القائمة الرئيسية

الصفحات

رواية كحل عرب الفصل الثاني والثلاثون 32 بقلم زينب ماجد

 رواية كحل عرب الفصل الثاني والثلاثون 32 بقلم زينب ماجد

رواية كحل عرب الجزء الثاني والثلاثون 

رواية كحل عرب الفصل الثاني والثلاثون 32 بقلم زينب ماجد


رواية كحل عرب البارت الثاني والثلاثين 


(((بقلم زينب ماجد )))

الحلقة_32
(زواج هدية )

حبيبي چن نجم ويلوح .. بسماي
واذوبن من اسمعه يصيح .. بسماي
عجب ياعين شو تبچين .. بس ماي
وچ ابچي دموم عل الراح من اديه .

هدية : يعني شنهي ؟

- ما ظل جدامنا غير هالدرب يهدية ، انا عجزت ويا الشيخ .. الكتله ذب بيه سند ما رضى و الكتله عوفني ما رضى ومنين ما اجيبنها ما رضى ولا عمامج راح يهدونه .

- ولون عرسنا شنهي حياتنا ؟

- ما نخلص منهم لجن الموت مصيرنا من كل ولا بد .

- مستعدة اموتن ولا اروحن لغيرك سرحان انا اموتن .

-ما ظلت جدامنا غير هالطريجة .. يوم الخميس .. انطري مني طارش ياخذج و نهج من هالديرة .

كضت بديه حيل : سرحان لا تهدني .. الف موته وياك ولا ضحكه ويا غيرك .

- ولو ما كدرت و تعددت الأسباب ، تعذريني يهدوة ؟

هزت راسها : ما اعذرنك .. انا راح انطرنك .. و يو ما اجيت وكتها اعرف انت ابصمت اعلى اعدامي و يمك و تنتهي الدنيا وياي .

جريتها و ضميتها الصدري .. و خذيت النفس من هواها .. هي ثغبت و كضت بدشداشتي و كامت تبجي .. جرت ادموعي وياها .. تمنيت هنا ويوكف بيه قطار العمر .. بهالمحطة و ارسي يمها .. وتنتهي سفرة حياتي واجزي منها .

بعدت مني و هي تعاين بعيوني ، نطقت : اعشكنج .

- انت الهوى اليسري بريتي وبلياك خنكة .

- اخ يا جلماتج شيعملن بحالي .

- اروحن لا يشوفنا احد

ضحكت و الدمعه بعيني ، حسيت عيوني وكربيت حبيتها بكصتها و كتلها : لا تظنين الكلب العشكج يهدج ، لا وحك علي لا .

-ناطرتك .

تنهدت و انا اكللها .. ان شاءالله

مشت و رديت لحصاني .. اعاينلها تمشي وتعرج وتحس بوجها و ترد تعاينلي .. دموعي تلالي بعيوني و انا اتنوعالها ما دريت هذا حدنا و انتهى بهالمجان العشك ..

رديت للقصر .. اجيبنها منا و اردنها منه .. صعبة حيل صعبة الشيخ ما خلالي منفس اتنفس منه صك علي كل البيبان .

انهبها ؟ و ابوي .. و اهلي و عشيرتي و شنهو مصيرهم
اهلها و حاكم الكل عمره ساندني و صايرلي ظهر .. شنهو مصيرة يو نهبت بته ؟
الا احنا الشنهو مصيرنا .. يو نهبتها ليا كاع افرن منهم و لون فريت ، ليمتها اظلن اظلن فار .. و الخطر موش بس يلاحكني .. يلاحكني و يلاحك بزريتي.

اعوفنها ؟
اعوفن ادموعها هماله
واخيب اضنونها .. واخون الوعد
واخل غيري يتخير اعليها يتكرب الها .. اطكن و اموتن
هدوة الي و ما تصير الغيري ..

بس شلون .. دخيلك ربي ساعدني وعلي مخنوك ..
بلا وعي كمت احضر للشردة .. عدي و البالي كلشي يهون ولا اعوفنها...

حضريت فليساتي و حجيت ويا الخاتون ع المعمل البغداد و كتلها هاليومين اسافر لبغداد ..

ساعة العرف ابوي انا رايح البغداد تفطن وكام يهيس انا جاي اصفي اموري .. كرب ليه و كال : شنهي الراي يسرحان

- شنهي بويه

- جاي تصفي فلوسك ؟

- لا لجن هيج جاي اداور اموري .

