رواية ادوار وهمية الفصل التاسع عشر 19 بقلم بنوتة الشيخ

        

 رواية ادوار وهمية الجزء التاسع عشر



رواية ادوار وهمية البارت 19 الحلقة السابعة عشر

#أدوار_وهميه 19والاخيره (الجزء الاول)
فاطمه؛عائشه امتى بتروح ؟
انور؛ممكن بكرا
فاطمه؛ابتسمت وعيونها يطيحو ....اي احسن
انور:خيرك؟
فاطمه:خدت نفس ...انور اسفه
انور:بملامح مش فاهمه...على شنو!؟
فاطمه:حسيت نفسي خديتك الايام هاذي من عائشه
انور:لا مش صح اغلب وقتي معاها في المشفى ومهتم بيها
انا نحاول نهتم بيك الاثنين ونعدل بينكم
فاطمه:مسحت دمعتها....نفسيتي صارت احسن وزدت تقربت من ربي وهاذا بفضلك وفضلها
مشكورين بس خلاص
انور:كيف خلاص ؟
فاطمه:انور
انور:نعم!
فاطمه:يتهيألي جي الوقت يلي نطلب فيه الطلاق
انور:سكت وهوا يشوفلها مش عارف شنو يرد
فاطمه:هكي الاتفاق نرجع نوقف ع رجليا وتردني حوش اهلي صح !؟
انور:بدون مقدمات ....قيس ضايقك في شي !!؟
فاطمه:بردت فعل سريعه.....لا حشااه
يشهد عليا ربي يتعامل معاي عادي زي هوا زي مرته
انور:امالا علاش !؟
علاش طلبتي الطلاق اليوم هكي تحديدا؟
فاطمه:لان خلاص انور تم الاتفاق ولقيت نفسي قادره على الطلاق توا
انور:مستحيل ....في شي وانا متأكد نفسيتك الايام هاذي وهدرزتك معاي متنطبقش على كلامك توا انا م عيل متفوتيشي عليا
فاطمه:حشاك بس هاذا الواقع
انور:بطللللي البرود يلي عندك فاطمه انا نحكي في شي وانتي تقوليلي هاذا الواقع؟
فاطمه:ابتسمت بهدوء.....انور بكرا راجعه بيت اهلي الصبح
اول ما نوصل غادي تقدر ترمي عليا الطلاق
انور:كان محروق 🔥ميبيش يطلقها ومش قادر يقلها ومن كثر حرقته تكلم بدون وعي .....واضح ان موتت بنتك قتلتلك قلبك احرف من الاول
فاطمه:اختفت ابتسامتها وبلعت ريقها كأن الكلمه كانت جمره في قلبها .....حطت الاوراق يلي قدامه بهدوء
انور:حس بي ان الكلمه يلي قالها كانت غلط وتوجع
نزل عيونه ....اسف
الايام يلي فاتو كنت مضايقه هلبا وحاسه ان في شي بيصيرلي
انوض في عز الليل انت راقد وانا نبكي خايفه منعرفش من شنو
حسيت بي اعراض ولما مشيت لي حوش اهلي طلعت مع خوي درت تحليلات لان زي ما تعرف يخدم في المشفى وطلع احساسي في محله
انور:انخطف لونه...شن صاير !؟
فاطمه:مقدرتش تتمالك نفسها وبكت.....سرطان 💔
كلهم قالو خلاص منتشر ومليشي علاج انور انا بنموت
انور:مسك راسها بين يديه مش مستوعب يلي يسمع فيه ....لالالالالا اهدي لا مش رح تموتي
امتى !امتى كيف منعلمش
فاطمه:تبكي بي العبره.....كلهم هكي قالو 💔
بنلحق بنتي انور 💔
حاسه روحي خايفه من الموت مش قادره نتخايل نفسي تحت التراب
انور:حضنها بقوه وهيا يرجف وقلبه بيطلع من مكانه كأنه متمني يكون هاذا كدب
في اللحضه هاذي تمنى لو انها طلبت الطلاق عادي
ومشت في حالها افضل من انها تموت بطريقه هاذي 💔
_______________________________________
رواد:يشوفلها
ريم:خبطاته ع كتفه ....خيرك تقول في حد خالعك 😂
رواد:خدي نفس ...
