رواية ولد الخالة الحلقة السادسة 6 كاملة للقراءة والتحميل pdf
 |
| رواية ولد الخالة الحلقة السادسة 6 كاملة للقراءة والتحميل pdf |
لتحميل رواية ولد الخالة كاملة pdf : اضغط هنا
رواية ولد الخالة الحلقة 6 السادسة كاملة مكتوبة
بقلم زهور جمال الدين
الحلقه السادسة
طلع اسامه للجنان وخلى انور فالمربوعه
قام التليفون واتصل بنعمات ...
-نعمات : الو
-اسامه : خيرك محكيتليش
-نعمات : على شنو بنحكيلك
-اسامه : على غرامياتك مع انور ولد خالى
-نعمات : اسامه شن تقول انت 😔😦
نوال تراقب فيها وهيا توشوش فالتليفون ..حست ان
الاجراء اللى خداته صح ..وحست ان نعمات توشوش
مع اسامه
-نعمات : غراميات شنو اللى تحكى عليها انت احترم
نفسك ..وبعدين انور هدا اللى تحكى عليه اقسم بالله
مافى حاجه بينى وبينه
-اسامه : تى باهى باهى
وسكر الخط منغير مايزيد حتى كلمه
_____________________________
بعد ما سكر اسامه الخط وجاه اتصال من بشير صاحبه
-بشير: شن حالك يا راس
-اسامه ينفخ: الحمدلله
-بشير : غير خيرك يا راجل تنفخ
-اسامه : ماخيرنى شى يا راجل ..شن حال الجماعه غادى
-بشير: الجماعه دايريلك استدعاء يا فندى😁..
وضرورى تكون متواجد هنايا فى اسرع وقت
-اسامه : وعلاش دايرلى استدعاء مفهمتش 😳
-بشير : مقدمين فيك بلاغ من تازربو انك ماستلمتش
الوحدة اللى بعتوك ليها
-اسامه : تى مانى مقدم على تغيير المكان ..فيه
جماعه مش احباب انا وياهم
-بشير: خلاص تعالة قولهولهم الكلام هدا بنفسك
-اسامه: من فى غادى فالمعسكر
-بشير : موجود فندى صلاح وفندى غيث
-اسامه : وفندى خليفه وين
-بشير : اهو هنايا لكن طالع الفجر متسقد لتازربو
-اسامه : امالا تعرف كيف ..هانى جاى توة
-بشير: الصباح رباح يا اسامه ..توة ليل
-اسامه : وانضيع من ايدى فندى خليفه ..لا لا اهو
جاى ضرورى حتى هوا يحضر
-بشير : دير رايك
__________________________
البنات فالمطبخ وحدات يديرو فالشاهى ووحدات
ايديرو فالقهوة
-اسراء: نعمات منهوا الولد اللى تحكى عليه خالتى
-نعمات : والله مندرى يا اسراء.. ولد اخت بوى.. لكن
مايسكنش هنايا جاى من امريكا
-خلود : عرفتها .. صح عمى المهدى عنده اخت
تسكن فى امريكا
-نعمات : خلاص هدا ولدها جاى دهوارى لليبيا يبي
يشوف بلاده
-حنان: ريتى هالبلاد اللى الواحد بيدهور فيها
-خشت هند للمطبخ: وخيرها بلادنا يا حنه
-حنان: ماخيرها شى لكن مدامه بيدهور مفروض
مشى لاوروبا عالاقل فيها ماتدهور
-خشت دهيبه: هند سقدى بالعشى خوك اسامه
بيمشى للمعسكر الليله
-نعمات:😳😳😳
______________________________
بدو البنات يوتو فالعشى ...
ونعمات تخمم نكلمه ولا منكلماش ..
فالاخير قررت انها تكلمه ..قامت التليفون وضربت رقمه ..ضبح لين فصل واسامه مردش
اسامه حاط تليفونه فى السيارة ..
وواقف على بوه يتكلم معاه ..قاله انه بيمشى توةة
بالرغم بوه قاله مسافه المعسكر بعيدة قريب ثلاث
ساعات .. لكن اسامه قعد مصر انه يمشى ..وبالفعل
طلع تسقد للمعسكر قبل حتى مايحطو العشى
كلمه صاحبه بشير...
قام اسامه التليفون ورد عليه وماشافش مكالمه نعمات ....
