القائمة الرئيسية

الصفحات

رواية ليلة اكتمال القمر الحلقة السابعه 7 - زهور جمال الدين

رواية ليلة اكتمال القمر الحلقة السابعه 7 - زهور جمال الدين

رواية ليلة اكتمال القمر الحلقة السابعه 7 - زهور جمال الدين
لقراءة باقي حلقات رواية ليلة اكتمال القمر : اضغط هنا

رواية ليلة اكتمال القمر الحلقة السابعة كاملة مكتوبة  للكاتبة زهور جمال الدين

زهور جمال الدين(7)
_
فى صالة حوشهم
عمتك زهرة تنادى/ سهام ..ياسهام
-طلعت كنتها نورا/ نعم ياعمتى
-زهرة / وين سهام
-نورا / سهام فالجنان الخلفى شورة تتصل بي كمال
-زهرة / حتى انا هدا ليش ندور فيها .. ترا بالله ناديهالى
-نورا / حاضر هى
شوى وجت سهام تمشى / ايووةة ياعمتى
-زهرة / حصلتى كمال ولا شنو
-سهام / لا والله ماحصلته .. تليفونه خارج التغطيه ..
-جنه مقعمزة جنب امها / هوا مش قاللكم بيبات
-سهام / ايه قال بيبات .. غير استغربت انه متصلش بكل
-جنه / مدامه خارج التغطيه معناها المنطقه اللى هوا فيها مافيهاش تغطيه اكيد ...
-فايزة مقعمزة جنبهم /الصباح رباح..ماتشغلوش وتو يكلمكم غدوة لما يبدا فطريق المرواح
-سهام / ان شاء الله
تلفتت ومشت للممر ..
زهرة شبحت لى بنتها / امالا خيرنى قلبي خانبنى
-جنه تهمس/ غير بالك انشغلتى عليه يااام .. اللطف عليه اوخى
-زهرة / ربي يرده سالم يااارب
جت اخت فايزة تحط فى الحليب والتمر لان فى الايام البيض وممكن فى من النساوين اللى صاايمه... وزعو التمر والحليب والميه
____________________________________________
_
فى خيمه الرجالة ...
نورى ماد رجله على كرسى ويحرك فالرجل الثانيه بسرعه ..
واضح انه يخمم فى شى .. ماسك تليفونه فى يده وكل شوى يتصل ... لااااا الموضوع معش طبيعى ...المغرب قريب ايأدن وكمال خارج التغطيه ... يااااربي جيب العواقب سليمه
جى واحد من العمال يمد فى الشاهى للناس ... لما وصل جهه نورى .. ترا كيف اضايق هوا وواحد من الشيابين ...تعكل طاحت منه الصفرة ويجى طايح هوا والشيبانى على رجل نورى ...
نورى / اااااه ... رجلى رجلى ...
وزى اللى اختل توازنه او داخ ... ناض بلال ومعاد والشباب يجرو ...
-معاد / نورى ... يانورى
-نورى وجهه مقلوب/ رجلى ياراجل
نورى معش شاعر باللى حواليه ... زى اللى داخ ...
قاموه الشباب وطارو بيه للعيادة وفى جرتهم عمك فاتح وبعض من الشيابين ...
الدكتور يعارك / ياحاج ولدك قلتله من امس لازم اليوم يخش العمليات وهوا يعاند
-فاتح يشبح لمعاد وبلال/ كيف يقوللكم الدكتور هكى وتروحو بيه يابهايم
-معاد / هوا اللى اصر عالمرواحة يابوى شن بنديروله
-فاتح يشبح للدكتور/ والله كان ندرى عليه مانخليه راهو بعته مع خوه من الصبح
-الدكتور/ حصل خير ... واهو دخلناه توة
-معاد / وين دخلتوه
-الدكتور/ دخلناه لعمليه مستعجله..
-فاتح / لكن لما جبناه كان دايخ وخاش فى غيبوبه نوضتوه منها ولا شنو
-الدكتور / اكيدة الدكاترة لداخل دارو اللازم ... المهم خلصو الخزينه وكملو الاجراءات
-معاد / تمام بادن الله
مشى الدكتور خش للممر
فاتح تلفت لى معاد / توة وقتها مشيه خوك .. لاتشاورو لاتناورو ...
