رواية كحل عرب الفصل الرابع والعشرون 24 بقلم زينب ماجد
رواية كحل عرب الجزء الرابع والعشرون
رواية كحل عرب الفصل الرابع والعشرون 24 بقلم زينب ماجد |
رواية كحل عرب الفصل الرابع والعشرون
أعز من روحي أحسك
وانته اعز منـٌي
ياحسبة عمر ..خاويتها إمن إصبــاي
بـِطلـَتْ صـَفنتي .. وما بَطـٌلـٌتْ مني
( للشاعر عريان السيد خلف )
هدية : لبست الأسود و كمت ويا نسوان خوالي ، فرشنا الحولي وووزعنا الوسادات اعليه ، و ظليت كاعدة وي بنيات خالي ونسوان كرابتنا، كلما اجو نسوان من السلف يصرخن ، نجابلهن و نلطهم .
شوية و دشن يسرى و جمارة ، اثنينهن لابسات اسود، كعدن احذاي، اندرت اعلى يسرى : جا ايمان وين ما هي ؟
- نامت و ما رضت تكعد، كعدنا ردنا ، عنطزت الا اتنام، هديناها و اجينا.
-انا هم نعسيت من الليل ما نايمة ، جن راسي افتر اعلى كثر البجي والصريخ
- جا روحي نامي كبل لا ترد امج من الدفنه ، من ترد هم تريدج عونه احذاها من كونها ترد متعوبة .
- اي والله جا اكومن انامن ليما تجي ، كعديني كبل لا تصل ، خوووش ؟
- خوش
كمت من مچاني، ورحت لحجرة خالي عليوي، انمطلت و اتغطيت بعباية و نمت، هيسيت احد يمي، شلت العباية ولنها جمارة مجطولة احذاي :هاا
- اريد انامن
غطيتها وياي ونما، لجن نومة موش هنية ، كل شوية نفز اعلى حس الصريخ و النعاوي، والرجلين تروح و ترد يم روسنا .
لهنااااك ، اجت يسرى ندهتني : هديوة .. هديووه
- ها ها ؟
- اكعدي خايبة يكولون اجوا الدفانه.
- صكد
- اي دكومي
كمت بساع و لفيت شيلتي ، و ووكفت اعلى حيلي، طلعيت من الحجرة الدنيا مغرب ، لكيت النسوان كلهن كايمات منتظرات امي و حبوبتي يدشن خاطر يجابلنهن .
درت راسي اعلى يسرى : جا ايمان ما اجت
- ما مشيت للبيت بعد ، موش بعيد الدرب لو رادت تجي بس اطر العجد تصل.
- جا لهسه ما وصلوا
- وصلت سيارة الشيخ و الزلم الكبارة ، بعد السيارة الهم بيها ما واصله هالناطرينها .
مشيت ووكفت بالباب كضيته ، خاطر انطر امي، زلم جثيرين واكفين بالباب و الفاتحة منصوبة ليغاد عنه ، درت راسي من هالصفحة خاطر اربي ... طلع سرحان جدامي عاكد حواجبه ومغندب، ظليت اعاين علي ، اشر بعصبية (عود دخلي) و يعاين منا و منا خاف احد شافه و هو يأشر .
انا ظليت واكفة اعاين اعليه ، صاح ( اااااااااااااااا شنهي وكفتك يخنجر دش داخل)
عاين اعليه خنجر : وين ادش بشيب ابيك جا غير موجب بمچاني .
- انت مالك غرض
- والله من عوينت ابيك .
انا رديت ليغادي و كاضة الضحكة لا تطلع عيب من من النساوين ، صاح سرحان ( بويه سدن الباب رحمة لوالديجن ، عودينه يو وصلوا نخبرجن )
ردينا الباب و بت خالي تنشد : ياهو هاذ
رديت : ما ادري
يسرى : هاذ سرحان ابن مطر ، شمالج يهدوة ما تعرفينه جا موش تشتغلين عدهم .
- ما ادري وچدت عدل .
- حكج ما تعايني جا عملتهم ما تنحط بالعب ساعة الطروج من الشغل لجن هم ذوله ال ضاحي الخبث بدمهم .
ردتها بت خالي : لا عليش تحجين هيج ، وعلي خوش ناس ، حتى هاذ ابنهم يكولون مثغف جان عايش ابغداد
هدية : شمالجن جا وكتها ، ناطرين امي اسكتن احنا بيا حال.
سكتن ... جا وين صاروا
شوي وسمعنا حسهن يصارخن من ابعين ، فتحنا الباب بالباب، وابن عم امي واكف صاح : يابه زلمنا شوية ليغاد
كربت امي تصرخ : ولك بووووووووووووويه
تلكينا كلنا و كمنا نصرخ وياها ونبجي ، دشينا البيت و هي تلطم اعلى راسها ، وكفت بنص البيت وذبت فزاعية
اجينا الدارهم و الدار خربانة
نصيح بصوت وين الجانوا ويانه .. يا بو صلاح يابوية
وين ايااااااامنا وذيج حجايانا
... وما اريده و البيت خلافك ما اريده ..
يابوووووووووووووية
وكامت تصرخ و احنا نبجي و نصرخ وياها ، كعدنا كوة و هي تصيح ( خايبات جابلني راح مني عزيز گلبي ، ولجن بعد ما اشوووووووفنه ، بعد ما يسير اعليه بووووويه )
انا كمت انوحن وياها اعلى نياحها وونها، ندستني جمارة ، درت ليها : ها ؟
- ابوي يريدج
كمت من امچيني ورحت ليه : ها بويه
- البگا بعمرج بويه
- الله يسلمك
- ايمان وينها ، صيحيها ليه اريد اروحن للبيت اغسل تحضرلي اهديماتي .
