رواية المحامي خفايا القدر الحلقة الثامنة 8 كاملة

رواية المحامي خفايا القدر الحلقة الثامنة 8 كاملة

رواية المحامي خفايا القدر الحلقة الثامنة 8 كاملة

لقراءة باقي حلقات الرواية : اضغط هنا 

رواية المحامي (خفايا القدر) الحلقة الثامنة 8 كاملة مكتوبة

♡ خفايا القدر ♡.
الحلقه :-
♤ الثامنه ♤.
بقلمى✏️ :-
Zezo_a_saad
واحيانا مهما حاولنا نهربو من الواقع والحقيقه بس لازم يجي يوم ونواجهوها .

كانت ملاك واقفه بالمطبخ وتغسل ف الماعين وتفكر ف كل اللي عايشاته حاليا.

وبوسط أنشغالها حست بحد واقف وراها ف الباب.
تلفتت ومن الصدمه تسمرت ف مكانها.
ملاك :-
اول ماتلفتت تسمرت بمكاني ..حسيت برجليا وعيوني ولسانى وكل ذره ف جسمى ثقلت... الهواء بدى يهرب من صدرى ومش لاقياته .
همست بصوت ثقيل وعيوني متعبية دموع :-
علااء.

علاء أبتسم بحزن وخنقه :-

ايه..علاء.
ملاك بصدمه ودموعها ع خدها :-
لالالا...لا مستحيل لا اكيد انا نتخايل .
تخطاها علاء ومشي للتلاجه خدى شيشة مية وطلع من المطبخ .
اول ماطلع علاء حسيت بالدنيا تلف بيا وبدت تظلم من حوليا حاولت نشد ف أقرب حاجه ليا بس بعدها ماعاد حسيت بشي.
علاء :-
هربت وهربت من المواجهه بس تعبت ووصلت لقناعه أن الهروب مش رح يجيب نتيجه ولا يغير من الواقع شي ..قررت نتقبل الواقع ونتعايش معاه لان اسئلة خوتي وامي كثرت وطلبهم اني نجي عندهم واتصالاتهم خلتني نخضع للامر الواقع.
طلعت من حوش بوي بعد الغدي وجيت لحوشنا خشيت للفيلا وكان الحوش فاضي ..وكيف بنمشي لداري سمعت صوت حركه بالمطبخ .
كنت متوقع امي بالمطبخ ..خشيت وهنا كانت صدمتي ..الانسانه اللي بنموت علي شوفتها من سنه قدامي وف الوقت اللي تمنيت ودعيت ربي اني مانشوفها.
وقفت مصدوم ومش مستوعب شي ..نتأمل فيها بس مش قادر نحكي ولا حتي نتنفس.
انتبهت عليا وتلفتت وياكسرت قلبي ووجع روحي لما جت عينها ف عيني ..مش قادر نحكي وزادت فكرت ع جرحي ملح لما همست بأسمي.
ماعاد قدرت نقاوم او نتحمل اكثر حسيت روحي رح ننهار خلاص خذيت ميه وطلعت هارب من نفسي ومن روحي اللي خليتها وراي.
اول مابعدت خطوه حسيت بصوت خبطه وبعدها صوت الماعين طاحو تكسرو.
رجعت نجري للمطبخ وقلبي سابقني وكل خليه ف جسمي حسيتها وقفت واستنزفت طاقتها أول ماشفتها طايحه وماتتحرك والصحون متكسرات بجنبها.
قربت منها نجرى قعدت نخض فيها ونحاول نوعيها بس ماترد عليا كانت تأن بس تمنيت نحضنها ونقربها من قلبي بس الواقع والشرع منعني.
طلعت من المطبخ نجري ..وقفت ف الممر وقعدت انادي ع امي.
علاء بصوت عالي :-
امييي...اميييي ياامي.
نزلت صفيه تجري وهيا مخلوعه :-
بسم الله علاء خيرك شن في ...امتي جيت شن صاير.
علاء قرب منها يجري وشد يدها ويجبد فيها للمطبخ :-
بسرعه ياامي م....احم ف بنت لقيتها مغمي علاها ف المطبخ بسرعه .
خشت امي تجري وخشيت نجري وراها وكانت ملاك ع وضعها .
صفيه بخوف تهز فيها :-
ملااك..ملاك بنيتي خيرك ..ملاك ردي عليا يايما شن فيك خيرك .
تلفتت صفيه ع علاء :-
بسرعه تعالي قيمها المرش تحتها نخاف تكون خشت فيها مرشه .
علاء بتوتر :-
امي كيف بنقيمها مايصحلي الله يهديك.
صفيه :-
تتعالي الله يهديك سامر مش موجود باش يقيمها فيسع .
علاء:-
ح..حاضر.
قربت منها وقمتها وانا حاس ان قلبي بيطيح من مكانه وكل جسمي يرتعش كان المرش يخش ف صوابع يديا لما نقيم فيها وانا مش حاس بيه .
طلعت بيها من المطبخ وخشيت لاقرب دار ف الدور الارضي حطيتها فيه وطلعت خليت امي معاها.
ملاك :-
يمكن من كثر صدمتي ماقدرت نتحمل وعقلي وقلبي اختارو يهربو من الواقع ع طريقتهم وبلحظه حسيت كل الدنيا المحيطه بيا ظلام دامس.
بعد فتره وعيت ولقيت روحي ف مكان غريب وبجنبي خالتي صفيه .
صفيه بخوف:-
ملاك يابنيتي تسمعي فيا ..ردي عليا يما الله يربحك .
ملاك بصوت تاعب :-
انا وين ..من جابني هنا.
صفيه بخوف :-
ف الفيلا انتي ..طحت ياماما وجابك علاء ولدي هنا.
ملاك :-
لما ذكرت اسمه وكأنها اختارت تطعني بسكين الواقع وتصحيني للكابوس اللي رح نعيش فيه .
خشيت ف حالة هستيريا بكي ع عياط وخالتي مش فاهمه شي وتحاول تهديني.
علاء :-
بعد ماطلعت من الدار قعدت واقف قدام الباب سمعت امي تحكي معاها وبعدها بديت نسمع فيها تبكي وتعيط بصوت عالي وامي مش فاهمه شي.
بهاللحظه بالذات حسيت بقلبي فعلا رح يوقف انحنقت وتمنيت الموت ف هاللحظه . ياريتني قعدت بعيد وماجيت سامحيني ياملاك سامحيني لو تقدري بالله عليك .
خبطت ع الباب وقعدت نكلم ف امي من وراه :-
امي شن في تبو نرفعوها للمستشفي.
فتحت صفيه الباب وطلعتله :-
ياوليدي والله ماني عارفه خيرها البنت بتقتل روحها بالعياط والبكي ياحليلي قريب تظهر من عقلها .
خشت امي وخشيت من وراها ...كانت ملاك قاعده ع السرير وحاضنه الوساده وغامره فيها وجهها وتعيط وتبكي بأعلي صوتها .
قربت منها امي وقعدت انا متسمر ف مكاني .
صفيه تهز فيها بخوف :-
ملاك ..ياملاك يابنيتي ردي عليا خيرك شن جاك العفو ردي عليا بالله عليك بسم الله عليك بسم الله عليك اعوذ بكلمات الله التامات من شر ماخلق .
صفيه تلفتت ع علاء:-
انا خلاص ماعاد عرفت كيف نديرلها ..بنمشي نتصل بخوك يجي يشوف مرته خيرها.
طلعت امي واول ماطلعت قربت من ملاك وقعدت ع السرير بجنبها وشديتها من كتافها ونحاول نبعدها من ع الوساده وبصوت عالي :-
ملاك ..ملااك اسمعيني ملاااك ياسرك من اللي اديري فيه انتي ماليكش ذنب ولا انا ليا ذنب ف اللي صار ..ملاااااك فيقي ع روحك فيقي ياسرك .
اول ماحسيت بحركه تقرب نضت بعدت من جنبها وخشت امي تجري .
صفيه :-
اهو كلمت سامر قريب يجي .
علاء :-
حسيت بالدنيا ظلمت بوجهي وطلعت نجري من الدار وسيبتهم .
.
.
.

