رواية حمل مرعب الحلقة الخامسة 5 بقلم مصطفى مجدي
 |
| رواية حمل مرعب الحلقة الخامسة 5 بقلم مصطفى مجدي |
رواية حمل مرعب الجزء الخامس
لما بطنى وجعتنى ودخلت الحمام علشان ارجع لقيت لون الترجيع بتاعى اسود وفيه حاجات بتتحرك ، اتخضيت جدا من اللى شوفته ووقفت مكانى وقعدت ادقق اوى ايه الحاجات اللى بتتحرك دى ، لقيتها حاجة عاملة زى ماتكون ايد صغيرة لكن مش لبنى ادم ، نور الحمام اطفى مرة واحدة ، التفت فجأة علشان ادور على زرار النور لقيت الحمام كله اتملى شعر ومبقتش اعرف اخطى خطوة قدام ، ولمحت صوت لحركة فى الحمام لكن معرفتش احدد مصدر الصوت ده ايه .
بعد ثوانى قليلة حسيت بحد بيمسكنى من رجلى وانا واقفة ، اتلفت لقيت طفل صغير مشوه سنانه طالعة لبره ، وعنده ديل ورجله رجلين حصان وعينيه لونها احمر غريب ووشه مكرمش جدًا قاعد على قعدة الحمام .
حطيت ايدى على وشى وقعدت اصوت لقيت ماركوس قدامى خبط على ضهرى ومسكنى من ايدى وانا عمالة اصوت ودخلنى الاوضة بتاعتى وقالى:
= انا عارف انك بتمرى بمرحلة صعبة بس انا عايز اقولك ان انتى بتعملى دور مهم ورئيسي فى تغيير حياتنا بالكامل ، انتى دلوقتى مجهزة لكل شئ لكن ناقصك حاجة واحدة بس ، ان يكون عندك القناعة والاستعداد للى جاى وتكونى حباه كمان علشان كل شئ يعدى كويس
.. حاجات ايه وقناعة ايه ؟ انا مش فاهمة حاجة
= انتى دلوقتى حامل
.. حامل ازاى ومن مين ؟!
= السائل الاسود اللى انتى شربتيه من البنت عباره عن حيوانات منوية من العالم السفلى ، يعنى انتى حامل لكن مش من بنى ادم زينا.
سرحت شوية وانا بحاول افهم كلامه وافهم كمان كل اللى بيحصلى ، لكن كمل كلامه وقالى:
= متحاوليش تتعبى نفسك بالتفكير دلوقتى ، كل حاجة هتعرفيها فى وقتها ، لكن باختصار علشان افهمك الفكرة العامة ، ان اغلب الناس بيحضروا الجان من العالم السفلى علشان يحققلهم حاجة من اللى هما عايزينها وكمان بيتحملو نتيجة غلطهم فى اى حاجة بيعملوها ضد العالم ده ، لكن مابالك بقى ان يكون عندك ابن من العالم السفلى ، هيحققلك اد ايه؟ وكمان ازاى هيغفرلك ويسامحك علشان انتى امه ، وعلشان انا ابوه.
.. ابوه ازاى ؟
= الحيوانات المنوية دى كانت عبارة عن خليط من حيوناتى المنوية وحيوانات منوية من العالم السفلى ، وعلشان كده احنا هنعمل اختراع وحدث تاريخى فى تاريخ العالم كله ، اول حمل من العالم السفلى فى التاريخ ، حمل مُرعب.
خرج من الاوضة بتاعتى وحسيت ان نفسي بدأ يرجع طبيعى تانى لكن حسيت بدوخة خفيفة ، اترميت على السرير علشان جسمي يرتاح وكمان كنت محتاجة انى افكر فى الكلام بتاعه واحاول افهم ابعاده ايه .
وبعد تفكير كبير حسيت من جوايا اني ممكن فعلا اقوم بالدور ده ، وبدأت احلم بالطفل اللى من العالم السفلي ده ممكن يحققلي ايه لما يطلع للنور ، وازاى هقدر اعمل اى حاجة انا عايزاها فى اى وقت بسبب وجوده .
نمت شوية وبعدها حسيت بحركة جوه بطنى والم شديد ، صحيت من النوم وعليت صوتى وقولت:
= نام بقى انا بطنى وجعتنى ولما اصحى ابقى العب براحتك
الغريب واللى مكنتش متوقعاه ان الحركة اللى جوه بطنى تهدى تمامًا وكأنه فهم انا بقوله ايه وسكت والالم كمان راح ، الموضوع كان غريب بالنسبالى وكان غير متوقع ليا خاصة فى الوقت ده ، نمت فعلا وصحيت ومرضتش اقول لماركوس على اللى حصل وحسيت انى محتاجة اخبي شوية حاجات علشان لو حد هيكون مسيطر اكتر على الطفل ، فاعتقد ان ده من حقى انا .
لكن الفضول خلانى عايزة اجرب انه سمع كلامى ده صدفة ولا فعلا الموضوع حقيقي ، بعد ماصحيت بشوية ، رفعت هدومى وحطيت ايدى على بطنى وقولت بصوت عالى :
= يلا العب شوية
اول ماقولت الكلمة حسيت فعلا بحركة بدأت فى بطنى والم بسيط وكأنه سامعنى وشايفنى .....
يجب وضع تعليق على هذا المقال، ليصلك اشعار بالحلقات الجديدة من الرواية.