- ايمان بالبيت
- وحيدها ؟
- اي ، مشت خاطر تلبس الاسود لجن نعست و نامت و ما رضت احد يكعدها .
- جا انا اروحن ليها ، احجي ويا امج شوفيها معتازة شي من البيت خاطر اجيبنه الها .
مشيت لمي و هي تنوح ، كربت ليها و شاورتها ، اندارت ليه وهي تحس بعيونها و توصيني اعلى اهديماتها السود الزينات ، الكاهن ابقجة حمرة بالكومدي مالها.
كتلها : جا انا اروحن ويا ابوي هيج ما يندل
- روحي و اخذي جمارة وياج مشطيلها شعفتها مچبنه عيب الناس تستنغد .
خوش ، صحت لجمارة و طلعنا انة وياها لأبوي، سرحان واكف بالباب، لابس دشداشة سودة و الشماغ لافه اعلى ركبته ، عاينت اعليه ، هو اندار وشافني ، انثولت ساعت الشفته ، تيهيت علومي ولني اعثر بطسة و اطيحن اعلى وجهي ...
يا فشلتي.
(بيت حاكم )
ايمان : شلت راسي و باوعت جربايتي كلها دم ، كمت اصرخ بكل علو صوتي ( اااااااااااااااه حااااااااااااااكم )
اباوع حوالية ، شي مشايفته كل عمري، وجوه يصعب افسرها و اشرح هيئاتهم ، دنكت و اني اصرخ ، هيئة مثل شكل الطفل بكد الكف او اصغر ، على جربايتي ، تقربت منه يسرى ، و شالته بيدها ، بس شكلها غريب مو يسرى اللي كل مرة اشوفها ، بس هيئتها .
شالت الجنين ورفعته و يحجون حجي مدا افهمه ، خليت ايدي على عيوني وغمضت ما جاي اكدر اطيق شوفتهم ، رعب حقيقي ... بقيت حاطة اديه على وجهي و اصرخ ( حاكممممممممم وينك حاااااااااكم )
شلت اديه ، الغرفة محد بيها !
باوعت منا منا ، ماكو احد ..
الدم بعده على الجرباية متلوثه ، و الجنين مموجود .
كمت بس رجليه مشلولين من الوجع، تجيت ايدي للسرير و كمت على حيلي ، شعري مشمور على ظهري ، و دموعي تجري و حالتي حالة .
كمت اجر خطواتي كوة ، الدم ملطخ كل رجلية
رحت طلعت من الغرفة ، ماكو احد من البيت ، صحت : يسررررررررى
مجاوبت !
ردفت : الله لينطيييييييييج ان شاءالله ، والله اكول لحاكم عليج ، يا ظالممممممة .
ماكو جواب، رحت كوة لغرفتها ماكو
والبيت هادئ كلش ، كأنو محد موجود ، بس جمارة ويسرى جانوا موجودين لما رجعنه للبيت وين راحو ؟
طلعت برا حتى اغسل والوجع بعده ابطني كلش مأذيني، باوعت للجوا ، عصر كأنوا قرب المغرب
معقولة اني كل هذا الوقت نايمة و ما ادري !؟
غسلت رجلية و جسمي .. ورديت للغرفة طلعت اليه ثوب بدلت لبسته و كعدت ابجي، متحركت من مكاني ولا كمت.
شوية وسمعت الباب الخارجية انفتحت، مكمت من مكاني ، سمعت صوت حاكم و هو يصيح : ايماااان ، ايماااان .
من سمعت بصوت حاكم ، بجيت بزايد ، مثل طفل مضيع ولكا اهله ، دخل للغرفة ، لكاني ابجي : ها بويه شمالج
شلت راسي و بجيت بقوة ، تقرب عليه بلهفة و تبعته هدية و جمارة للغرفة وكفوا بالباب ، وهو لزمني : شمالج تبجين ، ياهو وياج
كمت من مكاني و وباوعت للجربايه بس هو يباوعلي و محتار بيه و يصيح (كليلي ياهو وياج ) حجت هدية : بويه شني هاذ الدم اعلى القريوله ؟
باوع ، و رد عليه : شني هاذ الدم ، احجي شمالج ساكته
كمت ازيد بالبجي ، و حضنته : شنهي حملج طاح لو شنهي السالفة غير اعرف
- يسرى
- شمالها ؟
- كعدت من النوم لكيتها هي و طنطن هواااااي على راسي ، بقت ادوس ابطني الى ان بقيت انزف
اندار باستغراب على هدوة : يسرى وينها ؟
- غاد ابيت جدي
- اجت لهنا ؟
- جنه نايمين انا و جمرة ما اعرف
ايمان : اني شفتها والله حتى اخذت الطفل منانه
واشرت على ايدي .... هلكدوته جان هي اخذته وطلعت
- امشي بدلي خلني اخذج للجدة تعاينج ، امشي بويه
- ما اروح ، اني ارجع لبغداد
- جا وكتها ترجعين يا بويه عدنا فاتحة دمشي
- معليه رجعني لبغداد
- اي اي ماشي ، دمشينا امشينا ، هدوة العباية بوووويه
مسح دموعي و جر ربطة ولبسنياها ، ومشاني ، كلت اله :ما اكدر امشي رجلية يوجعوني .
اندار : بويه جمرة غاد اباب بيت اجدادج سرحان واكف ، كليله ابوي رايدك بشغيلة جيب سيارتك .
هدية : حجاها ابوي و انا كضيت گلبي ، درت اعاين ورا جمرة و هي تركض و ابوي يحجي و ينشد بأيمان اعلى هالطركاعة .