- وشنهي روحتك لبغداد

- شغل

- كبل اسبوع اجيت من بغداد .. شنهو الشغل بعد

- مشاغلي جثيرة بويه ، اذا ما عدك شي انا اكومن اترخص .

كض ايدي و كال اسمع : الزلمة الله فركة اعن المرة بعكله من كونه يحكم عكله موش عواطفه و الديرة عواطفه هاذ ادنى من المرة .

- عليش هالحجي

- ابوك انا و انصحنك .. حطها ابالك يو استعجلت و صخمت وجوهنا .. انا واخوتك الراح ننلام و شيخلصنا من ال ثجيل .. ويا فضيحتنا بين العشاير و يا فضيحة ابوها المسكين .. هاي يو ما كضوكم .. اما يو كضوكم .. فالجتل مصيرك و مصيرها و هاي موش ابعيدة و انت تعرف هم الهم عيون بكل مجان و مراكبينا من حيث ما نعلم منين .

ويو جتلوك و انت ابن شيخ .. ثارك بعشر ازلام ما يبرد
عشرة ازلام تنجتل ، و عشر نسوان تترمل ويا چثر الايتام

مريتك ووليدك هنا ؟
ما فكرت بيهم ؟ شنهو مصيرهم ؟
كل هاي خاطر انت تاخذ الهواها كلبك والف ويل لهلك واهلها .

هذا عكل يسرحان ؟

- وكف هالعرس ولا تخله يصير

- انا ناطر هالعرس ازود من الكل من كون بيه خلاصك و خلاص اهل بيتي من نار ال ثجيل .

- دام هيج الحجي .. اسمعني بويه
يو انكشف المستور و فار التنور .. تبرى مني و يو انجتلت لا تتوهدن بثاري .. و مرتي وبتي امانة بركبتك .

: سرحان .. سرحاااان

عافه و مشى .. مشى وراها وما وكف سرحان
جانت النار البكلبه تسعر و دخانها عامية اعيونه عن كل كلشي .. كل باله شلون اهدنها ؟ .. اهد كلشي و ما اهدنها .

الشيخ : حميد

- نعم شيخنا

- رايد خنجر اخيك ، ندهه ليه

-خير شيخ

- رايدنه بشغيلة

- امرك يمحفوظ .

راح ساعة ورد خنجر وياه : امر شيخ ، ساعة الكالي اخوي رايدني اجيتك فزاع و امرك اعلى راسي .. كول شيخ.

- سالم راسك يخنجر، انا مراغبك من چم. شهر و اشوفن امورك مستعدلة .. جنت اظنن سرحان مغلوط يوم الاختارك تشتغل وياه لجن الايام ثبتتلي سرحان ما غلطان بيك و انت جنت عد ظنه .

- فضل اخوي سرحان ما انساه و انا خادمكم يشيخ .

- خادم ربك .. لجن رايد انشدنك عن سرحان ، شنهي رايك بوضاعه هالأيام؟

- اوضاعه ما تسر يشيخ .. سرحان العشك عامي عينه و ما جاي يوجد احد غير هواه .

- تشوفه

- لا وعلي من كون يو ساندته بهالامر يصبح انا رايد موته و هو اخوي، لجن شنهو الطايح باليد و اسوي .

- تراكبه و ما يغيب من عينك ساعة، حتى من اينام انت وياه افتهمت ؟

- ويو حط اباله ؟

- ساعة اليحط طارش ليه و انا افضن كلشي .

- شيخ جلمتك اعلى راسي بس انا صكد يسموني نكري و سرسري و شلايتي .. لجن ما اخون بصويحبي وافتن اعليه ياريت تعذرني من هالسالفة .

-هاي موش خيانة .. هاي لمصلحته

- ولونه ؟ ... ( ولو إن ؟ )

- واجبك تحفظ صويحبك يخنجر

- انا اواعدنك راح امنعنه بكل حيل ويو ما كدرت اخبرنك و اكلك الامور طلعت من ايدي .

-احسنت .. روح واوكف وياه ..

- تامر شيخ

طلع خنجر من الشيخ وراح يدور سرحان .. لكاه كاعد اعلى الشط و باله مشدوه .

- ها يصويحبي اشوفن اعلومك ضايعة .

- جاي احترك يخنجر و عكلي ما جاي يفرزن وتايه بين اخطي جدمي يو اردن واهدناها و الاثنين براكين بفادي يوجرن .

