القائمة الرئيسية

الصفحات

رواية هروب ما بعد اغتصاب الحلقة الثالثة عشر 13 بقلم ميرو أحمد

 رواية هروب ما بعد اغتصاب الحلقة الثالثة عشر 13 بقلم ميرو أحمد

رواية هروب ما بعد اغتصاب الجزء الثالث عشر 

رواية هروب ما بعد اغتصاب الحلقة الثالثة عشر 13 بقلم ميرو أحمد


رواية هروب ما بعد اغتصاب الفصل الثالث عشر 13

فقت علي صوت مسعود ايعيط عليا
مسعود :انتي هيييي
انا انخلعت :بسم الله كنك شن في
مسعود بنبره حاده: وين راقده لتو الظهر قريب اذن
انا : ماحسيت علي روحي الساعه كم توا
مسعود بجديه : واحد الا "معاش نبيه النوم لوقت متاخر
انا لميت الشعري فوق بكسل نبي انوض عشان انصحصح
رفعت راسي القيته اشوفلي
انا برود: شن تبي عليش اتعيط
مسعود حذفلي الجلابيه " حدديها ليا بسرعه نطلع من الحمام نالقها واتيه
انا مسكتها: به
مسعود : نوضي حركي روحك لانه امي قالت انزلو تغدو عندي
انا: تمام
مسعود: مافيش داعي حد يعرف شن صاير بينا مش تمشي اتهدرزي لي الفرخات
انا: اوووف باهي خلاص افهمنا
مسعود رقتله : اوووف امتاعك هذي نسمعك اتعاوديها انقص السانك
انا صبيت ورافعه في ايدي دبشه وانتمتم : استغفرالله ايدور غير المشاكل
مسعود : شن قلتي ما اسمعتك
انا : شي شي بري دير حمامك وانت تاخرت ع الصلاه
مسعود رفع حاجبه : ماليك دخل نتاخر او لا وطلع
انا تكلم ببصوت: مش ماشي امعاه الدور بكل بايديرلي جو الواعر اوامر
مسعود : اسمعتك ره
انا ضحكت: والله حق مش ماشي امعاك الدور بكل
مسعود : انجيك ره
انا ضحكت: خليك في مكانك مش ناقصتك بكل
مسعود: خلاص ضمي فمك وديري الي قتلك عليه.
انا سكتت ما رديت عليه
حددت دبشه وحطيته ع السرير وطلعت قفطان مغربي لونه ازرق ملكي

