رواية حظابط سوسو الجزء العاشر والأخير بقلم نداء علي

لقراءة باقي روايات الكاتبة نداء علي : اضغط هنا

رواية حظابط سوسو الجزء العاشر والأخير بقلم نداء علي

نُرشح لك هذه الموسيقى لتسمتع إليها وأنت تقرأ رواية حظابط سوسو الفصل العاشر 10  

رواية حظابط سوسو الحلقة العاشرة والأخيرة 10 كاملة مكتوبة للكاتبة نداء علي

لقراءة الحلقة السابقة : اضغط هنا

سيف بعد ما رجعوا من سوهاج حاول يركز كل طاقته في القبض علي العصابة وقفل القضية

قدر سيف يوصل لكل افراد التنظيم وفضل قدامه اخر خطوة وهي التنفيذ

يوم تنفيذ العملية..

سيف : ساجدة انا عارف انك هتقدري كلامي ومش هتناقشيني فيه.. انا طالع مهمة صعبة ومعرفش هرجع منها ولا لأ.. بس اوعدك لو رجعت هعوضك وافهمك كل حاجة.. بس ادعيلي

ساجدة بخوف : سيف ارجوك بلاش الحركات دي عملية ايه انا عارفة انك بعدت عن الجيش من زمان

سيف : مقدرتش ياقلبي.. حاجات كتير منعتني اني استسلم اهمها واجبي وقسمي ان افدي البلد بروحي ودمي.. مقدرتش اقعد اتفرج واسيب غيري يضحي

سامحيني اني خبيت عليكي بس خوفي هو اللي منعني اقولك.. ادعيلي وخليكي قوية وقويني بيكي

ساجدة دموعها خانتها وقلبها وجعها من مجرد تخيلها ان سيف ممكن يحصله حاجة...

سيف مسح دموعها وكمل كلامه بحب : مش عاوز دموعك دي تاني.. وعلشان خاطري لو حصلي حاجة خلي بالك من امي وجدي.. نهال الحمد لله انا جوزتها للي يقدرها واطمنت عليها لكن امي وجدي ملهمش غيري

مشي خطوتين بس صوتها وهي بتندهله رجعه ليها تاني بلهفة حضنها بكل قوته وهي اتمسكت بحضنه كأنها طفلة بتحتمي بأبوها وخايفه تسيبه

🔸🔸🔸🔸🔸🔸🔸🔸🔸🔸🔸🔸🔸

القوات اتحركت الهجوم بدأ بإشارة من سيف اللي كان ماشي بكل هدوء وطلع علي شقة رهف

فتحتله باب شقتها وهي مبتسمة.. وهو ابتسملها بثقة

روجينا : اخيرا ياسيف.. ده انت تقيل اوووي

سيف : المهم اني جيتلك

رهف : عندك حق.. تحب تشرب ايه

سيف : اي حاجة من ايدك

روهف قربت منه بدلع وبدأت تلمس وشه بحركات مثيره وهو مقدرش يتحمل قربها منه اكتر.. مد ايده يشدها ناحيته اكتر وهي اتجاوبت معاه.. وبسرعه كان مخدرها بأبره في رقبتها وغابت عن الوعي

سيف : ينفع كده ياولية انتي.. كان زماني في حضن سوسو حبيبتي بقولها كلام مهم يابوز الأخص.. يلا مش مشكلة خليني اخلص منكم واركز مع حظابط بقي

↔

سيف شاور لزمايله وطلعوا خدوا روجينا وبعدها اتحركوا لبيت كريم وسامر وقبضوا عليهم بسهولة لأنهم كانوا سكرانين عالأخر

بدأ سيف ورجالته يتحركوا في اكتر من اتجاه بنفس التوقيت وقدروا يحققوا المطلوب منهم بنجاح لحد ما وصل سيف لهدفه وعرف مين هو الجاسوس اللي اتسبب في موت حكيم وفشل اخر عملية كانوا فيها مع بعض

سيف بوعيد وغضب : كنت حاسس انك واطي وخسيس ياعاصم بس متخيلتش ان كرهك يوصل لدرجة الخيانة