- لو عرست راح تحزن هي يوم يومين شهر .. سنة .. و تنسي و انت المثل .. لجن لو نهبتها يا مصيبة نلم؟
خوفنا اعليك يو اعلى اوليدك اليدفع اثامك يو على اهلك يو على اهلها .

- ابوي صكاها بوجهي

- ابوك ما صكها سرحان انت الحطيت روحك و حركتها بهالعشك .. انا حذريتك منه ساعة الطحت بيه .. انا هم ابوك ؟ .. عيونك معمية بعشكها و ما جاي تفرزن مخاطرها .. سرحان كلت الك كبل كلبك يتحول جمرة بصدرك .. و هساع اكللك يو خذتها يوم ما يخلونك تعيش بهنا الا ساعة التنجتل انت وياها و تروح عد رب رحيم . وكتها الويل و الچيل اعلى روس اهلك .. خايب تحجي صكد يو تشاقه ؟

- باجر زفتها و هي ناطرتني .

- خلها تمش وعين الله ترعاها ، و ترعى كلبك

- ووعودي وياها .

- وشفايدة الوعد لو نتايجة الموت سرحان .. هاذ موش وعد هاذ انتقام

- ودموعها ؟

- يجيهن يوم وينشفن

- و اجرحنها و ازيد صواب كلبها .. عرسيت و خلفيت من غيرها و اهدنها ..انا عايش بالف خير و هي تعرج بسبة ضيمي و ظلايمي اعليها

- جا لهنا وواچب شنهي رايد تزيد اعليها ؟

- انا جاي احترك يخنجر ، جاي اختنكككككك

- الله يعين كلبك .

ضل يضرب بيده بالحجر و يصيح و انا اعاين ليه ..

هدوة : باجر عرسي و انا جويعدة اناطر الطارش من سرحان ، ضميت اهديماتي و ذهباتي ببقجة و الحجة مزهبتها للعرس .. وابالي سرحان .

اعاين بوجوه اهلي .. اكدر ؟
اهدنهم ؟ ينسوني ؟
سنة سنتين اكيد ينسوني ، لجن امي حظلت هواي و التعب رسم ملامحه اعلى رسومها و ظهرها الشگه حدب .

كلشي بيه حنية ..
مسامرها و عتبها ، تعبها اعليه و شكاها
حتى الطك من اديها ما اهيسنه بكره
بكثر ما اهيس بفكر تريد تمنعني و ابالها لمصلحتي
لجنها ما درت بكلبي و علومه .

اعاين لوجه جمرة اختي .. تروح و تجي تضحك ليه و تكلي : خايبة اهديوة شمالج دضحكي .

لو حبوبتي وجلماتها المتروسة طيبة و مواساتها و دفو اديها و هي تكض اديه و تكول ( مت عيني اعليج حبوبة )

حتى لاله مرت اخوي ستار و ايمان مرت ابوي ، ما فاركني .. و ايمان تجيب بوليدها و تحطه بحظني و تواسيني خاطر انسى .

لليل امي كضت ايمان و لاله و كالت الهن : كومن ليها و رتبنها من كون باجر العرس .

ما مانعيت من كون البالي اروحن لسرحان ..
حضريت ارويحتي و ازهبت و امي ادور اعليه من كون كلبها ما متطمن .

الليل المر ما نمته ..ولا شفته ليما طر الفجر .. ردت اطلع للشط لجن شفت ستار كاعد و ما كدرت امش ..

نطرت بس الكا مجال ما لكيت .
اخ يالساعة التمر اشطولها .. و لحظات بالمر اتمر

عرس ما سوو بيت عمي .. كالو ناخذ المرة بعباتها و بس .. و ابوي عرفها معاند وياه جيفن اخذ يسرى بعباتها و ما سوى عرس .

بس فلاح و اخوته محضرين لحفلة و كعدة ازلام .. و سمعت جايبين براميل العرك و جايبين كيولية خاطر يحركون كلب ابوي و ال ضاحي .

ما جن هكو عرس .. الكل عده عادي بس امي محتامة و كلبها اعليه و ما جاي اطيبلها كعدة .. كربت ليه و كعدت جدامي .. خذت راسي حبتني و حجت : هديوة يمه عمت عيني بذاك اليوم الجبت ابيت ال ثجيل ييمه ، و علي يو اعرف هيج يصير وياج لكص جدمي و ما اخطي عتبتهم ..

