القائمة الرئيسية

الصفحات

رواية ليتني استطيع فعلها الحلقة الثانية والستون 62 والأخيرة بقلم زينب ماجد

رواية ليتني استطيع فعلها الحلقة الثانية والستون 62 والأخيرة بقلم زينب ماجد

رواية ليتني استطيع فعلها الحلقة الثانية والستون 62 والأخيرة بقلم زينب ماجد
الحياة رواية جميلة، عليك قراءتها حتى النهاية ..
لا تتوقف ابدا عن سطر حزين، فقد يكون السطر الذي بعده جميل، و تكون النهاية اجمل. ❤

........

فتحت الفيسبوك .. صفحة بتول گبالي
ناشرة شعر و صورة .. دخلت للتعليقات حتى اكتبلها (روعة )

اتفاجئ تعليق كدامي .. وحدة تسألها ( ولج شخبار اخوج صدك لكيتو اثره ؟

مدري شصار بيه، احس الدم حمى بشرايين جسمي، كمت من مكاني بسرعة، كمت افتر و بتوتر و ايد ترجف ادور على رقم بتول، خابرتها مرة مرتين
ما ترد
.. معقولة لكوه ؟
هيج و يرجع خالد ياااربي
اي دردي يا بتول ردي احترك دمي والله

صادق مو هنا ملتحق .. و بس اني بالغرفة .. افتر و انتظرها ترد .. ماكو

كعدت .. معقوله رجع بعد كل عالسنين لو لكوه شي يدليهم عليه ؟ .. رجع !!
شراح يسوي لو عرف اني متزوجة ؟
و حامل ؟
و ناهية كلشي و بادية حياة جديدة
هم راح ينكسر ؟
هم راح يدمر مثل ما دمرته بزواجي من امجد

كل هذا مو مهم ياربي المهم يرجع ويشتمى الهوى كافي عليه حتى لو شنا يسوي، وعد ربي ما اتقرب منه ولا اكابله ولا اتواصل وياه و ما الي علاقة بيه ابد ..
بس يرجع سالم

... خابرت بتول
:- الو

- شألو مو صار ساعة اخابرج

- جنت بالحمام والله، كولي ؟

- صحيح خالد لكيتوه ؟

- لا

- شفت وحدة معلقتلح و كايلتج صحيح لكيتو اثره

- اي لكينا الرقم مال سيارته ويا مجموعة ارقام ابيت بالأنبار

- اي ؟

- هالبيت جانو كاعدين بيه امراء دواعش و البيت مقصوف نصه و من محررين المنطقة و امشطيها لاكين الارقام .. و اختمال ان سيارته مستعملة بتفجير ارهابي لهسه يحققون

- عوفي هذا كله هو وين ؟

- هذا المحيرنا، سيارته و الرقم بالانبار ، زين هو وين ؟ كاتلينه و دافنينه، ساجنينة ما نعرف .. والله ما نريد شي حتى لو ميت على الاقل بس نلكه جثته

- كمت ابجي .. و هي تحجي

- شلونج ويا الشيخ

- زينة

-فرحتلج هواي والله ، الله يسعدكم ان شاءالله

- تسلمين ، بتول من ذاك اليوم ولهذا اليوم ما كاعد اكدر اطلع خالد من بالي ، اتزوجت و اني بكل يوم ادعي ربي يرجعه بالسلامة ما جاي انسى

- حتى لو رجع ما يفيدج حبيبتي ما دام الشيخ زين وياج انسعدي وياه ، الحب مو كلشي

- بتول اني ما رايده شي و الشيخ زين وياي و ما الكه مثله ، بس اتمنى كلبي ينسى و ما يتذكر من احط راسي ع المخدة ذكرى ذكرى تنعرض كبالي من الماضي ساعة ابحي و ساعة اضحك و ساعة ادعي ربي بس يرجعه بالسلامة ما اريد شي ثاني

- ان شاءالله ياربي ، صدك ما كتلج ، الخميس الجاي زواجي

- صدك ، الف مبروك ان شاءالله ، من منو ؟

- حماي، هو متزوج و الصراحة ما رايدته بس تعبت ديار اهلي يضغطون عليه و هم يضغطون، يعني اذا ابني وكع بالمدرسة هددوني يسحبون جهالي ، فقبلت بس ما راضية

- اذا ما راضية، لا تتورطين

- رافد جاي يلح .. من سافر رائد و لليوم تشكلت المسؤلية كلها براسه ابوي مريض، و ضحى و بناتها و اني و جهالي و امي و عائلته ، يكول حسو. بيه و خل كل واحد يخفف عني .. شسوي حسيت روحي ثكيله عليهم و اني و جهالي ٦ .. اخذ حماي و هو عمهم و انجب يمه و اسكت مليت و اني بروحي ثكيلة عد اهلي رغم والله ما دافعين عليه لو على جهالي ربع

- الله يكون بعونج حبيبتي، بلكي الله كاتبلج الاحسن

- ان شاءالله، الله يسمع من حلكج

.... نهيت الاتصال وياها و نزلت جوا
مريت على غرفة اثار ، كاعد تقرأ ، عفتها ورحت لغرفة الحجية ، فاتحة قناة دينية و تستمع محاظرة .. عفتها و رحت للمطبخ .. افكر

المشتمل بعد ما اتزوجت بقى لاسامة و خديجة و جهالها، بس اثار انطيتها غرفة بالبيت يمي مو هناك ..
مرتضى ورقية ويانا بالبيت ..
منتظرين امي تكمل اجرائات سفر خديجة ..
رغم زوجها دوم يهدد يريد جهاله، تالي حس عنده جهال .. و يطالب بيهم بس ما يندل البيت و يجي.

... وره يومين الظهر جنت راجعة من الدوام ، سحبت الباب حتى ادخل سيارتي، شفت سيارة صادق موجودة، عرفت هو هنا جاي من الموصل.

قفلت ورجعت الباب، و دخلت للبيت، لكيته كاعد بالإستقبال، البلازمة مشتغله و هو ابسطاله داخل و صافن بيها .. حجيت :- هلا ابو رضاوي الله يساعدك

- هلا بيج

- شوكت اجيت

- باوعلي، اخذ نفس و دار وجهه و كال :- قبل شوية

حسيته مو على بعضه، يمكن متعرض الظروف قوية بالجبهه احتمال متأذين او صديق اله مستشهد .. كلت اله :- راح اخلي الاكل ع النار احمي ، و اصعد اسبح و ارجع اصبلك غدا ما اطول

- عوفي السبح و الأكل، اكعدي

- شكو ؟

- رايد احجي وياج بموضوع

تقربت ردت اكعد كباله ع القنفة و اني احجي:- شصاير

- هاج اخذي هذا الموبايل و اقري و انت تعرفين شصاير

- مشيت عنده، اخذت الموبايل من ايده و رجعت للقنفة كعدت و باوعت ، رسالة ع الماسنجر مكتوب بيها

( انت تعرف منو هاي التزوجتها ؟ تعرف ابوها مغتصبها ؟ تعرف امها جانت بت ليل و تجيب زلم للبيت ؟ ، تعرف جانت تخون رجلها بس يطلع، ويا واحد اسمه خالد و يصير ابن عم رجلها تجيبه للبيت و على فراش رجلها تعرف ؟، اسألها عن اثار الحرك ليش حركج رجلج ؟ ليش حاول يغسل عارج منه ؟ .. بسرعة صدكتها و اخذتلك و حدة لا من ثوبك ولا من اصلك .. و اذا جذبت كلامي روح اسأل عليها و على امها بالمنطقة القديمة و شوف شيكلولك عنها ومبروك عليك الكرون الشدتلكياهم بزواجك منها )

انقبض كلبي، و انمغصتني بطني، و احس الدم صعد لراسي و اني اقرأ، نزلت بالمحادثة هو كايل ( منو انت ؟)

راد (فاعل خير )

مجاوب صادق ( هذا مو خير هذا هجمان بيوت، عندك دليل على كلامك جيبه غير هيج اطلعك من جوا الكاع و املص راسك و العباس )

راد ( انت دور وراها و اسأل بمنطقتهم القديمة و اذا لكيت كلامي غلط اني مستعد لكلشي، دور الحقيقة بنفسك المتزوجها كح** و نامت براسها هي و اخوتها )

... باوعتله بتوتر بخوف ، برجفة :- منو هذا

- عوفج منو هذا، اني بطريقتي اعرف منو هذا، انت احجيلي على الكاله

- ما اعرف منو داز هذا الكلام و شقصده هيج يسوي
دنكت للموبايل ابحث بالحساب كال

- كلت الج عوفيه، و ردي عليه

- انت مصدك هذا الكلام ؟

- لو بمكاني شراح تسوين ؟

- راح اسمع منك و افهم الموضوع و اشوف منو هذا الساقط اللي جاي يطعن بسمعتي

- وهذا اللي جاي اسوية
متجي ايده على الجانب و يمسح على لحيته، و يباوعلي :- اني ما رايد ادور وراج تالي الكا شي اني ما اعرف بيها وكتها الأمور توصل مواصيل ما تعجب، اذا عندج شي كليلياه لا تخليني ادور عليه

- انت شاك بيه ؟

- كلت الج ما شاك بيج، احجيييي فضيها

فركت وجهي و دنكت محتارة شأكول ، و شنو احجي و بأيش ادافع عن روحي .. احجيله حقيقتي لو انكرها ؟
نكرانها يعني هلاكي .

صادق :- هلكد الجواب صعب

رفعت راسي، الدموع تجمعت بعيني لا ارادي، كلت اله :- اوعدك راح احجيلك كلشي بس والله تعبانة من الطريق خليني ابدل و اسبح ووعد كلشي احجي، وكتها شتريد تسوي سوي ما اكول

- كلامج و خوفج يأكد الموضوع

- لا والله بس هسه متوترة لأن هم كالبين الحجي كله ضدي، اريد بس اوزن عقلي حتى احجيلك

- بدون جذب

- عساني اهلك اني واللي ابطني لو جذبت عليك بحرف والله.

هز راسه و تنهد :- روحي

كمت من مكاني الدموع تجري، دخلت للغرفة اخذت ملابس، و مشيت للحمام .. على الاقل اعرف شحجي و ارتب صيغة الكلام بعقلي كبل لا احجي ، ادري بروحي اذا حجيت و اني متوترة راح اخربها على روحي .

سبحت و طلعت من الحمام، ما اشوف شي كبالي، راسي عبارة عن حجي، دخلت للغرفة هو كاعد على السرير و مدنك مثبت ادية على ركب رجليه لازم راسه.