عند سامر:-
كنت طالع ومضايق ومش طايق روحي حاس بالخنقه ونحاول نتصل بهديل وماتبيش حتي تعبرني او ترد عليا.
وانا ف السيارة جاني اتصال من امي وقالت ان ملاك طاحت واغمى علاها.
ولعت السياره ورجعت نجري للحوش ..خشيت لقيت علاء قاعد بالصاله ..ماحكيت معاه ولاكلمه خشيت نجري للدار اللي فيها ملاك ولقيتها ف وضع يرثي له.
قربت منها وقعدت بجنبها وع طول امي طلعت وخلتنا برواحنا .
سامر :-
ملاك..ملاك ردي عليا تسمعي فيا ملاك شوفيلي انا سامر.
ولانها ماردت عليا ولا عطت استجابه غير البكي المستمر ..جبدتها بقوه من الوساده وحضنتها ليا وقعدت نحاول نهديها :-
اششش ملاك خلاص بالله عليك ..اهدي خلاص انا معاك مافي شي بس قوليلي خيرك شن في.
ملاك كانت ف عالم تاني والاستجابه الوحيده هيا انها ماسكه ف تيشرت سامر بقووه وتبكي بس وسامر مازال يحاول يهديها ويقرأ عليها ف القرأن .
بعد فتره حس بيها هدت وعرف من طريقه نفسها انها غفت ...عدلها ع السرير وغطاها وطلع
اول ماخش سامر للصاله لقي امه وعلاء.
صفيه بتوتر :-
ها طمني شن صار هدت والا شن صار فيها
سامر قعد ع الكرسي مقابل علاء :-
ايه الحمدالله رقدت اخيرا ..فهميني بس شن اللي صار معاها ياامي.
صفيه :-
ياوليدي والله مانعرف ..كنت ف داري لعند سمعت علاء ينادي نزلت نجري قالي ف بنت لقيتها طايحه ف المطبخ خشيت ولقيتها ملاك وحاولت نفيقها وماف فايده لعند قامها علاء للدار واول مافاقت مابطلتش بالعياط والبكي لعند جيت انت .
سامر تلفت علي علاء وشافله باستغراب :-
شن في ..خيرهم ايديك دم .
علاء بتنهيده :-
ماتهتم ..شوي من اللي داسهولي زماني ...المهم انت مش حتقدر تمشي بكرا للجنوب وتشوف المشروع متع الشركه خليك توا نمشي انا بدالك.
سامر :-
لالا حبيبي تعب عليك انت اخر مره مشيت وهالمره دوري لازم نمشي انا ونكمل بعض الاجراءات .
علاء :-
بس انت زوج...احم قصدي يعني توا عندك ظروفك ومرات يحتاجوك هنا .
سامر :-
لا الامور طيبه مادور شي ماعندهم شن يديرو بيا هنا.
صفيه بتعصيب :-
كيف تبي تسافر وتسيب مرتك هكي وضعها هبلت انت .
سامر بتعصيب :-
وشن تبيني نديرلها ياامي ..هذا واجبي ولازم نتم عملي وكان احتجتو لشي اهو علاء والا واحد من خوتي موجود .
علاء بضيقه :-
لا انا ماتعبو عليا ف شي اليوم ف الليل بنرجع لخوتي .
صفيه بعصبيه :-
سامر ماتركبليش السكر مش ناقصه هيا مرتك انت والا مرت علاء من اللي مسؤول علاها .
علاء:-
عند هالكلمه حسيت بنار تشعل فيا ومن غير مقدمات وقفت وطلعت لداري من غير مانزيد ولا كلمه .
اما سامر فاختار يهرب نفس الشي وطلع من الحوش.
سامر :-
ركبت ف السياره وانا حاس بالضيق والخنقه من هالوضع ..درت ودرت بالسياره وانا مش عارف وين ماشي ولا وين نبي نمشي.
درست ع الطريق وحاولت نتصل بهديل من جديد..ولما يأست انها ترد كتبتلها رساله 💌 :-
" بالله عليك لو نعنيلك حتي حاجه بسيطه ردي عليا ".
حطيت تليفوني وسندت راسي ع مسند الكرسي متع السياره ونحس ف راسي بينفجر ونتمني نبكي ونتخلص من كل هالضغط اللي انا فيه .
بعد شوي سمعت صوت مسج وصلني ..خذيت فوني وفتحته وكانت من هديل 💌:-
لو كنت انا نعنيلك حتي شوي ..ماكانت اتزوجت بغيري وفتتني ".
جربت نتصل بيها من جديد وماردت بعتلها مسج تاني 💌:-
" والله كنت مجبور ".
ردت عليا بمسج :-
" تزوجني باهي ".
تنهدت بقوة وكأني حامل جبل ع صدرى وكتبتلها مسج 💌:-
" ياريت نقدر بس الامر مش بيدى..اصبري معاي شوى وعطيني فرصه بس شوي "
جاني منها الرد 💌:-
ولأمتي بنستناك ان شاء الله .
وبعدها بعتتلي مسج تاني 💌:-
ماعاد تتصل بيا او تبعتلي لو سمحت لاني مش رح نرد عليك انساني احسن ".
قريت المسج ولوحت التليفون ع الكرسي اللي بجنبي وانا حاس بقلبي رح ينفجر..كنت مخنوق ومضايق ومحتاج لحد يسمعني ونقوله كل اللي بقلبي ومن غير مايسألني ع شي.
نعرفش كيف خطر ببالي هالشي وشديت فوني وكتبت رقم عشوائي واتصلت بيه.
رن ورن وف الاخر انفتح الخط وماحدش رد استغليت هالفرصه وحكيت حكيت وطلعت كل اللي ف قلبي والشخص ساكت لعند حسيت روحي استريحت وسكرت الخط .
.
.
.
تسريع بالاحداث وبعد مرور يومين :-