- عليش تبجين يمه ؟

- ابجي اعلى ظليمتج ييمه ، ابجي اعلى كلبيج الموجر .. ابجي اعلى حظج يبنيتي .

دنجت و دموعي كامن يهملن و يجرن : يو خذوني اليوم .. احسبيني متت

- اسم الله اعلى اسمج من طاري الموت ، اسمعي يمه .. صيري سباعية الحياة موش عشك و هوى ، خلي شيبات ابوج جدام عينج .. ابوج كضى عمره و هو يراعيجن و يداريجن و انا امجن يو صحت بيجن ينهد بيه و ما يرضى .. حفظي شيباته ييمة .. تراه من مصيبتج وليجاي شعره شاب من حجي الوادم لجنه يضم بكلبه و ما يحجي .

من حجت هيج .. وتذكرت وعودي وي سرحان كمت ابجي حيل .. كامت تمسح اعلى اجتافي و تكلي : هاي الدنيا ييمه يوم نطيح و يوم نوكف .. يوم نضحك و يوم نبجي و ما تضيج الشدة الا ويفرجها ربج .

ناخية الزهرة الزچية ييمه التلم همج و تمسح اعلى كليبج .

كومي يمه

- وين اكومن ؟

- جا يمه وذن الظهر من ساعة هم ياله تحضرين ارويحتج .. عمامج جايين

- انا ما اروحن ليهم يمه

- هذا نصيبج يمه جا شبدينا

- لا يمه عليج العباس لا تخليهم ياخذوني .

- لا تعلعلين كلبي يمه و كومي .

كمت اكضن بديها و ابجي اكللها ما اريد ، هدت ايدي و كامت ما تحملت و تكربت حبوبتي ولالة يواسن بيه و ايمان وكفت تجر بيه و تبجي وياي .

كمت وياهن و عيوني مناطرة الباب هلبت الطارش يهل.

من كربت ساعتي واحلامي ماي و تبدت اعلى كاع صبخة و ظلت الكاع تنشف بماي احلامي و تبخرهن.

كتلها ايمان كتبي عدج ..

- شكتب

- كتبيلي رسالة يو ما اجا سرحان وصليها ليه .. و كليلة هدوة افادك كضاها الضيم بفراكك .

كضت القلم و بدت تكتب

يانجمه صبح لليل اضل مساهر لشوفك
ياكمرة ربيع الناس ماتفهم على طيوفك
يجرحي الفضلت لو موت ماروفك

شجرالك خيبت ضني
حاجيني شبدر مني

ماي انثر عالحيطان
ياجف بعد ليلمني

خصلت و كتبت بنهاية الرسالة (هدوة)

اندكت الباب .. التفتت و ادموعي كامت تسچب .. دخلن النسوان .. امه و نسوان اخوته و نسوان ابوه.

كعدن يسولفن وانا ما اهيس وادم جدامي .. لا جاي اشوفن عمري و هو يضيع جدام عيوني .

اعلى كثر ما عيوني غازيها الدمع شوفهن كل .. و ما افرزن احد بالي كثر ما يسولف و يعاتب اذني ما تسمع حسهم اعلى حس بالي .

لبسيت العباية و طلعت وياهم و يسرى شاسلة بقجة اثيابي .. مشن بيه و الدرب جمر وشوك و كل خطوة تخطيها جدمي انلجم بفادي و جروحي تخزن .

سرحان : انا الزوم اروحن

خنجر : شنهي ما تكلي تسودنت .. دكعد

- ما اكدر يخنجر هدوة متانيتني

- هدها يسرحان خلها تروح لقسمتها

- يا قسمه هاي ويا غيري خنجر ، كمت ادفع بيه و اصرخ ... اشتعل لو احد كرب جدمها ... اشتعلللللل انت ما تفهم ... عليش ما تفهمووووون علي

كضيت راسه : افهم انا جاي احترك احتررررك
ودفعته عني للكاع و كضيت حزامي و لبسته و حطيت سلاحي بيه .. و خنجر كام ليه و يجر بيه : بداعة الخوة اوكف

- خايب اخيك غده نااااااار خنجر

كريم : سرحان خوية

- ميلو عني ، ما تأخرت الا بسببكم ميلو عني

كضوه و كام يلوونه .. و هو يريد يفج عنهم ..