وخشيت الحمام التاني دوشت علي السريع ذهنت جسمي بالمرطب ولبست الديشنبر وطلعت ولفه شعري بالمنشف شفت مسعود يلبس مريت من جنبه صبيت ع المرايا انجفف في شعري
مسعود قعد ايشوفلي خايف يضعف رفع عطره وبخ منه ايحاول يتجاهلني بس اعيونه مانزلتش من عليا
انا حسيت عليه امركز عليا من المرايا : تبي شي حاجه
مسعود فاق ع روحه: لا
انا 😕😕: اي صح فطرت ولا لا
مسعود :اي فطرت بعت امي فطور امبدري
انا: ياعطيها الصحه
مسعود لبس ساعة ورفع مفتاحه وتليفونه: انا نازال تحت تاخرت ع الصلاه بعد اتكملي انزلي
انا: به قبل كنت نبي ننزل امعاك
مسعود لف بيطلع: علي اساس غريبه ماكنتي عايشه فيه عادي بيتنا
انا: توا يختلف بديت مرتك
مسعود: المهم انزلي ابروحك انا ماشي
انا سكتت ولفيت بناخد القفطان بنلبس
مسعود مزال واقف ايشوفلي
انا: اطلع لو سمحت نبي انغير
مسعود انحرج وطلع من الدار لعند سمعت باب الشقه اسكر تنهدت بحزن لعند امتي معاملته امعايا هكي ليش مايبي ايصدقني مانبيش منه شي غير ايصدقني بس لبست وجففت اشعري وانفكر كيف انخليه ايسامحني وترجع علاقتنا زي قبل 😢 المهم ايرد نفس قبل عارفه قصتي صعبه علي اي راجل يتحملها يابل مسعود الي عشقه قلبي حاسه بيه نعرف قداش واعره علي رجل اتجي خطيبته او حبيبته قبل لايتزوجو اتقوله تعرضت لي اغتصاب 😔💔💔💔 قداش ما اتهد اجبال الكلمه هذي وتقتل مهما كان الشخص ايحبك بس صعبه عليه يتقبل موضوع زي هدا 💔💔💔😢😢
مسحت ادموعي بعد ماسرحت في قصتي وكيف تغيرت حياتي من يوم توفا بابا لعند اليوم قداش ما تحملت من هل الدينا شن مزال امخبيتلي 💔 زعما فرح ولا حزن 😔
حطيت وشاحي علي راسي وشفت وجهي ماكان عليه ولا نقطة مكياج مسحت ادموعي كانو اعيوني حمر استنيت لعند خف الحمار منهن ونزلت تحت قابلتني اسيل اضم في الصاله سلمت عليها
اسيل تضحك واتسلم عليا:صباحيه امباركه ياعروس وين نازله بكري.كان زدتي رقدتي 😂😂 حتي ولد خالتي نازل بدري ومشا لصلاه شن عندك قاعده ابروحك
انا:خزي ياحقيره
اسيل: ههههههه ترا انشوفكز
انا :ها
اسيل،،، ليش مش حاطه شي ع وجهك
انا،،، مانحباش وبعدين كيف بنقعد امع خوالي ومؤيد قاعدين احسن هكي
اسيل،،، ياهمي عروس انتي عادي مافيش حد امركز
انا خنقتني كلمه عروس 💔 علي طلعت اعميمه وروان وساره طلعو من المطبخ جو سلمو عليا وقعدو ايباركولي
خشو اسيل وساره عشان ايحطو الغداء الرجاله قريب ايجو
انا: انساعدكم في حاجه يا اعميمه
اعميمه: مش قتلك قولي امي
انا ابتسمت 😢: حاضر يامي
اعميمه ابتسمت:ايوا ديما نبي نسمعها
انا: حاضر
روان ساكته اشوفلي بحقد
انا: نمشي انساعد البنات