عاصم : برافو عليك ياسيف بجد انا صدقت انك استقلت وانحرفت بعد موت حكيم.. تصدق عجبتني اكتر منه.. حكيم كان مغفل وبينضحك عليه لكن انت طول عمرك ناصح

سيف هجم عليه يضربه وعاصم كان بيرد ضرباته بمهارة وقوة اكبر

عاصم مسك سلاح ابيض (مطواة) وبدأ يضرب سيف بيها

سيف كان بيتفادي ضرباته بس بالتدريج بدأت قوته تضعف وعاصم ابتسم بخبث وهو شايف سيف بيتألم من الإصابات اللي مالية جسمه

عاصم بدأ يضرب سيف بقوة اكتر وسيف بدأ يستسلم بس عاصم كلمه بشماته وقاله : تعرف اني من اول يوم دخلت فيه الصاعقة وانا بكرهك انت وحكيم.. وكنت سعيد اوووي وانا بخلص عليه وهو من غباوته كان مصدوم وفضل يترجاني اسيبه يعيش علشان مراته الحلوة وابنه اللي جاي في السكة.. عاصم ضرب سيف في ضلعه المكسور وهمسله بتأكيد كان عريس جديد.. زمانه بقي فرح في الجنة

سيف كل الهدوء اللي كان راسمه اتبخر.. افتكر شكل حكيم وهو غرقان في دمه.. افتكر مروان اللي اتحرم يشوف ابوه وفي لحظه كان زي الأسد الجريح بيزأر بجنون.. لحظة واحدة استجمع فيها قوته وضرب عاصم في مقتل وقبل ما عاصم روحه تطلع سيف قاله

حكيم دلوقتي عريس في الجنة.. وانت يابن الو.. علي جهنم وبئس المصير ان شاء الله..

سيف مقدرش يقف اكتر من كده وقع علي الأرض وبكي بحرقة علي فقدان حكيم.. دموع احتفظ بيها سنين ومسمحش لنفسه يحزن غير بعد ما اخد بتاره

سيف : ربنا يرحمك يا حكيم.. ربنا يجمعنا سوا في الجنة زي ما كنت اخويا وصاحبي في الدنيا

ساجدة بعد سيف ما سابها ومشي كانت حاسه انها بتحلم.. او يمكن كابوس معقول سيف كان مظلوم من البداية يعني هو لسه في الخدمة.. مش صايع ولا بتاع بنات زي ماهي فاهمه.. في وسط دموعها ضحكت واطمنت انه ليها لوحدها مفيش غيرها في حياته.. بس الخوف اتمكن منها تاني وهي حاسه بالخطر واترعبت لما تخيلت انها ممكن متشفش سيف تاني

🔸🔸🔸🔸🔸🔸🔸🔸🔸🔸🔸🔸🔸

سيف في المستشفى اتعمله الاسعافات اللازمة

اللواء فهد : حمد الله علي سلامتك يابطل.. رجعت حق حكيم يا سيف

سيف : الحمد لله يافندم.. الحمد لله اخيرا قدرت اوفي بوعدي واجيب حقه

فهد : ازاي قدرت توصل لعاصم مع انه ابعد ما يكون عن دائرة الشك

سيف : عمري ما ارتحتله وكنت دايما احذر حكيم منه.. والعملية الأخيرة لما حكيم استشهد قالي كلمة واحدة وهي اللي ساعدتني

فهد : قالك ايه

سيف : قالي انت طلعت صح.. حاولت افهم معني كلامه وبدأت اراقب عاصم.. في البداية مقدرتش اوصل لأي حاجة وبدأت أيأس بس بعد سنتين لما هو اطمن واتأكد ان بعدت عن الصاعقة والعمليات الخاصة بدأ يتحرك بحرية ومن وقتها وهو تحت عيني

فهد : ربنا يحميك يابني انت فعلا ونعم الصديق والأخ يا سيف ربنا يرحم حكيم ويبارك في ابنه

هسيبك ترتاح وهطلب من زمايلك يقدموا التقرير النهائي وانت خد الأجازة المناسبة ليك.. مش مفروض انك عريس ولا ايه

