رواية ادوار وهمية الجزء الخامس عشر
رواية ادوار وهمية البارت 15 الحلقة الحادية عشر
ريم:سبقني رواد وخش لي حوش اهله
انا قعدت واقفه في مكاني نشوف في زحمه وخيمه عرفت انها خيمة اعزي متع بنت فاطمه
اكتفيت اني نوقف في مكاني رغم نضرات الناس الغريبه يلي شافوني
كانو يتهامسو مني هاذي ؟لاني جايبه معاي شنطة السفر
سمعت هلبا حاجات!
سمعت عياط وسمعت هلبا كلام مش مفهوم
فظلت اني نقعد واقفه برا لين جتني بنت
كان واضح عليها انها مدام وممكن تكون عروسه لان محنيه عرايسيه في يديها وشبه طايره واضح على وجها ملامح الطيبه 
عائشه؛اهلين
ريم:اهلين بيك
عائشه؛اسفه خليناك طول الوقت هاذا برا مكنتش نعلم ان في حد جاي مع قيس وهوا لهي مع امه نصدمت يناري لان قيس مقالش انه مروح اليوم وزي متشوفي عندنا عزاء حاشه عيونك والاوضاع مفركسه
ريم:عادي ولا يهمك
عائشه:تفضلي حبيبتي معاي ارتاحي
ريم:مسكت شنطتها وتبعت عائشه يلي خدتها من الزحمه لين وصلت لي دروج
عائشه:شن اسمك؟
ريم:ريمه بس ينادو فيا ريم
عائشه:وقفت قدام الشقه....وانا عائشه سلفتك
ريم:قامت حواجبها بي استغراب
عائشه؛توترت....مش انتي مرت قيس؟
ريم:قيس!!؟...اااه اي اي قيس انا مرته اكيد امالا ليش جايه معاه
عائشه:ابتسمت واضح ان التعب مأثر عليك ...وتلفتت فتحت الباب
ريم:ضحكت ع نفسها داخلها...نسيت اسمه الحقيقي
عائشه:مبدئيا صاحبت الشقه مش موجوده هنايا بس تقدري ترتاحي فيها لين يهدا الوضع لوطه
لو تاخدي كلامي متنزليش لين قيس يرتب الوضع مع اهله
ريم؛تشوف لي الشقه....الشقه عادي تبع فاطمه؟
عائشه:بصوت مصدوم ...تعرفيها!؟
ريم:بنبرة هزوه......اكيد قيس حبيبي حكالي كل شي مستحيل يخبي عليا حاجه
عائشه:جاوبت وعلامات الصدمه قاعده على وجها...اءء اي اي شقتها بس كيف عرفتي ؟
ريم:نحت حجابها....واضح من حاجات الاطفال يلي ملوحه في كل مكان !...
عائشه:اي مزبوط تاعبه حاليا الله اعلم امتى ترجع بي السلامه
المهم احتجتي شي ناديني
ريم:تمام صحيتي
عائشه؛الله يسلمك.....وطلعت
طلعت عائشه مخليا ريم تتفحص في الشقه بعيونها
________________________________________
انور:شنو ياعمتي ؟ناضت ولا كيف !
مريم:لا اهو ياولدي على حطت يدك حتى العزي مش قادره نروحله
انور:واضح عليك تاعبه انتي روحي وانا نشوف الدكتور شنو يقول
مريم:انت يلي لازم تروح البنت يلي توفت بنتك يا انور علط الناس يجو بيعزو وميلقوكش
انور:سكت دقايق معرفش شنو يرد 
شاف لي فاطمه
شاف لي فاطمه ميقدرش يلومها في النهايه مضلومه وكدبت عشان هيا ام وتبي تعيش لي اجل بنتها
تكلم وعيونه ع فاطمه....حتى هيا مرتي !
واجبي نوقف معاها ومنخليهاش
مريم:تنهدت بوجع
انور:مسح عيونه ....خلاص انتي اطلعي روحي وبي اذن الله ما يصير الا الخير
مريم:ساوت الشال الشتوي يلي كانت لابساته وطلعت
انور:قعمز ع الكرسي وراسه مصدع يفكر !