ريم:اممم الموضوع جديات يعني !!؟شنو مخبي عليا !؟
رواد:مش انا يلي مخبي عليك المره هاذي.....
المره هادي انتي ريم
ريم:اختفت ابتسامتها ....شنو ؟
شنو قصدك!
رواد:تحكي انتي ولا ندوي انا !
ريم:ضحكت ع جنب تحاول تخفف الموضوع ....شنو بنحكي !
رواد:علا صوته وقلب الدنيا ......معش تستغبببببي ريم
معش تستغبي النمممممم
ريم:بلعت ريقها بخوف .....
رواد:خدي نفس عميق....وقعمز
ريم:نزلت عيونها وتكلمت بصوت واطي .....صدقتهم؟
رواد:رفع عيونه فيها وهوا متكنطي
ريم:صدقتهم صح!!
رواد:ادوي شن صاير ...علاش كدبتي امك قاعده حيه
ورجعت خداتك وعمرك 18فهميني
كيف تلزك شنو يلي درتيه!!
ريم:رجعت ملامح البرود القديمه على وجها ....شنو بنفهمك الواضح انهم فهموك قبل ما نحكي
ع اساس بتصدقني يعني!؟؟
رواد:ريم ادووووي متنرفزينيش اكتر من هكي
ريم:تبرم في الخاتم يلي في صبعها....كان حلم حياتي من لما صغيره نشوفها !
عندي صورتها محتفضه بيها ومحافضه عليها اكتر من روحي
لين جي اسعد يوم في حياتي ....تقريبا
رواد:كان يراجي في جزء معين في القصه لكن مقاطعهاش
ريم:جتني في المدرسه اول مره ...كانت فرحتي مش طبيعيه تهسترت
روحت معاها هذاك اليوم قعدت لعند المغرب ولما روحت كليت طريحه من بوي
لان مقتلاش وحبسني بدون مدرسه 3ايام
كانو احلا3ايام في حياتي لان كل لحضه نسترجع في لحضاتي معاها
رواد؛كملي
ريم:بعدين جتنا الحوش
عرضت ع بابا نقعد اسبوع عندها واسبوع عنده
ووافق
رواد:ساكت ويشوفلها
ريم:مشيت اول اسبوع وكان الوضع كويس نوعا مات
كانت تسكن في عماره مع راجلها من جنسيه تانيه مش ليبي وعندها منه ولد صغير
رواد:ريم انتي فاهمه اي جزء نراجي فيه ادوي
ريم:فيه واحد صديق راجلها عنده قهوا تحت العماره
كبير في العمر شوي
كل مره يحسب فيا لما نروح للمدرسه نكون ميته جوع
مره شاورما مره همبرغر مره بيتزا
رواد:اي؟
ريم:ولما يشوف راسي واجعني من القرايه يعطي فيا حبوب
رواد:مسح وجها بي يديه بتوتر
ريم:قعمزت ع الكرسي .....بديت نبيع في الحبوب هاذي لي البنات والشباب يلي يقرو معاي
كان مفهمتي انها مسكنات قويه ومفروض منحكيش لي خد عليها عشان ميصادروهاش
بديت نبيع ونجيبله ويعطي فيا في نصيبي من دون ما نفهم شي !
طمع هوا وراجل امي في الفلوس !
وزاد طمعهم فيا
رواد:شبحلها بنضره حاده كأنه وصل للجزء المطلوب
ريم:مكنتش غبيه لدرجة ان منعرفش شن يعني بنت ياخدو منها اعز ما عندها
لما رفضت وقاومت فضحوني !....قالو اني نغري فيهم ونبيع في المخدرات واني انسانه غلط ومننفعش
بس هاذا كله مهمنيش
طردوني من المدرسه ونقطعت من صاحباتي ومهمنيش
ضربوني طريحه لدرجة 4ايام فاقده الوعي ونستفرغ في دم ومهمنيش
رواد:شنو يلي همك؟
ريم:ربعت يديها.....كانت تضرب معاهم
رواد:قام حاجبه
ريم:اي امي......تخلت عليا
صدقت راجلها
فضلاته عليا لان هوا يفيدها في الدنيا هاذي اكتر مني
يصرف عليها ويربي ولدها ومسكنها في حوشه
اما انا بنت جبتلها العار وسمعتي تحت الحضيض ومفيش حد رح يقبل يتزوجني طول العمر
هيا هكي قالت!