وخشت فى ملف المكالمات واختفت المكالمه الواردة من سطح الشاشه متع التليفون
-اميمه : خيره اسامه مشى يا خالتى
نعمات تشبحلهم تراجى فالجواب لانها تحساب ان
اسامه طلع ومشى لانه تكنطى من موضوعها مع انور
-دهيبه: قالى المعسكر نادوه قالوله تعالة الليله ضرورى
-نوال: مفروض مشى الصبح يا عمتى الطريق فالليل تخوف
نعمات متابعه الهدرزة وشايفه الخوف على اسامه فى عيون نوال واميمه
-سعاد : شنو بتمشو لعرس امل بنت عبدالروؤف ولد عمى
-راضيه : بنمشو امالا شنو امها ماتقعدش علينا بكل ...
وتلفتت لحورية: بتمشى حورية ولا شنو
-حورية : انشالله بنمشو ..احنا ابراهيم يبينا نمشو حتى يوم القفه
-سعاد : نعمات بري معانا مش اديري زى عرس بنت كلثوم بنت خالتى
-نعمات : انشالله
وقعدو يهدرزو الوخيات الليل كله ...
والساعه 12 روحو كلهم لحياشهم ...
وطبعا كل وحدة معاها صوينيه صغيرة عشى راجلها
سخنت راضيه للمهدى عشاه ..وحطتهوله
-نعمات : تصبحو على خير
-المهدى وراضيه : تلاقى الخير ...
وركبت لدارها ...بدلت واتكت فسريرها
لكن ماجاهاش نوم ...
اسامه ماردش عليها ..ومستحيل تعاودله تتحشم
وماتقدرش .. واهو ساكته وتخمم وخلاص
______________________
وصل اسامه لمكان المعسكر
خش للمكتب يلقى فندى خليفه لابس كندرته وموتى روحه بيتسقد ..
-اسامه : باهى لحقت عليك يافندى
-خليفه: يا اسامه ناس بعتوك لمكان ..نمشيله ونبعت
تظلم .. لكن مش ندير من راسى ونقطع خدمتى
-اسامه : يافندى هما اللى قالولى الزم بيتك
-خليفه : منو اللى قالهولك الكلام هدا
-اسامه : فندى فرج ..
-خليفه : باهى يا اسامه ولدى توة انت موقوف
..ولازم نتخد معاك الاجراءات
-اسامة : وانا راضى .. لكن نبيك توقف مع الحق
وتتاكد من كلامى
-خليفه : منغير متوصى ..
وتلفت للباب : يا احمد
-احمد خش : نعم يا فندى
-خليفه : القى القبض على فندى اسامه وحطه فالحبس
-اسامه : منغير مايلقى القبض يا فندى..هانى ملشى
معاه بروحى
وطلع اسامه مع احمد من الغرفه...
-بشير: شنو صار يا اسامه
-اسامه 😁: بيحطونى فدار خالتى
-بشير😁: خش تختخ فالحبوس
-اسامه : تو تشوف يا امسخ 😁😁
خش اسامه للحبس وسكرو عليه
وقعد فندى خليفه يدير فى اتصالاته
_____________________________
-حورية : ياوليدى انت مش ثابت
-انور : لا المرة هادى ثابت وفالاكيد ..كلمى عمتى راضيه غدوة
-حورية : لكن بوك شرط يكلم عمامها الاصليين
-انور : عادى يعطونا رقمهم فالمغرب ونكلموهم مش مشكلة
-حورية : خلى نزيد نرد الشيرة على بوك وبعتالى ساهل
-انور : وبوى شن بيقول ..اصلا هوا من زمان كان
يتمنى عمتى راضيه عندها بنية وياخدهالى
-حوريه : شوى اهو ربي جابهالها
-انور : انتى شن رايك فيها يااام
-حورية : نعمااات .. ريتها كنه كل حبيب..صراحه
البنية ماشالله عليها واى وحدة فالدنيا تتمنى اديرها كنه
-انور فرح براى امه : باهى كويس .. اهم شى عندى
تكونى انتى راضيه يا غالية
-حورية : ربي يعطيك على قيس نيتك يا وليدى ..
بالرغم عارفه الموضوع مش حيمشى بالساهل
-انور : وعلاش يااام
-حورية : هند بنت عمتك دهيبه تبيك يا وليدى ...
