رواية إبتزاز الحلقة الرابعة 4 بقلم زهور جمال الدين
لقراءة المزيد من الروايات الليبيه : اضغط هنا
لقراءة المزيد من روايات زهور جمال الدين : اضغط هنا
 |
| رواية إبتزاز الحلقة الرابعة 4 بقلم زهور جمال الدين |
رواية ابتزاز الحلقة الرابعة 4 كاملة مكتوبة بقلم الكاتبة الليبيه زهور جمال الدين
لقراءة الحلقة السابقة من الرواية : اضغط هنا
-
-حمزة حمق/ منو يكلم فيك عقاب الليل
-شافت هند الرقم لقاته مودة بنت اختها / هادى بنت اختى
مدامها كلمتنى فالليل معناها اكيدة تبى حاجة مهمه
-حمزة / باهى نخليكم براحتكم .. اهو نراجى فيك
فتحت هند الخط على مودة / الو
-مؤدة/ اهلين هند
-هند / اهلا مودة
-مودة / منحكيلك حاجه مهمة سمعتها اليوم .. لازم انشوفك
-هند تحسابها سمعت بيها فاتحة بروفايل نرمين/ شن فى احكى حتى فالتليفون
-مودة / تمام نجيب السماعه ونجى نحكيلك
-هند / باهى اصبرى شوووويا نصكر ونعاودلك مابين ماجبتى سماعاتك
-مودة / فى شكون كنتى تكلمى فى هالليل يا شريرة
-هند / كنت نكلم فى صاحبي الجديد
-مودة / امالا القديم وين مشى😁
-هند / مصحك .. نكلم فى مدرسة معاى .. شوية بس تو نعاودلك
-مودة 😉/ يلبئلك يا جميل .. سلميلى عليه .. قصدى عليها صاحبتك
-هند / غير بري دورى سماعاتك بلا دراه كبد
-مودة / باهى
عاودت على رقم حمزة ...
-حمزة / الو
-هند / قلت بالك تقعد تراجى فيا.. وبنت اختى تبينى فى موضوع.. قلت نكلمك ماتراجيش اتصالى الوقت اتأخر .. غدوة نحكو
-حمزة حمق😠/ امالا بتسهرى معاها للفجر بنت اختك
-هند / اكيدة لا .. لكن بعد نكمل معاها بيكون الوقت فات العشرة ونص .. وبصراحة منقدرش نشعل تليفونى بعدها
-حمزة / الباين عليك خايفه حد يلقاه انتظار
-هند / اوووووف ... خيره اسلوبك هكى مستفز
-حمزة / انا اللى اسلوبى مستفز ولا انتى اللى عندك مكالمه عقاب االيل ومخلوعه لقوك انتظار
-هند / منهوا اللى مخلوعه منه
-حمزة / وين نندرى عليك انا
-هند / تصدق انا اللى غالطه ...
-حمزة / غالطة فى شنو
-هند / غالطه انى عطيتك وجه ورديت عليك
-حمزة / تمام معش تعطينى وجه .. وغدوة منجيك للمدرسه مناخد شفرة اختى
-هند هدت نفسها / ااه.. تاخد شفرة اختك .. علاش .. وانت شن ليك علاقة بيها الشفرة
-حمزة / شكلك نسيتى انها بأسمى
-هند/ خلاص غدوة بادن الله نكصرها...و نعطيهالك كصرها قدامى
-حمزة / لااااا يا شاطرة ..مس حنكسرها لانى نبيها وعندى ماندير بيها
-هند / قصدك بتستعمل معاى طريقه لوى الدراع
-حمزة / ايه منستعملها معاك .. بيش تتكلمى معاى بأدب
-هند / باهى لو سمحت يا استاد حمزة ..ممكن نسكر التليفون توة لان عندى مكالمه
-حمزة / مع شكون
-هند / قلتلك مع بنت اختى ..
