رواية زوجي النكدي الحلقة الثانية كاملة للقراءة والتحميل pdf
 |
| رواية زوجي النكدي الحلقة الثانية 2 كاملة للقراءة والتحميل pdf |
لتحميل رواية زوجي النكدي كاملة pdf : اضغط هنا
رواية زوجي النكدي الحلقة الثانية كاملة مكتوبة
لارا: اسمعي بنقولك شي مهم ع سجان ..شي لازم تعرفيه!!
انا"بستغراب": شنو ؟
لارا: انا صح بنت عمه بس حبيت نحكيلك شي ...سجان كان يحب بنت خاناته بس هو يحبها عشان يقهرها مشى قال العمتي فاديه ادورله اي بنت ..وهو موافق ...حطت يدها ع كتفي قولتك بينساها ويعيش طبيعي مع مرته الجديده ؟...اكيد ح يوريك الويل لانه توا يحسب البنات كلهن خاينات زي بعضهن 🙁
انا"نحاول نتملك غضبي": شنو دخلني تحكيلي ؟؟...برا الحوش راجل النساوين كلهن وفي حوشي راجلي انا شنو نبي اكثر من هك 😌
لارا"عقدت حواجبها": حبيت نقولك ان الشخص اللي معاك قلبه عند غير ..فنهاية نحن بنات زي بعضنا كان خواتي وبنات عمي غفلوك انا مش ح ندير زيهم
انا"ابتسمت": شكراً مش ح ننساها لك ...توا بعد اذنك بنبدل حوايجي
لارا"ابتسمت بنصر": تمام ...طلعت لارا اطقطق بكعبها العالي ..وانا نغلي من جوا مش عشان هو يحب ولاعشان شي ...نغلي لان انا شنو دخلني يعاملني معامله اخيي هكي !!....حاولت نبان طبيعيه وبديت نسلح ولبست فستان وردي خفيف لعند الركبه وكمامه لعند قبل الكف بشوي قماشه واقف ..وفردت شعري ..بعد شوي جتني جميله
جميله: ليش طلعتي ..في حد زعلك؟
انا :لا الحق كويسات كلهن 😣
جميله"ضحكت": اقطع كواستهن مش توا يبدا عرضهن
انا: اهم شي مش مؤديات بس والباقي عادي😅
جميله: هيا تعالي اقعدي مع ضيوف شوي قبل ليجي راجلك
انا: تمام...هي جيه نلبس اسورتي بس ..
_________________
لارا"تضحك": والله بين عليها هبله مش فاهمه شي😂
مريم"بحزن": مش قتلك الف مره ماتتدخليش في امور سجان ..لو يعلم ح يقطع رقبتك
لارا"بخبث": انا مش نفسك...قبل ماتكمل لارا قصت عليهن جميله
جميله"بتفنيصه": فكونا من المشاكل ..لارا شفتك لحقتي البنت ..شنو قلتي ؟
لارا"بربكه": اوووف ..حتى لما ندير شي كويس نطلع غلطانه ..
جميله: والله حذرتك يا لارا ...انتِ عارفه سجان مايرحمش حتى في امي ..يابال انتِ
لارا"قلبت عيونها وطلعت"
جميله: وانتِ يامريم ما تتقربيش من ساره واجد
مريم: قربنا منها مش عاجبك ..بعدنا مش عاجبك ..شنو نديرو؟
جميله: انا قتلكن بس ...طلعت جميله وهيا تدعي الربي تطلع لارا مش حاكيه شي الساره ...لان ساره كانت تعابير وجها مش طبيعيه ...فكرت جميله تحكي السجان وخلاص ..
اما انا قعدت بملل نستنى في ترويحتي للحوش عندي نيه نهزب ونقتل حتى القتل ...انا واخذني لعبه بس عشان يقهر بنت ثانيه ؟!!...صار يحسبني زي باقي البنات ينضحك عليا ....فات الوقت وجت الساعه10:30 ...جتني بنت صغيره منظرها يهبل
البنت: قالك سجان هيا ..دقيقتين ماتطلعيش نمشي
انا"نفخت": ولايهمك يا سجان ...تبي معامله بالمثل صح
جميله: بسم الله ...كنك اتمتمي.. لارا حكتلك شي ؟
انا"حسيتها تخدع فيا": لا شي ..غير بنروح
جميله: هيا نوصلك لفم الباب ..