كلها كم دقيقة و اجا سرحان بسيارته و جمارة صاعدة وراه، وكف جدام ابوي، ابوي فتح باب السيارة و كال لأيمان : ياله اصعدي
سرحان : خير شنهي شمالها؟
- خايب رديت ولكيتها سابحة بدمها
- اهااه ، عليش
- جا من كونها حبلة خايف سكطت .
- ان شالله سلامات ، ياله اصعدوا
يحجي و هو يبوك نظراته خاطر يعاينلي، صعدنا وياه ، و مشينا، جان نازل الليل ، ايمان تجر بنفسها و تبجي و انا عيوني محاوطاته من كون اليوم ما شفته عدل ولا حجيت وياه اهيس كلبي غده فلين .
حجا وياه ابوي : ما عرفت شصار اعلى جعدت ال ثجيل بطلابتهم ويا ال منعم ؟
سرحان : والله ما نشدت اعليهم ، لجن سمعت من خنجر كال مطينهم عطوة
- اي هو كال سلطان ناخذ عطوة ، لجن انا خايف لا يفصلونهم ..
- جا حكهم يو فصلوه ، الولد اعلى ما سمعت متأذي
- خايب حنون فگر حافي وما عده بنات ، منين نفصلهم من شيب اهلنا .
- الله كريم ، هي العطوة ١٠ ايام ، شوف وين توصل.
وصلنا الباب مالت الجدة، و انا عيني ما نزلت من عيونه و هو يحجي وي ابوي و كل شوية يدير العين صوبي.
دكينا الباب و ابوي يحاجي بأيمان ويوصي بيها، و هاي خايفة ترجف ، و انا واكفه بوراهم ، همس سرحان و هو واكف بذاك الصوب و متجي اعلى سيارته : باجر اريد اشوفنج يم الشط مو ما تجين .
تنداريت ليه ، ما يعاينلي ، هزيت راسي بمعنى (اي) اندار هو و عينه غاد، فتحت الباب الجدة، حجه ابوي : السلام عليكم بويه .
- يا هلا وعليكم السلام
- البت هاي رديت من الدفنه ولكيتها سابحة بدمها و هي حبلة من كون تشوفينها .
- اي سمعنا ببو صلاح مات حيل انقهرنا والله ما يستاهل
-- هاي بعد امانته و اخذها .
- ام الحبايب شحالها ؟
- الله يعاينلها ، دشي بويه
حجت الجدة ويا ايمان : دخلي بهداي دخلي
حاكم : عينج اعليها من كونها رچيجة ، تجيها
- احطها بعيني ابو ستار
اندار : هدوة بويه دشي وياها
دخلت و اني اسند ايمان ويا الجدة و هاي تبجي مبطلت دموع ، مطلتها اعلى الفراش و كشفتها ، انا طلعيت برا وكفت، استحي و انا ما معرسه اعاين هالامور و اخافن.
تنشد بيمان و ذيج تجاوبها ، من كالت الها شفت طفل وكع يطلع صغرة بكد جف الايد ، كالتلها : جا ما دام شفتي بعينج معناتها طاح
كومتها وضربتها ابر و اطتها كبسون و كالت الها : اخذي من هاي حبايتين و عدج العافية ، لجن نامي من كونج هسه بحساب نفسه .
طلعت و انا سنديتها ، فتحنا الباب وجدة ظلت تشرح لابوي الحالة و انا و جمارة عاونها و صعدنا ، سلم ابوي و صعد و ردينا للبيت ، وكفت اباب البيت ، و هي تكله : ما ابقر هنانه ما اريد ، اخاف ما اريد .
سرحان ظل ساكت و مدنك و ابوي داير وجه اعللنه : جا وين اخذج بهالليل بويه، نزلي اليوم و باجر اخذج لهلج .
- ما ادخل ، يسرى بيها طنطن هي اللي داست ابطني ما ابقى ما اريد .
حاكم : دياله ربي ، شلون سالفه هاي .
حاكم : البيت مسكون و البنية من ذيج الروحة لبغداد و هي مريضة و تعاني ، اخذها للقصر غاد يم عمتها الخاتون يعتنن بيها ليما تخلص الفاتحة .
- جا و نكلفكم
- افا شنهي شايلينها اعلى امتونا ، القصر واسع و يسع عشيرة ، و هو اعلى اعتبار بيت عمتها ، خلنا ناخذها ليش تخلي البت معلعلة وهي مريضة.
تنهد بحيرة : جا شسوي ، امشينا ياله ، انا هم عدي فاتحة ما اكدر اجابلنها ، هلبت منا ليما تفض فاتحتنا بيتي مخلص ، طكت روحي من البيت .
حرك السيارة سرحان و هو يكول : بعدكم تشوفون .
- والله انا مرات اهيس صوت لجن ما شايف ، بس امس جعدنا اعلى صريخ هدوة و ايمان عكبها صرخت بعدنا ما نعرف شجاهن ، اندكت الباب بعلم موتت الحجي الله يرحمه .
شال راسه : ليش حتى هدوة كام يأذيها
حجيت : هيسيت انا مربطة اريدن انطك ما اكدر ردت اموتن .
- جا البيت بعد ما ينكعد بيه يبو ستار ، شني ناوي تسودن عيالك
- جا شبيدي يسرحان ؟ غير جاي ابني بالبيت صارلي ثلث تشهر .
- حتى يو غؤفة وحدة و كلكم تلتمون بيها ولا كعدت هالبيت هاذ ، البت سكطت .
حجت ايمان : وشفايدة نشيل ويسرى ويانا ، هي التجيب الطناطن .