لما بتصحى فاطمه كيف بتتقبل موت بنتها؟
كيف بيكون رد فعلها لما تعرف ان قيس روح!؟
هل نقدر نطلقها وهيا بي الوضع هاذا؟؟
من بين تفكيره هاذا كان يبي يقيم عيونه بس لفت نضره قطرات الدم يلي اطيح من سرير فاطمه ع الارض !
قرب ع السرير ونحى الغطا من عليها بدون شعور طلع من الغرفه وهوا يطيح ويوقف وينادي ع الدكاتره
خشو الدكاتره والممرضين ومنعوه انه يخش
كانت فاطمه عايشه بس حالتها سيئه بدرجه كبيره
نزفت هلبا ودمها نزل
قعد انور واقف برا مش فاهم شنو يديرولها وحالته حتى هوا كانت صعبه
____________________________________
طق طق طق
بدر:سلمى ...سلمى افتحي نكلم فيك
سلمى افتحي لازم نتفاهمو
ترن ترن ترن
بدر:رد وهوا متغلل....شن نبي من دين امي مروه مش وقتك
مروه:علاش مش وقتي بدر؟؟؟،
من امتى كان عندي وقت معين انا!
بدر:وقف على بار المطبخ وهوا يحاول يهدا....مروه حبي
مروه:من راس خشمها...نعم
بدر:متزيدينيش انا نحاول نهدي الوضع ونفهمها يلي شفاته مش زي ما هيا مفكره
متقعديش حتى انتي تزني فوق راسي !
مروه:تحكي وهيا ترضع في ولدها........وشن صار معاها الهانم!؟اقتنعت ولا لا!!
بدر؛مش راضيه تفتح باب الدار
تلاقيت معاها الصبح قتلي كلمتين بعدين خلاص معش سمعت حسها
مروه:شن قالت؟
بدر:تبي الطلاق !
مروه:وعطيهولها شنو تراجي
بدر:خذي نفس وهوا يحاول يهدا ...ان شاء الله حاضر
مروه:حسب رايك تحكي لي ايمن راجلي ؟
بدر:توقعي منها اي شي ....يقولو احذر شر الحليم اذا غضب وهاذي من يوم ما عرفتها طيبه وكويسه الله اعلم توا شنو تطلع !
مروه:طيبه وكويسه!؟...خيره حسيتك معجب بيها انت؟
بدر:لا اله الا الله 
مروه:تمام بدر تصرف معاها هي سلام
بدر:مروه كبري عقلك
مروه:سكرت في وجها الخط
بدر:ناقصني انا الزححح
________________________________
ريم:سمعت الباب انفتح فهمت ان رواد خش (قيس)
رواد:خش وهوا يتأمل في الشقه يلي اثثها هوا وفاطمه لحضه بلحضه بكل حب
الشقه يلي عاشت فيها فاطمه بروحها وجابت فيها بنتها
يعلم ربي كيف كانت ترقد هيا وبنتها بروحهم !
خش رواد كأنه استاحش تفاصيل الشقه يلي رجعاته سنه لتالي
ريم:صبت القهوا ....شن صار عند امك !؟
رواد:شوية دراما وفاتت
ريم:مدتله كوب القهوا .....وتوا شنو؟
بعد ما تروح فاطمه وين بنقعدو!؟وشنو بيصير
رواد:قعمز ع الصالون وهوا يشوف لي سرير بنت فاطمه والعابها....متسأليني على شي توا
اقعدي هنايا وردي بالك تنزلي لي امي ردي بالك توري وجهك في العزي لوطه مش ناقص دوا
ريم:قعمزت مقابله.....عندك خوات؟
رواد:سرح شويه بعدين جاوب....لا
ريم:خوت من غير يلي جاك للفندق؟
رواد:خدي نفس كأنه يدكر.....لا مفيش غيره انور
ريم:اممم...به حلو
رواد:مش مفكره تجيبي ولدك؟
ريم:لا
رواد:شن القسوه يلي عندك هيا !
