعته .
- والله يا عمي لا ناطر ساعته ولا رايد من الله حوبة ، بس كون يحط عكله براس و يبيض وجه ابوي وما يسود تاريخه .. ما اريدن غيرها
- الله كريم .
هدية : كعدت امي وياي خاطر تقنعني يو عزلت لوحيدي اردن .. شفت كعدتي موش لايكة و انا اعلى وجه ولادة موش زينة اجيبن عد اهلي ..الناس شتكول اعليه .
وبعد جلمات سرحان .حتى كعدت اهلي كرهيتها من كون هو عايش حياته و مرته حبله و قصره و بستانه .. و انا وحيدة مخاوية الحايط .. شفت شرط امي احسن الي ، لا الهم شغل باكلتي ولا بشربتي ، شسوي لروحي براحتي .
طرشت امي جميرة ليسرى .. بس كالت الها لا تكولين امي ودتج .. هيج سوي روحج من المدرسه و جاية تشوفين نجيوة مشتاكة الها .. و كليلها ابوي قرر اذا يعزلون جدر هدوة يردها و يردج لبيتج .. واذا ما قبلو اهلج تظلين عدهم .
جلجول ما قصرت من المدرسة ومرت ليسرى ، رحبت بيها يسرى مو جن جلجول المصلبخ .. واحد نازل اعليها من السما من كون كعدت البت عد اهلها ما تنراد خصوصا يو جان عدها بيت و مطلعينه منها ، تحط روح بروح خاطر ترد البيتها .
كعدت يمها و سولفت الها الكالتهن بيها امي كلهن .. ويسرى ما عولت اعلى الله حاكم رضى يحط شرط و يرجعها ، راحت تحبحب براس فليح خاطر يرضى يعزل بيه لوحيدي .
مرت فليح ضرتي ما رضت شلون انه جديدة عهد وياه و اعزل ، و هي الصارلها سبع اسنين و فروخها خمسة واكلتها و شربتها ويا عيالها .. كالتلهم: اذا عزلت تعزلوني ما اظلن .
فليح ما رضى بالعزال بس امه من كون تريد يسرى ترد .. كعدت ترضي بيه و تكله : مالك غرض بمريتك هاي تريد تزعل يطبها حريشي خلها تزعل .
مامش يومين ..
وعمي دز طارش ( بعد الغدا احنا يمكم )
مشوا ال ثجيل للغدا بمضيف الشيخ زناد .
وصلوا غاد والشيخ زناد و ازلام العشيرة تلكوهم ورحبوا بيهم .. حجه سلطان : جا سرحان مامش ؟
زناد : ابنه موش طويب هالتعطل لخاطره
- ها جا خوش ، الله يكوم وليده بالسلامة
- الله يسلمك ، دش دش .
كعد سلطان و هو يكللهم : اي شنهو رايكم بالجاي يسويه صدام
زناد : صديم هاذ جنه ناويها اعلى حرب .. من كونه حاط كورة ويا اهل الدين .
حجه زلمة من ازلام العشيرة الكبار : الله بالخير عليكم
- الله بالخير
- احنا مضيف عشاير و موش ارجال دين ، الرايد يصلي الله يرحمه الشيخ مطر بنالنا جامع بنص السلف نذكر الله بيه ونصلي، رحمة الوالديكم لا تجيبون السياسة بنصنا و انتم تعرفون صدام ما جاي يرحم اهل الدين و معتبرهم كلهم عوان للخميني .. من رخصتكم بويه هدونا منهم مالنا حيل طلايب .
سلطان : لاااا على بختك .. الدين فوك كل شي
- اعلى راسي الدين لجن مراجعنا سكتت .. و احنا من سكتتهم .
حجه زناد : بس السكوت اعلى الباطل هم ما يصير يعمي .
سلطان : انا حجولي عنك و كالولي زلمة متدين و حكاني .. وانا يعجبني الزلمة المتدين .
زناد : الحمد لله اعلى كل حال .. ياله بويه صبوا الغدا.
حميد و رحيم حاضرين العزيمة .. سكتوا ..