سيف : بعد الضرب ده كله صعب يافندم

فهد وهو ماشي ضحك بمكر وقاله : عيب عليك سمعت البلد بين ايديك

سيف رفض يقعد في المستشفى وطلب يكمل علاجه في البيت.. اللواء فهد وافق علي كلامه ووصله بنفسه لحد البيت

فهد : ياريت ترتاح وتلتزم بكلام الدكتور.. اعتقد انك مش هتحتاج ممرضة تغيرلك عالجروح.. حضرة الظابط ممكن تقوم بالواجب واهي فرصه بالنسبالك يمكن تصعب عليها وتحن عليك

فهد مشي بالعربية قبل سيف ما يرد

سيف : ماشي يا سيادة اللوا.. بس كلامك مظبوط يمكن اصعب علي سوسو المفترية.. طلع لشقته بصعوبة وخبط علي الباب بهدوء وهو بيقول :

افتحي الباب يا سوسو انا سيف

ساجدة بفزع لما شافت سيف قدامها : سيف.. انت كويس ايه اللي عملك فيك كده

سيف : اسنديني بس الأول خليني ادخل.. مش قادر اقف

ساجدة ساعدته انه يدخل ونيمته بحذر علي السرير

سيف : وحشتيني.. كنت خايف مقدرش اشوفك تاني

ساجدة : سيف بلاش الكلام ده ارجوك وطمني ايه اللي حصل

سيف : مش قادر اتكلم دلوقتي نفسي اناااام.. بقالي سنين بنتظر اليوم ده وحاسس اني محتاج ارتاح

بعد اسبوع ساجدة كانت ليل ونهار جنب سيف بتهتم بأكله ولبسه والأدوية بتاعته.. بيتكلم وهي تسمعله باهتمام

سيف بجدية : انا عارف ان في حاجات كتير نفسك تعرفيها.. بس قبل ما اقولك اي حاجة في مشوار لازم نروحه سوا وبعد كده هسيبك تقرري هنكمل ولا هتبعدي

ساجدة خافت من كلامه بس هي فعلا محتاجة تفهم وتعرف كل حاجة

ساجدة : ممكن نأجل المشوار ده شوية لما تتحسن

سيف : لا.. كفاية تأجيل البسي هدومك ويلا بينا

سيف وساجدة وصلوا بيت حكيم.. وقفوا قدام باب شقته وسيف رن الجرس.. فتحتلهم عزة واول ما شافت سيف شدته لحضنها بلوعة ام فقدت ضناها

عزة : ربنا يريح قلبك يابني ربنا يخليك لينا ياحبيبي.. وعدتني انك هتجيب حق ابني ووفيت يا سيف

سيف : ايه ياماما مش هتدخلينا

عزة : ادخل ياقلبي ده بيتك.. اتفضلي يابنتي نورتينا

ساجدة : ده نور حضرتك

ساجدة قعدت شوية اتفاجئت بوجود روني.. ساجدة قامت من مكانها بس سيف قعدها تاني

روني بخجل : سلام عليكم.. حمد الله علي سلامتك يا أبيه

سيف : تسلمي ياحبيبة أبيه.. قربي ياروني سلمي علي ساجدة.. متخافيش

روني مدت ايدها وساجدة فضلت مترددة بس مدت ايدها وسلمت عليها

روني : انا أسفه وعارفة انك زعلانه مني بس والله انا مش كده وعمري ما كنت قليلة الذوق مع حد.. انا بس خفت ان أبيه سيف ينسانا او انتي تمنعيه عننا واحنا ملناش حد غيره

ساجدة بعدم فهم : وانا همنعه عنكم ليه

مروان سمع صوت سيف وجه جري عليه وهو بيضحك : بابا حبيبي.. انت كنت فين كل ده وحشتني كتييير

سيف : عيون بابا انا اسف كان عندي شغل.. ايه يا ماما مش هتحضروا الغدا انتي وروني ولا ايه انا مريض ومحتاج اتغذى

عزة باست راسه وقالتله : بعد الشر عنك يابني الأكل دقايق ويكون جاهز.. تعالي معايا يا رنا