عند ملاك :-
مرو يومين كنت فيهم طريحه الفراش وقداش ماتمنيت انى مانوض منه الا لقبري بس نرجع ونستغفر ونقول ربي مازال رايدلي نعيش .
بهاليومين اهتمت بيا خالتي ورناد وحتي سامر وماقصروش معاي نهائيا .
قررت اليوم انى نتقبل واقعي ورجع لحياتي الطبيعيه لان ماف فايدة من الهروب منها.
فقت الصبح توضيت وصليت ..وكان سامر مسافر الليله اللي قبلها للجنوب .
نزلت تحت وجت عيني ع خالتي ف الصاله ولحظى المعاكس ديمه كان هو قاعد معاها ايه هو علاء .
كنت رح نرجع بس خالتي شافتني ونادت عليا.
صفيه بإبتسامه :-
ملاك بنيتي صباح الخير..شن اليوم ان شاء الله وضعك احسن .
ملاك بتوتر وتحاول ماتشوف لعلاء :'
صباح النور خالتي ..الحمدالله احسن .
صفيه :-
لا اليوم واضح عليك وجهك ناير الحمدالله .
عند هالكلمه رفع علاء راسه وجت عيني بعينه وع طول نزل راسه من جديد.
علاء :-
اول ماشفتها قررت اني نهرب ومانتسبب في انها تخش ف هستيريا زي المره الماضيه ..وقفت وكيف مشيت خطوتين وقفتني امي .
صفيه :-
عليوه وليدي وين ماشي العفو كيف قعمزت معاك انا.
علاء من غير مايتلفت :-
لازم نمشي ياامي ضروري عندي شغل.. تعودي ع غيابي الله غالب هكي الحياة .
ملاك:-
سكرت عيوني بوجع ونحاول نسيطر ع دموعي وماتنزل قدام خالتي .
اخر شي كنت نتمناه واكثر شي تمنيته ف حياتي هو أن نقرب منه ونشوف الحياه اللي عايشها وكيف عايش وشن يحب ياكل ويشرب وامتي يرقد وامتي يفيق بس مش بهالطريقه اللي توجع القلب وتمزق الروح .
.
.
.

عند رناد :-
الله هالايام كيف تمر ومن غير شي جديد اكثر من الروتين ف خدمه الحوش والمطبخ باش نفش فيه غلي .
حتي ملاك مسكينه اللي كنت نقضي معاها ف الوقت مرضت مسكينه ويعلم الله بحالها .
اما بقيه العيله فكل واحد عايش حياة متشتته مانعرفش هالعيله عل من الاول هكي واقعهم وهكي حياتهم والا بس من لما افتحت المصيبه اللي اسمها وصيه هيا اللي تسببت ف هالتشتت ..سبحان الله من يشوف هالفيلا من برى والرزق وكل من يسمع بأسم هالعيله يقول ناس عايشين مرتاحين مش ناقصهم شي ..بس ماحدش عالم باللي يصير خلف الابواب.
بوسط افكاري وانا قاعده بداري خش حمزه يحكي ف الفون ويعيط .
حمزه بغضب :-
شن تبوني نديرله نقتله مثلا..تعالو للحوش وتو نتفاهم انا وياكم .
سكت شوي يسمع ف رد الطرف التاني وبعدها رجع لعصبيته :-
تي ماقلت شي انا .خوي صح بس مالياش سلطه عليه انتم عارفينه قداش عصبي ومتع مشاكل وماشي براسه ماكانش يسمع حتي ف كلام بوي لما يسكر راسه بيسمع كلامي انا .
رناد :-
خش لجناحه وقعدت انا نفكر ف سر هالعصبيه اللي عنده ..هالانسان غريب ليش هكي غامض وعصبي ومش معروف كيف يفكر او ليش .
وعشان نتفادى الاحتكاك بيه وهو متعصب ونتجنب غضبه قررت ننزل لتحت قبل مايطلع من داره .
.
.
.
.