وبالفعل دخلو نورى لغرفه العمليات ....
.
.
.
.
.
واللى ملوح فى الحوش المهجور ..الدياب نتشتله جسمه كله .. وجهه وخدوده وعينه اليمين ... . ملوح هكى فالعراء ... منتش مع بعضه ...مصارينه طايحات قدامه ...
خش لساحة الحوش المهجور افريقى يمشى عالجمل 😳😳
قعد ينادى عالحوش مارد عليه حد ...عرف ان الحوش مهجور
شاف لقى جثه كمال ملوحة ....والدياب مازالو فى جنبها ..
الدياب شبحو للافريقى وبدو يتراجعو لتالة بهدوء ويديرو فى اصوات ....
وتلفتو الادياب للخلف ومشو يجرو ونقزو من السور ..
الافريقى جاب نفس المسحة ... وحفر حفرة فى نفس المكان اللى طاح فيه كمال .. ودفن فيها الجثة لم هادوكه المصارين كلهم وحدفهم فالحفرة والدم وكل شى.. وحط التراب علي باقى الباقى الجثة
بعد ماكمل حول الغطاء من على راسه يطلع انه نفس الافريقى اللى دفن افراح😨😨... وووك غبارة هدا منهوا وشن قصته ومنين خش الباب مصكر بالسلاسل ....
اااااه ... توة فهمت .. هدا حارس المكان .. زى المارد .. يحرس فيه ويحميه مم اى دم محرم ... فى هكى قصدكم .. موجودين الحاجات هادو .. ارواح ولا جنون ولا شنهما ...
تو نشبحو قصته شنهيا ..الافريقى هدا الباين عنده قصه
___________________________________________
_
نورى خش للعمليات ...
رقدوه عالسرير محوليله حوايجه وملبسينه مريول العمليات
مزال دكتور التخدير ماخشش للصالة ..
نورى فتح عيونه بين دوخة ووقضه يشبح فى زوز ممرضات لابسات كمامات ويعقمو فى المواد ....
غمض عيونه .. فتحهم يلاقى وجه بنت مكشر عن انيابه قدامه... رعش مع بعضه واصدار صوت خايف ..
جت ممرضه وقفت جنبه وتشبحله ...
الممرضه الثانيه/ خيره
-الممرضه اللى فجنبه/ شوره يحلم ..مش عارفه
ومشت وخلاته ....
هوا عيونه مصكرات ...لكن ودانه يسمعو ... بدى يسمع فى صوت خطوات... حد يمشى بالخطوة لين يبي يقرب منه
فتح عيونه بصعوبة ... يلاقى افراح جايه ...افراح ..ايه افراح هيا لانه زابط وجهها كويس... فاتحه شعرها والدم نازل من فمها ... لكن مانمشيش كويس ... تعكز على رجلها ... كأنها تعبانه ... هوا مش فاهم خيرها ... لكن هيا الباين على مامصو منها من دم لين مش قادرة تتحرك ...
نورى يرعش مع بعضه ... قولو يخض ... غمض عيونه زى اللى مشى فى غيوبه ... فاق ثانى...فتح عيونه يلاقى نفس البنت اللى شافها فالمعرض لابسه بدلة بيضا وعاطيه بالضهر
زاد تمرعش اكثر واكثر ... حول عيونه من عليها وتلفت لسقف الغرفه يرعش ... يجيه وجه افراح من السقف لحد وجهه وهيا فاتحه فمها والدم يطلع منه ويقطر على وجهه... ويطلقها عيطه قوية ... جو الممرضات يجرو وخشو بعض من طاقم التمريض لان العيطه انسمعت برة
______________________________________________
_
قاسو لى نورى الضغط يلقوه مشيط ...وهوا فى غيبوبة ..... والدكاترة يتناقشو .. والرجل انفعصت من مكانها معش تتحمل تقعد حتى ساعه ضرورى من عمليه .. وهوا ضغطه عالى صعب يخاطرو بيه .... ياوالله عملة مبحبحه على نورى
ولما طال الوقت بلغو امه ومرته ... ولحقو للعيادة .. وصاير فيهم حالة ويتباكو كلهم ... لكن الباين عليها افراح بتبكيهم بدل الدموع دم
