القائمة الرئيسية

الصفحات

رواية الضربة القاضية الفصل الأول 1 كامل

 رواية الضربة القاضية الفصل الأول 1 كامل

رواية الضربة القاضية الفصل الأول 1 كامل


رواية الضربة القاضية الجزء الأول


الضربة القاضية 😍😍


الحجة اتصلت بيا الساعة 2 الضهر

- انت خلاص من ساعة ما قعدت فى حلوان و انا مش عارفة اتلم عليك 😏

- ‏ليه بس يا حجة دا انتى تؤمرى أمر و الله 😍

- ‏طب قوم البس و تعالى عاوزاك دلوقت

- ‏دلوقت 🙄 حاضر يا حجة مسافة الطريق و هكون عندك 


لا سألتها في إيه و لا اترددت اصلا انى اقوم اروحلها مش ناقصين تهب منها تيجى تمرمطنى فى حلوان 😂

دا انا كدة و هى راضية عنى 🤣🤣🤣

ما بالكوا لو غضبت عليا 🤣 🤣🤣🤣

لبست و اتحركت ركبت توكتوك لحد العبَّارة و ركبت العبَّارة من المعصرة هتعدى للحوامدية و من هناك اركب عربية للبلد

 و انا فى العبَّارة لمحت بنت كدة فى حدود ٢٣ سنة بتتكلم فى التليفون و بتعيط

 ‏و أخوكم مبيستحملش بصراحة الموضوع بتاع العياط ده

 ‏بس بردو مينفعش الواحد يحشر نفسه كدة منعا للإحراج ولو ردت عليا رد وحش و الا غلطت فيا هيبقى شكلى زى اللى حط وشه فى مروحة الشفاط 🤣


المهم العبَّارة اتحركت و تقريبا هى بتاخد ١٠ دقايق لحد ما توصل البر التانى

و كانوا اصعب ١٠ دقايق عدوا على قلبى 💔

البنت اللى زى القمر دى مبطلتش عياط و دموعها كانت بتقطع فى قلبى و مش عارف اعمل ايه 🥺🥺

وقفت العبَّارة و بدأنا ننزل و انا مش عارف ازاى هنزل و اسيبها لكن ما باليد حيلة🥺

نزلت و ركبت توكتوك للمجلس 

التوكتوك بيركب بالنفر النفر ب ٣ جنيه

أنا ركبت و قولتله اطلع يا اسطى و انا هحاسبك على الباقى

السواق ركب و لسة بيدور المكنة

و تيجى البنت اللى كانت بتعيط دى تسأله مجلس يا اسطى ؟

قالها لأ و الله الاستاذ طالع مخصوص 😕

قولتله مخصوص ايه يا عم اتفضلى اتفضلى 😍😍

سواق التوكتوك بصلى قولتله يا عم خلى عندك نظر 😏


و ركبت البنت جنبى و بقينا لوحدنا فى التوكتوك بس مشوار المجلس ده ٥ دقايق بالظبط 

فا يا إما أبقى شجاع و اتكلم بسرعة يا إما الفرصة دى لو ضاعت مش هتتعوض تانى ابدا 😯😯😯


- ممكن أسأل حضرتك سؤال و أنا آسف جدا على التدخل

- ‏اتفضل 😔

- ‏هو انتى ليه طول الطريق بتعيطى خير اقدر اساعدك فى اى حاجة ☺️

- ‏كتر خيرك متشكرة جدا 😔

- ‏الناس لبعضيها و انا و الله ما اقصد أتدخل انا بس بحاول لو فيه فى ايدى حاجة اساعدك مش هتأخر و الله

- ‏لا متشكرة جدا 😔

حسيت انها مش عاوزة تتكلم و لو ألحيت اكتر من كدة هبقى بايخ بصراحة جدا فسكت

التوكتوك قرب يوصل و انا هتجنن و مش عارف اعمل ايه

روحت مطلع ورقة و قلم من شنطتى و كتبت رقمي و أسمى

و قولتلهاط

- طيب بصى دا رقمى لو احتاجتى اى حاجة بس كلمينى و جربى مش هتخسرى حاجة

هتلاقينى معاكى فى اى وقت ☺️☺️

أخدت الورقة بمنتهى البساطة و حطتها فى شنطتها و شكرتنى مرة تانية

و التوكتوك وقف فى محطة المجلس و نزلنا دفعت ١٠ جنيه للسواق و قولتلها خلاص بقى دى حاجة بسيطة 

و بسرعة عديت الناحية التانية من الطريق 

و لأجل الحظ عربية البلد واقفة و ركبت و انا باصص عليها

العربية اتحركت و واحدة واحدة غابت عن عينى و انتهت القصة كدة بالنسبالى 

و دفعت الأجرة للسواق بتاع العربية و المشوار من الحوامدية لحد البلد ساعة بالظبط

فقررت انى انام شوية لحد ما نوصل حطيت الهاند فرى فى ودانى و شغلت ام كلثوم فات المعاد و غمضت عنيا و شوية و روحت فى النوووووووم 😴😴😴


وصلت البلد بالسلامة و دخلت على الحجة بالظبط بعد ساعة و نص من مكالمتها

اسرع دليڤرى فى مصر 🤣🤣

- إتأخرت كدة ليه يا بركات بيه

- ‏يا حجة اتأخرت إيه دا انتى لسة قافلة معايا 🤣

- ‏دا انا مكلماك م العصر 🙄

- ‏عصر 😯 طب بسيطة التليفون اهو و نشوف وقت المكالمة


بطلع التليفون من جيبى لقيته بيرن 😳

ورقم غريب 🙄

- ألوووو

- ‏ألوووو أستاذ بركات

- ‏أيوة اتفضلى مين معايا 🤔

- ‏أنا فاتن اللى شوفتنى فى العبارة و ادتنى الرقم و قولتلى لو ......