سيف : مش عاوزة تسأليني مين الناس دي وعلاقتي بيهم ايه

ساجدة : لأ.. لما تحب تقولي هتقول

سيف : وده تجاهل منك ولا مش حابة تعرفي حاجة تخصني

ساجدة : لا ده ولا ده بس اوقات الانسان بيحتاج مساحة خاصة وبيحتفظ ببعض الأسرار لنفسه

سيف : ومروان مش ممكن يكون ابني وانا فعلا مخبي عليكي؟

ساجدة : صعب ياسيف.. مستحيل تتخلي عن ابنك او تنكر وجوده

سيف : انتي غريبة اوي ازاي متأكدة بالشكل ده اني مش بكدب عليكي مش دايما تقولي اني بارد ومستفز

ساجدة : بس مش ندل ياسيف.. الانسان اللي يتخلي عن ولاده ندل ميستحقش يعيش.. ممكن نكون مختلفين ومبيعجبنيش اسلوبك بس انا عمري محسيت انك ممكن تتخلى عن حد مسؤول منك

سيف : هحكيلك كل حاجة.. حقك تعرفي عني اللي مفيش حد غيرك يعرفه.. مش بس لأنك مراتي.. لأ.. لأنك أول واحدة تقتحمني بالشكل ده.. اول حد اثق فيه ومش خايف انك تخذليني

انا كنت ساكن هنا في نفس العمارة دي شقتي في الدور اللي تحت.. اتربيت في البيت ده انا وحكيم

عبدالحكيم اخويا وصديقي.. امي وامه كانوا ليل نهار مع بعض انا وهو كنا يتامي زي بعض.. درسنا سوا ودخلنا الكلية الحربية سوا.. وكنا متفقين نتجوز مع بعض في نفس الليلة.. بس هو حب قبل مني واتجوز مني والدة مروان

وبعد شهور من جوازهم انا خطبت بنت عمتي.. منار كانت مناسبة وبتحبني او يمكن معجبة بيا

حكيم استشهد بعد ما واحد زميلنا غدر بينا وبلغ اعداءنا بمعاد العملية وكل تفاصيلها.. حكيم فداني بروحه واتقتل غدر.. بس وصاني اخد بالي من مراته وابنه

للأسف مني بسبب موت حكيم تعبت ومقدرتش تتحمل الولادة وماتت بعد ولادة مروان علطول

بعد اللي حصل مقدرتش اعيش في المكان ده تاني وجيت سكنت في شارعكم.. وفضلت محافظ علي وعدي لحكيم في حماية اهله ابنه.. بس منار متحملتش كانت بتغير من روني ومروان وخيرتني بينها وبينهم وبدون تفكير اخترت

ساجدة : مش ندمان

سيف : مستحيل.. لو بتحبني كان هتحس بوجعي

كانت هتعرف ان انا اللي مت مش حكيم.. والحمد لله قدرت اكمل واخد بتاره واريح قلبي.. دلوقتي انتي عرفتي كل حاجة

ساجدة : لسه.. ازاي والدتك متعرفش انك في الخدمة

سيف : امي لما حكيم استشهد انهارت.. حكيم كان قريب منها جدااا وفضلت فترة تعبانه وفي الاخر طلبت مني اسيب الجيش وانا مقدرتش انفذ طلبها ومقدرتش اتسبب في حزنها فقررت اريحها والقائد بتاعي ساعدني كتير

اني اظهر قدام الكل اني بعدت عن الخدمة واتعينت في شركة البترول.. والباقي انتي عارفاه

ساجدة : وأنا ياسيف

سيف : تقصدي ايه

ساجدة : جوازك مني كان من ضمن الخطة

سيف بصدق : لأ.. انا عمري ما تخيلت انك تدخلي حياتي في التوقيت ده انا فعلا كنت حابب ارتبط بيكي بس كنت مأجل كل حاجة لحد ما انتهي من مهمتي بس الظروف قربتنا من بعض غصب عني

ساجدة : والبنت اللي كانت معاك في المطعم

سيف ضحك بمكر : مالها دي كانت صارووخ

ساجدة : صاروخ في عينك قليل الأدب.. هترد ولا اقوم واسيبك

سيف قرب منها جدا : تقومي فين.. احنا هنقوم من هنا علي شقتنا هنعمل فيها معسكر تدريب مغلق نناقش فيها قضايا خطييييرة