-حمزة / صراحة انا ماخشتليش راس بنت اختك تكلم فيك عقاب الليل
-هند / انا غير .. انا تربطنى بيهم علاقه صداقة قبل مانكون خالتهم
-حمزة / تمام .. تصبحى على خير
-هند بهدوء/ زعلت
-حمزة /وانا ليش منزعل..كلمى اللى تبيه فالوقت اللى تحبيه
-هند / انت الباين مش مصدق انى نكلم فى بنت اختى
-حمزة / وانتى ليش حسيتى هكى
-هند / بطل ترد على سؤالى بسؤال
-حمزة / عموما براحتك
-هند / باهى تصبح على خير ونتكالمو غدوة
-حمزة / ليلتك سعيدة
صكرت من حمزة .. وعاودت لى مودة لقتها انتظار .. حطت تليفونها فالشحن وفتحت ماسنجر نرمين تبى تكمل مسح
__________________________________________
_
ثانى يوم
سحر رافعها بوها للجامعه .. فاتو على مودة ركبوها معاهم ومشو من الساعه 8 ونص.....مودة وسحر ونرمين يقرو فى نفس الكلية ( تقنية طبية)
-عمك الباشير/ بناويتى هدا اول يوم ليكم فالجامعه بعد وفاة بنت خالتكم .. شدو روحكم وقوو عزمكم
-سحر تمسح فدموعها / حاضر يابوى
وصوت مودة طلع وهيا تبكى ..
-بشير/ شن قالنا عاد مودة بنتى
-مودة / انشاءالله يا عمى
وصلو للجامعه .. دخلهم بشير بالسيارة للكليه ..
-بشير / امتى نجيكم
-سحر/ نكملو الساعه 2 ونص
-بشير/ باهى مع السلامه
ونزلو البنات .... مشو خطوتين وتلمدت عليهم الكليه كلها .. بنات وولاد ...
هما ماشيات مش دايرات قطرة مكياج على وجوههم حزينات ... البنات ايعزو فيهم وكلهم يبكو.. وجعتهم نرمين
خشو للمحاضرة .. حتى الدكتور عزاهم ..لان قصة بنت خالتهم انشهرت ...
مودة فتحت مدكرتها ... نخصتها بنت فى جنبها
-مودة/ ايوة يا منال
-منال / بنقولك حاجه مهمه بعد المحاضرة
-مودة / تمام ...
الدكتور خبط عالسبورة / هدوءءءء
__________________________________________
_
فى مدرسة هند ...
هند واقفه فوق فى ممر الدور الثانى ..تبى الابلة بتسألها على طالب..خاطر امه جايه تسأل عليه..كتبت درجاته فى ورقه
وفى نفس الورقه كتبت راى الابلة فالطالب من حيث الادب والمشاركة ....
وقف طالب/يا ابلة يبيك واحد فى صالة المدرسة تحت
-هند / منهوا الواحد هدا .. قوله يخش للمدير
-الطالب/ لا قالى نبى الاستادة هند
طول خطر عليها حمزة ....
-هند / قوله تو نجى
-الطالب / باهى
كملت كتابه احوال الطالب ونزلت من الدروج .. تشبح فى حمزة واقف فى الصالة متع الدور الاول لابس نظارات شمسيه ويقرا فى لوحه معلقه ..
وقفت جنبه / صباح الخير
-شبحلها وابتسم / صورتك اللى فاللوحة كم ليها سنه
-هند / اربع سنوات
-حمزة / ماشاءالله الناس تكبر وانتى تصغرى
-هند / اللى يشوفك امبارح .. مايشوفكش اليوم
-حول نضاراته / قصدك انتى ماتفّوتيش بكل
- ابتسمت/ لا نفّوت
-حمزة / امالا خلاص فوتيها قصه امبارح واحنا صغار اليوم
-هند/ فوتتها خلاص... شووويا بس نكلم ولية امر ونجيك
-حمزة / حتى انا مستعجل عندى شغل .. بس ممكن تورينى بروفايل نرمين والمحادثه اللى حكيتيلى عليها
فتحت هند تليفونها ... ومشت للفيس كتبت الرقم السري ومداته لى حمزة .. هاا شوف .. ووليه الامر تو نمشيلها حتى شوى ثانيه
-خداه حمزة /ويتكتك بصبعه فالتليفون لدرجة هند استغربت
-مدلها التليفون / تليفونك تصكر ترا افتحيه
خداته هند كتبت الرقم السري انفتحلها برنامج المكالمات..
-قعدت تضحك / انت طلعت من الفيس خشيت عالمكالمات
-حمزة انحرج/ لااا انا فاتح الفيس وهوا تصكر التليفون
-هند😁/ هدا كله وتوة قلتلى انسى الموصوع واحنا صغار اليوم
-حمزة / على فكرة انتى فهمتى الموضوع غلط
-هند مبتسمه / اهما المكالمات .. شوف ...