صار الغروب و خنجر و كريم واكفين عد الباب و راديون وردحة واكفات يجرن بيه و يواسنه ، و حميد ورحيم يقنعون بيه .. و سرحان الكعدة ما يكدر اعليها و الروح محتامة .

وكف جسام اعلى دار سرحان ، صاح : السلام عليكم

اندارله رحيم : هلا بويه وعليكم السلام ، ياهو انت ؟

- انا جسام ال سلطان ، اجيت اكلل لسرحان ابوي طالبك .

طلع سرحان .. و هم وياه .. كاله : شرايد مني ابوك

- عازمك اعلى حفل ازلام ، و يكول سرحان يضل وليدنا و يتمنى جيتك .

حجت راديون : شنهي الرايدينه ال ثجيل عكب سوايتهم ذيج .. الله ما يفكنا من ال ثجيل ؟ من يوم اللفونا و الديرة ما شافت خير

ضل يعاين عليها جسام و كريم صاح بيها : دشي يراديون .

دخلها و سرحان اندار اعلى خنجر .. حجه حميد : لا تمش

رحيم : اركد بويه و عوفهم و جزاتهم يم الله .

جسام : انا جيت اعزمنك يو اجيت هلا بيك ، و يو ما اجيت معذور .. اترخص انا .

سرحان احتام بامره .. و يراوح بمچانه ما يعرف يروح يو يظل .. يحظر عرس ولفه ؟ و من ناس ساوموه اعليها و فضحوها و جارو اعليه بالاعيبهم ليما خوت روحه .

سرحان : اكوم اروح

حميد : الشيخ يو درى جدمك خطت ال ثجيل عكب مساومهم يهد الدنيا و علي ، اكعد يابوي و استهدي بالرحمن.

- ابوي الشمخ اعليه بغرور الشيوخ و بعد ولفي عني .. خله يفك مني ، تراه كلبي موش حمل اومره بعد .

عفتهم و مشيت .. تبعني كريم و خنجر ، و امش و دلالي يلهب نار ، و الروح موجره بضيمها .

وصلت غاد .. ناصبين الجوادر ومزهبين الجعدة و الاضويه يا كثرها وصافين براميل العرك و الكاسات اعليهن .

كرب سلطان اعليه : يا هلا يا هلا و جثير الهلا بأبن الاخت .

سرحان : شنهي الراي ؟

سرحان : و ان وجدت امو ضايكتنا ، لجن انا اشوفن بيك جدي جلوب و اودنك و ما رايد تنفج بينا بسبة ناصر ووليدة .. و هالعزمتك اليوم غصبا اعليهم بعرس فليح .

- يحجي و انا اعاين الخبث بضحكته و عيونه .. رفع اديه و رحب بينا و كال : هلا بولد مطر .. نتشرف بيهم .

دشيت انا و كريم وياي و خنجر ..
امشي و احاجي بروحي : شرايد انه ، و شنهي جيتي لهنا ؟ و شعدي اكعد ؟

لجن ما اهيس بروحي اعلى كثر مضيع روحي .. كعديت و الزلم التمت و اشتغل الغنا و نزلن الكاوليات يركصن.

ضيعيت شوفي بفكري .. سهى بالي بدموع السمرة وحالها الساعة .. انمدتلي ايد .. عاينت زلمة من ازلام ثجيل يكدملي مشروب .رفعت ايدي ورديته

كريم و خنجر رفضوا يشربون .. و كل شويه يسألون سرحان كوم .. و سرحان متيه عكله .. و عيونه دم .

و سلطان مستمتع بهالمنظر .

وحدة من الكاولية شكلت عينها على كريم .. لابسة حمالة صدر و تنورة رقص و سنسال ضعيف على بطنها و شعرها لحد ركبة رجلها .

كربت يمه و ظلت تهز عنده .. لفتت عينه و ظل موجد بركصها و خصرها الميال


كامت تهز و تكسر كدامه بخصرها .. و تعاين ليه .. انفتن بيها كريم و هي ما شالت عينها من عيونه .. و المطرب يغني ( الوجن الوجن ) .. ناوشوها السجاجين و كامت تهز بخصرها و تدبج بالسجاجين .

استانس الها كريم .. و ضحك
كربت و اعلى حس الخشبة وكفت اعلى تك رجل .. وكامت تفتر و شعرها يضرب بوجوهم ، مال سرحان منها و خنجر بعد راسه و ظلت مجلبه لكريم وشعرها يضرب بوجهه

وكف حس الخشبة وفزت وكفت اعلى حيلها .. اشتغل ليها عزف الحية ، انطت ظهرها الكريم و كامت تتمايل بجسمها و تهز بخلفيتها ..