طلعت مع جميله لعند الباب
جميله: اسمعي يوم جمعه اتجو من ساعه 8 عشان العيله تلتم راه
انا: ان شاءالله .... طلعت وركبت فسياره وغلي وقهري كله حطيته في تصكيرت الباب
سجان"بصوت عالي": ماعندك حاجه غير ادلفي في هـ الباب😠
انا:سكتت...وفي عقلي الف حاجه
طول طريق ساكتين ماحد تكلم ...بعد ربع ساعه وصلنا
فتحت الباب ونزلت
سجان"بعصبيه": توا نصكره انا الباب اصحي تقربيه🙂
انا: تشوف فيا مشلوله ...خذيت الباب وصكرته بقوه
سجان"حط يديه ع وجها": صبرك يارب ...مانبيش نقتلها صبرك بس!
غميت عليه ووقفت قدام الباب امتع الحوش
سجان: ممكن تتكرمي شوي ..بنفتح الباب
انا: وكان قتلك مانبيش نتكرم🙁
سجان"بعصبيه حط يده ع عبايتي ورفعها فوث ورجع بيا للخلف ..قعدت مصدومه وهو فتح الباب وخش🤷😂
خشيت انا بعده للحوش ومشيت الدار النوم وصكرت الباب بسرعه قبل ما يخش
سجان"بصوت عالي": مش طبيعيه انتِ لازمك علاج😠🔥
انا: ياشقي بهم الناس من شاقي بهمك🙂
سجان"يحاول يهدا": افتحي امه الباب ...خير مانكسره
انا"بعناد": اكسره مش فاتحه
سجان"بعصبيه"
________________________
دانيا"بمكر": عمتي حسناء امتى بتزور ساره؟
حسناء: من امتى ادوري فيها
دانيا: صدق اللي قال ماتحسش بحبك للشخص الا بعد تفقده ..هذا اللي صارلي😔
حسناء"بعدم اقتناع": اكيد السبوع جاي بعد بكره جمعه اكيد في حوش عربهأ
دانيا"بعدم اهتمام": اها .. تمام
بعد طلعت دانيا جت مروه الأمها
مروه"بخوف": الحقي يما
حسناء"انفجعت": شنو خير ؟
مروه: دانيا تسأل فيا ع ساره
حسناء: نزل عليها الحن فجأه خلينا نعرفو نهاية الموضوع هذا شنو
مروه: دانيا مش طالعه الأمها..عميمه اسماء كويسه تهبل😍
حسناء"غارت": كويسه قدامكن ومن خلفكن شيطان والعياذ بالله
مروه: باه رني ع ساره ماحكينش امعاها بكل
حسناء: ذكرتيني ..بدري رنيت ع راجلها قال مش بحذاها ...
مروه"بنزعاج": امتى بديرولي هاتف😑
حسناء"فنصت": اسكتي وانتِ لسانك طاول يسمعك بوك يقتلك
مروه: باه هيا كلميها
حسناء: باه ..اصبري نرتب الملابس قبل
"عندي انا"
سجان: اخر فرصه بتفتحي ولا
انا"خذيت نفس وفتحت الباب": هاااا شنو تبي😒
سجان"بعصبيه": كيف تفهمي بس ؟
انا: مانحبش نشغل عقلي ...لما نحس الموضوع تافه نفوته
سجان"بغضب": طيري من قدامي
انا"ببرود اعصاب": ماعنديش جناحات 😒
سجان"تنرفز جى حط يده ع وجهي واليد الأخرا ع شعري قعد يمرر في يده ع وجهي
سجان"بنظرات يذوبو": بتحترمي نفسك ...كان تحبي شعرك ...وبتحترميني كان تحبي وجهك ..فاهمه
انا..جيت بنرد رن هاتف سجان
سجان: ادعي للي رن عليا لان والله ماكنت ناوي ندير فيك اشوي😠
انا..بعدت بسرعه
سجان"رد": نعم ..اها ..اهي بحذاي ..مد الهاتف
انا: منو؟
سجان"قلب عيونه":امك
خذيت منه الهاتف بسرعه
انا"رقيتلي": خير
امي "بصوت عالي": لووووولي ...واخيراً تريحتي في حياتك
انا"قريب انجلطت": اين هناء ..تحسبيها قصة سندريله هي ..معطيني الواحد مانعرفاش اصلا
امي"متفجأه": بسم الله ..شنو صارلك تحكي هكي امك انا
انا"دموعي فعيوني": صغيره انا مانستهلش اللي درتيه ليا والله مانستاهل
امي"بصوت واطي": اصحي ردي بالك مهما يصير تجيني مطلقه ..والله بابي ماينفتحلك تشمتي فيا النساوين"تقصد ضرتها"
انا"من كثر الصدمه صكرت عليها..وخشيت للدار
سجان: وين رحتي انتِ...مشيت للمطبخ وجيت القيتك مختفيه🙂
انا: ساكته
سجان"برفعت حاجب": نحكي امعك انا😒
انا"مسكه دموعي": واللهي تفوتني ...اشرت ع رقبتي ...واصله لعند هن راه
سجان"سكت وطلع من دار وكأنه يعرف اللي صار"
فاتت الليله ع جميع وكل حد في عقله قصه مختلفه✨
"ثاني يوم الصبح✨"
