رواية عشت وشفت الحلقة الأولى 1 بقلم حسن الجامعي
لقراءة باقي حلقات رواية حسن الجامعي على موقعنا : اضغط هنا
أو انضم لمجموعته على الفيس بوك : من هنا
 |
| رواية عشت وشفت الحلقة الأولى 1 بقلم حسن الجامعي |
رواية عشت وشفت الحلقة الأولى كاملة مكتوبة بقلم الكاتب الليبي حسن الجامعي
داليا : كنت ماشيه في طريق في اسطنبول مدينة كبيرة بكل و غربه وكنت ماشيه ندور على شغل باش نطلع فلوس وندفع كل شي عليا...وندفع ثمن غلطتي ندفع ثمن ثقتي بناس وندفع ثمن طيبتي الزايدة...كنت ماشيه في طريق وفجأه واحد يحط ايده على خشمي بعنف...وكنت نشم في ريحه قووية وواضح انها ريحه مخدر وغمضوا عيووني بسرعه دخت ومن بعدها فتحت عيووني ببطء ونشوف في دنيا كلها سوودة وايديا مربوطات ورجليا مربوطات مصدووومه مش عارفه شنو اللي صار معاي وكيف صار معاي وكيف كنت نشوف الحياة في ليبيا و تركيا...اول مرة نعيش ونشوف الواقع والجانب المظلم للحياة💔...!
_______________________
🔥روٌايَــــــــــــــــــــــاتٌ حَــــــــــــــسٌــــــن الجَــــــــــامّـــــعــــــيٌ 🔥
القصة صارت في سنه ( 2019 )
بين اسطنبول و تركيا ركزووا...!
في شهر 7 ❤
........................................
قبل شهرين...!
( ليبيا _ طرابلس )
الساعه 7 ونص الصبح...!
داليا : خششت بخطوات سريعه وهي متعصبة للدار...طلعت شنطة السفر متعها وحطتها على سرير وبدت اطلع في حوايجها كلهم من دولاب وهي متعصبه...اني نوووريك يا حقير يا واطي يا خاين حسبي الله ونعم الوكيل فيك...!
علي : خشش بفزع وهو متوتر...اءءءءء حبيبتي شنو ديري ليش تاخدي تلمي في حوايجك وتحطي فيهم في شنطة...؟
داليا : تجمعوا دموعها وبدت تعييط عليه...انت وواحد حقير وكلب وخاين معاش تقولي حبيبتي اني نكرهك نكرهك للمووووووت...!
علي : داليا حبيبتي بالله خلييك موجودة واستري عليا متقوليش لحد...!
داليا : تعصبت اكتر...مصح وجهك وخلاص هذه اللي هامك ان منفضحكش قدام الناس يا واطي!
علي :😨...غييير وين ماشيه وتاخدي في حووايجك توا امك وبوك يهزبوني يقولولي شن مدايرلها غير اقعدي نشرحلك كل شي عمري...!
داليا : كملت حوايجها ولبست عبايتها وهي مغلوله من علي...هيا هي نحي من طريقي وبرا كمل حب وغرام مع حبيبت القلب متعك يا وسخ...!
علي : وقف قدامها مصكر عليها طريق...مفييش مشي خليكي مووجودة حبيبتي بالله عليك اني منغيرك لا شي والله...!
داليا : ابتسمت بهزووة...هههههه لو انت ولا شي بدوني شنو الشي اللي خلاك تخوني مع وحده زي هذه يا حقير شفتهم الرسائل ومكالمات وطلعاتك معاها للأسف اني نكرهتك خلاص واحني لازم نطلقوا و توا...!
علي : انصدمم...كيييييف😨 اي طلاق هذه شنو تحكي مش لهدرجه حبيبتي...!
داليا : اني مش مضطرة نعيش مع واحد نسونجي وشخصيته ضعيفه وعايش واكل شارب على حسابي يا وسسخ لا وزيادة تخون فيا...!