اعميمه: خلاص انتي تريحي البنات كملو قعدو ع الحط بس
انا:يعطيكم الصحه ان شاء الله
اعميمه،،، سلمك
انا: وين ايـه
اعميمه تنهدت بحزن: والله مريضه مش قادره ترفع راسها
انا: بسم الله كنها امس كان اكويسه
اعميمه: والله في اليل تعبت البنات قعدو امعاها
انا: لا حوله ولا قوة الا بالله خلي نمشي انشوفها
اعميمه: الله ايربحك بنتي شوفيها بالك تنزل امعاك تاكل حاجه
انا:حاضر
رقيت لدار ايه وخليتهم تحت

خشيت القيت الدار امظلمه فتحت الضي وهويت الدار وفتحت الروشن وجيت لعند راسها ولمست جبهتها مافيش حراره
انا: كنك ايـوتـه شن اتحسي مافيش حتي حراره اعميمه قالت مريضه
ايـه شهقت كانها اتراجي في حد يسالها انفجرت تبكي 💔😢
انـا: بسم الله اهدي شن صايرلك
ايـه 😭: تخلا يا رنو خطب غيري
انا: اهدي واحكيلي من خطب
ايـه 😭😭:احمد 😭💔💔 خطب، ،وتبكي انا الغبيه الي انراجي فيه شهر هو مختفي نحسابه صح مشغول وخايفه عليه هو ماشي يخطب وعايش حياته
انا انصدمت : خودي نفس واهدي واحكيلي شن صار بالتفصيل
ايـه قعدت تبكي وتتكلم وتشهق بين كل كلمه 💔💔😭😭😭 حكتلي كل شي صار امعاها
انا وجعتني كيف تبكي عليه 💔: و عسا ان تكرهوا شيئا و هو خير لكم و عسا ان تحبو شيئا و هو شر لكم ،،،، صدقيني مادم ربي بعده عنك اكيد فيها خيرا ليك وكل شي نصيب ربي ماكتبلكم نصيب بعدكم عن بعض في البدايه مايبيكم تتعلقو في بعض اكثر لانه كل واحد نصيبه غير
ايـه تبكي :بس انا حبيته يا رنو والله حبيته ليش صار امعانا هكي 😭😭😭
انا 💔: الله غالب حبيبتي ربي كاتبلكم الفراق توا ربي يبعتلك الي احسن منه وايعوضك فيه
ايـه 💔😭: مانبيش احسن منه نبيه هو بس 😭😭😭😭
انا حضنتها 💔: خلاص ساد قطعتي روحك ارحمي روحك خلاص بتعارضي حكمة ربي
ايـه هزت راسها وتبكي: لالا بس والله حرقني 😭😭😭ليش كذب عليا من البدايه ماقال امه تبي تخطبله ليش علقني فيه وخلاني انحبه ليش وهمني علي اساس ايحبني هو علي طول استسلم وباعني ليش ليش 😭😭😭 وربي حبيته صدقته هو قالي مستحيل اتكوني لغيري كيف توا يتصل ايقولي خطبت نااااار هنا 🔥🔥🔥اتاشر علي قلبها حرقني حرقني يا ريناد 😭😭😭😭😭
انا وجعتني ضميتها:خلاص حبيبتي والله هو مايستاهل ولا دمعه منك ياقلبي هو الخاسر سادك قتلتي روحك امك تحت خايفه عليك
ايه تبكي 😭😭: بنموت مش متخليه بقول حبيبتي لي وحده غيري وايلبس الدبله لغيري وحده غيري تلبسله الابيض وينزف لغيري 💔😭 كيف تبيني انعيش عادي هو خلاص نصيب وحده غيري وحده غيري بتاخد مكاني وبتاخد كل احلامنا الي احلمناها هو معاش قعد ليا يا ريناد مخنوقه بنموت وربي انحبه ليش دار فيا هكي 😭😭😭😭