ريم:يتهيألي ان الموضوع يخصني !مليكش دخل
رواد:بطلي طولت لسان وديريلي حاجه ناكلها
ريم:نحت التيشرت قعدت بي كنتيرا وسروال
رواد:يشوفلها بخبث
ريم:خشت للمطبخ....نوض دوش ريحتك نساوين
واضح ان امك باساتك وحضناتك هلبا
رواد:رقد ع الصالون.....مدكرينيش!
ريم:فتحت الثلاجه وبدت تحضر في سفره بي الحاجات الموجوده ورواد يتبع فيها بعيونهوعيونه ذابله بيرقد
وعيونه ذابله بيرقد ريم:تعال تسمسم
رواد:قلت طيبي حاجه مش حطي معلبات
ريم:قعمزت ....مش عاجبك اطلب من برا مدرهليش كبدي....ووقفت تاخد في كوب مرش
رواد:ع اساس بيفوت من بين ريم والطاوله وتعمد انه يلصق فيها
ريم:قعدت في مكانها وقلبت عيونها....بعد من عليا
رواد:حط يده على كتفها....قلت بالك تبي مساج ولا حاجه
ريم:تلفتت وكان لاصق فيها....انت مقرف !
رواد:عقد حواجبه وشاف لي نفسه....الجمال هاذا كله ومقرف!!!؟
ريم:مقرف لانك وسط الاوضاع يلي انت فيها هاذي كلها وتفكر في حاجات حقيره زيك ...جت بتمشي رواد سكر عليها الطريق بيده
رواد:انكري ان الحاجات الحقيره هاذي مخاطركش فيها اليوم. ؟
ريم:ابتسمت بي استفزاز....قداشك واطي
رواد:خيرك فرحتي وزدتي قربتي انتي؟...كنت نتسهوك عليك ره !
بعد من قدامها وقعمز ياكل
ريم:يتهيألي لو تركز في حياتك وامورك الجديه احسن لان يلي جايك اسود من قلبك !
رواد:ياكل.....والله مريت اسود من قلبك
ريم:قعمزت قدامه تشرب في العصير وتتصفح في النت...مجد وين!؟
رواد:روح لي اهله
ريم:اهله،؟؟..عنده عيله يعني!
رواد:لالا جاي في باكو كلينكس ...تي عنده امالا شنو
ريم:اهاااا
رِوَايـــــــــات بـــَـنـُـــووتِـــة الشـِــيـــْـخأروى الــــطـــاهــــر المــســلاتــــيوليد:روحت الخرا يلي عندي خلي نمشي نقلها ادير غدي زي الناس
محمد:لالالا قعمز خليها ترتاح مش كانت في المستشفى!؟
اصلا طلبت من برا شويه ويوصل
وليد:شافله ع جنب ....وانت علاش متبيهاش تتعب ؟
محمد:بتوتر...مش هكي نقصد يعني خلاص طلبت ومشت الامور
وليد:طبطب ع كتفه ...فوت امه القلب الحنين هوا
وخليك حديد
محمد:علاش شنو لقيتني مداير
وليد:نشوف فيك لما تتلاقى معاها فوته الجو هوا
مش قصة انها مرتي لكن البنات يبو من يستحقرهم غلط القلب الحنين يلي عندك هوا
محمد:ولع دخانه
وليد:تذكر فاطمه؟
محمد:من فاطمه؟
وليد:بنت خالي ....مش هذيك الليله تخاطينا في الطريق !؟
محمد:معش اذكرني بي امها هديك الليله
وليد:ضحك كنت انت اول ليله ليك في الجو وضبطت الفرخه يلي عندي
مروح مسطول لنم جت النيه في بنت خالتي فاطمه
اليوم سمعت دارت حادت هيا وبنتها
البنت ماتت
محمد:بدو يديه يرجفو وهوا يدخن....مني رضي بيها!
وليد:مقصقصتش ع الموضوع الله اعلم شنو كاذبه
محمد؛البنت من راجلها ولا منك !