عند حمزه :-
خش لداره وهو متعصب غير ملابسه ونزل لتحت طلع من الفيلا للملحق الخارجي اللي كان عباره عن جناح استقبال فيه صاله كبيره .
شوي وصلو عمامه الاتنين وجده ..خشو وقعمزو كلهم ..وكان حمزه قاعد وساكت وواضح انه يغلي من داخل .
زيدان بعياط:-
المجنون اللي اسمه سفيان القو معاه حل ..تي مش خايف الغبي ينتشر الخبر وينزل ف النت كيف بنقابلو الناس بنتنا مخطوفه ليها ايام ومش معروف شن دارو فيها ..الناس لما تاكل وجهنا بالكلام حتي بناويتنا ماعاد يقربهم حد ولاياخذهم فضيحه راهو فضيحه باش تفهمو
هاشم بتعصيب :-
انا مش عارفه كيف لقاها ولاد الحرام ووصلو فيها...والحمار خوك كيف يشرط علينا شرط زي هذا باله ف الشروط بدل مايلم العار ويريحنا .
حمزه بغيض :-
انا نبي حاجه وحده نفهمها ...شن اللي صاير زمان ومانعرفوشي..ليش عمي صبحي هاجر لكندا وماعاد رجع
شافو عمامي لبعض وسكتو وبعدها شافو لجدي اللي كان ساكت وبس طلع عمي زيدان من غير مايحكي ولا كلمه .
اما عمي هاشم فرفع يده واشرلي بصبعه :-
ديرو راي مع خوكم يلم الموضوع قبل ماتكبر المشاكل خير .والا يتحمل مايجيه فاهمين .
طلع عمي هاشم حتي هو وقعد جدي بس اللي طول الوقت ساكت .
شفتله من تحت :-
ع الاقل هما معروفين من يوم يومهم مايحبونا ..باهي انت ماتبيش تحكي اللي صار.
الحاج حميد :-
انا ماعندي مانقول .
حمزه بعصبيه :-
كيف ماعندك ماتقول ..لازم تفهمونا من وين طلعت بنت عمنا هذه طول عمرنا ان عمي صبحي توفي من غير مايتزوج ولا يكون عنده صغار .
وقف جدي من غير مايزيد ولا كلمه وقعد يستند ع عكازه وطلع ..قتله بغضب :'
الباين انكم داسين علينا مصيبه وماتبوش حد يعرفها .
طلعت وراه وقررت نسأل امي لانها اخر امل ليا ... طلعت وشياطين الدنيا تلف قدام وجهي ونتعارك مع حوايج ونبي فاش نفش غلي..
خشيت للحوش واول ماتلاقيت كان مع رناد طالعه من المطبخ .
حمزه بتعصيب :-
امي وين .
رناد بهدوء:-
مانعرفش .
حمزه بعياط :-
امالا شن تعرفي ها ...تهزي غير ف راسك هكي وخلاص
رناد بغضب :'
وانا شن دخلني باش تعصب عليا ..ماشفتهاش من بعد مافطرنا مرات ركبت لدارها.
قربت منها بسرعه وشديتها من يدها وقعدت نهز فيها بغضب :-
تعرفي اقسم بالله مازلتي تعلي صوتك وتستفزيني نقطع رقبتك فاهمه .
ماردت عليا ودموعها اللي نزلو هما اللي ردو ع قسوتي هيا ماكانش ليها ذنب باش نفش غلي فيها..رخيت يدها وتباعدت علاها ..واول ماشفت امي نازله قربت منها.
حمزه بتعصيب :-
امي تعالي للمكتب نبيك ف موضوع ضروري.
خش حمزه للمكتب وخشت وراه صفيه وسكر الباب.
حمزه من غير مقدمات :-
امي شن تعرفي عن عمي صبحي الله يرحمه هو ومرته .
صفيه قعدت تشوفله بصدمه وساكته وقعمزت ع اقرب كرسي ..قرب منها حمزه وقعمز بجنبها وشد يدها:-
ماتقعدي ساكته ياامي بالله عليك ..قوليلي شن تعرفي تربحي.
صفيه بتهرب :-
ماتبيش تقولي شن اللي صاير قبل
حمزه يحاول يسيطر ع اعصابه :-
رح نقولك ياامي ..بس بالاول جاوبيني ع سؤالي.
صفيه بتنهيده :-
لما تزوجت بوك جبران ربي يرحمه كان عمك صبحي عمره 20 سنه ومازال اعزب وقتها وعند عمر 25 سنه سافر لكندا وتزوج وماعاد سمعنا عليه شي لعند بعد 15 سنه قالو توفى .
حمزه يشوفلها بصدمه :-
