القائمة الرئيسية

الصفحات

رواية كحل عرب الفصل التاسع والعشرون 29 بقلم زينب ماجد

 رواية كحل عرب الفصل التاسع والعشرون 29 بقلم زينب ماجد

رواية كحل عرب الجزء التاسع عشر 

رواية كحل عرب الفصل التاسع والعشرون 29 بقلم زينب ماجد


رواية كحل عرب البارت التاسع عشر


#كحل_عرب

((( زينب ماجد )))

الحلقة_29
(فخ و فضيحة )

و يلوموني
أحسك تكبر بروحي و يلوموني
و انا بلا شوفتك اشتنفع عيوني
يا شوكَي
و رجوتي
و دنيتي
و لوني
و عذابي
و لهفتي
و شكواي
و ضنوني
يخي عونك عليه و بيك خي عوني
يواهس تضحك الدنيا على شفافك
يا ابو ليل الحلو اليلعب على جتافك
أحس روحي تأمن بيك وتخافك
و أحسك مدري شنهو انتَ
لغز لا حجي لا سكتة
و لا غيرك نبع بالشوك يرويني
و توصيني
لوَنّك مو دمع ما شالتك عيني
(عريان السيد خلف)

كواغد : شني هالحجي خالة ، عيب ولا تعيدها بعد.

- عليش عيب انا رايدها اعلى سنة الله ورسولة و هي بت عمي ومن حكي.

- البت صغيرة وما اريدن جلمة عرس تطرى اعلى اذنها، شنهي يم فلاح شو ساكتة

- لا انا ما ساكتة يدية ، لجن الولد يتغشمر وياها.

- ولونه ، هيج تغشمر ما يراد.

فلاح : لا موش تغشمر و البت موش زغيرة ، انا رايدها .. و ناهي اعليها.

هدية : انا اخذك ، شنهي خلصوا الزلم و ظليت انت هاطر اخذنك .

ندستها كواغد و كالتلها : السانج يمفلوكة .. لا تحجين

انتفض هو : شنهي يبت عمي انا موش بعينج و هيج تحجين ، حسافة اعلى عمي الما عرف يربي بنياته و هالصلافة العدهن.

حجت مرته : شنهي ما تريدك زور يو كوة هي ، فك عنها.

هاذ ما كدر يحجي ويا النسوان كوم اعلى مرتك و اضربها جدام الكاعدين ، صارت هوسة ، كواغد ردت الفرخة النفاس بالصينية .. من عبن جانو اهل كبل ما عدهم ويسوون مهد. يجيبون صينية و يفرشونها ويخلونها للطفل النفاس .

حطته كواغد و كامت اعلى حيلها و كالت الها : نترخص يم فلاح ، يظهر مالنا حشمة عدكم، اودعناكم.

كامت اعلى حيلها .. و ام فلاح تتعذرها .. و هدوة وياها و ام حاكم تحجي .

جاي يسلمن .. دش ستار : ها يمة صارت صكد صارت عدي بت ؟

- يا صلاة محمد ساعة الشفناك، بينت يمه .

- جنت ويا خالي عليوي ، وينها .

- دش شوف ابنيتك و احنا رايحين .

- جا وين رايحين

- البيت غاد محد بيه ، ياله يمه ، تتربى بعزك ان شاالله .

هدية : الأخبن و صارت عده بته ، تهي يالله .

- انجبي الزركة ..

- دغلط علي اغلط ، الله اطاك اياها مثلي .. حل ما قصر الله وياك.

جسومة : دمشي ولج ، تتمضحكين و الوادم متكاومة من وراج .. امشي

طلعنا و امي اندارت علي : يالنمرة يالطايحة حظ يالبربوك .. ياهو الكالج تفكين حلكج و تحجين ؟ ولج عليش تخليني اكضن راسج و دك دك بالكاع هلبت يفك و يمش عدل.

- جا شسويت

- شنهي ولج تحجين ويا الزلمة و تكليله يو تظل بس انت

- جا صكد شنهي ما اريدنه.

- وعسنج لا ردتي، تحجيها و عمتج و احنا كاعدين ، يبت ما استحيتي من الناس الجاعدة مديتي السانج و طلتي اعليه .

- يمه انا هاذ ابو صماخ فليح يو يظل بس هو بالعالم ما اريدنه ، شنهي بس راسه بكبر السلف .. وكصته جول مالت حصونه و خشمه بيهن ٧ جداري طبخ مال فاتحة ووجهه مدوهن ومزرف و تريديني اخذه ؟
ييييع

- انا شلون وياج ، خايبة كون من ينضكر اسم العرس ، هيج جيبين راسج و تحطينه بالكاع من المستحى موش تكولين ما اريده.

- يمه جا انا حاجيه جدام غريب

- جا منين نعرفهم شنهي يومية ثاردين وياهم ، هم بس بالاسم عمام.

- ومن كونهم بس بالاسم شنهي معناتها من يكلي هديوة الي و انا حكي.

- عمه احجي انا تعبت و علي.

جسومة : حبوبه من ينجاب طاري العرس ما يصير تحجين لزوم تسكتين حتى يو ما راضية تجين تكليل لامج و هي تحجي عنج ، عفيه بتي الحبابة.

- صار حبوبه.

- خايبة ينمرة طاحت وذرة الساني و انا احجي وياج و ما تردين و حبوبتج من جلمتين رديتي و كلتي صار .

جسومة : ياااع جا شنهي تغارين مني

- اي من عبن حبوبتي ما ترزل بيه ، انت بس تدمغين اعلى راسي، ليما خويت .

- خواج البين بجاه الحسين ، امشي جدامي ياله ، و ارد اشوفنج بعد من احجي جلمة و تراددينها .

مشيت و انا انكث بديه ما راضية .