وليد:هه ميهمش
ماتت في النهايه
محمد:كمل دخانه وهوا يشوف لي وليد ....معقوله في بني ادم متوحش في الدنيا هكي ؟؟
عنده عادي يحكي ع مرته وعارف ان انا يلي اعتديت عليها؟
كيف يحكي على موت طفله ممكن تكون بنته بي البرود هاذا !؟
في اللحضه هاذي بدات تأكد محمد انه غلط جديات لما صاحب اشكال نفس وليد
____________________________________
الدكتور:جديات نفدت من الموت للمره الثانيه
لو عطلت شويه كانت المريضه ماتت من النزيف
انور:به توا شنو؟؟؟...حالها كويس ولا لا!
الدكتور؛وضعها مستقر رح تقعد في الملاحضه بعدين يصير خير
الف سلامه عليها
انور:الله يسلمك
الدكتور:سيبه ومشي
رواد:كل شي تمام ؟
انور:تفاجأ لما تلفت وشاف خوه !..
رواد:شني صاير فيها!؟
انور:تنهد.....حاولت تنتحر اليوم و مكتبش ربي انها تموت
رواد:حط يديه في جيوبه ....حالتها تاعبه؟
انور:فوق مما تتصور
رواد:شنو صار بخصوص الطلاق !؟
انور:بعقلك قيس؟؟؟نقولك البنت حالتها تاعبه وهلبا تبيني نزيدها
رواد:لو روحت معندهاش وين تقعد
انور:شن قصدك!؟
رواد:سكت
انور:لاااا!....متقوليش جبتها معاك!!
رواد:مرتي !....وين تبيني نخليها في الشوارع
انور:فصل .....من البدايه كنت عارف انك جايبها عشان فاطمه متلاحقكش لكن البنت معندهاش جهد ليك ولا لي شي شبه منتهيه!
رواد:رد عليه بنفس الصوت عالي.....شن دخلك؟؟
فهمني شن دخلك حتى انت عشان تحمل مسؤليتها !حتى انت عندك مرا وليها حق عليك
الله غالب هيا ربي ابتلاها بي اغتصاب وحمل
هاذا لو مكانش بي ارادتها
انور:دفه من كتافه...اتفي الله ياراجل شن الكلام يلي تقول فيه الزززززفت
بي العقل معاها5سنين انت خاطبها علاش بتخرب حياتها بي الطريقه هاذي
رواد:سكت
انور:روح قيس روووح متقعدش معاي بالله عليك خليني انا راضي نحمل مسؤليتها ع الاقل نكسب فيها اجر
رواد:سيب انور وقعمز على واحد من كراسي المصحه
كان انور تاعب !
فاطمه تاعبه !
وحتى رواد كان تاعب من داخله بس ميبيش يوضح لحد!!
_______________________________________
سلمى:فتحت غرفة النوم وطلعت منها
بدر:ناض بسرعه رهيبه من الصالون
سلمى:فاتت من قدامه ولا كأنه موجود
بدر:لحقها....سلمى
استهدي بالله وتعالي قعمزي انا وياك في الصالون نهدرزو شويه !
سلمى:تعبي في شيشة الميه.....مفي شي نحكيه معاك
بدر:مسكها من يدها.....لافي
سلمى:دفاته....خللييييييني بدر
يكفي يلي عرفته والعلاقه المقرفه يلي كشفتها
بدر:مش علاقه سلمى م.......
سلمى:بدت تحكي وهيا تبكي .....متضحكش علياااا مش عيله انا
مش كان طيبه وصدقت كم كذبه يعني حتى هاذي بنصدقها!
بدر:رجع شعره الخلف بتوتر
سلمى:عطاته بضهر تمسح في دموعها
بدر:اسف
اء انا انا
سلمى:تلفتت.....انت شنو؟!
شن تبي مني ؟؟
خايف نفضحك ونفضحها؟؟...ارتاح منديرهاش
ربي استركم منجيش انا نفضحكم
انت هكي اطمنت ولا؟تمام خليني في حالي معش تقرب عليا لين نرجع لي حوش اهلي وتوصلني ورقة طلاقي !
بدر:ساكت يشوفلها
سلمى؛ارتاح وريحها حتى هيا ....ومشت
بدر:ضرب الكرسي برجله لان رسمي قتلاته بي اخلاقها حتى بعد ما كشفت حقارته
_________________________________________
ريم:كسدت!