يعني لما توفي انا عمري تقريبا ف حدود ال20 او ازيد ..امالا ليش كذبو علينا وقالو ميت من لما نحن صغار.
صفيه بلعت ريقها وبتوتر :-
مش عارفه ياولدي مش عارفه ...اللي نعرفه ان الباين ف مشاكل بين عمامك وجدك وعمك صبحي هذا ليش طاش من البلاد وكان بوك بس اللي يتواصل معاه وبعد سفره بعام انحبس ف كندا وطلع بعدها ب4 سنوات حاول بوك يتواصل معاه بس فص ملح وذاب دور عليه بالولايه اللي كان فيها ومالقاه وكان ماليشي اثر .
وبعد سنين وصل لبوك خبر وفاته ومعاها اوراق الثبوتيه وهويته .. وقعد بوك من بعدها يدور ع مرته وصغاره بس ماوصل لاي نتيجه .
حمزه بصدمه :-
يعني اللي قاله سفيان صح ..ونفس الكلام اكدوه عمامي.
صفيه بحيره :-
شن اللي قاله سفيان ياحمزه فهمني ياوليدي.
حمزه بهدوء :-
عمي صبحي عنده بنت ..وحاليا هيا ف ليبيا ومخطوفه واللي خطفاها طالبين فديه وسفيان بس يعرف من اللي خطفاها وكيف يتصرف معاهم.
صفيه بصدمه :-
اللطف ياربي..بنت وخطف وفلوس شن هالكلام ياوليدي تقول ف فيلم هذا ف ليبيا الكلام .
حمزه :-
هذا الواقع ياامي وعمامي قريب ينجنو خايفين من الفضيحه .
صفيه بتوتر:-
باهي وادفعو الفلوس للي خاطفينها وطلعو البنت شن تراجو.
حمزه :-
الكارثه ان ولدك حاط شروط باش يطلعها وانتي عارفه سفيان راسه مسكر.
صفيه بخوف :-
شروط...شروط شني اللي حاطهم سفيان غباره.
حمزه :-
شرط ان جدي يعاود يقسم الرزق ويعطي لعمي صبحي حقه ف الرزق وانهم يثبتو برائته من التهم اللي نسبت ليه ف ليبيا وكندا مافهمت شن يقصد بهالكلام .
صفيه مصدومه ومش قادره تحكي ولا كلمه وبعدها بهدوء غريب :-
باهي شن قررتوا .
حمزه :-
والله ماني عارف ياامي..خوتي مازال مايعرفو بالموضوع انا وسفيان بس نعرفو... والورثه زي ماتعرفي مازال ماتقسمت ولا نقدرو نتصرفو فيها ..بس اكيد حقه من رزق بوي رح تاخذه كامل .
صفيه بإبتسامه :-
ربي يبارك فيكم ياوليدي ف من رباكم ..خلاص تو نحكي مع سفيان ونخليه يجيبها هيا وامها وتاخذ حقها كامل.
حمزه وقف وكيف بيطلع تلفت ع امه :-
بالله ياامي شن تحكي انتي..نقولك ولدك حاط شروط تقوليلي يجيبها تي المشكله مش فينا نحن المشكله ف عمامي انتي عارفه مستحيل يوافقو ع شروط سفيان.
صفيه :-
باهي شن الحل ياحمزه ..بتخلو البنت عندهم ..هذه بنت ومايصير اطول عندهم الله اعلم شن ممكن يصير فيها لازم تلقو حل انت فاهم قصدي كويس
حمزه :-
والله ماني عارف ياامي..تو لين نشوف جدي وعمامي شن يقررو ف هالمصيبه اللي حطنا فيها ولدك ..ناقصنا مصايب نحن .
وبعدها وقف حمزه وتلفت ع امه :-
علاء وين ..خلي نكلمه يحكي معاه هو اكثر واحد متعلق بيه سفيان ويسمع ف كلامه .
صفيه بتنهيده:-
علاء كيف طلع من شوي وقال بيمشي لخوته الليله ..استناه والا اتصل بيه وشوفه .
حمزه بتنهيده :-
مش عارفه هالعيله كيف بنلمها احترت وتعبت منهم كل واحد يجبد ع رايه .
طلع حمزه وركب للجناح متاعه وكيف بيخش لداره ..تراجع ووقف قدام دار رناد :-
ااه ياربي مش عارفه كيف بنفوت ايامي معاها ..كله من طولت لسانها تخلي فيا نتهور ومانسيطر ع اعصابي ..خلي نخش نشوفها بلكي دارت ف روحها حاجه نسون عقله صغير وتفكيره ع قده فالحين غير ف الخيانه وقله الوفاء حرام الواحد يعطيهم قلبه ويأمنهم ع حوشه.
.
.
.
.