علي : غييير اصبري يعني بتفسخي العقد ومعاش نخدم معاك وبنطلقوا وخلاص احكي...!
داليا : لو منحيتش من قدامي رح نتصل بأمك وبوك وخووتك ونحكيلهم على عملتك الوسسخه شن تحسابها سايبه هي نحي من قدامي...وطلعت!
علي : كان واقف وضعييف وتعابير ووجه معبيه ندم وحيرة وخووف...ياربي شنو ندير معاها هذه توا مصيبه مش عارف من قاللها النم😤...!!
داليا : اسمي داليا م97 مواصفاتي شعري اسود مايل للبني شوية جمييله هلبا ونعتبر احلى وحده في العيلة وهلبا ناس تغار مني لأن خديت علي و تزوجاته بس لأنهم يشوفوا فييه شخصية و حلو ومن برا يبان عنده فلوس وهو اللي معيشني على حسابه...لكن مع الاسف هو اني اللي معيشته...تزوجته ومدة الزواج كانت سنه وحده بسسس وسنه هذه شفت فيها جميع عيووبه وقرفه وندمت ان خدييته بس مقدرتش نطلق منه دغري باش العيلتين ميصيرش بيناتهم خلافات...وكنت متحملته لعند ما تخطى كل الحدوود والفرص...!
_______________________
عند اوس في تركيا:-
طق طق طق !
فريدة : اوووووف ياربي الشغاله التافها مجتش اليووم واني خايفه على بدكير اللي درته يفسسد ياربي يصبرني وخلاص...فتحت الباب!
اوس : صباح الخير يما شن الأمور شن مدايرة...!
فريدة : صباح اسود على راسك ووين مروح لتوا ووين كنت امبارح في ليل يا حيوان اتكلم...!
اوس : واااااك علينا توا بتبدا النفخ متع كل يووم ومحضراتها...كنت في شركه نخدم خلاص ارتحتي توا...!
فريدة : هههههههه صدقتك على اساس تخدم وجوو اني عندي شغل هلبا وللصبح...مش عليا الحركات هذه وجهز نفسسك غدوا رح نخطبلك بنت ليبيه بنت صاحبتي سميه مشاء الله جمال ومتعمله ومثقفه وتناسبك وهما اهني مقمين من سنتين يعني البنت حتى لغة تركية عندها مشاء الله علييها يا ولدي تناسبك...!
اوس : واااقف وقارن حاجبه...كم مرة قتلك اني منبيش تنزوج منبيش نتعرف على وحده كم مرة بنقولك ان احني جيينا علاج على خاطر بووي وكم مرة بنقولك ان احني فترة نكمل شغل الشركه ونرووحوا خلاص خلاص صكري على الموضوع راهو بتجيبلي الحاله النفسيه يمى...!
فريدة : نعم نعم نعم...تبيني نروووح لليبيا تبيني نروح للهرووب الضي لا والله مصح وجهك بعد ما تعودت على جوو اهني تبيني نروحوا لا هلبا هكي...!
اوس : خلاص معناها اقعدي اهني وديري اللي تبيه يما ربي يخليك ليا انتي امي...بسس فكيني من بنات و زواج لأن مش وقتهم ولا عندي خلووق لييهم اصلا😑...وخشش للدار متعه بقلة صبر وعصبيييه...!
فريدة : واقفه في وسط الحوش...لا ياربي اني لازم نقتتتل رووحي خلاص قلقت منه الولد هذه زي بوووه معاندي وراسه مصكر ربي يسترنا ويحفظنا من اللي جاي...!
اوس :- هذه اووس شخصية حلوة متواضعه يحب يساعد الناس عنده اهم شي اخته وامه وبووه...مشوا لتركيا على خاطر علاج بووه...استغنى على كل شي في ليبيا ونقل شركه وكل شي لتركيا على خاطر بوووه وصحته...مواليد97 لحيته خفيفه شعرها اسود مايل للبني...شخصيته هاديه ويعرف يتعامل مع الامور بكل بروود وهدووء...!