ومستحيل تسكت لما تفوتها وتمشى لحوش عمتك راضيه
-انور: اسمعى يااام ..انا هند بنت عمتى اقسم بالله
ماعمرى حطيتها فى بالى ولا يخطرلى انها تكون زوجه ليا
-حورية : بالرغم مفيش بينى وبينه ود .. وبالرغم
البنت عصبية شوى ..لكن والله انها مراءة ونص
وفزاعه وفالحه فالطياب وفى الضمان
-انور: شنو انا بناخد وحدة لانها اطيب ولا اضم
ياام .. انا نبى ناخد وحدة نكون حاس بيها وحاسه
بيا ...مش وحدة دايرة روحها مديرة عليا فالحوش
وكل شى بالتكشيخ ..
-حوريه : دير اللى يريحك ياوليدى..
-انور: سامحينى يااام سهرتك
-حورية : هوا انا خلاااص عيونى قريب يتسكرو
الساعه قريب اثنين ونص
____________________________
اسامه خش الحبس ...
واتكى عالسرير اللى فيه ....
حس انه انظلم من جماعة الشغل متاعه ويبي يحكى لحد
خطرت عليه نعمات ..
قعد يفكر فيها زعما روحت لحوشهم .. ايه اكيد
روحت مش من العادة خالتى راضيه تبات
عندنا ..وزعما هداكه البلى قاعد فالحوش ولا كيف
وينفخ : انا هنايا محبوس اكيدة بياخد راحته
ويتلفت للجهه الثانية: لا لا نعمات متربية ..ووعدتنى معش تنزل
وخلى عاد من ولد خالى اللى طلعلها فالخط توة
حط يده عالتليفون متاعه خطر عليه يتصل بيها
فتح بشير باب الحبس وحطله بطانية جديدة ومخدة
-بشير : تبى نجيبلك حاجه ثانية
-اسامه : لا والله صحيت يا بشير ..
-بشير: خيرك يا اسامه عادية راهو من زمان ننحبسو
ونطلعو ..انت بروحك قداش مرة تعطى فينا عقاب
وتبيتنا ليله هنايا
-اسامه : ومن قالك انا مضايق
-بشير: غير حسيتك متغير ولا
-اسامه : انا متغير
-بشير: واضح عليك ..متنرفز وزى اللى فى حاجه
شاغلاتك
-اسامه : شن حال الكبيدة
-بشير: الحمدلله فخيار الخير.. عيد ميلادها قريب
بنمشيلها انشالله
-اسامه : ربي يجمعكم عن قريب مع بعض يااارب
-بشير: بينى وبينك يا اسامه معش قادر منغيرها .
نبى نجيبها معاى اليوم قبل غدوة
-اسامه: وهيا .. حتى هيا متلهفة عليك هكى زيك
-بشير: اسكت ساكت .. هيا اكثر منى ...انشالله تجربه
الشعور يا اسامه لما حبيبتك تكلم فيك وهيا تبكى
وتقولك انا خايفه عليك
اسامه حط يده تحت راسه وتلفتله :زيد احكيلى
-بشير: ولا لما تبدا مضايق وتبعتلك رسالة تقولك
نحس فيك مضايق ..جوك ينقلب 180 درجه لما
تحس ان فى قلب حاس بيك
-اسامه: ربي يرزقنا انشالله
-بشير😍: تى مش قتلك متغير...زمان ديما تقول برة
وبعيد عليا..اول مرة تقول ربي يرزقنا
-اسامه : يا راجل كبرنا وصلنا لعمر نبو حد يحس بينا
-بشير: الف من يتمنالك يا اسامه .. بس انت تمنى
وحدة وكون صادق معاها
وناض بشير طلع من الغرفه اللى حابس فيها اسامه
وسكر الباب وراه
_________________________
قام اسامه تليفونه وكلم نعمات
شرين التليفون نعمات ردت من ثانى تشريينه
-اسامه : الوو
-نعمات : اهلين
-اسامه : روحتو
-نعمات : روحنا ايه بعد العشى..