عند رناد :-
كانت مقعمزه قدام المرايا وتشوف ف اثار صوابعه ف ذراعها..ودموعها ع خدها :-
المتحجر هذا عديم الاحساس شن اللي درتهوله انا باش يتعصب عليا ويدير هكي .
ناضت سكرت بلوزتها وقعمزت ع السرير وشوي وانفتح الباب وخش حمزه .
رناد بتعصيب ودموعها ع خدها :-
شن جاي تبي تكمل اللي بديته .
حمزه ببرود :-
انتي اللي استفزيتيني.
رناد وقفت وبصوت عالي :-
هاهاها صدقتك ..ماتكذبش ع روحك ياحمزه انت مدايرني زي الاداه اللي تفجر فيها ف غضبك وكرهك لجنس النساء ومش رح ترتاح الا بعد ماتقضي عليا يوم من الايام من كثر ماتكرهني.
حمزه ببرود :-
حاااق ابهرتيني ..غير خلي نقضي عليك قبل وبعدها ساهل نشوف رح نرتاح او لا.
رناد ببرود وضمت ايديها قدام صدرها:-
وشن جاي تبي توا ..بتبرد قلبك لما تشوفني نبكي .
قرب منها حمزه بعصبيه وشدها من فكها وضغط عليه بين يده .
رناد بألم :-
سادك ياحمزه توجع فيا راك ..يوم من الايام بتهشملي وجهي بالعنف متاعك .
حمزه بتعصيب :-
انتي اللي تستفزي فيا ..كم من مره قتلك ماعاد تكلميني ببرود وتقليل قيمه .
رناد :-
انا هذا طبعي هكي ربي خالقني بارده ونتعامل بالبرود طول عمري
حمزه وهو يشوف بعيونها:-
طبعك هذا غيريه والا رح نغيرهولك بطريقتي .
رناد باستفزاز :-
جرب كان تقدر.
حمزه شدها من شعرها وقرب راسها ليه وباسها من شفايفها بقووه وعنف كانت تحاول تفك روحها منه وهو مش راضي يطلقها لعند استطعم الدم ف فمه من شفايفها دفها بقوه لعند طاحت ع السرير وتباعد علاها .
حمزه باشمئزاز :-
مقززه زيك زي باقي بنات جنسك .
طلع حمزه وقربع الباب وراه وع طول استند ع الباب وحاس بكل جسمه يرتعش :-
شن في ياحمزه خيرك ليش هكي صار معاك ..علاش قربت منها علاش بسرعه رح تضعف هكي .
شد شعره بقوه ومشي خش لداره وقربع الباب وراه.
.
.
.