ساجدة بخجل : اتلم ياسيف حد يدخل علينا

سيف : ابداا.. قوليلي بحبك ياسيف

ساجدة : سيييف أتأدب بقي.. بجد هزعل منك

سيف : حاضر.. هتأدب مؤقتا.. وياستي البت اللي كانت في المطعم كانت شغل مش اكتر

عزة جهزت الأكل وروني دخلت لساجدة وسيف

اتغدوا مع بعض وروني اعتذرت اكتر من مرة وساجدة قبلت اعتذارها وحست بيها وبحبها لسيف

🔸🔸🔸🔸🔸🔸🔸🔸

بعد مدة.. سيف وساجدة روحوا بيتهم.. ساجدة فضلت ساكته شوية وسيف سألها

موافقة تكملي معايا بعد ما عرفتي كل حاجة.. مستعدة تعيش معايا والخطر حواليا في كل مكان

ساجدة : الخطر حوالينا كلنا يا سيف في اي وقت واي مكان

سيف : يعني مش هتندمي

ساجدة : انا كنت موافقة اكمل حياتي معاك وانت سيف الراجل المستهتر اللي مفيش بيني وبينه اي حاجة مشتركة .. تفتكر دلوقتي ممكن اندم اني متجوزة راجل زيك.. بطل مستعد يضحي بحياته علشان غيره

سيف : وايه كمان ياسوسو.. اتكلمي بقي وريحيني

ساجدة : اممم.. وكمان وسيم ودمك خفيف

سيف : يافرج الله.. اللي بعده بقي

ساجدة : وبحبك

سيف شالها بخفة وهو بيهمسلها وبيقول.. وانا بعشقك وهعلمك تعشقيني

ساجدة حاولت تبعد بس سيف شدها اكتر لحضنه وقالها بمكر :

رايحة فين ده سيادة اللواء حاطط كاميرات مراقبة ولازم اطمنه...

ضحكت هي بكل قوتها وكان صوت ضحكتها بالنسبة لسيف زي ضوء الفجر لما بيشق سكون الليل وعتمته.. خيط نور في وسط ضلمة ملهاش اخر

ومفيش كلام اتقال بعد كده غير همس بالحب وبس.....

بعد مرور شهر.. كان تعويض لسيف عن سنين حرمان وتعب عاشها لوحده.. وتعويض لساجدة عن ظلم عاشته طول حياتها بسبب جهل وعقد مجتمعنا....

ساجدة : سيف ممكن نتكلم شوية

سيف : سامعك ياحبيبتي

ساجدة : شغلي يا سيف.. ارجوك انا مقدرش اشتغل في مصلحة السجون

سيف : انتي مش شايفة ان العمليات الخاصة شغل صعب وخطر.. وانا مقدرش اغامر بيكي

ساجدة : ارجوك علشان خاطري

سيف شدها لحضنه وكلمها بهدوء وقال :

انتي رجعتي تاني لشغلك يا ساجدة.. بعد ما رجعنا من سوهاج انا اتأكدت انك مينفعش تكوني اي حاجة غير ظابط شرطة.. حاولت ابعدك عن الخطر والخطر لقيته قدامنا وجوه بيت اهلك.. وكنت فخور بيكي وبتصرفك واثبتيلي اني غلطان...

انا فعلا خايف عليكي بس انا مش اناني مش هجبرك تعملي حاجة غصب عنك.. بس ده ميمنعش اني طلبت اجازة مفتوحة ليا وليكي

ساجدة : أجازة مفتوحة ليه بقي

سيف : ما قلتلك في قضايا مهمة ولازم نحلها انا وانتي يا حظابط

ساجدة : وانا جاهزة وتحت امر سيادتك يا سيادة العقيد المحترم

سيف من بين قبلاته المتلهفة : عقيد ايه.. عميد ياحبيبتي.. عميد

🔸🔸🔸🔸🔸🔸🔸

بعد مرو خمس سنوات..