معنديش كتب جديده نقراهم
اشتراك النت كمل
وكل شي موجود في الشقه هاذي يذكر فيا بي ولدي
حاسه اني استاحشته ....ندمت اني خليته
صح متريحه انهم رح يعتنو بيه بس
استاحشته....هكي يكون شعور الام؟ !!
....هكي يكون شعور الام؟ !!ليا يومين بعيده عليه وحسيت هكي
كيف خلتني هيا 21سنه؟
رفعت راسها زي كل مره وقامت شعرها بملل
___________________________________
ريماس:وصلتها رساله قصيره
محمد(انتي بخير ؟
ريماس:ردت عليه....بخير لو توخر من على طريقي
محمد:اسف
محمد:قاعد ندكر فيك لو احتجتي شي كلميني
ريماس:مش رح نكلمك خلاااااص بطل تبعتلي يكفي حياتي يلي دمرتها الله لا تربحك انت والواطي يلي قاعد جنبك ولا تفكر انك رح تاخدني بي كلامك هاذا وادير فيا ما تبي ياولد الحرام ...
محمد:لوح تالفونه بعد ما حس بي الكفوف يلي عطتهوله !
رِوَايـــــــــات بـــَـنـُـــووتِـــة الشـِــيـــْـخأروى الــــطـــاهــــر المــســلاتــــيالساعه 12ونص ليلا:-
رواد:شنو اديري ؟
ريم:اااه الحمد الله انك جيت
رواد؛لوح جاكيته....استاحشتيني؟؟
ريم:لا طبعا ....نتصل بيك علاش مرديتش. ؟
رواد:مكنتش فاضي
ريم:نبي رصيد ...اشتراك النت تم وكسدت
رواد:يصير خير لا غضوا
ريم:لا يابابا اليوم مستحيل ع شنو بنسهر !
رواد:عليا
ريم:لوحت عليه المخده.....بطل رواد نحكي بجد نقصد قيس
رواد:ضحك عليها بهزوه....عندي رصيد تو نبعتلك
ريم:وين كنت !؟
رواد:يصب في الميه....عند انور
ريم:من انور؟
رواد:خوي
ريم؛اي نسيت اسمه ....وين هوا؟
رواد:قعمز واتكى ع الصالون....في المشفى مع فاطمه
ريم:وكيفها البنت؟
رواد:بخير احسن من قبل
ريم:كويس
رواد:يدلك في راسه بتعب
ريم:رواد ...نقصد قيس
رواد:نعم
ريم:سكتت شويه....ولا شي خلاص انسى بنرقد تصبح ع خير
رواد:تلاقي الخير
ريم:مقدرتش ترقد في غرفة نوم مش ليها !
اكتفت انها تاخد غطا وتمشي لي غرفة الضيوف !
_____________________________________
سلمى:قلبي يتقطع كل ما نقعمز بروحي وندكر يلي شفته
مش قادره نطلع لي حد لاني في اي لحضه نبكي
ومنبيش حد يسألني خيرك ليش تبكيي!!!؟
حطيت غطا ع راسي عشان ميطيحش الشعر وحشيت للمطبخ
عجنت حلويات وقعمزت نشكل فيهم
لازم وبي اي طريقه نلهي روحي ومعش نذكر لين يكمل الشهر ونطلع من هادالحوش
بدر:ناض يحك في عيونه يشوف لي الساعه ويشوف لي سلمى مقعمزه ادير في حلويات استغرب
توا قريب الساعه1علاش في المطبخ
بدر:سلمى انتي كويسه؟
سلمى:كملت شغل ومردتش عليه
اما بدر خاف ان سلمى تهبل من الصدمه وادير في روحها شي
خدي كرسي وقعمز يتفرج عليها وداير باله منها بعيونه لين كملت وعسلت الماعين وطلعت
وفي الوقت هاذا عرف بدر ان سلمى عندها ملامح جميله اول مره يلاحضها
نفس الشي اكتشفه انور وهوا واقف عيونه ع فاطمه
داير باله عليها مرات في اي لحضه تنوض وتحاول تنتحر للمره الثانيه
لو صارلها شي مستحيل يسامح نفسه
كانت عائشه ع الخط تحكى معاه وعيونه على فاطمه حايره منو بيسعد فيهم !!؟
ريماس كانت هيا يلي تراقب في وليد راقد مش حب
ولا اهتمام بيه
كان خوف لا اكتر !!