(القصر )

بشرى دخلت للحجرة ، ولكت سرحان كايم اعلى حيلة و يبدل بملامسه، ساعة الشافها هو ، لبس دشداشته بساع و كال الها : كربي

- كواك الله ، الحمد لله من كمت اعلى اجدامك

- الله يسلمج، كعدي

كعدت ورسومها متضايكة ، وابالها الف سؤال بس تستحي تسأل، بس بادرت بأول سؤال: ياهي هاي البت الدشت

- كبل لا تعرفين منهي، موضوعها ما اريدن تجيبينه لاي بشر ، ما اريد احد يعرف هدوة اجت لهنا.

- و هدوة منهي ؟

- شوفي يبت الناس ، انا ما رايد اظلم بختج ، لجن كلبي و عكلي ويا البت الشفتيها .. و عرسنا ما دريت بيه الا ساعة الزفة .

- يعني عشيكتك ؟

- انا ناوي اعلى خطبتها لجن عمامها ناهين اعليها ، و ابوي غصبني اعلى الزواج خاطر اكفن منها ، لجن هو موش داري بكلبي ملكعا موش ملك اديه .

- وانا ؟

- انت معززة مكرمة انا ما اريدن اظلمنج ، تريدين اطيج مهرج كامل و تردين لهلج ، تريدين تظلين هنا و ما تجمعنا غير المودة و الرحمة ، لجن خليها ابالج ، كلبي ما توصلين ليه من كونه ولهان بوليفه .. وساعة الاكدر احصل اعليها .. اخذنها زوجة .

ما ردت ، دنكت .. تبجي .. حجه : انا ما احمل بجى المرة من كونها ضعية ولا اريدن اشوفنج تبجين لجن جاي اكللج هالحجي خاطر لا تنصدمين بيه و تخلينه ابالج و انت مخيرة بظلتج و بروحتج.

- انا من سنة مات ابوي، من يوم المات ابوي و لليوم عمامي مامش سالفة و ما بلونا بيها .. اخرها الطركاعة الحصلت .. ساعة الكالولي خطبج الشيخ لبنه .. كلت يالله نزلت اعلينا رحمة الله .. لجن ......قطعت كلامها و هي تبجي .

- كعدتج بالقصر و احترامج باكي و ما يتقلل منج ، لجن انا ما ظلميتج ، انا ساعة الخطب رفضت .. وصديت عنهم و ما كربتهم اسبوعين لجن ما درين الا ساعة الزفة بالعرس .

شنهو رايج

- شنهي يكون رايي ، هاي قسمتي شسوي .

- الله كريم ، لجن السالفة الصارت ما اريدنج تجيبينها .

- وراح تظل البت كل يوم تجين لهنا.

- لا يابويه شتجي، هو بالسنة بالكوة اشوفنها ، لجن من سمعت بيه مريض اجتني .

حجيت وياها و كمت جريت شماغي و طلعت ، ظلو اهلي يتفكدوني و ها كمت ، و اي عالخير و الحمد لله اعلى السلامة ، طلعت من القصر وتمشيت للمضيف، ساعة الشافني ابوي وكف اعلى حيلي

- هلا بويه ، كمت اعلى حيلك .

- الحمد لله بخير ، لا تخاف علي

- يا ما اخاف اعليك بويه انهد حيلي اعليك بهالاسبوعين .

- سلامتك بويه .

كعدت و كدمولي كهوة و ظليت وياهم بالديوان ، شوية و كمت ، كلت ارجع للبيت ، ابدل هدومي و امشي للمعمل، لجن بعدني مضعضع من المرض و لشتي رخية .

ارتاحيت شواي، اجا حاكم للبيت كالولي : طالبك بالديوان
كمت ليها .. كعدت وياه و اخذت اخبار المعمل منه ، حجه : سرحان ارد اكللك .

- كول ابو ستار

- خنجر شلون مأمن بيه و حاطه بوسطنا .

- صويحبي خنجر.

- اعلى الراس لجن الكل يعرف هو واحد نكري ويدور خاوات ..

- الله كريم انا احجي وياه ان شاءالله .

سلم وراح .. للعصر بدلت و طلعيت برا ،لاكيت خنجر ، تلكاني : هلاااااا يابه ، الحمد لله على سلامتك خوية .

- هلا بيك

- وعلي فرحيتلك ساعة العرفت كمت اعلى احيلك .. و هلني اجيتك ..

- الله يسلمك

- شمالك ، شو وجهك مثكل اعلينا ، هكو شي

هزيت راسي و مشيت ، كضني : لا موش عوايدك كلي شمالك .

- جنت احسبنك صويحبي ورفيجي

- جا شنهي التغير

- ليلة عرسي اجيت ليك و كعدت وياك بالخيمة .

-ااااه .. حجالي .. سرحان

- لا تحج وياي .. دير ظهرك و امش

- لا ما امش خليني افهمنك

- شتفهمني، حاط عينك اعلى عرضي و تكلي افهمنك .

- سيف الله اعلى زردومي يو رضيت الباطل لعرضك ، انا اخيك و عرضك عرضي، انا متفاشل وياك حيل لجن موش بيدي ، و انا طيحيت روحي بهالمهانة و ضعت بهالدرب

- و عليش ما تكدمت ليها

رفع راسه : انا ياهو و اخطب بت الشيخ

- اي صكد انت ياهو و تخطبها خلك سكير شراب عرك نكري وصاحب خاوات ياهو انت و تخطب ، مو شغلة بت شيوخ، لجن كل مرة ما تليك بيك.

- اشكرنك يخوي، انا اترخص منك

كضيت ايده : اعدل حالك و توب من العرك و الخاوات ، واشتغل و صير زلمه اعليه الاعتماد ، وكتها تعال تكدمها و اخذها مكبعه بلا مهر

- عليك العباس

- انت اسعى و اصلح حالك ، و شوف ياهو الما يطيك مرة.