اندار سرحان : يسرى ياهي ؟
- مرت ستار ، هي وياها حاطت كورهن ابعض وحدة ما اطيك الاخرى
- اني شعليه هي تكرهني والله ، هي الداست ابطني ، انت لويش ما تصدكني .
وبجت بقوة ، اندار ابوي و هو يخذرها و يكللها : نوصل ونحجي عيب منا سرحان بسج .
وصلنا القصر ، و سرحان حجه ويا الحارس ينده وحدة من بنات القصر ، اجت سليمة تركض ، حجه سرحان : دخليها جوا و شوفيلها حجرة و خلها تنام ، البت مريضة .
- ان شاءالله
اندارت لابوي : ابقى يمي .
حاكم : المرة مناك ميت ابوها و ما ادري اشحالها ، دشي نامي و انا من الغبشة يمج و علي .
انا ظليت كاعدة بالسيارة ، حجه ابوي : تنزلين يمه لو تروحين هدوة ؟
- لا بويه اروحن امي موصيتني اعلى غريضاتها لزوم اجيبنهن .
- جا نزلي بويه
سرحان : لا خلكم انا اوصلكم
- لا زاحمناك و علي كلفناك
- شني هالحجي ابو ستار، ردي يابه ردي
- لا لا مشكور ، نزلي يابه
- بدربي يمعود
- سالم بدربك ان شالله ، يحفظك يالغالي
حجاها و هو يمد ايده يسلم ، مد سرحان ايده لابوي يسلم عليه و كاله :
- هلا بيك ابو ستار الغالي .
حجاها ، و صفت سيارة الشيخ ، ودعناهم ومشينا.
نزل الشيخ : شعده حاكم ؟
سرحان : ايمان سكطت و جابها هنا يم الخاتون
- افا ، شمالها ؟
- مدري ، تكول طنطل و يسرى و ما افتهمت .
- راح تتسودن البت وعلي، بس انت شجابك اعلى حاكم ؟
- وصلتهم بسيارتي
- صايرلهم سايك يبن الشيخ .
- بخدمة اهلنا
- والله جنها موش لخدمة اهلنا من كونك جاي تكصر الدروب و ابالك سوالف ما تصير .
- انا رايح لبيتي .
- بيت ما الك و انا موجود ، دش للقصر .
- تعبان ورايد اتمدد اعلى جدام امي خاطر تمرغلي، من رخصتك .
كض ايدي : انا موش عدوك ، انا رايد مصلحتك
- وين مصلحتي من الموضوع
- لا تظن بيوم بيت ثجيل يحنون اعلى ال ضاحي و يو مو تصير وليدهم ، يحسبونك اعلى ضاحي من كونك منهم .
- انا شنهي المستفادة من ضاحي و ثجيل ، غير تيتمت بجهلي و انحرمت من امي و شفت الويل من هالعداوة ، ليمتها تظل هالعداوة .
- انا موش حاقد اعليهم ، هم الحاقدين اعلينا و يدورون ورانا من كون يحسبون القصر و البستان حك ابوهم ثجيل موش حك ابوي ضاحي .
-حك الله المن ؟
- عاداتنا ، الشيخ هو اليورث نص الورث من الشيخ الميت ، دواي الشيخ الجبير و هو اعرف المن اطاها ، و اطاها لضاحي ، من كون المشيخ تريد عكول .
- انا كل هاذ مالي بيه لا ناقة ولا جمل، انا الرايده تعرفني ، و انا كانع بيها يو اظل كل عمري ناطرها .
- هوسة عشك ماخذتك و ما مخليتك توجد دربك ، لجن و انا ابوك اكللك ، بت حاكم ما تصير.
هزيت راسي و انا اكلك : راسي معورني تصبح اعلى خير .
حجيتها و انا امش لورا البيت و بالي انشده، ما اعرف هالسالفة شلون تخلص، لجن لزوم اسعى و انهي هالعداوة الما منها غير وجع الراس .
سرحان جان عده امل جبير هدوة تصير اله ، رغم هو لو يعاين الوضع يكول مستحيل ، بس كلبه يكله هدوة الك، ما يعرف الزمن شضامله و مسعاه بمصافة العشيرة طريق امله .
لما رجع حاكم و سأل يسرى على حجي ايمان حلفت اله ان هي ما مشت للبيت بشهادت شهود النسوان الجانن للبيت ، و انو هي جانت ويا جمارة ساعة الردت و جمرة شهدت على رجعتها وياها .
حاكم اعتبر حالة ايمان و البيت المسكون هو السبب، و قرر ما يرجعها من بيت الشيخ ليما يخلص من البيت و ينتقل بيه ، عافها غاد من كون الخدم مالت عمتها الخاتون مدارينها .
كواغد ظلت فاكدة عكب موتت ابوها ، كضت ٣ ايام الفاتحة و طاحت طريح وساد .. مريضة ما تكدر تشيل ايد ولا رجل وهدوة وياها وياها ما هدتها .
ما طلعت ولا مشت من بيت اجدادها و لا حتى كدرت تلتقي سرحان ، مرت ١٠ ايام و هي ما شايفته ولا تكدر تطلع خوالها ما يرضون البت تطلع ، كلشي يحتاجونه هم يجيبونه ، مجابله امها و كاعدة ..
مرت ١٠ ايام ياله كدرت تشوفه لما امها ردت للبيت بعد ما حاكم كال الها : بسج هادة البيت صارلج ١٠ ايام ، البيت خلص ، امشينا نلم اغريضاتنا خاطر انشيل .