تغدوا ال ثجيل وشربو جايهم بمضيف زناد .. وحجه سلطان : الله بالخير
- الله بالخير
- كعدنا و التمينا و ما تعرفون بفرحتي بلمتنا هاي من كون اتمناها صالي عمر و شكثر طرشت طارش خير للشيخ زناد و هو الما راد كربتنا لجن الشيخ زناد الله يسلمه ما قصر واكرمنا و ان شاءالله المضيف العامر .
- الله يسلمك ، ابوي زلمة خير لجن وصية جدي ضاحي بعد .. و جان ملزم بيها ..
- الله يرحمه ويغفر له .
- يرحم امواتكم .
- جينا هتا و التمينا خاطر ننهي العداوة .. وانا جدام الزلم كلها.. اطي بتي الزغيرة عطية للشيخ زناد و طالب منه بت من بيته خاطر يتلايم شطنا وننهي العداوة .
صاحت الزلم : و النعم منك و النعم .
زناد : اخذها بخير ان شاءالله و انا اطيكم اخيتي الزغيرة عطية .. خاطر يتلايم شطنا .
صاحت الزلم (و النعم و النعم ) و هوسوا ( هنا يتلاطم شطهم حوت و كوسج بيه ) وكاموا يدبجون و يهوسون ..
حميد اغتاض كلش و هو يعرف خنجر خاطب اخت زناد الزغيرة من الشيخ و الشيخ مطر رضا الخطبتهم و خنجر تمم كل جهاز عرسه ناطر بس تعدي اعلى وفاة الشيخ خاطر ياخذها.
كام من مكانه و راح لخنجر ...
ام رحيم كام من مكانه وراح لسرحان و بلغه بالكعدة كلها ...سرحان و سامع سلطان يحرض بزناد ضد صدام ، كض عكاله و طر الدرب .
وصل للمضيف ، استقبله زناد : هلا بخوي الهادني وكاعد ابيته .. عليش ما حضرت عزيمة ثجيل ؟
- العزيمة الما يرضاها ابوي ما اكربها ، بس وصلني الحجي الدار بينكم و جيت اوصيك
- انا كلت الك جلمتك ثكيلة اعلى افادي ، وفرها يخوي.
- زور كوا تاخذها يزناد ، ويلاد العشيرة بركبتك لا تنجر . انت شيخ عشيرة موش شيخ دين و اخر وصايا ابوي يكول ( لا توكف ضد صدام )
- هههههههه حتى هاي موصلينها الك ..
- بالمضيف لا تحجي اعلى صدام .. ولا تذمه ولا تكرب اسمه .. خلك بعيد عنه .
- هههههه خايف من صدام ؟
- مراجع اعليها العتب سكتت خوف اعلى الوادم من صدام ، تريدني انا ما اخاف اعلى وادمي منه ؟
- انا ما الي صدام ولا غيرة ، جبمة انطرت و حجينا بيها .
تنهدت : انا اخوك موش عدوك .. لا تعيدها .
- الذبو يوسف بالبير اخوته
- و الخذا حكي مني انت و انت كلش زين تعرف الحك الياهو .. خلني دايس اعلى جرحك وواكف وياك لخاطر ابوي.
- من عبن اعرف وكفتك موش لخير .. انا اعرف رايد حكك مني و جاي تسعاله .
- زناد انت مخربط بيني و بين ثجيل اصحى اعلى روحك خوية .
حجاها و طلع من عده ...
بعد العزيمة .. طلع سلطان و ناصر وراحو اعلى بيت حاكم .. رحب بيهم ، عرض اعليهم يتغدون كالوله : مشكور ، متغدين و شاربين جاي بمضيف الشيخ زناد .
حاكم : اي صحيح سمعت معزمين بمضيف زناد ، بووووويه جمارة جايكم ... اي شنهي ما شنهي ؟
سلطان : مامش .. اطيته بتي الزغيرة و اطاني اخيته بعد اربعين ابوه .. نطي البنيات ، جا انت عليش ما حضرت الكعدة شنهي موش من ال ثجيل .
- بعد الصار و زناد اكلها اعلى سرحان طاب كلبي من المضايف و دشتها .. اردن من المعمل تعبان اغفالي شواي و اطلع للكهوة اوكف ويا ستير.