- خايب و علي جا غير اصيرن علي بن ابي طالب بلا تشابيه ، حتى الجامع اسكننه وكل ربع ساعة اطكلي ركعه من كون صكد يو سويتها

ضحكت بصوت عالي :يعابيك الله كون حشى امير المؤمنين منك يالاغم ههههههههههههههه.

- عليك العباس صكد يو تتغشمر وياي

- لا وعلي ما اتغشمر ، عدل من روحك و ابنيلك حجرة و حط اخشاب وانا شغليتك وياي و كل العمال متحاذرين منك ، بيض وجهي وياهم ساعتهم تكبع و تاخذ .

- وعلي اتوبن و امش بكتر الحايط، لجن و شروط الشيخة .

- مالك غرض بحد ، سعادة البشر ما تنقاس بقصور يخنجر .. عشت عمري من قصر ابوي لبيت الخاتون ، و ابغداد بيگ و بالسلف ابن شيوخ ، لجن ما شفت السعادة ولا ضكتها الا بعيون السميرة الهواها كلبي.

- اخذ مني وعد بالعباس .. من اليوم يا الشرب ما احطنه بحلكي ولا اكرب الخاوات .. و الايام تثبتلك .

- جا انا شريدن ؟

......

حاكم : ايمان لزوم تمشين تباركين ليسرى بجيابتها .

- لويش اباركلها بعد السوته بيه

- ياهو الكال هي .. الجن يلبس اوجوه ابن ادم و البيت ذاك جان مسوكن .. لا تظلين حاجرة روحج بهالبيت ما تعقديتي ..

- حاكم اني اخاف والله .

- نروح انا وياج يا ايمان .. شنهي القضية

- امممم

- شنهي اممممم .. تروحين يو لا

- اي

- دياله ، حضري ارويحتج خليني امرن اعلى اهل بيتي اكللهم يحضرون خاطر هم يمشون .

- هم مشوا الصبح

- ولوّنه ؟ .. يروحون نحط حدر راس البت دلاعة و نرد .

- ميخالف .

- دياله
كام راح لبيته الثاني دش و طلب منهم يحضرون، لبسن اعبيتهن .. و حجت كواغد : حاكم انا الصبح رحت و ضاك خلكي من فليح ..

- شماله ابو صماخ الاعطر

-جدام عيني ويكلي البت انا ناهي اعليها و اريدنها

- يا بت ؟

- هديوة

- جا غير اوكلنه غنادر اهله ليما يشبع، مالج غرض بيه ووهسه انا اروحلهم و ارجنهم مرت الاخرى ما يعيدونها

- ويو البت اجت قسمتها ؟

- منا لذاك الوكت الله كريم الف عمامة مكلوبة، ياله بويه امشونا

هدية : بويه حتى انا اروحن ؟

- كلنا، اريدن اسركي البيبان و نمش ، ياله بعد ابوجن.
ستير بعده غاد

حجت كواغد و هي تطلع من البيت : مت عيني اعليه فرحان ببنيته ، ما مصدك صاير ابو .

- جا غير يو يحس و يوكف اعلى رجليه و يعاوني .

- يعاونك بس بهداي وياه كلما كمت ورچيته .

- جا شنهي بت هو و ادلعنه غير اريدنه زلمة ، موش بس مكابل خواله .

- خو انت ما تحلالك سالفة يا ما حطيت اهلي بوسطها.

ضحك : ياله بويه امشونا

اخذهن و تمشى بيهن السلف ليما وصل لبيت اخوه ناصر .. دش و سلم و اخذ البت حبها و سماها (زمن ) .. لجنها رخية و يخاف يكضها من كونها حيل زغيرة اسبيعية .

شال فلوس و حطهن حدر راس البت .. و ظل يعاين الها مبتسم .. و ستار فرحااان ما شايلته الدنيا و هو يشوف صارت عده بت .. فتحت عيونها الفرخة و ظل يعاين بيها حاكم .

- اكللكم البت الحولة يو لين بت انفاس .

ام يسرى : انا هم عاينيتها كب شوية عينها ما اجت وسطة ، طايحات كلش جوا .

كواغد : شو خل اعاين ، صكد شو عيونها محولات .

يسرى : يمكنها لين بت انفاس .

حاكم : الله كريم ، غطوها لا يوصلها هوا

اندارت يسرى على ايمان : كالو حبلتي، صكد حبلى ؟

ايمان : اي حامل .

- بيها الخير .

دش ناصر سلم و كعدوا وظلوا ، يحجون فتح حاكم سالفة فليح : شنهي سالفة فليح يناصر ؟

- شماله

- اليوم واهلي كاعدين و يغنطر جدامهم و ينهى اعلى بتي .

- جا البت منهي اعليها من الكماط .

- يا كماط هاذ .. وكت الصارت انا بالسجن و يو سامع احد ناهي اعليها لهد السلف فوك راسه وعلي.

- تهد السلف شنهي البت بتنا .

- بتك امنا بالله لجن مو انا الينهي اعلى بتي يناصر و حذر ابنك هالمرة كالها مرت الاخرى يو عادها ما اهدنا الا و انا حاز زردومة ، عشت عمري مفتكر عن ال ثجيل و حتى حكي بالكاع لليوم انا ما ماخذه منكم و انتم اخوتي و تردون اعلى بتي تنهون اعليها .

و ظل يصيح و يهدد بيهم و رجهم عدل ..
لجن فليح ما جاز .. كل يوم و الاخر و مر اعلى بيت عمه يشوف هدوة و هاي تتسودن منه.

مرت الأيام ..
و هدوة منكطعة عن سرحان و عشكهم بكلزبهم و عيونهم تارسها الشوك ، الا سرحان ما ترك درب الا و خاضة خاطر تدبر سالفة خطبتها .. لجن منين ما يجيبها ما تصلح .