طلعت هدوة ثاني يوم الفجرية تركض وكلبها يلهب شوك اعلى شوفة هواها ، وصلت و لكته واكف بحصانه اعلى الشط و ناطر ، من شافها فز من حصانه و نزل ومشه ليها .
- اجيتي يهدوة
- مشتاكتلك يسرحان
- وانا الشوك كاتلني و العباس، عشرة تيام ما مرت بيهن فجرية الا وانا مناطر جيتج ، وسباح كلبي ذايب اعلى شوفتج يهدوة .
- جا شسوي امي موش طويبة عكب موتت جدي، و هالظليت مجابلتها
- عدها العافية ان شالله .
- العافية الما تفاركك كون .
- اويلي اعلى دلالي شكثر ولهان يسمع هالجلمات التطيب صوابه .
- عفاك الله يهواي، عليش الصواب ؟
تنهد : شكللج يهدوة و شحجي
- هلك درو بعشكنا ؟
- ابوي عرف وتوهدنت من كونه رفض اخطبنج .
كلبي نغزني ساعة الكال "رفض" رديت : يعني شنهي ، مامش امل لهوانا .
- الامل بالله موجود لجن انا كلت الج دروبنا طويلة يهدوة ولزوم نصبر
- وشراح تسوي ؟
- انا رايد اصف ويا خوالي و اعايشهم ، هلبت اكدر انهي هالعداوة ، اولي و تاليتي شيخ اعلى هالعشيرة بعد عمر طويل لبوي ، و متامل اصافي الكلوب و اخذنج .
- جا و انطر ليما يسلمها ابوك .
- اسم الله اعليه .
- انا موش افولنه لجن وعلي ما احمل من كون الايام يمرن اخلافك مرات ما ينضاكن ولا ينحملن .
- اعلى كلبي ازود يهدوة لجن ما بيدنا شي ، يو خطيت جدمي ، احترك انا و اخسرنج .. ويضيع من ادينا كلشي .
- انا انطرنك .. من كون يو انحطيت جدام دربين اخسرنك يو انطرنك .. وعلي انطرنك لو جان الظن على تالي الشيب.
- اشيب اعلى عشكج و عيب املن .
- الشمس كربت تطلع لزوم اردن
- جا انا كلما غازليتج شردتي يهدوة
ضحكت : لا وعلي لجن ...
خجلت و دنجيت راسي ، ضحك و هو ياخذ هوى و يعاين بالجو و يترس ريته بهوانا ، درت اعاين اعليه، اندار و الضحكة راسمه اعيونه
- اعشكنج
ابتسمت ، هيسيت حس اجدام من بعيد جايه ، فزيت و انا اكلله : اروحن
- تجين باجر يو لاله ؟
- ما اعرف
- انا ناطرج ان جيتي وان لا ..
ابتسمت و انا اخذ الماي ، و هو توجه لحصانه ركب اعليه و مشى بيه ، و انا اخذت الماي ومشي ، لحكني ، بحصانه ويمشي بهداي وراي .
غنيت بصوت ناصي : اريد الله يبين حوبتي بيهم ، اريد الله على الفركة يجازيهم
يضحك وهو يسمعني ،حجه : اغنيلج يو صوتي موش حلو
ضحكت ، و هو ضحك وياي، وصلت للعجد (الفرع) كتله : اهدن كلبي يمك و امش
- عينج اعلى كلبي من كونه مرافكج وموش راضي يهدج .
ابتسمت و مشيت ، و هو ظل موجف ، ليما دشيت ، بس ااااخ اعلى كلبي الهام بيه، ١٠ ايام وانا ما شايفته اهيس رويحتي ذابت بفركاه وحييت بشوفته .
دشيت ، اطيت الماي اليسرى اللكيتها توها كاعدة ، ومشيت لحجرة امي، عاينت ابوي نايم ، و هي كاعدة : ها يمة اصباح الخير .
-هلا يمه
- شلون حالج اليوم ؟
- على الله ييمه ، كوميلنا نفض شغلنا من كون ابوج مستعجل اعلى الشيلة .
- ايمان ابيت الشيخ صارلها ١٠ ايام حكه .
- ايييه ، كوميلنا
سندتها و كومتها و انا اكللها : يمه ان جنتي موش طويبة انسدحي وانا افض الشغل بمجانج ما عدي شي ، وجمرة ويسرى وياي
- لا ييمه ريتج سالمة يبنيتي ، بس ليمتها اظلن نايمة خلينا نشوف شغلنا خاطر ابوج يجيب حرمته .
كمنا انا وياها نلم بغراضنا و نشدشد ، وابوي طلع لبيت الشيخ .
وصل غاد ، سلم اعلى الشيخ و دش للديوان كعد، فاتت ايمان ، حجه : ها بويه شلونج .
- زينه
دخلت الخاتون وصبيحة ساندتها : شلونك ابو ستار
كام : هلا خاتون ، هلا بيج ، شلونج يابه .
- الحمد و الشكر لله .
ايمان : راح ارجع و ترجع يسرى وياية
- بويه بيتج معزول عنها و البت مالها غرض بحالتج ، حلفت الف يمين و كالت ما وصلت البيت ساعة السكطتي .
- يعني شنو اني اجذب دا اكولك والله هي ، انت ليش مدا اصدكني .
الشيخ : موش هيج الحجي بويه ، زلمتج جاي ورايد ياخذج وياه، توصلون وحلو مشاكلكم بهداي.
الخاتون : وهذا الصح يا ابو سرحان بس حاكم لحد الان مدا يصدك ايمان وهذه هم مشكلة !
حاكم : انا ما مجذبها يخاتون ، لجن البت تحلف وهكو شهود اعلى حجايتها شلون اتهم البت بلا دليل.
