القائمة الرئيسية

الصفحات

رواية المحامي خفايا القدر الحلقة 27 كاملة

رواية المحامي خفايا القدر الحلقة 27 كاملة

رواية المحامي خفايا القدر الحلقة 27 كاملة

لتحميل رواية المحامي خفايا القدر pdf : اضغط هنا 

رواية المحامي خفايا القدر الحلقة 27 كاملة مكتوبة

الحلقه :-
♤ السابعه والعشرون ♤
بقلمي :-
#zezo_a_saad.
عند ملاك :-
نادا عليا سامر وقال ان يبي يحكي معاي بموضوع مهم ..ركبت لعنده ف الجناح ..وخشيت لقيته قاعد ع الصالون .
قربت وقعدت بجنبه :-
خير ان شاء الله طلبتني.
سامر شافلها وخدي نفس :-
هو قصدي يعني نبي ناخذ رايك بموضوع
ملاك :-
ان شاء الله خير احكي.
سامر بهدوء :-
نبي نخطب.
ملاك شافتله بصدمه :-
احم...كيف يعني مافهمت.
سامر :-
مش انتي عندك بنت عمك الكبيره مش مخطوبه صح .
ملاك :-
منو قصدك زبيده .
سامر :-
مانعرفش المهم الكبيره ..نبي نحكي مع عمك بخصوصها شن برنامجه زعما
ملاك باعصاب تالفه :-
سامر شن قاعد تحكي مش فاهمه شي راهو.
سامر خدي نفس :-
اهو تو نفهمك...فاكره صديقي طارق اللي كلمت سحر عليه اخت علاء ورفضاته .
ملاك :-
ايه خيره.
سامر :-
هو هذا ندورله ع وحده ..وبصراحه جت ف بالي بنت عمك لان يومها لما روحت بيك شفتها تلاعب ف ولد صغيرون وتحدفله ف الكوره حسيتها تحب الاطفال..وطارق زي ماتعرفي مسكين مسؤول ع خوته الزوز ويبي مراه تساعده ع تربيتهم قلت ناخذ رايك وبالمره تشوفي رايها حسيتك قريبه منهم بنات عمك وتقدري تفتحي معاهم هالموضوع.
ملاك تنهدت براحه :-
مش عارفه..هو الحق زبيده ماشاء الله عليها حنونه وعاقله وجميله وعمي هلبا ناس خطبوها منه ورفض لأن عندنا قانون ف العيله لازم البنت تكمل قرايتها قبل الزواج نعرفش توا شن الحق.
سامر :-
خلاص انتي احكي معاها بالموضوع وشوفي رايها مبدئيا ولو وافقت انا رح نحكي مع عمك بروحي.
ملاك :-
خلاص تمام متفاهمين معناتها
سامر وقف وباس ع راسها :-
تمام ..تصبحي ع خير عيونتي.
وطلع من الدار ..خشيت توضيت وصليت وقعدت نقلب ف التلفزيون لعند غفيت.
.
.
.

عند سامر :-
حسيت روحي تباعدت هلبا ع سحر المده الماضيه وقسيت عليها هلبا .
يمكن كنت متعصب منها كيف ماتحكيليش ع موضوع مؤيد وماتقولي ان ف حد متقدملها وزاد خوفب وتوتري لما علاء يقول ان مازال ماعطت رايها بالموضوع .
امس سألت سفيان شن صار بالموضوع وقالي ان مؤيد سكر ع الموضوع.
ماقتنعت بكلامه لان مؤيد كان مصر هلبا عليه قعدت نلح ع سفيان ونقصقص فيه لعند اخيرا قالي انه سألها وقالتله مش موافقه .
فرحت بهالشي اخيرا مؤيد بعد عن الماستي ..بس لامتي رح تقعد تستني فيا لأمتي رح ترفض العرسان ع شخص ماتعرف حتي اسمه .
بوسط تفكيري ...خش عليا علاء وكان واضح عليه مهموم.
قعمز بجنبي ع الكنبه ف الصاله .
علاء :-
مساء الخير .
سامر :-
مساء النور ..عليوه شن الجو.
علاء بتنهيده وجع :-
الحمدالله ماشيه .
سامر قرب منه :-
عليوه شن في حاسك مش ع بعضك .
علاء سند راسه بتعب ع الكنبه وراه وغمض عيونه :-
تعبان اقسم بالله .
سامر قرب منه وهو يمسح ع شعره :-
شن في ياعليوه شن اللي صاير.
علاء تنهد بوجع :-
بوي .
سامر :-
خيره شن في ان شاء الله خير.
علاء :-
قبضو عليه هو وراس اللفعه اللي معاه يدخلو ف شحنه حشيش للبلاد وامس حكمو عليه بسبع سنوات .
سامر شاف لعلاء بصدمه :-
لاحول ولاقوه الا بالله ..باهي شن ناوي ادير.
علاء بتعب :-
ماعندي.ماندير خلاص..خليه بلكي ينصلح حاله ع الاقل.
سامر :-
ان شاء الله خير وخلاص.
علاء تمدد ع الكنبه وحط راسه ع فخده سامر وغمض عيونه :-
تعرف اكثر حد واجعني ف الموضوع هو سحر.
سامر قلبه قبضه :-
ليش .
علاء بتنهيده :-
من قبل عندها عقده من بوي وتاريخه وترفض ف فكره الزواج ..وتوا رح تزيد اكثر نعرف كويس قداش ماتتحسس من هالموضوع.
سامر وهو يمسح ع شعر علاء :-
ماتخاف رح توافق لما تلقي الانسان اللي شاريها هيا وبس ومش هامه لا بوها ولا تاريخه.
علاء ابتسم بمراره:-
وين بتلقاه هالشخص..انت عارف مجتمعنا ياسامر مايرحمش ف هالمواضيع بديت مقتنع بكلام سحر اقسم بالله.
سامر بتأكيد :-
رح يصير ياعلاء...وغلاوتك عندي رح يجي اللي يستحقها واللي شاريها ويبيها لذاتها.
علاء بتنهيده :-
ان شاء الله خير وخلاص.
وقف علاء وشاف لسامر :-
نستأذنك توا ياغالي ..وسامحني صدعتلك راسك بهالليل.
سامر :-
ماتحكي هكي ياعليوه خوي انت راك وهمنا واحد .
علاء ابتسم وشفشف لسامر شعره بيده :-
سعيده ياغالي
ومشي علاء وخلاني مع همومي والمي ..واكثر شي موجعني ان سحر خلاص رح تمشي من عندنا باعتبار بوه محبوس رح ترجع عند امها .
.
.
.
.