- جا غير سرحان الاغم انطاها اله ، الا زناد شنهو وينطي المضيف ، بس شتكول اعلى سرحان .. حضيري و تفكيره معامل و شغل و هد المشيخة لزناد .
حاكم : سرحان مثل ابوه المرحوم الشيخ مطر ، زلمة لا يرضى بالباطل ولا يرضى الدم و انطاها لاخوه خاطر ما يتكاوم وياه ويشمت عداهم بمضيف ابوه .. و انا اشوف العقل عده .. هو ربحان موش خسران .. القصر و البستان و الحلال كلها عده .
- خله يجابلهن .. نشوف وين يوصلنه
- الله يوفكه ..
سلطان : شنهي الراي ؟ البنيات كل وحدة ابيت و كل ما يجولك مشايا تردهم .. شنهي شروطك يحاكم .
- انا موش ظلام بخت يبو نعمة .. الرايدة سلامة بتي ، لا رايد الها قصر ولا فلوس ، الاريدنه راحة بالها ...وراحة بالها بعزالها .
سلطان : ان جان اعلى العزال ناصر راضي و فليح مستعد يعزل جدرها .. بس منها و تكف .
- الطك يبو نعمة ، بتي موش فصلية و تنطك و يو غلطت انا ابوها جيبوها ليه و انا احاسبنها .. لجن ما ارضى لا فليح ولا امه ولا اي واحد من اهله يمد ايده اعلى بتي و يطكها.
- المرة الما تطاوع زلمتها تنطك .
- المهرة بيد خيالها يعمي ، من كونه زلمة حوك بنظرة وحدة يخلها تطيح بمجانها ما يعتاز طك، و الزلمة الما بيه خير يو ينومها بجتله و يكعدها بجتله المرة ما تحترمه من عبنه ما براسه حظ .. فلا تذب اللوم اعلى المرة .
ناصر : ما تريد الطك لبنيتك .. ما تحاجي ابنك شنهي ذنبها و يطكها و يذبها؟
- ستار زغير و انا لمته اعلى تصرفه و ما رضيتله لجن ساعة الشاف اخيته مزوركه .. سوا المثل وانا ما ارضاله .
سلطان : سوالف نسوان و انتم خوان . ما تسواش تتزاعلون وكلمن ينفرد عن الاخر لجلهن .. انده بتك يحاكم خاطر ناخذها لبيت زلمتها .. وكدرها و طشتها و جولتها اعلى حسابي .. و امش ويانا خاطر نرد بت نويصر .
- بتي ما عدها شي .. لجن انا بعد العشا ان شالله امرلك و نروح اعلى بيت ناصر نحجي .
- اهااا هاهيه .. انا ناطرك .
لاله : اييي لاهله ولا مرحبا ، راح ترد يسرى العوووجة
كواغد.: حسج شمالج منا الوادم
- عمه و علي هالبت ما اجرعنها .
اندارت كواغد و هي تحجي ، لكت هدوة تبجي بسكوت : ها يمة شمالج .
- يمه وعلي ما اودن رجعتي لفليح ما احبنه .
- كولي يا الله هاي قسمتج بعد جا شسوين ؟
- يمه ويو طكاني مرت الاخرى
- تحاذري ييمه شما يحجي هدي مثل الجلب اليعوعي و صكي اذانج عنه جا شسوين
لمت علاكتها، و علاكة الهدوم مالت الفرخ الجاهل الخيطتهن كواغد ليها ، و خذوها ناصر و سلطان ..
خنجر سمع من حميد راديون خطبوها و هو تسودن .. ركض لسرحان : خايب سرحااااان ، سرحاااان .
- هااااه شمالك
- رحيم ما حجالك ؟
- عليش ؟
- زناد مطي اخيتك الزغيرة لسلطان .
- مامش هيج حجي ، رحيم ما حجالي بس بسالفة السياسة .
- لا حميد سامعهم ... و سلطان مطيه بته الزغيرة .
- اوجب خل اتحغغ .. راح للمضيف وكف ويا عمه .. لكا عمه هم ما راضي بعطية زناد لراديون من كون ابنه رايدها و هو ناطر تطلع سنة الشيخ و ياخذها لأبنه.