من حس بيه دخلت، شال راسه ، تقربت من عنده ، كعدت على طرف السرير، عيوني دم من كثر البجي البجيته جوا المي

صادق :- خايف من الكلام الراح تنطقيه

- ما سويت شي والله

- احجيلي كلشي ما تضمين عليه حرف، لأن بعد ما شفت عيونج و خوفج اكيد راح ابحث و اعرفها بطريقتي ، فرايد اسمع منج

- جنت صغيرة بعمر ال١٦ سنة ، مشوهة الناس كلها تتمنمر على شكلي و حتى محد يمشي وياي، جان يكشون من منظر ادية
ابوية سكير و من يسكر يفقد.و يصير يتحرش ابناته، انهار اختي حركت نفسها لنفس السبب، و اني احتركت وياها بس تشوهي ما منعه من التحرش لما يسكر
امي اتزوجها و هي عمر ١٣ سنة جان يكتلها و يطردها بالشارع حتى تجيبله فلوس .. شنو تشتغل شتسوي ميهمه المهم تجيبله فلوس حتى يشتري شرب بيهن
.. امي جانت طول اليوم مو ويانا تطلع الصبح ترجع المغرب .. ابويه اكثر انسان اخاف من عنده ، ما عندي غير اخ و اخت صغار
جنت احتاج احد يسمعني كلمة حلوة
احتاج انسان يحسسني اني انسان مو شي يشمئزون منه
مراهقة بنص بيت لا ام حاويتها ولا اب يعتنيلها .. ضايعة و بنفسها اللي يحتويها ..
اعترف كل هالامور خلتني احب شخص مو الي
و حتى زوجته لما تنمرت عليه بررت لنفسي اذيتها و حاولت ابعدها منه .. بس بعد ظروف اضطريت اتزوج انسان جان عاجز و عقله على كده .. مسولفتلك عليه (سلمان ) ما جان زوج كامل يحتويني من الداخل، جان اني وياه اخوة و بالفعل اخوه لان هو ما صارلي زوج ابد

وره ٣ سنوات مات ورجعت لبغداد بس لما رجعت اللي جنت معجبه بيه مطلك .. جان هو يوكف ويايه بالجبيرة و الصغيرة، جان يستعطفني و يستعطف حالتي ، شفت بيه الشي الاحتاجه و هو الاهتمام
.. بفترة صار هو سايق الخط مالتي عرف بمشاعري و راد يتزوجني
انسان ما جان همه شكلي و ظروفي و كلشي اني مريت بيه، اتعلقت بيه وحسيته هو هذا الامل اللي راح يخلصني من اللي بداخلي .. هو اللي راح يحتويني

بس اهله ما قبلوا و عارضوا الزواج لاني مشوهة و لان عرفوا ابوي جان يتحرش بينا من مذكرات اني كاتبتها و اختي ضيعتها يمهم

بوكتها جانت بت عمتي مريضة و توصيني على جهالها و تطلب مني اتزوج رجلها، و اهله معارضين الزواح، و مرته كل يومية ادك الباب مالتنا و تبجي حتى ترجع الرجلها .. حسيته مو من حقي
عفته ووافقت .. بس غلطي جان الوافقت عليه هو ابن عمه ، و بيتهم كبال بعض ، هو من عرف اني عفت الزواج من عنده اتحلفلي و جان يكلي ( الا اخليج تعيشين شعور الخيانة كل يوم ) شكد ما احاول ابتعد الكاه كبالي حتى امي صارت مرت اخوه يعني لو شما ابتعد هو قريب ، بس والله ما حاولت ولو لمرة اقسم بالجنين اللي ابطني ما فكرت اخون و اني على ذمة رجلي ، بس هو جان مكابلي يصدف يسألني او يحجي وياي بس والله ولا مرة حاولت اخون جان اكثر كلمة يسمعها منها ( ابتعد و خليني اعيش)
اللي اتزوجته هو جان مجبور بيه و اني مجبوره بيه بظروف كلش غلط حاولنا نتفاهم .. ما صار تفاهم ،
هواي جانوا يتمنولي الشر ووصلت رسالة مثل اللي وصلتلك . تكول لرجلي ان مرتك عدها علاقة ويا ابن عمك و تحبه و تصيحه و من هالامور .. هو انجن وكتها بدون ما يسمع مني عذبني و حرك اديه بعدين يلا عرف الحقيقة و ان الرسالة اجت من مرة اخوه جانت حاقدة عليه، اخوه طلك مرته. و اني اطلكت من عنده

صادق :- و ذاك ؟

- اللي جنت متزوجته ابن عمه يعني يا يختارني يا يختار عشيرته اءا اتزوجني يشمرونه من العشيرة، اختار اهله و عشيرته .. و بقيت لحد ما انفقد هو
صارله هاي السنة الخامسة مفقود

- و من ايستي منه اتزوجتيني مو ؟

-مو هيج ، اني جنت رافضه اتزوج نهائي بس امي و صديقتي و الكل جان يكلي شوفي حياتج هو من جان موجود اختار اهله و انفقد انت موكفة حياتج ليش
انسي الفات كله و اتزوجي

- و اتزوجتيني حتى تنسينه

- مو هيج ، اني ما ردت اظلمك وياي و طلبت منك مهلة طويله للزواج حتى اتاكد اني اني الفات نسيته و اكدر اكمل وياك

- و النتيجة

- دوم اكول لروحي اتمنى لو انت الطالعلي بأول حياتي ، جان ما مريت بكل اللي مريت بيه ، و هسه لو خيروني منو اختارك انت ، لان وياك حسيت بقيتي بقدري محد يشك بيه ولا يطعن بيه انسان محترمني و مقدرني ، مو لان اريد اكسب عواطفك بس صدكني والله العظيم وياك قررت انهي الفات و اعتبر حياتي بدت وياك وبس . و هذا اللي جاي اسويه و ما اعرف منو اللي يريد ينتقم مني و يوكعني

- شلون اتأكد الكلام الكلتيه كله حقيقة

- ما عندي شاهد غير الله، و اني راضية بكل اللي راح تسوي لان اني حجيتلك الحقيقة بقت تتقبلها ما تتقبلها يمك .

كام من من مكانه و طلع ، دنكت افرك بوجهي :- اللعي ساعدني دخيلك ، لما اجيت دا ارتب حياتي يخربطوها الية كلها الله ينتقم من الي يريد يدمرني

نزلت جوا، اثار تلكتني :- ديار قريني رياضيات

- صادق وين ؟

- طلع

- روحي هسه من عندي ما الي خلك بعدين

..لليل اجت اخت صادق حسناء و حجت للحجية، نفس الرسالة الواصلة الصادق واصله لخواته و خواته كايلات لامه .. و اكيد نسوان اخوته و اقاربه راح يعرفون

.. منو هذا اللي يريد يفضحني و ليش يسوي هيج، اخابر صادق لو اعوفه ، هو صدكني لو لا .. هو وينه
عقلي كلش تشوش ما كاعد افسر شي
الأمور كلها تلخبطت

اخر شي قررت اخابر صادق، دكيت عليه مرة مرتين .. تلاثة ما رد .. معناها ما صدكني

رحت للمشتمل، كعدت ويا خديجة اسولف الها و اشكيلها .. و هي تواسيني :- لا تخافين والله مدامج طيبة و كلبج طيب الله يوكف وياج و الله ويا المظلوم ع الظالم، حطي عينج بعين الله و كولي حسبي الله و نعم الوكيل

- و الطفل ، اذا يطلكي يبقى بيني و بين ابوه ، ما ادري قراري غلط لما اتزوجت لو شنو ما دا افتهم

- لا غلط ولا شي ترا الشيخ خوش رجال، و هو لو مو زين ما كعد.يحجي وياج بهدوء جان لزمج من شعرج وووو شسوا بس هو تصرفه عقلاني و سمع منج و ان شاءالله يصدكج

دا تحجي، دك الموبايل، باوعته ( صادق ) فزيت من مكاني و كاتلها :- خابر
طلعت برا بسرعة و رديت :- الو

- مخابرة عليه ؟

- اي ٣ مرات و ما رديت

- جوا جنت ازور

- وين انت ؟

- بالنجف، اجيت ازور الإمام علي

- صادق ما اعرف انت مصدكني لو لا، بس اللي دزلك الرسالة دزها لخواتك ولامك و حجو وياي و نكرت كلشي كبالهم، لتكلي ليش نكرتي ما اتجرأ احجي حقيقتي لأي واحد

- يعني الرسالة الوصلتني وصلت اهلي ؟ شوكت هاي ؟

- اليوم العصر اجت حسناء للبيت، اني هسه بالمشتمل، و حق الله ما الي ذنب بشي ولا اعرف منو هذا الجاي يشهر بيه

- روحي هسه روحي خل اشوف الموضوع

قفلت الخط منه ، و دخلت لغرفة اسامة ، خديجة و جهالها يمي كاعدين، هوسة و دوخة و فكري و عقلي بهوسة اكبر من الهوسة اللي بالغرفة

مدنكة و احطة ايدي على كصتي و منين ما اجيبها فضيحة، راح اكدر استمر ويا صادق و هو يعرف جنت احب واحد غيره و عائلتي هيج، و اهله شلون راح اواجهم .. و شراح يطلعون عليه من كلام
شراح اكول و شراح ابرر
ولو اني صبرت .. صادق يصبر على هيج سمعة ؟
راح يتحمل يسمع كل هالكلام لو يعوفني ؟.

دخل اسامة :- هلو ديور

- هلو حبيبي شلونك

- شبيج مريضة ؟

- لا مبية شي

- شو مو على بعضج ؟

- شوية ظروف اني و صادق تنحل ان شاءالله

- اريد احجي وياج بموضوع

-اللي هو ؟

كعد :- بيت ابوي راح يكوش عليه عمي و نروح مفلسين

- و يكوش هو كله بيت حرام

- ديار ابوي جان عنده بيت و باعه و اشترى اكبر منه

- منين غير بفلوس الحرام

- حرام عليه مو علينا احنا مجرد ورثه، و بعدين ابوي ما شفنا منه شي خير على الاقل نستارثه و نشوف الخير بورثه

- عمي شنو موضوعه

-ابن عم ابوي خابرني و كالي على عمي عماد، الا ابوي صارله شهور من مات ما اجا بيته على بالي ولا اتذكرته

- ولا اني ابالي ، انت شوف عمي عماد شبيه و شنو موضوعه و عود اني اخذ قسام شرعي و اخلي يقسم البيت و نمشي الامور بشكل قانوني

- ماشي

... بتت بغرفة اسامة و مرحت للبيت، الصبح طلعت لدوامي، الظهر رجعت للبيت، حجت حسناء :- شو لا انتو ولا رجلج تردون على هالموضوع شنو سالفتكم هيج سهل عدكم منو هذا الجاي يطعن بيج و الحجي صدك، عيالي لو سمعوا انفضح

- تنفضحين ليش اني كلت الج الكلام مو حقيقي

- و شنو اليثبت ؟

- و شنو اليثبت الرسالة صحيحة ليش مصدكة الرسالة و ما مصدكتني، دا اكلج اتهام و اني باقرب وقت احاول اعرف الفاعل و اقاضي قانونيا
غير هالكلام ارجوج كافي .. عيب بحقي لا اني اذيتكم ولا بيوم شفتو من عندي شي
فخلص كافي ..

حجيت و صعدت، لكيت صادق متمدد على الجرباية، بس ما نايم، بدلت و خلصت و هو ما مباوع، تقربت يمه

-وين راح ذاك الحب

باوعلي :- شنو

- الرجال الجان يحبني ويغازلني بكل لحظة ، ولو اجا من دوامة ميخليني افارك احضانه، معقولة كلشي راح

- لو راح انت هم تروحين وياه، بس هاي انت كدامي

-رايد اطلكني

سكت شوية، رد حجه :- للحظة اللي سمعت بيها الكلتي، اجا ابالي اطلك ، استغفرت ربي و طلعت بوجهي لامير المؤمنين دخلت عنده و كلتله اوكفلي يا علي .. لا اكدر استوعب الموضوع ولا اكدر اطلكها و جاه ابطنها ابيناتنا

- اذا لخاطر الجاهل و بطلت تحبني ..عوفني

- ام مرتضى عندي منها ٤ ، و الاربعة ما وكفوني من قررت

من حجه هيج، اتجرأت و فتحت ايده و خليت راسي على صدره و تمددت يمه ، تنهد هو، حجيت :- ما رايدني مو ؟

- بالامام و صفنت .. هو اليدز هيج رسالة شيريد ؟ و على شنو ناوي ؟

- يريد يفضحني و ما يخليني ارتاح وياك

-الواضح هيج، زين اني مرة كابلتها ٣ سنين ما شفت عليها شي غلط رغم اني مركز بطلعتج و طبتج ما فد يوم لاحظت انت عدج شي .. حتى علاقات ويا الجيران ما عدج ، تروحين بطريقج و تجين بطريقج، و اتزوجتج و موبايلج مفتوح كبالي وكت ما اجي ما شفتج فد يوم ضميتي لو سررتي شي من وراي
اصدك واحد غريب و انفذ طموحه و غاياته على حساب انسانة اني حبيتها

.... شلت راسي من صدره ، ابتسمتله :- يعني مصدكني

- الصدكتج و الما صدكتج اني حبيتج ورا كل الصار و انت وياي ما غلطتي ، لو غلطانه وياي ولو حاس عندج شي وانت على ذمتي ما اكتفي بطلاكج ، بس انت وياي ما غلطتي

حضنته .. الحمدلله رب العالمين .. والله العظيم ما عندي شي

حط ايده عليه :- بس منو هذا اللي هيج جاي يسوي ؟
كعد من مكانه :- اهلي عرفوا و حتى اخوتي وصلهم الخبر يعني القصة بعدها ما خلصت

- شراح تسوي

- تشكين بمنو ؟

-اخاف احجي و تفهمني غلط بس اني اشك بطليقتك ، لإن الاعرفهم و يكرهوني ما يعرفون اقرباءك وما اعتقد يهمهم اقربائك ..