عند سحر :-
قاعده بداري وهذاك الشاب من بكري يتصل...نعرفش ليش الرجاله طبعهم اناني يعني لما يكونو معصبين ومزاجهم مش رايق مايكلفو نفسهم حتي يحكو معانا ولما يرضو يبونا نحكو معاهم عادي وكان ماف شي صار.
حطيت فوني سايلنت وتمددت ع السرير وخليته يرن ..شوي ووصل منه مسج مكتوب فيه💌 :-
ورب العرش لو مارديتي عليا ..تو نمشي لخوك نحكي معاه.
قريت المسج وتجاهلته لان واضح ان فيلم منه هو وين يعرف خوي اصلا باش يمشيله .
شوي ووصلني مسج تاني منه 💌 :-
تستهينيش بكلامي نديرها راهو.
اتصل تاني ..رديت عليه وقعدت ساكته .
سامر بهدوء :-
معقوله لعند نهددك ياقاسيه عشان تردي عليا.
سحر بدموع :-
انا اللي قعدت قاسيه توا.
سامر بلهفه :-
حبيبي ليش البكاء بس الله يهديك.
سحر سكتت وقعدت تبكي بالعبره وزاد صوت بكاها.
سامر بوجع :-
تعرفي لو ماتسكتيش توا نجي لعندك وناخذك ف حضني.
سحر ابتسمت من بين دموعها :-
ماتوقعتك تكون سوبرمان ...ع اساس تعرف وين نكون انا ووين مكاني .
سامر ابتسم :-
وحياتك لو كنت فكرونه تراني وصلت.
سحر انصدمت من كلامه وتعدلت ف قعدتها :-
انت عرفتني انا منو...قول الحق بالله عليك .
سامر :-
لو عرفت منو انتي..تراني خطفتك من زمان وهربت بيك...نحبك ياالماستي.
سحر :-
كدبه مستحيل نصدقك.
سامر بصدمه :-
ليش بس .
سحر :-
ع اساس مش عارف وتسأل اخري .
سامر بتنهيده :-
اسف حبيبي والله اسف سامحيني شويه ضغوطات وظروف اكبر مني والله .
سحر بلوم :-
باهي انا شن ذنبي معقول اطلع ظروفك فيا .
سامر تنهد بوجع :-
حبيبي ماتقتليني بيوم بالله عليك.
سحر بخوف :-
ليش تحكي هكي شن في قاعد تخوف فيا راهو.
سامر :-
لو ياخذك غيري والله ننجن ونموت انا.
سحر ابتسمت :-
انت كل مره تطلع براي بالاول نقتله وبعدها.نقتلك واليوم نقتل روحي شن في بس.
سامر :-
قلبي احكي جد ماتقعدي تتمسخري ع كلامي .
سحر :-
حاضر مش رح نتمسخر بس حتي انت ماتقعد تخوف فيا ..انا قتلك من قبل ووعدتك ومش رح نخلف وعدي .
سامر :-
باهي سامحتيني والا لا.
سحر :-
امم خلي نفكر .
سامر :-
معقوله تقسي ع حبيبك.
سحر :-
اكيد زي ماهو قسي عليا...وتوا مضطره نسكر بنرقد عندي فيقه بدري.
سامر :-
ليش شن في شن عندك.
سحر :-
عندنا مناسبه سعيده نوتولها .
سامر باستعباط :-
مناسبه شنو.
سحر :-
اتنين اقاربي بيتزوجو يعني بيعقدو قرانهم .
سامر :-
عقبالنا يااارب .
سحر بخجل :-
تصبح ع خير .
سامر :-
وانتي بألف خير ياعمري .
سكرت سحر وتمددت ع فراشها شوي وخبط الباب وخش علاء .
علاء :-
سحوره رقدتي حبيبتي.
سحر تعدلت ف تقعميزتها :-
لالا مازال واعيه خش عليوه .
علاء قعد بجنبها ع السرير :-
مش جايني نوم .
سحر بقلق :-
خير فيك شي عليوه .
علاء شاف لسحر :-
سحر بوي انحبس.
سحر بصدمه :-
انحبببس...ليش !!.
علاء :-
تهمته خطيره وحكمو عليه 7سنواات.
سحر دموعها نزلو غصب عنها.
علاء بهدوء :-
ليش تبكي ياعمري باهي.
سحر بشهقه :-
وشن بنفرح ياعلاء....طول عمري نتمني يكون عندي اب زي الناس نفتخر بيه ونرفع راسي بين الناس.
تنهد علاء بحسره :-
هذا نصيبنا وقدرنا ف الدنيا..سحر هكي تقدري تردي عند امك وحموده ولقرايتك مايفرحك هالشي.
شافتله سحر :-
قرايتي.
علاء يمسح ف.دموعها :-
ايه قرايتي كنت مفكر ف ااموضوع حتي قبل ماينحبس بوي ...وتوا زاد اصراري لان مش رح يصيرلك مشاكل ولا دوشه .
سحر نزلت عيونها للارض وبغصه :-
انسي الموضوع ياعلاء فات الوقت خلاص..اي قرايه اللي تبيني نقراها وانا بنت المجرم وهكي رح تكون نظره الناس ليا.
علاء بتعصيب :-
سحر بلاش تفكير غبي وكبري عقلك ..تقفيش عند كلام الناس وتنسي تعيشي حياتك لان كلام الناس مش رح يرحمك لو مهما كان وضعك حتي لو كنتي بنت رئيس دوله.
سحر :-
ان شاء الله خير وخلاص.
قرب منها علاء وحضنها وباس ع راسها :-
تعوذي من الشيطان واستريحي تو يلا تصبحي ع خير.
سحر بابتسامه :-
تلاقي الف خير ربي يحفظك .
.
.
.