كريم : حراتي صعدت و كمت امسح العرك عن كصتي .. و هي دايره عن نزلت راسها ليورها و تهز بجتافها و كومت شعرها بحضني و جسمها ارتسم جدامي و هي تتمايل .

اشرت للساكي .. صب كاس و انطاه ليه فزت هي و كامت تتمايل جدامي و تضحك و عينها تربي ، كمت اشرب و اعاين ليها .

كض ايدي خنجر : موش وكته

- بعدت ايده عني .. وكمت امسح اعلى لحيتي و اوجد بيها .. بعدت مني ووكفت بنص تهز .. كمت من مجاني ، طلعت الفلوس من جيبي و كيتيته فوكاها و يهي اعلى تك رجل تهز .

وكف سرحان ، شال سلاحة و جر اقسام و رمى الشاجور كله بالجوو.. فزت هي من صوت الرمي و ختلت بحضني .. حطيت ايدي اعلى جتافها.

كض ايدي سرحان و جرها و كال الهم : بالمبارك

- وين سرحان

- امش مااااااااالي خلكك

- هدني

- جاي اكلك امش

- تراني موش جاهل و تكودني هيج يبن ابوي .

- و تكيت اعلى الكاولية بكعدة ال ثجيل .

- امش .. و خلني .

جر ايده كريم و سرحان كاله : البيه كافيني .. امش عساك لا مشيت .

مشى سرحان و اندار كريم ورد .. كض زلمه و كاله : انا نازل للبستان البت الركصت عدي ، اريدنها بساع، و الك التريده .

- خوش .

نزلت امشي جن خذت عكلي بخصرها الميال .
تيهتني .. شوي ، و نزلت هي و تمشي وخرزها يتهزهزن .

وكفت عدي و تخصرت : كول يحلو

- شنهو اسمج ؟

- دينار

- منين مجبله ؟

- احنا كاولية رحالة. . وين ما تكون رزقتنا نمش ليها . ..

- انا كريم ابن الشيخ مطر

- اعرفنك

- و منين تعرفيني ؟

- من ساعة الاجيت شدهت بالي و خذت شوف عيوني ، نشدت عنك واطوني اصلك و فصلك .

- عيونج و انت تركصيهن هيسيت بشوفهن حجي

- ابتسمت و مشت و هي تكول : شحجن

نزعت السترة من جسمي و حطيته اعليها : كلبي فهم حجيهن ما حاج السان يكرر الكالنه.

عاينت ع السترة و رفعت اديها كضت اديه اعلى امتونها: حياتكم حلوة وازلامكم هيبة وواحدكم ياخذ العكل و انت تسواهم كلهم .. لجن لا انه ولا عشرة مثلي يحكلنه ..نكرب منك يو من هالحياة التعيشونها.

- و عليش تكولين هيج ؟

- ساعة الركصت .. موش كلبك الحجه .. لجن جسم اغتاض وراد يلم جسمي .. احنا موش اكثر من هيج .

- مامش فرق

- عدك لجن عدي غير .. رد يبن الشيخ و عيش بكصر ابوك و هد دينار الكاوليه تركص خاطر عمها يربح بركصها و يو غصرت انجتل و انت بحلكة خاشوكة ذهب .

- لا تبسمرين ، ان جنتي رايدة تحجيلي .. انا اسمعنج ..

- يمكن ابالك انا كح... و يمتى ما ركصت و حليت بعينك تكدر تحصل اعليه .. بس البالك غلط .. انا بت و رزقتنا هاي بالليل نركص و بالنهار نجدي لجن ما نشتغل شغل العواهر .

- انا جان ابالي اخذنج ابيت تحجيلي البالج لجن...

- طلعت ما افيدنك مو ؟

- لا مو هيج .. بس اذا تكدرين تروحين وياي .. انا مستعد

- تسمع مني ، يو تطلبني .

- اسمعنج

ابتسمت ليه و مشت وياه .