.
.
.
.
.
.
ثانى يوم الصبح لقو ضغط نورى نازل دخلوه للعمليات ...
وهما عيلة كاملة صاير فيهم .. ياويلهم نورى اللى فى غرفه العمليات وياويلهم كمال اللى ادن الضهر وهوا ماروحش وتليفونه خارج التغطيه .. وياويلهم الحوش المعبى بالناس اللى تعزى مقعمزين معاهم غير اهل فايزة وهما كلهم فالعيادة
-فاتح / اتصل بي خوك شوفه وينه
-معاد / توة غير الهى فاللى ملوح لداخل فالعمليات..كمال سيوره يوصل
-فاتح / كلمتة
-معاد / ماحصلتاش تليفونه خارج التغطيه
-فاتح / هوا وين مشى ..اما منطقة
-معاد/ والله ماندرى عليه يابوى
-فاتح / كيف ماتندريش على خوك ..سياراتكم اللى جايبيينهم وين مكانهم
-معاد / والله ماندرى ولدك نورى ماقاليش عليهم
وشرين تليفون معاد ... شاف الرقم لقاها سهام مرت خوه كمال تتصل ...
رد عليها / الوو
-سهام / كيف حالك اوخى معاد وكيف حال نورى توة انشاءالله احسن
-معاد / قاعد فى غرفة العمليات ان شاء الله خير وخلاص
-سهام / قتلك .. ماكلمكش كمال .. قلبي يغلى عليه من الصبح وانا نتصل تليفونه خارج التغطيه
-معاد / بالك مزال ماروحش من المنطقة اللى هوا فيها .. مزال الوقت ضهر
-سهام / انت حصلته
-معاد / لاوالله ماحصلتاش... تو يروح ياسهام ماتخافيش
-سهام ترعش/ ان شاء الله خير ..
وصكرو الخط
-فاتح / هادى سهام
-معاد / ايه سهام تسأل على كمال
-فاتح / ماهو عيلة فليت.. كنهدا توة يبعت خوه وهوا يشبح فالضرف..تو يطلع مالعمليات وبعتالى ساهل عندى معاه كلام
_____________________________________________
_
نورى طلع بعد ساعه من العملية ... دخلوه العنايه ... شن السبب .... لانه خش فى غيبوبة
فاتح / وشن سبب هالغيبوبة يادكتور
-الدكتور خايف/ متخافش ياحاج مش اول مرة ديما تصير
-معاد / يعنى قداش احتمال يقعد فالغيبوبة ..
-الدكتور / بالك يوم او يوم ونص ...على حسب...المهم متخافش ياحاج
وهاديكة العيلة تمولج ... وصاير فيهم ... نورى اللى خش غيبوبة .... وكمال اللى ماروحش
امهم فالحوش فاتحتلهم نديب / ياحليلى على صغارى ... ياحليلى شتقت الولد الصغير وشكله الكبار بيلحقو
-بنتها جنه مقعمزة جنبها تبكى/ ادكرى الله يمى.. ونقصى صوتك يسمعك بوى يجى يديرنا نهار احرف
-زهرة / احرف من النهار ... وانا شن مزالى فالدنيا صغارى واحظ ورا الثانى
-نسيبتها ام فايزة / وحدى الله يازهرة نعرفك مراة تايبه وتصيمى وتصلى ... اصبري واحتسبي وادكرى الله يا حاجه
-زهرة / لا اله الا الله ... ياوخيتى بيش بنصبر وهاك تشوفى ف حالى ..امس دفنت ولد ولدى واليوم واحد فالعنايه وواحد ميردش على تلفونه
وسهام مرت كمال تبكى فى حالة دايرين بيها امها وخواتها
ام سهام / ياوخيتى كنتو فى امان الله ... غير شن جاها هالعيلة بس
-زهرة / وين نعلم... اهو تشبحى فينا نصيمو ونصلو ونتصدقو ...زى الناس
-ام سهام / لاااا نشهد بالله وليداتك نويرة وين ما يشورو ينورو
-خالتهم سالمه / ربي يحفظلك وليداتك ياوخينى غير انتى قولى يااارب ....والغايب ربي معاه وانشاءالله يرده الليله قبل غدوة
-زهرة تبكى/ ياوليد كمال جعنك وين ماتمشى سالم لايلاقيك عدو لا ظالم