تسريع بالاحداث وبعد مرور 3 ايام :-
عند اسراء :-
اليوم هو يوم عقد قراني انا وسفيان ومن الصبح الحوش ماهداش نهائي تجهيزات ع قدم وساق .
أما انا حاصله عليا ريناد وتحطلي ف الميك اب .
اسراء بتأفف :-
ريناد ياسر بالله عليك مش مشيت للكوافيرا وحطتلي ميك اب .
ريناد بتركيز:-
اسراء ياسرك عناد واثبتي ماتعبيني معاك.
اسراء :-
اووف ليش كل هالالوان بيطلع شكلي زي المهرج .
ريناد :-
اووف اسراء دهشتيني ..الالوان وميك اب الثقيل ضروري عندنا مش تحسابي روحك ف كندا شويه بودره وروج ومشي الحال.
اسراء :-
ووه قداش ماتحبو الاوفر شن هذا.
ريناد :-
احكي زي ماتبي..توا بديتي مننا اشربي من مانا وانعمي بعمانا.
اسراء :-
ريناد انتي درتي هكي ف فرحك مع حمزه.
ريناد وهيا تحطلها ف الكحل :-
ماتذكرينيش بالله ...نتفكر فيها حتي الكحل مابي يثبت ف عيوني من كثر البكي
اسراء بحيره :-
قصدك كنتي تكرهي حمزه لهالدرجه .
ريناد :-
ههههه وفوق ماتتصوري
اسراء :-
باهي وتوا.
ريناد تحطلها ف المسكره :-
نحبه فوق ماتتصوري.
اسراء :-
وانا مش حاسه اني عروس بكل ولا كان عقد قراني .
ريناد :-
باهي ليش وافقتي يااسراء مادامك مش مقتنعه بيه.
اسراء :-
ماهو كنت رح نتزوج ع كل سكه فامش رح يختلف الحال.
ريناد :-
تفكيرك غريب الحق.
اسراء :-
بعمري ماتوقعت نتزوج حد من هالعيله من كثر مانكرهم..ولقيت روحي زوجة لواحد من اولادهم ..بس ع الاقل جت ف سفيان بالاخر دار هلبا حاجات عشاني انا وامي وساعدنا وقبله عمي جبران ماقصرش .
ريناد :-
واخيرا كملنا وحق ربي طالعه تهبلي .
وقفت اسراء وشافت روحها ع المرايه :-
حيييه هذا انا.
ريناد :-
طالعه حلوه صح.
اسراء :-
طالعه تقول مهرج صابه عليه المطر.
ريناد :-
هههه كذابه والدليل رح يكون ع لسان سفيان.
قعدت نتإمل ف روحي ف المرايا..كان الفستان ذووق سفيان لونه دمي وضهره كله عريان لنهايه الظهر ومن قدام دانتيل شفاف تحت الصدر بمنطقه الخصر والميك اب كان مغيرني هلبا وبارز لون عيوني وتسريحت شعري اللي كله مقيوم ونازل رولز كيرلي ع ظهري.
اسراء تشوف لظهرها بالمرايا :-
سفيان الصايع جايبلي فستان كله عريان.
ريناد :-
هههه عرف كيف يحصل عليك.
خشت ملاك ووقفت مبهوره من شكل اسراء .
ملاك باعجاب :-
اسراء طالعه تجنني .
اسراء :-
يابنتي ف حد يقدر يجاري جمالك انتي اللي غزاله والله.
قربت ملاك من اسراء وشدتها من يدها وقعدت تلف فيها :-
تجنني اقسم بالله ...سفيان البرا ع فكره .
اسراء بخلعه :-
لا بالله عليكم ماتخلوه يخش .
ملاك قربت من ريناد وشدتها من يدها :-
اسفين اسراء مانقدروش هكي متفقين معاه من الاول.
طلعت ملاك وريناد وخلوني بروحي يحليلي بنموت من الخجل .
شوي وانفتح الباب ولبدت وراء الستار وغطيت وجهي بيدي .
قرب سفيان بخطواته وباعد الستار وبعدها باعد ايديا من ع وجهي .
نزلت راسي بخجل ..قرب يده وقاملي وجهي وقعد يتأمل فيا فتره وبعدها قرب مني وباسني من شفايفي وتباعد ورجع باس مره تانيه وتالته ورابعه.
اسراء دفاته :-
سفيان خلاص والله بنموت من الخجل مادير هكي.
سفيان بابتسامه :-
مبروك عليا انتي ياحلالي .
اسراء بخجل :-
الله يبارك فيك.
سفيان بهمس :-
طالعه تجنني ..محلاك بجد مش قادر نقيم عيوني من عليك.
اسراء بخجل :-
حتي انت.
سفيان بهيام :-
حتي انا شنو.
اسراء بارتباك :-
طالع حليوه.
قرب منها سفيان بيبوسها تاني ..
اسراء بربكه :-
سفيان بالله عليك خلاص بنطيح انا من الخجل.
سفيان باسها ع خدها :-
نحبك انا ونموت فيك.
رن فونه رد عليه وكان واحد من خوته .
بعد عليها وطلع وخشت ملاك وريناد .
اسراء برعشه :-
خزي عليكم باهي والله ماتتحشمو اقسم بالله.
ريناد :-
هههه خليني نعدلك الروج يلا فسده خونا وقت الناس تستني تحت.
اسراء :-
ماردودلكم باهي تو يبانلكم .
عدلتلي ريناد الروج ونزلنا لتحت...كان ف ماما وخالتي وسحر وامها وعيال عم ملاك مرت عمها وبنات عمها التلاته وكان في ام ريناد ومرت خالها ..وف من عيال عمامي هويدا بس وف خالة سفيان .
قربت منهم سلمو عليا وباركولي كلهم وقعمزنا نهدرزو وفاتحين اغاني .
شوي وخشت ملاك :-
تغطو سفيان بيخش يلبسها.
لبسو الكل عباياتهم وحجابهم ..وخش سفيان .
حضن امه وباركتله وسلم ع ماما وباس يدها.
بعدها قرب مني وباس ع راسي ..ولبسلي الدبله وتعليقه بسيطه .
وخديت دبلته لبستهاله ..قرب مني زي المجنون وحضني همستله ف وذنه :-
سفيان حيه ع العار تحشم ع وجهك خيرك.
سفيان بهمس :-
تي وربي ماشايف واحد..انا الغبي كان هذا تراني ماوافقت ع رايك وخليتها فاتحه ودخول شن بيصبرني الليله .
اسراء بخجل :-
وراس امك اطلع نهار اسود.
طلع سفيان وقعدو كلهم يضحكو ع اسراء ويلبسو فيها ع تصرفات سفيان .
.
.
.
.