- بس بنفس الوقت ام مرتضى ما تعرفج ولا تعرف مكانج اللي بالدورة فمنين عرفت ابوج هيج وضعه لو انت هيج جنت بماضيج و حورتها ؟

- معقوله متعرفين على بعض ؟

- على كل حال، اني طلبت تحديد موقع على صاحب الحساب، حتى اعرف هو من وين فاتح حسابه
من ينطوني الموقع سهل اعرف منو الراسلني و راد يسوي هيج

- تكدر تحدد موقعهم

- اي، عندي جماعة شغلتهم .. و طلبت منهم

وكتها نزل لاخته و نكر كل الكلام و كال الها :- اني ساكت لان اريد اوصل لهذا اللي يدز هيج وكتها احط راسها جوا رجلي و اسحك و اطلع منه حقي

... ثاني يوم .. خابر واحد صديقه مهندس و طلع مكان الحساب من الدورة انطاه الموقع و انطاه نوعية الجهاز اللي انفتح منه الحساب

ركب سيارته هو و طلع الهم

... اندكت الباب .. طلعت ام رافد

صادق :- السلام عليكم يابه

- و عليكم السلام ، تفضل منو

-البيت بيه زلمة حجية لو حجيي ويا النسوان ؟

- خير يمه شنو الموضوع

- و الله الحجية الموضوع ما وراه خير ، اذا اكور رجال بالبيت خل يطلع حتى احجي وياه

- هسه بس خل اخابر ابني

- شوية و طلعت الحجية :- هاك يمه احجي ويا ابني بالدوام

- الو السلام عليكم

- و عليكم السلام، منو انت

- اني واحد معيول اعلى عرضة ، اسمع خوية الموقع و الحساب راح اخليهن عد الحجية ، صدك و ثق بالله العظيم خلال يومين اذا ما طلعتولي الحساب التجاوز عليه و طعن بعائلتي، بيناتنا العباس ابو فاضل لا احط الساتر هنا و انتم عدوي و اسوي بيكم الما تسوى بداعش نفسه.

- اخي لحظة بس خل افتهم شصاير

- اني مرتي تصير طليقة ابن عمك ديار ووصلني رسالة على الفيسبوك بيها كلام و طعن و تجاوز عليه و على مرتي و حددت صاحب الحساب و طلع من بيتك ، نوعية الجهاز و الحساب عد الوالدة
كدامك يومين بس اطلعلي منو التجاوز بحقنا و تجيبه لبيتي و هذا رقمي و العنوان راح اخلي يم الوالدة، يعتذر مني و من عائلتي و يبوس اقدامنا وكتها افكر اسامحكم لو اسويعا عشائريا و اهلي العكل تاخذ حيفها

- اخي لا تهدد

- لا اهدد، اسمع مو انت التكلي لا تهدد ، لما تجي رسالة و صاحب الرسالة يكلك شد كرون وكتها كلي تهدد لو ما تهدد اطلعلي التجاوز و غصبا ما عليكم و الا هي تايهة و اني وياكم و نشوووف

ام رافد :- يمه والله ما عدنا احد غير زلمة مشلول و هالولد، استر علينا ابني فدوة رحتلك

- العندي كلته
عايفهم و طالع ..

اللي حسب ما خابرتني بتول و حجتلي ..
رافد راجع للبيت كالب البيت عليهم هاجم الدنيا ، الجهاز جان النوع ( نوت ٣ ) و هالجهاز جان عند عد ضحى و عد مهيمن ابنه.

فهو شاك يا بمرته مسوية حساب بموبايل ابنها
يا ضحى اللي مسويه كل هذا ..
مهددهن .. مرته حاطة ايدها على القران و حالفة ان ما الها علاقة
اما ضحى مخابرة اهلها و زعلانة بحجة يتهموها و هي تعبت من عدهم صارلها ٥ سنين صابرة و ساكته . باقية مصيحة بالبيت و تبجي و تنكر لحد ما جاية امها و ماخذتها

رافد مخابر على صادق، كايله :- خوية اني حجيت ويا اهلي و حققت وياهم اني ما عدي بالبيت غير مرت اخوي المفقود و مرتي و امي شفتها حجية
مرتي ما الها علاقة بالموضوع

صادق :- هذا الحجي ما تحجي يمي، كلت الك اطلعلي الحساب لو الحجي يصير عشائري وكتها ما تخلص

راجع رافد حاجي ويا ابو ضحى و كايله :- ماكو غير ضحى هي اللي مسويه هالموضوع ، في حال ما تفضها انت و بتك ، اسحب الجهال و كل حق الها ماكو ابيت ابوي و تفلس من كلشي

الموضوع طول يومين .. الاب كلش ضغط على ضحى الى ان كالتله:- اني ما الي علاقة مرت الشيخ هي المسوية هالموضوع مو اني
لا اعرف صادق ولا اهله كل هالحجي من مرته الاولى المطلكها

واصل لخبر لصادق .. جن شلون طالع هيج كلام
مخابر على اخوة ام مرتضى و مهددهم على هالكلام

مرت الشيخ ناكرة و كايله هي الراسلتني و هي الحجتلي الموضوع و اني كلت الها عيب مهما يكو الشيخ ابو جهالي ما اطعن بيه، و اني ما الي علاقة

صادق متخبل و يصرخ :- لو الله شامرني بنص الدواعش ولا حاطني بمشكلة مال نسوان

... التبين بعد جر و عر بالموضوع و طول حوالي اسبوعين وحدة تذبها ع الخ

.. اني صديقة بتول على الفيسبوك دائما اعلق الها .. كبل من جنت ما ماخذه الشيخ جنت احط صورتي الشخصية .. من باب اتفيك بسيارتي و صورة اليه و اني اباب السيارة .. فواضح اسمي و صورتي

ضحى داخلة الحسابي ، ماخذتلها فرة بيه، و باقية تراقب حسابي .. لحد ما اني ناشرة بيوم الخطوبة مالتنا اني و صادق .. مناسبة (تمت الخطوبة ) على الفيسبوك ، و صورة صادق و صورتي على المناسبة و الكل مباركلنا ..

داخله هي و شايفة حسابه و صورته ، راجعة مبحوشة بصفحتي و دازة طلبات صداقة لكومة من صديقاتي والمقربات مني .. حتى رقية بت صادق

بالفترة اللي تأخر صادق و ما رجع ، رقية ناشرة صورة ابوها اللي هو حاطها بالصفحة الشخصية و كاتبة عليها (لا ارجوا من الله الا ان يرجعك لي سالما منتصرا )

اني معلقتلها بوكتها و هواية معلقين .. فعرفت هاي البنية تصير بت رجلي، داخلة على رقية و دازتلها ( شتصيرين من ديار )

رقية تكول .. شفت الرسالة بعد شهر من المراسلة ، كايلة الها :- مرت ابوي اتزوجها قبل يومين

كايلتلها :- ديري بالج منها هاي مو خوش بنية و تضحك عليكم ديار امها هيج و ابوها هيج ..

فرقية ما حاجيه هالكلام لأبوها .. رايحة حاجية هالحجي كله لامها .. امها ماخذه حساب ضحى و الظاهر متفقات على هالموضوع ..
لاني حساب ام مرتضى و ضحى .. بيناتهم طلب صداقة .. فاكيد هن اللي طابخات الموضوع

بس الأثنين نكرنه ..
رافد باقي يلح على ابو ضحى، الرجال قرر يجي هو بنفسه يعتذر من صادق لان ضحى ما قابلة و اصلا ناكرة بس هو راد يسد السالفة

اجانا للبيت صادق ما جان موجود، فمرتضى مخابر على عمه صادق و جاي مستقبل ابو ضحى .. و الرجال معتذر منه هواي و بايس راس الحجية و كايللهم :- بتي غلطت و اني طالب كرمكم و شتفصلون اني البس

فسلام اخو صادق الجبير كايله :- هاي هي عمي اعتبرها مكضية ، سوالف نسوان ولو دخلن بيها الشيخ و اتجاوزن عليه بس بعد سوالف نسوان و اعتبرها طايحة لجيتك

من رايح الرجال، سلام داز عليه رقية .. دكت الباب، كالت :- عمو سلام يريدج جوا

- اي

لبست كلابيه و رتبت حجابي و نزلت ، لكيته يم عمتي ، حجيت :- ها ابو اكرم شلون

- هلا بعد اخوج شلونكم شلونكم زينين

- والله الحمد لله على الله

- الشيخ شلونه بعده بالموصل

- اي والله ما نازل

- يرد بالسلامة، خوية هذا الرجال اجانا يصير ابو وحدة اسمها ضحى اللي مراسلة صادق ، اجا يعتذر و الظاهر هي وكحة و ابوها خطية اجا يتوسللنا و يعتذرلنا على الكلام المطلعته عليج

- هاي هي

- اني هم كلتله طايحة لجيتك، فيا خوية اعذرينا و هاي كدام امي تخابر خواتي و توصلها الهم الكلام تلفيق بتلفيق و صادق ما يرضى احد يجيب طاري عائلته بشينة ... وصيهن و نبهي عليهن كلمة ما تطلع بحق مرت صادق

و انت يا خويه اعذرينا اذا سمعتيلج كلمة مو حلوة، و امسحيها بوجهي

- لا حشاك ابو اكرم اني ما ردت غير ان يعرفون انو اني مو هيج و الصار عداوة حتى يخربون حياتي، ما دام انصلح كلشي ما عندي شي ويا احد

- بارك الله بيح، يلا اني اكوم اروح ، يمه ما تروحين وياي ؟

- لا يبعد امك ما بيه خليني هنا

- براحتج

.. عافنا و مشى .. حجت الحجية :- مرت صادق ذيج هم لازم واحد يضبها

-عوفيها حجية ما دامها خلصت المشكلة و الله خلصني منها .. كافي ما اريد احاسب تحد ولا اريد اوصل لاحد الله موجود و الله اليجازي

- و النعم بالله

عفتها و طلعت لكيت رقية واكفة تستمع، مشيت للمشتمل خابرت صادق كلت اله ، كال :- اي خابرني سلام و كالي

- شوكت تجي ؟

- باجر اذا الله راد

- اي همزين باجر جمعة اني كاعدة ما عندي شي

- مشتاقتلي يرويحتي ؟

ضحكت: لا مو اني .. البطني مشتاقلك

- جايكم باجر و ابوسها لخلقتج و خلقة اللي ابطنج

ضحكت :- توصل بالسلامة ان شاءالله

كعدت ويا روحي صفنت الحمدلله الخلا عندي هيج رجال متفهم جان اني رحت بيها من ورا ضحى و سوالفها .. طلعلي حقي منهم و رجعلي اعتباري كبال اهله .. الحمد لله

صفنت ويا روحي .. اخ يا خالد شفت مرتك شنو سوت بيه .. هاي الضحيت بيك على مودها و اتنازلت بيك في سبيل ترجع الها ..هيج تسوي بيه
مرات اتمنى ارجع لذاك اليوم و اطردها من البيت و ارجع لخالد و اعيش وياه ..