انا قعدت نبكي امعاها وربي حالها ايبكي الحجر علي طول خطر عليا مسعود ومعامتله ليا بس حمدت ربي انه هو راجلي حتي لو زعلان مني ولا يكرهني المهم مش متزوج غيري ولا في حياته وحده غيري وربي حاسه بنارها 😭😭💔 تخيلت شن ايصير فيا لو مسعود خدا وحده غيري حالي بيقعد زي ايـه واكثر من هكي 💔💔😭😭
انا 😢😢😢 : خلاص ي عمري خليها علي ربي هو الي جمعكم صدفه وفرقكم ان شاء الله يجمعكم تاني
ايـه :💔 معاش فيه احمد خلاص صعب انردو لانه امه عطاته قلة السامح وبتغضب عليه لو ما خدا بنت خالته هو خلاص قال خطبت بنت خالتي يعني خلاص معاش فيها نحنا معاش فيها ايـه واحمد انتهت قصة حبنا انتهت احلامنا 💔😭😭
انا: وغلاوتي عندك اسكتي قطعتيلي قلبي 😢😢
ايـه: انا الي قلبي تقطع وانحرق يا رنو😭😭😭
انا 💔💔:ي عمري خلاص اسسس صوت الرجاله روحو اسكتي توا ايجي حد علينا
ايـه: 😭😭😭
انا 😢💔:خلاص امسحي ادموعك ياقلبي هيا ننزلو توا ايشكو في حاجه بعدك قاعده روان تحت من امبدري بتاكلني بعيونها هيا ننزلو حاولي تنسني اشوي عارفه صعب بس ماتخلي حد ايحس عليك وربي انا صاير فيا احرف منك ومايخطرش ع البال بس اهو نتعايش امع الحياه بعد نقعد ابروحي نبكي ويخطر عليا كل شي بس ما انبين لي الناس ضعفي الا لي الناس الي انحبهم مانخليش حد ايشوف ادموعي ديما انخلي الناس ايشوفوني قويه مهما صارلي بس بعد نقعد ابروحي نبكي مانقولك مانبكي كل الناس عندها اهموم اوجاع ماتشوفي شخص يضحك معناته سعيد بحياته وراء الضحكة هذي في الف دمعه وجرح كبير 💔💔 هي حبيبتي نوضي ماتخلي حد ايحس بيك
ايـه:رنوده شن صاير امعاك
انا 💔😢: خليها في القلب تجرح ولا تطلع برا وتفضح
ايـه مسحت ادموعها: حاسه وراك سر كبير قوليلي
انا سرحت في الماضي مسحت دمعتي😢💔: ايجي وقت المناسب وتعرفيه هيا خلينا ننزلو
ايـه: انزلي انتي انا مانبيش ننزل ماعنديش نيه انشوف حد
انا:عشان خاطري
ايـه: مانقدرش وربي انتي انزلي خليك جنب مسعود راه تاخده منك روان تتلصق عليه
انا:تاخد عينها الكلبه
ايـه: امال انزلي لي راجلك
انا:مانبيش انخليك ابروحك
ايـه:امشي ياقلبي اصلا نبي نقعد ابروحي
انا:يعني اتلزي فيا
ايـه :اي
انا:خري عليك حتي انا الي خايفه عليك باهي وصبيت
ايه:انبصر ياهمي انتي تنحطي ع الراس مش تنلزي يابخت خويا فيك
انا ضحكت: نجك ليا هذو الناس الي تفهم مش زي خوك البارد
مسعود فتح الباب وخش:خيرا خوها
ايـه خافت تحساب مسعود سمعنا انا شفتها كيف خايفه
انا:بارد
مسعود فنص فيا: من البارد
انا:انت بارد وغبي وماتفهمش
مسعود سكت ايشوفلي
ايـه ضحكت:خيركم ياعرسان
مسعود: وانتي خيرك قاتلي امي مريضه
ايـه:لا عادي غير تعبانه بس ماما امزودتها اشوي
مسعود:شن اتحسي باهي نرفعك لي المستشفي اشحي وجهك كيف اصفر
ايـه ابتسمت بمجامله ماتبيش مسعود يحس: انا اكويسه ارفع مرتك بس من قدام وجهي من انبدري انلز فيها هي شي ماتبيش اتحرك نبي نرقد ساد شحورتوني في عرسكم خلوني نريح
انا :خزي عليك انا خايفه عليك مانبيش تقعدي ابروحك بس ماتستاهلي الحق عليك خليت امي وجيتك
مسعود ابتسم علي الكلمه عارف تقصد امه
ايـه: هيا انتم بلا مطرود نبي نرقد حتي بعد زوجانكم لصقينا فيا
مسعود ضحك: هيا انتي اطلعي انخلوها ابروحها
انا: باهي انت التاني اتلز خليتها ليكم وطلعت 😂😂😂😂
مسعود:استغفرالله علي العظيم كنا في مجنونه وحده توا اتنين
ايـه: ربي ايعينك
مسعود: امين وطلع ورايا