عند سحر :-
كنت قاعده انا وحموده خوي ونقري فيه ف الدار ...شوي سمعت صوت بوي يعيط تحت نزلت نجري .
صبريه :-
ياسرك ماخذيت ياجمعه خليت بوقي..السلسله مش رح تاخذها ولو ع قطع رقبتي هذه اللي قعدتلي من ريحه امي فاهم .
جمعه بغضب :-
تو نوريك انتي جلدك خذي ع الضرب.
وقرب من صبريه وبدي يضرب فيها زي الغول ..نزلت سحر تجري ونزل محمد وقعدو يحاولو يبعدوه وهيا يجلد فيهم كلهم بالسبته .
ومن رحمه ربي انفتح الباب وخش علاء يجري قرب من جمعه وشده ولواله يده وراء ظهره.
علاء بغضب :-
ياسرك يابوي ياسرك ...مش سادك ظلم حرام عليك كرهتهم ف عيشتهم وكرهتني معاهم فيك
جمعه بعياط :-
اطلقني يافاسد اطلقني..امشي اقلب وجهك ياولد صفيه وجبران ..اطلع من حوشي ومادخلكش بيا انا وعيلتي .
علاء بصوت عالي :-
اي عيله اللي تحكي عليها ياجمعه ...انت حرام فيك يكون عندك مراه وصغار .
وبعدها تلفت علاء لخوته :-
مش قلتلكم معاش توقفو ف وجهه باش مايضربكم انتم وخالتي قداش مره نبهت عليكم .
صبريه ببكاء :-
انا اللي منعته يبي ياخذ مني السلسله اللي ورثتها من حياه امي .
علاء بغضب :-
اركبو الفوق كلكم وخلوني معاه بروحي .
ركبو كلهم ..وقعدو يراقبو فيه من فوق ..طلق علاء بوه ..وطلع من جيبه ربطه فلوس لوحها عليه :-
هذه الفلوس حق السلسله اللي كنت تبي تاخذها ..اطلع من هنا وخليهم ف حالهم .
خدي جمعه الفلوس ببرود وهو طالع تلفت ع علاء :-
طول عمرك ولد امك ياعلاء..بس هذا وجهي ان كان مابعدتك ع عيلتي وحرمت عليك حتي تشوفهم .
طلع جمعه وقربع وراه علاء الباب ..وركب لقي خوته وامهم ف الدار .
اول مافتح علاء الباب ..جو عليه خوته يجرو وحضنوه وقعدو يبكو.
علاء بهدوء وابتسامه :-
خلاص ياسركم من البكاء يادلوعين ..مفروض تعودتو ع هالوضع .
وبعدها تلفت ع صبريه :-
خالتي من بعد اذنك عطيني السلسله ندسهالك عندي لان بوي مش رح يخليك ف حالك علي خاطرها .
بعد علاء خوته وقعد يمسح ع شعرهم :-
خليكم هنا ..شوي ونجيكم تمام.
طلع علاء وطلعت وراه سحر تجري :-
وين ماشي ياعلاء .
علاء تلفت علاها :-
شوي ونجي حبيبتي مش معطل
سحر شدت يده :-
ماتمشي وراء بوي ياعلاء..بوي مخلط ع مجرمه ومرات يأذوك بالله عليك .
علاء بهدوء:-
ماتخافي ياقلبي مش رح نعطل ..ف شي لازم نعرفه ورح نرجع وعد .
طلع علاء وقعدت سحر تستني فيه ومر الوقت والساعات وانا مشغوله عليه ونتصل بيه جهازه مسكر ونحاول مانبين قدام امي وحموده خوي.
وعند الساعه 11 بالليل :-
كنت قاعده بالصاله وانفتح الباب وخش علاء .
اول ماشافاته سحر جت عليه تجري .
علاء :-
سحر ليش واعيه لتوا حبيبتي.
سحر :-
ماقدرت نرقد قبل مانطمن عليك ..الحمدالله انك بخير .
علاء وهو حاضنها ولاف يده ع كتفها:-
سلمها اوخيتي الحنونه وباس ع راسها.
سحر :-
غير ملابسك مابين حطيتلك العشي اكيد جعان .
علاء :-
لالا ياقلبي مش خاطري ف شي ..نبي نرقد وخلاص .
سحر :-
باهي تمام ..تصبح ع الف خير حبيبي.
وبعدها دارت سحر دوره ف الحوش وطفت الضيات وخشت لدارها رقدت.
.
.
.