ايام و ايمان راحت لعمتها تزورها ووصتها هدية (كلي لسرحان يمر يومية الصبح من تروح امي للمدرسة تاخذ جمرة ، انا راح اكشن الباب و خله يمر خاطر اشوفنه )

وما جذبت خبر ايمان راحت و كلتله اعلى حجي هدية ، و يا فرحة الما وسعت سرحان ساعة العرفله درب يشوف ولفه بيه .

صار كل يومية الصبح يترقب طلعت كواغد .. و يو طلعت .. طلعت هديوة تكش الكاع و ترشها بطاسة ماي و هاذ ياخذ العجد رايح وراد يعاينها و ما يركز بيها خاطر لحد يلمحه، و يو شاف احد .. كر بمچانة وما مشه خاطر لا يجيبلها الجلمة .

وبعد ما اندل درب ايمان ، صار كل فترة يكتب رسالة شوك لهدوة ، خاطر تقراها الها ايمان .. و هدوة تبوك ورق واقلام من جمرة و تخلي ايمان تكتبلها اشعار منها .. و حجي و كلام لسرحان .

و ظلت هالشوفات و المراسيل بينهم .
لا هو بطل من عشكها و كلب هدوة چز من ولفها .

مرت ٨ اشهر اعلى هالحال ..
حاكم اجر الكهوة من حجي نوري و شغل ستار بيه ..
وهو ظل اعلى شغله بالمعمل.

خنجر اعلى وعده و تاب من الشرب ومسامر الليالي و الطرب ، و التهى بشغله وكاعد يبنيله حجرة و بظنونه هلبت يكملهن و يخطب راديون لجن طبعه شقاوجي .. و ياهو اليكابله يدفره يو يهدده .

خاصة كهوة حاكم .. يكعد و غصبا ما على ستار يصبله بلاش و شحده يحجي و حاكم يموت منه .

لجن بطل يبوك و يمد ايده ... و العافية تداريج .

لجن راديون يوم الدرت سرحان مواعد خنجر يطيها ليه ... يا كاع الما تلمها من الفرحة ، و صار سرحان بعز روحها و معلكه كل امالها بيه .

مرت سرحان حبلت من ليلة العرس .. و ما درو بحبالتها الا بعد ٥ شهور .. و من عرف سرحان ما حجه ولا كال لاحد خاطر لا تعرف هدوة و تتضايك .

اكثر من مرة بشرى شكت سرحان للشيخ من كونه هاجرها و ما يكربها .. بس الشيخ يكللها (صبري يجي يوم و يرد ليج ، داري وليده ابطنج و اصبري بويه ) وما يحجي ويا سرحان .. و بطل يلح عليه بعد ما شافه وصل الموت يوم الغصبه اعلى العرس .

و صار عليها ٨ شهور .. وهدوة ما تدري بمرت سرحان حامل .

كواغد.و حاكم اشتروا الكاع وتعاونن عليها ام حاكم و كواغد و زرعنها بيتنجان و بتيته وطماطة و و خيار و فلفل و عنب وتفاح زغار .. وكاضيات وكتهن بالكاع يزرعن بيها و يحوشن .

اما زمن بت ستار .. فتبينت البت صدك حولة وحولها كلش قوي و عيونها طايحات كلش .. عادة العرب يركضون للسادة و الشيوخ اذا صار عدهم مريض واخر ما ابالهم الطبيب .

كواغد خذت البت و يسرى للشيخ الراحنله كبل مرة و كال الها : انا كلت الج البت التصير عدج ما تطلع سالمة و الولد ما يركد و يموت ، احسنلج من الضيم كطعي الخلفة .

لجن يسرى و درت بيمان حامل ، شهرين اعلى عمر بتها و احبلي من جديد .. و بطنها ها علواتها بشهر السادس .

و ايمان خلصت شهرها التاسع و دخلت بالعاشر و كلت منه ٦ ايام و هي ما جايبة و حاير بيها حاكم .

- ولج بويه تمشي بالبيت تمشي خاطر تسهل ولادتج .

- رجليه يوجعوني .

- جا غير بطنج هاكبرها طبعا يوجعنج ... بس امشي تحركي .. كواغد هالوياج و هي ماهي حبلة و يومها تكضي بالكاع ما تستراح ، اطلعي حوشي وياهن .

- ما اعرف

- تعلمي ، جا هو البشر يطلع من بطن امه كلشي ما يعرف ، بالتعلوم يعرف كلشي ، ياله بويه كومي .

خذها و مشا للبستان هدت من ايدها كواغد و حطت جف ايدها اعلى عينها من الشمس و تعاينلهم من وره خشمها : ها المعوشرة يمتى فرجها

- انا اراح اجيبن و هي لاله

- جا هاذ الياخذله وحدة حلكها فاهي و ٢٤ ساعة مجودرة بالبيت و كاعدة

- هالجبتها هلبت تتمشى و تسهل ولادتها .

- تمشي ولج تمشي ، شنهي الكعدة هاي

- والله جاي اتوجع

- جا غير اخر ايامج .. قابل شنهي الفرخ يدفع يو يدغدغ و ما تريدينه الوجع

- اني بعد ما اجيب

حاكم : غصدج بعد ما تحبلين

- اي بعد ما اريد

جسومة : جا يو كل النسوان مثلج ما خلفت الوادم .

حاكم : خايبة دجيبي بسلامة عوينة ابيه اليريد فرخ بعد .

كواغد : شنهي الحصل .. جا من باب جتلت روحك اعلى البزرية و جبتها خاطر البزر

- يعابيج العباس كون يمتى جتلت روحي اعلى البزرية ، شنهي كتلج خطبيلي يو اجيتج يوم و كلت الج اريدن بزر ، هي قسمة كاتبها الله و ادهدهت اعلى راسي .. لجن انت اااااااااع ... ما تعبريلج جلمه و الا و نزيتي بيها .

جسومة : جا هسة عوفنا من نكرتكم .. اليوم الطبك ، نسوي بالبيت يو وين تروحين .