لا والله ارجع للساعة الشفت بيها خالد و اطلع من البيت كبل لا اسلم عليه و اتعرف .. جان وكتها اني ما اتاذيت و امي ما اتأذت و لا اتورطت ويا امجد ولا خربت علاقتي بامة و ابوه

حبيته هواي و دفعت ثمن حبه غالي
اااخ لو بس تطلع من بالي ، لو بس تعوفني يوم واحد بس و ما اتذكرك و ما ينعصر كلبي عليك ..
لو بس اكدر اسويها و ما افكر بيها ..

ثاني يوم نايمة ، دكت الباب اثار، كالتلي :- صادق جوا
طفرت من نومت و نزلت اله ، كاعد يم امه ، دنكت بست راسه :- الله يساعدك ابو رضاوي

- هلا عمري شلونج

- تسبح

- تسبحيني ؟

خزرته و اشرتله امه كاعدة و بته واكفة .. ضحك و انتجا و كام ، كال :- والله تعبان و شابع وصخ ما سابح و جوعان حيل جوعان

- لعد احضرلك الاكل بين متسبح

- شتسويلي

- اطلعلك دجاج

- لا تكليلي دجاج ولا لحم ولا مرك ولا تمن بس تذكريهن تكلب معدتي ما اريدهن

- لعد.شسويلك ، جبن ؟

- بربج جاي من حرب تحطيلي جبن؟

- احتاريت والله

- فتح الثلاجة ، لكا معلبات باگلة .. حط اثنين و كال :- سويلي تشريب باكله و كثريلي بالبيض عليهن

باوعتله مبتسمة :- ادلل

- ادلل بس بهاي لوووو

- روح لا تجي بتك

- بتي منو شو ما اتذكرها ؟

- اييي راح يسويلي نفسه العاشق الولهان النسى كلشي بمجرد شافني

- تقرب حيل :- لهسه ما عرفتي اني عاشق وولهان بيج

- لا عرفته

- و ما دام عرفتي شراح تسويلي

- تشريب باكلة

رفع راسه و هو يضحك بصوت عالي ، باس خدي و كال :- يلا كملي

انداريت من عنده، دنكت اطلع الجدر، هو واكف وراي :- ادليج على الجدر

- اندله والله روح

كمت و حطيته على الكاونتر ، مد ايده من بين خصري و كال :- لعد خل تعلمج شلون يفتحون القوطية

- هههههههه صاير وكيح حيل

- فوك ما رايد اساعدج

بقى يفتح بالقواطي و هو حاضني، حس احد بالممر ابتعد من عندي بسرعة ، و مشى للطباخ .. ضحكت :- عوف منك اني اسوي روح اسبح

- خليني واكف بواهسج مرتاح ما عدي شي

وكف هو يسوي التشريب ، و جيبي و انطيني و ناوشيني ، و هو بس واكف .. تالي كال :- ها شلون سويته ؟

ضحكت :- يخبل يابة غير انت التعبت بيه

- عمرج كله مسويه هيج تشريب ؟

- لا والله

شال الصينية و حطها بالكاع، صاح ابنه مرتضى و بت رقية و اني كعدت و كعدنا ناكل و هو يشيل ويوكل بينا

.. العصر و هو نايم .. اخذت موبايله ابحوش بيه
هو مو كلش بالفيسبوك .. ميعرف غير ينشر و يعلق و يشارك منشورات غير هيج ما يعرف

فدخلت على طلبات المراسلة لكيت عندة ٦ رسايل .. ما فاتحهن ولا واصلهن .. اتعجبت امجد مراسله
دخلت على الرسالة مكتوب بيها

(السلام عليكم ... اعتذر عن الازعاج اني طليق ديار وسمعت بالمشكلة الصايرة وبس حبيت اوضحلك فد موضوع خاف واصلك اني طلكت ديار وردت اكتلها غسل عار حبيت اوضحلك ان اني مثلك جان واصلتني رسالة بس التبين ديار بريئة منها ما جاي ادافع الها بس ردت احجي الحق لان هي بدت حياة جديدة وياك و ما رايدها تتضرر ، البنية الها عليه فضل خدمتني و خدمة جهالي و مرتي المرحومة و اهلي و ما فد يوم شكت من عدنا و لا طلعت علينا كلام مو زين و اني جاي اكلك كلمة ذمة الكلام الطلع عليها مو صحيح )

.. باوعت بالرسالة .. الحمدلله حليبه طاهر و ما رضى عليه الكلمة الموزينة، شوية و كعد صادق كلت اله على الرسالة ، باوعها و قراها و مسحها و ما رد على امجد.

... مرت هالفترة بخير و هدوء ..
اني وياه متصافين .. حملي اكتشفت بيه بنية .
و هو فرح بيها هوايه .. بس تبقى فرحتنا الجبيرة لما تخلص معركة الموصل و يرجع النا منتصر

يوم ١ /٧ ... راسلني و دزلي مقطع اله هو و الفصيلة مالته كلهم لازمين الاسلحة مالتهم و يهتفون بشوارع الموصل ( احنا الردينا الموصل و داعش ذلينا )
و هو واكف وياهم ورافع البيكيسي مالته و يهتف بيه و الفرحة واضحة على ملامحة

دزيتله ( خلص انتصرتوا مو )

دز:- طهرنا الموصل بالكامل و طردنا اخر نجس داعشي منها ، و بحيل الله ترجع لاهلها

- الحمد لله رب العالمين ، ربي والله فرحانه ، يعني راح يعلنون بيان النصر

- هاي تبقى يم رئاسة الوزراء لما يجي حيدر العبادي لهنا يعلن بيان النصر بس احنا انتصرنا و انتهت المعركة

- الله يحفظكم و يرحم كل الشهداء يارب ، متتخيل فرحتي شكد ، يعني راح ترجع مو ؟

- لا ننتظر بيان النصر بحضور رئيس الوزراء بعدها ارجع

- ان شاءالله

نزلت للحجية .. حجية حجية انتصرنا انتصرنا

- خلصت ؟

- اي انتهت معركة الموصل انتصرناااااااااا

اجت رقية :- يعني بابا راح يرجع

- لا ينتظر بيان النصر و بعدها يرجع

بعدها بعشرة ايام يلا رجع .. ذبح ٤ ذبايح بثواب شهداء الحشد الشعبي و شهداء العراق .. وزعنا ٣ وذبيحة طبخ و عزم الكل
ومشغلين بدي جي اناشيد ..
....بولدنا و حشدنا و بالجيش العراقي
انتصرنا و ثبتنا منو الشعب العراقي
يا شيعة و يا سنة ابن الاصل باقي
مسيحي ويا كردي عراقي يعني راقي

... ودك لافته مكتوب بيها
شكرا لابطال الحشد الشعبي المقدس
شكرا لابطال الجيش العراقي الباسل
شكرا لابطال الشرطة الاتحادية الغيارى
شكرا لابطال الذهبية و الرد السريع
شكرا لكل انسان ساهم بتحرير العراق
و الشكر الخاص لسماحة المرجع الأعلى علي الحسيني السيستاني على الفتوى المباركة التي انقذت العراق.

.. انتصر العراق و اعلنوا بيان النصر و انتهت المعارك ورجع صادق لبغداد .. نقل شغله هنا بالهيئة و كل فترة يروح خفارات على السواتر

جنت كلش فرحانة من خلصت المعارك ورجع للبيت، لأن من هو بالبيت كلش اطمن و ارتاح و بالي صافي، بس من هو يروح اضوج .

مرت الأيام و حملي يوم عن يوم يكبر و يزيد ..
صادق يريد اسم البنية ( زينب) على اسم اخت الامام الحسين .. و اني اريدها اسم غريب و حلو و اريدها ( ايلين )
ما يقبل .. و اكوله

- دخيل السيدة زينب على راسي والله ، بس اريد اسم ما مستخدم هواي اريد اسماء غريبة

- لاااا استغفر الله احنا مسلمين لازم اسمائنا تكون اسلامية

- اسلامك بينك وبين ربك الأسم عليه

- اذا بينا وبين ربنا اندثر بعد محد يحجي بيه، ما يصير اريد الاسم اسلامي

- و هسه دخيل الاسلام زصل يم اسم بتي ، صادق اريها ايلين

-- لا زينب

- ايلين

-زينب

-هو شنو قابل انت الراح تخلفها ترا اني

- اذكرج لو ما يحتاج ؟

ضحكت :- اييي بس اني الراح يطيح حظي لحد ما اطلعها

- سؤال هي تتسجل بأسمي لو بأسمج ؟

-بأسمنا اثنينا

- احجيلي يصيحوها باسم صادق لو ديار

- صادق

- شفتي ؟

- هو شنو شفتي ، لا تخليني ما اطلعها من بطني، كلت الك اني اسميها كافي عدك ٤ جهال و اسماىهم كلها اسلامية

- و من تالي تسوينا يهود

- هو اسم ترا، يهوديييش ؟

- اكو احلى من اسم زينب ؟.

-اي ايلين

- لا بارك الله بيج

- يااا ههههههههه

- علمود اسم

- اسم هذا اختاره امير المؤمنين ، انت ليش هيج صايرة كافرة و ادورين سوالف كفار

- واني كفرت بس على ايلين

- هاي اسماء كفار

-صاااادق

- راح فدوة صادق لهالخلقه اليحبها

- ما دام تحبني وافق

- ماكو احلى من اسم زينب

صاحت الحجية :- قمرر قمرررررر تتسمى قمر و اليغير هالاسم معناها لا ما يحترمني و لا اعرفه ولا يعرفني

انلصمنا اثنينا .. عاد شفنا حل وسط .. هم اسم حلو و خفيف و هم مذكور بالقرأن و اسلامي حسب ما يريد البطل الاسلامي مالتي

.. جنت انتظر ولادتي يوم يوم .. على كد ما فرحانة ببنتي اللي راح تجي .. على كثر ما متخوفه حيل من الولادة

جنت اسمع الولادة صعبة حيل فجنت متخوفة منها شلون راح اجيب و شلون راح اطلعه .. فقررت اجيب عملية احسن ما اولد و اتوجع

بس صادق ما قبل يكلي :- شنو يشكون بطنج و انت ما تحتاجين ، مو زين عليج .. التسهيل من الله تحمليها ساعات

بس اني عاندت العمليه .. تالي هو شافلي مستشفى تولدني طبيهي بس ابنج نصفي يطلعون الطفل بلا ما احس ..

اتفق وياهم على يوم الولادة ويا ما خلصت شهري، اخذني للمستشفى ..
شنو رحت غير معدلة نفسي .. كلت هو اني ما وراي صلاة بعد فخل اصبغ اضافيري هم ..
صبغت و سويت شعري و حطيت فاونديشن و ومسكارة .. و مكياج خفيف
كلت هو شعليه ولادة و ابنج بعد ما اتوجع

بس جنت بطرانة كلش بطرانة
اثاري البنج باخر عشر دقايق ويا الولادة ..
واني قبل ٥ ساعات بدت عندي اوجاع الولادة
كل ربع ساعة انذبح لحد ما صارت تتقلص المدة
كن البجي و الوجع و اني امسح بعيوني، الكحل و المسكارة سوا عيوني جني باندة و مجرور لاذني من امسح جني امون

شعري على كثر ما املخ براسي من الوجع صار عطابة هلكبرها ، يا كوشتي و يا كفشتي

تالي باخر لحضات من الولادة بنجوني و صاروا يولدوني .. الطفل اندار راسه و اتعسرت الولادة و حولوني عملية قيصرية

اخذوني ع السديا يمشون بيا و اني اصيح :- اخ صادق اااخ كلت الك اريد عمليييية عذبتني رااااااح اموت

بوكتها خطية حيل انقهر ، باقي بالباب يدعيلي
خديجة و اخته جانوا ويا، جيبوني بنج عام ..