رواد:وقف وعطاها بضهر كأنه بيطلع ...
ريم:صدقتهم!؟
رواد:تلفتلها عشان يشوف في عيونها نضره جديده
كأنها خايفه يسيبها ويمشي مثلا!
رد عليها بصوت متقطع.....منعرفش
ريم:رجعت نضرت البرود وملامح الاستفزاز....عطاته بضهرها وهيا تلف في شعرها الاسود
عادي قولي صدقت....شبحتله
ابدا مش رح تحرك فيا شعره ....تخيل وحده جت الدنيا واهلها عليها وامها تخلت عليها وقاعده عايشه
تبي لما انت متصدقش كلامها تموت !!؟
بلعقل هيا.....وضحكت واتجهت لي ولدها
رواد:طلع وسكر الباب بدون مايرد
🔥رِوَايـــــــــات بـــَـنـُـــووتِـــة الشـِــيـــْـخ🔥
🔥أروى الــــطـــاهــــر المــســلاتــــي🔥
بدر:مقعمز شابك يديه في بعض وقلبه يدق عقله يرفع ويجيب وعنده بصيص امل يمكن يتحقق الطلب يلي جاي عشانه 💔
سمع صوت رد فيه الروح ❤️
سلمى:السلام عليكم
بدر:قام راسه وشافها💔...نفس العيون نفس الملامح الطفوليه يلي كان يموت ويرجع يشوفها 💔
وقف مفيش كلمه قادره تطلع منه
سلمى:مقامتش عيونها من ع الارض ....ماسكه يديها في بعض وساكته
بدر:عادي تقعمزي 5دقايق نحكو ؟
سلمى:تحكي وعيونها في الارض ....شن مزال فيه عشان نتكلمو فيه؟ تبي الذهب صح!!
اسفه ليا شهور نقول لي خوي يرفعه ومفضاش بجد مش ناسياته
بدر:مش جاي عشان ذهب !
جاي عشان حاجه اغلى من هكي
سلمى:عندي حاجه اغلى من الذهب ؟
بدر:انتي .....انتي اغلا من ذهب العالم كله
سلمى:رفعت عيونها فجآه فيه
كانت ملامح بدر لما تلاقو عيونهم في بعض تحكي كل شي 💔
سلمى:مزلت عيونها من جديد...ممكن !
ممكن كانت في عيوني لمعة الذهب وانت طفيتها💔
بدر:سلمى مش جاي نسمع منك كلام يقطع اكتر من هكي يكفي اني متشرد طول الفتره هاذي بدونك
سلمى:توا جاي تقول في الكلام هاذا بدر؟؟
حتى العده كملتها انا انت غريب عليا توا لعلمك
بدر:قاطعها.....ترجعيلي ؟
سلمى:كان قلبها بيوقف اللحضه هاذي
ياما استنت الكلمه هاذي لكن بعد ما وصلتها شنو يكون ردها؟؟
بدر:سلمى نحكي معاك
حوشي ضلم من غيرك 💔يعلم ربي بحالي
سلمى:قامت راسها وعيونها دموع....سمعت انها اطلقت
علاش متاخدهاش ؟
كنت تسهر معاها الليل كله بدر مستحيل ننسى المنضر يلي شفته معاك في الاستراحه
ولا لما راقدين الاثنين في مكالمة فيديو كأن حبكم كبيرر بدرجه غريبه
بدر:نعترف غلطت كانت حركه غبيه مني ومنها وربي لعند هاذي اللحضه مفضحناش
هيا ربي حرق قلبها نفس ما حرقت قلبك لما كانت تزن فوق راسي
سلمى:وانت كيف ربي بيعاقبك بدر؟
بدر:سكت وهوا يشوفلها
سلمى:ناضت وقفت
بدر:يهز في راسه بهدوء بمعنى لا....متحرقيليش قلبي انتي !!!💔
سلمى:شوف حياتك بعيد عليا
مسامح ربي يهنيك لاني طيبه ومستحيل نتمنى الشر لي حد ...كانت اخر كلمتين ليها وطلعت من المربوعه
بدر:مسك راسه بين يديه وهوا حاس بي شعور زي السم !!