كواغد : الشيخة ملوك مودية علي تريدين اقرا المجلس بالقصر ، و بيتين مودي اعليه .. وما اعرف عدمن نقرا

حاكم : لا تغصرين ، فري البيوت كلها بحجة الطبك .

- فارة اركص يو اغني ، ثواب لابو عبدالله حتى الفلس ما اخذنه هن النسوان هالعدهن يحطنه بحضني.

جسومة : لا جا ما بيها شي ، يمه عزا الحسين مت عيني اعليه عليش تمنعنا.

- يمه انت وكت الشغل بالكاع تصيحين اخ يجدامي ووكت بيها فرارة ومجالس جدامج يصيرن اصحى من جدامي .

- يااااع جا شنهي حاط عينك اعلى جدامي

- جا وعلي اصحى مني

طلعت عكوس اديها و خلتهن ابوجه و صاحت : فالك لا كبلنا ان شالله .. بيش طالبني.

ضحك و دار وجهه .. لكه ايمان كاعدة و امدده رجليها و فاتحتهن صاح : عليش كاعدة بويه خاف تتعبين انجطلي بويه انجطلي فرد دور .. و جطلي الفرخ وياج ، تاليتي بالمنگاش اطلعنه .

ضحكن كواغد و جسومة ، اجت هدية ويسرى جايبات الاكل وياهن طابك سمج و حطنه و التمو بنص الكاع ياكلون .

كواغد : تغدن و نامن من كون ورانا سهر للصبح ما تنامن تعاونني بالمجلس.

حجت هدية و هي شاكة حلكها بضحكة : القصر هم تقرين بيه يمه ؟.

- اكلي لا اكومن ابيس بيج و تاليتي اقرى اعلى كبرج ، اكلي ومالج غرض .

حاكم ؛ شمالج ويا البت كاعدة اعلى زردومها حسرة حجتلها جلمة يا ما رجيتيها .

- من كون بتك هالأيام صايرة خفيفة و انا اموتن ولا اشوفن البت الخفيفة هيج اكرمع اجدامها و اكعدها و تثكل غصبا ما عليها .

حجتها و هي تخزر بهدوة، ذيج ضاعت الضحكة الشاكة حلكها و غندبت و دنجت حتى الزاد بعد ما اشتهته. .

خلصن الغدا و فضن شغلهن و مشن كلهن نامن .. للغروب ياله كعدن .

هن عادتهن .. من يوم اول محرم يلبسن الأسود بالرغم هو مقتل الأمام الحسين يوم العاشر من محرم .. بس ويا دخول الشهر هن يحزنن مواساة للزهراء عليها السلام.

لجن هدوة و درت راح تمر القصر ، بالختلة و جري الكحل خفيف بعيونها خاطر يشوفها سرحان حلوة .

وكامت تتختل من امها خاطر لا تشوف الكحل بعيونها وتحجي، بس ويا ما رادن يطلعن ، كواغد.سوتلهن جرد خاف خيط لون بثيابهن لو ملابسهن موش مالت حزن من كونها الملاية ولزوم تجي بحزن مو كاشخهة .

وكفتهن وفردشتهن وحدة وحدة ، حتى ايمان .. كالته : شو يالدعبلة .. دوري ... امشي ياله .. كربي هدوة

- حجت و هي مسويه روحها دايرة وجها تشتغل و تكللها : يمه انا ملابسي سود والله ما بيهن شي

- كربي اشوفنج

سوت روحها ما سمعت و رادت تطلع .. كضتها كواغد : تعااااي بالله اشوفن .. شحاطة بعينج ولج .

- يمه مامش شي ، كحل من امس

- من امس ولج ...
ودمغتها ... خايبة هاي دروبج ما تعبريهن اعلى امج يالنمرررررة ....دمغتها ... متكحلة ووووولج .. و كربت اعلى عينها و فركت عيونها حيل و هي تكللها ..... عرس الخلفوج ولج و متكحلة يو ابالج غير اظنون

- لا يمه لا تفركين هيييييج شني صخمتيني

- صخمج البين و هطر راسج الحسين ، لو عزا ابيج اتحطين الكحل ولج ... جاية لعزا ابن الزهرة مكحلة ، كلبي ما يرتاحلج يهديووووووووووة

وفركت كل وجها صاحت : شني يمه غليلي غسلي موش كلبتي وجهي اسود

- خاطر تبطلين الكحلة يالنمررررة

راحت هدوة تغسل وجهه و وتبجي و طلعت و هي تبجي و كواغد كلساع و جايبتها بدمغة .

دشن اول بيت قرت بيه ساعة ، و ضيفوهن جاي نومي وكامن .. للبيت الاخر .. طلعن صار بوجهن فلاح

- ها عظم الله اجركم شلونكم

كواغد : واجرك يمه ، الحمد لله
حجتها و مشت ، كض يسرى : وين رايحين ؟

- للغصر

-سرحان غاد موجود ؟

- شمدريني اشم كفا ايدي و اعرفنه موجود يوله ، هالرايحة .

- عينج اعلى هديوة و لا تفاركينها من كون هاذ سرحان النذل اعرفنه حاط عينه اعليها

- بس يو اعرف شعاجبك بيها .. زركة و اضعيفه شعاجبك بيها .

- جا اهدنها لال ضاحي ياخذون بناتنا .

- والله ما ادري عنكم ، انا اروحن

- مثل ما وصيتج عينج اعليها ولا تفاركينها

- ان شالله ان شاءالله .

مشن للقصر استقرن بيه يكملن للفجر .

الديوان ملفوف بقماش اسود للعزا .. و القصر ظال بس للنساوين .. و الزلم كلها تحيي الطبك بالجامع ، الشيخ ذابح ٧ ذبايح بثواب الأمام و السلف مكلوب ياخذ ثواب ابو عبد الله .

كعدت كواغد و نسوان السلف ترسن الديوان .. وبدت بالصلاة على محمد وال محمد .. و حييت المجلس و النسوان وياها .