عند ريناد :-
كان هالاسبوع اسبوع حافل بالافراح ...من جهة التجهيزات لفاتحه سفيان والفرحه اللي عايشينها العيله كلنا...ومن جهة تانيه حمزه اللي تغير معاي تغير ملحوظ لا شن ملحوظ فرق السماء عن الارض.
بدي يطلع فيا ويخلي فيا نمشي مع البنات للمحلات برواحنا مع واحد من خوته وماعاد نلاحظ ف نظرات الشك بعيونه
خش عليا وانا قاعده ف الدار بعد مامشو الضيوف من عندنا .
قرب مني وقعد بجنبي ع السرير .
حمزه :-
شن في حبيبي وجهك اصفر حاسه بشي.
ريناد :-
لالا شوي تعب بس.
حمزه :-
باهي نوضي نرفعك للعيادة.
ريناد :-
مايحتاج والله شوي تعب ويمشي.
حمزه شد يدها وابتسم :-
ف عندي مفاجأه لام جبران نور عيوني.
ريناد ابتسمت :-
حقه 😍 شن هيا المفاجأه .
حمزه باسها ع خدها ووقف :-
اهو رح تشوفي بعيونك ..وفتح الدرج وطلع منه بوكس متاع فون.
ريناد مش مصدقه عيونها وتشوف للفون والدموع عبو عيونها.
حمزه يشوفلها بتركيز :-
ماعجباتك الهديه شكله.
ريناد شافتله :-
قول ان حق بالله عليك مش بصاره
حمزه بضيقه :-
ريناد خيرك حسستيني مجرم ف حقك.
ريناد حضناته بقووه :-
الله ياحمزه لو تعرف قداش نحبك ومانقدرش نعيش من غيرك .
حمزه بابتسامه :-
بكايه .هذا كله فرحه بالفون .
ريناد بعدت عليه وحاوطت وجهه بايديها :-
لا طبعا مش عشان الفون ..عشان بديت توثق فيا اخيرا وتغيرت نظرتك ليا.
رن فون حمزه وكان علاء...شاف لريناد :-
هذا علاء.
ريناد :-
خلاص خلي نفتحله شوفه خيره وانا بننزل لتحت ماتبي شي.
حمزه :-
بوسه صغيره بس.
قربت منه ريناد باساته من خده وطلعت من الدار فتحت لعلاء ونزلت لتحت.
لقيت اسراء كيف راكبه تتبرطم .
ريناد :-
هههه خيرك العفو شن في بسم الله.
اسراء :-
سلفك اهو سخيف وساقط هلبا راهو.
ريناد :-
ههههه سلفي اللي هو زوجك يعني .
اسراء :-
وهو ف ساقط غيره .
ريناد :-
خيره شن دار بس من اول يوم ف العراك زي الفار والقطوس.
اسراء :-
تخايلي الساقط حضني قدام امي وباسني العار حشمني يحساب كان امي كنديه معناها فري.
ريناد :-
مش قادره نصدق كل هالخجل اللي عندك .
اسراء بضيقه :-
شن قصدك ياريناد.
ريناد بسرعه :-
لا والله ماقصدي اللي فهمتيه ياسرو ...نقصد ان انتي تربيتي ف مجتمع منفتح وصغيره ف السن ومع هذا تصرفاتك غير عن عمرك ورزينه هلبا.
اسراء :-
امم باهي سامحتك ..ياويلك تعاوديها .
وقف سفيان وراها وكان يضحك من غير صوت ويأشرلي بمعني ياناري خفتي منها.
شفتله بنص عين ..وشفت لاسراء قبل ماتنتبه عليه :-
اسراء بجد قوليلي شن رايك ف سفيان .
اسراء :-
متهور وراسه مسكر وساقط لابعد الحدود .
قرب منها سفيان ولف ايديه ع خصرها وقامها .
اسراء بخلعه :-
واااك ريناد ياخاينه وربي لما نوريك.
سفيان :-
هههه ف وحده تقول ع زوجها هكي هذا بدل مادافعي عليا قدامها عبيت عليك والله .
اسراء وهيا تخبط ف بيديها :-
.سفيان نزلني بلاش عار يشوفونا واحد من خوتك.