سرحان تسودن .. طلع لبيت زناد بساع
ملوك : صكد مطي اخيتك لال ثجيل يزناد
- اي عليش ؟
- شني هم ال ثجيل و تطيهم اختك .. شمااااااالك تسووووودنت
راديون : ياهي المطيها ؟
زناد : ما ارضى المرادد انا حجيت و انتم تنفذون
ملوك : انفذ شنهي يزناااااد ، خيرة الزلم خطبو اختك تجار و شيوخ و ما اطيناها .. تجي انت تطيها لال ثجيل
- يمممممممممه ، ليجاي وحدج ، انا افادي ما عاد يحمل ، كافي علي سرحان بالموت متجرعه ، موش الدور انت ويا تراددوني .
ملوك : انا ما مراددتك ..بس اخيتك ما تكربها ولو تنطيها افتهمتتتتتت
- موش انت التفهميني يمه ، ان جان ابوي يسمعلج و يمشي بشوراج و تاليته طاح بسبتج .. ما اعيدن غلطت ابوي و امشي بشورج .. فلا اتخلين ابالج تمشين موش زناد ال مطر اليمشي بشور مره .
راديون : شور مره شنهي .. انا ابوي اطاني .. و حجه وياي كبل موته وباركلي .
- باركلج علييييش
ملوك : دشي داخل يراديون
- لا يمه ما ادشن ، حده وليجاي ، اخذ حك سرحان ، ما ياخذ حكي ، انا بت الشيخ مطر ما انطي عطية .. و ما ارضى تذلتي هالذلة يزناد .
حجتها و هو فز عليها كضاها من شعرها يجر بيها و تولاها رفسات .. كامت تصيح و ملوك تصيح ، نسوان عمه و نسوانه يفاككن و مامش احد كدرله و جرها منه .
دفرها للكاع و داس اعلى راسها و يصيح : انا الما تمشيييييين بشوري وووووووووولج .. كح**
ويا ما حجاها سرحان جان جاي اعليه ، سمعها لا حسب حساب نسوان ولا كح ولا تكحكح ... دفر الباب و كال : خايب يالسكط ياهي هاي التكول عليها كح** ولك
جر زناد من راديون و جابه بوكس ؤ رده ليوره و طفر اعليه طيحه للكاع و كعد اعلى صدره يتكاتل وياها ويصرخ : ولك بت الشيوخ تكول عليها كحححححححححححححب***
عمه و ابن عمه تراكضو ، يجرون بسرحان و زناد كامله : اطكني وانا الشييييييييخ .. ولك سرحاااااااااااان اطكني
- انعل ابو السواااااك شيخ ولك بخمس اصخول ما اسرحنك انت و المشيخة شنهووووو .. هكو شيخ يتهم اخته بهالتهيمة يالردي ، تطيها لال ثجيل .. باحلامك .
اندار لراديون و كال الها : جيبي اهدومج و امشي وياي
زناد : مالها طلعة من البيت ، و انت ما الك كلمة اعليها ، انا اخوها و انت براااااااا .
كامت راديون تصرخ و تبجي : اااااااااااااالله اكبر عليكظ هدوني بحالي هدوووووني ، مات ابوي و عافني الك .. وينك بويه تعال لبتك سبوها بويه ، بويه ضعيوني بووووووويه ، اطلع من كبرك و اتلاحك لبتك بووووووووويه .
سرحان جرها و كال الها : امشي يبت الاجواد ، شحده اليكربج و اخيج موجود
وكف بصدره زناد و عمه يجر بيه ، و زناد يصيح : ما تطلع .
سرحان : ظل هوبز بمچانك .. بس راديون ما تظل عدك .
ملوك : البسي بساع و اطلعي ويا سرحان ، عبايتها بساع وينها جيبنها .
سرحان و زناد واكفين بوجه بعض ، وملوك جرت بتها و طلعتها من البيت ، و خلت مرت عمها تصعدها بسيارة سرحان ..
تقربت مرت عمه وندست سرحان ، فهمها زناد .. طلع من البيت كبل توجه لسيارة سرحان ، جاي يفتح الباب كضاه سرحان : لحد هسه كاض روحي عنك لا تخلي السلف يكول سرحان حط الجيلة بنص راس اخوه عكب موتت اخوه .. خلني صابر و كاض اعصابي عنك .