كأنه قلبه بدي ينحرق !!
_____________________________________
رواد:منعرفش
مجد:بلا استهبال قيس !...بالك تسحابه القصص هاذي تصير في روتانا سينيما بس؟
راهو يصير عار احرف من هكي بتريس ياولد خالتي
رواد:طول الوقت ميهزها شي !
لا ناس تتهزا عليها ولا كلام ينقال عليها!
طول الوقت نسأل شنو الشي يلي مخليها هكي
لما حكالي ناصر قالي محد خطبها بسبب انها سمره واختها احلا منها
ننصدم في اول يوم انها قنينه ويلي محليها سمارها
طلعت القصه شي تاني
مجد:يشوف لي رواد وساكت
رواد:وانت شنو كان نسيت روحي ونوصف في مرتي قدامك ماد وجهك تسمع
مجد:اي الزززح شنو تبيني ندير نسكر وداني ؟
كان انت حمار شنو تبيني نديرلك
رواد:خدي جبده من الدخان.....انسجمت
مجد:والخلاصه!!!
رواد:متسألنيش
ساره:مجد هيا انا واتيه
مجد:اركبي السياره مفتوحه
رواد:شن وضعها اختك؟
مجد:متسألنيش الايام هيا منقعدش في الحوش هلبا وهيا 24ساعه عندكم تقول اختكم
رواد:معش تخليها ترفض في العرسان ناصر ترفى وانتهت القصه يا مجد
مجد:خلينا من الدوا هيا توا....شريت الحوش يلي حوايز اللوز
رواد:متفاجأ...تدوي رسمي؟
مجد:وربي ....نبيك تتوسطلي تكلم حد من خوتك على نورهان
رواد:اي نورهان؟
مجد:اختك من بوك بلا زهايمر عاد
رواد:شن تقول انت فضانيتها الجمعه يلي فاتت ره!
مجد:انصدم....كيف!
رواد:انت معش كلمتني نسحابك طلعت الموضوع من راسك
مجد:سيبه واتجه لي السياره
رواد:مجددد مجددد
________________________________________
في السياره :-
كانت فاطمه مقعمزه سارحه
وانور واقف في دروج المشفى بعد ما رفع التحاليل لي الف دكتور وكلهم يقولو في نفس الكلام
مفيش امل 💔💔💔
بيهبل💔بيقلب الدنيا لانها بتموت بين يديه ومش قادر يديرلها شي
رجع لي السياره وحط التحاليل ع جنب
فاطمه:حتى هاذا قال نفس الكلام صح!
انور:لا ....قال خلي نبدو في العلاج مرات نقدرو نسيطرو عليه وقال الف حاجه تانيه
فاطمه:اهاا....
انور:ماسك نفسه بسيف ...رد ع تالفونه
عائشه:حبيبي وينك نتصل من الصبح ؟
وخيرك مجيتنيش اليوم
انور:بتروحي ولا؟
عائشه:اي نراجي فيك ....خيره صوتك هكي شن فيه؟
انور:شي سلامتك دقايق ونوصل فيك
عائشه:تمام
انور:سكر التالفوني وطلع بي السياره
فاطمه:تشوف من الروشن وسارحه
وانور مقدرش يفاتحها بي ولا موضوع !💔
_______________________________________
بدر:رد عليها وهوا بيتفجر....شن تبيييييي شن تبي دمرتيني
مروه: ش شش شنو؟
بدر:شن مزال تبي مني مروه
جريتيني في الحرام وخليتيني نضلم البنت بسبب انا اليوم مش قادر نرجعها 💔
بسبب الانانيه يلي كنتي فيها
مروه:ع اساس انت مهدمتليش حوشي؟؟؟
خليتني نلهى على راجلي ونكرها لين تجي اقرب انسانه ليا تاخده وشردت صغاري
بدر:يدوي ويخبط....اسمممممممك معش نبي نشوفه في تالفوني انسي اممممممممممي انسيني
وسكر عليها
___________________________________
نورهان:سارحه ومفيش اي علامة فرح في وجها
سعاد:شوفي هاذا مش اللون هاذا احسن للبيان؟؟
نورهان:اي حلو