كاعد تقرأ كواغد .. و هدوة عينها بالنسوان فضولها يدفعها تشوف مرت سرحان .. بس ما اجت .. ظلت كاعدة يم امها و تصفك بديها خاطر تجي اللطمة عدلة و متناسقة مو كل وحدة ادك لوحيدها .

لي ما طبت مرت سرحان و بطنها عالية !!

هدية : دشت وانا سبليت .. هاي حبلة يو عدها كرش ، ايدي وكفت من الصفك .. و ظليت اعاين اعليها ، و هي اول ما دشت ادور بين النسوان ليما شافتني و تنهدت .. و كعدت باطراف الباب .

راديون كاعدة جريب مني .. التفتت ليها و شاورتها : مرت سرحان حبلى يو عدها كرش ؟

ندستني امي ... عبن ما تحب حجي بمجلسها .. وجر افادي و انا اعاينلها وكلما اصدن ليها الكاها تعاينلي ..
ما جن كاعدة اعلى كاع .. نار وموجرة حدري ... اريدن بس تخلص امي خاطر اعرف .

ليما كملت .. وانطت رخصة للنسوان ، اللي تغسل اللي تشرب اللي عدها حاجة تكضيها .. بهالوكت خدم القصر .. قدم ضيافة للمجلس

اندارت هدوة : ما جاوبتيني ؟

- الجواب ما يسرج يهدوة

بلعت ريكي و درت . و عرفت هي حبله .. شكثر ازتله رسايل و يودي ليه ولا مرة كالي مرتي حبلة ، هيج سرحان مستغفلني ولاعب اعلى عكلي !

كمت اتنهد قهر .. ردت اكومن ، كضتني امي : وين رايحة؟

- رايحة اتغوسل اختنكت النسوان جثيرة واحتريت

- شواي و تردين ، يو تأخرتي اكومن ليج .

- كمت منها و ما سمعتلها اختنكت حيل ... طلعت .. تبعتني مرت سرحان ..

درت ليها : مبارك الحمل

- يا بركة هاي اشوفنها و انت ماخذته مني .

- انا ما اخذت احد، هم الخذو ولفي مني.

- ودام خذوه شعدج وياه .

- انا بعمري ما اشوفن غير سرحان وراضية اظلن كل عمري بليه عرس ولا اشوفن غيره ، ولفي و ما اريد غيره .

- حرام اعليج .. هدي و امشي انا شنهي ذنبي وما يعاينلي .

- وانا شذنبي بيكم .. انا يو مختارج ما اكربنه .. لجن اعرف هو انغصب اعلى هالعرس و تمرض و انا انغصبت ارضى بيه.

- وشبالج يعرس اعليج و ينزلج اعلى راسي ضرة .

- هو كال انا خيريتها تروح يو تظل و حاجيلج كلشي .

- وانا سكتت موش راضية لجن ما اطي زلمتي لغيري و اخليها تاخذ مجاني .

- من الأساس ما جان مجانج .. انا وياه مواعدين اعلى العرس وجابوج بمجاني غصب .

- عايني نفسج و استحي اعلى روحج لاحكة زلمة و مجلبة بذياله .

- موش انا الأجلب بذيال احد .. عايني نفسج انت .. التحاولين تجلبين بذيال كلبه و ما توصلين .. عكلة و كلبه وروحه كلهن يمي، و انا راضية بيج و راضية حتى يو انزل ضرة بس كون انجمع ويا ولفي حدر سكف واحد .

- عسى الله لا جمعج .. و بعدج عنه و عني بجاه هاي ليلة الطبك .

دفعتني و مشت .. هملن دموعي .. رحت اغسل .. لحكتني راديون : ها يهدوة ، عليش تبجين .

- يو خنجر و عرس و مرته تدعي الله يبعدج عنه .. شيجرى بحالج

- الله يعين حالج، لجن لا تاخذين اعليها يهدوة البت هم مسكينه من كون سرحان هاجرها و ما يكربها .

- هاجرها شلون .. جا منين حبلت من فطر الكاع ؟

- شالت فرخ من ليلة عرسها ... ومن نهد ذيج الليل و هو ما كربها و حتى ابوي ما غصبه بعد من كون ساعة الغصبه اعلى العرس .. وصل الموت و هده .

- جنت اتخايل و اتحلم يو صار عدي منه ولد اسميه علي ... تالي راح يجيه الولد من غيري.

- كل هالامور موش مهمة .. ادعي الله يجمعكم و الله كريم .. ياله امشينا نرد امج ناطرتج.

رديت للعزا .. وظلينا ليما كربت صلاة الفجر .. امي طلبت من وحدة تعرف تقرا .. تتراس المجلس و تقرأ زيارة الامام الحسين و سورة يس و دعاء التوسل .

واعلى حس ادعيتهن .. ايمان غفت .. و انا ساعة الشفتها نامت عيوني كامن يطفن .. ليما حطيت راسي اعلى كتر و غفيت ، و جمرة نامت .

وذن المومن .. صلن .. ظلت امي تنده بينا خاطر تكومنا ، بس وحدتنا النعاس هادها ما كمنا، الشيخة ملوك كالت الها : ام ستار شو هو الدرب اظلم و البنيات نايمات .. تمددي وياهن و صكي باب الديوان محد يكرب و الضحى يو كعدتن اخذيهن و امشي قابل غرب احنه .

كواغد هادها التعب من القراية ما كالت باطل فرشوله و تمددت نامت و جسومة .. بس يسرى كالت لا انا اروحن .

صفر البيت بعد ساعة ولا حس ينسمع .. حتى حراس القصر من كونهم حيوا الليلة ناموا .. الا سرحان كاعد يتنطر هلبت هدوة تفز وتكوم ليه يشوفها.

شويه و كعدت بت زناد .. كضها و كاللها : عمو تروحين لهدوة تندهينها .. بس ندهيها و طلعي بلا حس وديري بالج احد يحس.