سفيان ركب بيها :-
عادي مرتي حلالي خلي يشوفو.
نزلت ريناد تضحك :-
مجانين اقسم بالله.
.
.
.

عند فرح :-
تعبت وعييت وانا ندور ع جمال ومش لاقياته ولا عارفتله طريق.
رجعت نسأل عليه بالمراكز ونفس الشي ماليشي اثر...مشيت حتي للشركه وسألت عليه وقالو مايعرفوش حد بهالاسم .
عطيتهم معلومات عنه وانه كان يشتغل ف قسم الشؤون وكان مايحكيش بس للاسف مافيش من يعرفه
استاذ حسن الوحيد المسؤول عن تعيينه واللي عنده المعلومات عليه سألت عنه وقالو مسافر ليه اكثر من شهر .
ضاقت بيا الدنيا وكل يوم علي نفس الحاله ..مش عارفه وين نمشي او شن ندير بديت ف نهايه حملي وجيابي قريب وين بنمشي بروحي باهي ولامتي بنقعد عند خالتي عائشه .
صح هيا متحملتني وتعامل فيا احسن معامله بس هالشي دوم مش يوم يعني لامتي رح نقعد ع هالوضع .
ندور وراء مجهول ...لانعرفله لا هويه ولا اهل ...حتي رقم فونه ع قد ماحاولت نذكره ماقدرت من وقت ضاع مني فوني هذاك اليوم.
احترت وحار دليلي وماعاد عارفه نتصرف...نعرفش ليش خذوني رجليا لحوشنا القديم حطيت الخمار ع وجهي وخشيت للمنطقه عشان مايعرفني حد.
وصلت عند باب الحوش وكان مسكر ..خبطت وخطبت ماحدش فتح .
ع فوتت واحد من الجيران ..سألته.
فرح :-
لو سمحت خوي.
الشخص :-
تفضلي اختي.
فرح :-
هالحوش فيه حد ساكنه والا فاضي.
الشخص :-
لالا مسكون اختي ف من ساكنه.
فرح بأمل :-
باهي ماتعرفش من ساكنه خوي.
الشخص :-
اللي نعرفه ان شخص اصله غرباوي وكان فتره ف السجن وطلع.
فرح بأمل وتدعي بداخلها :-
ياخوي بالله عليك ماتعرفش اسمه او وين نلقاه.
الشخص :-
لا ياوخيتي ع حد علمي مسافر راهو .
فرح :-
باهي هالشخص بكوش يعني مايتكلمش
الشخص :-
لا يتكلم واموره طيبه مافيه شي.
فرح باحباط :-
اخر سؤال سامحني عطلت ماتعرفش شن اسمه.
الشخص :-
اللي نعرفه ان اسمه سند ..وانا يااختي راني ساكن ليا شهرين بس هنا وهذا اللي نعرفه عليه.
فرح نزلو دموعها بخيبه :-
مشكور خوي بارك الله فيك.
شفت نظره اخيره للحوش ورجعت من وين ماجيت وانا نجر ف حطام نفسي وبقايا روحي اللي مش قادره نلقاها .
.
.
.
.