ايـه بعد طلعنا من عندها فتحت تليفونها اتشوف في محادثاتها هي و احمد وتبكي 💔😭😭

نزلنا انا ومسعود تحت كانو كلهم موجودين علي الغداء
اعميمه: وينها
انا :قالت ماعندها نيه تعبانه اشوي
خالي محمد: كنها من الصبح ماشفتها
اعميمه:والله مريضه
خالي محمد:خلي انشوفها
مسعود:تريح ياباتي مافيها شي ارهاق تبي ترقد توا كنت عندها
انا :اي صح يا خالو
خالي محمد:: باهي ارفعولها تاكل
انا: اشوي تاني نرفعلها خليها ترقد
روان: دلع بس
انا 😒😒

تغدينا خشو البنات ايغسلو انا اعميمه حلفتلي ما اندير حاجه امعاهم خش خالي ايقيل ومسعود رقا لي شقتنا وخالي مشا لي بيته ومؤيد خش لي داره
رفعت الغداء لي ايـه القيتها راقده نزلت كسدت امع اعميمه انهدرزو وجو البنات جابو سفرة قهوة ونسكافي وحلويات قعدنا انهدرزو
روان : اسمعتي يا اخويله شن صار في جارتنا
اعميمه:منو
روان اتشوفلي : صح قتلك جيرانا الفتره الي فاتت حولو جو ناس تانين سكنو جنبنا
اعميمه:اي خيرهم
روان ابتسمت : هذا بنتهم طلع مغتصبها ولد مرت باتها
انا قلبي انقبض حسيتها اتكلم عليا 😨
اعميمه شهقت: بسم الله حسبي الله ونعم الوكيل فيه الكلب يا روحي عليها شن صار فيها شن دارو فيها هلها
روان ضحكت واتشوفلي: ياحنه ضحكت علي ولد خالها وكدبت عليه و تزواجاته
اعميمه: كيف تكذب عليه هلها مايعرفو ولا شن صار امعاها اكيد ولد خالها عرف
روان: ضحكت عليه لين يوم الدخول صدامته المسكين
اسيل: يانعليا شن صار فيه الولد
روان: مسكين شن بيصير فيه اكثر من هكي سكت وزمطها عشان مايبي يفضح بنت عمته وتنفضح العيله كلها
اعميمه: ربي يستر عليه دنيا واخرا وحسبي الله ونعم الوكيل فيه الكلب
روان: بس طلعت ماتستاهل ياريت فضحها
اعميمه:كنها
روان : هدا ياحنه طلعت علي علاقه بيه الي اغتصابها حتي بعد ما اتزوجت تطلع امعا من وراء راجلها
اعميمه: مرض ان شاءالله هدي تستحق الموت بنات اخر زمان فوق ما سترها تطلع وتلعب من وراء
ساره اتشوف لي روان بشك: اما وحده من جارتكم انا ماسمعت بيها بكل
روان تخزرطت ماعرفتش شن اتقول:جيرانا الي في الشارع الي ورانا بيتهم ايجي خلف بيتنا ماتعرفيهم لانهم لا يطلعو ولا ايخشو
ساره:اها
اعميمه:باهي خلي البنت اتكمل
انا ساكته مصدومه نسمع فيهم وشكيت انه روان تعرف بس من حكالها حتي مسعود نبهه عليا مانحكيش كيف عرفت
روان:خلاص راجلها بعد عرفها تكدب مشا خطب من خالته وعرسهم شهرالجاي مابش ايطلقها منعها من الطلعه والخشه وناز فيها ضرب ليل نهار مايقدرش حد يفتح فمه ولا ايكلمه بكلمه واسبوع الي فات هربت امعا نفس الولد الي اغتصبها
اعميمه حطت يدها علي قلبها: عطها ما ينزعها هل الفانص تستحق قطع رقبه تي هدي موتها احسن من عيشتها
انا حسيت فيها انه القصه ومختلفه نهايتها بس كان روان اتلمح علي حاجه مافهماش
اسيل:اي ربي يبعدهم عنا الناس الي هكي ووووه عليا الدينا بدت اتخوف بكل
اعميمه:اي والله ناس معاش تحشمت علي وجهم
روان قعدت اترقص في حواجبها ليا ما افهمتها
روان: شن تبي من بنت ماعندها لا بو ولا خو ايلمها اكيد بيطلع منها اكثر من هكي
اعميمه:خلاص حسه قلبي انغم منها غير سيرتها
اسيل:انا بنشوف به
انا صبيت امعاها: حتي انا بنرقا لي الشقه انشوف مسعود مرات يبي حاجه وانغير وننزل
اعميمه:اربحي يابنتي اكيد راجلك يبيك
انا:تمام مش حا انطول
اعميمه:خودي راحتك حبيبتي
انا طلعت من جنبهم خليتهم ايهدرزو
ورقيت من الدروج وعقلي امشوش شن قصة البنت الي حكت عليها روان بس هي تشبه قصتي 💔💔 بس انا مستحيل انخون مسعود ولا انبدله بحد زعما ايصير فيا زي البنت هذي بس ليش روان تتكلم واتشوفلي وتضحك 😢😢 اكيد عارفه حاجه بالك مرت بابا حكتلهم زعما ايديرها مسعود وياخد غيري 💔💔 فتحت الباب الشقه تنهدت بحزن وقلبي مهموم تعبانه والله اتعبت خلاص معاش نقدر نتحمل اكثر من هكي خشيت لي الدار القيت مسعود راقد. فتحت الباب طلعت توته حوش طويله غيرت لانه القفطان ضايقني

مسعود بحركتي في الدار بس خلا روحه عادي كانه راقد

انا لبست وخنقتني العبره 😢قعدت انشوف في مسعود كيف راقد. خشت جنبه ولفيت ايديا عليه وخشيت في حضنه نبكي من غير صوت تمنيت ايلف ايده ويحضني وايقولي انا امعاك ماتخافيش قعدت نبكي وشاده عبرتي مانبيش اينوض

مسعود انصدم حس بشعور غريب بعد خشيت في حضنه حس بيا نكبي وموجوعه كان خاطره ايلف ايديه ويحضني بس في حاجه من داخله اتقوله لا في نفس الوقت مايقدرش يبعد عني لانه حتي هو كان محتاج الحضن هدا مرت ساعه كامله هو فايق ويسمع فيها تبكي بس مش قادر ايدير شي لعند حس بيها ارتخت وردت تنفسها طبيعي عكس امبدري تبكي وحابسه نفسها فتح اعيونه لقاها راقده ودمعتها علي خدها رفع يده مسحها وتنهد بحزن وعقله وقلبه امشوش هو عارفها مظلومه بس لي امتى بيستمر عقابه ليها باس راسها ولف ايديه عليها وخششها في حضنه وحط حنكه علي راسها وايفكر لعند رقد حتي هو ❤️❤️