الشيخ : حكك
الخاتون : مو كل جريمة ما الها شهود يكون المتهم بريئ يا شيخ و انت تعرف .
حاكم : انا ما اعرف يا خاتون انت ليش تاهمة البت و انت ما شايفه منها شي
- بس البنية دا تكول شايفة منها اكثر من موقف .
- عيال بيت ويصير بيناتهن مشاكل بس مو توصل بيها ، تدوس بطنها هي و الطناطل و تبوك ابنها شنهي ما تكليلي دخيل بختج يا عكل يصدك .
الشيخ : خاتون ياريت تخلين المشكلة بيناتهم و حاكم ما مكصر ويا البت خاويها و حابها و ان شالله شيلة خير ويخلصون من هالمشاكل دام البت معزوله عنهم.
الخاتون : اثاث بيت ايمان يكون كامل ، من بنكات و فراشات و ثلاجة و تلفزيون و كلشي ، احنا من بيت بناته خاتونات و ما يصير تعوف بيتها فارغ .
حاكم : انا نكلت غرفتها وما اقصر وياها ان شاءالله
- انت ما تقصر ، بس ورث ابوها موجود و يتأثث على حسب ما يعجبها ، على اثاث بيوتنا البغدادية.
عاين حاكم للشيخ ، و كال : ما عدي مانع لجن كاغد توه ميت ابوها وما اريدن اضايكنها ، بأثاث ضرتها وبيتها فارغ .
الخاتون : اني كواغد احبها ، لكن هم لازم تقدر انو ايمان تأثث بيتها من ورث ابوها و مو من احد .
غمز الشيخ لحاكم حتى يفض الموضوع ، حاكم تضايك حيل ، و كاللها : ان شالله .
كام : ياله انا اروحن ، اودعناكم
ايمان : واني هم راح ابقى
- جا البيت فارغ وانت و الخاتون تريدن اثاث، صبرج علي يومين لينا اكدر اثث و اصيحلج.
- لا اروح وياك
الخاتون : لا انت مريضة ، ابقى هنا لبين ميكمل شغله .
حاكم كام يتنهد ، وايمان سكتت، حجه : اترخص انا يشيخ .
طلع و هو يكله : لا تهم يحاكم ، اخذ البنية مني و اعلى راحتك اثث .
- لا انا راح ابيعن الحلال خاطر اشتري الكاع البصف البيت و اطيها الكاغد ، خاطر ما تتضايك اعلى اثاث.
- وشما تحتاج انا سداد ان شاءالله
- الله يديمك فوك راسنا شيخنا .
- اليوم كعدت ال ثجيل وي ال منعم
- اي والله الظهر .
- خلهم حذر، تراهم بيت ثجيل ما يتامنون يروحون يضحون ببنياتك .
- لا شحد اليكرب بناتي ، يحسب الله ما خلقه غير
- عاشت ايدك ، ياله بويه
- اودعناك
- الله وياك .
طلعت منهم و رحت للبيت، كعدت ويا كواغد و كتلها : عليش ما تخليني ابيعن الحلال ، البيت غاد ما بيه مجان للحلال .
- خلي الحلال هنا ليما نلاكيلهن مجان
- انا رايد اخذ الكاع البصف البيت
- جا وكتها ؟
- كاغد انا ما رايد اضمن اعليج لجن الخاتون ضايكتني و هي تتشرط بثاث البيت مالت ايمان و انا ما عدي غير الحلال ، و اخافن لا اثث وازيدن اعليج همج و انت موس ناكصة .
تبسمت بحزن : جلمتك هاي كافية ووافية يبو ستار ريتك سالم ، انا ما احطن اعوينتي اعليها هي بت خير ، وعكب ابوي الدنيا طلعن من اعوينتي ومالي خلك احطن بالي ويا احد .
- خليني ابيع الحلال و اشتريلج الكاع وبطلي من بيت الشيخ و خلصي وكتج بالكاع و اتلهي .
ما كلت باطل ساعة الواكفت اعلى بيعت الحلال، جبت زلمة ودخلته البيت و خذيته للقطة البيها الحلال ، اطاني سعر زين ، احنا عدنا هايشتين و حولي و ٨ صخول ، الهايشة و السبع صخول جابن سعر الكاع ، بعتهن و خليت بس الهايشة و الحولي وصخلة وحدة.
اخذت الفلوس و اطيتهن لكواغد ..
وطلعت لال ثجيل اعلى الكعدة وصلت غاد شفت سرحان حط سيارته : ها شو هنا .
ابتسم : هلا ببو ستار ، جا من كونهم خوالي و جايهم.
- الشيخ يدري بجيتك
- لا
- يو درى ما يرضى
- اراضي لجن لو ظلينا على عداوتهم يحاكم ما نجني غير الضحايا .
كمنا نحجي و نتمشى لبيت سلطان : شنهي ناوي تصلح العمام .
- اسعى والله يتوكل امورنا
- و النعم بالله ، خير ما تفعل ، ياله امشنا .
دخلنا لبيت سلطان ، دشينا الديوان كامت الزلم وفرينا الديوان نسلم .
كعدنا ، و حجه سرحان : الله بالخير .
ردوا - الله بالخير و الرحمة .
سلطان : مجبل اعلى خوالك يسرحان .
- خوالي و النعم منكم و اتومس بيكم
ابتسم و الزلم تجاوبه : والنعم منك يبن ال جلوب .
سرحان : ال منعم هم خوالي من كون مرضعتي منهم ، ونا طاب بالسالفة طباب خير ، من كون اعرفهم و عدي معرفة وياهم .
- خير اليلفاك الله يسلمك
سلطان : ابوك موافك اعلى جيتك يبن ال مطر .