مشت البنية و دشت الديوان .. ظلت تعاين وين هدية ليما ندلتها .. ظلت تنهد بيها .. فزت هديه و ظلت تعاينلها ..

شاورتها : عمي ديدج

-عاينت لمي نايمة .. فرحت حيل ساعة العرفت احنا نايمين بالقصر وما رادين للبيت .. تسللت بهداي و انسلين من الديوان و طلعت .

القصر هدووووووووء محد كاعد ..

طلعت من باب القصر و نزلت للبستان، جاي الوفن للبيت ، طلع هو كبالي .. تبسمت .

ابتسم : اصباح الشوك يهواي

تمشيت منه و نزلت للبستان .. و هو يمشي .

كمت اخذ نفس حيل و هو يمشي جريب مني ، جن اريدن اشبع ريتي بهواه .. حجيت: عليش ضميت عني حبالة مرتك .

- ما ردت اضايكنج .

- سرحان يمتى يخلص هالوضع انا خلص صبري بنطرتك .

- شنهي البيدي و ما سويته يهدوة

- انت عايش وعدك مرة و جايلك ولد وانا وحيدتي اعلى الدرب اتنطرك .

- يو عايش و مرة سادة اعلي مجانج .. جان لكيتيني هساع انا بكترها موش ناطر كعدتج وكلبي لهفان اعلى شوفتج .. وعلي مالي نفس بكربتها ، تمنيت تطلب مني الطلاك من كون ما ارضى بظليمتها لجنها اختارت تظلت و زادت علي بحبالتها و صعبت اموري وياها و ما اعرف وين نصل بدربنا وانا مالي نفس بيها .

- هم يجي يوم و ننجمع يسرحان ؟

- اذا راد الله .. ننجمع

- و يو ما راد

- نرضى بقضائه .. لجن خليها ابالج و العباس لو ما عملت ابوي بالعرس .. لجن ظليت كل عمري عزابي اتنطر الفطرة اعلى جمعتنا .. بس الصار كله موش اختياري .

- كل ما يمر وكت و اكولن اتعود .. هاي قسمتي و ارضى بصبحية اشوفنك اتمر واترس عيوني بشوفتك .. لجن كلما مر الوكت يزيد العطش بيه ليك و انطرنك نطرت الصايم لمجعة ماي .

- يا عشكي لحروفج و انت تصفطينهن اعلى شفافج اليطلعن جن حس نغم .. تطربيني و تخليني ايام وليالي جكارتي بيدي و مساهر الليل بخيالهن .

- انا اروحن

ضحك ... ابتسمت هي : جا ما يصير نضحك اليوم جتلة اليمام .

- سلام الله عليه .. لجن جلمتج هاي تفزز بروحي هواي .. جن فزت عشب طاح اترابها الماي.

- و تكلي تصفطين الحجي، جا انت شنهو .

- ههههههههههههه اعشكنج يهدوة .

- ضحكت .

- كوليها ولو مرة

- ما تطلع

- لخاطري ، حطي مستحاج اعلى كتر و ريحي افادي بهالجلمة .

- انا موش اعشكنك .. هالجلمة ما توصف شعوري ليك .. الشايلته الك بفادي اكبر من جلمة عشك .

- اااااااخ ربي ااااخ .. دخيلك يبو خيمة الزركة .. جا ربي ما طالب غير .. كريم و تردني ..

- انا اروحن اخافن امي تكعد و تستفكدني .

- كبل ساعتين جاتلني النعاس و ما نايم من امس لجن بعد شوفتج .. ياهو اليجيب النوم لعيوني

- اشوفنك بخير

- انت الخير كله يبعد هلي و عشيرتي.

مشيت و انا افادي مرتاح .. جا ياهو الأسعد مني بهالصباح و انا ريكيت عيوني بشوفت هواي .

مشيت و انا ادندن ويا ارويحتي .. ييمه انطيني الدربيل انظر حبي و اشوفه ..

و لني اتضكر اليوم العاشر .. استغفريت ربي و رديت للقصر.

وحدة من العادات بيوم عاشوراء هي الناس تبطل رزقه و كلها تسد بابها و تعزل و محد يطلع اعلى باب الله من كون هاذ اليوم البجى بيه الرسول اعلى ابن بته الحسين عليه و على رسولنا واهل بيته افضل الصلاة و السلام .. فتشوف البيبان مصكوكه .. الكل نايم و مهود ببيوته .. لا الفلاح يزرع ولا البكال يبيع ولا اي رزقه تفتح ..

رديت للقصر .. لكيت امي بعدها نايمة .. همزين تطمن كلبي ... مشيت لكيت صبيحة كاعدة و محتارة .. كتلها : ها عمه اصباح الكدر .

- هلا عمة .

- اعاوننج

- والله يا بتي حايرة

- عليش ؟

- انا محضرة من امس .. اجيت الساعة نص البيض ماكول .. جا هسه منين اجيبن و احطن للريوك .

- دبريها شلون ما جان ..

- شدبرنها يبتي ..

دزت الحارس اعلى بيت البكال يجيب منه بيض .. معزل و ما فاتح

كتلها : تريدين اجيبلج من البيت ؟

-شكثر عدكم

- هواي عدنا

- جا جيبيلي و انا باجر اطي لامج

- اي ..
لبست و طلعت .. وكفني سرحان : وين ؟

- رايحة اجيبن بيض من البيت

- امشي و انا اتبعنج .

- لا يشوفك احد .

- ما اكرب ليج .. امشي

مشيت و هو مبعد عني ويمشي، وصلت للبيت يسرى نايمة و بس ستار و فلاح كاعدين .. نشدني ستار كتله جيت اعلى البيض .