عند علاء :-
كنت لازم نحكي مع حمزه بخصوص موضوع سحر ..ركبت بعد ماروحو الناس من عندنا وخبطت ع جناحه فتحتلي ريناد وخشيت
علاء :-
السلام عليكم.
حمزه :-
مرحبتين عليوه خش ياغالي
علاء :-
سامحني جايك بهالوقت..بس نبي نحكي مع بموضوع.
حمزه :-
ولايهمك ياعليوه انت تجي بأي وقت.
علاء ابتسم بهدوء :-
جيت بنقولك رح ناخذ سحر من هنا ...ماعاد في داعي تقعد اكثر وحبيت نشكرك بجد ع وقفتك معاي والله مارح ننسالك هالشي طول عمري.
حمزه بلوم :-
ماتحكي هالكلام ياعليوه والله نزعل منك..هذا حوشك ياراجل وليك فيه زي مالينا فيه خيرك .
علاء :-
ولو يبقي اللي درته معاي كبير ولازم نشكرك عليه.
حمزه بتنهيده:-
عليوه لو تبي تشكرني بجد تراجع ع اللي قاعد تفكر فيه وحكينا فيه يومها.
علاء نزل عيونه بالارض :-
رح نكون كذاب لو قتلك رح نسمع كلامك ..بس خليها للوقت وخلاص.
حمزه :-
عليوه ف حاجات الواحد لازم يحكم فيها عقله ومايخلي عواطفه تسيطر عليه .
علاء بتنهيده :-
وف حاجات العقل مستحيل يتحكم فيها واكبر من طاقته ياحمزه .
وقف علاء :-
المهم حبيت نشكرك ونعطيك علم بنفوت يومين تانيات وبنروح بيها ان شاء الله .
حمزه :-
ع خير ان شاء الله...قعمز خيرك نضت
علاء :-
هذاكا هو...بنمشي نشوف سند مش عاجبني وضعه بكل.
حمزه :-
تمام ياغالي تو حتي انا نغير ونجيكم .
طلع علاء وقعد حمزه يغير ف ملابسه .
.
.
.
.

عند ملاك :-
بعد ماكملنا السهره ركبت غيرت ملابسي وصليت العشاء .
وكيف بنرقد تفكرت ان سامر وصاني نحكي مع زبيده وانا نسيت الموضوع بكل.
شفت للساعه لقيتها مازال 11 اتصلت بيها .
ملاك :-
حبيبتي ان شاء الله غير مش راقده.
زبيده :-
لالا ملوكه نايضه شن جوك توا
ملاك :-
الحمد الله تمام شن مدايره.
زبيده :-
اهو ماشيه الحمدالله كيف خشيت لداري .
ملاك :-
باهي ميه ميه..زبيده ف موضوع نبي نحكي فيه معاك وناخذ رايك فيه.
زبيده باستغراب :-
ان شاء الله خير حبيبتي .
ملاك :-
كل خير....بصراحه سامر طلب نحكي معاك ف موضوع مهم.
زبيده بحيره :-
سامر زوجك..!! وين يعرفني هو مافهمت.
ملاك :-
يعرفك عن طريقي يعني من خلال حديثي عليك قدامه وشايفك بمره .
زبيده :-
ملاك شن قاعده تحكي مش فاهمه شي راهو.
ملاك :-
غير افهميني كويس . سامر عنده صاحبه يدور يبي يتزوج ..وسامر من خلال كلامي عليك قدامه طلب مني نحكي معاك ف موضوع صاحبه وناخذ رايك هل توافقي او لا فهمتيني .
زبيده بحيره :-
صاحبه ورشحني انا ليه ..والله مافهمت حاجه .
ملاك :-
اووف زبيده خيرك قعدتي غبيه فجاه ..شفتي الصغار اللي عندنا اليوم الولد والبنت .
زبيده :-
قصدك ميرال ومعاويه يهبلو ماشاء الله عليهم ياخذو العقل قداش مامؤدبين.
ملاك :-
ياستي العريس خوهم واسمه طارق وعمره 26 سنه وهو اللي يربي فيهم من بعد ماتوفت امهم وبوهم ف حادث سياره .
المهم خوهم يدور ف وحده تقبل بخوته معاها...وسامر حكي معاي بالموضوع وبصراحة شجعته عليك لان نعرفك حنونه وماعندكش مشكله ف خوته.
زبيده :-
والله ياملاك مانعرف شن بنقولك فاجأتيني الحق ومش عارفه شن نرد ومانعرفش بوي شن رح يقول.
ملاك :-
عمي خلي موضوعه ع جنب ..المهم انتي توا فكري بالموضوع كويس الولد شكرهولي سامر ف اخلاقه وسمعته وخادم ع روحه وبحوشه والاهم يربي ف يتامي مسكين وخالشي حلو فيه ان مالوحش خوته رغم انهم خوته من بوه بس.
زبيده :-
والله ماني عارفه ياملاك .
ملاك :-
اسمعي فكري بالموضوع كويس واستخيري واعطيني رايك وموضوع عمي لو انتي وافقتي خليه ع سامر وعليا .
زبيده :-
ان شاء الله خير وخلاص.
ملاك :-
كل خير يارب...ربي يسعدك ويكتبلك اللي فيه خيرتك حبيبتي..وتو نخليك تستريحي تصبحي ع خير.
زبيده :-
تلاقي الف خير يااارب.
.
.
.
.