وقربت منه وقفت جنبه وهوا اطول منها بهلبا
-هند / هادى مكالمتك انت ... وهادى مكالمة مودة بنت اختى
ضربت عالاتصال وفتحت المايك .. التليفون ايشرين
ردت مودة بصوت واطى/ انا فالمحاضرة توة.. تكمل ونكلمك
وصكرت التليفون
تلفتتله / صدقتنى توة
-حمزة / ايه صدقتك
-هند / يعنى ماكنتش مصدقنى امبارح
-صكر عيونه / لا
-هند😔/ شكرا
-حمزة يضحك / عفوا
-ابتسمت / نشوف ولية الامر ونرجعلك .. ولا بتمشى
-حمزة / لا نراجى فيك بيش نشوف الرسايل
-هند / تمام ...
مشت هند لى غرفتها فى نهايه الممر ... ولبس حمزة نضاراته ويشبحلها..هيا لابسه سروال وبلوزة طويله وجاكيت قصيرة
وحجاب ... تمشى وهوا يشبح لى رجليها وكتافها ومشيتها
كملت من وليه الامر ... ودخلاته هوا للغرفه ... وفتحو التليفون على ماسنجر نرمين وشافو الرسالة
-حمزة / المشكلة اننا مش عارفين مكانهم ولا هما شكون .. ولا منين يعرفوها ولا شن يبو منها
-هند / انت قلت انها عمليه سرقه اعضاء ولا لا
-حمزة / انا قلت ان المخدر اللى خداته متع عمليات .. يعنى احتمال تكون عملية سرقه اعضاء ... انا قلت احتمااال .. ماقلتش اكيد
-هند / انشاءالله خير
___________________________________________
_
فى الجامعه
المحاضرة تمت ... مودة وسحر طلعو برة .. زادو جوهم بنات ثانيات من الكليه والكليات الثانية عزوهم
منال / مودة ترا شويا
تلفتتلها مودة / هى
وتلفتت للبنات / نستادنكم توة
سحر شبحتلها وحركت حواجبها بمعنى شنو
مودة بادلتها الحركة بمعنى مش عارفه ...
مشت مودة مع منال وقعمزة على جدع شجرة طايح
طلعت منال كتاب قرآن باست عليه وحطاته فى حجرها
-منال / مودة ماتزعليش منى..حطى يدك عالقران واحلفيلى انك لو عاودتى الكلام اللى منقولهولك توة ماتجيبيش اسمى ولا تقولى عليا .. بوى واعر ونخاف منه
-مودة اتفاجئت / انشاءالله خير شن فى
-منال /حطى يدك عالقران واحلفى وبعدها نقولك .. قبل كل شى متوضية ولا لا
-مودة / ايه متوضيه ...
وحطت يدها عالقران/والله لو عاودت الكلام اللى بتقوليهولى مانعاود اسمك ولا نقول منال هيا الى قالتهولى
-منال / باهى حلو
وحطت يدها عالقران وحلفت / اقسم بالله يا مودة الكلام اللى منقولهوك توة مافيه كلمه وخدة كدب
-مودة / صادقه يا منال
خدت منال كتاب القران باست عليه وحطاته فالشنطة
-وتلفتت لى مودة / يوم اللى ماتت نرمين .. ماسألتوش نفسكم ليش ضربتها السيارة برة الجامعه .. مع انها كانت داخلها
-مودة / شن قصدك
-منال / ماتتفاجئيش بالكلام اللى منقولهولك ... يوم وفاة نرمين .. كانت هيا فالكلية الصبح .. انا كنت مقعمزة عالكرسى القريب من الشباك فى غرفة السكرتيرة .. وبعدين جاها واحد فى سيارة لونها احمر .. قعدو يدوو شوى وبعدين فتحت السيارة
وركبت معاه ومشو
-وقف مودة / مصح وجههك
البنات المقعمزات كلهم انتبهولهم وتلفتولهم .. ومن ضمنهم سحر....