_______________________
عند نووسة في الحوش:-
الساعه 8 الصبح...!
نوسة : راقده على سرير وكل شووية تتقلب...لعند ما طاحت من سرير...اوووووف اووف اوووف سرير صغير وزباله بجديات صبح اغبر على روسكم كلكم😠...!
جيهان : ناضت من النوم...تي خيرك تعيطي من عند الصبح شنوو في خرا اهيا...!
نوسة : انتي صكري فمك وارجعي تمرقدي خير ما تاخدي كم كف على وجهك ع صبح...!
جيهان : رجعت رقدت وتغطت...اللهم صبرني عليها المخلووقة هذه امييين يارب...!
نوسة : ناضت وفتحت الدولاب متعها...مفيش حوايج كالعاده عندي زوز لبسات وفي غساله كالعادة فقر فقر فقر فقر فقر فقر عيلة فقر...حتى روج تم مني مش عارفه كيف بنمشي للجامعه اليوم...!
جيهان : قولي الحمدلله على كل حال...التمرد هذه رح يزيدك مصايب...صلي وتفائلي بدل الرغي هذه كله ع صبح...!
نوسة : موعظك عليها لنفسسك يا عمري...قالك صلي قال...شنو الصلاة بتجيبلي فلووس ولا شنو بزبط...!
جيهان : 😱...حرررررام معاش تقوولي هكي...استغفري ربك لا حول ولا قوة الا بالله...ربي يهديك ربي يهديك يا نوسة...!
نوسة : رح نلبس لبسة من عندك يا وجه الفقر...وبعدين متحشمينيش قدام صحباتي وتقوليهم هذه لبستي وهي واخدتها مني و حركات هذه...!
جيهان : تحسابيني زيك مريضه...بري البسي وانتي نحس فيك ماشيه تستعرضي مش ماشيه تقري زي خلق ربي...!
نوسة : قلبت عيوونها بملل...خدت شوور ع سريع ودارت شعرها وحطت مكياج خفيف ولبست بلوزة حمرا على سروال اسود جلد ولبست الشنطة الصغيرة متع الجامعه...وجت بتطلع!
نعيمة : وين ماششيه بالبس هذه يا للا...؟
نوسة : قلبت عيونها...اوووف ياربي بدي تحقيق
نعيمة : قاعده نكلم فيك اتلفتي بأدب وجاوبي بأدب...قتلك وين طالعه...؟
نوسة : تنرفزت... طالعه ندهور في الملاهي طالعه مع صحباتي نشري حوايج ماهو احني عندنا فلوس هلبا زي الرز يا عليك حاله وخلاص...طالعه للجامعه وين بنمشي يعني😒...!
نعيمة : احترمي نفسسك لما تتكلمي معاي اني امك مش وحده تلعب معاك في شارع فاهمه ولالا...قليلة ادب...!
نوسة : خلاص خلاص خلاص درهتولي كبدي وانتم كل يووم لازم تحقيق وين طالعه ووين خاشه...وطلعت وصكرت الباب بالقوة...!
نعيمة : حطت ايدها على راسها بقلة صبر...اخخ يا الله امتى البنت هذه بتعقل ودير عقل!
جيهان : بنتك مش طبيعية بكل...لوو بوي مزال عايش راهو علمها الادب والاخلاق...ومش مدايرتلك قيمه بكل...مش رح تفهم ان دنيا فانيه بكل الا لما تجرب وتعيش وتشووف الشي اللي احني خايفين منه...!
نعيمة : ربي يهديها يا بنيتي ربي يهديها💔...!