طلعوني من العمليات منتهية .. الطفلة جانت تعبانة فحولوها للعناية، صادق جان كلش متوتر خايف يصير عليه شي ، تكول خديجة ما كعد ولا استقر خلصها طول ما انت بالعمليات هو يروح يرجع يدعي لحد ما انطوهم الطفلة

ماخذها هو و اخته، مامن الطفلة و راجعلي .. اني خلوني بالافاقة ما طلعوني لحد ما كملت هذيان يلا طلعوني

لأن تعبت و كلش تأذيت بالولادة .. فسمى الطفلة ( ايلين ) لخاطري حتى شوي يفرحني

طلعوني الالم يذبح بجسمي، طلع هو بوجهي باس راسي و كال :- الحمدلله على سلامتج عمري

- راح امووت صادق راح اموت

- هانت ان شاءالله هانت

ودوني لغرفة خاصة بيه ، وهو واكف على راسي ولازمني :- ديورتي رويحتي يبعد حيلي انت ، والله يابه لو ادري بيج هيج تتاذين فلا اخليج تولدين طبيعي جان اختصرتها عليج بعملية

اني لازمة بايدة و ابجي من الوجع و هو مدنك علية و يمسح على شعري .. اجت ممرضة انطتني مسكن و غيرتلي ملابس العملية و نمت

لما نمت هو راح للطفلة .. ساعتين و طلعوها ، جابها خلاها بمهد كزاز يمي، فتحت عيوني، كوة انطق :- صادق الطفلة وين ؟

- هاي يمج حياتي
شالتها خديجة و جابتها يمي :- هاي باعيها اشونها صدقة تخبل

حسناء :- تشبه صادق

خديجة :- لا معاني امها تشبه ديار

صادق :- المهم الطفلة و امها بخير عسى ما شلون ما تكون، سالمات كافي عليه

يومين يلا طلعوني من المستشفى، جانت العملية عليه حيل صعبة خاصة شتا .. كلش تاذيت
صادق ما فاركني ابد ..
رغم خديجة و اخته موجودات .. بس هو ما عافني
جان يسهر الليل كله يم راسي وراس الطفلة
يسويلها ممي و يشيلها و ينومها .. بس من تحتاج كماط يروح ينطيها لامه تكمطها و يرجعها يم راسي

اثار و اسامة طارو بالطفلة .. اول بنت اخت الهم
اثار اشترت الها من يم مدرستها خراخيش و العاب جهال .. اما اسامة فغركها للطفلة ملابس
لان مول مال اطفال كدام محلة
كل يوم و زارك جايب الها ملبس

بيت ابوي انباع .. و اتوزع علينا .. عمي اخذ من عنده ٢٠ مليون ، الباقي كلت اله لا توزع ولا تنطي من عنده، اشتري بيت و خليه الك .. ضمان لمستقبلك

فعلا دور بيت و اشترى قريب من عدنا بفرعين ..
بهالفترة اجوا خطابة على خديجة يصير جيرانه بالفرع متزوج بس زوجته مريضة واجا خطبها من صادق
اجا فاتحني بالموضوع .. كلت اله احجي وياه
فاتحتها .. شفتها مرحبه بالموضوع ..

بلغت صادق ورد جواب للرجال .. كاله اصبروا عليه بس الكا بيت ايجار حتى انقلها بيه و نستقر
صادق عرض عليه بيت اسامة و كاله اني راح احجيلك ويا اخوها يتساهلك

.. و بالفعل اسامة وافق .. سوينا حفلة صغيرة بيناتنا و اتزوجت و اخذت جهالها وياها، انتقل مرتضى من بيتنا الى المشتمل .. صار بس اله و لاسامة

الحجية امه تحسنت و كامت تمشي على رجليهة و فرحنا بيها هواي و ناذرة هي ذبيحة لابو الفضل العباس لو كامت على رجليها .. ذبحت و عزمت

بيوم العزيمة ، شفت اثار مو على طبيعتها
كل شوية تصعد و تنزل .. و تراقب بالباب ..
لاحظت و سكتت ..

لما صعدت .. صعدت وراها .. شفتها دخلت بغرفتي و تباوع من الشباك للكراج ، باوعت وياها .. فزت

- شبيج ؟

- ما بيه شي

- تباوعين لمنو ؟

- ولا احد

- اوك، شو انطيني الجهاز

- شنو ديار كلت الج ما عندي شي

سحبت الجهاز منها، شفت الها محادثات ويا اكرم .. اكرم يصير ابن سلام اخو صادق .. تخبلت :- لج انت بعقلج ؟ شلون هيج تسوين ؟ ما تخافين تفضحيني كدام سلام

- ما سويت شي غلط احنا نحب بعض

- و تحجيها حيواااانة والله من اشوفج مراسلته لو حاجية وياه الا اسحب الجهاز من عندج و فلا اخلي يمج بعد

- يريد يتزوجني

- ولج لا تخبليني زواجيش و انت بهالعمر استحي على نفسج عييييب

كمت ارزل بيها و سحبت الموبايل من عدها ... بس هي ما اهتمت ولا اهتزت ، راحت اخذت ايلين بحضنها و ترضع بيها

لليل صفت العزيمة .. اجاني اكرم للمطبخ ، هو بكدي يطلع .. جبير ، جنت واكفة وحدي ارتب ، فات و كال :- السلام عليكم

- و عليكم السلام هلو اكرم

- ام ايلين اني جاي احجي وياج .

- على شنو ؟

- اني اعرف انت عرفتي بقصتنا اني و اثار ، بس اني رايدها من صدك و رايد اتقدم الها

- تتقدم الها شنو اكرم البنية صغيرة ثالث ما مخلصة شنو زواج شنو حب ، اسامة لو عرف يكلب الدنيا فانساها احسن

- بس اني احبها

- و هي صغيرة مو مال حب ، فعيب شيلها من بالك

دخل صادق للبيت ، من سمعه اجا هو راح ..

رفضت زواجه لان اثار جانت صغيرة و طايشة مو مال زواج فردتها تكبر و توزن افعالها يلا
الانسان بوقت مراهقتها حبه و افعالها كلها تكون بطيش فما ردتها تقرر غلط ..

بس هي بدوني و من وراي استمرت بعلاقتها وياه

مشت هاي الفترة بهدوء ..

خالد ما بين ولا لكيناله اثر غير رقم سيارته
مكتول عايش الله اعلم ..
بس عايش كل هالمدة .. تحتاج معجزة
فقطعنا الامل برجعته ..

ابو رافد مات .. انقهرت على موته و ترحمتله

ضحى سقطت عنها شرعية الزواج من خالد و صار بامكانها تتزوج، فاتزوجت رافد هم رجال الها و هم عينه على بنات اخوه
وكعدها ويا منى بنفس البيت
العرفته من بتول بس المكافش بيناتهم ..

الصار بعد زواج رافد .. باع سيارته و دز فلوسها لرائد باعتبارها هاي فلوس حصته من الورث .. و ماخذ وكالة من خواته حتى يبيع البيت و يشتري بيت اكبر .

هن انطنه وكاله شرط يتسجل باسم امهن
هو بايع البيت و مسجله باسمه و مكوش على ورث ابوه بالكامل .. ضحى زوجته و بناتها عنده
و خواته حرمهن من الورث
رغم هاي ام رافد صافه وياه ضد بناتها
تكول الولد احق بالورث شنو النسيب وياخذ حق

البنات كلهن زعلانات على امهن و على اخوهن ..
طلبت من عندي بتول يرفعن دعوة على رافد لان بالوكالة اكو شهود ان يحط الورث باسم امهن مو باسمه و هو حرمهن .. ورادني اتولى القضية

حجيت ويا صادق، كال :- اششش انسي الموضوع وما ينفتح ممنوع

- هذا شغلي صادق

- شغلج بوضيفتج عمري ما محتاجة ترفعين قضايا، لا ادخلينا بسين و جيم ولا اتورطينا ويا ذيج الملة ، كلشي ما مسويتلهم و تهموج باطل لو تتقربين منهم شيسوون بيج

حاولت وياه ما قبل .. فتعذرت من بتول و هي قدرت موقفي .. وكلت القضية مالتها لعذراء صديقتي هي التولت الدعوة

فصارت صداقة بيني و بين بتول و عذراء .. كلش مقربة من عدنا هي .. و ما اعرف ليش احس بيها ريحة الماضي ..

صح الماضي جان مر .. بس كلبي مستحيل ينسى حلاوة الماضي .. من احجي وياها احسها شي من ريحة خالد

... مرت طل هالايام هدوء و طبيعية و الحمدلله حياتي جانت ماشية تمام ..

لحد يوم ١ اكتوبر / ٢٠١٩
جان يوم مظاهرات العراق اللي الشعب قرر يخوض حرب اخرى من بعد حرب داعش، بس هالمرة ضد الدواعش الحقيقين و هم الساسة الفاسدين.

تنظمت مظاهرات و عرفت من اسامة ان هو العصر بساحة التحرير و حضر لافتة كاتب بيها ( نازل اخذ حقي )

كلت اله :- اخاف عليك اسامة ما الي غيرك بهالدنيا

- اذا اني و غيري ما طلعنا منو يطلع ؟

- يطلع اللي يريد يطلع بس انت اخاف ذوله مجرمين اسامة تتذكر شسوو بمتظاهرين البصرة مراح يرحموكم مستعدين يقتلون الشعب على بكرة ابيه و ما يتنازلون عن كراسيهم

- لا تحاولين ديار ، اني نازل اخذ حقي.... يتبع

الجزء الثاني من الحلقة الاخيرة

.......

اسامة :- لا تحاولين ديار نازل اخذ حقي

-ما محتاج حق انت عندك خير من الله

- و الما عدهم الهم الله مو ؟

ما سمع مني و حضر ملابسه و الافتات مالته و راح الساحة التحرير

جتن اول يوم حشود مليونية بساحة التحرير .. المحافظات الجنوبية و الوسط كلها طلعت
بصرة
عمارة
كوت
ناصرية
سماوة
ديوانية
كربلاء
نجف
وبغداد
كل العراق انتفض بصوت واحد و هو ( اريد وطن )

جان بالي كلش مشغول، و صادق باله يم مرتضى ... لان ماكو و ما كايله اني بالمظاهرات . كايله اني يم صديقي

لثاني يوم الظهر انكطع النت و الشبكات صارت زفت .. يخابر صادق على ابنه و ماكو ميحصل

نسمع ان صارت مجازر و متولين المتظاهرين بالمي الحار و القنابل الدخانية ، كلبي يم اسامة .. متت اريد اعرف اخباره ماكو

حصلته كوة حجه ،، سألته عن مرتضى انقطع الاتصال
فرضوا حظر تجوال .. الشارع كله تايرات محتركة
الجو كله دخان ومغيم ..
و الاخبار ما اطمن

الحكومة تتوسل بالشعب يرجع بس الشعب كلش تعب ما يصدك باي كلام او قرار منهم .. رايد تغيير جذري
رايد تغيير الطبقة السياسية باكملها

اتصل صادق على مرتضى حصله، جان كلش متوتر ، صرخ بيه :- لك انت وين صارلي يومين اخابر علييييك ما ترد

- بابا اني ويا صديقي

- احجي الصدك لا تجءب انت بالمظاهرات ؟

- اي بابا

- ولك بابا ذوله قتله تعتقد يخلوكم عايشين و ينطوكم كراسيهم يكتلونك ارجع ابني

- من رحت للحشد خفت الموت بابا ؟، ذوله اخطر من داعش على العراق يابه، و اذا انتم حررتوا العراق من داعش احنا نريد نحرر عراقنا منهم و من امثالهم ، تراجع ما ارجع ، ادعيلي ارجع بالسلامة و اذا ما رجعت ابريني الذمة

حاجي هالكلمات و مودع ابوه و قافل الموبايل
صادق متخبل، لبس ملابسه، كلت اله:- وين متشوف الدنيا هوسة وين تريد تروح

- اذا ما يرجع على الاقل ابقى وياه هناك احمي ما اكدر اعوف ابني لللرايح و الجاي اعرفهم عصابات ذوله وولدنا الغيرة ماخذتهم و لو هسه ٤٠ مليون عراقي يموت ما ينطوها.