اخذته و رديت .. حجه فلاح : انطري اوصلنج

- ما يعتاز

- ولونه .. امشي

مشيت لجن سرحان ساعة الشاف فلاح يمشي وياي و هو يعرف هاذ الناهي اعليه .. كام يفور .. خفت لا فلاح يعاينه بس فلاح صاد وجهه و يحجي .

- ابالج شي يبت عمي

- شنهي

- عليش ما ترضين بيه .

- ما اريدنك

- ما تريديني شني شناغصني

- جا هي زور يو كوة .. ما احبنك

- ولا تحبيني عسنج لا حبيتي لجن خليها ابالج .. اخذج اخذج

- اكلك انت عليش لاحكني

- لازم رايدة تتمشين خاطر القصر يشوفونج و تتفسحين اعلى كيفج

- امشي عني مالي خلك شوفتك

دمغني اعلى راسي وكضني من شيلتي : من حلاة شوفتج يالزركة بفلسين ما اعبرنج لجن خليها ابالج............... هو حجاها و سرحان هد اعليه

اطاه بوكسي نيمه للكاع و فز نام فوكاه و تولاه بوكسيات ليما خرب وجه و ما ظلتله ملامح تنشاف و انا .. كضيت عبيتي و شردت.

اطيت لصبيحة البيض ورحت كعدت امي : يمه كومي

- هاه ؟

- رحت اجيبن بيض لصبيحة من البيت و فليح رافجن و جتلني بنص الدرب جيف ما ارضى بيه وتعرضله سرحان نعنعاه تنعنع ..

- ياااع .. تحجين صكد

- اي والله يمه كومي

فززت البنات كلهن .. واترخصت من صبيحة و بعدهم اهل القصر نايمين وطلعنا .. لا عرفت سرحان شصار بيه ولا دريت فليح شسوا .

مشت امي وكعدت ابوي و حجتله السالفة .. خاطر لا فليح يسبكنا ويألف اعلينا ..

كض دشداشته ابوي و طلع ..

سمعيت الجو امخبص فد دور ... و تناحروا ثجيل و ضاحي .. و ابوي بالنص ..

حسب ما سمعت .. سرحان كال شفته يجتل بيها و تدخلت .. و فليح يتهمه عده علاقة وياي .. بس الشيخ ماكلهم و شاربهم ..

بس سلطان ما جايز معتبر .. هاي تعدي اعلى ثجيل و ابوي بينهم .. و اطلابة وصلت للظالين و امي خلصت كل وكتها ادمغ اعليه .

وابوي صاف ويا سرحان و مصدكه من كون فليح شهد .. ان انا و بت عمي اكطعها اذبحها انت مالك غرض لجن اعرف انت رايدها و حاط عينك اعليها

ابوي متوليه وليه شلون يفضح بعرضه جدام الوادم و متعارك ويا ال ثجيل ..

لثاني يوم و الدنيا كابة لجن اتسجلت ضد ال ثجيل من كون فلاح جاي يشهر بعرضهم و يتهم ال ضاحي و الشيخ مطر اعترف بغلط ابنه من اتعدى اعليه بس حسبها نخوة و شالته الغيرة اعلى البت و فزعلها .. بس رافض احد يتهم ولده بالرديه ..

لجن فلاح ما عده دليل اني عدي علاقة ويا سرحان .

انا هم ثولة و اصكد باي احد و اشوفن يسرى كلبها اعليه و تغلط اعلى اخوها و دمها محترك ويانا و تلوم شلون اخوها يتهمني هيج تهيمة .

لليل و اجتني يسرى : خايبة هدية وينج

- هاه

- انا حجيتلج ويا سرحان و عرفت اعلومهم .

- و شنهي العلوم .

- يكول .. انا رايدج بالليل بعد ما الناس تنام اشوفنج بالكاع .

- لا اخافن ما اطلع ، انا اصلا ما عدي شي وياه

- خايبة انا اخيتج سرج و غطاج شمالج .. و اريدلج الخير و اخي اعرفنه باطل وراح اتطلك من وراه و انا تعرفيني شكثر اودنكم

- اي بس انا معلي وعلي

- اي دطلعي لسرحان .. وشوفي شيريد هو ابن شيوخ يمكنه يريد يوصيج

- وامي يو درت ؟

- انا راح اوكفلج عد الباب و ما اخلي احد يكرب ..

-جا خوش .

سرحان : اندكت الباب .. بت زناد جايبتلي مرسال ..

عاينيته ورقه فتحيتها .. من هدوة .. تريد تشوفني بالليل بكاع اهلها .

- شجاي تسوين يهدوة .. الوكت موش وكته .

ما ردت اروحن لجن ظلت ابالي اخافن هدوة بيها شي .. جتلوها .. يو اذوها .. هدوة ما تطلبني بهالليل و بهالظرف الا صاير شي .

كمت لبست الثامي و تمشيت .. ليما كلش نزل الليل و الناس نامت .. طريت من العجد خاطر اشوفن .

شفت هدوة مناطرة عد الباب

تمشيت لكاع اهلها و انا اعاين مامش احد .. تلفلفيت و نزلت .. و هي طلعت .. تعاين وراها و مبينه خايفة .. اشتعل كلبي اعليها خافنها متأذيه .

نزلت و انا اضمن بوجهي .. كربت ليه : ها يسرحان

- ها يضوه عيون سرحان

- انا خايفة حيل و عمامي اطلابتهم للظالين .

- اعرف لجن لا تخافين تنحل الامور .. مالهم اعلينا شي .. لجن انت عليش طلبتيني

- انا ما طلبتك .. موش انت حاجي وي يسرى ورايدينؤ

- هدوة رديييييي بساع

- شكو ؟؟؟؟؟

- هدها وراد يركض .. تلكاه ناصر وكضه من هدومه و صرخت مرت ناصر : ءهلااااااااااا يسلف ءهلااااااااا .. وينكممممممممممم شوفوا ال ضاحي شعملووووووووووووو بينه

يهالوادم وينكمممممممممممممممم....يتبع

reaction:

تعليقات