-اسامه: وخيرك ساهرة لتوة
-نعمات : نخمم فى كلام قالهولى واحد بكرى
فالتليفون وطلع مشى لخدمته
اسامه يضحك
-نعنات : انت خيرك طلعت قبل العشى
-اسامه : مشيت للمعسكر مكان شغلى .. الباين عليك اتصلتى ولا سألتى
-نعمات : شوف تليفونك تلقانى مكلماتك من لما سمعت انك طلعت
-اسامه 😍😊: بلحقة
وحط تليفونه قدامه وشاف المكالمات يلقاها متصله
-اسامه : والله ماشفتها المكالمه
-نعمات : معليشى معدور الطريق طويلة وانت ماركزتش اكيد
-اسامه : تعرفى منين نكلم فيك توة
-نعمات: من وين
-اسامه : نكلم فيك من الحبس
-نعمات 😳: حبس شنو ..وعلاش حبسوك ..ومنهما اللى حبسوك
-اسامه يضحك : غير بالشوية وحدة وحدة بس ..
هادو صحابى راهو يعنى حبس اخوى مش اكثر
-نعمات : ونعما الصحاب والله ..صحابك ويحبسوك
امالا كانا عدوينك كيف
-اسامه: راهم قتلونى 😁
-نعمات : بعيد السو عليا
-اسامه : خايفه عليا
نعمات سكتت
-اسامه : عادى تقدرى تقولى لا مش حنزعل
-نعمات : وليش بنقول لا ..
-اسامه : تخافى عليا
-نعمات : ايه هلبا
-اسامه : باهى تحكيلى الصدق
-نعمات: اكيد
-اسامه : شن قصه انور ولد خالى
_____________________________
-المهدى: هيا عاجبتهم يشوفو فيها لما تمشى للمعهد
-راضيه: تعرف الموضوع هدا متع يونس جارنا
فوقنى لهلبا حاجات
-المهدى: شنو قصدك
-راضيه: نخاف كانا جونا ناس لنعمات يسالونا على
اصلها وفصلها ...شن بنقولو
-المهدى: لا اصلها لا فصلها ..انا بوها وانتى امها ..اللى
عجبه هكى مرحبتين ..واللى ماعجباش بالسلامه
-راضيه: تبى الحق معتز ولد يونس جارنا والله
مايتعوص ...ادب واخلاق وشهادة
-المهدى: غدوة نقولولها وهيا تقرر
_______________________________
-نعمات : والله ماهناك قصه .. زمان قعد يناشب فيا فترة ..
-اسامه تعصب: باهى
-نعمات : قلتله الصادق يجى من الباب
-اسامه : اهاا
-نعمات : فقالى هوا فترة نتعرفو وناخدو على بعض
وبعتالى ساهل
اسامه: وبعدين
-نعمات : خلاص مفيش بعدين .. انا عارفاته بلعوط
ويبي يعدى وقته ..فقلتله نتعارفو بعظ الخطوبة ..
اسامه لقى كلام انور مطابق لكلام نعمات
معناها نعمات صادقه وماكدبتش
-اسامه : وليش قلتيله هكى
-نعمات: بيش نفتك منه لانى عارفاته دوة وخلاص
-اسامه: لكن تعرفى انك عجبتيه بكلامك هدا ونوى
انه يخطبك
-نعمات :بجد
-اسامه : لويجى يخطبك توافقى
-نعمات تكنطت: انا مش مفكرة فيه حاليا الموضوع هدا
-اسامه : الراى هدا عالجميع ولا غير على انور بس
-نعمات : شن قصدك
-اسامه : قصدى على ايوب
-نعمات : شن تخرف انت .. انا عمرى مافدنفكر فيهم الزوز
هيا بالسلامه توة
-اسامه : خيرك بتسكرى
-نعمات : ايه بنسكر
-اسامه : خليك معايا ❤
نعمات رنت فودانها الكلمه ..وبدت مشاعرها تتحرك
-اسامه : انا بروحى فالحبس متسيبينيش
-نعمات : من عيونى نقعد معاك ليش لا
-اسامه عنده نيه يقوللها ياااربي على طول ..
وفالاخير شد الجملة وماخلاهاش تطلع من فمه
وقعدا نعمات معاه لادن الفجر وبعدها سكرو الخط
_____________________________
اسامه فى هاديكة الحبسة يحسابها ليله بس ....
يضربهالك اربعه ايام
لين الرد جاهم من نازربو وداروله افراج ...