لبس و طلع لساحة التحرير .. نباوع التلفزيون هوسه كل قناة تكول شكل .. كلوبنا نار .. كلش تعبت نفسيتي و اخوي هناك ..

ما جانت اكو نسوان بدايتها بس ولد و لو بودي اتبع اسامة لساحة التحرير و اكعد كباله و احاميله عن كلشي حتى ما يتأذى ..

نت انكطع صار الموبايل اتاري ، و التلفزيون مبي اي برامج .. كلها تغطية للمظاهرات ..

عاد اثار و رقية بدعن .. صارن يطلع الاكو و الماكو و يسون اكلات و حلويات ..

دخلت المطبخ .. لكيت مسويات بيتزا و خلية النحل وكيك .. و ايلين يمهن ملمطخه روحها بالطحين

- اووو شمسوية بنفسج يا ماما ليش هيج

رقية :- ما تقبل تطلع بس اوديها يم بيبي تبجي

- بالي يم مرتضى و اسامة كلش .. حيل تعبت

رقية:- ما عليه شي اصلا لو اني ولد والله اروح الساحة التحرير و اكعد هناك

- ان شاءالله بس كون تعدي سلامات على الشعب العراقي

الطرق مقطوعة و البيت شما انظفه مصخم .. لا مدارس ولا جامعات .. رجع صادق بالليل

- ها بشر

- شبشر الشباب نايمة بالشارع تريد حقها و الحكومة معنطزة متوليتهم قنابل ، كلت لمرتضى لا تتقرب من الجسر ولا يغرونك ساتر ما ساتر معليك اكعد بساحة التحرير و اسكت

- ترا على ابوه دمه حامي

- ذوله حكومة ديار

- و داعش جان اخطر

- داعش جنت شايل سلاحي، ذزله طالعين بطرك فوانيلهم و محد راحمهم ينطونهم الطلقة بصدرة و لا جنه شاب عراقي كل الرايده ( وطن ) لا الد اعدائهم
يحسونه انسان يهدد كراسيهم فقتلهم هم و الماي سوا

- بالي يم اسامة

- هم واكفي سويا ، بس تدرين بالله افتخرت بيهم ، العراق بخير دام بيه هيج شباب غيارى ، الغيرة عدنا ما تنتهي تتوارثها اولادنا ، كل واحد بيهم دمة يفور و هو يصيح ( بالروح بالدم نفديك يا عراق )

- غير لو هالوطن مقدرهم

- شبيده ديار ؟ .. العراق جان هو ابو العالم بسومر و اشور و اكد بابل ... احنا العالم بأسرة .. بس تكالبت علينا الدول كل واحد يريد ينتجي على ظهره و يرتفع
بعد ما جان الكل جواه

- الله المعين

- شسوا البنات اليوم

- اووو لك غير طلع ماكو احد بندارتهن

- هههه فدوة

- وبتك هاي بنصهم طامسة بالطحين

- بعد ابوها و كلبها ، بالله باوعيلي ، لول ، كولي بابا

- ببااااا

- وين بوستي

- بح بح

- ليش بح ، اريد ابوس

ديار :- تعال بوسني اني اني

صرخت :- لاااااا

صادق :- لا لا بعد ما اريد لول ، اني اريد ديوري حبيبي ، شو تعاي حبيبتي انطيني بوسة

هو سحبني اله و هي وكفت تملخ بروسنا، دفعتني من عنده تلزم راسه و تصيح :- يااااه اددي
عود وخري هذا مالتي

هو شالها و شمرها على السرير و ياكل ابطنها و هي تضحك سكرانة من الضحك .. اباوعلهم و اضحك

ردت اكوم ، باوعتلي و تصيح :- تع تع تع

رجعت :- ها ام السان شتريدين

نامت و فتحت اديها و خلت راس ابوها على جهة و راسي على الجهة الثانية و تلولي : لللللووووو

هو فرحان بيها طاير يبوس و يعض بخدها و هي تصير عصبيه ، تضوج من لحيته على خدها و تصيح :- نااااااان

و هو يصيح ( حاضرررر سيدي ) وينام بحضنها ..
حضناها اثنينا و نمنا .. طبعا من وراها صرنا اخوان لأن ما تقبل ال تنام بحضنا و لو شلناها شوية تحس بسرعة تبجي

كمت افرشلها هي وياه بالكاع من تنام هو يسحب نفسه على كيف ويجي يمي ..

مدلله عنده الى ابعد الحدود ، لان اجتله على كبر كل جهاله كبار اقل واحد بيهم بالخامس ابتدائي . فمددله تروح لبيبيتها تلعب بحالها لعب ما تحجي
تروح لخوتها يموتون عليها
اما اسامة و اثار فالله ما خلق غيرها عدهم

اثار امها الثانية ، اذا بجت ايلين هي تبجي من يمها ، تكلب الدنيا ما تقبل ايلين تبجي و هاي شايخة على الكل منين ما تمد مدلله

... مرت ١٠ ايام مال المظاهرات .. راح بيها قرابة ١١٦ شهيد و ٥٠٠ جريح ، جان اكو قناصين يستهدفون المتظاهرين واحد واحد و يكتلون بيهم

فبعد وعود كثيرة من الحكومة باصلاح الوضع المتظاهرين رجعوا لبيوتهم و انطو مهلة للحكومة ١٥ يوم ، اذا ما طلعوا قتلة المتظاهرين خلال هالايام يرجعون بمظاهرة اقوى ب٢٥ اكتوبر

رجع اسامة و رجع مرتضى .. ورجعت الامور طبيعية
اني اداوم اعتيادي و اثار مدرسة و رقية جامعة ، و ايلين يم عمتي

خلال ال١٥ يوم هاي .. صادفت الاربعين مال الأمام الحسين .. الزوار تمشي بالملايين ..

دخلت للغرفة مال الحجية و لكيتها تبجي :- ها خير حجية ؟

- مشتاقة لابا عبدالله

- صدك جذب حجية و هذا البجي بس لان مشتاقة

- انت ما تحسين بنار كلبي صارلي ٦ اسنين ما زايرته ولا ماشية باربعينة الله ما مسهلي الزيارة

- تريدين اخذج

مسحت وجهه بشيلتها و حجت :- تكدرين ولج

- والله اخذج قابل شنو صعبة ، عندج كرسي متحرك و امشي بيج ، بس شيقنع صادق ، يكول زوري ابيتج ما يقبل نمشي

- خلي عليه

- والله اذا قنعتيه اروح شعندي اكيف

والله صدك .. نزل صادق و فات سلم عليها و هي طلعت سوالفها الحجية سوت روحها مريضة

كال الها :- سلامات يمة شبيج

- شفت حلم مو زين

- شنو هذا الحلم ؟

- جن واحد بالحلم كالي اذا ما تروحين لابا عبدالله باجر تموتين

- يعني لازم تروحين اليوم ميصير باجر لان تموتين اي

- والله هذا ذكي يعرفج اذا رحتي باجر ما تلحكين على الاربعين

- يعني اروح اليوم؟

- يمه ترا كلنا نموت

- و انت رايدني اموت

- لا اسم الله عليج بس منو ياخذج ؟

- ديار

- لا لا لا .. ابد انسيها

- اكلك اذا ما رحت اموت باجر هاي شبيك

- لا يمه ممنوع ديار ما تروح

- اكلك، هي من تروح للدوام و تمشي كبال الف زلمة ما عليها شي من تاخذني للزيارة خفت عليها والله يصويدق طلعت عاق و ما تحب امك

- يمه اخاف عليكم والله تتورط بيج بالطريق و انت مريضة

- هذا طريق ابا عبدالله هو بكيفك محد يموت بيه

دخلت اني و كلت اله :- شبيك يا عيوني شو هي الدنيا كلها طالعة خل نروح

- شرط

- شنو ؟

- تلبسين عباية و جواريب ، ضحك ماكو ،تصوير ماكو ، يم كل موكب واكفات تاكلن ماكو ..

- تامر غير يدلل الحلو كم صدوقي عندي و اكوله له

ابتسم هو و كام يباوعلي بنظرات بطرف عيونه، كال :- ماشي

رقية سمعت كالت :- اروح

اثار :- اني اروح اشيل ايلين من ديار

صادق :- بقت عليه اني هم اروح

ديار :- صدك ؟

- اي والله اخذكم كلكم ازوركم و ارجع خوما اخليجن نسوان تمشن وحدجن

- يلا ما اكيف علوا

صدك لبسنا و بدلنا، اسامة و مرتضى قرروا يطلعون ورانا ، و اني و صادق و الحجية و اثار و رقية رحنا .

نزلنا بالدورة من الدورة مشينا مشي ، و الحجية مخليها بكرسي، هي تمشي بس مو مال مشي قوي ما تكدر ، حاطها هو بالكرسي و يدفع بيها و شاد ايلين بعكاله على ظهره و يمشي

اخذنا شحط ما خلانا نرتاح ولا دقيقة ، لا نوكف على موكب و ناكل لا نستريح ، اثار كامت تبجي من كد ما تعبت و هو يمشي ولا عليه

كلت اله :- صادق والله تعبت هلكت بس خل نرتاح

كعدنا نستريح ، راح جابلنا لفات كص لحم و داطلي و عصير نومي بصرة و زبيب .. فرشنا علاكة و كعدنا ناكل، هو تمدد و حط راسه على رجلي، ايلين اجت نامت بحظنة

- متاكل ؟

- لا يرويحتي الف عافية

اكلنا و شبعنا و كعدنا نسولف، المواكب تمر زنجيل وصوت باسم الكربلائي ( يسكت العالم بأسره و نستمع صوت الحسين )

.. كملنا سوالف و هو نامله فد ساعة و كعد كال :- يلا خل نكمل ..