كان سجان حس بشي ثقيل ع يده وعى فتح عيونه بشوي لقاني راقده ع يده
سجان"بهدؤ": ساره ...ساره... نومها مافيش اثقل منه حاول يبعدني بدون مانوعى ..فتحت عيوني ع لمسات يده
انا"صبيت من سرير بسرعه": ووووه عليا
سجان"منفجع": خير شنو صار😳
انا"بعصبيه": من قالك ارقد جنبي😠
سجان"برفعة حاجب": ماحد قالك ارقدي ع سريري😒
انا: كان وعيتني ...شكله حبيت تستغل الفرصه
سجان"نفخ": ع اساس توعي مجرد ماشخص يقول اسمك🙂
انا: كذبك هذا مش عليا...خليني ساكته ..اصلا اللي زيك مايستحقوش حد يحكي امعهم
سجان"بعصبيه": مسكني من يدي وحط عيونه فعيوني ...هما شهرين بتتحمليهم بعدين بنعزقك الهلك ..وبالمناسبه شنو سامعه عليا عشان تجرئتي وقلتي امثالك😠...امثالي مزالتي ماتعرفيهمش راه ..طلق يدي وخذا منشف ومشى للحمام "حشاكم"
انا"نتوجع": ايي يدي ...من كثر مامسكها بالقوه علمت فيا 💔
قعدت في سرير اشوي بعدين خطرتلي فكره ..صبيت للمطبخ وبديت نحوس فيه طلعت طنجره وخضره ...بندير طاجين ودجاج محمر ...صح صغيره لكن متعلمه التطيب ونعرف نلم 🤷... المهم حطيت الغدى ع نار وطلعت الدار النوم فتحت الدولاب وطلعت توته بسيطه نظامها منفوخه"الماليه عنابيه فيها رسمة دبدوب بالأسود والسروال اسود " شتاء ومحتاجه شي يدفي ❤️.
طقيت ع باب الحمام
انا: ساد كملت الميه الساخنه ..اطلع😒
سجان: دوري وين ادوشي معش طقي عليا
انا: باه ..تمام ....شفت للساعه القيتها 11 وهو خش ساعه10
انا: اكيد الميه ساخنه كملت ولاقريب تكمل ...والله مانفوتها الفرصه
طلعت لعند الباب شفت ع جنب القيت عداد الضي طفيته😈"الضي دير روحه انقطع😂🤷"
سجان"بصوت عالي": مش وقته توا
انا"نضحك بصوت واطي"
سجان: يا ساره ..يا ساره
انا"كملت عقاب ضحكتي ومشيتله نحاول مانضحكش😂💔"
انا"احم احم": نعم
سجان"بعصبيه": ماقتلكش غني انا تقول ديري في تجربة اداء😠
انا: شنو تبي ..بسرعه😁
سجان: سخنيلي اميه ...ميه هنا ثلج وشامبو مزال ع شعري
انا"انسندت ع الباب": يقولو الميه المسقعه اتنشط العقل ..هذا عشمي فيك مش مسخنتلك شي موت😂💔
سجان"يحول في شامبو من عيونه": تمام...مردوده ..كله تمام
سمعته فتح الدوش
انا"في سري": حرام وجعني يدوش بميه مسقعه...بس ماحد قاله يلعب بيا خله يتحمل نتايجة افعاله 😌
المهم رديت للمطبخ فتحت الروشن يضوي عليا ...ماهو الضي مقطوع عاد😂💅.... شفت للطاجين القيته مزال شوي ويطيب ...سمعت باب الحمام انفتح مشيت نجري للدار بنشوف منظره بعد دوش الفرش اللي حصله😂...خشيت للدار شفته لاف منشفه ع وسطة والباقي ع شارع😳❤️🔥
انا:اا...نبي نبي حاجه ...خشيت وقعدت ندور في الدرج
سجان"ينشف في شعره": ما سألتكش شنو تبي🙁
انا: مش مهم عشان مانبيكش تفهمني غلط😒
سجان"قرب مني خطوه": اللي مش غلطان مايبررش😉
جيت بنرد عليه
سجان: اتشوووو..اتشوو
انا"حطيت يدي ع راسي": حييي مرضت🤦
سجان: لا ...اتشوووو..م اا ممرضتش ..اتشووو
انا: واضح مشاءالله عليك😂
سجان"برفعت حاجب": نبي نغير اطلعي ولا تبي تقعدي😕
انا: نن نطلع ...مشيت نجري وضميري يوجع فيا حرام معقوله مرض بسببي!!...لامرض بسبب افعاله مادخلنيش 🙂
__________________________
دانيا: ماما بنطلع انا
اسماء: وين ؟؟
دانيا: بنمشي الصاحبتي ونجي
اسماء: عارفتك مش ح تريحي الا لما اديري مصيبه
دانيا: ليش خايفه والله مافي شي
اسماء: تمام ...ماطوليش
طلعت دانيا من الحوش وهي لابسه ومتكمه وحاطه نضراتها فوق الوشاح ...لقت صاحبتها "إيمان" تستنى فيها في السياره
دانيا"فتحت باب السياره وركبت": شنجو يامني😍
إيمان: ليك وحشه...مختفيه يابنت
دانيا: وقتي كله في الحوش ..