عند جلال فاق القي روحه في المستشفى
سالمه:من دار فيك هكي
جلال حط ايده علي صدره بوجع:كيف اوصلت هنا
سالمه:في واحد جابك هنا ومشا
جلال بوجع: اااه
سالمه:اتحس بحاجه انكلم الدكتور
جلال هزر راسه :لالا شن صارلي
سالمه تبكي: كسر ايديهم ان شاء الله من دار فيك هكي
جلال بحقد: مانعرفش شاف رجله امجبسه
جلال:شن صارلي
سالمه 😢: عندك كسر في خشمك وكسر في قفص الصدر ولا الظلوع شن ايقولوله هدا والكبد تضررت قال الدكتور هكي عشان مضروب واجد عليها وايدك مكسوره وكسر جنب الحوض و رجلك فيها تشعرينه واصباع يدك اليسار مسكورات كلهن ايكسر اعظامه كيف ما كسراك وهذا غير جسمك متشوه
جلال تنهد بوجع وحقد ومش ناوي علي خير:بسيطه يحساب روحه راجل اي صح كيف عرفتي انا هنا
سالمه:كلموني الشرطه لانه بعد اختفيت بيومين بلغت الشرطه عليك وعطيتهم موصفاتك وصورتك قعدو ايدور عليك لعند لقوك خبروني
جلال:اها باتي ما اتصل ولا دورني
سالمه بحقد: هو انت قاعد قدام اعيونه ما ايدور فيك هايم في المكلوبه مرته وعويله اتصلت بيه ولا كانه ولده مفقود قال توا يرجع اكيد غاطس في تركينه امعا شلة الفاسد
جلال:توا هدا اب
سالمه:حق صاحب الشقه قال انت ماك دافعله عربون قال عندك اسبوع اتخلصوني ولا تطلعو من الشقه وانا ماعرفت كيف اندير انت تعرف طلعنا من هل العز الي فيه حتي دينار ماعندي والي عندي عطيته ليك
جلال:كان بعتي من اذهبك
سالمه:انبيع عينك
جلال: ساهله غير نطلع من هنا بس
سالمه:الدكتور قال تسبوعين بتقعد هنا مرات حتي شهر مانعرفش
جلال:عليك قصه المهم انتي حاولي تصرفي وادفعيله لعند نطلع انا
سالمه لوت زومتها:باهي
دق الباب وخش طارق وامع واحد من الشرطه
طارق:السلام عليكم الحمدلله ع السلامه
سالمه:عليكم السلام
جلال:الله ايسلمك
طارق:انا الضابط طارق $$$ جيت بناخد اقوالك ومن دار فيك هكي
جلال خاف يدكر في كلام حسن قبل لا ايفكه وتاكد بعد سمع اسم طارق وشافه وتهديد حسن
جلال: مانعرفهم ناس تعركت امعاهم
طارق 😏: تقدر توصفهم ليا ولا تعرف اسمائهم
جلال توتر : مانعرفش كاني سمع واحد ايقوله خليل والتاني عبد السلام وامعاهم واحد مصري مانعرفش اوجهم لانه كنت في دار ظلام
طارق بخبث: بس امك قالت اختفيت امع الساعه 2 الظهر كيف ماشفت اوجوهم
جلال بخوف: لالا طلعت قعدت ندهور في اليل تالقيت امعاهم ماشفت اوجوهم
طارق في خاطره حسن الكلب بي شنو امهدده لعند خايف هكي.
طارق:نفهم انك ماتعرفهم
جلال:اي لاني ليا كم يوم بس جيت لبنغازي مانعرفش حد فيها
طارق: تمام مره تانيه انتبه لي روحك
وزاد يستجوب فيه هو يكدب 😂😂😂

طلع طارق من عنده هو بيموت ضحك عليه.

اما جلال قاعد في حاله بس مش ناوي علي خير بكل

سيف: يعني توا امروح
احمد:اي
سيف:شن بدير
احمد: انشوف امي انحاول نقنعها قبل ما ايفوت الوقت. مش قادر انشوفها تتوجع وانا حاس ب النار الي داخلها حاس بوجعها عرف روحي جرحتها وكسرتها بس نبي انحاول لي اخر مره عشانها هي
سيف: بس امك خلاص خطبتلك بنت خالتك
احمد: خطبتلي مزال عندي وقت
سيف: دير رايك بس معروف مش حا يتغير شي وانت تعرف امك
احمد ايلم في دبشه الي حايس في الدار: بالله خطاني ياراجل انت كل شي امسكره في وجهي قتلك بنحاول انا كنك اتحطم فيا
سيف: الحق فيا ننصحك فيك وامخلي هي وقاعد امعاك
احمد:اوووووف بديت في السطوانه امتاعك تربح امك اعتقني يا راجل مليت مخنوق نبي اندير اي حاجه علي اقل اسمائي دافعت عن حبي
سيف فاته وفتح شنطته ايلم في دبشه: ها سكتت انشوفو نهايتها امعاك اتعبت في جرتك
احمد: ان شاء الله نهايتها زي مانبي انا
سيف ااضايق وقعد يرسم في خطه في باله.