-ابوي زلمة خير وموش كطاع رحم خاطر ينهاني عن خوالي .
حجه زلمة : يخلفك بخير ان شاءالله .
- يديم بعمره .
- لجن يكولون المشيخة عكب مطر لزناد و الشيخة ملوك حالها مثل الشيخة حدهن وكت الرفضت ثجيل اليخلف اخوه دواي .
سرحان : السموحة منك انا ما ارضى اسامي اعراضنا تنذكر بدواوين ، الوكت موش وكته خاطر نحجي بهالمواضيع ، انا جاي طباب خير ، و ان شالله اسعالى .
سلطان : حاذر يبن اختنا تراه الذيابة مناورتك وتتاني الغفلة خاطر تهد اعليك و تنهش بلحمك .
- و انا صاحيلهم (و ان اجتمع قوما على ان يضروك بشيء فلن يضروك الا بشيء كتبه الله عليك ، رفعت الاقلام و جفت الصحف) ... صدق رسول الله
ردفوه : صلى الله عليه واله ، سمعنا انت عشت ابغداد واخذت عنها ، وما شالله اعليك ، الخير باين ، لجن ما ماخذ حجاياتها.
- وكت الأجيت واحجي بغدادي
ضحكت ... صاروا يستهزئون بحجاياتي، شفت لكل ديرة حجاياتها ، لو رحت بغداد حجيت بغدادي و ان رديت حجيت بحسچتنا .
صاح زلمة : اجو اجو
كلنا كمنا ، و انا طلعت تلكيتهم ، شيخ ال منعم زلمة خير ورفيج ابوي و صديجة، وكت الشافني استغرب وكفتي ويا ال ثجيل ، مديت ايدي و سلمت اعليه .
حجه : ويانا وياهم يبن شيخ مطر .
تبسمتله : ويا الحك ان شالله .
تبسم و كال : هلا بيك .
دشينا داخل و انا ماخذني القلق ، كلت ، محلوله براية العباس ان شالله، كعدنا و بدا الحجي و الاخذ و العطا ، على الكلام و ردت الوجوه الخيرة تحجي الحك و تحاول توصل الحل، ووكفوا اعلى الفصل من كون ابنهم متأذي .
انا اخذت جانب السكتة دا الكبارية يحجون ، من وكفوا اعلى الفصل ، حجيت : الله بالخير عليكم.
عاينوا : الله بالخير .
- انا ويا الحك موش ويا احد، وجيت لهنا طباب خير ان رضيتوني ادخلت و ان ما رضيتوا اتكترت .
سلطان سكت ، و حجه شيخ ال منعم : هلا بيك يبن ال مطر .
- انا كبل شواي حجيت وياهم و كلت الهم مرضعتي من ال منعم ، و ان شاءالله انتم خوالي .
- و النعم منك بويه .
- (ان الله يأمر بالعدل و الاحسان وايتاء ذي القربى ) وانتم كرابتي ان شاءالله ، ويو حجينا بالعدل فعدل الله الحك الكم من كون حنون هو المتعدي اعلى وليدكم ، و ان حجينا بالاحسان فأنتم اهل الفضل والاحسان ، و الفضل لله الولد وان جان متاذي لجن عدى الشر عنه ان شالله .
حجه واحد : الفصل ما اتنازل عنه .
ردفه سلطان وهو يحجي ، و ذاك يرد ، و يصيحون الفصل ، كلت الهم : خوش بويه ان جانكم تريدون فصل ، انا فصالكم .
حجه شيخ ال منعم : فصالنه يبن ال ضاحي .
- لا وعلي فصالكم والبت تاخذونها من بيت ثجيل ، بعد .
- شلون
- مالكم غرض ، انتم ردتو فصليه و انا مطيكم فصلية ان شالله ، ومحلوله بفضل الله ، و موعدنا امس تجون ليه تاخذون فصليتكم .
ظل واحد يعاين للثاني، ندسني حاكم : خايب تسودنت انت
- انطر وشوف وين تصل تاليها .
كاموا من مجانهم و فصليتهم بركبتي ، وياخذونها مني ، سلموا و مشوا .
اندار سلطان : شنهي الراي يبن ال جلوب
- خالي انا كتلك طاب طباب خير و ان شالله محلولة
ضحك و هو يكول : للمرة الثانسة اشوفن جلوب جدامي بشحمة ولحمة .
ضحكت و كتله : اودعناكم .
طلعنا انا و حاكم ، وهو يحجي : خايب فصل هاذ شنهي تتكفلة و انت من ال ضاحي .
- شوف تاليها
فتركته اعلى اطراف ال ثجيل ، اخذت سيارتي ومشيت للممعمل اوكف اعليه من كون كربت افتحنه و اباشر بيه .
للمغرب ، خلصت من المعمل رديت للمضيف مالت ابوي، لكيت ابوي واكف ومدخن ، كربت ليه : هلا بويه
- لا هلا بمكفاك ، صكد السمعته يو لا
- ان جان بخصوص الفصل ، فالكالك صادك
- انت على اي اساس تكفل فصل اثجيل ، شنهي ذول و تكفل فصولهم ولك .
- بويه انا ما ضريتك ولا خليتك بظهري، دشيت الكعدة بسمك و انا ابن ال مطر.
- وتكفل فصلهم وووووولك .
- بويه ان جنت ما ضارك بشي ، فكطع الرحم حرام ال ثجيل و ان جانو عدوينك لجنهم خوالي .
- توجب ويا عدوين اهلك يردي
انتفضت : موش انا الينكال عنه ردي يشيخ ، تربات ايدك و العيبة ما تجيس اطباعي .