سعاد:قفطانك شنو لونه؟
نورهان:هااا؟....منعرفش
سعاد:تي وين عقلك نكلم فيك انا
نورهان:حاسه راسي يوجع فيا...اهو قدامك سمر خودي رايها في كل شي مش مهم عندي عادي اي حاجه ....وطلعت
سعاد:البنت هيا معش فهمتها
سمر:مدوريهاش اكيد متوتره من الخطوبه
سعاد:وانتي خيرك هكي بديتي ضعيفه بتموتي؟
سمر:بالله خليني ساكته
سعاد:اي سكوتك بركه
___________________________________________
فاطمه:نزلت ركبت من الخلف وانور ساكت
عائشه:ركبت السياره باست انور بدون ما تنتبه لي فلطمه🤦🏻‍♀️
عائشه:استااااحشتك
انور:بصوت واطي.....تحشمي
عائشه:انتبهت لي فاطمه يلي كانت مقعمزه في الخلف
تحولت ملامحها لي غضب....اهلا فاطمه
فاطمه:اهلين...كيف حال امك؟
عائشه:بخير الحمد الله...وسكتت
كان واضح على عائشه انها منزعجه لدرجه مش طبيعيه من فاطمه يلي احتكت بي ايمن هلبا ويأجلو في موضوع طلاقها
رِوَايـــــــــات بـــَـنـُـــووتِـــة الشـِــيـــْـخ🔥
🔥أروى الــــطـــاهــــر المــســلاتــــي
الساعه9في الليل:-
رواد:يدور في الشحن وقالب الدنيا
ريم:خشت عليه في الدار .....شنو ادور؟
رواد:مردش عليها
ريم:فهمت ان تقريبا تقريبا رواد كرها ومش حاب يحكي معاها !!
ممكن زي ما كانت متوقعه!
تجاهلاته نفس مادار وخشت للحمام ادوش
رواد:مسك الشحن وهوا يفكر .....كان مفروض يرد عليها !
اكيد حطت في بالها ان معش بيحكي معاها لي السبب يلي سمعه عليها !
واكيد حست بي هلبا حاجات 💔
اذكر برودها وقال....هاذي ماتحسش
بس في الوقت هاذا كانت ريم في الحمام ادير في شي مش متوقع ابدا!!.......
__________________________________
عائشه:لوحت الشنطه ع طول يدها وهيا تعيط
مفيييييييييش تفااااااهم انور زهقت
هاذي اسمها مهزله واستهتار
لو طلقتها راهو توا راميه حتى العده لعند امتى بنقعد ساكته توا قريب تسكرو سنتين زواج !!
انور؛البنت بتمووووت خلي عندك قلب
عندها السرطان في المراحل الاخيره
عائشه:بدت تبكي ....وحتى هيا بتقعد معاها لاخر لحضه؟
به وانا انور💔اناااااا شنو يصير فيا
انور انت بديت تميل ليها💔💔💔😂
انور؛لا اله الا الله خلاااااص عائشه
عائشه:مش خلاص 💔
طلقني انا وخليك معاها لاني اكتفيت
انور:بصدمه......تبي تطلقي؟؟؟ا
عائشه:تبكي.....اي
انور:انتي .............
__________________________________
طق طق طق طق
سعاد:جايه جايه ...سمر؟؟
سمر:اءء اء امي
سعاد:مش كيف روحتي،؟
ان شاء الله خير شن جابك!!
سمر:بدت تبكي ....يتبع
___________________________
بين الاحداث هاذي كلها كان في عقل يخطط يقتل هلبا ناس بسبب حقده وكرها
وكان في شخص يفكر يخطف شخص تاني عشان يرتاح
وكان في شخص يدور على حل للمصيبه يلي هوا فيها
هلبا تفاصيل مركزتش عليها رح نكتبها في حلقة بكره
لان حلقة بكره رح تكون تكمله للااهيره تاعبه هلبا ومقدرتش نكملها ع اساس بنقسمها ع يومين امس كتبت كلمتين بس 🤦🏻‍♀️
يالله هانت بكرا تفتكو مني ومن الروايه

تعليقات



حجم الخط
+
16
-
تباعد السطور
+
2
-