-منال وقفت / استرى وماتعيطيش .. البنت بنت خالتك
-سحر من بعيد / خيركم !! .. انجى
-مودة قامت يدها / لا
-منال / انا مقدرة موقفك .. وخلعتك على بنت خالتك .. لكن اقسم بالله ماكدبت عليك فى كلمه وهدا اللى صار .. ولعلمك الشخص اللى مشت معاه انتى تعرفيه
-مودة فتحت عيونها/ نعرفااااه 😱.... منهوا
-منال / مانعرفش ... لكن جايك هنايا للكليه ..مرة شفتك واقفه عليه ...
-مودة انهارت / منهوا هدا ... دكرينى فيه
-منال / تو نقولك
____________________________________________
_
فى نفس الكليه
زوز بنات مقعمزات على تركينه ويهدرزو
-رنا / ياوخيتى فكينى بنات خالتها مقعمزات يسمعونا ولاويتهم فاتحيلنا تحقيق
-رنيم / نبى نفهم هيا الشيخة تكلم فيها على خاطر خالتها .. ليش نرمين تبعت صورتها .. ولا منو بعتهالها مفهمتش
-رنا/ نقصى صوتك .. البنات اللى ورانا قراب هلبا معش تنطقى الاسم
-رنيم/ خيرك خايفه ... كلهم يتكلمو على نرمين راهو
-رنا / يتكلمو عليها مسخفتهم .. مش يقولو الشيخة
-رنيم / تى باهى وانتى ترعشى فهمينى
-رنا / الشيخة متع الفيس صاحبة غلا الروح ادمن قروب الفراشات ..
-رنيم / باهى
-رنا/ نفس الاسبوع اللى توفت فيه نرم.. نبيش ننطق الاسم
-رنيم / خيرها .. شن صار
-رنا / قبل يوم الوفاة بي ثلاثه ايام.. كلمتنى الادمن وقالتلى انا ديما نعلق معاها ونجيبو فى سيرة الكليه .. فسئلتنى ادا كنت نعرفها شخصيا ..ونعرف شكلها ... فقلتلها ايه
-رنيم / باهى
-رنا / قالتلى ان فى وحدة اسمها العرافه خديجه تبى تكلمنى .. قلتلها باهى ورديت عليها فالخاص
-رنيم تشوقت / غير احكيلى بسرعه خيرك تحكى بالشوى وبعدين شن صار
-رنا / لما رديت عليها بعتتلى صورة نرمين وقالتلى ادا كانت بالفعل هياولا لا .. .قلتلها منقولكش الا لو قلتيلى من بعتلك الصورة..هيا ولا حد ثانى ..
-رنيم / وشن قالتلك
-رنا / دارتلى حضر ...
-رنيم / وبعدين شن صار
-رنا / مشيت حكيت لى للادمن غلا الروح وحكيتلها
-رنيم/ غبيه المفروض حكيتى لى نرمين نفسها
-رنا / قتلك نقصى صوتك .. انا قلت نشوف قبل .. لو نرمين هيا نفسها اللى بعتتها مفيش داعى نحرجها .. ولو حد ثانى باعتهالها مننشى نبلغ نرمين
-رنيم/ وشن صار بعدها
-رنا / قلتلك حكيت للادمن وقلتلها تستفسر منهاو..طبعا الموضوع خدى يومين .. وبعدها ردت عليا ان نرمين باعته صورة واحد اسمه سيف تبى تشبح عليه.. يانارى نرمين الله يرحمها على نياتها عطتها اسمه الثلاثى ..دوراته الشيخة فالفيس ولقاته ولقت صورته وكلماته وفضحتله نرمين بعد مابعتلها كروت مدار .. يمشى هوا الفالح يبعتلها صورة نرمين ويقوللها اشبحيلى عليها
-رنيم/ وكيف وصلاته الصورة
-رنا / الله اعلم ...