عند سند :-
روحت ليا يومين عند اهلي ...كان لازم نجي عشان خوي رغم ان ماعنديش نيه حتي ف حاجه ولا بخاطري شي بس ماقدرت مانشاركه فرحته.
تصدقو كلمه فرحه تذكر فيا بيها حالي يعلم بيه غير ربي تعبت وقوتي نهارت والله وماعاد عندي طاقه .
قاعد بداري ونرتب ف الملابس ونشم ف ريحتهم .
ااه يابابا زعما رح تجي للدنيا ونشوفك والا خلاص انتي وامك ماعاد رح نشوفكم .
خبط الباب وخش علاء ...شافله سند بابتسامه مغصوصه :-
عليوه خش ياغالي.
علاء بهدوء :-
نحسابك راقد قلت ندور عليك دوره.
سند بنبره وجع :-
النوم نسيته ليه شهور خوك.
قعمز علاء بجنبه وشد ملابس البيبي بيده :-
شن قاعد ادير .
سند بغصه :-
نرتب ف ملابس بنتي ..شفتهم قداش حلوات وناعمات.
علاء :-
ربي يطمنك عليها ان شاء الله .
سند دموعه نزلو :-
تعبت ياعلاء والله تعبت ياريت نموت ونرتاح .
علاء قرب منه ويمسح ع ظهره بيده :-
بعيد الشر عنك ياسنودي ..خلي املك بربي كبير وتعوذ من الشيطان شن هالكلام نعرفك عزمك قوي.
سند ببكاء :-
اي عزم اللي تحكي عليه ياعلاء...خاش قريب ف التمانيه شهور وقلبي محروق عليهم ..مش عارف لاميتين ولا حيين ...بنمووت ياعلاء معقول ف يوم وليله فص ملح وذااب وين مشو باهي فرح ماعندهاش حد معقول تكون ماتت .
لالالا ...لا مستحيل ماتت لا لاااا مامتتش فرح وبنتي حيين لا مستحيل فرح تخليني مستحيل.
قرب منه علاء بخوف بعد شافه متهستر :-
سند خيرك اهدى ياراجل ..اذكر ربي وتعوذ من الشيطان اهدي.
سند بهستيريا :-
حووول جيبولي بنتي ..جيبوهالي ..يافررررح وينك وينك واااااااك عليا وااااااك.
علاء بصوت عالي ويحاول يحضنه وهو حاط ايديه ع راسه ويعيط :-
سند حبيبي اهدي تعوذ من الشيطان قول لا اله الا الله بسم الله عليك بسم الله عليك.
ع خشت صفيه تجري :-
خيركم شن في شم اللي صاير.
علاء تلفت علاها :-
امي اطلعي وخلينا بروحنا دزيلي حمزه ماف شي .
سند وهو منهار ويبكي :-
اااه ياربي ..يارب ماتعاقبني فيهم يارب وااااك عليا نبي بنتي جيبولي بنتي.
علاء حضنه وشاف لامه :-
امي بري الله يهديك وخلينا بروحنا..ابعتي حمزه واطلعي.
طلعت صفيه ودمعتها ع خدها وهيا ترتعش مع بعضها تلاقت مع سفيان .
سفيان مخلوع :-
خيركم شن في شن اللي صاير.
صفيه بدموع :-
خوك ياوليدي مش عارفه خيره يندب ويعيط ف داره .
خش سفيان يجري وجي حمزه وراه يعرج ع عكازه خش وسكر الدار وراه .
قرب من سند وهو منهار ومتهستر.
حمزه شاد وجه سند بين ايديه :-
سند ..سند ركز معاي تسمع فيا سند .
سند بهسترا :-
خلوني ف حالي نبي نمووت خلوني .. حمزه بالله عليك جيبلي بنتي نبي بنتي انا حسو بيا بالله عليكم ااااه ياربي ياربي الطف بيا ياربي ارحمني ولاتعاقبني يارب .
حمزه :-
أذكر الله ياسند ...تعوذ من الشيطان هذا كله مصاب من ربي ورح تفراج .
سند بعد عليه وبعياط :-
حسوو بيا خيركم .. خيركم مش قادرين تفهموني نبي بنتي ومرتي جيبوهم ليا واااااك عليا واااك وااااااك .
حمزه قرب منه وشده من تيشرته :-
سنددددد فيق ع روحك فيق اذكر الله ياسرك .
سند بعياط ودموع :-
حولو من قدامي حولوو نار اللي فيا مش حاس بيها حد نبي نمووت خلاص ووااك علياا.
وبلحظه رفع حمزه يده وضرب سند كف بأقوى ماعنده .
سفيان بدموع :-
مش هكي ياراجل مش واعي بروحه هو خيرك.
حمزه بغصه :-
تخشش بيني وبينه ...وخذي سند ف حضنه وقعد ع الارض وحاضنه ويبوس ع راسه :-
اسف اسف ياسنودي ... مش بقصدي نمد يدي عليك والله حقك عليا ..تحسابنا مش موجوعين زيك وجعنا واحد ونارك نارنا ياسند
سند بدموع :-
نبي مرتي وبنتي ياحمزه.
حمزه بهدوء :-
رح نلقوهم بعون الله والله رح نلقوهم ..بس انت لازم تكون قوي وبعزم الرجال مش لازم تنهار لازم تقوي روحك اللي قاعد ادير فيه توا غلط بغلط.
سند :-
تعبت ياحمزه...تمانيه شهور وانا صابر تمانيه شهور وانا متحمل ونقول تو غدوه نلقاهم ومافيش فايده تعبت انا تعبت.
حمزه :-
بعون الله تفراج والله تفراج هذا كله اختبار من ربي وامتحان لصبرك ورح تنفرج ف الاخر اهم شي تخلي ثقتك بربي كبيره .
وقعد حمزه يحكي معاه ويحاول يهديه لعند هدي شوي وبدي يغفي .
علاء بهدوء :-
خلاص برو انتم تو نبات معاه انا مادورو شي.
سفيان :-
نقعد معاك نرقد حتي ع الكنبه .
علاء :'
لالا برو انتم وكونو هانيين ..مش رح نخليه بروحه بكل .
حمزه :-
تمام ..هيا ياسفيان خليه يستريح .
قرب سفيان باس ع راس سند وطلع هو وحمزه وقعد علاء معاه.
اول ماطلعو جت عليهم صفيه.
صفيه برعشه :-
خيره سند ياحمزه طمني عليه شن في سمع ع مرته حاجه.
حمزه لف يده ع كتفها وقعد يمشي هو وياها :-
مافيش شي ياغاليه..اعصابه تعبانه شوي مكبوت وكان لازم يطلع الضغط اللي بداخله لازم يتفجر احسن مايقعد مكبوت.
صفيه :-
باهي شن توا حاله باهي .
حمزه بتنهيده :-
الحمدالله احسن ...رقد توا وخليت معاه علاء بايت بجنبه .
صفيه بدموع :-
ربي يجبر بخاطره ويتلطف بحاله والله وجعلي قلبي .
حمزه :-
تفراج ان شاء الله ..خشي انتي ستريحي ياسرك تعب .
صفيه :-
تصبح ع خير وليدي .
حمزه باس ع راسها :-
تلاقي الف خير ان شاء الله .
.
.
.
.