مشانا مشي ما ماشية منه بحياتي ..
تقريبا بنص يوم وصلنا لعون .. جان يكول :- يلا هاهية ارفعو اديكم و سلمو خل نرجع

اباوع اثار و رقية يريدن يبجن ، امه كلبت وجها ، جان كلت :- شنو حبيبي جايين نشم ريحة من بعين غير نزور

- روح الحسين بكل مكان زوروا منا الا توصلون

الحجية :- هو انت مان علينه بهالجية طلعتها من خشونا زلم خشنه ما توصل بيومين و انت وصلتنا لعون بنص يوم

هو تعب ايلين على ظهره و يدفع .. و بعد خلصت لوه خشمه بعد لو الدنيا تنكلب ما يفك .. و امه ضاجت كلش من عنده .. و عاندت الا تزور

تحاجوا هناك هو يكول نرجع و عي تكول لو اندفن ما ارجع و هو بقى يسب بالساعة الجابنا بيها

تالي استغفر ربه و كام اخذت ايلين من عنده رغم هو الما يقبل ينطينياها بس كلتله ما عندي شي نتناوب عليها اني و البنات

مشى بينا مشي طيارة .. غير مشكنا غير اتفركست رجلينا واحدنا كام يمشي جنه جنه انسان الي من التعب

حس بينا تعبنه .. كام يصعد بينا سيارات .. من سيارة لسيارة يتنقل بينا الى ان كدرنا نوصل الامام الحسين
طبعا ما كدرنا نفوت لان الصحن مخصص بس للزلم باب النسوان فاتحي للرياجيل
فصادق راح و بقانا كاعدين برا

اباوع كل مكان بالامام اتذكر ايامي هنا .. احلى ايام ..
اخذت الحجية ورحت للموكب مال بيت السيد .. اني اعرف وين موقع .. بس دخلت عرفتني مرت ابنهم
تلكتني بالهلا و الحاضن و المباوس
كعدتنا ووزعت علينا مي بارد كلاصات و كعد تسألني على اخباري و اني اسولف الها

كلت الها :- احجيلي الحجية شلونها

- اووو الحجية انطتج عمرها صار سنتين

- يااااا

- اي والله ماتت خطية بسرطان بالراس

- قهرتيني والله
حطيت اديه على خدي و اباوعلها و دموعي كامت تكت .. شكد علمتني شكد ربتني الله يرحمها برحمته الواسعة

- شنسوي هذا الالله كاتبه بعد

- سيد جعفر اشلونه

- سيد جعفر اتزوج

- صدك

- اي والله ذيج مرته

باوعتله . محنكة و عبايتها على راسها .. حجت :- خلفت من عنده اثنين ولد

بقيت اسولف وياها على اوضاعهم و رجعت لذيج الايام الحلوة ويا سلمان ايام جانن طيبات .. شكد بقيت اترحم لسلمان بذاك اليوم

بعدها رجع النا صادق لكينا عصبي لان ما لاكينا .. اخذنا وكوة بألف يا الله رجعنا للبيت بس شرجعنا جنازة من التعب . فدوة للامام

بعدها .. بأيام .. خلصت المهلة اللي انطاها الشعب للحكومة اللي ما طلعت قاتل واحد للمتظاهرين و خلصوها اتهامات بين بعض

رجع الشعب بمظاهرة اقوى .. بيوم ٢٥
وكتها الشعب اتخلى عن كلشي و طلع بشبابه و بناته و اطفاله .. الكل نزل الشارع

توصيات صادق لمرتضى و اسامة ما يوصلون الجسر .. ولا يوصلون الساتر و ما يتعدون ولا على اي منتسب بحجة شغب

يكول .. هم حالهم حالنا لو ما يخافون على رواتبهم تنقطع جان اتظاهروا ، بس ذوله مأمورين عدهم عوائل .. اما اللي يضربون بحقد و يصوبون بالمتظاهرين فذوله خدام الاحزاب هي الدازتهم

جنه نشوف التحرير جنة عبر الموبايل .. و كل الدنيا هناك .. و جبل احد اللي متمثل بالمطعم التركي و التحشيش عليه من ابو السماعة اللي يصبح عليهم

اتوسلت بصادق نطلع ما قبل، تالي كوة قنعته و اخذت رقية و اثار و طلعت لساحة التحرير

كلنا شايلين اعلام .. الخيرات و التوزيع بفلس و العالم كلها فرحانه و كانه عرس عراقي .. مو مظاهرة

من بعدها صارت الامور تسوء ... الناصرية تحترك و البصرة احتركت و الاعتدائات تزيد .. الفتنة صارت بالنجف و الحرك و القتل و العشاير نزلت ..

بليلة .. دخلوا على ساحة التحرير فايتين على الشباب و هم نايمين .. صفوهم ..

هنا انكلبت الدنيا كلاب، اخابر اسامة مايرد ، تخابر مرتضى ما يرد ...صادق لبس ملابسه و طلع لساحة التحرير رغم حظر بس هو عنده هوية ما الحشد الشعبي ..

كلبي صار نار .. متت اريد بس خبر اسمعه من اسامة و مرتضى .. اتصل بيهم اريد محد يرد

تالي خابرني صادق كال :- اسامة تصوب و اني هسه وياه بمدينة الطب

كمت الطم و املخ بروحي :- اسامة كلت الك لا تروح

طلعت من البيت فقدت لا حسيت على بتي ولا على اي شي ، عفت حتى السيارة و طلعت بتكسي لمدينة الطب

دخلت بس شنو الوضع .. موتى و جرحى و دم بكل مكان ، خابرت على صادق :- الووو وين انت ؟ وين فعمني اني بمدينة الطب

- شعندح طلعتي متكليلي ما تشوووووووفين للموت بفلس ارجعي

- وين انت وين بس كلي

- نقلته بسيارتي لكربلاء هناك عندي اصدقاء اعرفهم بالمستشفى التابعة لاعتبة تتولى علاجه مجاني ، حالته مو مال ابقي بنص هالجرحى

- اخوي ما اصيى صادق كلبي يريد يطلع من مكانه فدوة ما اكدر ابقى

- وين تجين من صدكج . درجعي و اني اخابرج و اطمنج

رجعت للبيت مفرفحة و الوم و ابجي و اندب حظي و اكول هو بس هذا الاخ عود احظى بيه لا مستحيل مستحيييل

لثاني يوم .. عرفت مسويله عملية الطلقة فايته على كليته ، تالفة عنده جزء من الكلى و متعرض لشضايا برجله

توسلت بصادق اجي لكربلاء ما قبل كال :- ابقي بمكانج وبس لا تتهورين

بيومها استقال الرئيس ( عادل عبد المهدي ) .. كلها فرحت و ضربت صعادات و الجو احترك .. بس بعديش ، اخوي طاح بيها كل فرحة ما بقت النا باستقالة الرئيس

٣ ايام و جابو اسامة للبيت .. مصوب و ما بيه حتى يفك حلكة .. كلته :- ها خوية هذا حقك الاخذته
الشعب العراقي مو من حقه غير يتعذب و يموت و ينجرح .. هذا حقه و نصيبه بالدنيا لا تصدك بيوم ناخذ حق و الدنيا كلها متكالبة ضدنا

رغم وكعة اسامة بس مرتضى ما تاب، بقى ملازم ساحة التحرير و يفتح بث مباشر لاسامة حتى يشوفه التحرير

بعدها بدت الامور تسوء اكثر .. وتعقدت اكثر
صارت تطلع اتهامات ذيول وولد السفارة
وواحد يتهم اللاخ ...صارت الشباب تتقاتل ما بينهم

مرتضى تعارك بالتحرير ويا واحد يكله ( ابوك ذيل ) لإن شيخ و تتبع للحشد الشعبي اللي تموله ايران .

و هذا مرتضى لازمة و يكله ابوي يشرف راسك ، بابوي و بامثاله تحرر العراق انت شسويت ... و ذاك يصيح عليه ما دمر العراق غيركم

عاد صادق وقتها حرم التحرير على مرتضى، كاله الباقي فتنة مو تظاهرة ، استر علينا و اكعد ما عليك بأحد ..

المظاهرات انخرقن و جريمة ساحة الوثبة بعد ما حققوا بيها طلعوا اللي نفذوها دواعش ..

كايله شوف .. دواعش منين اجو . دتشوف نايمين بيناتنا و ياكلون ويشربون ويانا و نواياهم خبيثة ، استقالت الحكومة انتظر نشوف وين نهايتها اكعد بعد

بعد ما راحو التحرير .. اول ما كعدو عن التحرير
دخل فايروس اجتاح العالم .. و هو فايروس كورونا

نهى التظاهرات كلها .. لا مو بس المظاهرات .. نهى كلشي ، انطوا حظر شامل كعدنا ببيوتنا .. لا دوام لا مدارس لا طلعة لا طبة .. العالم كله توقف بسبب هءا الفايروس

بوكتها المرجع افتى بحملة التكافل الاجتماعي .. على كل الشباب و الغيارة اللي تكدر تتطوع لخدمة الفقراء و اعانتهم بهذا الظروف الصعبة

اطوع صادق و مرتضى و اسامة .. مرتضى و اسامة بدراجاتهم يفترون على البيوت و يوصلون المساعدات

اما صادق فاطوع لدفن موتى فايروس كورونا ..
و صرنا ما نشوفه الا قليل ..

بعد ايام .. شفته نايم بفراشه الصبح ، كعدته :- صادق ما تروح ؟

- جسمي حيل يوجعني متت و الأنفلونزا ذبحتني

- لزمت جسمه .. حار جمر ..
جبت الكمادات و كعدت اسويله ..عسى تنزل حرارته
صار يكح حيل و كل ما جاله .. يختنك اكثر ..

هنا خفت .. الاعراض كلها تكول بيه الفايروس .. الفايروس اللي العالم كله خايف منه حل ضيف بجسم صادق. دخيلك يا الهي

اخذت اثار و ايلين لبيت خديجة بقيتهم يمها و الحجية خابرت سلام و كلت اله :- ترا صادق اشك بيه فايروس كورونا تعال اخذ الحجية بسرعة

- صدك تحجين ؟

- اي والله ابو اكرم كل الاعراض بيه

- شلون تدخل للبيت و اخذها خاف البيت بيه وباء

- هو شاك بنفسه لهيج ما نزل جوا انت تعال و اخذ الحجية هي جبيرة بالعمر اذا الفايروس لاحها تموت خطية تلاحك الها

صدك للعصر و احا اخذ امها من البيت، هو طلع الحجية اني ساعدت صادق يكوم و صعدته بالسيارة ، اخذته سويتله اشعة مفراس ب١٧٥

تبين عنده فايروس كورونا ، خفت حيل .. فايروس العالم كله خايفة من عنده ، بصادق .. اباوعله و ابجي اخاف افقدة اني و بتي منو النا بعده
اموت لو صار بيه شي

يعني معقولة الله يسوي بيه هيج، بعد ما اخذ مني خالد و يوجعني بصادق و يوجع بتي وياي و ننحرم منه

مفاركته ابد.. رغم هو يكلي :- ابعدي من عندي يرويحتي لا تنعدين

- فدوة الك قابل روحي اغلى من روحك و اخاف عليها، المهم تكوم من هالمحنة سالم و ترجعلي اني و بتي

- اروحلج فدوة حبيبتي

- اسم الله عليك

بقيت لابسه الكفوف و الكمامات و مكابلته مطلعت ولا وصلت احد ما ردت اذي احد ، لازمه موبايلي و مكابلته . لان اعتبر ملابسه للفايروس وممكن انقل عدوة .. حتى برا البيت ما طلعت

مرتضى يلبس الكمامات و الكفوف و يدخل يجيب النا الاكل لابوه و الكمامات و الكفوف الي .. على طول لابستهن

خابر على اصدقائه .. كامو يجيبوله الاوكسجين للبيت، صعده مرتضى و حطوه يم راسه و علموني شلون استخدمه ..

و كمت اداري بيه .. بخار و فيتامينات و ثوم و اكل صحي، وصل الموت من الخنكة بس ما عفته ولا لحظة .. لحد ما بدا يستعيد عافيته

شوية شوية صارت الخنكة ووالفلاونزة تروح من عنده ، كام ينام بهدوء بدون ما يكعد مختنك .. الى ان استعاد صحته بالكامل و كام يمشي على حيله ..

رحنا اني وياه فحص .. كالوله اتعافى و الفتيروس اتلاشى من جسمه. هو الان خالي من الفايروس

هلكد فرحت بيه حسيت الله استجاب دعواتي زرجعليا و ما حرم بتي منه .

بس الصار .. اني الكامت تطلع عندي الاعراض ، فقدت حاسة الشم و التذوق .. صداع ، سعال ، رشح ..

اخذني للدكتوره سوولي فحص .. كاله ( زوجتك حاملة للفايروس) وكتها كلب الدنيا عليه ، كابلني مكابل ..
الباب ما طلعه ..