امع المغرب روحو روان وساره بس اسيل قعدت امع ايه

عندي انا فقت القيت روحي في حضن مسعود ابتسمت وقعدت انشوفله كيف راقد وشعره نازل علي وجه مديت ايدي ورفعت اشعره وقعدت نلعب بيه 😍😍😍 نزلت ايدي علي وجه ونلمس في لحيته ورفعت صبعي ممرت علي شفايفه وسرحانه في سبحان الله قداش انحبه فجاء فتح اعيونه انخلعت

مسعود كان فايق قبل لا انفيق بس ماحب يتحرك للنه مستمتع وحاس براحه وايشوفلي حسيت بيها تتحرك غمضت اعيوني حسيت بيها بعد رفعت اشعري وملمس ايديها كيف ناعم بعد حطت ايدها علي لحيتي معاش تحمل ركبت عليا الحراره حسيها ناويه علي حاجه تانيه انا مش مسعد ليها ومش وقتها لاني ماسك روحي عليها غصبن عني فتحت اعيوني القيتها اتشوفلي واخدودها احمرو وكيف تحشمت وطبس راسها كان خاطري ناكل هل الخدود الي زادو جمالها كل يوم اتزيد تحلا اكثر من يوم الي قبلها ولا اعيونها بعد انشوفهم عقلي وقلبي ينشل مانقدرش اعيوني انشيلهم منها شن هل مخلوقه ربي خلقها عشان اتجنني انا بحركاتها وعفويتها
مسعود :شن اديري
انا تحشمت نزلت اعيوني ونزلت ايدي :شي
وجيت بنصبي بس مسكني مسعود
مسعود بمكر:شن رقدك جنبي
انا سكتت ماقدرتش نتكلم
مسعود بخبث:انا خليتك تحت عند هلي شن جابك ليا وليش قريبا مني هكي شن قلت انا
انا تخزرطت ماعرفت نتكلم : اءءءءءه مانعرفش
مسعود طيحني عليه ودخل ايده في اشعري: كيف ماتعرفيش وانتي الي جيتي رقدتي عندي
انا حسيت قلبي وقف من قربه ليا وكيف ايشوفلي اعيونه فيهم لمعه 😍: اءءء كنت مضايقه اشوي اسفه كان حضنتك
مسعود ايشوف لي اعيوني 😍: ومن ضايقك
انا علي طول دمعو اعيوني : روان 😢
مسعود تعصب قعمز: خيرها شن دارت
انا خفت :شي تعزق في الدوه زي قبل
مسعود فنص فيا: احكي يا ريناد احسنلك رد بالك تكدبي عليا
انا تنهدت بحزن :وحكيتله كل شي وحركات روان وكل حاجه
انا: حسيتها تعرف من حركاتها وكيف اتكلم
مسعود: من وين بتعرف هي
انا:وربي بننجن كيف المشكله مافيش حد يعرف غيرك انت وخالي
مسعود شافلي بشك: شن عرفك انه باتي يعرف
انا خفت: يوم الي جلال جا
مسعود تعصب واعيونه تطلع منهم الشراره مسك ايدي وضغط عليها بالقوه: اسمه معاش تدكريه قدامي وربي نقتلك 😡😡😡🤬🤬🤬
انا خفت 😨😨😮
مسعود متعصب: وخيرا الكلب كملي
انا بخوف 😢😢:هو قال خالك يعرف وخبرته
مسعود 😡😡: شن قال تاني
انا 😨😢: وربي الي قاله ليا قلته ليك يومها
مسعود 😡:ريناد رد بالك تكدبي عليا مره تاني ولا ايصير امعاك حاجه وما اتخبريني والله تم الله ماني راحمك مره تانيه
انا هزيت راسي نبكي : حاضر
مسعود طلق ايدي وناض خش الحمام وعقله امشوش في كلام روان شن قصدها

انا انهرت تبكي كانه ادموعي علي سبله بس في حاجه امفرحتني انه مسعود حسيته كانه متغير فيه حاجه غير علي طول ابتسمت بعد ادكرت روحي كنت راقده في حضنه نسيت كل شي 😍❤️

مر باقي اليوم عادي مافيش اي احداث. اليل نزلنا تحت تعشينا وهدرزت امع اسيل وايـه اشوي حاولنا انطلعوها من جو الكابه اشوي امع الساعه 11 روحت لي الشقه اول ما خشيت حسيت بحاجه خنقتني قلبي مغموم ماعرفتش ليش خشيت وسكرت الباب سلحت الوشاح حاسه النفس انقطع خشيت لي الدار كان مسعود مش قاعد خليته تحت امع مؤيد وخالي علي ايهدرزو خشيت الحمام خديت دوش ولبست قفطان بيتي تحت من الركبه. طلعت دهنت جسمي جففت اشعري وطحت علي السرير رقدت كنت حاسه بحاجه خانقتني ومضايقه وااااجد برغم توا كنت تحت عادي وفرحانه 💔 '" بس مسرع ما الفرحه اتم ديما فرحتي مش كامله"