- ‏ايوة أيوة ازيك تحت امرك اتفضلى

طبعا لو قولتلكم انى نسيت اصلا انى واقف قدام الحجة مش هتصدقونى 🤣🤣🤣

- بص يا استاذ بركات انا فعلا محتجالك فى حاجة مهمة

- ‏تؤمرينى و الله 😍😍

- ‏انا عاوزة مكان ابات فيه لحد الصبح 🙄


و هنا مش لازم اوصفلكم وشى لونه بقى إزاى و عدد دقات قلبى بقت كام دقة أكيد انتوا مستوعبين

رديت عليها بدون تركيز و لا تفكير و لا أى حاجة

- إنتى فين دلوقت طيب

- ‏أنا فى نفس المكان اللى سيبتنى فيه

- ‏طيب اركبى عربية من مكان انا ما ركبت 

- ‏هروح فين ؟

- ‏هتنزلى عندنا البلد و هتباتى مع امى 🙄

- ‏خلاص ماشى هركب و اتابعك بالتليفون 😔


فاتن قفلت من هنا و انا فوقت من هنا 😂

الحجة بتبصلى بصة لازم يتعمل عليها دراسة 😂😂

اللى متابع فيكم قناة ناشونال چيوجرافك فى برنامج اسمه وحوش البرية 🤣🤣🤣🤣

امى فى المراحل دى بتاخد شكل الديناصور اللى بيبخ نار ده

و انا جسمى بيتنفض طبيعى 😂😂

- مين صاحبة الصون و العفاف المتربية اللى هتسيب أهلها و تيجى تبات معانا دى يا بركات بيه ؟ 😏

- ‏بصى يا حجة دى بت غلبانة خالص و شكلها ياعينى ملهاش حد و....

- ‏انت بقى عرفت منين انها غلبانة و مكسورة الجناح و ملهاش حد و بتبيع سبح فى الحسين 🤔


- ‏طب اسمع كلامى المرادى و شوفى يا حجة 😚

- ‏سمعت الرعد فى ودانك انت جايبلى مصيبة وجى يا بوز الغراب انت

اتصل يا واد بيها رجعها احسن و رحمة ستك لو جت لامرمطها هنا 😡

- البت ركبت خلاص يا امى و مهما كان دى غلبانة و بصى يا ستى لو شوفتيها و مرتحتيش همشيها

بس بالله عليكى ما تكسرى بخاطرها


فى النهاية الحجة سكتت لكن مقتنعتش و دا مكانش مهم بالنسبالى المهم أن فاتن جاية و هتبات عندنا 😂😂

ملحقتش افرح و لقيتها بتقولى طيب بقولك ايه اتصلى على مراتك 😳😳😳

- مراتى ؟ مراتى ازاى يعنى يا حجة معلش 🙄

- ‏زى الناس يا روح الحجة و الا انت خايف مراتك تعرف

- ‏يا حبيبة قلبى انتى عاوزة تجيبى جيلك العظيم ده لجيل مراتى المتخلفات دول 😍

- انت عندك حق أنهم متخلفات بس بردو لازم اقولها 🤗


من هنا لهنا أجلنا حوار مراتى ده لكن متلغاش انما هنستنى شوية و هى مش هتاخد اى رد فعل الا لما تشوف فاتن

البت زى حتة الجاتووو و انا عارف انها هتصعب على الحجة و هتبيتها معاها 😍😍


عدت ساعة صعبة جدا عليا بعدها بالثانية لحد ما فاتن اتصلت و قالت انها وصلت 

بعتلها توكتوك بتاع واحد جارنا جابها لحد البيت 😍😍

و اخيرا فاتن فى بيتنا 

راجعت بسرعة القصة من اول ما شوفتها فى العبارة لا يمكن كنت اتخيل أبدا أن القصة تنتهى بإنها تبات معانا فى البيت و فين عند الحجة 🤣🤣🤣

أول ما الحجة شافتها طبعا فصصتها من فوق لتحت بنظرة واحدة لكن عادى مش مشكلة

سلمت عليها و طبطبت على ضهرها و قالتلها نورتى البيت يا حبيبتى 😍😍

و فجأة بدون أى مقدمات 

- خلاص يا بركات يا حبيبى اتوكل انت على الله روح بات مع مراتك و انا هفضى أوضة لفاتن تنام فيها و الصبح هتصل بيك تيجى 🤣

- ‏اروح فين يا حجة ؟ انا اصلا لسة معرفش حضرتك كنتى عوزانى ليه

- ‏لا خلاص يا حبيبى كنت عاوزة اشوفك و اطمن عليك بس اتوكل بقى على الله عشان متتأخرش 

- ‏يا حجة انا لسة ....

- ‏ما خلاص اتوكل على الله روح يا بركات لمراتك 😡


كان لازم امشى مفيش أمل 

بس كانت ضاربة قاضية من الحجة صراحة و غير متوقعة

مشيت من عند الحجة و انا مش مستوعب ازاى جالها قلب تعمل فيا كدة 🤣🤣🤣

و قصة فاتن اللى انا مش فاهم عنها اى حاجة دى 

و يا ترى ايه قصتها اصلا و يا ترى الحجة هتعمل فيها ايه

قولت اتصل بفاتن و انا فى الطريق لقيت تليفونها مقفول 

هى الحجة كلتها و الا ايه 🤣

وصلت عند مراتى لقيت ضربة تانية تحت الحزام 🥺

أول ما دخلت لقيت مراتى بتقولى

- مين فاتن اللى عند امك دى يا روح امك 😡😡😡


هنكمل بكرة بقى 😍😍😍


reaction:

تعليقات