سيف بيجري ورا ولاده الاتنين حكيم ومهدي.. وبينده عليهم بجدية : اقف عندك ياكلب انت وهو.. مين فيكم اللي كسر الساعة بتاعتي.. انتوا ايييه قرود مش بشر زينا

ساجدة شالت الولدين وقالتلهم انزلوا تحت عند تيته

ساجدة في ايه يا سيف بيه متعصب عالولاد ليه

سيف : سوسو بلاش انتي تدخلي كفاية رقية ومهدي مبوظين اخلاقهم

ساجدة : بالعكس ولادك رمز للأدب والاخلاق زي ابوهم بالظبط

سيف : يا راجل ده انتي بتتريقي بقي

ساجدة : ابدا يا بيبي.. بس انت مش قادر تقتنع ان ولادك نسخة منك في الشكل والتصرفات. ربنا يعيني عليكم

سيف : مش عاجبينك ولا ايه يا حظابط

ساجدة بحب : عجبني اوي يافندم.. متنساش تجيب مروان وماما عزة علشان الحفلة بالليل وكلم ماجد وروني وأكد عليهم ميتأخروش

سيف : حاضر ياختي ماجد ده عملي الأسود قولت هيتجوز ويبعد عني راح اتجوز روني ولزقلي في كل حته

ساجدة : ليه ان شاء الله وانت كنت هتلاقي راجل زيه فين

سيف : في الحقيقة مفيش.. رغم انه غلس بس طلع اد كلمته ومحافظ علي رنا وعمره ما زعلها

ساجدة : ايوة كده.. احبك وانت حقاني

سيف : هنشوف يا بطل ياريت بس بعد الحفلة متهربيش وانا هثبتلك اد ايه انا حقاني..

🔸🔸🔸🔸🔸🔸🔸🔸

ساجدة وسيف عاملين حفلة عيد ميلاد سيف واولاده

حفلة بسيطة بس كلها حب وتفاهم..عهود ومعاذ واولادهم موجودين.. ثائر وقمر... وجميلة ومصطفي.. الحاج عبدالحق حاسس بالسعادة وفخور ببناته وعيلته

رقية ومهدي سعادتهم كملت بوجود احفادهم

وفي اخر الحفلة سيف واقف بيبص علي كل الموجودين بيتأمل الوجوه وبيسأل نفسه :

معقول يا سيف بعد سنين الحزن والخوف تلاقي بر الأمان جوة حضنها.. معقول يا ساجدة ربنا بيحبني للدرجة دي..

ساجدة : سيف.. بقالي كتير بكلمك وانت مش معايا

سيف حضن ساجدة وهي حست بخجل همستله بحب : سيف حبيبي الناس هياخدوا بالهم

سيف : انا كان ممكن يحصلي ايه من غيرك.. معقول حياتي كانت هتكمل من غير وجودك فيها

ساجدة : كل شئ نصيب ودايما ربنا بيكتبلنا الخير بس اطمن حتي لو انت مش جوزي وحبيبي كنت هخطفك واتجوزك يا سوسو

سيف بغيظ : ايه سوسو دي عيب كده ياحظابط

ساجدة : عيون سوسو ونبض قلبي انت يا سيف.. انت وجودك خلاني احب الدنيا واحب نفسي.. عمرك ما حاولت تغيرني او تمحي شخصيتي بالعكس بتقويني وتزود ثقتي بنفسي.. كل العيوب اللي كان الناس شايفينها فيا اكدتلي انت انها مميزات.. ساجدة ظابط الشرطة اللي مبتخفش من مخلوق.. بتبقي بين ايديك انت سوسو الطفلة الصغيرة اللي بتخاف من بعدك وغيابك عنها

سيف حضن ايديها بايده وقالها بحب

يلا بينا نرحب بالمعازيم يا سيادة المقدم

انتهت النوفيلا.. متشكرة جداااا لمتابعتكم وآرائكم بجد اسعدتوني جدا ومبسوطة ان الفكرة عجبتكم.. ياريت نربي بناتنا عالحب والقوة.. البنت وجودها نعمة ولو محستش بالحب في بيتها عمرها ما هتلاقي نفسها افتخروا ببناتكم وربوهم يعتزوا بنفسهم وميقبلوش الاهانة

دمتم في رعاية الله

تعديل المقال