حجيتها بغضب و هويت عنه و مشيت ، و صدري ينكط غيض من كون الموصله الحجي تارس اذنه اعليه و محشده زين .
اخذت الحصان و طريت السلف لي ما وصلت الشط ، هنا يرتع كلبي ويسكن من كون احسن بخطوات هدوة بيهن و يهود دلالي بذكرها و انا اتخايلها و انسى كلشي و اسرح بيها و بعشكها اهم .
ظليت ليما نزل الليل كلش و الناس هودت ، مشيت لبيت امي و دشيت اعليها ، و كعدت اسولف وياها، ليما نمت ، و هي تفرك بجسمي من خوفها متعوب.
كعدت الصبح ، كلت الصبيحة و الخدم البالقصر يدشن لبيتي و يعاونن امي ، لإن عازم شيخ ال منعم واخو المتعدين اعليه ،و سلطان و حنون، خاطر يحضرن الغدا .
اجا الشيخ ، وكف و كال : اسمع ولك يسرحان ، وعلي يو ورطت روحك بهالفصل لاتبرى منك اعلى عنادك وركبت راسك هاي ويو صفيت بعد ويا ال ثجيل ال اكص جدامك .
- جلمتك اعلى عكالي بويه و حاشى اوهدنك بطلابة انت مالك بيها ، لجن ان وكفت ونهيتني عن خوالي هاي مالك حك بيها من كونهم كرابتي و قطع الرحم حرام والله موصي بيه و لا طاعة لمخلوق في معصية الخالق ، و طاعتك تبطل ساعة التنهاني عن خوالي .
- موش زودك خوالك ، لجن انا خايف من غاياتك يسرحان
سكتت، ردف : بت حاكم شيلها من بالك يسرحان.
- وانا جان البال معلك بطراف كصايبها، وكلبي متورط بيها .
- عشكك باطل و يهدم بيوت من كون العاشكها منهي اعليها نهوة كماط.
- انا ما ابطل مسعاي ليما احصل اعليها .
- خايب موتي اعلى ايدك يبن ردحة من كونك عليت كلبي بعنادك هاذ .
حجاها و مشى و انا ظليت موجف بمجاني و اربي ... تنهدت ، ما خاب من سعى اعليك يبو خيمة الزركة لا تخيب مسعاي .
صار الظهر و حاكم اول الحاضرين : ها يبو ستار
- خايب غير يو نامت عيوني عكب طلابتك هاي، انا خايف اعليك تتورط و ابوك صعبة اطباعة يسرحان .
- لا تخاف و تفضل غداك يمنا ان شالله
- يو ورطت روحك كتلتك اعلى حسابي .
ضحكت ، و كعدنا بالبيت نسولف، ساعة و اجوا المعازيم ورحبنا بيهم انا و حاكم، بس سلطان ما رضى يدش بيتي من كونه تابع لبوي ، ليما حاكم كاله : البيت مفصول و تابع لسرحان و امه موش لمطر .
وطلعيتله انه و ضيفته و رحبت بيه و جبته لبيتي ، دشوا الزلم و كعدوا ، اكرمتهم بالخدمة و الضيافة و جاي و ماي و كهوة اعلى اتم وجه .
حجيت : انا واعدتكم امس وكلت الكم انا فصالكم بعد ما ظنت احسان .
حجه شيخ ال منعم : افا عليك يبن ال جلوب ، عليش هيج الحجي .
- والله يا شيخ انا مالي بيها لجن دشيت طباب خير و كلت احلنها من كون حنون حالته اعلى كده و ما عده و الولد بخير ، و انتم الصدك ما اكرمتوني ووكفتوا اعلى الفصلية .. و فصليتكم جاهزة
- شنهي الراي .
- الراي يمي ... يممممممه ، ام سرحان .
طلعت امي هاكدها كاتلها الضيم و حاني ظهرها وعصابتها اعلى راسها جنها عمامة سيد ، ومكبعه بعباتها ، كتلها : يمه يلا حضري امورج و امشي
- يله يمه انا انا حاضرة
الشيخ : وين تروح ام سرحان
- جا انتم ردتو فصلية وشرط من ال ثجيل، وامي من ال ثجيل ، و اعليه العباس مكطوع كلبها ٢٨ سنة من نهد ابوي ما مرها زلمة من كون الاخذها .
ضحكوا بصوت عالي ، و الشيخ يصيح : خايب سرحان سالفتك ما تتسولف وعلي .
- عليش هيج ، جا غير امي و اريدن مصلحتها و انا اعرفكم ناس خيرة ، و مطيكم امي .
الشيخ يضحك : ولك سرحان غلبتنا و علي
- اها هيج ما راضين بأمي، شمالها ؟
ضحكوا و هم يكلوله : الفصل طايح لجل عين ام سرحان
حجت امي : يعلي علومك يشيخ و يحفظك ان شالله و يحفظ وليداتك. من امس ووليدي حاير بهالطلابة و حجه وياي من كونه ما يرد بت تدفع اثام اهلها وهو طامع بكرم ال منعم من كونكم خواله اعلى الرضاعة .
كمت اعلى حيلي و كتله : انتم اهل الاحسان و نترجى الفضل منكم ويكولون لا تطلب الحاجات الا من اهلها
ابتسم : والله انك شيخ و ابن شيوخ ، والفصل طايح حدر جدامك يبن جلوب .
- وانا الكافل ان شالله لدوا المريض ، و اعلاجه بركبتي و شاكر فضل يشيخ .
سلطان : من اكلكم جلوب بزره ماحد يصدكني .... يتبع
- لقراءة الفصل الخامس والعشرون : اضغط هنا