.
.
.
.
.
وفاتو ثلاثه ايام وكمال لا السمى قالت ريته لا الوطا قالت ريته ...
وفاق السى نورى من الغيبوبة .... ومشاله بوه
-فاتح وجهه مايتفسرش/ الحمدالله على سلامتك يانورى
-نورى وجهه منفخ ويتكلم بصعوبه / الله يسلمك يابوى
-فاتح يعارك / خوك وين
-معاد / غير بالشوى يابوى
-فاتح / صكر فمك انت
-معاد / الدكتور قال بالشوى عالمريض
-فاتح / شنو داير عمليه قلب مفتوح تحسابه ..هيا كلها رجل مفعوصه
-نورى يتكلم بصعوبة/ تى خيركم
-فاتح / كمال وين ... وين بعته
-نورى فتح عيونه/ خيره كمال
-فاتح / كمال ماروحش لتوة ...خوك وين
فتح نورى عيونه مجحوضات ............يشبح فى افراح واقفه ورا بوه وتشبحله ومنزلة شعرها على وجهها
-نورى بدى يعيط/ يابوى .... يابوى
وخشو الممرضات يجرو وصارت فيهم حوسه .....
نورى مش شاك ان افراح ورا الموضوع .... لا بدى واثق ومتاكد ان افراح ورا الموضوع ....
ضربوله يبرة مهدئة ... وفهم الموضوع بالشوى من معاد ...
وقاله توووووووة من كل تطلع من هنايا تمشى تجيبلى لازرق ...
بالفعل طلع معاد ومشى يدور عالازرق من شخص لشخص من استراحة لى استراحة ...لحد ما طاح..وجابخ لى نورى ..
خش لازرق لى غرفه نورى وهوا لابس سلاسل دهب زى الفنانانين / خيرك تبهدلت يا نورى ... خيرك صاير فيك هكى
-نورى / ماهو من كثر ماتنشد عليا
-لازرق/ لالالا انا شادها سفر برة وسياحه وتدهوير
-نورى/ قعمز بلا صياعه زايدة... واسمع كلامى كوووويس
-لازرق / قول اللى تبيه
-نورى / انا بعتت خوى كمال لى هداكة الحوش قبل ثلاثه ايام
-لازرق / نهارك لاحرف اما حوش
-نورى / تى هداكة الحوش ياراجل خيرنا
-لازرق/ باهى
-نورى/ وين الباهى ... لتوة كمال ماروحش
-لازرق/ لالالا ياوخى والله مانستعرف بيك ولا ليا علاقه
-نورى/ انت من اتهمك بحاجه ... نبيك تشوفلى الحوش بالك طاح فالبير ولا طاح فى حاجه
-لازرق/ هوا مفتاح القفل قاعد عند نفس الجماعه ... لكن اسمع راهو كل شى بحسابه
-نورى/ تم الكلام .... غير شوفهولى بس
-لازرق/ تم عطينى اسبوع
-نورى / هلبا اسبوع
-لازرق/ امالا تحسابه ساهل من حيث قلت ياحوش نطلع طول .. هدا يبي استخارة ويبي برنامج قطع وامور انت ماتفهمهاش
سكت نورى حس انه تسرع لما بعت خوه منغير مايشاور حد ... كانا لازرق اللى عمره ماركعها بيستخير قبل وبيخبر اصحاب الاقفال .....كيف هوا يدير فى خوه عملة زى هادى ويبعته ف يوم وليله ...المهم عرف روحه غلط هلبا
بعد اسبوع ....
لازرق مواطى راسه/ البركة فراسك يانورى
-نورى طول بدى يبكى/ قصدك لقيتوه
-لازرق/ لقيناه مدفون ...
-نورى/ قصدكم نبشتو قبره
-لازرق/ نبشنا القبر ورفعنا معاد وتعرف عليه .....
نورى / لاحول ولا قوة الا بالله العلى العظيم
-لازرق/ ولكن لقينا حاجه ثانيه
-نورى قام راسه/ شنو
______________________________________________
تمت .... ويتبع

هل اعجبك الموضوع :

تعليقات

لو عايز أي رواية pdf .. أو لو عايزنا نعرفك لما الرواية إللي بتتابعها ينزل منها حلقة جديدة، انضم لقناتنا على التيجرام: من هنا 
ما هو الفصل الذي تود قراءته؟