وفى هادوكه الاربعه ايام سهر ومكالمات هوا ونعمات للصبح
هوا يحكى على حياته من لما خش الموال هدا
وهيا تحكى على يومياتها هيا وامها راضيه
وهوا عاد الغيرة تركبه ناااار كانا دكرت اسم ايوب
على فمها
واربعه ايام لما اسامه مهناش ماتلاقتش مع ايوب
لانها مواعدة اسامه ماتنزلش ولا تتعامل معاه
اسامه طلع من الحبس وقال لجماعته انا تعبت
وبنروح لحشونا الحق وتو نرجع
وهما طبعا عطوه الادن
وروح اسامه وصل ادان المغرب
-اسامه : انا وصلت قدام الحوش
-نعمات : باهى الحمدالله على سلامتك
-اسامه : بري بسرعه وتى نفسك امتى بتلحق..قعدتى
طول الطريق تسايري فيا ونا لهيتيش بروحك
-نعمات: مش انت اللى قلتلى سايرينى وقصرى الطريق عليا
-اسامه : قصدك سايرتينى لانى انا طلبت هكى منك
-نعمات : كنت حنسايرك حتى لو كانتش انت تبى
-اسامه : امتى بتمشو انتو
-نعمات : قالت امى الساعه سبعه المغرب ..
-اسامه : امالا هوا هداكه بري وتى روحك ...وزى ماوصيتك
-نعمات : ماتلبسيش لبس عارى ..متحطيش مكياج
اوفر ..باهى فهمنا
-اسامه : ايوووه شاطرة
وخش اسامه لحوشهم سلم على امه وخواته لقاهم
يلبسو ماشيين لعرس امل قريبت امهم
وفى حوش راضية
نعمات تجرى جرى توتى فى روحها
والساعه ع ركبت هيا وامها ومشو للعرس ..راضيه
هيا اللى تسوق
قولى يا حنه حضرو العرس راضيه وخواتها ومرت
خوها وبناتهم ...
حوش دهيبه رفعهم اسامه ...
مدو العشى وتعشو
-راضيه : هيا نعمات ...
وتلفتت لخواتها : ليلتكم سعيدة انا بنروح
البنات قالولهم احنا مازال بنقعدو لين نحضرو
العريس كيف بيخش ونشوفوه ..
ناضت راضيه لبست عبايتها هيا ونعمات وسلمو عليهم وطلعو
ركبو السيارة ..
شرين تليفون راضيه
-راضيه : هادى خالتك سعاد
وردت عليها
-سعاد : راجينا شويا يا راضيه ..حطينى انا ودهيبه
فى حوشها تعبنا الحق
-راضيه : باهى هيا تعالو سقدو
طلعو سعاد ودهيبة فتحو الباب وركبو من الخلف
-نعمات : والله ماصارت يا خالتى تعالى اركبى من قدام
-دهيبه : والله ماك نازلة اهو حتى من تالى انتو
بتنزلونا وبتمشو .. بتقعدى راكبة نازلة
-راضيه : رجلى اليسار يبست
-سعاد : بسم الله عليك يا وخيتى خيرك
اسامه يشبح فيهم من بعيد راكبات والسيارة واقفه
جى ل راضيه : خيرك يا خالتى
-راضيه: وليد اختى رجلى يبست معرفتش خيرها
-اسامه : بخيها بالميه بالك راقدة
-راضيه : لا لازى تقلص ..وبتنزل من السيارة : تعالة
سوق بينا انت يا اسامه البنات مازالو ساعه ثانية
نزلت راضيه وركبت من تالى مع خواتها
وركب اسامه فى كرسى السواق
ونعمات يبست فمكانها
الخوات الثلاثه من تالى يهدرزو ونازلين قرمه
فالعرس اللى كانو فيه
واسامه من قدام هايم فى نعمات ونعمات هايمه فيه
حاطه وشاحها قدام فمها شاداته بايديها ...
قام اسامه تليفونه كتب رساله وحطه ..
وتلفتلها منغير مايلاحظوه امه وخالاته : شوفى الرساله
قرتها مكتوب فيها: نزلى وشاحك ونزلى يدك 😍
نزلت نعنات وشاحها... عجباته هلبا وهوا يسبح القدام
منغير ما يحس بنفسه حط يده اليمين ..على يدها اليسار ....
وتلفتتله نعمات وابتسمت