مسعود كنت انهدرز امع خالي ومؤيد استاذن منهم وركبت لي شقتي كنت امرايفلها قبل ساعات بس كانت في حضني بس مانشبعش منها لو تقعد طول عمرها في حضني ملكت قلبي شن دارتله مش قادر انعاقبها ولا نقسا امعاها حاولت انقسي قلبي عليها افشلت ماقدرتش انعاقب طفلتي قلبي عشقها وحبها تسللت في قلبي وملكاته باسمها مش قادر نبعد عنها بس هي غلطت وكذبت عليا انا من اول ما جبتها هنا حسيت صاير امعاها حاجه غير موت بوها قربت منها وقفت جنبها وسالتها بس حكتلي قصه تانيه بس كنت شاك القصه ناقصه مش كامله وقت حكتلي صن صار امعاها وكيف اغتصبها الواطي تمنيت متت قبل ما نسمع الكلام منها احتقرت روحي اني جيت في وقت متاخر ماقدرتش اندافع عنها ادكرت كلمتها بعد لقيتها في الجنان تبكي قالتلي ياريت كنت نعرفك قبل يومين من هروبي قبل نعرفك ولد خالي لكان حالي احسن اليوم. انا عارف انها مظلومه بس انها كذبت عليا وما حكتلي وقت سألتها هذي جننتي ماخلتش فيا عقل فوق قصتها الي دبحتني دبح وشن دار فيها الحقير وكيف دمر حياة طفلتي كنت كل يوم نازل فيه ضرب وعذبته بس مزال مافشت فيه غلي يوم الي جيت بنقتله خلاص معاش متحمل انشوف طفلتي وهي بعيده عني بسببه بس ما القيته وعرفت صاحبي هربه بس كنت امخطط وراسم حاجه فبالي بننهي حياته كلها ايجي وقت مناسب بس بناخد حق ريناد كامل منه انخليه يندم علي الساعه الي قرب منها
فتحت الباب الشقه خشيت قعدت اندور فيها بعيوني لفيت في الشقه كامله فتحت باب الدار القيتها راقده.
ابتسمت وخشيت جنبها رقدت لاني كنت تاعب ليا ايام مرقدتش اكويس

.
.
.
.
.
.
.
.
.

روان: شن صار كلمتي المره
تهاني:اي قالت توا يبدا مفعوله
روان ابتسمت: يعني خلاص بنتخلص منها ريناد ضروري يطلقو هي مسعود
تهاني: حكيتي الي قتلك عليه
روان:اي شفتها كيف خافت وشكت انه انا نعرف شي
تهاني: اي اكويس اهم شي اتشك في مسعود وهكي ايصير الي نبوه وتكتر مشاكلهم وانتي خليك ديما ماشيه لبيت خالتك
روان: اي كان تسعمي الكلبه حتي هي وراها افلوس اكثر من عيت خالتي الي تملكم مال قارون الكلبه توا بدا باسم مسعود وهدي نقطه في صالحنا احني 😍😍 يعني عصفورين بحجر واحد وريناد تطلع منها هكي
تهاني: اي هههههه مساكين راحو فيها سالمه مرت بوها ولدها خططو في الاخير طاحت علي روسهم
روان ابتسمت بخبث: تعرفيهم يا ماما
تهاني: كنت نسمع علي سالمه من مبروكه مره مره يتلكمو عليها شن تبيهم
روان تضحك: خطرت علي بالي خطه جهانميه ياماما
تهاني:شنو
روان ابتسمت بخبث وقعدت تحكيلهها

.
.
.
.
.
.
.
.

روح احمد لبيتهم فتح الباب وكان عنده نسخه وخش داخل وانصدم يسمع في صوت اعياط خش يجري

.
.
.
.
.

تاني يوم الصبح

اسيل نزلت تجري تحت وتبكي 😭😭😭

.
.
.
.
.
.
.

فتحت اعيوني وكان راسي تقيل ويوجع فيا نشبح في مسعود يلبس بسرعه وطالع يجري
انا لحقته : بسم الله كنك تجري شن صاير
مسعود: ............

.
.
.
.
.
.

جلال:،،،،،،،،،،

.
.
.
.
.
.
انا 😨

يتبع ..

لقراءة الحلقة الرابعة عشر : اضغط هنا 

لا تنسى كتابة تعليق كي يصلك اشعار بالحلقات الجديدة من الرواية.

reaction:

تعليقات