إيمان: سمعت بأختك تزوجت ...ع فكره زعلت ماعزمتنيش!!
دانيا"بحقد": مش اختي ..قصدي اختي منن بويا والعرس درنه ابسرعه
إيمان: قبل زعلت منك جديات😌
دانيا"ابتسمت بخبث": ما تزعليش نعزمك في عرسي😉
إيمان"ضحكت": حاطه حد في راسك اكيد ؟
دانيا: تعرفيني نحب الفعل اكثر من الكلام
إيمان: باه قتيلي عندك مشوار وين ؟
دانيا: تعرفي لارا ؟
إيمان: البنت هذي اعوذ بالله منها العن بنت في بنات الدفعه🙂
دانيا"ضحكت": ذاكرتك اكويسه😌
إيمان: حسستيني متخرجين من عشر سنين...ماليه شي تخرجنا حتى سنه ماطق
دانيا: عارفتك ماتحبيهش البنت بس اكيد عندك رقمها
إيمان"بعد تفكير": والله ناويه ع شي انتِ نعرفك !!... احكي ع شنو ناويه
دانيا"بعد تردد":
_____________________
"في حوش اهل سجان"
فاديه: يا اشرف "للتذكير اشرف ولد عم سجان وصديقه المقرب في نفس الوقت"....
اشرف"يحك في عيونه": موعيتني بدري يامرت عمي شنو تبي 💔💅
فاديه: اعقل شوي بس !!...اين بدري حرام عليك الساعه 12
اشرف"بنعس": انتِ وامي بشنو تقرباً البعضكن😣
فاديه: ع اساس ماتعرفش
اشرف"بغلاسه": جاوبيني والا نمشي
فاديه: تقعد سلفتي..
اشرف: اصلا انتن الأثنين عدوات النوم...نهج من حوشنا ع خاطر بنرقد توعيني يامرات عمي
فاديه"تنرفزت": فكني من جو باب الحاره ...شادلي في كلمة مرات مرات عمي🙂
اشرف: يا مرات عمي اعقلي واحكيلي ليش جيبتني من فجر ربي
فاديه"تنهدت": اكيد صاحبك حكيلك ع الاتفاق اللي بيني وبينه
اشرف ...رفع يده وقعد يعد ع اصابعه ويحكي بصوت واطي
فاديه"تعصبت": شنو ادير توا ؟
اشرف: انعد في اصحابي ماهو ماعرفتش ع اي واحد تحكي😕
فاديه: صبرني يارب ...سجان ..سجان تعرفه ؟
اشرف"بعباطه": اهاااا..كان قلتي من الاول ليش تلفي ودوري
فاديه: المهم تعرف الأتفاق ولا؟
اشرف"بستغراب": تصدقي اول مره نسمع انه متفق امعك ع حاجه ... شنو صاير ؟
فاديه"خذت نفس":
.....يتبع🔥🔥
الاتفاق متع فاديه....خطت دانيا ..نوايا سجان ...حيل ساره ..سكوت حسناء ...حقارة لارا ...تهدئت مريم لِلارا ...وقوف جميله في صف ساره ...كل شي هنا في من ورأه خدع والعيب ..وصدق واحاسيس تلقوهن في الحلقات القادمه❤️....تفاعلو بلايك ورئيك بس ✨
للكاتبة:لينة المنفي🔥🔥