تسريع بالاحداث وبعد مرور اسبوع :-
عند سحر :-
اليوم بنروح لحوشنا ...عشت شهور بهالفيلا وتعرفت ع ناس عشت معاهم ايام حلووه وشاركتهم ف افراحهم واحزانهم .
طلعت شنطتي وسلمت ع ريناد حضنتها بقووه ودموعي نزلو:-
بالسلامه ياريناد..وسامحيني ديمه نبصر عليك .
ريناد :-
ربي يسعدك ويعطيك ع قد روحك الحلوه ونشوفك ع خير ان شاء الله
مشيت لملاك وحضنتها :-
ملوكه ياعمري والله لو كانت عندي اخت ماكنت حبيتها زي ماحبيتك بالسلامه وربي يسعدك
ملاك :-
عاز عليا فراقك والله ...ربي يسمعني عليك الاخبار الحلوه يارب.
حضنت اسراء ببكي :-
صاحبيتي الطايشه والعصبيه رح نستاحشك هلبا والله.
اسراء :-
عيونك رح تلقيني ع راسك ديمه مش رح نخليك ف حالك تحلميش تتريحي من صداعي
سحر :-
ياريت والله .
وسلمت ع ام اسراء وخالتي صفيه وودعتهم .
كيف بنطلع دورت فوني بجيبي مالقيته.
سحر :-
عن أذنكم نسيت فوني بالمطبخ .
مشيت للمطبخ وخشيت لقيت علاء شاد فوني بيده .
علاء شافلي بصدمه وعصبيه :-
من هذا اللي يتصل بيك سحر .
وقفت متبنجه ومصدومه ف مكاني مش قادره نحكي ولا نقول كلمه.
علاء قرب منها بعصبيه وشد يدها :-
سحر احكي من هذا مكالمات فائته وكلها باسم الكئيب افتحي الرمز افتحيييي ناخذ الرقم افتحي .
وكيف بنفتح سمعنا صوت ورانا .
ريناد :-
الرقم هذا ليا ياعلاء .
علاء بصدمه :-
يخصك انتي ...هذا مسجل باسم ولد ياريناد
ريناد بتوتر :-
ايه انا نحكي معاه من هاتف سحر لأن زي ماتعرف ماعنديش فون.
علاء بصدمه :-
لكن....
ريناد :-
هذا رقم ايمن ولد خالتي تقدر تتصل بيه وتتأكد
علاء حط الفون ع الطاوله :-
وحمزه يندري.
ريناد :-
لا مايندريش ورجاءا ماتقوله .
علاء وهو مصدوم ومش مستوعب :-
وكيف تحكي معاه ومن وراء حمزه .
ريناد :-
هذا امر شخصي .
علاء وهو طالع :-
هيا ياسحر وماعاد نبي نشوف هالرقم عندك من تاني.
طلع علاء وقعد يحكي مع واحد من خوته .
سحر بدموع :-
ليش درتي هكي ياريناد .
ريناد :-
مانبيكش تخسري خوك ياسحر...وهذه عواقب الغلط اللي حذرتك منه ردي بالك بالله عليك.
سحر :-
والله مارح ننسى وقفتك معاي ياريناد .
رينادو:-
اطلعي بسرعه قبل مايشك فيك وخليك عاديه ومشي ع نفس الكلام ماتخافي .
طلعت وراء علاء من بعد ماودعتهم كلهم .
.
.
.
.

عند سامر :-
كنت واقف ع علاء بالجنان ...لعند طلعت الماستي اللي خطفت قلبي .
مش قادر نتأقلم مع فكره ان ماعاد رح نشوفها ونتصبح فيها كل صبح راسي رح يتفجر .
قربت مننا بخجل ..سحر :-
نعتذر منك بالخصوص ياسامر لان صار بيناتنا اكثر من سوء تفاهم ونتمني مايكون ف قلبك زعل من جهتي.
سامر بهدوء ويتأمل فيها :-
ولا يهمك ماف قلبي الا كل خير جيهتك.
سحر :-
عن أذنك ونشوفوك ع خير .
ركبت وركب علاء وساق السياره ونحس بقلبي طلع معاها .
وكيف بنخش للحوش سمعت عياط خشيت نجري .
سامر بخلعه :-
خيركم شن في شن اللي صاير.
صفيه بعياط ودموع .......
.
هل اعجبك الموضوع :

تعليقات