الالم جان خيالي مخيف .. مرات احس روحي على كد ما مختنكة .. دبرلي بلازمة دم .. و جابلي اوكسجين و يفركلي ظهري بأيده حتى اكدر اشتم الهوى و اتنفس

صابني حساسية من الكمامات و الوكسجين ، وجهي كله انطعن ، و الفايروس اعتقدت راح يموتني .. بس صادق ما عافني .. جان ملازمني بكل دقيقة
بخار و ادوية بوقتها ... و علاج

يمر الليل كله ابجي اتخيل روحي اموت شيصير ابتي ووين تروح و عد منو ، وصلت بيه الحالة اخابر باثار ابحي و اكللها : بتي امانه عدج ما تعوفيها مثل ما داريتج ادارينها

و اثار نطت من البجي :- اتكلي اذا تموتين اني اموت ما تتحمل اعيش بدونج انت امي و انت اهلي كلهم والله ما اعيش

خلتني ابجي بالزايد

لحد ما الحمد لله صارت عافيتي شوية شوية ترجعلي .. حللت طلعت معافة من فايروس كورونا

حيل فرحت حسيت بروحي انتصرت على فايروس مدمر العالم .. ما كدرلي و كمت ورجعت لبتي و لاخواني و لرجلي

فرحة صادق ما تنوصف بيه ، طهر البيت و ذبح ذبيحتين عني و عنه .. لوجه الله تعاله لأن كومنا بالسلامة

و انتهت حياتي
صح تعبت هواي .. بس الله جازاني بانسان عوضني باكثر من اللي جنت استحق

عرضت حياتي كدامكم بشينها و زينها .. كلت الكم اني طعنت ابناس .. و اذيت ناس .. بس السويته ما فات عليه .. و رجعلي اضعاف و انطعنت و اتهمت بنفس التهمة التهمت بيها غيري

اخذوا الزين من قصتي و ابتعدوا الف متر عن اخطائي ، بعمركم لا تحاولون تنسون انسان بأنسان ثاني

بعمركم لا تحاولون تتعدون على شي مو الكم لأن راح تعانون و تعانون و ما تحصلون بس الهم و القهر و الحسرة

الشي المو زين البيكم خلو نقطة قوة مو نقطة ضعف و اشتغلوا عليه لحد ما تنجحون .. وكتها راح تحسون بالفخر وماكو شي راح يكسركم

كفاحي الوحيد جان دراستي .. اعتبر نفسي فعلا كافحت ووصلت و اليوم اني على وجه افتح مكتب محاماة بعد ما تنهتي ازمة كورونا

مو لأن احد ساعدني ولا لأن احد سهلي وضيفتي . التسهيل من الله وحده هو اللي يبعثلك بشر يساندوك اذا جانت ثقتك بيه و توكلك بس عليه .

ابوي اخذ جزاه .. وراح لرب عادل ولليوم اني ما باريته الذمة

امي استقرت بأستراليا ويا زوجها المغربي ، ما تحبه كلش، دائما تشكي حياتها و تكول ان ما احس لحياتي طعم مرات افكر ارجع للعراق اعيش يمكم لان ما جاي انسعد رغم اني باحلى دولة
كلت الها .. هذا اللي جنيتي ماما .. اخذتي الدنيا طول بعرض .. مخليتي سفر لا حب لا رجال لا دنيا كلشي جربتي بهالحياة لحد ما فقدتي طعمهم

انتواللي ردتي الدنيا و الله يكول ( و من كان يريد حرث الدنيا نؤته منها و ماله في الاخرة من نصيب ) الله انطاج اللي تريدي و هي الدنيا بس حرمج اللذة .. لأن انت ما عشتيها بطاعته . عشتيها بمعصية
لذة المعصية ما ادوم .. تفقدك لذة الحياة باكملها ..

تطلب من اثار تروح يمها بس اثار ملازمتني ما ترضى تعوفني .. و جذابه مو بس عليه هي لليوم تحب اكرم و هو يحبها بس اني اريدها تكمل دراسه يلا تتزوج

اسامة اليوم عمره ٢٢ سنة .. بعمر زواج بس ما يحب الزواج .. من امي جزت روحه من النسوان حتى علاقات حب حرماها على نفسه

عذراء اطلكت من رجلها لأن يخونها هواي رغم يحبها بس يومية لاكفته ويا وحدة فقررت تطلك احسن ..

وسام عايش بألمانيا . للان بدون زواج بالرغم يعرف عذراء تزوجت بس ما فتح وياها اي موضوع، يدرس بالخارج، و كل فترة يخابرنا اني و صادق و يسلم علينا .

خديجة صار عدها طفل رابع من زوجها الثاني، زوجته ماتت و جاب اطفاله البقية و عاشو سويه .. الحمدلله مرتاحين و متصافين

رباب المرة اللي كادت لامي ووكعت بينها و بين رافد .. رجلها اكتشفها ويا علاقة ووصلت بيها لحد الكتل، بس ما ماتت .. بس هذا السمعته من امي
رغم امي عافتها و ما انتقمت منها بس الله انتقم منها بفعلها ..

رافد حرم خواته من الورث ولليوم هو كلشي مبيه غير ان انرزق بطفل من ضحى .. و عايشين حياتهم لليوم.

بتول صديقتي و اعز صديقاتي هي و عذراء .. علاقتها ويا اهلها انتهت .. لإن امها ايدت رافد ما وكفت ويا بناتهم . هواية متأذية

خالد
هو الحسرة اللي بكلبي
هو السر اللي داخل القفص الصدري
هو الشهكة و هو التنهيدة الاتنهدها بالليل على غيابة
مو اريده .. بس المثله ما يستحق هيج
اتمنى لو بس الكالى اثار .. لحد هاي الساعة هو مفقود و ما اله كل اثر .. الكل نساه الا كلبي
كل ليلة تمر ذكرياته على عيوني و تخليهن يمطرن
كل ليلة كلماته ادك باذاني

لا يربج
عوفي اليتعبوج و اولهم اني
لو متت لا تنسيني
ما نسيت ولا اكدر انسى

مو خيانة برجلي لا .. صادق عندي ما ابدله بالدنيا بغلاة روحي .. بس يلعن ابو الذاكرة اللي ما تنسى و تخلي الكلب ينعصر كل ليلة

اكثر الليالي اكعد بيهن بالليل و اختنك لما اتذكره و اتذكر بناته كبرن بلياه .. ءاك الجان يطلهن اصبع و يخلي الفرحة مالية عيونهن .. راح

اتمنى لو بس انساه اتمنى لو بس تطلعه من بالي
اتمنى اكدر و اسويها و اعيش ..
بس (ليتني استطيع فعلها )

.....................

خلال ٦٣ حلقة و انتم تبحثون عن البطلة .. اكولكم بالنهاية البطل الحقيقي هو الانسان اللي ما يخليك تضطر تبررله ، اللي يحبك بصدق و بطهر و مستحيل يأذيك و ارجع و اكول ما يخليك تبرر افعاله لا للناس ولا لنفسك حتى .

الحب مو كلشي ولا كلشي انت تتمسك بيه صح، ربما انت تشاء والله يشاء ان يجعل للنصيب رأي اخر ، و يجعل الخيرة فيما يختاره هو الك
لان ببساطة هو اعلم بيك منك ، ارأف بيك عليك، احن من امك عليك .. ممكن انت تصر تريد شي يأذيك بينما هو يصر على ان يبعدك حتى يسعدك

تبجي ايام و ليالي اكيد . لكن الاكيد راح ترجعله فد يوم و راح تكوله من كل كلبك ( اشكرك يارب)

ثق بالله فقط

اما في تحليل غلاف الرواية

فالبنت على هيئة قمر.. و هي ديار
القمر على رغم جماله لكن مشوه ذات ندوب ، يحاول يستمد القوة لحتى يضيء دروب غيره ، جانب مشرق من القمر اما الجانب المظلم هو ماضيها و حياتها و اسرارها اللي بداخلها .

... شجرة عائلة تحمل بيتين .. بيت زوجها و بيت اهلها اخوتها ، البيتين مستند عليها

الشجرة اللي على الجانب .. اللي لا هي ميته ولا هي حيه .. و هي خالد اللي بقى بقلبها الى اليوم تتمنى نسيانه

البيت منير و باب مفتوح .. دلالة على استقرار بحياة جميلة و باب للامل

البيت الثاني "نافذتين" و هي اثار و اسامة

ليتني .... بخط اعوج تدل على تخبط في التمني

"..." ثلاث نقاط بعد كلمة "ليتني" و هي ٣ محاولات بالزواج بكل زواج تتمنى تخرج الكابوس اللي اسمه خالد من حياتها

"استطيع فعلها" باللون البني .. بيان على بشرة خير و حكمة تصرف توازي بين الاماني و بين الواقع

غلافة اسود .. دلالة على الظلم و الحرام الي يخيم على الرواية

و كالعادة تبدع اعراف العاني بتصميم غلاف مميز لرواية اخرى من رواياتي

اما بأخر القصة اترككم مع مشهد حدث البارحة لما تأخرت للفجر بالتنزيل .. مع السلامة و احبكم هواية
#زينب ماجد

ديار :- كاعدة منتظرة البارت ينزل ، اغفي و كاعدة بالبيج اسحب عسى يطلع البارت حتى اكتب ( اول تعليق )

صارت ب٣ .. شال راسه صادق :- شو كاعدة ؟

- منتظرة الكاتبة تنزل البارت

- يا بارت ولج

- مال القصة

- مخبله عاقلة كاعدة ل٣ تنتظرين قصة دنامي يابه نامي

- لا منتظرته

- مو وراج دوام

- اي بعد شسوي يا عيني غير زنوبة اتاخرت ولو من وراي

- من وراج ليش ؟

-لا يعني اكول كله من وراي هسه لو نايمة و مطمورة مو احسنلي

- اكوم اصلي الليل احسن من قصتج

راح و اني مكابله البيج . هسه تنزل هسه وج يا زنوبة والله نعست و طفيت شلون بالله

شوية و رجعلي :- شو بعدج كاعده ؟

- مو كلت الك منتظرة القصة

- ادري يا بوية قصة هاي لو سحور الساعة ٣ ونص

- هسه انت روح نام شعليك بيه

تمدد شوية صارت الصلاة ، كام صلاة ورجع بعدني انتظر و كاعدة، صاح :- الله اكبر لو حبلى هم جان جابت و خلصت، و انت بعدج منتظر القصة ، قصتيش هاي ما تكليلي

- قصة احبها احبها

- ما تسوفيليها

- ما يحتاج ، اكوم اصلي و اشوف زنوبه وين توصل

رحت صليت ورجعت و البارت بعده ما نازل ، درت وجهي و الكاه ضارب عكس و يباوعلي :- ها خير ؟

- اني اكول لو تعوفين القصة و تجيلي اسويلج قصة

- قصتيش ؟

- يعني مثل ان نسوي اخ او اخت الوله و شي من هذا القبيل

- اكلك شيخنا ، صليت ؟

- الحمدلله

- دور وجهك ١٨٠ عني خليني حايرة بقصتي روح

- افيدج والعباس

- الاستفادة التجي منك ما اريدها

- قصصي حلوة شبيج انت بس تعاي

- ما اريد قصصك روووح

- هو بكيفج جاي اكلج تعاي انسوي قصة

- ما اريد صادق .. رووووووح .. صااادق القصصصصصصصة مااااالتي

- انعل ابو عشيرة القصة اليوم

- صاااااااااادق .

النهاية

هل اعجبك الموضوع :

تعليقات

لو عايز أي رواية pdf .. أو لو عايزنا نعرفك لما الرواية إللي بتتابعها ينزل منها حلقة جديدة، انضم لقناتنا على التيجرام: من هنا 
ما هو الفصل الذي تود قراءته؟