نوسة :- مواليد99 تقرا في جامعه مواصفتها طولها متوسط بيضه شعرها اسود ومايل للبني وطووويل عيونها عسليات...بنت متمردة وضد العادات والتقاليد اللي مجتمعنا...تحب تطلع هلبا تبي الفلووووس...وكل يوم تلعن وتسب في عيلتها اللي ملهاش ذنب...بس لأن هما معندهمش فلوس...هما تلات بنات نعيمه اتكوون امها وجيهان اختها الكبيرة تخدم في صيدلية وتجيب في الفلوس على قد ما تقدر تحاول تووفر كل شي للحوش ومع ذلك نوسه مش عاجبها ششي💔...!
_______________________
عند سراج في تركيا:-
ترن ترن ترن :-
سراج : راقد وكل شووية يسمع صوت تلفون يصكره ويرجع يرقد مرة تانييه...اووووف صبح اززفت شن يبوا من امي توا دره اهما...!
ترن ترن ترن !
سراج : الووووو ها شن في خيركم من عند صبح!
احمد : سراج بالله تعالا للشركه بسسرعه في مشكله اهني صايرة ونبووك اتجي تحلها...!
سراج : مفيييش حاجه متقدروش اديروها من غيري...!
احمد : اءءءءءءء...ايييه هههههه بالله تعالا !
سراج : سكر في وجه الخط...يضحك زي الخرا ههههه بالله تعالا...مبرررده...!
سراج : عايش في تركيا لييه 4 سنين يشتغل في اسطنبوول فاتح شركه نقل وحولات وشحن...اعزب وعايش بروووحه عيلته كلها في ليبيا...وحييد ديما لكن مرة مرة يطلع مع اصحابه...حافظ مناطق اسطنبول كلها ويعرف الاماكن الكويسه واللي مش كويسه تبع العصابات وحبوب الخ...مواليد95 مواصفاته شعره اسووود عيونه عسليات...طووويل وعريض وشخصيته عصبيه هلبا...!
سراج : ناض خدي دووش وطلع لبس طاقم مرتب متع الشغل...وفطر على سريع وفتح الباب شقه نحى القفل وبعدين فتح المفتاح المرة الاولى وتانيه وتالته ونحى الحديدة وطلع😐...!
_______________________
عند روز في الجامعه:-
الساعه 8 ونص الصبح...!
روز : كانت تتمشى في الجامعه وتتفرج على ناس وكانت ادور من بيناتهم الشخص اللي هي تبييه...وكانت تشوف يمين ويسار وتعبت وهي ادووور عليييه...!
الياس : وجي من وراها وخلعها...وووووه👻...!
روز : انخلعت...وووك عليا خلعتني يا حيوان تفوووه عليك تحساب روحك صغير😨...!
الياس : اوووبا خيرك اليوم طالعه حلوة اكتر من قبل بهلبا تصدقي...!
روز : يعني اني كنت شينه قبل هكي🥺💔...!
الياس : ههههههه انبصر عليك يا عمري...المهم اني خلاص مش مصدق امتى بنتزوجك خلاص نبووا نطلعوا من مكان هذه ونمشوا على شط بحر اسطنبوول ونرتاحوا من ليبيا ونخليك تعيشي اميرة ❤...!
روز : تحمسست...حليلي حبيبي معاش تحمسسني خلاص مش مصدقه امتى يجي يوووم غدوا هذه واخييرا فرحانه حبيبي❤
الياس : اييه يا عمري...بس مش غدوا رح نهربوا
روز : اءءءءءءء....كيييف يعني امتى مفهمتش عليييك...!
الياس : اليوم في ليل تجهزي نفسك وتاخدي حوايجك كلهم ومع الساعه 3 في ليل نجيك اني بسيارة ونهربوا من اهني ونكونوا خالصين هكي...!
روز : كييييف😨...اليووم في ليل كيف نبي نلحق اني قصدي مفهمتش كيف رح نلحق نجهز حوايجي حبيبي💔...؟
الياس : خلاص حبيبتي متجيبيش حوايج هلبا مدابيا خفاف لأنك بتهربي انتي...وبعدين خلاص اني حجزت راهوو...!