سرحان : طلعت من العرس مكتاض وروحي موجرة و اسب و انعل بروحي .. اهيس الموت راحة الي بهالساعة و لا العذاب الجاي اجاريه ، الشهكة تطلع من صدري ضيم .. و انفاسي لهيب

انطكيت بواحد درت ليه ما تعذرتله .. و هو من شافني ما حجه جر الثامه و ابتعد مني .. صاحله واحد : شااااكر

انداريت و انا اعيس شايفه و ملتكي بيه من كبل لجن ما اذكر وين .. لحكني خنجر : شمالك يخوي علكتها بجيلاتك

- تمنيت هالجيلات انومنهن بصدور ال ثجيل واحد واحد .

- هد عنك و انسى

- لا و علي ما انسى .. حكي من ال ثجيل اردنه و انا وياهم و الزمن طويل يا خنجر و احلف بالعباس ابو فاضل لحول اسنين عمرهم قهر و ايامهم ضيم .. مايهم دم و هواهم بارود و لكلب صبحهم ليل ، بس خلهم ينطرون اعليه و انا احلفت بالعباس .

رحيم : هم زين شفتك يسرحان

- شرايد مني يرحيم

- صحيح كريم مكيت بكعد ال ثجيل ؟

- شبساعها الجلمه و صلت ليكم ؟

- ابوك واج نار و طالبك بسرعة .. كال تسحبهم و تجيبهم الي .

- كريم ما رد علي .. و انا موش رايح هدني بروحي

- وليدي ابوك موش احسن من حالتك ، رويحته غاديه ارماد اعليك ، امش و طمن كلبه .

- وانا ياهو اليطمن كلبي عكب ما حط عطابه بنص افادي .. عليش اطالبوني و انتم ماش احد منكم مطيني .

- الحجي موش وكته امش و كول ياله

- مشيت عنهم .. و رحت للمضيف ساعة الدخلت و ابوي كام : تسودنت انت .. عكب فضيحتهم ليك تدوس عتبة كاعهم .. ولك انا ليمتها اظلن معلعل من ورااااك سرحاااان .. كلي يمه يفتك منك و من طلاااااااايبك

- كتلك اتبرى مني و خلني اخذها ، هساع الخليتني اخلف وعودي و وجريت النار بيه .. مرتاح .. كلبك مطمن اعليه .. هاي مصلحتك التحجي بيها .. انت حركتني حركتنيييييييي انااااااا متتتت متتتتتتتت جاي تنشد واحد ميت و تكله ليش تمش .

بويه كلبي نااااااار موجره بيييييه بويه .. شلت السلاح و كضيت ايده و كتله : دوس و اخلص من طلايبي دووووووووس

هدية : كعدة بحجرتي و دموعي يواسني و اهيس كلشي ابالي تفلش وراح وراحت اوعوده .. الجان يكلي لا تهدين ايدي يهدوة .. هدني وراح لمريته ..

حس غنا وركص برا درت اعاين الحجرة لا اثاث ولا كلشي ماكو .. فراش كديم مادينه و لحاف جاتلة الوصخ و غراضه مصفوفات اعلى الشباج و بطل عرك بصفهن.

لفيت روحي و انا ابجي .. بجي وحدة ضيعت كل احلامها و ذيج الليالي الجانت ما تنامهن و هي تتخيل عمرها و يا اليتمناه كلبها
ما دريت عشكه دغش و هدني و مشى عني .

كمت اتذكر حجايته و هو يكلي و يو ما كدرت يهدوة تعذريني ، دنكيت ابجي بقوة و اصيحن ما اعذرنك لا وحك داحي الباب ما اعذرنك ..

فزيت اعلى حس الرمي و زاد البجى اعليه .. كمت للشباج .. اعاين ليهم ما اشوفن شي .. الشباج طين و من تكضه يهل اعليك ..

كمت ابجي و اعاين ليبرة .. لفت انتباهي موس حلاقة محطوط بكاس ماي ويمه كسرة زغيرة مالت مراية .. جريته .. ردت انهي روحي لجن خوفي من الله منعني .. كعديت بمجاني ما اعرف شسوي و الموس بيدي .

ومن اعاين الفراش و اذكر فليح راح ينام احذاي اعليه ... روحي تحتام اعلى ولفي و اصيح بصوت ( اااااااااخ )

نزعت الشيلة من راسي و عاينيت بكسرة المرايا .. كمت امشي الموس اعلى راسي و زينت شعري كله .

طبت ام فليح .. صرخت ياااااع شسويتي يمفضوووووحه ... ما تريدين وليديييييي....يتبع

يُتبع ..

reaction:

تعليقات