-رنيم/ وخبرتى نرمين ولا كيف درتى
-رنا😔/ لما كملت محاضرتى وطلعت منقوللها قالو توة ضربتها سيارة وتوفت
-رنيم / رحمه الله عليها
-رنا / الله يرحمها ويغفرلها ... لكن اسمعى بالله عليك الكلام يموت هنايا .. لان حتى الادمن غلا الروح محلفتنى
-رنيم / لا لا كيف عاد ..تعرفينى نعاود فالدوة
-رنا / نستادنك توة ..بوى وصل
-رنيم / ادنك معاك
طلعت رنا من جنب رنيم وهيا تشبحلها لين ركبت السيارة ومشت .. ناضت رنيم من مكانها
-رنيم / سخر .. بالله نبيك شوى
-تلفتتلها سحر وقفت ومشتلها / ايووووة يا رنيم
-رنيم / منقولك كلام توة .. لكن ردى بالك تسألينى من قالى
-سحر/ تمام... تعالى قعمزى واحكيلى
-قعمزت رنيم / شوفى
_________________________________________
_
المهم ياحنه البنات روحو طايبات ... يراجو غير امتى يجى المغرب وبيمشو لى حوش خالتهم بيش يتلاقو مع هند ويحكولها المعلومات اللى وصلتهم ... وخالتهم تتصرف ..
وصلت هند ووصلو هما وقعدو يحكو
-هند / ياحمارة ماقدرتيش تدكريه
-مودة / ماعرفتاش .. قالتلى لابس سروال قماش وبلوزة حمراء .. اشكال زى هادو انا منعرفهمش
-انتصار/ لااا الحق مودة تعرف غير المنظم 😁
-مودة ضربت انتصار على رجلها / ضمى فمك
-هند / توة ضرورى نعرفو منهوا اللى ركبت معاه
-سحر/ وردى بالك تشكى فى نرمين هكى ولا هكى .. راهى استحالة تركب مع حد .. كيف مشت مع هدا مش عارفه
-هند / عموما فالاكيد ان الشخص هدا هوا نفسه اللى يبعتلها فصورها ويهدد فيها
- مودة / اللى محيرنى انى حتى انا نعرفه
-هند عيونها دمعو وسرحت تخمم/ زعما حق نرمين انقتلت قتل .. باهى انا كيف بنبلغ خوها توة ونقوله اختك ركبت مع واحد ومشت معاه فى سيارته .. كيف بيخمم فيها بعدين .. بدل مايقول الله يرحمها حيقول افتكيت منها... كيف بندير يااااربي ...
شرين تليفونها ...شافت المتصل لقاته حمزة ...
-ردت عليه / الو
-حمزة/ اهلين استادة هند
-هند / اهلا بيك
-حمزة / ممكن نثقل عليك بطلب
-هند / مفيش مشكلة عادى تفضل
-حمزة / جايينى جماعو العمل .. ممكن اديريلى قهوة
-هند / حاضر .. كم شخص انتو
-حمزة / احنا عشرة انفار
-هند / حاضر .. حندير 15 بالك حد من الموجودين جنبكم يبي يشرب
-حمزة / تمام .. مشكورة
-هند/ قتلك ...
لكن حمزة صكر تليفونه وماسمعهاش ...
ناضت هند من مكانها ...
-سحر/ وين ماشيه خالتى
-هند/ مندير قهوة .. ومرات نبعت للرجالة قبل
" تحشمت تقول قدامهم ان حمزة كلمها 😁"
-انتصار/ انوضو معاك
-هند / كانا احتجت تو اناديكم ...
مشت هند للمطبخ .. حطت براد كبير هلبا عالنار .. وحطت فيه القهوة وشوية سكر وتلفتت اتجهز فى الفناجين ..
ربع ساعه وكانت القهوة جاهزة ... اتصلت هند بي حمزة
-حمزة / الو
-هند / القهوة جاهزة ابعت حد يرفعها
-حمزة / باهى
وصكرة التليفون .... وقامت هند البراد..وبدت اتصب فالقهوة
ممكن 3 دقايق وطقطق باب المطبخ الخارجى ...
فتحاته هند وتلفتت تاخد فى الصفرة لانها توقعت انه باعت فرخ صغير ...
قامت الصفرة وتلفتت للباب ... تلاقى حمزة واقف ...
مدتله الصفرة .. خداها منه
-حمزة / يسلمو يدياتك تعبتك معاى ❤
-هند متحشمه ومبتسمه / لااا عادى مفيش مشكلة 😍
-حمزة / ربي يحفظك ...
وماسك الصفرة من جهه وهيا من جيهه وواقف يشبحلها
-هند تحشمت هلبا / فى حاجه
-حمزة 😊/ بأدن الله مافى الا سلامتك ❤🌷
__________________________________________
تمت ... ويتبع
لقراءة الحلقة الخامسة من الرواية : اضغط هنا