روز : اووووووف...مشكلة هكي ليش مقتليش قبل ما تحجز عللش تحط فيا تحت الامر الوقع؟
الياس :اءءءءء...خيرك حبيبتي معاش صارلك معاش تبي تتزوجيني خلاص💔...؟
روز : 😨...لالالا حبيبي مستحييل نتخلى عليك اني يا عمري💔...!
الياس : معناها خلاص يا عمري جهزي نفسسك باش نهربوا من اهني...ونعيشوا حياة طبيعية برا من اهني...!
روز : تمام حبيبي...خلاص رح تبدا المحاضرة❤
الياس : بحب...روز اني نحبببك ❤
روز : واني نموووت فييييك❤...كانت عمييه ومتشوفش قدامها كانت تشووف في الحياة ورديه وحلوة وتتخيل كيف رح تكون حياتها بعد ما تسافر من اهني😍...!؟
روز :- مواليد99 نديد نووسه...هما الزوز صحبات ونفس طبع بعض لكن روز قلبها اطييب بهلبا وخوويفه وبريئه وكل شي يقوللها علييه الياس هي اديره...خاصة لما قاللها ان امه و بوه مش موافقين علييها...وقاللها رح نهربوا مع بعض وهي وااافقت طووول ومفكرتش في عيلتها ولا على ناس شنو رح يتكلموا علييها اوو كيف رح تكون سمعتهم قدام الناس...واكبر غلطه رح ديرها في حياتها هي انها رح تهرب مع الياس لتركيا في اسطنبووول لأن 💔...!
عند الياس:-
ترن ترن ترن:-
عمر : ايوا يا غالي شن الامور شن الاوضاع عندك...!
الياس : الامور لوز اللوز يا عشيري...وكل شي زي ما خططناله رح يصير يا حبي🔥...!
عمر : كيييف قصدك هي صدقاتك انك تحبها وتبي تتزوجها ولا كييييف احكيلي بتفصيل شني مني...!!!
الياس : غر اصبر انت بسس...شاف روز وتأكد انها دخلت للقاعه متع محضرات...!
عمر : الووووووووو!؟
الياس : خييير فيتك اصبر...المهم شووف اني قدرت نقنعها وهي مقتنعه 100% يعني الاموور ماشيه زي ما نبوا انت جهز الفلوس اللي قتلك علييهم وجهز السيارة وكل شي...!
عمر : تم تم يا غالي مالا الليله رح توصلوا ولا امتى بزبط...!
الياس : طيراتنا ساعه 4 رح نوصلوا الساعه 7 او 8 الصبح جهز رووحك متنساش ومترقدش باش متضيعش اللي درناه كله وتعبنا عليييه...!
عمر : تم يا غالي الفلوس واتيات بالربطه🔥...!
الياس : اووووكي😈...#يتتتتبببع!
_______________________
شي طبيعي رح تكوون الحلقة الأولى قصيرة باش تتعرفوا اكتر على ابطال الرواية وقصصهم وشخصياتهم ومواصفاتهم❤...ورح نسألكم اما اكتر قصة شدت انتباهك وتحسسيها رح تكون قصة قووية ومنها عبره وموعظه وفيها احداث قوووية...هل هي قصة :-
( داليا ) او ( نوسة ) او ( روز )
مزال الشخصية الاخيرة في الحلقه الجايه ❤
الرواية حلقاتها بسيطات مبيتش نطولها لأن رح ادووووخوا فيها لأنها حلوة❤
اي تعليق سلبي حظر من القروب❤
الحلقه 2 مش رح تنزل الا لما توصل الحلقة 1500 لايك❤لأن القروب 23 الف ومفيش الا 1000 بسسس يتفاعلوا...هيا قيمووو القدر وروني هل انتم قدها ام لا وللعلم رح يكون تنزيل على حسب التفاعل ويوم بعد يوم ... ومش كل يوم والله الا في حاله ان تفاعل قوووي ايووا... جو نوو ورطوبةومريض و نكتب فيها...ومفيش تفاعل هلبا هكي عليا😂🔥...!