تخاف ينوض في اواخر الليل زي كل مره ويدير فيها شي!
مجد:كان يراقب حتى هوا
بس عكسهم كلهم كان يراقب في صور
ممكن يكونو مجرد ذكريات وممكن الدنيا تعطيهم فرصه جديده!
ايمن كان يراقب في مروه مرته
يراجي فيها امتى ترقد لانه كان متحمس يفتح موضوع الزواج مع حبيبته
وسعاد كانت تراقب في القطعه الصغيره يلي قدامها
الحاجه الوحيده يلي قعدت من ريحة ناصر
كانت تراقب فيه وداخلها تتوعد انها مستحيل تعطيه لي حد وهيا يلي رح تربيه
______________________________________
بعد مرور3ايام:-
مريم:ماسكه بنتها فاطمه وتحاول تكون سندها لين توصل لي السياره
لحق عليها انور وركبها واقنع امها تركب مع اي حد تاني عشان يحكى مع فاطمه براحته
ولع انور سيارته وطلع
فاطمه:راسها ع الكرسي وتشوف لي الروشن
عيونها ذابلهوجها اصفرمنكسره
وجها اصفرمنكسرهانور:قيس ليه4ايام مروح
فاطمه:مدارتش اي ردت فعل
انور:روح هوا ومرته
فاطمه:ابتسمت بتعب
انور:حاليا مرته معندهاش وين تقعد خذت شقتك لين ب
يشوفلها مكان
انتي اقعدي مع عائشه فوق لين تتعدل الاوضاع
فاطمه:مكاني مش معاكم انور روح بيا حوش اهلي خليه يعيش مع مرته
وانت عيش مع مرتك
انور:مش رح نخليك لين تتعافي وتردي زي قبل بعدين ساهل !
________________________________
ريم:خدت من عائشه الشحن...شكرا بجد بعدين رواد يجيبلي شحن ونردهولك
عائشه:رواد؟؟
من رواد؟
ريم:اااه قيس نقصد كنت نحكي مع خالتي هبلتني بي اسماء صغارها
عائشه:ضحكت ولا يهمك
صوت ينادي في الدروج...عيوووشه عيوووشه
عائشه:فتحت الباب...تعاااالي انا عند مرت قيس
وتلفتت لي ريم...عادي تجي ولا؟!
ريم:اكيد اي
خشت البنت وعائشه سكرت الباب
عائشه؛شافت لي ريم هادي مرت قيس وهاذي ساره تكون بنت خالة قيس
ريم:ساره؟....تشرفنا
ساره:بيك اكتر....وشافت لي عائشه
عيوشه نبو حد يتبرع بي دم فصيلته نفس قيس وانور ...راجلك وين ؟
عائشه:انور طلع منعلمش بيه شوفي قيس
ساره:قيس بي كليه وحده زعمه عادي يتبرع!؟
عائشه:مش عارف بس تقريبا عادي
ريم:سكتت وهيا تربط في الاحداث
رواد بكليه وحده؟الجرح يلي في جنه !
نفس الجرح يلي في جنب صار بزبط!!!!.....
______________________________
رواد؛واقف قدام باب الشقه يدور في مفاتيحه
يسمع في خطوات راكبه الدروج
ابتسم يسحابها امه اخيرا وكبت بتشوف ريم لكن بسرعه ما تلاشت الابتسامه اما تلاقت عيونه مع عيون فاطمه بعد سنه تامه
_____________________________
ريماس:استغربت من وليد كيف يفوت موعد العمل ومينوضش!!؟
ترددت هلبا انها تنوضه بس خافت ينوض متأخر ويعصب عليها هيا
ريماس:وليد ...وليدددد وليددددً
حطت يدها عليه ونصدمت كيف جسمه بارد هكي !!.....يتبع
عند كلمتي ونزلتها اليوم