ملوك تبجي وكاضه اباب السيارة ، و عمهم يجر بزناد و يكله : خلها تمشي وياه و احنا باجر نمر ليه و نحلها ، الوادم منا لا تخلون السلف يتورج اعلى طلايبكم .
وسرحان و زناد واحد يعاين بوجه اللاخ .. و عيونهم تجدح شرار من الغيض الشايلينه بكلوبهم .
اندار سرحان وركب سيارته و اخذ اخته و طلع ..
وزناد يتوعدله هو وراديون .
رجع بيها و هي تبجي ، سرحان يفور غيض ، التفت اعليها : لا تبجين بعد اخوج ،
- ازناد ما راح يهدك ولا راح يهدني بحالي .
- دخل يكووووم ، وكت الصعده فوك جتافنه .. يكرم طار علي الچلب البلباب اقدرنه ازود من زناد ، ويحجي بالدين المرهوك .. تبرى منه الدين ... وين مامش وحيد ردي كام يتغطى بالدين ويحجي بيه هلبت الناس تكرمه .. خزاه الله بجاه علي ابن ابي طالب .
- زناد شيخ يسرحان .. و ازلامه جثير
- لا تخافين ، ردي لقصر ابوج و نامي رغد ولا تشيلين هم اله ، انا من باجر اخبر زناد اخلي يجي يكبع وياخذ .
- يتصيدلنه وندوهن خنجر ويانا .
- انت عليش خايفة خوية ، جاي اكللج لا تخافين ، خله يولي .
ظلت تبجي بهداي ...
وصلها القصر ، نزلها و صاح : بشرررررررررررررررى
- امر يبو مأمون
- اخذي راديون ودخليها جوا ترتاح
ردحة : شنهي الصار
- الصار زناد تسودن ، تخيلي منطي راديون لسلطان .. هاذ براسه عقل ؟ ادشن اعليه الكاه ساحك اعلى راسها ويفشر اعليها .. هاذ هم تسمينة تربات ابوي.
- انكسرت ايده ان شالله
صبيحة : هم شني ال ثجيل و ينطون مرة ، موش هاي بت حاكم ، شايفة الويل منهم ما يتعايشون، كوة ردوها اليوم
تنهد.سرحان ورفع راسه : ردت ؟
- ردت ودموعها بعينها ما تريد رجعته .. ماخذها سلطان و عود بالليل يردون مرت ستار
فرك وجهه و هو يتنهد : ينلام ابوي من يكرهم ، لا وعلي ما ينلام ، جنت اكولن ابوي عليش حاقد اعليهم ؟ وحقدت اعليه من رد امي و كطع علاقته بآل ثجيل ، لجن اليوم انا عرفتك حكه .. و العباس ما ينلام هم ال ثجيل بشر وتتلانم وياهم ، شياطين الأنس هم .
- ردحة : وشراح تسوي ؟
- الله كريم ، الخاتون وينها
- بحجرتها بس مريضة كلش ، حتى من نحجي وياها ما عاد تجاوبنا .
- ديرو بالكم عليها .. انا رايح للمضيف
ردحة : دير بالك من زناد يمه
- لا تخافين .
كام من مچانه وراح للمضيف .. ما دش و عمه جراه و كاله : لا تكرب زناد هالساعة
- جا مو هاذ الصفيتو وياه عليّ
- زناد موش الاولي يسرحان لا حاط كدر لينا ولا يسمع من عدنا ، و رافع منخاره اعلى عمامه .
- انا رداده
- اسمممممع يسرحان .. راديون انطت بالمضيف لال ثجيل ، و الجلمة صعب تنرد .
- راديون ما تمش لال ثجيل
- وانا وياك بت ال ضاحي ما تروح لال ثجيل .. فرصتهم هاي يطلعون كل احقادهم بيها .. انا عدي الحل
- شنهو ؟
- مامش غير ابني ينهي اعليها وياخذها و يلغي هالزواجة هاي ، بغير هالحجي .. الجلمة النكالت بالمضيف ما تنرد ......يتبع
يُتبع ..
- لقراءة الفصل التالي : اضغط هنا
لا تنسى كتابة تعليق ليصلك اشعار بالحلقات الجديده من الرواية