عند سفيان :-
وصل للمستودع وكان معاه بشير ..نزلو ولقو مصطفي قدامهم واقف.
سفيان بغضب :-
تي شن تمد ف وجهك البرا يادماغ ..راسك مربع انت والا شنو .
مصطفي بخوف :-
توا كيف طلعت لما سمعت السياره ..عرفتكم انتم جيتو
سفيان بعصبيه :-
تو ياربع وكان طلع حد تاني فايت من هنا وشافك مش بيبلغ فيك.
مصطفي بخوف :-
اصلا ..اصلا مافيش حد يفوت من هنا مكان مهجور مايخشله حد .
سفيان :-
تعرف مازلت تعاودها راسك نقطعه فاهم ..خلاص امشو توا والصبح تنرزعو قدامي ف الموعد فاهمين .
ركب مصطفي وبشير ف السياره ومشو ...وبعدها خش شفيان للمستودع .
واول ماخش وقف ف مكانه ويشوف بصدمه و......
.
.
.

برايكم شن رح يصير ..وشن الاحداث الجايه ..شن قصه صبحي وليش حمزه يتصرف هكي وملاك شن نهايه حياتها مع سامر.
بإنتظار ارائكم وتعليقاتكم وتوقعاتكم الحلوه .
ملاحظه /
حاولت قدر الامكان نتطرق ف الاحداث..بالاول فكرت نوقف الراويه بس بعدها قررت نكمل ع امل نخففو شوي من الضغط النفسي بالكتابه والقراءه ..نسأل الله السلامه للجميع وربي يحفظكم .
تحياتي اختكم وصديقتكم دائما :-

تعليقات



حجم الخط
+
16
-
تباعد السطور
+
2
-